Dsa₂ fariseos quianꞌ₅₄ dsa₂ saduceos mɨ₂₃ ne₄ Jesús a₂jmo₃ ꞌéi₂ caun₂ léi₄ juëꞌ₂
16
Dsa₂ fariseos* quianꞌ₅₄ dsa₂ saduceos* i₁lein₅₄ i₁jɨin₅₄ Jesús, ia₁ a₂ꞌnoꞌ₂ juɨ₅ ꞌa₂ liaꞌ₂ tiainꞌ₃ Jesús quianꞌ₅₄ jág₁; jaun₂ ca₂mɨ₃ a₂jmo₃ ꞌéi₂ caun₂ léi₄ a₂já₅ gueiꞌ₅₄ i₂juɨ́g₃.
2 La₁ ca₂ŋag₃ Jesús:
―[ꞌNiaꞌ₂ tɨngꞌ₂ jágꞌ₁ të₂le₃ ca₂ꞌláu₂ jme₁lɨn₅₄, juáꞌ₂ ꞌniaꞌ₂: “Dse₃ bá₄ ꞌei₅ táng₃ ꞌióg₃, ia₁ guéin₂ bá₄ jniá₂ gueiꞌ₅₄ mɨ₂güɨ́g₃.”
3 Ján₃ bá₄ juáꞌ₂ ꞌniaꞌ₂ jme₁lɨn₅₄ juɨ₁liaꞌ₂ të₃ o₃ꞌiog₂, “Tiáꞌ₃ jmɨ́₅ në₃, ia₁ guéin₂ jniá₂ jnei₅ tioꞌ₅₄ gueiꞌ₅₄.”Ŋiꞌ₅₄ bá₄ ꞌniaꞌ₂ ꞌa₂ liaꞌ₂ juaꞌ₅₄ ꞌe₂ jein₅ jág₁ ꞌa₂ liaꞌ₂ jniá₂ gueiꞌ₅₄, jŋiaꞌ₅₄ liaꞌ₂ ꞌe₂ a₂të₅ neꞌ₅₄ ꞌniaꞌ₂ jmɨg₄ në₃ bá₄, tsá₃ ŋiꞌ₅₄ ꞌniaꞌ₂ ꞌe₂ jein₅ jág₁.]a
4 Tsɨ₁jon₂ dsa₂ ꞌlɨnꞌ₅₄ i₂tsá₃ nag₃ la₂, mɨ₂₃ a₂jmo₅₄ jniá₂ caun₂ léi₄ a₂o₂dsang₂. La₁ ꞌi₁caun₂ léi₄ siáꞌ₂ tsá₃ ꞌe₂ ŋeꞌ₂ ꞌniaꞌ₂, jŋiaꞌ₅₄ liaꞌ₂ caun₂ léi₄ juɨ₁liaꞌ₂ a₂ca₂i₃ŋɨ́₂ Jonás bá₄.
Jaun₂ ca₂tén₂ bá₄ Jesús dsa₂ ꞌéi₂, ca₂ŋáiꞌ₃.
Levadura quióꞌ₅ dsa₂ fariseos
5 Jme₁ca₂ꞌan₂ chiꞌ₂ dsɨ₂guia₃-tɨ́n₂ jmɨ₁ŋíꞌ₄, ca₂dsáuꞌ₃ dsɨ́₅ tsá₃ ꞌe₂ i₁ŋíꞌ₄ le₁quian₅ guë́ꞌ₃.
6 Jaun₂ ca₂juáꞌ₂ Jesús:
―Jmo₄ ꞌniaꞌ₂ ꞌí₁ jaun₂ tsá₃ le₃tɨnꞌ₂ ꞌniaꞌ₂ juáꞌ₅ a₂jme₂tag₅ dsa₂ fariseos*, dsa₂ saduceos në́₃. Ia₁ juáꞌ₅ quióꞌ₅ lë́₅ liaꞌ₂ lë́₅ juɨ₁ levadura*.
7 Jaun₂ ca₂dsia₃ chiꞌ₂ dsɨ₂guia₃-tɨ́n₂ jág₁ tsɨ́ꞌ₅ rɨinꞌ₅₄:
―Ia₁ tsá₃ i₁ŋíꞌ₄ le₁quian₁ bá₄ jniog₄, jaun₂ bá₄ juáꞌ₂ le₂në₅.
8 La₁ ca₂rë₃líꞌ₄ bá₄ Jesús ꞌe₂ jág₁ dsia₂₃, jaun₂ ca₂juáꞌ₂:
―¿ꞌE₂ lë₃ juáꞌ₂ ꞌniaꞌ₂ tsá₃ le₁quianꞌ₄ i₁ŋíꞌ₄? ¡ꞌE₂ guë́₄ ca₂juɨg₄ ꞌénꞌ₂ ꞌniaꞌ₂!
9 ¿ꞌE₂? ¿Tsa₁ ma₂ca₂rë₃ŋɨ́ꞌ₂ ꞌniaꞌ₂? ¿Tsa₁ ma₃dsá₂ ꞌauꞌ₂ ꞌniaꞌ₂ liaꞌ₂ conꞌ₂ ca₂dsioꞌ₄ jniá₂ ꞌŋiá₂ i₁ŋíꞌ₄ ca₂lɨn₅ quióꞌ₅ ꞌŋiá₂ mei₅ dsa₂, on₃ guëꞌ₂ dsá₂ ꞌauꞌ₂ ꞌniaꞌ₂ je₂liáꞌ₂ tsɨ₁mɨꞌ₂ ꞌnau₅₄ a₂ca₂cagꞌ₅₄ táng₃ ꞌniaꞌ₂?
10 ¿On₃ guëꞌ₂ dsá₂ ꞌauꞌ₂ ꞌniaꞌ₂ liaꞌ₂ conꞌ₂ ca₂dsioꞌ₄ jniá₂ guio₃ i₁ŋíꞌ₄ ca₂lɨn₅ quióꞌ₅ quén₂ mei₅ dsa₂, on₃ guëꞌ₂ dsá₂ ꞌauꞌ₂ ꞌniaꞌ₂ je₂liáꞌ₂ tsɨ₁mɨꞌ₂ ꞌnau₅₄ a₂ca₂chóng₂ a₂ca₂cagꞌ₅₄ ꞌniaꞌ₂ në́₃?
11 ¿ꞌA₂ bá₄ liaꞌ₂ ŋɨ́₄ tsá₃ rë₂lenꞌ₅₄ ꞌniaꞌ₂? On₃juaꞌ₅₄ i₁ŋíꞌ₄ ꞌë₅ jniá₂ jme₁në₂juáꞌ₃ jmo₄ ꞌniaꞌ₂ ꞌí₁ quianꞌ₅₄ levadura quióꞌ₅ dsa₂ fariseos quianꞌ₅₄ dsa₂ saduceos.
12 Jaun₂ guë́₄ ca₂ŋɨ́ꞌ₂ dsɨ́₅ ꞌéi₂ a₂ꞌë₅ Jesús jaun₂, on₃juaꞌ₅₄ a₂ca₂tɨ́in₂ jmo₃ ꞌí₁ juɨ₁liaꞌ₂ juɨ₁ levadura a₂cónꞌ₂ dsa₂ i₁ŋíꞌ₄, a₂ca₂tɨ́in₂ jmo₃ ꞌí₁ ꞌa₂ liaꞌ₂ lë́₅ juáꞌ₅ a₂jme₂tag₅ dsa₂ fariseos quianꞌ₅₄ dsa₂ saduceos bá₄.
Ca₂juáꞌ₂ Pe₄ liaꞌ₂ tí₅ jág₁ dsau₅ a₂lɨ́n₅ Jesús dsa₂ I₂rë₂ꞌɨ́n₁ quián₅ Diú₄
13 Jme₁ca₂dsióg₃ Jesús ma₂quián₅ juɨg₂ Cesarea ja₁tén₄ Filipo, jaun₂ ca₂ŋɨ́iꞌ₃ chiꞌ₂ dsɨ₂guia₃-tɨ́n₂ quiáin₅:
―¿ꞌEin₂ lɨ́n₅ Jaun₅* dsa₂ mɨ₂güɨ́g₃, juáꞌ₂ dsa₂?
14 Jaun₂ ca₂ŋag₃ ꞌéi₂:
―I₂lɨn₅₄ dsa₂ juáꞌ₂ a₂lɨ́ngꞌ₅ Juan₅₄ i₂chon₅ dsa₂ jmɨg₂; i₂siánꞌ₂ guëꞌ₂ juáꞌ₂ a₂lɨ́ngꞌ₅ Elías; i₂lɨn₅₄ guëꞌ₂ juáꞌ₂ táng₃ a₂lɨ́ngꞌ₅ Jeremías, o₃ jan₂ i₂siánꞌ₂ i₂já₅ ꞌë́₂ jág₁ quióꞌ₅ Diú₄.
15 Jaun₂ ca₂ŋag₃ Jesús:
―¿ꞌNiaꞌ₂ guëꞌ₂ në́₃? ¿ꞌE₂ juáꞌ₂ ꞌniaꞌ₂ ꞌein₂ lɨ́n₅ jniá₂?
16 Jaun₂ ca₂ŋag₃ Si₂mu₅₄ Pe₄:
―ꞌNe₂ lɨ́ngꞌ₅ dsa₂ I₂rë₂ꞌɨ́n₁*, Ja₁ŋiꞌ₅₄ Diú₄ jénꞌ₃.
17 Jaun₂ ca₂ŋag₃ Jesús:
―ꞌE₂ guë́₄ dsenꞌ₃ ꞌne₂, Si₂mu₅₄, ja₁ŋiꞌ₅₄ Jonás, ia₁ ꞌi₁jan₂ dsa₂ mɨ₂güɨ́g₃ tsá₃ në₂jme₃jnia₅ neꞌ₅₄ a₂në₅, jŋiaꞌ₅₄ liaꞌ₂ Ŋeꞌ₃ jniá₂ i₂guá₅ i₂juɨ́g₃ bá₄.
18 Jaun₂ juáꞌ₅ jniá₂ juɨ́g₂ ꞌne₂, a₂ma₂chengꞌ₂ Pedro,b jaun₂ ne₄ nɨ₁ꞌlau₂ la₂c jmógꞌ₄ jniá₂ guáꞌ₅ quió₃, jaun₂ ca₂liaꞌ₂ jŋiaꞌ₅₄ i₂ꞌio₅ bí₂ ꞌmú₃ tsá₃ le₃quɨꞌ₅₄ jmɨg₄ juaꞌ₅₄ a₂tióꞌ₃ quiongꞌ₅₄ quianꞌ₅₄ mai₅₄ quióꞌ₅.
19 Jaun₂ o₄gogꞌ₂ ꞌne₂ dsia₅₄ jniá₂ jág₁ dse₃ quió₃ a₂lë́₅ co₂ꞌnióꞌ₄ ŋí₁ llave a₂niá₃ ja₁dsɨ₃tionꞌ₅₄ dsa₂ ja₁gon₂ Diú₄. Ca₂le₃jë́₃ ꞌe₂ a₂tsá₃ cuë́ꞌ₂ ꞌne₂ jmɨg₄ ne₄ guaꞌ₅₄ ꞌuë₃ la₂ liaꞌ₂ conꞌ₂ lë́₅ jág₁ quió₃, ján₃ bá₄ le₂jaun₂ tsá₃ lé₂ gueiꞌ₅₄ i₂juɨ́g₃; ján₃ bá₄ le₂jaun₂ juɨ₁liaꞌ₂ a₂cuë́ꞌ₂ ꞌne₂ jmɨg₄ guaꞌ₅₄ ꞌuë₃ la₂ liaꞌ₂ conꞌ₂ lë́₅ jág₁ quió₃, a₂jaun₂ bá₄ lé₂ gueiꞌ₅₄ i₂juɨ́g₃ ján₃.
20 Jaun₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅ a₂tsá₃ ꞌein₂ tsɨ́ꞌ₃ ꞌi₁jan₂ a₂lɨ́in₅ I₂rë₂ꞌɨ́n₁* quián₅ Diú₄.
Ca₂ꞌë́₂ Jesús jág₁ a₂jóin₂
21 Të₂le₃ ne₄ juɨ₅ ja₁ŋó₄ jaun₂, ca₂jme₃lióg₃ Jesús ca₂ꞌë́₂ jág₁ ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅, a₂tion₅₄ dsó₃ juɨ₅ Jerusalén, ja₁dsɨ₃ŋɨ́i₂ ꞌlióng₂ ne₅₄ jmɨ₁uɨg₅ a₂jmógꞌ₂ dsa₂ canꞌ₅₄ quián₅ guáꞌ₅, quianꞌ₅₄ juɨg₅₄ jme₂dsa₂, të₅juáꞌ₅ në́₃. Jaun₂ ca₂juáꞌ₂ a₂jŋagꞌ₃ dsa₂, la₁ a₂ꞌnɨ₅ jmɨg₄ jaun₂, jeinꞌ₅₄ bá₄ táng₃.
22 Jaun₂ Pe₄ në́₃ ca₂jiog₃ le₃cau₅, jaun₂ ca₂jme₃lióg₃ a₂të₂néiꞌ₂ a₂jme₁jnéi₂ juɨ₅, ca₂juáꞌ₂:
―¡Tsá₃ o₁le₅₄ le₂në₅, Te₁guiꞌ₅₄! ¡O₁lɨ́gꞌ₂ bá₄ tsá₃ juɨ₁dsi₂ŋɨ́ꞌ₂ ꞌne₂ le₂në₅!
23 La₁ Jesús në́₃, ca₂jéinꞌ₃ le₂caꞌ₃, jaun₂ ca₂juáꞌ₂ ca₂tsɨ́ꞌ₃ Pe₄:
―¡Jŋiagꞌ₃ cau₅ quió₃, Satanás! Jŋiaꞌ₅₄ jnɨꞌ₂ bá₄ ꞌne₂ juɨ₅ quió₃, ia₁ tsá₃ le₂jaun₂ dsɨ₂jiog₅ ꞌauꞌ₂ juɨ₁liaꞌ₂ dsɨ₂jiog₅ dsɨ́₅ Diú₄. Ia₁ liaꞌ₂ dsɨ₂jiog₅ dsɨ́₅ dsa₂ mɨ₂güɨ́g₃ bá₄ dsɨ₂jiog₅ ꞌauꞌ₂.
24 Jaun₂ ca₂juáꞌ₂ Jesús ca₂tsɨ́ꞌ₃ ca₂le₃jɨ́n₃ chiꞌ₂ dsɨ₂guia₃-tɨ́n₂ quiáin₅:
―Chi₂juaꞌ₂ ꞌein₂ ꞌnio₃ ꞌéin₃ jniá₂, co₂dsia₅ juɨ₁dsi₂ꞌén₂ dsɨ́₅ guioin₅₄, juɨ₁jmo₁₂ co₂jŋiai₅₄ a₂jóin₂,d juɨ₁jia₂ chi₁coꞌ₅₄ quió₃.
25 Ia₁ juɨ₁ꞌein₂ guë́₃ i₂tsá₃ ꞌnio₃ jón₂ ia₁ a₂ꞌɨ́n₅ dsɨ́₅ le₃chain₂ dse₃ mɨ₂güɨ́g₃ la₂, dsɨ₂ꞌén₂ quióꞌ₅. La₁ juɨ₁ꞌein₂ guë́₃ i₂ténꞌ₂ dsɨ́₅ gue₃ ꞌmú₃ ꞌuɨg₅₄ quió₃ jniá₂, le₃chain₂ dse₃ mɨ₂güɨ́g₃ caun₂.
26 Ia₁, ¿ꞌe₂ bá₄ ta₁ jmo₃ a₂líꞌ₂ dsa₂ ꞌŋio₅ lɨn₃ ne₄ guaꞌ₅₄ ꞌuë₃ la₂, në₁juaꞌ₂ dsɨ₃ꞌén₂ bá₄ guëꞌ₂ jme₂dsí₂ quióꞌ₅ mɨ₂güɨ́g₃ caun₂? ¿O₃ je₂liáꞌ₂ lé₂ le₃quí₃ dsa₂ ꞌliaꞌ₅₄ ia₁jaun₂ tɨ́nꞌ₄ jme₂dsí₂ quióꞌ₅?
27 Ia₁ Jaun₅* dsa₂ mɨ₂güɨ́g₃ jŋióiꞌ₂ quianꞌ₅₄ juɨ₅bí₂ jláꞌ₁ quióꞌ₅ Jmei₂, quianꞌ₅₄ ángeles quiáin₅, ja₃qui₅ ꞌlianꞌ₅₄ dsa₂ ꞌa₂ conꞌ₂ jŋiaꞌ₅₄ niog₅ ca₂jmo₃.
28 A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, chan₂ i₂lɨn₅₄ juɨ₁liaꞌ₂ i₂tionꞌ₅₄ ja₁lá₃ tsá₃ dsián₃ ca₂liaꞌ₂ ca₂të́₂ ne₅₄ jɨ́in₂ Jaun₅ dsa₂ mɨ₂güɨ́g₃ a₂jŋióiꞌ₂ lɨ́in₅ rag₅₄ a₂qui₃dsɨ₂₃ ꞌéiꞌ₃.