A₂quen₅ lɨn₃ bá₄ a₂dsɨ₂quénꞌ₅ dsɨ́₅ dsa₂
13
Jmɨg₄ jaun₂ i₂lɨn₅₄ dsa₂ i₂jme₁tionꞌ₅₄ guë́₄ ca₂dsia₃ ca₂tsɨ́ꞌ₃ Jesús ꞌa₂ liaꞌ₂ ca₂jme₃dsian₅ Pilato i₂lɨn₅₄ dsa₂ chan₂ Galilea. Ca₂cóinꞌ₂ jmɨ₄ dsa₂ ꞌéi₂ quianꞌ₅₄ jmɨ₄ jáꞌ₂ i₂ca₂jme₃dsian₅ dsa₂ i₂jéinꞌ₂ ne₄ Diú₄.
San Lucas 13:1-21
2 Jaun₂ ca₂juáꞌ₂ Jesús në́₃:
―¿Lɨ́nꞌ₂ ꞌniaꞌ₂ në́₃, dsa₂ chan₂ Galilea ꞌéi₂ ca₂i₃ŋɨ́i₂ le₂jaun₂ ia₁ ꞌlióng₂ guë́₄ dso₄ jme₁le₁cáinꞌ₄ liaꞌ₂ conꞌ₂ guë́₄ dsa₂ go₅₄?
3 Juáꞌ₅ jniá₂, on₃juaꞌ₅₄ le₂jaun₂; ia₁ le₂në₅ bá₄ ꞌniaꞌ₂ ján₃, në₁juaꞌ₂ tsá₃ ca₂dsi₃quénꞌ₅ ꞌauꞌ₂, dsiángꞌ₃ ján₃.
4 ¿On₃ bá₄ lɨ́nꞌ₂ ꞌniaꞌ₂, ꞌŋio₅ lɨn₃ guë́₄ jme₁le₁cánꞌ₄ dso₄ dsa₂ i₂guia₃-jŋiá₂ i₂ca₂dsan₃ ꞌéi₂, liaꞌ₂ conꞌ₂ ca₂quɨꞌ₃ nɨ₁ꞌiaꞌ₂ ŋei₅ ja₁chei₂ Siloé, liaꞌ₂ conꞌ₂ guë́₄ ca₂le₃jɨ́n₃ i₂tiánꞌ₅ Jerusalén?
5 Juáꞌ₅ jniá₂, on₃juaꞌ₅₄ le₂jaun₂; ia₁ ján₃ bá₄ le₂në₅ ꞌniaꞌ₂, në₁juaꞌ₂ tsá₃ ca₂dsi₃quénꞌ₅ ꞌauꞌ₂, dsiángꞌ₃ bá₄ ján₃.
Jág₁ jángꞌ₅ léi₄ quióꞌ₅ nɨ₁ꞌma₂ higuera a₂tsá₃ mɨ́g₂ ꞌag₅
6 Jaun₂ ca₂juáꞌ₂ táng₃ Jesús jág₁ jángꞌ₅ léi₄ la₂:
―Jan₂ dsa₂ jme₁jnia₄ caun₂ ꞌma₂ a₂ꞌag₅ mɨ́g₂ higo ja₁nau₂ quióꞌ₅, jaun₂ ca₂i₁jag₅₄ chi₂juaꞌ₂ ma₂le₁ꞌág₄ mɨ́g₂. Tsá₃ mɨ́g₂ cha₂ guëꞌ₂ në́₃, jme₁dsióg₃.
7 Jaun₂ ca₂tsɨ́ꞌ₃ dsa₂ i₂jmo₅ ꞌí₁ ja₁nau₂ jaun₂: “Ma₂ꞌnɨ₅ ŋi₂ guio₂₃ i₂jág₃ nɨ₁ꞌma₂ në₅ chi₂juaꞌ₂ le₁ꞌág₄ mɨ́g₂, la₁ caun₂ tsá₃ mɨ́g₂ cha₂ bá₄ liaꞌ₂ co₂ráun₂ guio₅₄. Quiꞌ₅₄ co₂ŋeiꞌ₅₄. Tsá₃ ta₁ jmo₃ jŋiaꞌ₅₄ jme₂dsiá₃ ꞌoꞌ₅₄ ꞌuë₃ bá₄.”
8 La₁ dsa₂ i₂jmo₅ ꞌí₁ ja₁nau₂ ꞌéi₂ në́₃ ca₂ŋag₃: “Te₁guiꞌ₅₄, cuë₄ jmɨg₄ o₁dsi₅₄ guë́₄ caun₂ ŋi₂ la₂; jmo₅₄ dse₃ le₃lágꞌ₃, tóꞌ₄ ꞌmɨg₄ jáꞌ₂ në́₃,
9 o₁ne₄ chi₂juaꞌ₂ ꞌag₃ mɨ́g₂ ŋi₂ caun₂. Në₁juaꞌ₂ tsá₃ ꞌe₂ mɨ́g₂ cha₂ i₁jáun₃, jaun₂ guë́₄ uɨ́nꞌ₂.”
Ca₂jme₃ꞌlión₂ Jesús jan₂ ꞌio₅₄ i₂jme₁quɨnꞌ₅₄ mɨ₂caꞌ₅₄ caun₂ jmɨg₄ sa₅₄
10 Caun₂ sa₅₄, jme₁ꞌen₅₄ Jesús jme₂tɨin₂₃ dsa₂ dsi₂néi₂ guáꞌ₅ sinagoga*.
11 Ja₁jaun₂ jme₁ꞌen₅₄ jan₂ ꞌio₅₄ i₂ma₂guia₃-jŋiá₂ ŋi₂ dsoꞌ₅₄. Ca₂jmógꞌ₂ jme₂dsí₂ ꞌlɨnꞌ₅₄ rë₂guenꞌ₂ mɨ₂caꞌ₅₄, jme₁ŋɨ₂₃ tsá₃ lé₂ néiꞌ₃ rë₂.
12 Jme₁ca₂jág₂ Jesús, jaun₂ ca₂të₃, jaun₂ ca₂juáꞌ₂:
―ꞌIo₅₄, ma₂ca₂ꞌlóngꞌ₂ bá₄ dso₄ a₂jme₁lɨ́ngꞌ₄.
13 Jaun₂ ca₂téi₂ gu₂. Dsɨ₂juɨ₅ le₂jaun₂ bá₄ ca₂néiꞌ₃ mɨ₂caꞌ₅₄ ꞌio₅₄, jaun₂ ca₂jme₃juɨinꞌ₂ Diú₄.
14 La₁ dsa₂ i₂niog₅ ne₄ guáꞌ₅ sinagoga, ca₂rë₃ꞌnéi₃ quianꞌ₅₄ Jesús ia₁ ca₂jme₃ꞌlióin₂ dsa₂ ꞌéi₂ të₃ jmɨg₄ sa₅₄. Jaun₂ ca₂tsɨ́ꞌ₃ dsa₂ i₂tionꞌ₅₄:
―Jŋéi₂ jmɨg₄ bá₄ ca₂tɨ́n₂ dsa₂ jmo₃ ta₁; juɨ₁ja₂lén₂ ꞌein₂ ꞌnio₃ ꞌlión₂ jë₄ semana, on₃juaꞌ₅₄ rëꞌ₂ jme₁sa₅₄.
15 Jaun₂ ca₂ŋag₃ Te₁guiꞌ₅₄ ca₂tsɨ́ꞌ₃ ꞌéi₂:
―¡ꞌNiaꞌ₂ dsa₂ i₂jŋiaꞌ₅₄ dse₃ le₁ꞌág₄ o₁ne₁! ¿Tsa₁ ꞌein₂ ꞌniaꞌ₂ chénꞌ₂ ca₁juɨ₅ o₃ búꞌ₄ quián₅ juaꞌ₅₄ tsá₃ dsɨ₃jiog₃ dsɨ₃ꞌeinꞌ₅₄ jmɨg₂ o₁jŋiaꞌ₅₄ lë́₅ sa₅₄?
16 Ia₁ dsa₂ mɨ́₂ la₂, i₂lɨ́n₅ jan₂ tsɨ₁jon₂ Abraham; i₂së₃dsen₃ jme₁ma₂ꞌneiꞌ₂ ma₂guia₃-jŋiá₂ ŋi₂. Jaun₂ në́₃, ¿tsa₁ ca₂tɨ́in₂ cheinꞌ₂ ján₃ jŋiaꞌ₅₄ të₃ jmɨg₄ sa₅₄?
17 Jme₁ca₂juáꞌ₂ Jesús le₂në₅, ca₂rë₃guiꞌ₅₄ bá₄, ca₂le₃jɨ́n₃ conꞌ₂ dsa₂ i₂ꞌiog₅₄. La₁ ꞌioꞌ₂ jénꞌ₅ të₅ dsɨ́₅ bá₄ dsa₂ i₂tionꞌ₅₄, ca₂le₃jë́₃ a₂jláꞌ₁ jmo₅ ꞌéi₂.
Jág₁ jángꞌ₅ léi₄ juɨ₁liaꞌ₂ mɨ́g₂ jon₂ quióꞌ₅ nɨ₁ꞌma₂ mostaza
18 Ca₂juáꞌ₂ në́₃:
―¿ꞌA₂ liaꞌ₂ le₃juáꞌ₄ lë́₅ ja₁gon₂ Diú₄? ¿ꞌE₂ quianꞌ₅₄ lé₂ le₃quɨ́ng₄?
19 Lë́₅ juɨ₁liaꞌ₂ mɨ́g₂ jon₂ nɨ₁ꞌma₂ mostazaa a₂ca₂jne₃ jan₂ dsa₂ ja₁nau₂ quióꞌ₅. Jaun₂ ca₂i₃cón₃ ca₂dsióg₃ ca₂lë₃ caun₂ nɨ₁ꞌma₂ pa₁; i₁tan₅ në́₃ ca₂tóꞌ₂ tsag₅₄ gu₂ neiꞌ₅₄ jaun₂.
Jág₁ jángꞌ₅ léi₄ juɨ₁liaꞌ₂ ꞌa₂ liaꞌ₂ ronꞌ₂ i₁ŋíꞌ₄
20 Ca₂juáꞌ₂ Jesús le₂la₂ ján₃:
―¿ꞌE₂ quianꞌ₅₄ lé₂ le₃quɨ́ngꞌ₄ lë́₅ ja₁gon₂ Diú₄?
21 Lë́₅ juɨ₁liaꞌ₂ lë́₅ levadura* a₂co₂güɨ́nꞌ₂ jan₂ ꞌio₅₄ jë₄ ꞌnɨ₅ tioꞌ₅₄ ꞌma₂b ti₁can₁ i₁ŋíꞌ₄. Quianꞌ₅₄ co₁séinꞌ₄ levadura bá₄ guionꞌ₂ ca₂le₃jë́₃ ti₁can₁.
Jág₁ jángꞌ₅ léi₄ quióꞌ₅ o₄ꞌné₄ dsag₂
22 Liaꞌ₂ conꞌ₂ ma₂ꞌein₅₄ juɨ₅ a₂dsióg₄ Jerusalén, qui₂ca₂i₁jme₁tɨin₂₃ guë́₄ dsa₂ le₂tan₅₄ juɨg₂ te₁ꞌi₁ ja₁ca₂ŋɨi₅.
San Lucas 13:22-35
23 Jaun₂ ca₂ŋag₃ jan₂ dsa₂:
―Te₁guiꞌ₅₄, ¿meꞌ₂ bá₄ dsa₂ i₂tɨ́nꞌ₅?
Jaun₂ ca₂ŋag₃:
24 ―Quenꞌ₂ ꞌniaꞌ₂ bí₂ tióngꞌ₂ juɨ₅ o₄ꞌné₄ dsag₂; ia₁ juáꞌ₅ jniá₂, juɨn₅ i₂ꞌnio₃ tónꞌ₃, la₁ tsá₃ le₃quɨꞌ₅₄ jmɨg₄.
25 Ia₁ conꞌ₂ tsá₃ ŋó₅ jë₁ma₂të́₂ rë₁náu₃ juɨg₅₄ dsi₂néi₂, jnéi₃ o₄ꞌné₄, ꞌniaꞌ₂ në́₃ i₂të₃tsɨngꞌ₅₄ le₃ca₁ꞌné₄, jme₁liógꞌ₄ toꞌ₅₄ mɨꞌ₅₄ të́ꞌ₄: “¡Te₁guiꞌ₅₄! Nia₄ o₄ꞌné₄, tióꞌ₄ jniaꞌ₅₄.”ꞌÉi₂ në́₃ ŋag₃: “Tsá₃ cuɨ́n₅ jniá₂ ꞌniaꞌ₂; tsá₃ guion₅₄ a₂jáꞌ₄ ja₂nóꞌ₅ ꞌniaꞌ₂.”
26 Jaun₂ guë́₄ jme₁liógꞌ₄ ꞌniaꞌ₂ juaꞌ₅₄: “Jniaꞌ₅₄ bá₄ la₂ i₂ma₂que₅₄ ma₂ꞌneꞌ₅₄ co₂lë₅ quianꞌ₅₄ ꞌne₂; juaꞌ₂ ꞌne₂ bá₄ guëꞌ₂ ca₂jme₁tagꞌ₂ jniaꞌ₅₄ jɨn₄ juɨn₅ dsa₂.”
27 Jaun₂ dsa₂ juɨg₅₄ dsi₂néi₂ në́₃, ŋag₃: “Ma₂në₂juáꞌ₃ jniá₂ tsá₃ guion₅₄ i₂ꞌein₂ ꞌniaꞌ₂. Cau₅ jŋiaꞌ₃ ꞌniaꞌ₂ ca₂le₃jɨ́ngꞌ₃ i₂jmo₅ dsóꞌ₅ a₂ꞌlɨgꞌ₅₄.”
28 Ja₁jaun₂ qui₂o₁ꞌoꞌ₄ o₁quɨ́gꞌ₃ ꞌniaꞌ₂ janꞌ₅₄, jë₁ma₂të́₂ rë₁jɨngꞌ₅₄ Abraham, Isaac, Jacob, quianꞌ₅₄ ca₂le₃jɨ́n₃ guë́₄ dsa₂ i₂jme₁ꞌë́₂ jág₁ quián₅ Diú₄, tioinꞌ₅₄ ja₁gon₂ Diú₄, la₁ ꞌniaꞌ₂ guëꞌ₂ në́₃, dsɨ₃gangꞌ₅₄ uɨ́ng₂.
29 Ia₁ qui₂ja₃len₅ i₂chan₂ ca₂taun₂ ca₂taun₂ mɨ₂güɨ́g₃ ja₃tiainꞌ₂ guë́ꞌ₃ co₂dsia₅ ja₁gon₂ Diú₄.
30 La₁ lé₂, chan₂ i₂lɨn₅₄ i₂tión₂ le₃jë₁ca₂tóꞌ₂, të₃tsɨinꞌ₅₄ le₃ne₄ juɨ₅; i₂tión₂ le₃ne₄ juɨ₅ rë₂në́₃ guëꞌ₂ në́₃, të₃tsɨinꞌ₅₄ le₃jë₁ca₂tóꞌ₂.
Ca₂ꞌo₃ Jesús o₄quióꞌ₄ dsa₂ juɨg₂ Jerusalén
31 Hora jaun₂ dé₄ dsi₃lén₂ i₂lɨn₅₄ dsa₂ fariseos*, ca₂juáꞌ₂:
―Co₂ŋeiꞌ₅₄ dse₃ jú₅ ja₁lá₃, quian₂ juɨ₅ quiángꞌ₂, ia₁ ꞌnio₃ Herodes jŋagꞌ₃.
32 Jaun₂ ca₂ŋag₃ táng₃ Jesús:
―O₂nóꞌ₅ ꞌniaꞌ₂, o₂cheiꞌ₅₄ dsɨ₂ma₂jág₂c ꞌéi₂: “Ŋí₂, la₂ bá₄ ꞌú₄, në₃, ꞌióg₃ në́₃; në₃ bá₄ guë́₄ ꞌuɨngꞌ₅₄ jme₂dsí₂ je₂naꞌ₅₄ quióꞌ₅ dsa₂, në₃ guë́₄ qui₂jme₁ꞌliong₅₄ dsa₂. ꞌIóg₃ caun₂ guë́₄ ꞌŋia₅ quió₃.”
33 A₂caun₂ jmo₅₄ bá₄ jniá₂ ta₁ a₂ca₂tɨ́ng₂ jmo₅₄ të₁liaꞌ₂ chang₂, ia₁ tsá₃ lé₂ le₃jón₂ jan₂ dsa₂ i₂ꞌë́₂ jág₁ quián₅ Diú₄ uɨ́ng₂ ja₁lë́₄ juɨg₂ Jerusalén.
34 ¡ꞌNiaꞌ₂ dsa₂ juɨg₂ Jerusalén! ¡ꞌNiaꞌ₂ dsa₂ juɨg₂ Jerusalén, ꞌniaꞌ₂ i₂jme₂dsiángꞌ₁ dsa₂ i₂ꞌë́₂ jág₁ quián₅ Diú₄, ꞌniaꞌ₂ i₂qui₂jnagꞌ₅₄ cang₄ dsa₂ i₂chen₅ Diú₄ jɨnꞌ₄ ꞌniaꞌ₂! ¡ꞌLióng₂ ráun₂ jme₁ꞌɨ́n₅ dsɨ₃ jme₁chi₁liangꞌ₂ chiꞌ₂-guein₂ juɨg₂ la₂ quiángꞌ₂, juɨ₁liaꞌ₂ jmo₅ i₁tsɨ́nꞌ₃ a₂chi₂lainꞌ₂ guein₂ quiáin₅ toꞌ₂ néꞌ₃ tsɨ₁rë₂cu₅, la₁ guionꞌ₅₄ ꞌniaꞌ₂ tsá₃ ca₂gueꞌ₅₄!
35 Ŋí₂ në́₃, të₃tsɨꞌ₅₄ chi₁güɨ́gꞌ₂ dsi₂néi₂ quiángꞌ₂. Juáꞌ₅ jniá₂, o₁lɨ́gꞌ₂ tsá₃ ma₃jagꞌ₅₄ jniá₂, ca₂liaꞌ₂ ca₂të́₂ jmɨg₄ ja₁juaꞌ₅₄ ꞌniaꞌ₂: “Juɨ₁le₂jŋió₃ i₂në₅ i₂já₅ o₄quióꞌ₄ Te₁guiꞌ₅₄.”