Ca₂jme₃ꞌlión₂ Jesús jan₂ dsa₂ i₂lɨ́n₅ ꞌméꞌ₅ ꞌiog₅
8
Jme₁ca₂sión₃ Jesús máꞌ₂, juɨn₅ lɨn₃ dsa₂ jme₂quiongꞌ₅₄.
2 Jaun₂ ca₂jme₃quián₃ jan₂ dsa₂ dsoꞌ₅₄ i₂lɨ́n₅ ꞌméꞌ₅ ꞌiog₅, ca₂chi₃jné₃ ne₄ Jesús, jaun₂ ca₂juáꞌ₂:
―Chi₂juaꞌ₂ ꞌniogꞌ₂ ꞌne₂, Te₁guiꞌ₅₄, lé₂ bá₄ jme₁ꞌlioꞌ₅₄ jniá₂.
3 Jaun₂ Jesús në́₃ ca₂néiꞌ₃ gu₂, ca₂jŋaꞌ₃ quióꞌ₅ dsa₂ ꞌéi₂, jaun₂ ca₂juáꞌ₂:
―ꞌNio₃ bá₄ jniá₂. Jme₁ꞌliong₅₄ ꞌne₂.
―Në₃ jaun₂, tsá₃ lë₁ꞌein₂ juɨgꞌ₂ ꞌi₁jan₂; jŋiaꞌ₅₄ liaꞌ₂ guanꞌ₂ o₂jme₁jnia₅ ne₄ jme₂dsa₂, jaun₂ o₂jenꞌ₅₄ a₂ꞌnióꞌ₅ jme₁tiꞌ₄ conꞌ₂ lë́₅ ꞌÉiꞌ₃ quióꞌ₅ Moisés, ia₁jaun₂ le₃ŋi₅ dsa₂ a₂ma₂le₁jɨ́ngꞌ₃.a
ꞌA₂ liaꞌ₂ jme₁ꞌén₂ jan₂ juɨg₅₄ ꞌlióg₂ romano
5 Jme₁ca₂ꞌí₃ Jesús jë₄ juɨg₂ Capernaum, ca₂jme₃quián₃ jan₂ juɨg₅₄ ꞌlióg₂ romano coin₂, jaun₂ ca₂mɨ₃ a₂jme₃ꞌo₅₄ ꞌéi₂, ca₂juáꞌ₂:
6 ―Te₁guiꞌ₅₄, jan₂ dsó₂ i₂jme₂ti₃ ta₁ ne₃, ron₅ dsoꞌ₅₄ ŋág₅ uɨg₅ ja₁quió₃; a₂ꞌuaꞌ₂ quióꞌ₅, tsá₃ lé₂ jë́ꞌ₂ gu₂-tag₅₄.
7 Jaun₂ ca₂juáꞌ₂ Jesús:
―Nei₅₄ bá₄ jniá₂ i₁jme₁ꞌlioin₁₂.
8 Jaun₂ ca₂ŋag₃ juɨg₅₄ ꞌlióg₂:
―Te₁guiꞌ₅₄, tsá₃ ca₂tɨ́n₂ jniá₂ juaꞌ₅₄ o₁ꞌúꞌ₃ ꞌne₂ dsi₂néi₂ quió₃; jŋiaꞌ₅₄ liaꞌ₂ a₂jme₁jmóꞌ₂ ꞌéiꞌ₃ bá₄, jaun₂ ꞌlión₂ dsa₂ ꞌéi₂ quiáng₃.
9 Ia₁ le₂në₅ bá₄ jniá₂ ꞌŋió₃, chéngꞌ₅ a₂jme₂ti₅₄ ꞌéiꞌ₃ quióꞌ₅ juɨg₃, ján₃ bá₄ le₂në₅ te₁negꞌ₅₄ ꞌlióg₂ i₂niog₅ gu₃, ꞌe₂ caun₂ ꞌnio₃ jniá₂ lé₂. Në₁juaꞌ₂ ca₂juɨ́g₂ jniá₂: “Gua₂ jó₄”, ja₁jaun₂ dsó₃ bá₄; në₁juaꞌ₂ ca₂juɨ́g₂ jniá₂ i₂siánꞌ₂ guëꞌ₂ táng₃: “Ŋia₅”, jiá₃ bá₄. Në₁juaꞌ₂ ca₂juɨ́g₂ jniá₂ dsa₂ siánꞌ₂ quiáng₃: “O₂jmo₄ a₂la₂ a₂ó₃”, a₂jaun₂ dsɨ₃jmó₂ bá₄.
10 Jme₁ca₂nág₂ Jesús a₂juáꞌ₂ dsa₂ ꞌéi₂, ca₂i₃góꞌ₃ dsɨ́₅, jaun₂ ca₂tsɨ́ꞌ₃ dsa₂ i₂jme₁quiainꞌ₅₄:
―A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, ca₂liaꞌ₂ ꞌi₁jan₂ dsa₂ juɨg₂ Israel*, tsá₃ i₂ma₂jɨn₄ jniá₂ i₂ꞌén₂ guë́₄ lɨn₃ liaꞌ₂ ꞌén₂ dsa₂ la₂.
11 Jniá₂ juɨ́g₂ ꞌniaꞌ₂, juɨn₅ dsa₂ i₂qui₂ja₃lén₂ ca₂le₂con₂ guaꞌ₅₄ ꞌuë₃, a₂tiainꞌ₃ co₂lë₅ guë́ꞌ₃ quianꞌ₅₄ Abraham, quianꞌ₅₄ Isaac, Jacob në́₃ ja₁gon₂ Diú₄ gueiꞌ₅₄ i₂juɨ́g₃;
12 la₁ dsa₂ i₂jme₁ca₂tɨ́n₂ tónꞌ₃ ja₁gon₂ Diú₄, dsɨ₃toinꞌ₅₄ jë₄ qui₁néꞌ₃ uɨ́ng₂, qui₂dsɨ₃ꞌáu₃, quɨ́gꞌ₃ jan₅₄.
13 Jaun₂ ca₂juáꞌ₂ Jesús ca₂tsɨ́ꞌ₃ juɨg₅₄ ꞌlióg₂:
―Guanꞌ₂ dsi₂néi₂ quiángꞌ₂. Lé₂ bá₄ conꞌ₂ lë́₅ ꞌéngꞌ₂.
Dsónꞌ₂ rëꞌ₂ hora jaun₂ ca₂ꞌlón₂ dsó₂ mozo quián₅ dsa₂ ꞌéi₂.
Ca₂jme₃ꞌlión₂ Jesús ma₂chog₅₄ Pe₄.
14 Co₂ráun₂ ŋó₃ Jesús ja₁quióꞌ₄ Pe₄. Ja₁jaun₂ jme₁rë₂quian₅ ma₂chog₅₄ Pe₄ a₂dsoꞌ₅₄ ꞌi₄ dséi₂.
15 Jaun₂ ca₂jŋaꞌ₃ Jesús gu₂ dsa₂ dsoꞌ₅₄, jaun₂ dsɨ₂juɨ₅ le₂jaun₂ bá₄ ca₂o₃ꞌág₃ dséi₂. Jaun₂ ca₂nau₂ ma₂chog₅₄ Pe₄ ca₂jme₃lióg₃ ca₂jme₃ti₃ ta₁ ne₄ mesa, a₂agꞌ₃.
Ca₂jme₃ꞌlión₂ Jesús juɨn₅ lɨn₃ dsa₂ dsoꞌ₅₄
16 Le₃ca₂nei₂ jaun₂, juɨn₅ lɨn₃ dsa₂ i₂jiog₅ jme₂dsí₂ je₂naꞌ₅₄, ca₂o₃jŋia₃ dsa₂ ne₄ Jesús; jaun₂ quianꞌ₅₄ ca₂jon₄ jág₁ bá₄ ca₂ꞌuɨ́inꞌ₂ jme₂dsí₂ ꞌlɨnꞌ₅₄. Jaun₂ ca₂jme₃ꞌlióin₂ ján₃ ca₂le₃jɨ́n₃ dsa₂ dsoꞌ₅₄.
17 Le₂në₅ bá₄ ca₂rë₃ti₃ jág₁ quióꞌ₅ Isaías i₂jme₁ꞌë́₂ jág₁ o₄quióꞌ₄ Diú₄ jme₁ca₂juáꞌ₂:
ꞌÉi₂ bá₄ ca₂jŋiáꞌ₂ a₂jme₁ꞌuau₅₄ jniog₄,
ꞌéi₂ bá₄ ca₂can₃ guei₂ jmɨ₁uɨg₅ quián₂ jniog₄.b
Dsa₂ i₂jme₁ꞌnio₃ jme₃quianꞌ₅₄ Jesús
18 Jme₁ca₂jág₃ Jesús juɨn₅ lɨn₃ dsa₂ le₁lio₃, jaun₂ ca₂jmo₃ ꞌéiꞌ₃ a₂ŋɨ́₃ dsa₂ quiáin₅ të₂le₃ ꞌŋoꞌ₅₄ jmɨ₁ŋíꞌ₄.
19 Jaun₂ ca₂jme₃quián₃ jan₂ të₅juáꞌ₅ coin₂, jaun₂ ca₂juáꞌ₂:
―Të₅, nei₅₄ jniá₂ quianꞌ₅₄ ꞌne₂ ca₂le₂con₂ ja₁gogꞌ₅₄.
20 Jaun₂ ca₂ŋag₃ Jesús:
―I₂cha₂ të₂ꞌlau₂ quióꞌ₅ bá₄ juɨ₁liaꞌ₂ i₁güɨ₅, ján₃ bá₄ le₂jaun₂ juɨ₁liaꞌ₂ i₁tan₅ i₂ꞌɨn₅ gueiꞌ₅₄, i₂tioꞌ₅₄ tsag₄ bá₄ ꞌéi₂. La₁ Jaun₅* dsa₂ mɨ₂güɨ́g₃ në́₃, tsá₃ ja₁cha₂ juaꞌ₅₄ ja₁quióg₃ ca₂tiá₂.
21 Jan₂ guëꞌ₂ i₂siánꞌ₂ i₂jme₁ma₂ŋó₅ quiongꞌ₅₄ ca₂juáꞌ₂:
―Te₁guiꞌ₅₄, ¿tsa₁ cuë́ꞌ₁ jmɨg₄ a₂négꞌ₄ i₁ꞌong₃ deꞌ₂ jŋiá₅ ŋeꞌ₃?
22 La₁ ca₂ŋag₃ Jesús:
―ꞌÉin₃ ꞌne₂ jniá₂, juɨ₁dsi₂ꞌón₃ bá₄ ꞌlag₄, ꞌlag₄ rɨinꞌ₅₄.
Ca₂jmo₃ Jesús ca₂ꞌág₂ tei₄ jmɨ₁ŋíꞌ₄, ca₂jŋiaꞌ₃ dsí₂ në́₃
23 Jaun₂ në́₃, ca₂ꞌí₃ Jesús ꞌŋióꞌ₃ tsɨ₁mu₅, quianꞌ₅₄ dsa₂ i₂ma₂quiainꞌ₅₄.
24 Jme₁ma₂tioinꞌ₅₄ ne₄ jmɨg₂, ca₂ꞌág₂ dsí₂ tiá₂ lɨn₃ conꞌ₂ tsá₃ jáin₅. Ca₂liaꞌ₂ ma₂dsɨ₂jein₃ jmɨg₂ ꞌŋióꞌ₃ tsɨ₁mu₅. La₁ jme₁rë₂güɨ́n₃ bá₄ Jesús ŋó₅.
25 Jaun₂ ca₂i₁ŋei₅₄ bá₄ dsa₂ quiáin₅, jaun₂ ca₂juáꞌ₂:
―¡Te₁guiꞌ₅₄, lio₄! ¡Ia₁ dsɨ₃ꞌéin₂ jniaꞌ₅₄c ja₁lá₃!
26 Jaun₂ ca₂ŋag₃ Jesús:
―¿ꞌE₂ lë₃ ŋɨ́₄ lë₃ ganꞌ₃ ꞌniaꞌ₂ dsa₂ i₂tsá₃ lɨn₄ ꞌén₂?
Jaun₂ ca₂nau₂ ca₂jéin₂ dsí₂, jmɨ₁ŋíꞌ₄ në́₃, jaun₂ co₂ŋeiꞌ₅₄ ca₂të₁tsɨꞌ₅₄ táng₃ tei₄.
27 Jaun₂ ca₂i₃góꞌ₃ dsɨ́₅ dsa₂, qui₂ca₂ŋɨ́iꞌ₃ rɨinꞌ₅₄:
―¿I₂ꞌein₂ bá₄ dsa₂ në₅, le₂jiog₅ dsí₂ le₂jiog₅ jmɨ₁ŋíꞌ₄ nag₅ gau₂ jág₁ quióꞌ₅?
Dsa₂ i₂chan₂ Gadara i₂jme₁tionꞌ₅₄ je₂naꞌ₅₄ të₂dsɨ́₅
28 Jme₂ca₂dsióg₃ Jesús le₃ca₂ton₂ jmɨ₁ŋíꞌ₄, të₂le₃ ꞌuë₃ Gadara,d jaun₂ ca₂ꞌuɨn₂ on₃ dsa₂ jë₄ le₁ꞌon₅ ꞌlag₄, jaun₂ ca₂jme₃quiáin₃ con₂ Jesús. Le₃on₃ dsa₂ ꞌéi₂ jme₁jiog₅ je₂naꞌ₅₄, jaun₂ ꞌŋio₅ lɨn₃ jme₁tsau₂ dsɨ́₅, ꞌi₁jan₂ dsa₂ tsá₃ ꞌein₂ lé₂ le₃ŋɨ́₃ juɨ₅ jaun₂.
29 Jaun₂ ca₂tóinꞌ₂ co₂mɨꞌ₅₄ ca₂juáꞌ₂ tiá₂:
―¿ꞌE₂ ꞌuɨg₅₄ tiánꞌ₅ ꞌne₂ jë₄ quianꞌ₅₄ jniaꞌ₅₄, Jesús Ja₁ŋiꞌ₅₄ Diú₄? ¿A₂ŋeꞌ₃ ꞌne₂ ja₁lá₃ a₂jmogꞌ₅₄ jniaꞌ₅₄ të₃jŋiá₅?
30 Meꞌ₂ cau₅ jaun₂, jme₁tionꞌ₅₄ juɨn₅ i₁ŋí₅ guë́ꞌ₅;
31 jaun₂ qui₂ca₂mɨ₃ je₂naꞌ₅₄ ne₄ Jesús, ca₂juáꞌ₂:
―Chi₂juaꞌ₂ ꞌuagꞌ₅₄ jniaꞌ₅₄ ja₁lá₃, chei₅ jniaꞌ₅₄ dsi₁tióꞌ₄ quióꞌ₅ i₁ŋí₅ ꞌo₃.
32 Jaun₂ ca₂juáꞌ₂ Jesús:
―O₂nóꞌ₅ ꞌniaꞌ₂.
Jaun₂ ca₂ꞌuɨn₂ jme₂dsí₂ ꞌlɨnꞌ₅₄ të₂dsɨ́₅ dsa₂ ꞌéi₂, jaun₂ ca₂i₃toinꞌ₅₄ të₂dsɨ́₅ i₁ŋí₅. Dsɨ₂juɨ₅ le₂jaun₂ bá₄ ca₂i₁nio₁ co₂chiꞌ₅₄ i₁ŋí₅ cuɨng₂₃ juɨ₅ siá₅, jaun₂ ca₂i₁seinꞌ₃ të₂ jmɨ₁ŋíꞌ₄. Ja₁jaun₂ ca₂dsain₃ ca₂ꞌɨnꞌ₃ jmɨg₂.
33 Dsa₂ i₂jme₁jmo₅ ꞌí₁ i₁ŋí₅ në́₃ ca₂cuɨng₃. Jme₁dsi₃lein₃ jë₄ juɨg₂ ca₂dsia₃ a₂ca₂lë₃ jaun₂, quianꞌ₅₄ a₂ca₂lë₃ quianꞌ₅₄ dsa₂ i₂jme₁tionꞌ₅₄ je₂naꞌ₅₄ në́₃.
34 Ca₂le₃jɨ́n₃ dsa₂ chan₂ juɨg₂ jaun₂ në́₃ ca₂ꞌuɨin₂ i₃léin₂ ja₁ꞌen₅₄ Jesús. Jaun₂ jme₁ca₂jɨ́in₂ Jesús në́₃, ca₂chi₃quióng₂ jmɨg₄ a₂o₃ꞌɨin₅ le₂con₂ jaun₂.