Ca₂rë₃tsɨ́n₃ ꞌa₂ liaꞌ₂ jniá₂ Jesús
17
Jŋéi₂ jmɨg₄ cang₂ jaun₂, ca₂jŋia₃ Jesús Pe₄, Jacobo,a quianꞌ₅₄ Juan₅₄ rɨnꞌ₅₄ Jacobo në́₃, ca₂i₃léin₂ conꞌ₂ guioin₅₄ caun₂ máꞌ₂ ŋei₅.
2 Ja₁jaun₂ ca₂rë₃tsɨ́n₃ ꞌa₂ liaꞌ₂ jniá₂ Jesús të₃ jág₅ ꞌéi₂. Ne₄ Jesús ca₂jnia₃ tág₅ juɨ₁liaꞌ₂ jniá₂ ꞌiog₂; tsɨnꞌ₅₄ guëꞌ₂ në́₃ ca₂jnia₃ tiog₂ jau₂ ca₂liaꞌ₂ tág₅ lɨn₃.
3 Jaun₂ dsɨ₂juɨ₅ jaun₂ ca₂jnia₃ Moisés quianꞌ₅₄ Elías, tióin₂ dsia₂₃ jág₁ quiainꞌ₅₄ Jesús.
4 Jaun₂ ca₂juáꞌ₂ Pe₄ ca₂tsɨ́ꞌ₃ Jesús:
―Te₁guiꞌ₅₄, ¡ꞌe₂ guë́₄ dse₃ liaꞌ₂ tioꞌ₅₄ jniog₄ ja₁lá₃! Chi₂juaꞌ₂ niogꞌ₂, jmo₅₄ jniá₂ ꞌnɨ₅ tsɨ₁ꞌio₅ láu₃: caun₂ quiángꞌ₂, caun₂ quióꞌ₅ Moisés, caun₂ guëꞌ₂ quióꞌ₅ Elías në́₃.
5 Të₃jë₄ dsia₅ Pe₄ jág₁ jaun₂, ca₂lioin₂ caun₂ jnei₅ tág₅; jaun₂ jë₄ jnei₅ jaun₂ ca₂néꞌ₂ jág₁ a₂juáꞌ₂:
―I₂la₂ bá₄ jón₃ quiáng₃, i₂ŋɨ́₄ lë₃ ꞌnióg₃ guë́₄ lɨn₃. ꞌE₂ bá₄ ꞌŋio₂ dsɨ₃ quiainꞌ₅₄. Nei₂ ꞌniaꞌ₂ jág₁ quióꞌ₅.
6 Jme₁ca₂nág₂ chiꞌ₂ dsɨ₂guia₃-tɨ́n₂ jág₁ jaun₂, ca₂rë₃góꞌ₅ ca₂le₃jë́₃ ca₂i₃gainꞌ₅₄ ꞌuë₃ le₁ꞌéin₂,
7 Jaun₂ ca₂guánꞌ₃ táng₃ Jesús cau₅ quióꞌ₅, ca₂jŋauꞌ₃, jaun₂ ca₂juáꞌ₂:
―Nau₂ ꞌniaꞌ₂; Tsá₃ lë₁jmo₂ ꞌniaꞌ₂ gangꞌ₃.
8 Jaun₂ jme₁ca₂jág₃ táng₃, tsá₃ ma₂ꞌein₂ i₂siánꞌ₂ ca₂jɨ́in₂; jŋiaꞌ₅₄ liaꞌ₂ ꞌŋiog₅ bá₄ Jesús ma₂chéinꞌ₅.
9 Jme₁ja₂lein₃ sióin₅ táng₃ máꞌ₂ jaun₂, ca₂jmo₃ Jesús ꞌéiꞌ₃, ca₂juáꞌ₂:
―Tsá₃ ꞌein₂ juɨgꞌ₅₄ ꞌniaꞌ₂ a₂në₂jagꞌ₅₄ ꞌniaꞌ₂ në₅, ca₂liaꞌ₂ ca₂të́₂ jmɨg₄ jë₁ma₂ca₂jenꞌ₅₄ táng₃ Jaun₅* dsa₂ mɨ₂güɨ́g₃ ne₄ ꞌmú₃.
10 Jaun₂ ca₂ŋag₃ chiꞌ₂ dsɨ₂guia₃-tɨ́n₂ ca₂ŋɨ́iꞌ₃ Jesús:
―Chi₂juaꞌ₂ le₂në₅, ¿ꞌE₂ lë₃ juáꞌ₂ të₅juáꞌ₅, Elías bá₄ i₂jiá₃ le₂ꞌuɨg₅₄?
11 Jaun₂ ca₂ŋag₃ Jesús:
―Dsónꞌ₂ Elías bá₄ jiá₃ le₂ꞌuɨg₅₄, jaun₂ ꞌéi₂ bá₄ jme₃rë́₃ ca₂le₃jë́₃.
12 La₁ juáꞌ₅ jniá₂, i₂ma₂guan₅ bá₄ Elías, la₁ tsá₃ ꞌein₂ ca₂rë₃cuɨg₅. Jaun₂ qui₂ca₂jmógꞌ₂ dsa₂ liaꞌ₂ lë́₂ dsɨ́₅ ca₂le₃jë́₃ guë́₄ ꞌa₂ liaꞌ₂ ꞌnio₃ jmógꞌ₂. Ján₃ bá₄ le₂në₅, Jaun₅ dsa₂ mɨ₂güɨ́g₃ dsɨ₃ŋɨ́i₂ uɨg₅ o₄gú₃ dsa₂ ꞌéi₂.
13 Jaun₂ guë́₄ ca₂rë₃líꞌ₄ chiꞌ₂ dsɨ₂guia₃-tɨ́n₂, Juan₅₄ i₂ca₂chon₃ dsa₂ jmɨg₂ bá₄ ꞌɨn₅ Jesús, a₂juáꞌ₂ le₂jaun₂.
Ca₂jme₃ꞌlión₂ Jesús jan₂ chiꞌ₂ i₂ꞌen₅₄ jme₂dsí₂ ꞌlɨnꞌ₅₄ dsɨ́₅
14 Jme₁ca₂dsi₃lein₃ ja₁tionꞌ₅₄ dsa₂ juɨn₅, jaun₂ ca₂jme₃quián₃ jan₂ dsa₂ ja₁chénꞌ₄ Jesús, jaun₂ ca₂chi₃jné₃ ne₅₄, jaun₂ ca₂juáꞌ₂:
15 ―Te₁guiꞌ₅₄, dsia₄ ŋéi₂ ꞌauꞌ₂ chiꞌ₂ quiáng₃, ꞌŋio₅ lɨn₃ ŋág₅ uɨg₅ lɨ́in₅ dso₄ ꞌei₂; ꞌlióng₂ ráun₂ ma₂ca₂táinꞌ₂ dsi₂si₂, dsi₂jmɨg₂ në́₃.
16 Ma₂i₁jŋiai₅₄ jniá₂ ne₄ chiꞌ₂ dsɨ₂guia₃-tɨ́n₂ quiángꞌ₂, la₁ tsá₃ ca₂tióꞌ₃ jme₃ꞌlió₂.
17 Jaun₂ ca₂ŋag₃ Jesús:
―¡ꞌEn₁ jmáꞌ₃ tsá₃ ꞌe₂ ꞌénꞌ₂ ꞌniaꞌ₂! ¿Je₂liáꞌ₂ jmɨg₄ jmáꞌ₃ ꞌnióꞌ₅ ꞌú₄ quianꞌ₅₄ ꞌniaꞌ₂? ¿Je₂liáꞌ₂ jmɨg₄ jmáꞌ₃ ꞌnióꞌ₅ jmo₅₄ tióꞌ₅ dsɨ₃ quianꞌ₅₄ ꞌniaꞌ₂? I₂jŋia₅ chiꞌ₂ ja₁lá₃.
18 Jaun₂ ca₂jí₂ Jesús ca₂jéin₂ je₂naꞌ₅₄. Jaun₂ ca₂o₃ꞌɨ́in₃ të₂dsɨ́₅ chiꞌ₂ ꞌéi₂, jaun₂ guë́₄ në́₃ ca₂ꞌlóin₂ dsɨ₂juɨ₅ le₂jaun₂.
19 Jme₁co₂lág₂ jaun₂ ca₂dsia₃ chiꞌ₂ dsɨ₂guia₃-tɨ́n₂ jág₁ quianꞌ₅₄ Jesús jë₄ conꞌ₂ guioin₅₄, jaun₂ ca₂ŋɨ́iꞌ₃ ꞌéi₂:
―¿ꞌE₂ ꞌuɨg₅₄ tsá₃ ca₂tián₃ jniaꞌ₅₄ dsén₄ i₂ꞌlɨnꞌ₅₄?
20 Jaun₂ ca₂ŋag₃ Jesús:
―Ne₄ ia₁ a₂ŋɨ́₄ lë₃ ca₂juɨg₄ ꞌénꞌ₂ bá₄ ꞌniaꞌ₂. A₂dsɨ₂jóꞌ₃ juáꞌ₅ jniá₂, juaꞌ₅₄ meiꞌ₂ guë́₃ ꞌénꞌ₂ ꞌniaꞌ₂, tsá₃ a₂nag₅₄ o₁jŋiaꞌ₅₄ conꞌ₂ tí₅ ca₂mɨ́g₂ mɨ₂jon₂ mostaza,b lé₂ le₃jme₁juɨgꞌ₅₄ ꞌniaꞌ₂ juɨ₁liaꞌ₂ máꞌ₂ ó₃: “Jŋiagꞌ₃ ja₁në₅, gua₂ të₂le₃ ca₂taun₂”; máꞌ₂ jaun₂ në́₃ jŋiógꞌ₃ ja₁ꞌëꞌ₂ ꞌniaꞌ₂. ꞌI₁caun₂ tsá₃ ꞌe₂ cha₂ juaꞌ₅₄ a₂tsá₃ lé₂ le₃jmóꞌ₂ ꞌniaꞌ₂ juaꞌ₅₄ meiꞌ₂ guë́₃ le₂jaun₂.c
Ca₂ꞌë́₂ táng₃ Jesús jág₁ a₂jóin₂
22 Të₁liaꞌ₂ i₂nioi₅₄ co₂lë₅ le₂con₂ ja₁tén₄ ꞌuë₃ Galilea, jaun₂ ca₂juáꞌ₂ táng₃ Jesús a₂jángꞌ₂ dsa₂ jɨ́inꞌ₂ Jaun₅* dsa₂ mɨ₂güɨ́g₃ o₄gú₃ dsa₂ mɨ₂güɨ́g₃.
23 Jaun₂ jŋagꞌ₃ dsa₂, la₁ a₂ꞌnɨ₅ jmɨg₄ jaun₂, jeinꞌ₅₄ bá₄ táng₃. Ca₂táꞌ₂ ꞌliaꞌ₂ bá₄ dsɨ́₅ chiꞌ₂ dsɨ₂guia₃-tɨ́n₂ jme₁ca₂nág₂ jág₁ jaun₂.
Ca₂quí₃ ꞌliaꞌ₅₄ ja₁con₂ dsɨ₂tan₅₄ quián₅ guáꞌ₅
24 Jme₁ca₂dsióg₃ Jesús juɨg₂ Capernaum quiainꞌ₅₄ chiꞌ₂ dsɨ₂guia₃-tɨ́n₂, jaun₂ ca₂o₃lén₂ dsa₂ i₂cágꞌ₅ jma₃tɨn₃ ꞌéiꞌ₃ cu₄ dracma* a₂ꞌnióꞌ₅ quióꞌ₅ guáꞌ₅ templo*, jaun₂ dsa₂ ꞌéi₂ ca₂jme₃quiáin₃ con₂ Pe₄, ca₂ŋag₃:
―¿Tsa₁ quí₅ të₅ quiánꞌ₂ ꞌniaꞌ₂ ꞌliaꞌ₅₄ quióꞌ₅ guáꞌ₅?
25 Jaun₂ ca₂ŋag₃ Pe₄:
―Ján₅. Quí₅ bá₄.
Jme₁ca₂ꞌi₃ Pe₄ dsi₂néi₂, jaun₂ ꞌŋiog₅ Jesús deꞌ₂ jŋiá₅ ca₂juáꞌ₂ ca₂tsɨ́ꞌ₃ Pe₄:
―¿ꞌA₂ liaꞌ₂ lɨ́nꞌ₂ ꞌne₂, Si₂mu₅₄? Juɨ₁liaꞌ₂ jan₂ rag₅₄ dsa₂ mɨ₂güɨ́g₃, ¿ꞌEin₂ quióꞌ₅ mɨ₂₃ ꞌliaꞌ₅₄? ¿Quióꞌ₅ dsa₂ go₅₄, o₃ quióꞌ₅ jmáꞌ₃ dsɨ₂nau₂ ꞌe₂?
26 Jaun₂ ca₂ŋag₃ Pe₄:
―Quióꞌ₅ dsɨ₂nau₂ bá₄.
Jaun₂ ca₂juáꞌ₂ táng₃ Jesús ca₂tsɨ́ꞌ₃ ꞌéi₂: