Tsá₃ lë₁cáun₂ ꞌniaꞌ₂ ꞌí₁ quióꞌ₅ i₂siánꞌ₂
7
ꞌTsá₃ lë₁cáun₂ ꞌniaꞌ₂ ꞌí₁ quióꞌ₅ rɨ́ngꞌ₂, ia₁jaun₂ tsá₃ con₂ Diú₄ ꞌí₁ ja₁conꞌ₂ ꞌniaꞌ₂ guiongꞌ₅₄.
2 Ia₁ le₂në₅ bá₄ con₂ Diú₄ ꞌí₁ ja₁conꞌ₂ ꞌniaꞌ₂ guiongꞌ₅₄ juɨ₁liaꞌ₂ cáunꞌ₂ ꞌniaꞌ₂ ꞌí₁ ja₁con₂ rɨ́ngꞌ₂. Quianꞌ₅₄ ꞌéiꞌ₃ a₂dsiaꞌ₂ ꞌniaꞌ₂, ꞌéiꞌ₃ jaun₂ bá₄ dsiog₃ Diú₄ quiánꞌ₂ ꞌniaꞌ₂ guiongꞌ₅₄.
3 ꞌ¿ꞌA₂ liaꞌ₂ jniagꞌ₃ ꞌne₂ jagꞌ₅₄ jme₁qui₅ píꞌ₁ a₂ꞌi₄ jme₁ne₁ rɨ́ngꞌ₂, tonꞌ₂ tsá₃ lengꞌ₅₄ guëꞌ₂ a₂ꞌi₄ ca₂ꞌnau₅₄ nɨ₁chá₅ pa₁ jme₁neꞌ₁ ꞌŋiagꞌ₂?
4 ¿O₃ ꞌa₂ liaꞌ₂ lé₂ le₃juɨgꞌ₅₄ rɨ́ngꞌ₂: “Cuë₄ jmɨg₄ dsi₄ jniá₂ jme₁qui₅ píꞌ₁ a₂ꞌi₄ jme₁neꞌ₁,” tonꞌ₂ në₅ bá₄ chi₁ꞌi₁ ca₂ꞌnau₅₄ nɨ₁ꞌma₂ chá₅ jme₁neꞌ₁ ꞌŋiagꞌ₂?
5 ¡ꞌNe₂ dsa₂ i₂lë₁jmo₅ o₁ne₁! Dsi₄ deꞌ₂ jŋiá₅ nɨ₁ꞌma₂ chá₅ mɨ₂neꞌ₅₄ ꞌŋiagꞌ₂, jaun₂ guë́₄ lé₂ le₃jagꞌ₅₄ rë₂, jaun₂ guë́₄ lé₂ dsíꞌ₁ qui₅ píꞌ₁ jme₁ne₁ rɨ́ngꞌ₂.
6 ꞌTsá₃ cuëꞌ₂ ꞌniaꞌ₂ juɨ₁liaꞌ₂ dsɨ₂jɨꞌ₅₄ a₂lë́₅ a₂jŋió₅ quióꞌ₅ jme₂dsí₂, ia₁ conꞌ₂ tsá₃ ŋó₅ në₁juaꞌ₂ ja₂dsɨ́in₂ a₂jmo₃ le₁juɨg₁ quiángꞌ₂. Ján₃ bá₄ tsá₃ dsia₂ ꞌniaꞌ₂ juɨ₁liaꞌ₂ mɨ́g₂ jláꞌ₁ a₂quen₅ quiángꞌ₂ ne₄ i₁ŋí₅, conꞌ₂ tsá₃ ŋó₅ në₁juaꞌ₂ qui₂ca₂tsóꞌ₃, jme₃ꞌióg₃.
Juɨ₁liaꞌ₂ dsa₂ i₂mɨ₅, i₂ꞌnoꞌ₂, i₂të́₂ në́₃.
7 ꞌMɨ₄ ꞌniaꞌ₂ ne₄ Diú₄, jaun₂ guéiꞌ₁ ꞌniaꞌ₂; ꞌnioꞌ₂ ꞌniaꞌ₂, jaun₂ bá₄ dsiangꞌ₂; té₃ ꞌniaꞌ₂ o₄ꞌné₄, jaun₂ bá₄ niá₂.
8 Ia₁ juɨ₁liaꞌ₂ i₂mɨ₅, gue₃ bá₄; juɨ₁liaꞌ₂ i₂ꞌnoꞌ₂, dsioꞌ₂ bá₄ ján₃; ján₃ bá₄ le₂jaun₂, quióꞌ₅ juɨ₁liaꞌ₂ i₂të́₂ o₄ꞌné₄, niá₂ bá₄.
9 ꞌ¿O₃ chan₂ juɨ₁liaꞌ₂ ꞌein₂ ꞌniaꞌ₂, jme₁mɨ₅ chiꞌ₂ quiángꞌ₂ i₁ŋíꞌ₄, cuëꞌ₂ ꞌniaꞌ₂ ca₂mɨ́g₂ nɨ₁cang₁?
10 ¿O₃ chanꞌ₂ ꞌniaꞌ₂ jë₁ma₂ca₂mɨ₃ chiꞌ₂ quiángꞌ₂ quióꞌ₅ ju₄, cuɨ́inꞌ₄ ꞌniaꞌ₂ dsɨ₂mɨꞌ₂?
11 Jaun₂ në́₃, chi₂juaꞌ₂ ꞌniaꞌ₂ dsa₂ i₂rë₂cánꞌ₄ dso₄ tɨngꞌ₂ cuëꞌ₂ cosa dse₃ chiꞌ₂-guein₂ quiángꞌ₂, ¡ꞌë₂ guë́₄ bá₄ Ŋéiꞌ₅ ꞌniaꞌ₂ i₂guá₅ gueiꞌ₅₄ cuë₃ a₂dse₃ cuë́ꞌ₃ juɨ₁liaꞌ₂ i₂mɨ₅ ja₁coin₂!
12 ꞌꞌUɨg₅₄ jaun₂ në́₃, jmo₄ bá₄ ꞌniaꞌ₂ quianꞌ₅₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌe₂ a₂ꞌniogꞌ₂ ꞌniaꞌ₂ jmo₃ ꞌéi₂ quianꞌ₅₄ ꞌniaꞌ₂; ia₁ a₂në₅ bá₄ ta₁ quíꞌ₅ ca₂le₃jë́₃ Si₂ ꞌÉiꞌ₃, quianꞌ₅₄ guë́₄ Si₂ a₂qui₂ca₂jmo₃ dsa₂ i₂jme₁ꞌë́₂ jág₁ quián₅ Diú₄.
O₄juɨ₅ dsag₂
13 ꞌTiónꞌ₂ ꞌniaꞌ₂ të₂le₃ o₄juɨ₅ dsag₂. Ia₁ a₂ꞌɨ́₂ juëꞌ₂ bá₄ ja₁dsɨ₂tonꞌ₅₄ dsa₂ juɨ₅ a₂jiog₅ ja₁dsɨ₃ꞌéin₂. Ja₂lɨn₃ guë́₄ juɨn₅ dsa₂ i₂dsɨ₂tonꞌ₅₄ juɨ₅ jaun₂;
14 ia₁ caun₂ o₄juɨ₅ dsag₂ rë₂quɨ́ꞌ₅ bá₄ ja₁i₂nio₄ dsa₂ a₂dsi₁lein₅ ja₁le₃chan₂ jme₂dsí₂, jaun₂ tsá₃ lɨn₄ juɨn₅ i₂dsoꞌ₂ juɨ₅ jaun₂.
Të₂le₃ quianꞌ₅₄ mɨ́g₂ a₂ꞌag₅ bá₄ nɨ₁ꞌma₂, jángꞌ₅ léi₄
15 ꞌJmo₄ ꞌniaꞌ₂ ꞌí₁ jaun₂ tsá₃ jme₃gau₅ dsa₂ i₂i₂nio₄ ꞌë́₂ jág₁ a₂juɨ₁gain₂, i₂ja₂lén₂ ja₁conꞌ₂ ꞌniaꞌ₂ qui₂rë₂lɨin₅₄ a₂lɨ́in₅ jáꞌ₂ chaꞌ₂, la₁ të₂le₃ néꞌ₃ të₂dsɨ́₅ lɨ́in₅ juɨ₁liaꞌ₂ lɨ́n₅ dsɨ₂jɨꞌ₅₄ náu₂ tsau₂ dsɨ́₅.
16 La₁ të₂le₃ ꞌa₂ liaꞌ₂ jmo₅-dsáu₅ bá₄ le₃cuɨinꞌ₂ ꞌniaꞌ₂; ia₁ tsá₃ gueiꞌ₅₄ chi₁uɨ́ng₃ taun₅ quɨn₅ dsa₂ juɨ₁liaꞌ₂ mɨ́g₂ uvas. On₃ guëꞌ₂ lé₂ le₃quɨn₃ dsa₂ mɨ́g₂ higos* gueiꞌ₅₄ ꞌma₂ taun₅ jmɨꞌ₅₄.
17 Jaun₂ në́₃, ca₂le₃jë́₃ ꞌma₂ dse₃, mɨ́g₂ dse₃ bá₄ ꞌag₅; ján₃ bá₄ le₂jaun₂ juɨ₁liaꞌ₂ nɨ₁ꞌma₂ ꞌlɨgꞌ₅₄, mɨ́g₂ ꞌlɨgꞌ₅₄ bá₄ ꞌag₅.
18 Juɨ₁liaꞌ₂ nɨ₁ꞌma₂ dse₃, tsá₃ lé₂ le₃ꞌag₃ mɨ́g₂ ꞌlɨgꞌ₅₄; ján₃ guëꞌ₂ le₂jaun₂ tsá₃ lé₂ le₃ꞌag₃ mɨ́g₂ dse₃ juɨ₁liaꞌ₂ nɨ₁ꞌma₂ ꞌlɨgꞌ₅₄.
19 Ca₂le₃jë́₃ nɨ₁ꞌma₂ a₂tsá₃ ꞌag₅ mɨ́g₂ dse₃, jŋiaꞌ₅₄ liaꞌ₂ a₂uɨ́nꞌ₂ bá₄, dsɨꞌ₂ dsi₂si₂.
20 Jaun₂ le₂në₅ bá₄ le₃cuɨinꞌ₂ ꞌniaꞌ₂: të₂le₃ ꞌa₂ liaꞌ₂ lë́₅ jmo₂₃.
Tsá₃ ca₂le₃jɨ́n₃ tɨ́nꞌ₄ ja₁gon₂ Diú₄.
21 ꞌTsá₃ ca₂le₃jɨ́n₃ i₂të́₂ jniá₂: “Te₁guiꞌ₅₄, Te₁guiꞌ₅₄,” dsi₁lein₅ gueiꞌ₅₄ i₂juɨ́g₃ ja₁gon₂ Diú₄; jŋiaꞌ₅₄ liaꞌ₂ jmáꞌ₃ i₂jmo₅ a₂ꞌŋio₂ dsɨ́₅ Ŋeꞌ₃ i₂guá₅ gueiꞌ₅₄ bá₄ dsi₁len₅.
22 Juɨn₅ dsa₂ lé₂ jmɨg₄ jaun₂ i₂juáꞌ₂ tság₃ jniá₂: “Te₁guiꞌ₅₄, Te₁guiꞌ₅₄, ma₂qui₂ca₂ꞌë́₄ jniaꞌ₅₄ jág₁ o₄quiánꞌ₂ ꞌne₂. Quianꞌ₅₄ bí₂ ꞌéiꞌ₃ quiángꞌ₂ në́₃, ma₂qui₂ma₂ꞌuɨnꞌ₅₄ jniaꞌ₅₄ je₂naꞌ₅₄, ma₂qui₂ma₂jmó₁ jniaꞌ₅₄ ꞌlióng₂ léi₄ juëꞌ₂ në́₃.”
23 La₁ jaun₂ guë́₄ në́₃ juɨg₅₄ jniá₂: “O₁lɨ́gꞌ₂ tsá₃ ꞌniaꞌ₂ ca₂rë₃cuɨ́ng₅. Cau₅ jŋiaꞌ₃ ꞌniaꞌ₂ i₂jmoꞌ₂ a₂ꞌlɨgꞌ₅₄.”
Ta₁tɨn₃ ne₅₄ ꞌuɨg₅₄
24 ꞌJaun₂ në́₃, ca₂le₃jɨ́n₃ juɨ₁liaꞌ₂ dsa₂ i₂nag₅ jág₁ quió₃, jmo₂₃ a₂juɨ́g₂ jniá₂, lɨ́in₅ juɨ₁liaꞌ₂ lɨ́n₅ jan₂ dsa₂ i₂ŋɨ́ꞌ₂ dsɨ́₅ i₂ca₂jmógꞌ₃ ꞌne₄ ne₄ ꞌlau₂.
25 Ca₂já₃ jmɨ́₅, qui₂ca₂juëꞌ₂ jmɨg₂ cuá₃, ca₂ꞌág₂ dsí₂ tiá₂ lɨn₃ ca₂jnáu₃ ꞌné₅ jaun₂; la₁ tsá₃ ca₂quɨꞌ₃, ia₁ jme₁chíꞌ₄ bá₄ ꞌuɨg₅₄ ne₄ ꞌlau₂.
26 La₁ ca₂le₃jɨ́n₃ juɨ₁liaꞌ₂ dsa₂ i₂nag₅ jág₁ quió₃, tsá₃ jmo₂₃ guëꞌ₂ a₂juɨ́g₂ jniá₂, lɨ́in₅ juɨ₁liaꞌ₂ lɨ́n₅ jan₂ dsa₂ co₄ i₂tsá₃ ꞌen₅₄ dsɨ́₅, ca₂chiꞌ₃ ꞌné₅ quióꞌ₅ ne₄ ti₁tsag₁.
27 Jme₁ca₂já₃ jmɨ́₅, ca₂juëꞌ₂ jmɨg₂ cuá₃, ca₂ꞌág₂ dsí₂ tiá₂ ca₂jnáu₃ dsoꞌ₂ tsɨ₁ꞌné₅ jaun₂; jaun₂ ca₂quɨꞌ₃ ca₂gon₃ gau₂ lɨn₃.