Ca₂jme₃tag₅ Jesús a₂tsá₃ jmo₃ dsa₂ a₂jŋiaꞌ₅₄ conꞌ₂ dse₃ le₁ꞌág₄ o₁ne₁
12
Të₃jë₄ jaun₂, të₂le₃ mei₅ bá₄ dsa₂ i₂ca₂ŋɨꞌ₂, ca₂liaꞌ₂ qui₂co₂ꞌliainꞌ₂ rɨinꞌ₅₄. Jaun₂ Jesús në́₃ jŋiá₅ deꞌ₂ dsa₂ i₂quiainꞌ₅₄ bá₄ ca₂tsɨ́ꞌ₃:
―Të₃ŋiꞌ₅₄ ꞌniaꞌ₂ quianꞌ₅₄ juɨ₅ liaꞌ₂ lë́₅ quian₅ dsa₂ fariseos*a co₂ꞌnióꞌ₄ i₂lë₁jmo₅-dsáu₅ o₁ne₁.
San Lucas 12:1-31
2 Ia₁ ꞌi₁caun₂ a₂rë₂ꞌma₄ juaꞌ₅₄ lɨ́n₂ dsa₂ a₂tsá₃ le₃jniá₂, tion₅₄ bá₄ rë₂jniá₂; ján₃ bá₄ tsá₃ cha₂ ꞌi₁caun₂ a₂rë₂jlë₅ juaꞌ₅₄ lɨ́n₂ dsa₂ a₂tsá₃ ꞌein₂ le₃ŋi₅, tion₅₄ bá₄ rë₃ŋi₅ dsa₂.
3 Jaun₂ në́₃, ca₂le₃jë́₃ ꞌe₂ a₂dsia₅ dsa₂ jë₄ qui₁néꞌ₃, jiá₃ bá₄ le₃ja₁jniá₂ si₂. Le₂jaun₂ juɨ₁liaꞌ₂ jág₁ a₂dsia₅ dsa₂ jë₄ të₃coꞌ₅₄ a₂qui₂le₁jnág₅ ꞌné₅, a₂dsɨ₃ꞌag₅ bá₄ jaun₂.b
I₂ꞌein₂ ca₂tɨ́n₂ dsa₂ jme₃gain₃
4 ꞌꞌNiaꞌ₂ a₂mei₅₄ quiáng₃, juɨ́g₂ jniá₂ ꞌniaꞌ₂, tsá₃ jmo₂ ꞌniaꞌ₂ gangꞌ₃ i₂jme₂dsian₅ nɨ₁ŋɨ́₅, ia₁ tsá₃ ma₃a₂siáꞌ₂ juaꞌ₅₄ a₂ꞌio₂₃ guë́₄ bí₂ jmo₃.
5 Jaun₂ la₂ juáꞌ₅ jniá₂ ꞌein₂ dsónꞌ₂ i₂ca₂tɨ́nꞌ₂ ꞌniaꞌ₂ jme₁gangꞌ₃: i₂ꞌéi₂ bá₄ jme₁ganꞌ₃ ꞌniaꞌ₂ jmo₄ i₂ꞌio₅ bí₂, jme₃dsiog₂₃, tonꞌ₂ ꞌio₂₃ bí₂ ꞌliogꞌ₃ ja₁ꞌlɨgꞌ₅₄ ján₃.
6 ¿Tsa₁ ꞌnɨ₅ dsa₂ ꞌŋiá₂ i₁tan₅ tei₄ quianꞌ₅₄ tɨn₃ ŋí₁ guéin₂? La₁ ꞌi₁jan₂ ꞌéi₂ tsá₃ dsɨ₂ꞌén₂ dsɨ́₅ Diú₄.
7 Jag₄ ꞌniaꞌ₂ jaun₂, ꞌŋio₅ lɨn₃ guë́₄ dsan₂ dsɨ́₅ Diú₄ ꞌniaꞌ₂, le₂jiog₅ jŋi₂ dseiꞌ₂ ꞌniaꞌ₂, ma₂ŋi₅ bá₄ Diú₄ je₂liáꞌ₂ mɨꞌ₂ tí₅. Jaun₂ tsá₃ jmo₂ ꞌniaꞌ₂ gangꞌ₃, ia₁ ꞌŋio₅ guë́₄ quenꞌ₄ ꞌniaꞌ₂ liaꞌ₂ conꞌ₂ guë́₄ juɨn₅ i₁tan₅.
Dsa₂ i₂jme₂jnia₅ cuɨin₂₃ Jesús
(Matt 10:32-33; 12:32; 10:19-20)
8 ꞌJuáꞌ₅ jniá₂, ca₂le₃jɨ́n₃ i₂jme₂jnia₅ ja₁con₂ dsa₂ mɨ₂güɨ́g₃ a₂cuɨg₂₃ jniá₂, ján₃ bá₄ le₂jaun₂ Jaun₅* dsa₂ mɨ₂güɨ́g₃ ꞌag₃ jme₃jniog₂₃ a₂cuɨg₂₃ ja₁con₂ ca₂le₃jɨ́n₃ ángeles quián₅ Diú₄.
9 La₁ juɨ₁liaꞌ₂ i₂tsá₃ ꞌag₅ a₂cuɨg₂₃ jniá₂ ja₁con₂ dsa₂ mɨ₂güɨ́g₃, ján₃ bá₄ le₂jaun₂ tsá₃ ꞌɨ́in₄ jniá₂ a₂cuɨ́in₅ ja₁con₂ ángeles quián₅ Diú₄.
10 Ia₁ juɨ₁ꞌein₂ guë́₃ i₂ꞌɨn₅ ꞌlɨgꞌ₅₄ Jaun₅ dsa₂ mɨ₂güɨ́g₃, cha₂ bá₄ o₂ꞌén₂ dso₄ quióꞌ₅. La₁ juɨ₁liaꞌ₂ i₂juáꞌ₂ ꞌlɨgꞌ₅₄ ꞌɨin₂₃ Jme₂dsí₂ Jŋió₅, tsá₃ ma₃o₂ꞌén₂ dso₄ cha₂.
11 Jë₁ma₂ca₂jŋia₃ dsa₂ ꞌniaꞌ₂ ne₄ dsɨ₂tan₅₄ quián₅ guáꞌ₅, o₃ jë₁ma₂ca₂jiog₃ ne₄ i₂con₂ ꞌí₁, ne₄ dsa₂ i₂qui₂dsɨ₅ ꞌéiꞌ₃ në́₃, tsá₃ jmóꞌ₂ ꞌniaꞌ₂ ꞌɨ₅ ꞌauꞌ₂ juaꞌ₅₄ tsá₃ ŋiꞌ₅₄ ꞌa₂ liaꞌ₂ ŋagꞌ₅₄, ꞌo₃ ꞌe₂ juɨgꞌ₅₄.
12 Ia₁ ꞌŋiog₅ bá₄ Jme₂dsí₂ Jŋió₅ jme₃tag₂₃ ꞌe₂ a₂ca₂tɨ́nꞌ₂ ꞌniaꞌ₂ ŋagꞌ₅₄, jë₁ma₂ca₂të́₂ hora jaun₂.
Goꞌ₂ në₁ꞌein₂ ca₂dsia₃ le₁máꞌ₂ ꞌŋio₅ lɨn₃ jmo₃ dsɨ́₅ jmáꞌ₃ quióꞌ₅ ꞌŋiog₅
13 Jan₂ dsa₂ i₂jme₁ꞌen₅₄ jë₄ jaun₂ në́₃, ca₂tsɨ́ꞌ₃ Jesús:
―Të₅, cheiꞌ₅₄ co₂nio₄ dsó₂ rɨ́ngꞌ₃ juɨ₁cuë₁₂ conꞌ₂ a₂ca₂tɨ́ng₂ a₂cha₂ quióꞌ₅ ꞌlag₄ ŋeꞌ₃.
14 Jaun₂ ca₂ŋag₃ Jesús:
―ꞌNe₂ dsa₂, ¿ꞌein₂ ca₂dsiog₃ jniá₂ a₂lɨ́ng₅ jan₂ i₂dsióꞌ₅ ꞌe₂ a₂ca₂tɨ́nꞌ₂ ꞌniaꞌ₂?
15 Ján₃ bá₄ ca₂juáꞌ₂:
―Të₃ŋiꞌ₅₄ ꞌniaꞌ₂ tsá₃ i₂jmo₂ juaꞌ₅₄ a₂ŋɨ́₄ lë₃ ꞌɨ́n₅ ꞌauꞌ₂ a₂le₃cha₂ quiángꞌ₂. Ia₁ on₃juaꞌ₅₄ jmáꞌ₃ a₂ŋɨ́₄ cha₂ quióꞌ₅ dsa₂ le₃chain₂.
16 Jaun₂ ca₂tsɨ́ꞌ₃ táng₃ dsa₂ jág₁ jángꞌ₅ léi₄ la₂:
―Jme₁chan₂ jan₂ dsa₂ i₂jme₁cha₂ cu₄ ꞌŋio₅ lɨn₃. ꞌLióng₂ lɨn₃ jme₁rau₂ quióꞌ₅.
17 Jaun₂ ca₂i₃jiog₅ dsɨ́₅: “¿ꞌE₂ bá₄ jmo₅₄ jniá₂ në́₃? Tsá₃ ma₃cha₂ ja₁tóꞌ₄ a₂ca₂rau₂ quió₃.”
18 Jaun₂ ca₂i₃jiog₅ dsɨ́₅: “Le₂la₂ jmo₅₄. Quɨ́ꞌ₄ tsɨ₁ꞌio₅ a₂tióng₂ në₅, jaun₂ jmo₅₄ a₂caꞌ₅₄ guë́₄. Jaun₂ ja₁jaun₂ tóꞌ₄ trigo, quianꞌ₅₄ ca₂le₃jë́₃ guë́₄ a₂cha₂ quió₃.
19 Jaun₂ guë́₄ ꞌnáuꞌ₄ dsɨ₃: ꞌLióng₂ ma₂niog₅ le₁máꞌ₂, ma₂len₅ ꞌlióng₂ ŋi₂; ma₂lé₂ jan₅₄, gua₅₄ tei₄, guëꞌ₅₄, guɨꞌ₅₄, cuë́₄ o₂ꞌŋió₃ o₂jŋia₃ dsɨ₃.” La₁ Diú₄ në́₃ ca₂juáꞌ₂ ca₂tsɨ́ꞌ₃ dsa₂ ꞌéi₂:
20 “¡ꞌE₂ guë́₄ conꞌ₅₄ ꞌne₂ lɨ́ngꞌ₅! Juaꞌ₂ a₂ꞌuë₂ në₃ mág₄ jniá₂ ꞌmú₃ quiángꞌ₂. Ca₂le₃jë́₃ a₂ma₂dsiaꞌ₅₄ ꞌne₂ rë₂, ¿ꞌein₂ bá₄ quióꞌ₅ lé₂?”
21 Le₂në₅ dsɨ₂ŋɨ́₂ juɨ₁liaꞌ₂ dsa₂ i₂dsia₅ le₁máꞌ₂ jmáꞌ₃ quióꞌ₅ ꞌŋiog₅, la₁ të₂tsɨinꞌ₅₄ lɨ́in₃ le₃ja₁con₂ Diú₄.
I₂jmo₅ ꞌí₁ bá₄ Diú₄ chiꞌ₂-guein₂ quiáin₅
22 Jme₁ca₂dsan₃ jaun₂, ca₂tsɨ́ꞌ₃ táng₃ chiꞌ₂ dsɨ₂guia₃-tɨ́n₂ quiáin₅:
―Juɨ́g₂ jniá₂ ꞌniaꞌ₂, tsá₃ jmo₂ ꞌniaꞌ₂ juaꞌ₅₄ a₂ŋɨ́₄ dsan₂ ꞌauꞌ₂ ꞌe₂ a₂quëꞌ₅₄ të₁liaꞌ₂ changꞌ₂, on₃ guëꞌ₂ o₄quióꞌ₄ nɨ₁ŋɨꞌ₁, juaꞌ₅₄ dsan₂ ꞌauꞌ₂ ꞌe₂ quɨꞌ₅₄.
23 Ia₁ jme₂dsí₂ bá₄ a₂quen₅ guë́₄ liaꞌ₂ conꞌ₂ guë́₄ má₃. Ján₃ guëꞌ₂ le₂jaun₂ nɨ₁ŋɨ₁ bá₄ dsa₂ a₂quen₅ guë́₄ liaꞌ₂ conꞌ₂ guë́₄ ꞌmɨꞌ₂.
24 Ŋí₂ deꞌ₂ ꞌniaꞌ₂ juɨ₁liaꞌ₂ i₁qui₂liaꞌ₂. Tsá₃ ꞌe₂ jne₂₃, on₃ guëꞌ₂ ꞌe₂ cha₂ a₂le₃rau₂ quióꞌ₅, on₃ guëꞌ₂ ꞌio₅ chíꞌ₅ quióꞌ₅. Diú₄ bá₄ i₂jme₂tau₅₄. ¡Jaun₂ ꞌŋio₅ lɨn₃ guë́₄ bá₄ quenꞌ₄ ꞌniaꞌ₂ liaꞌ₂ conꞌ₂ guë́₄ i₁tan₅ ꞌéi₂!
25 ¿I₂ꞌein₂ ꞌniaꞌ₂ i₂lé₂ le₃jmo₃ le₃chain₂ guë́₄ uë́₂,c ne₄ ia₁ a₂ŋɨ́₄ lë₃ ꞌɨ₅ ꞌauꞌ₂ ꞌniaꞌ₂ changꞌ₂?
26 Chi₂juaꞌ₂ tsá₃ quɨnꞌ₅₄ ꞌniaꞌ₂ jmɨg₄ quianꞌ₅₄ a₂ca₂juɨg₄ në₅, ¿ꞌe₂ guëꞌ₂ lë₃ ŋɨ́₄ dsan₂ ꞌauꞌ₂ ꞌniaꞌ₂ quianꞌ₅₄ a₂siáꞌ₂?
27 Ŋí₂ deꞌ₂ ꞌniaꞌ₂ ján₃ ꞌa₂ liaꞌ₂ qui₂dsɨ₂cón₃ lí₁. Tsá₃ tsɨ₁ŋi₅ lé₂ tsë́ꞌ₃, on₃ guëꞌ₂ lé₂ ta₃. Jaun₂ juɨ́g₂ jniá₂ ꞌniaꞌ₂, ca₂liaꞌ₂ jŋiaꞌ₅₄ Rag₅₄ Salomón, quianꞌ₅₄ ca₂le₃jë́₃ a₂jláꞌ₁ a₂jme₁cha₂ quióꞌ₅, tsá₃ ca₂rë₃jláinꞌ₁ bá₄ guë́₄ juɨ₁liaꞌ₂ jláꞌ₁ lí₁.
28 Chi₂juaꞌ₂ le₂në₅ chiꞌ₅ Diú₄ jláꞌ₁ nau₂ a₂cha₂ ꞌŋa₁, a₂jŋiaꞌ₅₄ jniá₂ jláꞌ₁ ca₂tiá₂ co₂lág₂, ia₁ juɨ₁la₂ ꞌióg₃ dsɨ́ꞌ₂ dsa₂, ꞌë₂ guë́₄ bá₄ ꞌniaꞌ₂, dsa₂ i₂ꞌén₂ ca₂juɨg₄, jmo₃ bá₄ Diú₄ ꞌí₁.
29 Jaun₂ juáꞌ₅ jniá₂, tsá₃ i₁niogꞌ₄ juaꞌ₅₄ a₂ŋɨ́₄ dsan₂ ꞌauꞌ₂ ꞌe₂ quëꞌ₅₄ ꞌagꞌ₅₄. Tsá₃ can₂ ꞌniaꞌ₂ o₂i₁ dsɨ₅ quianꞌ₅₄ a₂jaun₂,
30 ia₁ jmáꞌ₃ a₂në₅ bá₄ a₂ŋɨ́₄ lë₃ ꞌnioꞌ₃ dsɨ₂nau₂. Ia₁ i₂ŋi₅ bá₄ Ŋéiꞌ₅ a₂ꞌnióꞌ₅ ca₂le₃jë́₃ a₂në₅ quiánꞌ₂ ꞌniaꞌ₂.
31 La₁ ꞌnioꞌ₂ deꞌ₂ jŋiá₅ ꞌniaꞌ₂ ja₁goin₂, jaun₂ ca₂le₃jë́₃ a₂në₅ të₁ja₃lé₂ a₂ma₂ŋag₅₄ cuë₃.
A₂quen₅ lɨn₃ a₂cha₂ quióꞌ₅ dsa₂ gueiꞌ₅₄ i₂juɨ́g₃
32 ꞌNiaꞌ₂ jáꞌ₂ chaꞌ₂ quiáng₃, tsá₃ lë₁jmo₂ ꞌniaꞌ₂ gangꞌ₃, o₁jŋiaꞌ₅₄ la₂ tsá₃ juɨnꞌ₅ ꞌniaꞌ₂, la₁ ꞌŋio₂ dsɨ́₅ Ŋéiꞌ₅ cuë₃ ja₁goin₂.
San Lucas 12:32-59
33 ꞌNag₄ ꞌniaꞌ₂ a₂cha₂ quiángꞌ₂; jme₂ꞌon₅₄ i₂te₂ŋé₂. Jŋiaꞌ₅₄ liaꞌ₂ le₂në₅ bá₄ dsióg₄, të₃ron₅₄ të₂ꞌmɨꞌ₂ a₂tsá₃ ton₅ jmɨg₄ le₃ꞌáu₂ quiánꞌ₂ ꞌniaꞌ₂; caun₂ a₂quen₅ lɨn₃ ꞌóꞌ₄ ꞌniaꞌ₂ quiángꞌ₂ gueiꞌ₅₄ i₂juɨ́g₃ a₂tsá₃ ton₅ jmɨg₄ dsiá₃, ja₁tsá₃ lɨ́gꞌ₂ jmɨg₄ dsióg₄ ꞌang₂, on₃ guëꞌ₂ i₁tsanꞌ₅₄ lé₂ le₃ꞌén₂.
34 Ia₁ juɨ₁liaꞌ₂ ja₁rë₂ꞌmúꞌ₄ ꞌniaꞌ₂ quiángꞌ₂, ja₁jaun₂ bá₄ ꞌi₄ ꞌauꞌ₂.
ꞌNióꞌ₅ bá₄ a₂chan₂ dsa₂ rë₂jáin₁
35 ꞌRë₂jánꞌ₁ ꞌniaꞌ₂ changꞌ₂, le₁lɨngꞌ₄, le₁guíꞌ₂ si₂ tsɨ́₅ quiángꞌ₂.
36 Juɨ₁lenꞌ₅₄ ꞌniaꞌ₂ në₂jag₄ bá₄ dsa₂ i₂chi₁jŋia₅ guanꞌ₂ juɨg₅₄ ŋó₃ ja₁niog₅ jmɨg₄. Rë₂jánꞌ₁ ꞌniaꞌ₂ changꞌ₂, ia₁jaun₂ lé₂ le₃naꞌ₅₄ ꞌniaꞌ₂ dsɨ₂juɨ₅ jë₁ma₂të́₂ rë₁guáinꞌ₃ quein₃ o₄ꞌné₄.
37 ꞌE₂ guë́₄ dsen₃ dsa₂ i₂le₁ne₅₄ jë₁ma₂ca₂guánꞌ₃ juɨg₅₄. A₂dsɨ₂jóꞌ₃ juáꞌ₅ jniá₂, ꞌŋiog₅ bá₄ ꞌéi₂ dsiog₃ ne₄ mesa, tonꞌ₂ quɨ́ꞌ₃ ꞌmɨꞌ₂ a₂jme₂ti₃ ŋág₃ má₃.
38 ꞌE₂ guë́₄ dsen₃ dsa₂ i₂tionꞌ₅₄ le₁ne₅₄ jë₁ma₂ca₂jo₃ juɨg₅₄ o₁jŋiaꞌ₅₄ la₂ ca₂guáinꞌ₃ a₂ꞌuë₂ dsi₃nei₅, o₃ ma₂ca₂ŋɨ́₂ dsi₃nei₅ ꞌe₂.
39 La₁ juɨ₁le₂ŋiꞌ₅₄ ꞌniaꞌ₂ a₂la₂ ján₃, juaꞌ₅₄ meiꞌ₂ guë́₃ ŋi₅ dsa₂ quióꞌ₅ dsi₂néi₂ ꞌe₂ hora jiá₃ dsa₂ ꞌang₂, guá₃ rë₂nei₅₄, jmo₂₃ ꞌí₁, tsá₃ cuë₃ jmɨg₄ ꞌí₂ dsa₂ ꞌéi₂, ꞌang₃.
40 Le₂në₅ bá₄ ꞌniaꞌ₂ ján₃, rë₂jángꞌ₁ changꞌ₂, ia₁ conꞌ₂ tsá₃ ꞌein₂ lɨ́n₂ bá₄, të₃tsɨnꞌ₅₄ Jaun₅ dsa₂ mɨ₂güɨ́g₃.
Juɨ₁liaꞌ₂ dsa₂ i₂tsá₃ rë₂tiꞌ₅₄ ta₁ quióꞌ₅
41 Jaun₂ në́₃ ca₂ŋag₃ Pe₄:
―Te₁guiꞌ₅₄, ¿a₁në₂cheiꞌ₅₄ jmáꞌ₃ jniaꞌ₅₄ jág₁ jángꞌ₅ léi₄ në₅, o₃ a₂në₂cheiꞌ₅₄ ca₂le₃jɨ́n₃ ꞌe₂?
42 Jaun₂ ca₂juáꞌ₂ Te₁guiꞌ₅₄:
―¿I₂ꞌein₂ ꞌéi₂, lɨ́nꞌ₂ ꞌniaꞌ₂, lɨ́n₅ dsa₂ dsen₃ i₂rë₂tiꞌ₅₄, niog₅ dsi₄, i₂ca₂dsiog₃ juɨg₅₄ nio₃ ne₅₄ jmo₃ ta₁ dsi₂néi₂, a₂agꞌ₃ ŋɨiꞌ₃ dsa₂ hora ca₂tɨ́in₂?
43 ꞌE₂ guë́₄ dsen₃ dsa₂ i₂niog₅ ne₄, i₂jo₅ juɨg₅₄ jme₂ti₃ bá₄ ta₁ quióꞌ₅, i₁guainꞌ₂.
44 A₂dsɨ₂jóꞌ₃ juáꞌ₅ jniá₂, dsiog₃ juɨg₅₄ a₂nio₃ ne₅₄ ca₂le₃jë́₃ a₂cha₂ quióꞌ₅.
45 La₁ në₁juaꞌ₂ lɨ́n₂ dsa₂ i₂niog₅ ne₄ ꞌéi₂, le₃ꞌag₄ bá₄ guanꞌ₂ juɨg₅₄, chi₂juaꞌ₂ ca₂jme₃lióg₃ ca₂jmáiꞌ₂ uɨg₅ dsa₂ ŋeꞌ₂, dsa₂ mɨ́₂ në́₃ i₂jme₂ti₃ ta₁, tonꞌ₂ ꞌŋiog₅ guëꞌ₂ ca₂ꞌí₃ guë́ꞌ₅, ꞌɨ́nꞌ₂, ca₂rë₃ꞌein₅ bá₄ ꞌŋiog₅,
46 la₁ conꞌ₂ tsá₃ jáin₅, conꞌ₂ caun₂ hora a₂tsá₃ ŋi₅ bá₄ guanꞌ₂ juɨg₅₄; uɨg₅ gau₂ ꞌŋio₅ lɨn₃ bá₄ cuë₃ ꞌéi₂, co₂jaun₂ bá₄ uɨg₅ gue₃ conꞌ₂ lë́₅ tɨn₃ dsa₂ i₂tsá₃ ꞌén₂.
47 ꞌJuɨ₁liaꞌ₂ dsa₂ i₂ŋi₅ ꞌe₂ ꞌnio₃ juɨg₅₄, la₁ tsá₃ ꞌe₂ co₂jŋia₅₄ jmo₂₃, on₃ guëꞌ₂ jme₂ti₃ a₂juáꞌ₂ ꞌéi₂, cán₂ uɨg₅ dsɨ₃bain₅₄ ca₂liaꞌ₂ ton₅ ꞌmɨ₅ ꞌlióng₂ lɨn₃ nɨ₁ŋɨ₁₂.
48 La₁ juɨ₁liaꞌ₂ i₂tsá₃ ꞌe₂ ca₂rë₃ŋi₅ tonꞌ₂ jmo₅-dsáu₅ cosa a₂ca₂tɨ́in₂ gue₃ uɨg₅, tsá₃ lɨn₅₄ ꞌlióng₂ ꞌmɨ₅ cán₂. Juɨ₁liaꞌ₂ dsa₂ i₂ꞌlióng₂ të₂no₄ gu₂ a₂ca₂tɨ́in₂ jme₃ti₃, ján₃ bá₄ ꞌlióng₂ a₂mág₃ juɨg₅₄. Ján₃ guëꞌ₂ le₂jaun₂ juɨ₁liaꞌ₂ i₂ma₂dsia₅ dsa₂ ꞌlióng₂ ne₅₄, ꞌlióng₂ guë́₄ a₂chi₃quióng₂ dsa₂ jmɨg₄ jángꞌ₃.
Jesús bá₄ ꞌuɨn₄ a₂lë́₂ le₁dsonꞌ₅₄ dsa₂
49 ꞌA₂i₃ꞌɨng₅₄ si₂ mɨ₂güɨ́g₃ la₂ bá₄ jniá₂ guio₃. ¡ꞌE₂ guë́₄ ꞌɨ́n₅ dsɨ₃, juaꞌ₅₄ ma₂cau₂ bá₄ co₂ŋeiꞌ₅₄ të₂në₃!
50 La₁ tion₅₄ niog₅ tiáng₄ juɨ₅ ja₁dsɨ₃ŋɨ́g₂ mɨꞌ₅₄ ꞌŋio₅ lɨn₃. Jaun₂, ¡ꞌe₂ guë́₄ ꞌŋio₅ o₂i₁ dsɨ₅ chang₂, ca₂liaꞌ₂ ca₂rë₃ti₃ ta₁ a₂guio₃!
51 ¿Lɨ́nꞌ₂ ꞌniaꞌ₂ a₂guio₃ jniá₂ i₃ꞌei₃ tei₄ mɨ₂güɨ́g₃ la₂? On₃juaꞌ₅₄ le₂jaun₂. A₂i₃jmo₃ le₁dsonꞌ₅₄ dsa₂ bá₄ jniá₂ guio₃.
52 Ia₁ të₂le₃ ne₄ juɨ₅ ja₁dsau₅₄ në₅, juɨ₁liaꞌ₂ caun₂ dsi₂néi₂ ja₁lë́₂ ꞌŋiá₂ dsa₂, lé₂ le₁dsonꞌ₅₄,
53 ún₂ jme₃ꞌŋiai₅₄ on₃; i₂on₃ jme₃ꞌŋiai₅₄ i₂ún₂ táng₃; juɨ₁liaꞌ₂ jmei₂ dsa₂ tóinꞌ₃ mɨꞌ₅₄ quianꞌ₅₄ ja₁ŋiꞌ₅₄, ja₁ŋiꞌ₅₄ guëꞌ₂ ꞌí₂ mɨꞌ₅₄ quianꞌ₅₄ jmei₂; juɨ₁liaꞌ₂ chog₅₄ tóinꞌ₃ mɨꞌ₅₄ quianꞌ₅₄ ja₁mɨ́g₄, ja₁mɨ́g₄ guëꞌ₂ ꞌí₂ mɨꞌ₅₄ quianꞌ₅₄ chog₅₄. Juɨ₁liaꞌ₂ i₂lɨ́n₅ ma₂chog₅₄ dsa₂, tóinꞌ₃ mɨꞌ₅₄ quianꞌ₅₄ lo₅₄, juɨ₁liaꞌ₂ mɨ₂lo₅₄ ꞌí₂ mɨꞌ₅₄ quianꞌ₅₄ ma₂chog₅₄.
Juɨ₁liaꞌ₂ jme₁cha₂ léi₄ gueiꞌ₅₄
54 Ján₃ bá₄ ca₂tsɨ́ꞌ₃ dsa₂:
―Jme₁cáunꞌ₂ ꞌniaꞌ₂ ꞌí₁ gueiꞌ₅₄ jme₁tsau₂ jnei₅ le₃ja₁rɨn₂ ꞌiog₂, jagꞌ₄ ꞌniaꞌ₂, jiá₃ jmɨ́₅, dsónꞌ₂ bá₄ le₂jaun₂ lë́₂.
55 Jaun₂ jme₁ja₂ dsí₂ të₂le₃ sur, jagꞌ₄ ꞌniaꞌ₂ dséi₃ ꞌiog₂ në₃. Jaun₂ dsónꞌ₂ bá₄ le₂jaun₂ lë́₂ ján₃.
56 ¡ꞌNiaꞌ₂ dsa₂ i₂jŋiaꞌ₅₄ dse₃ le₁ꞌág₄ o₁ne₁! Ŋiꞌ₅₄ ꞌniaꞌ₂ ꞌa₂ liaꞌ₂ juaꞌ₅₄ ꞌe₂ niog₅ të₅ neꞌ₅₄ ꞌniaꞌ₂ gueiꞌ₅₄, quianꞌ₅₄ ꞌe₂ lë́₂ ne₄ guaꞌ₅₄ ꞌuë₃. ¿ꞌA₂ bá₄ liaꞌ₂ tsá₃ tɨnꞌ₂ ꞌniaꞌ₂ caunꞌ₅₄ ꞌí₁ léi₄ a₂ma₂cha₂ rë₂në́₃?
Jme₁jenꞌ₂ jág₁ quianꞌ₅₄ dsa₂ i₂ꞌiog₅₄
57 ꞌ¿ꞌE₂ lë₃ tsá₃ cáunꞌ₂ ꞌniaꞌ₂ ꞌí₁ jë₄ quiángꞌ₂ guiongꞌ₅₄ a₂dsi₂ten₅₄ jmóꞌ₂?
58 Jë₁ma₂ꞌengꞌ₅₄ juɨ₅ dsiógꞌ₄ ne₄ dsɨ₂tan₅₄ quianꞌ₅₄ dsa₂ i₂ꞌnag₅, jme₁jenꞌ₂ ꞌniaꞌ₂ jág₁ le₂ꞌi₄ juɨ₅ jme₁dsian₅ mɨꞌ₅₄ a₂changꞌ₂ quiainꞌ₅₄. Ia₁ conꞌ₂ tsá₃ ŋó₅ në₁juaꞌ₂ ca₂tsagꞌ₂ të₃ne₄ dsɨ₂tan₅₄ i₂qui₂dsɨ₅ ꞌéiꞌ₃. ꞌÉi₂ në₃ jángꞌ₃ ne₄ ꞌlióg₂; ꞌlióg₂ guë́₄ në́₃ toꞌ₂ néꞌ₃ ꞌmá₃.
59 Juáꞌ₅ jniá₂, o₁lɨ́gꞌ₂ tsá₃ o₃ꞌɨngꞌ₂ ja₁jaun₂ ca₂liaꞌ₂ ca₂quiꞌ₅₄ jë₁ca₂tóꞌ₂ ŋí₁ guéin₂ a₂rɨngꞌ₂.