9
Jaun₂ ca₂tsɨ́ꞌ₃ dsa₂ le₂la₂ ján₃:
―A₂dsɨ₂jóꞌ₃ juáꞌ₅ jniá₂, ia₁ chan₂ i₂lɨn₅₄ ꞌniaꞌ₂ i₂tión₂ ja₁lá₃ i₂tsá₃ tɨn₅₄ dsián₃ néꞌ₃ a₂të₅₄ ne₅₄ a₂guá₂ jmɨg₄ a₂jme₃gón₃ Diú₄ quianꞌ₅₄ juɨ₅bí₂ quióꞌ₅.
San Marcos 9:1-13
Ca₂rë₃tsɨ́n₃ Jesús liaꞌ₂ jniái₂
2 Jŋéi₂ jmɨg₄ cang₂ jaun₂ ca₂jŋia₃ Jesús Pe₄, Jacobo, Juan₅₄ në́₃, jaun₂ ca₂i₃léin₂ conꞌ₂ guioin₅₄ juɨ₅ caun₂ máꞌ₂ ŋei₅. Ja₁jaun₂ ca₂jme₃tsɨ́n₃ Jesús liaꞌ₂ jniái₂ të₃ jág₅ rɨinꞌ₅₄.
3 Jaun₂ nɨ₁tsɨnꞌ₅₄ ca₂jnia₃ tág₅ co₂ꞌnéꞌ₅ tiog₂ jau₂ ca₂liaꞌ₂ ꞌi₁jan₂ dsa₂ chan₂ mɨ₂güɨ́g₃ tsá₃ tɨin₂ rang₃ ꞌmɨꞌ₂ a₂jnia₅₄ tiog₂ le₂jaun₂.
4 Jaun₂ ca₂jág₃ ca₂jnia₃ coin₂, Elías quianꞌ₅₄ Moisés, tióin₂ dsia₂₃ jág₁ quiainꞌ₅₄ Jesús.
5 Jaun₂ në́₃ ca₂juáꞌ₂ Pe₄ ca₂tsɨ́ꞌ₃ Jesús:
―Të₅, ¡ꞌe₂ guë́₄ dse₃ liaꞌ₂ tioꞌ₅₄ jniog₄ ja₁lá₃! Në₃ o₁jmogꞌ₅₄ ꞌnɨ₅ tsɨ₁ꞌio₅ láu₃: caun₂ quiángꞌ₂, caun₂ quióꞌ₅ Moisés, caun₂ guëꞌ₂ quióꞌ₅ Elías në́₃.
6 (On₃juaꞌ₅₄ jaun₂ ca₂rë₃líꞌ₄ rëꞌ₂ Pe₄ ꞌe₂ a₂ca₂ꞌŋiai₂, të₂ꞌɨ₂₃ le₂jaun₂, ia₁ a₂góꞌ₅ ꞌŋio₅ lɨn₃ tioinꞌ₅₄).
7 Të₃jë₄ jaun₂ në́₃ ca₂ꞌág₂ jnei₅ ja₁tioinꞌ₅₄, ca₂lioin₂. Jaun₂ jë₄ jnei₅ jaun₂ ca₂néꞌ₂ jág₁ a₂ca₂juáꞌ₂:
―I₂la₂ bá₄ jón₃ quiáng₃, i₂ꞌnióg₃ guë́₄ lɨn₃. Nei₂ ꞌniaꞌ₂ jág₁ quióꞌ₅.
8 Dsɨ₂juɨ₅ le₂jaun₂ jme₁ca₂jág₃ táng₃, tsá₃ ma₃ꞌein₂ chan₂, jŋiaꞌ₅₄ liaꞌ₂ jan₂ ꞌŋiog₅ bá₄ Jesús quiongꞌ₅₄ guë́₄.
9 Jme₁ma₂tioinꞌ₅₄ juɨ₅ ja₂lein₃ sióin₅ máꞌ₂, jaun₂ ca₂jmo₃ Jesús ꞌéiꞌ₃ a₂tsá₃ ꞌein₂ tsɨ́ꞌ₃ ꞌi₁jan₂ ꞌe₂ a₂ca₂jág₃ jaun₂, a₂jmo₃ tei₄ ca₂liaꞌ₂ ca₂jenꞌ₅₄ táng₃ Jaun₅* dsa₂ mɨ₂güɨ́g₃ ne₄ ꞌmú₃.
10 Jaun₂ në́₃ tei₄ bá₄ ca₂jmo₃, tsá₃ ꞌein₂ ca₂tsɨ́ꞌ₃, jŋiaꞌ₅₄ liaꞌ₂ qui₂ca₂ŋɨ́iꞌ₃ rɨinꞌ₅₄ ꞌe₂ jein₅ jág₁ jaun₂ a₂jeinꞌ₅₄ ne₄ ꞌmú₃.
11 Jaun₂ ca₂ŋɨ́iꞌ₃ Jesús:
―¿ꞌE₂ lë₃ juáꞌ₂ të₅juáꞌ₅, Elías bá₄ i₂ca₂tɨ́n₂ jiá₃ le₂ꞌuɨg₅₄?
12 Jaun₂ ca₂ŋag₃:
―Dsónꞌ₂ bá₄ jaun₂ Elías bá₄ i₂jiá₃ le₂ꞌuɨg₅₄, a₂jmógꞌ₃ ca₂le₃jë́₃. ¿ꞌE₂ guëꞌ₂ lë₃ jaun₂ chi₁ton₅ ne₄ Si₂ a₂ca₂tɨ́n₂ Jaun₅* dsa₂ mɨ₂güɨ́g₃ a₂tsá₃ caun₂ dsɨ₃ŋɨ́i₂, tsá₃ guei₃ dsa₂, ꞌliogꞌ₃ dsa₂ ꞌuë₃ co₂ŋɨ́₂?
13 La₁ jniá₂ juáꞌ₅, i₂ma₂guan₅ bá₄ Elías, qui₂ca₂jmógꞌ₂ dsa₂ ca₂liaꞌ₂ lë́₂ dsɨ́₅, liaꞌ₂ conꞌ₂ lë́₅ chi₁ton₅ ne₄ Si₂.
Ca₂jme₃ꞌlión₂ Jesús jan₂ chiꞌ₂ i₂jme₁ꞌen₅₄ i₂ꞌlɨnꞌ₅₄ të₂dsɨ́₅
14 Jme₁co₂lág₂ jaun₂, ca₂dsi₃lein₃ ja₁tionꞌ₅₄ rɨinꞌ₅₄. Jaun₂ ca₂jɨ́in₂ juɨn₅ dsa₂ siánꞌ₂ tionꞌ₅₄ le₃lágꞌ₃ jaun₂. Tionꞌ₅₄ të₅juáꞌ₅ në́₃, tsɨin₂₃ quianꞌ₅₄ ꞌéi₂.
San Marcos 9:14-29
15 Jaun₂ dsɨ₂juɨ₅ jme₁ca₂jág₃ dsa₂ ca₂le₃jɨ́in₃ ca₂jɨ́in₂ Jesús, ca₂i₃góꞌ₃ dsɨ́₅ ꞌŋio₅ lɨn₃, jaun₂ i₃léin₂ i₁cuag₃ Diú₄.
16 Jaun₂ ca₂ŋag₃ Jesús:
―¿ꞌE₂ jág₁ tsɨ₂jɨ́nꞌ₂ ꞌniaꞌ₂ quianꞌ₅₄ dsa₂ në₅?
17 Jaun₂ ca₂ŋag₃ jan₂ dsa₂ i₂ꞌen₅₄ jë₄ jaun₂:
―Të₅, la₂ jŋiag₅₄ chiꞌ₂ quiáng₃ a₂ꞌein₅₄ jme₂dsí₂ ꞌlɨnꞌ₅₄ i₂tsá₃ cuë₅ jmɨg₄ dsia₃ chiꞌ₂ jág₁.
18 Chi₂juaꞌ₂ ꞌa₂ guëꞌ₂ jáꞌ₄ jmógꞌ₂, jmo₂₃ tón₂ ꞌuë₃. Qui₂ꞌuë́ꞌ₅ chiꞌ₂ jan₅ mɨ₂ꞌo₅₄, qui₂quɨgꞌ₂ mɨ₂jan₅₄ në́₃. Jmo₂₃ a₂rë₂ꞌuáꞌ₃ rë₂juɨ́₂ quióꞌ₅ në́₃. Jaun₂ jme₁ma₂në₂juɨ́g₂ jniá₂ dsa₂ i₂quiangꞌ₅₄ a₂jme₁dsein₂₃ i₂ꞌlɨnꞌ₅₄, la₁ tsá₃ tióꞌ₅, juáꞌ₂.
19 Jaun₂ ca₂ŋag₃ Jesús:
―¡ꞌEn₁ jmáꞌ₃ tsá₃ ꞌe₂ ꞌénꞌ₂ ꞌniaꞌ₂ dsa₂ chan₂ jmɨg₄ në₃! ¿Je₂liáꞌ₂ jmɨg₄ jmáꞌ₃ ꞌnióꞌ₅ jmo₅₄ jniá₂ tió₅ dsɨ₃ ŋɨ₅₄ quianꞌ₅₄ ꞌniaꞌ₂? O₂quiain₅ ꞌniaꞌ₂.
20 Jaun₂ ca₂i₁quian₅₄ dsa₂ chiꞌ₂ ca₂o₃jiog₃ ne₅₄. Jaun₂ dsɨ₂juɨ₅ jme₁ca₂jág₃ i₂ꞌlɨnꞌ₅₄ ca₂jɨ́in₂ Jesús, ca₂jmo₃ táng₃ i₃ꞌɨ́n₃ i₂bëꞌ₅₄ qui₂ca₂ba₂ca₂lɨ́inꞌ₂ ꞌuë₃, ꞌuë́ꞌ₅ jan₅ mɨ₂ꞌo₅₄.
21 Jaun₂ ca₂ŋɨ́iꞌ₃ jmei₂ chiꞌ₂:
―¿Jma₂je₂liáꞌ₂ jmɨg₄ jénꞌ₅ le₂në₅?
Jaun₂ ca₂ŋag₃:
―Liaꞌ₂ conꞌ₂ bɨnꞌ₅₄ bá₄ i₂në₅.
22 ꞌLióng₂ ráun₂ ma₂jmo₃ a₂ꞌnio₃ ꞌí₂ néꞌ₃ si₂, ꞌnio₃ ꞌí₂ néꞌ₃ jmɨ́g₃ në́₃, a₂jmógꞌ₂ i₂ꞌlɨnꞌ₅₄ a₂ꞌnio₃ jŋagꞌ₃. La₁ në₁juaꞌ₂ cha₂ a₂lé₂ le₃jmóꞌ₂, dsia₄ ŋéi₂ ꞌauꞌ₂ jniaꞌ₅₄.
23 Jaun₂ ca₂juáꞌ₂ Jesús:
―¿ꞌA₂ bá₄ liaꞌ₂ jaun₂ “chi₂juaꞌ₂ cha₂ a₂lé₂?” Lé₂ bá₄, quióꞌ₅ ca₂le₃jɨ́n₃ i₂ꞌén₂.
24 Dsɨ₂juɨ₅ le₂jaun₂ ca₂ŋag₃ jmei₂ i₂bëꞌ₅₄ ca₂juáꞌ₂ tiá₂:
―¡ꞌÉn₂ bá₄ jniá₂! ¡Jme₁ꞌo₁ jaun₂ le₃ꞌéng₂ guë́₄!
25 Jme₁ca₂jág₃ Jesús caun₂ qui₂ca₂ŋɨꞌ₂ juɨn₅ lɨn₃ guë́₄ dsa₂, jaun₂ guë́₄ ca₂jéin₂ i₂ꞌlɨnꞌ₅₄, ca₂juáꞌ₂:
―Jú₅ ja₁në₅, ꞌne₂ jme₂dsí₂ i₂jmoꞌ₂ con₄ güɨn₄ chiꞌ₂. Ca₂liaꞌ₂ o₁lɨ́gꞌ₂ jmɨg₄ tsá₃ ma₃ꞌúꞌ₄ ja₁në₅, ia₁ jniá₂ juáꞌ₅.
26 Jaun₂ jme₁ca₂o₃ꞌɨ́n₃ i₂ꞌlɨnꞌ₅₄, ca₂jmo₃ guë́₄ cónꞌ₂ ca₂guióꞌ₃ chiꞌ₂ ꞌéi₂, ca₂i₃ꞌɨ́in₃, ca₂ba₂ca₂lɨ́inꞌ₂ ꞌuë₃, ca₂quiog₂ tsá₃ líꞌ₄. “Ca₂join₃ bá₄”, ca₂juáꞌ₂ meiꞌ₂ tsá₃ ca₂le₃jɨ́n₃ dsa₂ i₂ca₂jág₂.
27 Jaun₂ ca₂ꞌɨ́n₃ Jesús mɨ₂gu₂, ca₂chóꞌ₂, jaun₂ ca₂nau₂ chiꞌ₂.
28 Jaun₂ jme₁ma₂ꞌí₅ Jesús caun₂ dsi₂néi₂, ja₁jaun₂ ca₂ŋag₃ chiꞌ₂ dsɨ₂guia₃-tɨ́n₂ conꞌ₂ guioin₅₄:
―¿ꞌE₂ ꞌuɨg₅₄ tsá₃ ca₂tián₃ jniaꞌ₅₄ a₂dsén₄ i₂ꞌlɨnꞌ₅₄?
29 Jaun₂ ca₂ŋag₃ Jesús:
―Jme₂dsí₂ ꞌlɨnꞌ₅₄ i₂le₂në₅ lé₂ le₃ꞌuɨ́in₃ jmáꞌ₃ liaꞌ₂ quianꞌ₅₄ a₂chi₂lénꞌ₂ dsa₂ Diú₄.a
Ca₂ꞌë́₂ táng₃ Jesús jág₁ a₂jóin₂
30 Jme₁ca₂ꞌuɨin₂ juɨg₂ jaun₂, ca₂i₃lein₃ táng₃, ca₂ŋɨi₅ juɨ₅ ꞌuë₃ Galilea, tsá₃ jme₁ꞌnio₃ Jesús le₃ŋi₅ dsa₂,
San Marcos 9:30-50
―Ja₂quián₃ jmɨg₄ a₂jángꞌ₂ dsa₂ jɨ́inꞌ₂ Jaun₅* dsa₂ mɨ₂güɨ́g₃ o₄gú₃ dsa₂ i₂ꞌiog₅₄ jaun₂ jŋagꞌ₃ dsa₂. La₁ a₂ꞌnɨ₅ jmɨg₄, jeinꞌ₅₄ bá₄ táng₃.
32 La₁ chiꞌ₂ dsɨ₂guia₃-tɨ́n₂ në́₃, tsá₃ ca₂ŋɨ́iꞌ₂ ꞌe₂ jein₅ jág₁ a₂juáꞌ₂ le₂jaun₂, tonꞌ₂ tsá₃ ma₃ca₂tiá₃ dsɨ́₅ juaꞌ₅₄ a₂ŋag₃ guë́₄ ꞌe₂ ŋag₃.
Tsɨn₅ chiꞌ₂ dsɨ₂guia₃-tɨ́n₂ ꞌein₂ bá₄ i₂lɨ́n₅ i₂dsen₅₄ guë́₄ conꞌ₂ quiainꞌ₅₄ rɨinꞌ₅₄
33 Jaun₂ ca₂dsi₃léin₂ juɨg₂ Capernaum. Jme₁ma₂tiáinꞌ₅ dsi₂néi₂, jaun₂ ca₂ŋɨ́ꞌ₃ Jesús chiꞌ₂ dsɨ₂guia₃-tɨ́n₂, ca₂juáꞌ₂:
―¿ꞌE₂ jág₁ tsɨ́nꞌ₂ ꞌniaꞌ₂ ja₂nógꞌ₅ le₂ꞌi₄ juɨ₅?
34 La₁ tei₄ bá₄ ca₂tiáinꞌ₂, tsá₃ ꞌe₂ ca₂ŋag₃, ia₁ le₂ꞌi₄ juɨ₅ ja₂lein₃ tsɨin₂₃ ꞌein₂ dsónꞌ₂ i₂lén₂ i₂dsen₅₄ guë́₄ jë₄ quióꞌ₅ rɨinꞌ₅₄.
35 Jaun₂ ca₂guá₂ Jesús, jaun₂ ca₂të́ꞌ₃ ta₁guia₃-tɨ́n₂ ꞌéi₂, jaun₂ ca₂juáꞌ₂:
―Chi₂juaꞌ₂ ꞌein₂ ꞌniaꞌ₂ ꞌnio₃ lén₂ i₂le₂ꞌuɨg₅₄, cán₂ ne₄ juɨ₅, ꞌnióꞌ₅ léin₂ i₂jë₁ca₂tóꞌ₂ quióꞌ₅ ca₂le₃jɨ́n₃, jme₂ti₃ ta₁ ne₄ ca₂le₃jɨ́n₃ rɨinꞌ₅₄.
36 Jaun₂ në́₃ ca₂cain₃ jan₂ guein₂ quián₅ dsa₂, jaun₂ ca₂dsiain₃ ꞌéi₂ jë₄ quióꞌ₅, jaun₂ ca₂jŋauꞌ₃, ca₂juáꞌ₂:
37 ―Juɨ₁ꞌein₂ guë́₃ i₂guen₅ jan₂ guein₂ bëꞌ₅₄ le₂la₂ o₄quió₃ jniá₂, jniá₂ bá₄ guei₂₃. I₂guei₅ jniá₂, on₃juaꞌ₅₄ jmáꞌ₃ jniá₂ guei₂₃. Guein₂₃ le₂jiog₅ i₂ca₂chei₃ jniá₂.
“I₂tsá₃ ꞌiog₅₄ jniog₄, të₂le₃ quián₂ jniog₄ bá₄ chéinꞌ₅”
38 Jaun₂ ca₂juáꞌ₂ Juan₅₄:
―Të₅, në₂jɨn₄ jniaꞌ₅₄ jan₂ dsa₂ i₂në₂ꞌuɨ́nꞌ₂ je₂naꞌ₅₄ quianꞌ₅₄ bí₂ ꞌéiꞌ₃ quiángꞌ₂. Tsá₃ ma₃në₂cuë́₁ jniaꞌ₅₄ jmɨg₄ juaꞌ₅₄ a₂jmo₃ guë́₄ le₂jaun₂, ia₁ tsá₃ ŋɨ₂₃ guëꞌ₂ quianꞌ₅₄ jniog₄.
39 Jaun₂ ca₂juáꞌ₂ Jesús:
―Tsá₃ jmóꞌ₂ ꞌniaꞌ₂ le₂jaun₂, juaꞌ₅₄ a₂jnɨgꞌ₅₄. Ia₁ ꞌi₁jan₂ tsá₃ jmo₅ caun₂ ta₁ juëꞌ₂ liaꞌ₂ conꞌ₂ lë́₅ ꞌéiꞌ₃ quió₃ jniá₂, juaꞌ₅₄ a₂lé₂ le₃dsia₃ ꞌag₃ ꞌlɨgꞌ₅₄ dsɨ₂juɨ₅ le₂jaun₂.
40 Ia₁ juɨ₁ꞌein₂ guë́₃ juɨ₁liaꞌ₂ i₂tsá₃ ꞌiog₅₄ jniog₄, i₂tión₂ të₂le₃ quián₂ jniog₄ bá₄ ꞌéi₂.
41 Ia₁ në₁juaꞌ₂ ꞌein₂ ca₂cuë́ꞌ₃ ꞌniaꞌ₂ tsá₃ a₂léiꞌ₂ o₁jŋiaꞌ₅₄ caun₂ vaso jmɨg₂ bá₄, ia₁ a₂ténꞌ₅ ꞌniaꞌ₂ të₂le₃ quióꞌ₅ I₂rë₂ꞌɨ́n₁* quián₅ Diú₄, a₂dsɨ₂jóꞌ₃ juáꞌ₅ jniá₂, líꞌ₂ bá₄ ꞌliainꞌ₅₄.
A₂goꞌ₂ tsɨ₃sénꞌ₂ dsa₂ dso₄
42 ꞌJuɨ₁ꞌein₂ guë́₃ i₂jmo₅ tsɨ₂sénꞌ₂ dso₄ juɨ₁liaꞌ₂ i₂meꞌ₂ le₂la₂ i₂ꞌén₂ të₂le₃ quió₃ jniá₂, ja₂lɨn₃ guë́₄ dse₃ co₂ŋeiꞌ₅₄ juaꞌ₅₄ a₂tón₂ dsa₂ ne₄ jmɨ₁ŋíꞌ₄ rë₂quein₅ ca₂mɨ́g₂ nɨ₁to₂ dsɨ₂lag₅₄.
43 Në₁juaꞌ₂ mɨ₂gogꞌ₂ jmo₅ a₂tangꞌ₂ dso₄, co₂ŋeiꞌ₅₄ guë́₄ dse₃ ꞌnia₄, ia₁ ja₂lɨn₃ guë́₄ dse₃ dsiángꞌ₄ ꞌnau₅₄ caun₂ gogꞌ₂ ja₁le₃changꞌ₂ co₂tan₅₄, conꞌ₂ guë́₄ a₂jme₁dsiángꞌ₄ guio₃-juɨ́g₃ a₂rë₂ꞌŋia₅ ta₁tɨn₃ gogꞌ₂ ja₁tsá₃ lɨ́gꞌ₂ jmɨg₄ éi₃ si₂.b
45 Në₁juaꞌ₂ mɨ₂tagꞌ₅₄ jmo₅ a₂tangꞌ₂ dso₄, ꞌnia₄ ján₃, ia₁ ja₂lɨn₃ guë́₄ dse₃ dsiángꞌ₄ guiangꞌ₅₄ ja₁le₃changꞌ₂ co₂tan₅₄, liaꞌ₂ conꞌ₂ guë́₄ a₂jme₁dsiángꞌ₄ a₂rë₂ꞌŋia₅ le₃tɨn₃ tagꞌ₅₄ guio₃-juɨ́g₃, ja₁tsá₃ lɨ́gꞌ₂ jmɨg₄ éi₃ si₂.c
47 Chi₂juaꞌ₂ mɨ₂neꞌ₅₄ jmo₅ a₂tangꞌ₂ dso₄, co₂ŋeiꞌ₅₄ guë́₄ dse₃ dsi₄ ján₃, ia₁ ja₂lɨn₃ guë́₄ dse₃ a₂dsiángꞌ₄ a₂tengꞌ₅₄ ca₂mɨ́g₂ mɨ₂neꞌ₅₄ ja₁gon₂ Diú₄, liaꞌ₂ conꞌ₂ guë́₄ a₂jme₁dsiángꞌ₄ a₂rë₂ꞌŋia₅ ta₁tɨn₃ mɨ₂neꞌ₅₄ guio₃-juɨ́g₃:
48 ja₁tsá₃ lɨ́gꞌ₂ jmɨg₄ dsián₃ i₁jaꞌ₅₄,
on₃ guëꞌ₂ si₂ éi₃ në́₃.d
49 ꞌIa₁ ca₂le₃jɨ́n₃ bá₄ ꞌnióꞌ₅ lé₂ ꞌí₁ të₂le₃ quianꞌ₅₄ uɨg₅ a₂lë́₅ liaꞌ₂ lë́₅ si₂.e
50 Dse₃ bá₄ tsɨ₁ŋi₁ të₁liaꞌ₂ ŋiꞌ₅₄, la₁ në₁juaꞌ₂ ca₂ꞌen₃ ŋiꞌ₅₄ tsɨ₁ŋi₁ në́₃, ¿ꞌA₂ bá₄ liaꞌ₂ lé₂ le₃lei₂ táng₃? Jaun₂ juɨ₁lenꞌ₅₄ bá₄ ꞌniaꞌ₂ juɨ₁liaꞌ₂ lë́₅ tsɨ₁ŋi₁. Juɨ₁le₂chanꞌ₂ bá₄ ꞌniaꞌ₂ ꞌei₅ tei₄ quianꞌ₅₄ rɨ́ngꞌ₂ le₂jangꞌ₂ le₂jangꞌ₂.