Jág₁ jángꞌ₅ léi₄ juɨ₁liaꞌ₂ dsa₂ i₂séi₂ mɨ́g₂ jon₂
4
Conꞌ₂ siáꞌ₂ táng₃, co₂ráun₂ ca₂jme₃lióg₃ Jesús ca₂jme₃tɨin₂₃ dsa₂ cheiꞌ₅₄ jmɨ₁ŋíꞌ₄. Ia₁ juɨn₅ lɨn₃ dsa₂ ca₂lë₃ në́₃ ca₂ŋɨꞌ₂ ja₁chéinꞌ₄, jaun₂ ca₂ꞌí₃ ꞌŋióꞌ₃ tsɨ₁mu₅ ꞌei₅ cheiꞌ₅₄ jmɨg₂; jaun₂ ja₁jaun₂ ca₂guá₂. Dsa₂ guëꞌ₂ në́₃ ca₂tóinꞌ₂ cheiꞌ₅₄ jmɨg₂.
San Marcos 4:1-23
2 ꞌLióng₂ jág₁ dse₃ ca₂jme₃tag₂₃ të₂le₃ quianꞌ₅₄ jág₁ a₂jángꞌ₅ léi₄. Jë₄ juáꞌ₅ quióꞌ₅ a₂jme₂tag₂₃, ca₂juáꞌ₂:
3 ―Nei₂ ꞌniaꞌ₂: Jan₂ dsa₂ ca₂ŋe₄ ja₁nau₂ ca₂i₁séi₄ mɨ́g₂ jon₂.
4 Jme₁ma₂ꞌein₅₄ séi₂ në́₃, a₂lɨn₅₄ mɨ́g₂ jon₂ i₂gaꞌ₅₄ le₂ꞌi₄ juɨ₅. I₁tan₅ bá₄ ca₂dsi₃lén₂ ca₂cágꞌ₃ a₂jaun₂.
5 A₂lɨn₅₄ guëꞌ₂ mɨ́g₂ jon₂ táng₃, ca₂i₃toꞌ₅₄ jë₄ nɨ₁cang₁, ja₁tsá₃ guaꞌ₅₄ lɨn₄ cha₂. A₂jaun₂ në́₃ tsá₃ uë́₂ ca₂rë₃ꞌag₄, ca₂ꞌia₂, ia₁ tsá₃ jɨꞌ₂ guaꞌ₅₄ ja₁i₃toꞌ₅₄.
6 La₁ jme₁ca₂jnióg₃ ꞌiog₂ në́₃, ca₂rë₃juɨng₅ ca₂rë₃quéin₃ bá₄, ia₁ tsá₃ jmú₄ ꞌlióng₂ jme₁cha₂.
7 A₂lɨn₅₄ guëꞌ₂ ca₂séiꞌ₂ ja₁lë́₄ nɨ₁taun₅. Jme₁ca₂i₃cón₃ nɨ₁taun₅ në́₃, ca₂jlë₃ bá₄ a₂jaun₂, tsá₃ ꞌe₂ ca₂rau₂.
8 La₁ a₂lɨn₅₄ guëꞌ₂ në́₃ ca₂tɨ́n₂ ja₁dse₃ ꞌuë₃. A₂jaun₂ ca₂rau₂ bá₄ dse₃. A₂lɨn₅₄ ca₂ꞌág₂ jma₃guióg₂-guiá₂ mɨ́g₂, liaꞌ₂ ca₂mɨ́g₂ jon₂. A₂lɨn₅₄ guëꞌ₂ jma₃ꞌnagꞌ₂ ne₂guióg₂ mɨ́g₂; a₂lɨn₅₄ guëꞌ₂ jma₃caun₂ ꞌŋiá₂-láu₂ mɨ́g₂.
9 Jaun₂ në́₃, ca₂juáꞌ₂ Jesús:
―Ca₂le₃jɨ́nꞌ₃ ꞌniaꞌ₂ i₂le₁dsɨ₅₄ rë₂gua₄, rë₂ nei₂ ꞌniaꞌ₂.
Ta₁ quíꞌ₅ jág₁ a₂jángꞌ₅ léi₄
10 Jme₁ma₂i₂len₃ dsa₂, jme₁ma₂të₁ꞌŋiái₄ quiainꞌ₅₄ chiꞌ₂ dsɨ₂guia₃-tɨ́n₂, quiainꞌ₅₄ i₂lɨn₅₄ guë́₄ dsa₂ siánꞌ₂, jaun₂ ca₂ŋag₃ ꞌéi₂ ꞌe₂ jág₁ dsau₅ jángꞌ₅ jág₁ jaun₂.
11 Jaun₂ ca₂juáꞌ₂ Jesús:
―Diú₄ bá₄ jmo₅ a₂rë₂ŋɨ́ꞌ₂ ꞌauꞌ₂ ꞌniaꞌ₂ jág₁ a₂rë₂ꞌma₄ ꞌa₂ liaꞌ₂ lë́₅ ja₁goin₂, la₁ dsa₂ i₂tsá₃ i₂nio₄ quianꞌ₅₄ jniá₂ në́₃, ꞌnióꞌ₅ juáꞌ₂ dsa₂ të₂le₃ quianꞌ₅₄ jág₁ a₂jángꞌ₅ léi₄:
12 ia₁jaun₂ i₂në₂jág₃,
la₁ tsá₃ ca₂rë₃líꞌ₄ ꞌe₂ në₂jág₃.
I₂në₂néi₂ në́₃,
la₁ tsá₃ ca₂rë₃líꞌ₄ ꞌe₂ në₂néi₂,
on₃ guëꞌ₂ ca₂ŋɨ́iꞌ₂;
conꞌ₂ tsá₃ ŋó₅ në₁ca₂jéinꞌ₃ dsɨ́₅,
ia₁jaun₂ jme₁ꞌlioin₁₂ jniá₂.a
Juáꞌ₂ Jesús ꞌe₂ jág₁ dsau₅ jein₅ jág₁ juɨ₁liaꞌ₂ dsa₂ i₂séi₂ mɨ́g₂ jon₂
13 Ca₂juáꞌ₂ ján₃:
―¿Tsa₁ ŋɨ́ꞌ₂ ꞌniaꞌ₂ jág₁ a₂jángꞌ₅ léi₄ në₅? ¿ꞌA₂ bá₄ guëꞌ₂ lé₂ le₃ŋɨ́ꞌ₂ ꞌniaꞌ₂ juɨ₁liaꞌ₂ jág₁ a₂jángꞌ₅ léi₄ siáꞌ₂?
14 Juɨ₁liaꞌ₂ lɨ́n₅ dsa₂ i₂séi₂ mɨ́g₂ jon₂, le₂jaun₂ bá₄ lɨ́n₅ juɨ₁liaꞌ₂ dsa₂ i₂ꞌë́₂ jág₁ dse₃ quióꞌ₅ Diú₄.
15 I₂lɨn₅₄ dsa₂ lɨ́in₅ juɨ₁liaꞌ₂ mɨ́g₂ jon₂ a₂i₃gaꞌ₅₄ le₂ꞌi₄ juɨ₅. Nag₂₃ jág₁ dse₃, la₁ dsɨ₂juɨ₅ jaun₂ ja₂ Satanás jŋiáꞌ₂ jág₁ a₂ma₂jnia₄ të₂dsɨ́₅ dsa₂.
16 I₂lɨn₅₄ guëꞌ₂ dsa₂ lɨ́in₅ juɨ₁liaꞌ₂ lë́₅ mɨ́g₂ jon₂ a₂i₃gaꞌ₅₄ jë₄ nɨ₁cang₁. Nag₂₃, gue₂₃ jág₁ a₂ꞌŋio₂ dsɨ́₅.
17 La₁ia₁ tsá₃ uë́₂ tióꞌ₅, ia₁ tsá₃ lɨn₄ jmú₄ cha₂ juaꞌ₅₄ a₂chanꞌ₂ tiá₂ jág₁. Jaun₂ jë₁ma₂ca₂can₃ o₂i₁ dsɨ₅, a₂co₂ꞌein₅ dsa₂ ꞌuɨg₅₄ jág₁ dse₃, dsɨ₂juɨ₅ bá₄ tí₂ táng₃ jág₁.
18 I₂siánꞌ₂ guëꞌ₂ në́₃ lɨ́n₅ co₂ꞌnióꞌ₄ mɨ́g₂ jon₂ a₂i₃gaꞌ₅₄ jë₄ nɨ₁taun₅. Nag₂₃ jág₁ dse₃,
19 la₁ ꞌŋio₅ guë́₄ ꞌɨ₅ dsɨ́₅ o₂meꞌ₅₄ dsɨ₅ a₂cha₂ mɨ₂güɨ́g₃ la₂; ne₄ ꞌuɨg₅₄ ia₁ a₂ꞌɨ́n₅ dsɨ́₅ juɨ₅ ja₁le₃cha₂ cu₄, ja₁në₅ bá₄ ja₁rë₂gain₂ táng₃; tsá₃ caun₂ a₂ꞌɨ́n₅ dsɨ́₅. Ca₂le₃jë́₃ a₂jaun₂ në́₃ jmo₅ jlë₅ jág₁ dse₃, tsá₃ ma₃cuë₂₃ jmɨg₄ a₂ráu₃.
20 La₁ i₂lɨn₅₄ guë́₄ në́₃ nag₂₃, gue₂₃ bá₄ jág₁, chanꞌ₂ tiá₂. Lɨ́in₅ juɨ₁liaꞌ₂ lë́₅ mɨ́g₂ jon₂ a₂i₃gaꞌ₅₄ ja₁dse₃ guaꞌ₅₄. ꞌLióng₂ rau₂. I₂lɨn₅₄ guëꞌ₂ lɨ́n₅ co₂ꞌnióꞌ₄ mɨ́g₂ a₂qui₂ca₂ꞌág₂ guióg₂-guiá₂; i₂lɨn₅₄ guëꞌ₂ co₂ꞌnióꞌ₄ a₂qui₂ca₂ꞌág₂ ꞌnagꞌ₂ ne₂guióg₂, o₃ caun₂ ꞌŋiá₂-láu₂ mɨ́g₂ liaꞌ₂ ca₂mɨ́g₂ mɨ́g₂ jon₂ a₂i₃jnia₄.
Jág₁ jángꞌ₅ léi₄ juɨ₁liaꞌ₂ nɨ₁tsɨ́₅ chi₁guíꞌ₂ si₂
21 Jaun₂ ca₂juáꞌ₂ táng₃ Jesús:
―Në₁juaꞌ₂ quian₅ dsa₂ caun₂ nɨ₁tsɨ́₅ a₂guíꞌ₂ si₂, ¿ꞌa₂ chiꞌ₃? ¿néꞌ₃ tsɨ₁mɨꞌ₂, o₃ néꞌ₃ tsɨ₁cama? Jan₂ꞌón₄. A₂ꞌag₅ gueiꞌ₅₄ bá₄ dsa₂ si₂.
22 Ia₁ ꞌi₁caun₂ cosa tsá₃ cha₂ juaꞌ₅₄ a₂lɨ́n₂ dsa₂ rë₂ꞌma₄, a₂tsá₃ le₃jniá₂; tion₅₄ bá₄ rë₂jniá₂. Ján₃ guëꞌ₂ ꞌi₁caun₂ jág₁ tsá₃ cha₂ juaꞌ₅₄ lɨ́n₂ dsa₂ a₂tsá₃ ꞌein₂ le₃ŋi₅; tion₅₄ bá₄ rë₂ŋi₅ dsa₂.
23 Chi₂juaꞌ₂ ꞌein₂ dsi₅₄ rë₂gua₄, juɨ₁nei₅₄ rë₂.
24 Conꞌ₂ siáꞌ₂ táng₃ ca₂juáꞌ₂ Jesús:
―Tionꞌ₂ ꞌniaꞌ₂ juɨ₅ ꞌe₂ a₂nagꞌ₂. Quianꞌ₅₄ ꞌéiꞌ₃ a₂cauꞌ₂ ꞌniaꞌ₂ guiongꞌ₅₄, ꞌéiꞌ₃ jaun₂ bá₄ quióg₃ Diú₄ quiánꞌ₂ ꞌniaꞌ₂ ján₃, jŋiaꞌ₅₄ të₂le₃ lë́₅ guë́₄.
San Marcos 4:24-41
25 Ia₁ juɨ₁liaꞌ₂ dsa₂ i₂ꞌŋio₂ dsɨ́₅ le₃ŋɨ́iꞌ₂, Diú₄ bá₄ jmo₃ le₃ŋɨ́iꞌ₂ guë́₄ dse₃. La₁ i₂tsá₃ ꞌnio₃ le₃ŋɨ́ꞌ₂ në́₃, Diú₄ bá₄ jmo₃ a₂tsá₃ ma₃le₃ŋɨ́iꞌ₂ co₂ŋeiꞌ₅₄.b
Jág₁ jángꞌ₅ léi₄ juɨ₁liaꞌ₂ ꞌa₂ liaꞌ₂ ꞌia₂ mɨ́g₂ jon₂
26 Jaun₂ ca₂juáꞌ₂ Jesús:
―Le₂jaun₂ bá₄ lë́₅ ja₁gon₂ Diú₄, juɨ₁liaꞌ₂ lë́₅ quianꞌ₅₄ dsa₂ i₂jne₅ ꞌe₂ jne₂₃.
27 Jë₁ma₂ca₂ꞌia₂, qui₂dsɨ₂cón₃ a₂jaun₂. La₁ juɨ₁liaꞌ₂ dsa₂ i₂jne₅ ꞌéi₂ në́₃, o₁jŋiaꞌ₅₄ a₂ꞌuë₂-jmɨ₂ güɨin₂, nau₂ në́₃, la₁ tsá₃ jaun₂ ŋi₅ ꞌa₂ liaꞌ₂ lë́₂ a₂dsɨ₂cón₃.
28 ꞌUë₃ bá₄ liaꞌ₂ lë́₅, jaun₂ bá₄ rau₂. Le₂ꞌuɨg₅₄, tag₄ deꞌ₂ jŋiá₅ ꞌia₂; ŋó₅ jaun₂ ꞌia₂ nɨ₁la₁, lë́₂ nɨ₁guein₂. Ŋó₅ jaun₂ lë́₂ nɨ₁cuɨg₂ lá₅ në́₃.
29 Jë₁ma₂ca₂ron₂, jaun₂ guë́₄ dsɨ₂ꞌáun₂ dsa₂; ia₁ ca₂të́₂ jmɨg₄ a₂ca₂rau₂.c
Jág₁ jángꞌ₅ léi₄ juɨ₁liaꞌ₂ mɨ́g₂ jon₂ quióꞌ₅ nɨ₁ꞌma₂ mostaza
30 Conꞌ₂ siáꞌ₂ táng₃ ca₂juáꞌ₂ Jesús.
―¿ꞌA₂ liaꞌ₂ lë́₅ ja₁gon₂ Diú₄, o₃ ꞌe₂ quianꞌ₅₄ lé₂ le₃quɨn₃?
31 Lë́₅ juɨ₁liaꞌ₂ lë́₅ mɨ́g₂ nɨ₁ꞌma₂ mostaza.d Mɨ́g₂ jon₂ jaun₂ lë́₅ a₂píꞌ₁ guë́₄ ꞌŋio₅ lɨn₃, liaꞌ₂ conꞌ₂ guë́₄ ca₂le₃jë́₃ jon₂ a₂jne₅ dsa₂.
32 Jë₁ma₂ca₂i₃jnia₄ në́₃, dsɨ₂cón₃ dsiog₅ lë́₂ caun₂ nɨ₁ꞌma₂ pa₁, ca₂liaꞌ₂ qui₂rë₂já₂ nɨ₁guꞌ₂ quióꞌ₅. Jaun₂ tianꞌ₅ i₁tan₅ ja₁lë́₄ ꞌenꞌ₂ quióꞌ₅.
Ta₁ a₂quíꞌ₅ jág₁ a₂jángꞌ₅ léi₄ a₂ca₂jme₃tag₅ Jesús
33 Ca₂jme₃tɨn₅ Jesús dsa₂ jág₁ dse₃ të₂le₃ quianꞌ₅₄ ꞌlióng₂ jág₁ a₂jángꞌ₅ léi₄ le₂në₅.
34 ꞌI₁caun₂ jág₁ tsá₃ jme₁cuë₂₃ juaꞌ₅₄ tsá₃ të₂le₃ quianꞌ₅₄ jág₁ a₂jángꞌ₅ léi₄. La₁ jë₁ma₂të₁ꞌŋiái₄ conꞌ₂ guioin₅₄ quiainꞌ₅₄ chiꞌ₂ dsɨ₂guia₃-tɨ́n₂ quiáin₅, jme₁juáꞌ₂ liaꞌ₂ rë₂jiá₃ jág₁.
Ca₂jmo₃ Jesús ca₂ꞌág₂ tei₄ jmɨ₁ŋíꞌ₄, ca₂jŋiaꞌ₃ dsí₂ në́₃
35 Le₃ca₂nei₂ jmɨg₄ jaun₂ ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅:
―Ma₃ le₃ꞌŋoꞌ₅₄ jmɨ₁ŋíꞌ₄ le₃ó₃.
36 Tionꞌ₅₄ jaun₂ dsa₂ cheiꞌ₅₄ jmɨ₁ŋíꞌ₄, ca₂ŋó₃ Jesús ca₂jiog₃ chiꞌ₂ dsɨ₂guia₃-tɨ́n₂ ꞌŋióꞌ₃ tsɨ₁mu₅ ja₁jme₁ꞌein₅₄ táun₂ jág₁. Ján₃ bá₄ i₂lé₂ guë́₄ tsɨ₁mu₅ siáꞌ₂ quiongꞌ₅₄, tionꞌ₅₄ dsa₂.
37 Jme₁co₂lág₂ jaun₂ ca₂ꞌág₂ dsí₂ tiá₂ lɨn₃, jaun₂ qui₂ca₂jnáꞌ₃ jmɨg₂ ꞌŋio₅ lɨn₃ ca₂liaꞌ₂ ca₂i₃ꞌa₄ jmɨg₂ ꞌŋióꞌ₃ tsɨ₁mu₅, jŋiaꞌ₅₄ meiꞌ₂ tsá₃ ca₂canꞌ₂.
38 Jme₁rë₂güɨ́n₃ bá₄ Jesús ŋó₃ le₃chi₁coꞌ₅₄ rë₂dsɨn₅ ꞌmɨꞌ₂ dsi₅₄. Jaun₂ ca₂ŋei₃ dsa₂, ca₂juáꞌ₂:
―¡Të₅! ¿Tsa₁ dsan₂ ꞌauꞌ₂ juaꞌ₂ dsɨ₃ꞌéin₂ jniaꞌ₅₄ ja₁lá₃?
39 Ca₂nau₂ Jesús jaun₂ në́₃, ca₂jéin₂ dsí₂, ca₂jéin₂ jmɨ₁ŋíꞌ₄ në́₃, ca₂juáꞌ₂:
―¡Jme₁ꞌua₅₄! ¡Tei₄ jmo₄!
Jaun₂ dsɨ₂juɨ₅ jaun₂ bá₄ ca₂ꞌág₂ táng₃ tei₄ jmɨ₁ŋíꞌ₄, dsí₂ në́₃ ca₂jŋiaꞌ₃.
40 Jaun₂ ca₂juáꞌ₂ Jesús ca₂tsɨ́ꞌ₃ chiꞌ₂ dsɨ₂guia₃-tɨ́n₂ quiáin₅:
―¿ꞌE₂ lë₃ ŋɨ́₄ ꞌŋio₅ ganꞌ₃ ꞌniaꞌ₂? ¿ꞌA₂ bá₄ liaꞌ₂ ŋɨ́₄ tsá₃ rë₂ꞌénꞌ₂ ꞌniaꞌ₂?
41 Jaun₂ i₃góꞌ₃ dsɨ́₅ ꞌŋio₅ lɨn₃, qui₂ca₂tsɨ́ꞌ₃ rɨinꞌ₅₄:
―¿ꞌEin₂ bá₄ lɨ́n₅ i₂në₅ ca₂të₂ jmɨ₁ŋíꞌ₄, ca₂të₂ dsí₂ në́₃ qui₂nag₅ gau₂ jág₁ quióꞌ₅?