Jág₁ a₂ca₂cuë₃ Jesús máꞌ₂
5
Jɨ́n₂ Jesús dsa₂ juɨn₅ ꞌéi₂, jaun₂ ca₂uɨ́g₂ caun₂ dsɨ₂conꞌ₂ ja₁ŋei₅ guë́₄, jaun₂ ca₂guá₂. Jaun₂ ca₂ŋɨꞌ₂ dsa₂ i₂quiainꞌ₅₄ le₃lágꞌ₃ quióꞌ₅.
2 Jaun₂ ca₂jme₃lióg₃ ca₂jme₃tɨin₂₃ dsa₂, ca₂juáꞌ₂ le₂la₂:
¿ꞌEin₂ dsa₂ ꞌéi₂ i₂jmo₅ ꞌioꞌ₂?
3 ―ꞌE₂ guë́₄ dsen₃ juɨ₁liaꞌ₂ dsa₂ i₂rë₂líꞌ₄ qui₂chi₁quiain₁₂ jmɨg₄ o₄quióꞌ₄ jme₂dsí₂ quióꞌ₅, ia₁ i₂le₂ꞌéi₂ bá₄ ca₂tɨ́n₂ ja₁gon₂ Diú₄.
4 ꞌꞌE₂ guë́₄ dsen₃ juɨ₁liaꞌ₂ dsa₂ i₂taꞌ₂ ꞌliaꞌ₂ dsɨ́₅, ia₁ cuë₃ bá₄ Diú₄ liánꞌ₂ dsɨ́₅.
5 ꞌꞌE₂ guë́₄ dsen₃ juɨ₁liaꞌ₂ dsa₂ i₂jmo₅ meꞌ₂, ia₁ guaꞌ₅₄ ꞌuë₃ bá₄ tɨin₅₄, cuë₃ Diú₄.
6 ꞌꞌE₂ guë́₄ dsen₃ juɨ₁liaꞌ₂ dsa₂ i₂ŋɨ́₄ lë₃ ꞌɨ́n₅ dsɨ́₅ jmo₃ a₂ꞌŋio₂ dsɨ́₅ Diú₄, ia₁ lë́₂ dsɨ́₅ në₂jag₄ bá₄ a₂i₁cónꞌ₅, a₂rë₂quein₂ dsɨ́₅ në́₃; ia₁ ꞌágꞌ₄ bá₄ dsɨ́₅, jmo₃ Diú₄.
7 ꞌꞌE₂ guë́₄ dsen₃ juɨ₁liaꞌ₂ dsa₂ i₂ŋéi₂ dsɨ́₅ dsa₂ siánꞌ₂, ia₁ dsia₃ bá₄ Diú₄ ŋéi₂ dsɨ́₅ guioin₅₄.
8 ꞌꞌE₂ guë́₄ dsen₃ juɨ₁liaꞌ₂ dsa₂ i₂qui₂le₁jë́₃ dsɨ́₅, ia₁ jɨ́in₂ bá₄ Diú₄.
9 ꞌꞌE₂ guë́₄ dsen₃ juɨ₁liaꞌ₂ dsa₂ i₂quɨ́nꞌ₅ bí₂ ꞌnoꞌ₂ juɨ₅ ꞌa₂ liaꞌ₂ ꞌag₃ tei₄, ia₁ quiong₃ Diú₄ chiꞌ₂-guein₂ quiáin₅.
10 ꞌꞌE₂ guë́₄ dsen₃ juɨ₁liaꞌ₂ dsa₂ i₂qui₂co₂ꞌein₅ dsa₂ ꞌuɨg₅₄ ia₁ a₂jmo₂₃ a₂ꞌŋio₂ dsɨ́₅ Diú₄, ia₁ ja₁gon₂ Diú₄ bá₄ ca₂tɨ́in₂.
11 ꞌꞌE₂ guë́₄ dsenꞌ₃ ꞌniaꞌ₂, jë₁ma₂të́₂ rë₁qui₃jnáuꞌ₂ dsa₂ jág₁, qui₂co₂jmógꞌ₂, a₂juáꞌ₂ ca₂le₃jë́₃ ne₅₄ jág₁ a₂tsá₃ tí₅ ja₁conꞌ₂ ꞌniaꞌ₂ o₄quió₃ jniá₂;
12 jmo₄ ꞌniaꞌ₂ ꞌioꞌ₂, juɨ₁le₁ꞌág₄ bá₄ dse₃ ꞌauꞌ₂, ia₁ guéiꞌ₁ ꞌniaꞌ₂ ꞌliangꞌ₅₄ jó₄ gueiꞌ₅₄ i₂juɨ́g₃. Ia₁ le₂në₅ bá₄ ján₃ qui₂ca₂co₃ꞌein₃ dsa₂ quióꞌ₅ dsa₂ i₂jme₁ꞌë́₂ jág₁ quián₅ Diú₄, i₂ma₂ca₂rë₃chán₃ le₂jŋiá₅ conꞌ₂ guë́₄ ꞌniaꞌ₂.
Jág₁ a₂jángꞌ₅ léi₄ juɨ₁liaꞌ₂ tsɨ₁ŋi₁ quianꞌ₅₄ si₂ a₂tág₅ jɨn₄ dsa₂ mɨ₂güɨ́g₃
13 ꞌTénꞌ₅ ꞌniaꞌ₂ ta₁ ne₄ guaꞌ₅₄ ꞌuë₃ juɨ₁liaꞌ₂ jmo₅ tsɨ₁ŋi₁ jë₄ má₃. La₁ në₁juaꞌ₂ ma₂ca₂ꞌen₃ ŋiꞌ₅₄ tsɨ₁ŋi₁, ¿ꞌa₂ bá₄ liaꞌ₂ lé₂ le₃lei₂ táng₃? Tsá₃ ma₃ꞌe₂ ta₁ jmo₃, a₂jŋiaꞌ₅₄ liaꞌ₂ a₂dsɨ₃gaꞌ₅₄ bá₄ jaun₂, qui₃tsóꞌ₃ dsa₂.
14 ꞌJán₃ bá₄ rë₂jniáꞌ₁ ꞌniaꞌ₂ co₂ꞌnióꞌ₄ a₂lɨ́ngꞌ₅ si₂ quióꞌ₅ dsa₂ mɨ₂güɨ́g₃. Juɨ₁liaꞌ₂ caun₂ juɨg₂ a₂niog₅ dsɨ₂conꞌ₂ tsá₃ lé₂ le₃dsɨ₃ꞌma₄,
15 ján₃ bá₄ tsá₃ guíꞌ₅ dsa₂ si₂ caun₂ nɨ₁tsɨ́₅ a₂chiꞌ₃ néꞌ₃ tsɨ₁gu₅; gueiꞌ₅₄ bá₄ chiꞌ₂ dsa₂ ia₁jaun₂ tágꞌ₅ si₂ ja₁con₂ ca₂le₃jɨ́n₃ i₂tionꞌ₅₄ dsi₂néi₂.
16 Le₂në₅ bá₄ ꞌniaꞌ₂ në́₃, jmo₄ tág₅ si₂ quiángꞌ₂ jɨn₄ dsa₂ mɨ₂güɨ́g₃, ia₁jaun₂ të₅₄ ne₄ dsa₂ a₂dse₃ a₂jmoꞌ₂ ꞌniaꞌ₂, jaun₂ jme₃juɨinꞌ₂ Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃.
Jme₂tag₅ Jesús juɨ₁liaꞌ₂ ꞌÉiꞌ₃
17 ꞌTsá₃ o₁lenꞌ₂ ꞌniaꞌ₂ juaꞌ₅₄ a₂guio₃ jniá₂ a₂jŋiáꞌ₄ Si₂ ꞌÉiꞌ₃ quióꞌ₅ Moisés, on₃ guëꞌ₂ jág₁ a₂jme₁jme₂tag₅ dsa₂ i₂jme₁ꞌë́₂ jág₁ quián₅ Diú₄. On₃juaꞌ₅₄ ta₁ jaun₂ guio₃ jniá₂ a₂jŋiáꞌ₄, të₂le₃ a₂jme₁ꞌŋia₅ bá₄ jniá₂ guio₃.
18 Ia₁ a₂dsɨ₂jóꞌ₃ juáꞌ₅ jniá₂, të₁liaꞌ₂ niog₅ mɨ₂güɨ́g₃, të₁liaꞌ₂ jniá₂ dsɨ₄ gueiꞌ₅₄ në₅, ꞌi₁caun₂ punto, on₃ guëꞌ₂ ꞌi₁caun₂ letra píꞌ₁ quióꞌ₅ Si₂ ꞌÉiꞌ₃ tsá₃ dsɨ₃ꞌén₂ ca₂liaꞌ₂ ca₂rë₃ti₃ ca₂le₃jë́₃ a₂niog₅ lé₂.
19 ꞌUɨg₅₄ jaun₂, juɨ₁liaꞌ₂ i₂jmo₅ cau₅ caun₂ ꞌÉiꞌ₃ Juáꞌ₅ ne₄ Si₂ ꞌÉiꞌ₃, o₁jŋiaꞌ₅₄ lɨ́in₂ caun₂ ꞌéiꞌ₃ tsá₃ lɨn₄ quen₅, në₁juaꞌ₂ le₂jaun₂ jme₁tɨin₂₃ dsa₂ rɨinꞌ₅₄, le₂jaun₂ bá₄ lén₂ dsa₂ ꞌéi₂ jan₂ dsa₂ i₂tsá₃ lɨn₄ quen₅ ja₁gon₂ Diú₄. La₁ juɨ₁liaꞌ₂ dsa₂ i₂nag₅ gau₂, jme₂ti₃, le₂jaun₂ jme₂tɨin₂₃ i₂siánꞌ₂ në́₃, le₂jaun₂ bá₄ lén₂ dsa₂ ꞌéi₂ juɨinꞌ₂ ja₁gon₂ Diú₄.
20 Ia₁ a₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, në₁juaꞌ₂ tsá₃ ca₂jmoꞌ₅₄ ꞌniaꞌ₂ a₂dse₃ guë́₄ conꞌ₂ guë́₄ të₅juáꞌ₅ quianꞌ₅₄ dsa₂ fariseos*, liaꞌ₂ o₁lɨ́gꞌ₂ jmɨg₄ tsá₃ lé₂ dsi₁noꞌ₃ ꞌniaꞌ₂ ja₁gon₂ Diú₄.
Jme₂tag₅ Jesús juɨ₁liaꞌ₂ a₂rë₂ꞌne₂ dsa₂
21 ꞌMa₂ŋiꞌ₅₄ bá₄ ꞌniaꞌ₂ ꞌa₂ liaꞌ₂ lë́₅ ma₂nág₂ dsa₂ canꞌ₅₄ quiánꞌ₂ ꞌniaꞌ₂: “Tsá₃ jŋɨ́gꞌ₄ dsa₂,a ia₁ në₁juaꞌ₂ ꞌein₂ ca₂jŋɨꞌ₃ rɨnꞌ₅₄, tion₅₄ të₃dsɨ₅₄ bá₄ ꞌéiꞌ₃ ja₁coin₂.”
22 La₁ jniá₂ juáꞌ₅ juɨ́g₂ ꞌniaꞌ₂, chi₂juaꞌ₂ ꞌein₂ ca₂rë₃ꞌné₃ quianꞌ₅₄ rɨnꞌ₅₄,b ján₃ bá₄ le₂jaun₂ jiógꞌ₂ ꞌí₁ ja₁coin₂, të₃dsɨ₅₄ ꞌéiꞌ₃. Ján₃ bá₄ le₂jaun₂ juɨ₁liaꞌ₂ i₂të₂ꞌonꞌ₂ rɨnꞌ₅₄, ne₄ dsɨ₂tan₅₄ quián₅ guáꞌ₅ bá₄ dsi₁léin₂, la₁ juɨ₁liaꞌ₂ i₂quian₅ tontoc rɨnꞌ₅₄, goꞌ₂ ꞌliáinꞌ₃ quióinꞌ₄ dsi₂si₂ ja₁ꞌlɨgꞌ₅₄.
23 ꞌUɨg₅₄ jaun₂ në́₃, në₁juaꞌ₂ dsi₂canꞌ₅₄ ꞌe₂ dsi₂canꞌ₅₄ ne₄chei₂, a₂jenꞌ₅₄ ne₄ Diú₄, në₁ca₂dsáuꞌ₃ ꞌauꞌ₂ tsá₃ ꞌei₅ caun₂ jág₁ quianꞌ₅₄ rɨ́ngꞌ₂,
24 ja₁jaun₂ deꞌ₂ dsia₄ a₂jaun₂ cau₅ ne₄chei₂, jaun₂ guë́₄ guanꞌ₂ jme₁dsian₅ mɨꞌ₅₄ o₂ꞌéi₂ caun₂ jág₁ quianꞌ₅₄ rɨ́ngꞌ₂. Jaun₂ guë́₄ ŋeꞌ₅₄ táng₃ i₂dsia₄ a₂cuëꞌ₅₄ Diú₄.
25 ꞌChi₂juaꞌ₂ ꞌein₂ ꞌnio₃ ꞌnag₃ ne₄ dsɨ₂tan₅₄, ŋiꞌ₅₄ ta₁ ꞌnioꞌ₂ juɨ₅ ꞌéi₂ caun₂ jág₁ quiainꞌ₅₄ néꞌ₃ a₂jmo₃ le₂jaun₂, ia₁jaun₂ tsá₃ jángꞌ₂ ne₄ dsɨ₂tan₅₄ i₂qui₂dsɨ₅ ꞌéiꞌ₃; ia₁ dsɨ₂tan₅₄ në́₃, conꞌ₂ tsá₃ ŋó₅ në₁ca₂jángꞌ₂ o₄gú₃ chiꞌ₂ ꞌɨꞌ₅₄; i₂ꞌéi₂ guë́₄ në́₃ ꞌliogꞌ₃ néꞌ₃ ꞌmá₃.
26 A₂dsɨ₂jóꞌ₃ juáꞌ₅ jniá₂, tsá₃ a₁jaun₂ o₃ꞌɨngꞌ₂ ja₁jaun₂ ca₂liaꞌ₂ ca₂quiꞌ₅₄ ca₂le₃jë́₃ ꞌa₂ conꞌ₂ mɨ₅ dsa₂ quiángꞌ₂.
Jme₂tag₅ Jesús a₂tsá₃ nióꞌ₃ dsa₂ jág₁ quianꞌ₅₄ dsa₂ on₃juaꞌ₅₄ dsɨ₂i₂gu₂
27 ꞌMa₂ŋiꞌ₅₄ bá₄ ꞌniaꞌ₂ ján₃ ꞌa₂ liaꞌ₂ lë́₅ ma₂juáꞌ₂ dsa₂ le₂jŋiá₅: “Tsá₃ niógꞌ₄ jág₁ quianꞌ₅₄ dsa₂ on₃juaꞌ₅₄ dsɨ₂i₂gogꞌ₂.”d
28 La₁ jniá₂ guëꞌ₂ juáꞌ₅ juɨ́g₂ ꞌniaꞌ₂, chi₂juaꞌ₂ ꞌein₂ dsɨ₂jiog₅ dsɨ́₅ ꞌlɨgꞌ₅₄ qui₂jɨ́in₂ jan₂ dsa₂ mɨ́₂, co₂ꞌnióꞌ₄ ma₂në₂ꞌnióg₂ dso₄ quiongꞌ₅₄ juɨ₅ të₂dsɨ́₅.
29 ꞌNë₁juaꞌ₂ mɨ₂neꞌ₅₄ jmo₅ a₂tangꞌ₂ dso₄, co₂dsia₅ dsi₄, tiong₂ uɨ́ng₂; ia₁ dse₃ guë́₄ a₂dsɨ₃ꞌén₂ ca₂jne₄ quiángꞌ₂, conꞌ₂ guë́₄ jme₁o₁ꞌúꞌ₃ ta₁jangꞌ₂ ja₁ꞌlɨgꞌ₅₄.
30 Ján₃ bá₄ le₂në₅ në₁juaꞌ₂ mɨ₂gogꞌ₂ jmo₅ a₂tangꞌ₂ dso₄, co₂dsia₅ ti₄, tiong₂ uɨ́ng₂; ia₁ dse₃ guë́₄ a₂dsɨ₃ꞌén₂ ca₂jne₄ nɨ₁ŋɨꞌ₁ conꞌ₂ guë́₄ jme₁o₁ꞌúꞌ₃ ta₁jangꞌ₂ ja₁ꞌlɨgꞌ₅₄.
Jme₂tag₅ Jesús juɨ₁liaꞌ₂ dso₄ a₂tén₂ dsa₂ dsɨ₂i₂gu₂
31 ꞌJán₃ bá₄ ma₂juáꞌ₂ dsa₂ le₂jŋiá₅: “Chi₂juaꞌ₂ ꞌein₂ ca₂tén₂ dsa₂ mɨ́₂ quián₅, ca₂tɨ́in₂ cho₃ caun₂ si₂ a₂jángꞌ₅ léi₄ a₂ma₂ca₂téin₂ dsónꞌ₂ rɨinꞌ₅₄.”e
32 La₁ jniá₂ juáꞌ₅ juɨ́g₂ ꞌniaꞌ₂, chi₂juaꞌ₂ ꞌein₂ ca₂tén₂ dsa₂ mɨ́₂ quián₅, on₃juaꞌ₅₄ cha₂ ꞌuɨg₅₄, juaꞌ₅₄ a₂ma₂nióꞌ₅ jág₁ quianꞌ₅₄ i₂siánꞌ₂, jmo₂₃ a₂ꞌno₃ ꞌio₅₄ quiáin₅ dso₄. Ján₃ bá₄ le₂jaun₂ juɨ₁liaꞌ₂ dsa₂ ŋeꞌ₂ i₂cán₂ ꞌio₅₄ i₂ma₂téi₂ dsa₂, ján₃ bá₄ le₂jaun₂ ꞌno₂₃ dso₄.
Jme₂tag₅ Jesús juɨ₁liaꞌ₂ jág₁ a₂ꞌɨn₅ dsa₂ Diú₄
33 ꞌMa₂neiꞌ₂ bá₄ ꞌniaꞌ₂ ján₃, ꞌa₂ liaꞌ₂ lë́₅ ca₂nág₂ dsa₂ canꞌ₅₄ ma₂lɨ́gꞌ₂: “Tsá₃ jmóꞌ₂ juaꞌ₅₄ a₂tsá₃ jme₁tiꞌ₄ jág₁ quiángꞌ₂ a₂ma₂cuëꞌ₅₄ a₂ꞌɨ́ngꞌ₅ Te₁guiꞌ₅₄.”
34 La₁ jniá₂ juáꞌ₅ juɨ́g₂ ꞌniaꞌ₂ tsá₃ ꞌe₂ ꞌuɨg₅₄ cha₂ juaꞌ₅₄ a₂ꞌɨ́ngꞌ₄ Diú₄; tsá₃ ꞌë́ꞌ₁ gueiꞌ₅₄ i₂juɨ́g₃, ia₁ ne₄ta₁ quióꞌ₅ Diú₄ bá₄ jaun₂;
35 on₃ guëꞌ₂ ꞌë́ꞌ₁ guaꞌ₅₄ ꞌuë₃, ia₁ co₂ꞌnióꞌ₄ ja₁tióng₂ tag₄ bá₄ Diú₄; on₃ guëꞌ₂ ꞌnióꞌ₅ ꞌë́ꞌ₁ ꞌniaꞌ₂ Jerusalén, ia₁ juɨg₂ quióꞌ₅ Rag₅₄ Juɨnꞌ₂ bá₄ jaun₂.
36 Tsá₃ lë₁ꞌë₂ ꞌniaꞌ₂ mɨ₂dseiꞌ₂ guiongꞌ₅₄ në́₃, ia₁ ꞌi₁ca₂mɨꞌ₂ nɨ₁jŋi₂ dseiꞌ₂ ꞌniaꞌ₂ tsá₃ lé₂ le₃jmóꞌ₂ tiog₂, on₃ guë́₄ a₂liaꞌ₂ në́₃.
37 Juaꞌ₅₄ bá₄ ꞌniaꞌ₂ quianꞌ₅₄ ca₂jon₄ jág₁, “ján₅”, o₃ “jan₂ꞌón₄” ꞌe₂, ia₁ në₁juaꞌ₂ ꞌein₂ ca₂juáꞌ₂ ŋag₅₄ guë́₄ conꞌ₂ lë́₅ në₅, já₅ ja₁con₂ i₂së₃dsen₃ bá₄ jaun₂.
Jme₂tag₅ Jesús jág₁ juɨ₁liaꞌ₂ a₂con₂ dsa₂ ꞌmaꞌ₅₄ ja₁con₂ rɨinꞌ₅₄
38 ꞌMa₂neiꞌ₂ bá₄ ꞌniaꞌ₂ a₂ma₂juáꞌ₂ dsa₂ le₂jŋiá₅: “Në₁juaꞌ₂ ꞌein₂ ca₂ꞌén₂ ca₂mɨ́g₂ mɨ₂ne₄ rɨnꞌ₅₄, le₂jaun₂ bá₄ lé₂ ꞌéiꞌ₃ dsɨ₃ꞌén₂ ca₂mɨ́g₂ mɨ₂ne₄ juɨ₁liaꞌ₂ i₂ca₂jmo₃ ján₃; o₃ në₁juaꞌ₂ ꞌein₂ ca₂tiaꞌ₃ ca₂mɨ́g₂ mɨ₂jan₄ rɨnꞌ₅₄ në́₃, le₂jaun₂ bá₄ lé₂ táng₃ ꞌéiꞌ₃, tiáꞌ₃ ca₂mɨ́g₂ quióꞌ₅.”f
39 La₁ jniá₂ guëꞌ₂ juáꞌ₅ juɨ́g₂ ꞌniaꞌ₂, tsá₃ lë₁nau₂ ꞌniaꞌ₂ quengꞌ₂ quianꞌ₅₄ dsa₂ ꞌlɨnꞌ₅₄. Në₁juaꞌ₂ ꞌein₂ ca₂quein₃ rë₂jogꞌ₂, jeinꞌ₅₄ të₂le₃ ca₂ton₂, juɨ₁quein₂₃ ta₁tɨn₃ ton₂.
40 Chi₂juaꞌ₂ ꞌein₂ ꞌnag₅ quiángꞌ₂, a₂ꞌnio₃ jŋiáꞌ₂ nɨ₁tsɨ́nꞌ₂, le₂jiog₅ tsɨ₁ꞌmɨꞌ₂ dsiog₂ quiꞌ₅₄ cuëꞌ₅₄ juɨ₁quion₂.
41 Në₁juaꞌ₂ ꞌein₂ ca₂chi₃quióng₂ jmɨg₄ a₂caunꞌ₅₄ lio₅₄ caun₂ kilómetro, o₂con₄ tɨn₃ kilómetros.
42 Juɨ₁ꞌein₂ guë́₃ mɨ₅ ꞌe₂ mɨ₅ quiángꞌ₂ a₂dsi₂, cuëꞌ₅₄; ꞌa₃ lë₁jeinꞌ₅₄ le₃mɨ₂caꞌ₅₄ quióꞌ₅.
Jme₁ꞌnió₄ bá₄ ꞌniaꞌ₂ juɨ₁liaꞌ₂ dsa₂ i₂ꞌiog₅₄ quiánꞌ₂ ꞌniaꞌ₂
43 ꞌJán₃ bá₄ ma₂neiꞌ₂ ꞌniaꞌ₂ a₂ma₂juáꞌ₂ dsa₂ le₂jŋiá₅: “Jme₁ꞌnió₄ a₂mei₅₄ quiángꞌ₂, jme₁ꞌŋia₅₄ juɨ₁liaꞌ₂ dsa₂ i₂ꞌiog₅₄.”
44 La₁ jniá₂ guëꞌ₂ juáꞌ₅ juɨ́g₂ ꞌniaꞌ₂: Jme₁ꞌnió₄ bá₄ ꞌniaꞌ₂ juɨ₁liaꞌ₂ dsa₂ i₂ꞌiog₅₄, mɨ₄ ne₄ Diú₄ o₄quióꞌ₄ juɨ₁liaꞌ₂ dsa₂ i₂co₂ꞌein₅.g
45 Jaun₂ le₂në₅ bá₄ a₂rë₂jniáꞌ₁ ꞌniaꞌ₂ a₂lɨ́ngꞌ₅ chiꞌ₂-guein₂ quián₅ Ŋéiꞌ₅ i₂guá₅ gueiꞌ₅₄ i₂juɨ́g₃; ia₁ ꞌéi₂ bá₄ cuë₅ ꞌiog₂ cuë́ꞌ₅ liaꞌ₂ dsa₂ ꞌlɨnꞌ₅₄ liaꞌ₂ dsa₂ dsen₃; ján₃ bá₄ chein₁₂ jmɨ́₅ cuë́ꞌ₅ liaꞌ₂ dsa₂ i₂cuɨn₅ Diú₄ liaꞌ₂ dsa₂ i₂tsá₃ Diú₄ cuɨn₅ në́₃.
46 Ia₁ në₁juaꞌ₂ ꞌnióꞌ₃ ꞌniaꞌ₂ jmáꞌ₃ liaꞌ₂ dsa₂ i₂ꞌnio₃ ꞌniaꞌ₂, ¿ꞌe₂ ꞌlianꞌ₅₄ ꞌniaꞌ₂ guéiꞌ₁ le₂jaun₂? Le₂jiog₅ dsa₂ i₂cán₂ ꞌliaꞌ₅₄ quián₅ dsɨ₂tan₅₄ tɨn₂ le₂jaun₂.
47 Chi₂juaꞌ₂ cuɨ́nꞌ₅ ꞌniaꞌ₂ Diú₄ jmáꞌ₃ liaꞌ₂ dsa₂ rɨ́ngꞌ₂, ¿ꞌe₂ a₂ŋag₅₄ guë́₄ a₂dse₃ jmoꞌ₂ ꞌniaꞌ₂ në₁juaꞌ₂ le₂jaun₂? Ia₁ le₂në₅ bá₄ jmo₅ dsa₂ i₂tsá₃ Diú₄ cuɨn₅ ján₃.
48 Juɨ₁dsi₂canꞌ₅₄ bá₄ ꞌniaꞌ₂ a₂dsi₁nógꞌ₅ léngꞌ₂ dsa₂ dsen₃ juɨ₁liaꞌ₂ dsen₃ Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃.