Guén₂ dsa₂ quián₅ Jesús mɨ́g₂ trigo caun₂ jmɨg₄ sa₅₄
6
Caun₂ jmɨg₄ sa₅₄, ca₂ŋɨ₅ Jesús caun₂ ja₁nau₂ ja₁jnia₄ trigo. Jaun₂ ca₂gág₃ dsa₂ i₂quiainꞌ₅₄ mɨ́ꞌ₂ trigo, qui₂ca₂guéin₂ ca₂guë́ꞌ₃.
San Lucas 6:1-16
―¿ꞌE₂ lë₃ jmoꞌ₂ ꞌniaꞌ₂ a₂tsá₃ ꞌi₄ ꞌéiꞌ₃ jmo₃ dsa₂ jme₁jmɨg₄ sa₅₄?
Jaun₂ ca₂ŋag₃ Jesús:
3 ―¿Tsa₁ ma₂ꞌíꞌ₂ ꞌniaꞌ₂ ja₁juáꞌ₂ a₂ca₂jmo₃ David quiainꞌ₅₄ rɨinꞌ₅₄ jme₁ca₂táꞌ₂ i₁cónꞌ₅?
4 Ca₂ꞌí₃ dsi₂néi₂ quióꞌ₅ Diú₄ ca₂can₃ i₁ŋíꞌ₄ jŋió₅ a₂ꞌi₄ ꞌéiꞌ₃ a₂guë́ꞌ₃ jmáꞌ₃ jme₂dsa₂. Ca₂guë́ꞌ₃, ca₂cuë́ꞌ₃ rɨinꞌ₅₄ i₂jme₁quiainꞌ₅₄ në́₃.
5 Ca₂juáꞌ₂ Jesús ján₃:
―Jaun₅* dsa₂ mɨ₂güɨ́g₃ bá₄ i₂quian₅ ꞌéiꞌ₃ ne₄ quióꞌ₅ jmɨg₄ sa₅₄.
Dsa₂ i₂rë₂jáꞌ₃ caun₂ gu₂
6 Co₂ráun₂ táng₃ caun₂ jmɨg₄ sa₅₄ ca₂lë₃, ca₂ꞌí₃ Jesús guáꞌ₅ sinagoga*, ca₂jme₃tɨin₂₃ dsa₂. Jë₄ jaun₂ jme₁ꞌen₅₄ jan₂ dsa₂ i₂rë₂jáꞌ₃ gu₂ ne₁.
7 Ca₂tiog₃ dsa₂ fariseos quianꞌ₅₄ të₅juáꞌ₅ chi₂juaꞌ₂ jme₃ꞌlióin₂ ꞌéi₂ të₃ jmɨg₄ sa₅₄, ia₁ jme₁ꞌnoꞌ₂ juɨ₅ ꞌa₂ liaꞌ₂ jmo₃ dsáu₁ ꞌéi₂.
8 La₁ a₂ŋi₅ rë₂ bá₄ Jesús ꞌe₂ a₂dsɨ₂jiog₅ dsɨ́₅ dsa₂ ꞌéi₂ tióin₂, jaun₂ ca₂tsɨ́ꞌ₃ dsa₂ i₂rë₂jáꞌ₃ gu₂:
―Nau₂, ŋia₅ dsi₂jo₂ la₂.
―La₂ ŋag₄ jniá₂ caun₂ ꞌniaꞌ₂: ¿ꞌE₂ ꞌi₄ ꞌéiꞌ₃ jmo₃ dsa₂ juɨ₁liaꞌ₂ jme₁jmɨg₄ sa₅₄? ¿A₁dse₃, o₃ a₂ꞌlɨgꞌ₅₄ ꞌe₂? ¿A₂lióin₂ dsa₂ mɨ₂güɨ́g₃ rɨinꞌ₅₄, o₃ a₂jŋagꞌ₃ ꞌe₂?
10 Jaun₂ ca₂jɨ́in₂ ca₂le₃jɨ́n₃ dsa₂ i₂tión₂ le₃lágꞌ₃ quióꞌ₅, jaun₂ ca₂tsɨ́ꞌ₃ dsa₂ dsoꞌ₅₄:
―Neiꞌ₅₄ gogꞌ₂.
Jaun₂ ca₂néiꞌ₃. Dsɨ₂juɨ₅ jaun₂ bá₄ ca₂lág₃ gu₂.
11 La₁ ca₂rë₃ꞌné₃ bá₄ dsa₂ jain₂ jain₂ tioinꞌ₅₄, ca₂jme₃lióg₃ ca₂tsɨ́ꞌ₃ rɨinꞌ₅₄ ꞌe₂ jmáiꞌ₂ Jesús.
Ca₂quiónꞌ₂ Jesús guia₃-tɨ́n₂ dsa₂ i₂chein₃ ꞌa₂ guë́₃ jáꞌ₄ chei₃
12 Ca₂lë₃ të₃jë₄ jmɨg₄ jaun₂, ca₂ŋó₃ Jesús juɨ₅ caun₂ máꞌ₂ a₂chi₂i₁leinꞌ₄ Diú₄. Të₁jma₃nei₅ bá₄ ca₂ŋɨi₅ chi₂léinꞌ₂ Diú₄.
13 Jme₁jnia₃ táng₃ jaun₂, ca₂të́ꞌ₃ dsa₂ i₂quiainꞌ₅₄, jaun₂ ca₂quióinꞌ₂ guia₃-tɨ́n₂ ꞌéi₂. I₂ꞌéi₂ në́₃ ca₂quiain₃, i₂chen₄ quiáin₅.a
14 Le₂la₂ jme₁chein₂: Si₂mu₅₄ i₂ca₂quiain₃ Pe₄; Drë́₄ rɨnꞌ₅₄ Si₂mu₅₄; Jacobob quianꞌ₅₄ Juan₅₄ në́₃; Fe₂li₄, Bartolomé,
15 Të₅₄, To₁má₄, Jacobob i₂lɨ́n₅ ja₁ŋiꞌ₅₄ Alfeo; Si₂mu₅₄ i₂lɨ́n₅ cananista.c
16 Judas rɨnꞌ₅₄ Jacobo; quianꞌ₅₄ Judas Iscarioted i₂ca₂dsióg₃ ca₂ꞌnɨi₃ Jesús cang₂.
Jme₂tɨn₅ Jesús juɨn₅ lɨn₃ dsa₂
17 Jme₁ca₂sióin₃ máꞌ₂ jaun₂, quiainꞌ₅₄ ꞌéi₂, jaun₂ ca₂nau₂ caun₂ ja₁lë́₄ ja₁jo₂. Ja₁jaun₂ në́₃ jme₁ma₂le₁ŋɨꞌ₂ juɨn₅ lɨn₃ dsa₂ i₂chan₂ ta₁caun₂ ꞌuë₃ Judea, i₂ja₂lén₂ Jerusalén, ca₂le₃jë́₃ juɨg₂ te₁ꞌi₁ le₂tan₅₄ cheiꞌ₅₄ jmɨ₁ŋíꞌ₄ ja₁niog₅ juɨg₂ Tiro quianꞌ₅₄ Sidón në́₃,
San Lucas 6:17-49
18 ia₁ ꞌnio₃ dsa₂ nag₃ jág₁ quióꞌ₅ Jesús, tonꞌ₂ ia₁ ꞌnio₃ ꞌlióin₂ ꞌe₂ caun₂ dso₄ niog₅ lɨ́in₅. Le₂jaun₂ guëꞌ₂ dsa₂ i₂chan₂ uɨg₅ co₂jmógꞌ₂ jme₂dsí₂ ꞌlɨnꞌ₅₄, ja₁jaun₂ qui₂ca₂ꞌlóin₂ bá₄ ján₃.
19 Qui₂ca₂ꞌnáuꞌ₃ juɨ₅ a₂nɨ́iꞌ₃ quióꞌ₅ Jesús, ia₁ jme₁ꞌio₅ ꞌéi₂ bí₂ a₂jme₁jme₂ꞌlióin₂ ca₂le₃jɨ́n₃.
Juɨ₁liaꞌ₂ a₂dse₃, quianꞌ₅₄ a₂tsá₃ dse₃ liaꞌ₂ chan₂ dsa₂
20 Jaun₂ ca₂jɨ́in₂ ca₂le₃jɨ́n₃ i₂ma₂quiainꞌ₅₄, jaun₂ ca₂juáꞌ₂:
―ꞌE₂ guë́₄ dsenꞌ₃ ꞌniaꞌ₂ dsa₂ i₂changꞌ₂ ŋégꞌ₂ le₃ne₄ Diú₄, ia₁ ꞌniaꞌ₂ bá₄ ca₂tɨ́ngꞌ₂ ja₁goin₂.
21 ꞌꞌE₂ guë́₄ dsenꞌ₃ ꞌniaꞌ₂ i₂changꞌ₂ ꞌongꞌ₅₄ rë₂në́₃, ia₁ ꞌágꞌ₄ bá₄ ꞌauꞌ₂. Dsenꞌ₃ ꞌniaꞌ₂ i₂quɨꞌ₂-ꞌo₅ jmɨg₄ në₃, ia₁ ŋágꞌ₄ bá₄ ꞌniaꞌ₂.
22 ꞌꞌE₂ guë́₄ dsenꞌ₃ ꞌniaꞌ₂ jë₁ma₂ca₂jme₃ꞌiog₅₄ dsa₂, a₂ꞌuágꞌ₂, jë₁ma₂të́₂ rë₁të₃ꞌoꞌ₂, quiong₃ dsa₂ a₂ꞌlɨngꞌ₅₄ o₄quióꞌ₄ Jaun₅ dsa₂ mɨ₂güɨ́g₃.
23 ꞌJmo₄ ꞌniaꞌ₂ ꞌioꞌ₂ ꞌŋio₅ lɨn₃, quian₂ ꞌniaꞌ₂ o₂ꞌŋió₃ ꞌauꞌ₂ jë₁ma₂të́₂ jmɨg₄ jaun₂, ia₁ le₂në₅ bá₄ guéiꞌ₁ ꞌniaꞌ₂ juëꞌ₂ ꞌliangꞌ₅₄ gueiꞌ₅₄ i₂juɨ́g₃. Ia₁ le₂në₅ bá₄ ma₂jmo₃ dsa₂ canꞌ₅₄ quiáin₅ ca₃ma₂lɨ́gꞌ₂ ma₂jmáiꞌ₂ dsa₂ i₂jme₁ꞌë́₂ jág₁ quián₅ Diú₄.
24 ꞌLa₁ ꞌe₂ guë́₄ juɨ́gꞌ₂ ꞌniaꞌ₂ dsa₂ cha₂ cu₄, ia₁ ma₂gueꞌ₅₄ bá₄ ꞌniaꞌ₂ liangꞌ₅₄.
25 ꞌꞌE₂ guë́₄ juɨ́gꞌ₂ ꞌniaꞌ₂ i₂changꞌ₂ qui₂le₁ꞌágꞌ₃ ꞌauꞌ₂, ia₁ já₅ jmɨg₄ jë₁le₃changꞌ₂ ꞌongꞌ₅₄. ꞌE₂ guë́₄ juɨ́gꞌ₂ ꞌniaꞌ₂ i₂chan₂ co₂ŋág₂ jmɨg₄ në₃, ia₁ já₅ bá₄ jmɨg₄ jë₁tóngꞌ₁ ꞌliaꞌ₂ ꞌauꞌ₂ quɨꞌ₁-ꞌáuꞌ₂.
26 ꞌJuɨ́gꞌ₂ bá₄ ꞌniaꞌ₂ jë₁ma₂të́₂ rë₁qui₃ꞌag₃ dsa₂ dse₃, ia₁ le₂në₅ bá₄ ca₂jmo₃ dsa₂ canꞌ₅₄ quiáin₅, ca₂ꞌɨin₃ dse₃ dsa₂ juɨ₁gan₂ i₂jme₁ꞌë́₂ jág₁ ma₂lɨ́gꞌ₂.
A₂jme₃ꞌnio₃ dsa₂ juɨ₁liaꞌ₂ dsa₂ i₂ꞌiog₅₄
27 ꞌLa₁ ꞌniaꞌ₂ dsa₂ i₂nag₅, juáꞌ₅ jniá₂: Jme₁ꞌnió₄ ꞌniaꞌ₂ dsa₂ i₂ꞌiog₅₄, jmo₄ a₂dse₃ ja₁con₂ dsa₂ i₂ja₂uɨn₅₄ dsɨ́₅ jág₂.
28 Caun₂ dse₃ bá₄ qui₁ꞌɨ́ngꞌ₄ i₂ꞌag₅ ꞌlɨgꞌ₅₄; chi₁lenꞌ₅₄ ꞌniaꞌ₂ Diú₄ o₄quióꞌ₄ i₂lë₁co₂jmógꞌ₂.
29 Chi₂juaꞌ₂ ꞌein₂ ca₂jnáu₃ ca₂ton₂ rë₂jogꞌ₂, jeinꞌ₅₄ le₃ca₂ton₂ táng₃ o₁jnáu₄; chi₂juaꞌ₂ ꞌein₂ ca₂jŋiáꞌ₂ ꞌmɨꞌ₂ dsiog₂ quiángꞌ₂, le₂jiog₅ tsɨ́ngꞌ₂ a₂quiꞌ₅₄ cuëꞌ₅₄ ján₃, o₁quion₂.
30 Juɨ₁ꞌein₂ guë́₃ mɨ₅ ꞌe₂ mɨ₂₃, cuëꞌ₅₄; chi₂juaꞌ₂ ꞌe₂ caun₂ a₂jŋiáꞌ₂ quiángꞌ₂, tsá₃ ma₃magꞌ₅₄.
31 Juɨ₁liaꞌ₂ a₂ꞌniogꞌ₂ ꞌniaꞌ₂ jmo₃ dsa₂ ja₁congꞌ₂, le₂jaun₂ jmo₄ ꞌniaꞌ₂ ja₁coin₂.
32 ꞌIa₁ në₁juaꞌ₂ ꞌniógꞌ₃ jmáꞌ₃ liaꞌ₂ dsa₂ i₂ꞌnio₃ ꞌniaꞌ₂ guiongꞌ₅₄, ¿ꞌe₂ ti₁ꞌmagꞌ₄ ca₂tɨ́ngꞌ₂ në₁juaꞌ₂ le₂jaun₂? Ia₁ ján₃ bá₄ le₂në₅ jmo₅ juɨ₁liaꞌ₂ dsa₂ i₂ꞌno₅ dso₄.
33 Ia₁ chi₂juaꞌ₂ jmoꞌ₂ ꞌniaꞌ₂ dse₃ jmáꞌ₃ liaꞌ₂ ne₄ dsa₂ i₂jmo₅ dse₃ ja₁congꞌ₂, ¿ꞌe₂ ti₁ꞌmagꞌ₄ ca₂tɨ́ngꞌ₂ në₁juaꞌ₂ le₂jaun₂? Ia₁ le₂në₅ bá₄ tionꞌ₅₄ dsa₂ i₂ꞌno₅ dso₄ ján₃.
34 Në₁juaꞌ₂ qui₂dsiꞌ₂ ꞌniaꞌ₂ jmáꞌ₃ liaꞌ₂ le₃quióꞌ₅ i₂lɨ́nꞌ₂ ꞌniaꞌ₂ le₃quɨꞌ₅₄ jmɨg₄ jéinꞌ₃ quiángꞌ₂, ¿ꞌe₂ ti₁ꞌmagꞌ₄ ca₂tɨ́ngꞌ₂ në₁juaꞌ₂ le₂jaun₂? Ia₁ le₂në₅ bá₄ tionꞌ₅₄ guëꞌ₂ dsa₂ i₂ꞌno₅ dso₄ ján₃, qui₂dsi₂ quióꞌ₅ rɨinꞌ₅₄ jain₂ jain₂, ia₁jaun₂ qui₃gue₃ quióꞌ₅ rɨinꞌ₅₄.
35 La₁ ꞌniaꞌ₂ në́₃, jme₁ꞌnió₄ i₂ꞌiog₅₄, jmo₄ a₂dse₃ ja₁coin₂; dsi₄ ꞌniaꞌ₂ quióꞌ₅, tsá₃ jmo₄ ꞌniaꞌ₂ juaꞌ₅₄ a₂ŋɨ́₄ ꞌɨ₅ ꞌauꞌ₂ a₂jaun₂. Jaun₂ le₂në₅ bá₄ guéiꞌ₁ ꞌniaꞌ₂ juëꞌ₂ ꞌliangꞌ₅₄, tonꞌ₂ léngꞌ₂ chiꞌ₂-guein₂ quián₅ Diú₄ i₂guá₅ gueiꞌ₅₄. Ia₁ i₂ꞌua₁ dsɨ́₅ ꞌéi₂ ján₃ ja₁con₂ dsa₂ ꞌlɨnꞌ₅₄, i₂jŋiaꞌ₅₄ ti₁ꞌmagꞌ₄ tsá₃ cuë₂₃.
36 Juɨ₁lenꞌ₅₄ ꞌniaꞌ₂ dsa₂ ŋéi₂ dsɨ́₅, juɨ₁liaꞌ₂ ŋéi₂ dsɨ́₅ Diú₄ Ŋéiꞌ₅.
Tsá₃ lë₁cáun₂ ꞌniaꞌ₂ ꞌí₁ quióꞌ₅ rɨ́ngꞌ₂
37 ꞌTsá₃ lë₁cáun₂ ꞌniaꞌ₂ ꞌí₁ ja₁con₂ rɨ́ngꞌ₂, jaun₂ tsá₃ con₂ Diú₄ ꞌí₁ ja₁conꞌ₂ ꞌniaꞌ₂ guiongꞌ₅₄. Tsá₃ ꞌliánꞌ₅ ꞌniaꞌ₂ rɨ́ngꞌ₂ jaun₂ tsá₃ ꞌliogꞌ₃ Diú₄ guionꞌ₅₄ ꞌniaꞌ₂ ján₃. ꞌÉn₃ ꞌniaꞌ₂ dsáu₁ rɨ́ngꞌ₂, jaun₂ bá₄ ꞌén₂ Diú₄ dsáuꞌ₂ ꞌniaꞌ₂ guiongꞌ₅₄.
38 Qui₂jme₁ꞌon₁ ꞌniaꞌ₂ rɨ́ngꞌ₂, jaun₂ bá₄ jme₃ꞌo₅₄ Diú₄ ꞌniaꞌ₂, cuë₃ caun₂ ꞌéiꞌ₃ tí₅, a₂tóꞌ₅ tiá₂, a₂qui₂rë₂ꞌŋiáꞌ₄ rë₂ lɨn₃, ca₂liaꞌ₂ tsá₃ ma₃toꞌ₂ ja₁ꞌéiꞌ₄ jmo₃, tóꞌ₃ të₂jmu₂ quiánꞌ₂ ꞌniaꞌ₂. Ia₁ ꞌéiꞌ₃ jaun₂ bá₄ toꞌ₂ Diú₄ juɨ₁liaꞌ₂ lë́₅ ꞌéiꞌ₃ a₂dsiánꞌ₅ ꞌniaꞌ₂ rɨ́ngꞌ₂ guiongꞌ₅₄.
39 Jaun₂ ca₂cuë₃ Jesús jág₁ jángꞌ₅ léi₄ la₂:
―¿Lé₂ le₃jŋia₃ dsa₂ ten₄ jan₂ dsa₂ ten₄ rɨinꞌ₅₄ a₂ꞌë₃ juɨ₅? ¿Tsa₁ tsɨ₃séinꞌ₂ juaꞌ₅₄ juɨ₁liaꞌ₂ caun₂ siá₅?
40 ꞌI₁jan₂ juɨ₁liaꞌ₂ i₂ꞌɨ₅ si₂ tsá₃ lɨ́in₅ juaꞌ₅₄ a₂juɨinꞌ₂ guë́₄ conꞌ₂ guë́₄ të₅ quiáin₅; ca₂liaꞌ₂ ca₂dsóꞌ₃ si₂ quióꞌ₅, jaun₂ guë́₄ lé₂ le₃dsióg₄ léin₂ conꞌ₂ lɨ́n₅ të₅ quiáin₅.
41 ꞌ¿ꞌA₂ bá₄ liaꞌ₂ jŋiáꞌ₄ ꞌne₂ jme₁qui₅ píꞌ₁ a₂ꞌi₄ jme₁ne₁ rɨ́ngꞌ₂, tonꞌ₂ tsá₃ lengꞌ₅₄ a₂ꞌi₄ nɨ₁ꞌma₂ chá₅ jme₁neꞌ₄ ꞌŋiagꞌ₂?
42 ¿ꞌA₂ bá₄ liaꞌ₂ tiá₂ ꞌauꞌ₂ juɨgꞌ₅₄ rɨ́ngꞌ₂: “Rɨnꞌ₅₄ jniog₄, cuë₄ jmɨg₄ o₁dsi₁₂ jme₁qui₅ píꞌ₁ a₂ꞌi₄ jme₁neꞌ₄”? ¡ꞌNe₂ dsa₂ i₂lë₁jmo₅-dsáu₅ o₁ne₁! Dsi₄ deꞌ₂ jŋiá₅ nɨ₁ꞌma₂ chá₅ a₂ꞌi₄ jme₁neꞌ₄ ꞌŋiagꞌ₂, jaun₂ guë́₄ le₃jagꞌ₅₄ rë₂ dsíꞌ₁ qui₅ píꞌ₁ a₂ꞌi₄ jme₁ne₁ rɨ́ngꞌ₂.
Të₂le₃ ꞌa₂ liaꞌ₂ lë́₅ mɨ́g₂ a₂ꞌag₅ bá₄ nɨ₁ꞌma₂, jángꞌ₅ léi₄
43 ꞌTsá₃ cha₂ nɨ₁ꞌma₂ dse₃ juaꞌ₅₄ a₂lé₂ le₃ꞌag₃ mɨ́g₂ ꞌlɨgꞌ₅₄; ján₃ guëꞌ₂ le₂jaun₂ tsá₃ cha₂ nɨ₁ꞌma₂ ꞌlɨgꞌ₅₄ juaꞌ₅₄ lé₂ le₃ꞌag₃ mɨ́g₂ dse₃.
44 Le₂caun₂ le₂caun₂ bá₄ nɨ₁ꞌma₂ jauꞌ₂ ꞌí₁ të₂le₃ ꞌa₂ liaꞌ₂ lë́₅ mɨ́g₂ a₂ꞌag₅: ma₁ tsá₃ quɨn₅ dsa₂ mɨ́g₂ higos juɨ₁liaꞌ₂ nɨ₁ꞌma₂ taun₅ chei₅₄, on₃ guëꞌ₂ lé₂ le₃cágꞌ₃ dsa₂ mɨ́g₂ uvas juɨ₁liaꞌ₂ chi₁uɨ́ng₃ taun₅.
45 Ján₃ bá₄ le₂në₅ dsa₂ në́₃. Juɨ₁liaꞌ₂ dsa₂ dsen₃, liaꞌ₂ conꞌ₂ lë́₅ a₂dse₃ a₂ma₂rë₂ꞌma₄ të₂dsɨ́₅, jmo₂₃ a₂dse₃; dsa₂ i₂ꞌlɨnꞌ₅₄ në́₃, liaꞌ₂ conꞌ₂ lë́₅ a₂ꞌlɨgꞌ₅₄ a₂ma₂rë₂ꞌma₄ të₂dsɨ́₅, jmo₂₃ a₂ꞌlɨgꞌ₅₄. Ia₁ liaꞌ₂ conꞌ₂ lë́₅ a₂ꞌlióng₂ ŋag₅₄ cha₂ të₂dsɨ́₅ dsa₂, a₂jaun₂ bá₄ ꞌuë₂ mɨ₂ꞌo₅₄.
Tɨn₃ né₃ ꞌuɨg₅₄ cha₂
46 ꞌ¿ꞌE₂ bá₄ lë₃ të́ꞌ₅ ꞌniaꞌ₂ jniá₂, “Te₁guiꞌ₅₄, Te₁guiꞌ₅₄”, tonꞌ₂ tsá₃ jmoꞌ₂ guëꞌ₂ ꞌniaꞌ₂ a₂juáꞌ₅?
47 Le₂jan₂ le₂jan₂ i₂të₁ja₂lén₂ ne₃, i₂ja₂néi₃ jág₁ quió₃, tonꞌ₂ neꞌ₅₄ në́₃, la₂ ꞌɨ́in₄ ꞌa₂ liaꞌ₂ lɨ́in₅:
48 lɨ́in₅ juɨ₁liaꞌ₂ jan₂ dsa₂ i₂ca₂jmógꞌ₃ ꞌné₅, ca₂guéi₃ ꞌei₄ deꞌ₂ jŋiá₅ ca₂liaꞌ₂ ca₂të́₂ ne₄ nɨ₁ꞌlau₂. Ne₄ jaun₂ ca₂jme₃lióg₃ ꞌuɨg₅₄ ꞌiaꞌ₂. Jme₁ca₂juëꞌ₂ jmɨg₂, ca₂dságꞌ₃ jmɨg₂ tiá₂ ꞌei₅ dsoꞌ₂ tsɨ₁ꞌné₅ jaun₂. La₁ ca₂liaꞌ₂ jŋiaꞌ₅₄ tsá₃ ca₂ꞌŋiáꞌ₂, ia₁ rë₂ jme₁lë́₄.
49 La₁ juɨ₁liaꞌ₂ i₂nag₅ jág₁ quió₃, tonꞌ₂ tsá₃ neiꞌ₅₄ guëꞌ₂ në́₃, lɨ́in₅ juɨ₁liaꞌ₂ lɨ́n₅ dsa₂ i₂ca₂chiꞌ₃ ꞌne₄ jŋiaꞌ₅₄ dsɨ́₂ ne₄ ꞌuë₃ bá₄, tsá₃ ꞌuɨg₅₄ ꞌiaꞌ₂ ca₂jmo₃. Jme₁ca₂dságꞌ₃ tiá₂ ꞌei₅ jmɨg₂ dsoꞌ₂ tsɨ₁ꞌné₅ jaun₂, ca₂quɨꞌ₃ bá₄, co₂ŋeiꞌ₅₄ ca₂ꞌen₃.