Ca₂jme₃ꞌlión₂ Jesús jan₂ dsa₂ mozo quián₅ juɨg₅₄ ꞌlióg₂ romano
7
Jme₁ca₂dsan₃ cuë₂₃ jág₁ le₂në₅, ca₂le₃jɨ́n₃ bá₄ dsa₂ qui₂ca₂nág₂, jaun₂ ca₂ŋó₃ juɨ₅ juɨg₂ Capernaum.
San Lucas 7:1-35
2 Ja₁jaun₂ jme₁guá₄ jan₂ juɨg₅₄ ꞌlióg₂ romano i₂jme₁ꞌŋio₅ jan₂ dsa₂ i₂jme₁jme₂ti₃ ne₅₄, i₂jme₁ꞌnioi₃ lɨn₃. ꞌÉi₂ në́₃ jme₁dsoꞌ₅₄ jme₁ma₂rë₂quiain₂₃ jóin₂.
3 Jme₁ca₂rë₃ŋi₅ juɨg₅₄ ꞌlióg₂ a₂ꞌɨn₅ dsa₂ Jesús, jaun₂ ca₂chein₃ jan₂-on₃ dsa₂ canꞌ₅₄ quián₅ dsa₂ judíos* a₂i₃léin₂ a₂i₁mɨ₂ ne₄ Jesús a₂jiá₃ jme₃ꞌlióin₂ dsa₂ mozo quiáin₅.
4 Jme₁dsi₃léin₂ ja₁ꞌen₅₄ Jesús, ca₂mɨ₃ tion₅₄-jan₃, ca₂juáꞌ₂:
―Ca₂tɨ́n₂ bá₄ guiꞌ₅₄ juɨg₅₄ ꞌlióg₂ ꞌéi₂ a₂jme₁ꞌoinꞌ₄,
5 ia₁ ꞌŋio₅ lɨn₃ bá₄ ꞌnioi₃ dsa₂ juɨg₂ go₄ jniog₄. Ia₁ ꞌéi₂ bá₄ ca₂jmo₃ ꞌéiꞌ₃ a₂ca₂lág₃ guáꞌ₅ sinagoga* quián₂ jniaꞌ₅₄.
6 Jaun₂ ca₂ŋó₃ bá₄ guëꞌ₂ Jesús quianꞌ₅₄ ꞌéi₂. La₁ jme₁ma₂ja₂quián₃ dsi₁léin₂ dsi₂néi₂ jme₁ca₂chen₃ táng₃ guiꞌ₅₄ juɨg₅₄ ꞌlióg₂ jan₂-on₃ a₂mei₅₄ quiáin₅, a₂quian₅ jág₁ a₂juáꞌ₂:
―Te₁guiꞌ₅₄, tsá₃ cánꞌ₁ ta₁ juaꞌ₅₄ a₂gogꞌ₅₄ të₂ ja₁quió₃, ia₁ tsá₃ ca₂tɨ́ng₂ juaꞌ₅₄ a₂o₁ꞌúꞌ₃ dsi₂néi₂ quió₃.
7 ꞌUɨg₅₄ jaun₂ i₂jiog₅ dsɨ₃, ¿i₂ꞌein₂ bá₄ jniá₂ juaꞌ₅₄ nei₅₄ ꞌŋió₃ të₂ ja₁congꞌ₂? La₁ tióꞌ₅ juaꞌ₅₄ ca₂jon₄ bá₄ jág₁ quiángꞌ₂ të₂në₅, ia₁jaun₂ jŋia₃ dsoꞌ₅₄ mozo quiáng₃.
8 Ia₁ le₂në₅ bá₄ jniá₂ ꞌŋió₃ chéngꞌ₅ jme₂ti₅₄ ne₄ juɨg₃, ján₃ bá₄ niog₅ gu₃ ꞌlióg₂ i₂te₁negꞌ₄. Në₁juaꞌ₂ ca₂juɨ́g₂ jniá₂, “Gua₂ jó₄”, ja₁jaun₂ dsó₃ bá₄; në₁juaꞌ₂ ca₂juɨ́g₂ “Ŋia₅ ja₁lá₃”, jiá₃ bá₄. Ján₃ guëꞌ₂ le₂jaun₂ në₁ca₂juɨ́g₂ “O₂jmo₄ a₂la₂ a₂ó₃”, a₂jaun₂ dsɨ₃jmó₂ bá₄.
9 Jme₁ca₂nág₂ Jesús jág₁ në₅, ca₂i₃góꞌ₃ dsɨ́₅ o₄quióꞌ₄ dsa₂ ꞌéi₂, jaun₂ ca₂jéinꞌ₃ ca₂jɨ́in₂ dsa₂ i₂quiainꞌ₅₄, jaun₂ ca₂juáꞌ₂:
―Të₃dsónꞌ₂ bá₄, ca₂liaꞌ₂ ꞌi₁jan₂ dsa₂ chan₂ Israel* tsá₃ ma₂ca₂dsánꞌ₂ jniá₂ i₂ꞌén₂ liaꞌ₂ ꞌén₂ dsa₂ në₅.
10 Jme₁ca₂dsi₃len₃ dsa₂ i₂chen₄ ꞌéi₂ dsi₂néi₂, ma₂ca₂ꞌlón₂ bá₄ dsa₂ mozo i₂jme₁dsoꞌ₅₄.
Ca₂jme₃jenꞌ₅₄ Jesús ja₁ŋiꞌ₅₄ jan₂ ꞌio₅₄ ꞌnág₂
11 Cang₂ jaun₂ ca₂ŋó₃ táng₃ Jesús caun₂ juɨg₂ ja₁chei₂ Nain, jaun₂ ca₂jme₃quiainꞌ₅₄ chiꞌ₂ dsɨ₂guia₃-tɨ́n₂ quiáin₅, i₃léin₂ quianꞌ₅₄ juɨn₅ guë́₄ dsa₂ siánꞌ₂ në́₃.
12 Jme₁ja₂quián₃ dsióg₄ ja₁dsɨ₂tonꞌ₅₄ dsa₂ o₄ꞌné₄ juɨg₂, ca₂jág₃ ca₂ꞌuɨn₂ dsa₂ i₃ꞌóin₃ jan₂ ꞌlag₄, i₂jan₂ tan₅₄ ꞌéi₂ ja₁ŋiꞌ₅₄ jan₂ ꞌio₅₄ ꞌnág₂. Juɨn₅ lɨn₃ bá₄ dsa₂ juɨg₂ i₂jme₁quiongꞌ₅₄ i₃ꞌo₃.
13 Ca₂táꞌ₂ ŋéi₂ dsɨ́₅ Te₁guiꞌ₅₄ jme₁ca₂jág₂, jaun₂ ca₂juáꞌ₂:
―Tsá₃ ꞌau₂.
14 Jaun₂ ca₂jme₃quiáin₃ ca₂nɨ́iꞌ₃ tsɨ₁gu₅. Ca₂jŋia₃ bá₄ guëꞌ₂ dsa₂ i₂jme₁le₁te₂, jaun₂ ca₂juáꞌ₂ Jesús ca₂tsɨ́ꞌ₃ ꞌlag₄:
―¡ꞌNe₂ juɨ́g₂ jniá₂ chiꞌ₂, nau₂!
15 Jaun₂ në́₃ ca₂guá₂ ꞌlag₄, ca₂jme₃lióg₃ ca₂dsia₃ jág₁, jaun₂ ca₂jángꞌ₂ Jesús ne₄ chog₅₄.
16 Jme₁ca₂të́₂ ne₄ dsa₂ a₂ca₂lë₃ jaun₂, ca₂i₃góꞌ₃ dsɨ́₅ ca₂le₃jɨ́in₃, jaun₂ ca₂jme₃juɨinꞌ₂ Diú₄, ca₂juáꞌ₂:
―Ma₂ca₂rë₃jniá₂ jan₂ dsa₂ juɨnꞌ₂ i₂ꞌë́₂ jág₁ quián₅ Diú₄ jë₄ quián₂ jniog₄.
Juáꞌ₂ në́₃:
―Ma₂guan₅ Diú₄ a₂jme₃ꞌoin₅₄ dsa₂ juɨg₂ quiáin₅.
17 Le₂con₂ ja₁tén₄ ꞌuë₃ Judea, le₂con₂ ma₂quián₅ jaun₂ në́₃, qui₂ca₂rë₃ŋi₅ dsa₂ a₂ca₂jmo₃ Jesús jaun₂.
Dsa₂ i₂ca₂chen₃ Juan₅₄ i₂chon₅ dsa₂ jmɨg₂
18 Ca₂rë₃ŋi₅ Juan₅₄ ca₂le₃jë́₃ a₂jaun₂, ia₁ ca₂dsia₃ dsa₂ i₂jme₁quiainꞌ₅₄. Jaun₂ ca₂të́ꞌ₃ on₃ dsa₂ ꞌéi₂,
19 jaun₂ ca₂chei₃ ne₄ Te₁guiꞌ₅₄ a₂dsɨ₃ŋag₅₄ chi₂juaꞌ₂ të₃dsónꞌ₂ lɨ́in₅ dsa₂ i₂lë́₅ jág₁ jiá₃, o₃ jŋiai₃ i₂siánꞌ₂ ꞌe₂.
20 Jaun₂ dsa₂ ꞌéi₂ në́₃, ca₂jme₃quiáin₃ con₂ Jesús jaun₂ ca₂juáꞌ₂:
―Juan₅₄ i₂chon₅ dsa₂ jmɨg₂ në₂chei₃ jniaꞌ₅₄ a₂ŋag₄ ꞌne₂ chi₂juaꞌ₂ të₃dsónꞌ₂ lɨ́ngꞌ₅ i₂lë́₅ jág₁ jiá₃, ¿o₃ jŋia₄ jniaꞌ₅₄ i₂siánꞌ₂ ꞌe₂?
21 Të₃jë₄ jaun₂, ca₂jme₃ꞌlión₂ Jesús juɨn₅ lɨn₃ dsa₂ i₂jme₁le₁dsoꞌ₅₄, ca₂le₃jë́₃ ne₅₄ jmɨ₁uɨg₅ a₂jme₁le₁quian₅ dsa₂; liaꞌ₂ jme₂dsí₂ ꞌlɨnꞌ₅₄ në́₃ qui₂ca₂ꞌuɨ́inꞌ₂; qui₂ca₂jmógꞌ₃ jme₁ne₁ dsa₂ i₂jme₁ten₄.
22 Jaun₂ guë́₄ ca₂jéinꞌ₃ jág₁ quióꞌ₅ ꞌéi₂, ca₂juáꞌ₂:
―O₂nóꞌ₅ ꞌniaꞌ₂ o₂dsia₄ o₂cheiꞌ₅₄ Juan₅₄ ꞌe₂ ca₂të́₂ neꞌ₅₄, ꞌe₂ a₂qui₂në₂neiꞌ₂ në́₃. Qui₂jág₅ juɨ₁liaꞌ₂ dsa₂ ten₄; të₁i₂nio₄ táng₃ dsa₂ i₂tsá₃ lé₂ jme₁i₂nio₄; të₂tsɨnꞌ₅₄ le₁jɨ́n₃ i₂jme₁lɨ́n₄ ꞌméꞌ₅ ꞌiog₅; qui₂nag₅ táng₃ dsa₂ i₂jme₁guɨn₄ në́₃; le₂jaun₂ guëꞌ₂ ꞌlag₄ në́₃ qui₂jeinꞌ₅₄ táng₃; ja₁con₂ dsa₂ dsɨ₂ŋé₂ dsɨ₂ꞌag₅ jág₁ dse₃ a₂lión₂ dsa₂.
23 ꞌE₂ guë́₄ dsen₃ dsa₂ i₂tsá₃ ꞌag₅ caun₂-tɨn₃ dsɨ́₅ o₄quió₃ jniá₂.
24 Jme₁ma₂i₂len₃ dsa₂ i₂ca₂chen₃ Juan₅₄ ꞌéi₂, jaun₂ ca₂jme₃lióg₃ Jesús ca₂tsɨ́ꞌ₃ dsa₂ a₂ꞌɨin₂₃ Juan₅₄, ca₂juáꞌ₂:
―¿ꞌE₂ ca₂i₁jagꞌ₄ ꞌniaꞌ₂ liaꞌ₂ conꞌ₂ i₁nógꞌ₄ ꞌuë₃ quein₂ co₂ꞌŋiog₅ jaun₂? ¿O₃ bá₄ ca₂jagꞌ₅₄ ꞌniaꞌ₂ ca₂ꞌnau₂ nɨ₁ꞌma₂ ta₅ a₂lë₁qui₂bí₂ dsí₂ ja₁jaun₂?
25 Chi₂juaꞌ₂ on₃ jaun₂, ¿ꞌe₂ guëꞌ₂ ca₂i₁jagꞌ₄ ꞌniaꞌ₂? ¿O₃ bá₄ ca₂jɨngꞌ₅₄ jan₂ dsa₂ i₂quiꞌ₂ tsɨnꞌ₅₄ jláꞌ₁ ꞌe₂? La₁ on₃ le₂jaun₂. Ia₁ ŋiꞌ₅₄ bá₄ ꞌniaꞌ₂, ca₂le₃jɨ́n₃ dsa₂ i₂të₁i₂nio₄ jlánꞌ₁ i₂qui₂cuë́ꞌ₅ o₂ꞌŋió₃ o₂jŋia₃ dsɨ₅, i₂tionꞌ₅₄ juɨ₁liaꞌ₂ dsi₂néi₂ quióꞌ₅ rag₅₄ bá₄ i₂le₂ꞌéi₂.
26 Jaun₂ në́₃, ¿ꞌe₂ guëꞌ₂ ca₂i₁jagꞌ₄ ꞌniaꞌ₂? ¿O₃ bá₄ jan₂ dsa₂ i₂ꞌë́₂ jág₁ quián₅ Diú₄ ꞌe₂ ca₂jɨnꞌ₅₄ ꞌniaꞌ₂? Dsónꞌ₂ bá₄ jaun₂. Jan₂ i₂lɨ́n₅ i₂juɨnꞌ₂ guë́₄ liaꞌ₂ conꞌ₂ guë́₄ jan₂ i₂ꞌë́₂ jág₁ quián₅ Diú₄ bá₄ ca₂i₁jɨnꞌ₄ ꞌniaꞌ₂, juáꞌ₅ jniá₂.
27 Juan₅₄ bá₄ ꞌéi₂ i₂ꞌɨn₅ Si₂ quióꞌ₅ Diú₄ ja₁juáꞌ₂:
Tsɨng₅₄ jan₂ dsa₂ quiáng₃ ne₄ juɨ₅ quiángꞌ₂, jón₃,
a₂dsɨ₃can₅ jág₁, jmo₃ co₂jŋia₅₄ juɨ₅.a
28 Juáꞌ₅ jniá₂ juɨ́g₂ ꞌniaꞌ₂, ca₂liaꞌ₂ ꞌi₁jan₂ dsa₂ tsá₃ ma₂ca₂rë₃chán₃ i₂juɨnꞌ₂ guë́₄ liaꞌ₂ conꞌ₂ guë́₄ Juan₅₄. La₁, i₂lɨ́n₅ i₂meꞌ₂ guë́₄ ja₁gon₂ Diú₄, i₂ꞌéi₂ lɨ́n₅ i₂juɨnꞌ₂ guë́₄ liaꞌ₂ conꞌ₂ guë́₄ ꞌéi₂.
29 (Ca₂le₃jɨ́n₃ dsa₂ i₂ca₂nág₂, liaꞌ₂ dsa₂ i₂cán₂ ꞌliaꞌ₅₄ në́₃, jme₁ca₂jŋói₂ jmɨg₂ ca₂cho₃ Juan₅₄, le₂në₅ bá₄ ca₂jme₃jniai₂₃, Diú₄ bá₄ i₂lɨ́n₅ i₂qui₂dsɨ₅ ꞌéiꞌ₃ tí₅.
30 La₁ dsa₂ fariseos* quianꞌ₅₄ të₅juáꞌ₅ në́₃, tsá₃ ca₂gue₃ cho₃ Juan₅₄ jmɨg₂; le₂në₅ bá₄ a₂ca₂rë₃jniái₂ ján₃ a₂tsá₃ jiꞌ₅₄ a₂jme₁ꞌnio₃ Diú₄ jmo₃ quiongꞌ₅₄.)
31 ―¿ꞌA₂ liaꞌ₂ le₃juaꞌ₅₄ lɨ́n₅ dsa₂ i₂chan₂ jmɨg₄ në₃? ¿ꞌE₂ bá₄ quianꞌ₅₄ le₃quɨ́ng₄ lɨ́in₅?
32 Lɨ́in₅ juɨ₁liaꞌ₂ lɨ́n₅ i₂bëꞌ₅₄ i₂tónꞌ₅ qui₂guióꞌ₅ jmáiꞌ₂ rɨinꞌ₅₄ jë₄ ꞌmaꞌ₅₄, juáꞌ₂:
Në₂jéi₄ jniaꞌ₅₄ te₁fi₁ o₄quiánꞌ₂ ꞌniaꞌ₂,
la₁ tsá₃ në₂dsiánꞌ₃ ꞌniaꞌ₂;
ján₃ guëꞌ₂ në₂jmó₁ jniaꞌ₅₄ son₅₄ quióꞌ₅ ꞌlag₄
la₁ tsá₃ ca₂táꞌ₂ guëꞌ₂ ꞌliaꞌ₂ ꞌauꞌ₂ ꞌniaꞌ₂.
33 ꞌIa₁ ca₂guan₃ Juan₅₄ i₂chon₅ dsa₂ jmɨg₂, i₂tsá₃ jme₁guë́ꞌ₅ i₁ŋíꞌ₄, on₃ guëꞌ₂ vino jme₁ꞌɨ́nꞌ₂ në́₃, ca₂ꞌɨinꞌ₅₄ ꞌniaꞌ₂ a₂ꞌein₅₄ jme₂dsí₂ je₂naꞌ₅₄.
34 Ca₂guan₃ guëꞌ₂ táng₃ Jaun₅* dsa₂ mɨ₂güɨ́g₃ i₂tɨn₂ guë́ꞌ₅, ꞌɨ́nꞌ₂ në́₃; la₁ ꞌniaꞌ₂ juáꞌ₂ ꞌɨ́inꞌ₅ a₂lɨ́in₅ jlé₂ ꞌí₅, má₄ jmɨ́g₃ në́₃, a₂lɨ́in₅ a₂mei₅₄ quián₅ dsa₂ cha₂ dsáu₁, quianꞌ₅₄ dsa₂ i₂cán₂ ꞌliaꞌ₅₄ quián₅ dsɨ₂tan₅₄ në́₃.
35 Rë₂jniá₂ bá₄ a₂ŋɨ́₄ lë₃ ŋɨ́ꞌ₂ dsɨ́₅ Diú₄, a₂tɨin₂, të₂le₃ quianꞌ₅₄ ꞌa₂ liaꞌ₂ lë́₅ jmo₅ chiꞌ₂-guein₂ quiáin₅.
ꞌEn₅₄ Jesús dsi₂néi₂ quióꞌ₅ Si₂mu₅₄ dsa₂ i₂lɨ́n₅ fariseo
36 Jaun₂ ca₂të₃ jan₂ dsa₂ fariseo ca₂të́ꞌ₃ Jesús a₂i₁guëꞌ₂ dsi₂néi₂ quióꞌ₅. Ca₂ꞌí₃ bá₄ guëꞌ₂ Jesús dsi₂néi₂ quióꞌ₅ dsa₂ fariseo ꞌéi₂ jme₁dsióg₃, jaun₂ ca₂guá₂ ne₄ mesa.
San Lucas 7:36-50
37 Të₃jë₄ jaun₂, ca₂dsióg₃ jan₂ ꞌio₅₄ i₂ꞌno₅ dso₄ i₂jme₁ŋɨ₅ juɨg₂ jaun₂, ia₁ jme₁ca₂rë₃ŋi₅ a₂ꞌen₅₄ Jesús guë́ꞌ₅ dsi₂néi₂ quióꞌ₅ dsa₂ fariseo ꞌéi₂. Jaun₂ ca₂dsióg₃ quian₅ caun₂ nɨ₁tsɨ́₅ píꞌ₁ jláꞌ₁ a₂lë́₅ quianꞌ₅₄ alabastro*, a₂ꞌa₄ noꞌ₅₄ mɨ₂juɨg₂.
38 Ca₂guá₂ ꞌo₂₃ cau₅ ja₁tióng₂ tag₄ Jesús, ca₂jme₃lióg₃ ꞌág₂ jmɨg₂ ꞌei₅ jme₁ne₁₂ coꞌ₅₄ tag₄ ꞌéi₂. Jaun₂ ca₂jme₃quéin₃ táng₃ quianꞌ₅₄ jŋi₂ dsi₅₄, jaun₂ ca₂chenꞌ₃, jaun₂ ca₂tsáng₂ noꞌ₅₄ mɨ₂juɨg₂.
39 Jme₁ca₂jág₃ dsa₂ fariseo i₂quióꞌ₅ dsi₂néi₂, ca₂i₃jiog₅ dsɨ́₅: “Juaꞌ₅₄ meiꞌ₂ guë́₃ të₃dsónꞌ₂ dsa₂ në₅ lɨ́in₅ jan₂ i₂ꞌë́₂ jág₁ quián₅ Diú₄, jme₁le₃líꞌ₄ ꞌa₂ liaꞌ₂ lɨ́n₅ dsa₂ i₂nɨ́ꞌ₅ quióꞌ₅. Ia₁ jan₂ ꞌio₅₄ i₂ꞌno₅ dso₄ bá₄ në₅.”
40 Jaun₂ ca₂juáꞌ₂ Jesús ca₂tsɨ́ꞌ₃ ꞌéi₂:
―Si₂mu₅₄, cha₂ caun₂ jág₁ a₂ꞌnio₃ juɨg₅₄ ꞌne₂.
―Juaꞌ₅₄ ꞌne₂, Të₅ ―ca₂ŋag₃.
41 Jaun₂ ca₂juáꞌ₂:
―On₃ dsa₂ jme₁le₁rɨ́n₃ cu₄ quióꞌ₅ jan₂ dsa₂ i₂tɨn₂ jme₁dsi₂ cu₄. Jan₂ jme₁rɨn₂ ca₂jau₅₄ mei₅ ꞌéiꞌ₃ cu₄ denarios*, jan₂ guëꞌ₂ jme₁rɨn₂ të₂láu₃-guiá₃.
42 Ca₂ꞌén₂ bá₄ guëꞌ₂ dsa₂ juɨg₅₄ cu₄ dsáu₁ jë₁le₃oin₃ le₂jaun₂, ia₁ tsá₃ guëꞌ₂ quɨꞌ₅₄ jmɨg₄ jángꞌ₃. Jaun₂ tsá₃ ma₃tion₅₄ ca₂mág₃ cú₁. Jaun₂ në́₃, ¿ꞌein₂ i₂on₃ ꞌéi₂ i₂ꞌnioi₃ guë́₄?
43 Ca₂ŋag₃ táng₃ Si₂mu₅₄:
―Dsa₂ i₂jme₁rɨn₂ guë́₄ ꞌlióng₂, lɨ́n₂ jniá₂.
―¿Jɨngꞌ₄ dsa₂ mɨ́₂ la₂? Jme₁në₂ꞌú₃ dsi₂néi₂ quiángꞌ₂, tsá₃ jmɨg₂ në₂cuëꞌ₅₄ a₂jŋí₃ tag₃; la₁ ꞌio₅₄ la₂ në́₃ ma₂në₂rang₃ tag₃ quianꞌ₅₄ jmɨg₂ ꞌei₅ jme₁ne₁₂, tonꞌ₂ ma₂në₂chí₃ táng₃ quianꞌ₅₄ jŋi₂ dsi₅₄.
45 Ján₃ bá₄ le₂jaun₂, tsá₃ në₂chenꞌ₅₄ quió₃ jme₁guang₁₂. ꞌIo₅₄ la₂ guëꞌ₂ në́₃, ca₂liaꞌ₂ tsá₃ ꞌna₂ bá₄ caun₂ chenꞌ₂ tag₃.
46 Tsá₃ noꞌ₅₄ ma₂në₂ꞌágꞌ₂ juaꞌ₅₄ a₂ma₂në₂tsángꞌ₃ dsi₃; la₁ ꞌio₅₄ la₂ guëꞌ₂ në́₃, ma₂në₂ꞌág₂ noꞌ₅₄ mɨ₂juɨg₂ tag₃.
47 ꞌUɨg₅₄ në₅ në́₃ juáꞌ₅ jniá₂ ia₁ a₂ŋɨ́₄ lë₃ ꞌlióng₂ dso₄ jme₁rë₂cáinꞌ₄, la₁ ma₂rë₂ꞌén₄, a₂jaun₂ bá₄ lë₃ ŋɨ́₄ lë₃ cuë₂₃ léi₄ a₂ꞌnio₃. La₁ juɨ₁liaꞌ₂ dsa₂ i₂ca₂juɨg₄ bá₄ dsáu₁ rë₂ꞌén₄, meꞌ₂ bá₄ cuë₂₃ léi₄ a₂ꞌnio₃.
48 Jaun₂ guë́₄ ca₂juáꞌ₂ ca₂tsɨ́ꞌ₃ ꞌio₅₄:
―Ca₂le₃jë́₃ bá₄ dsáuꞌ₂ ma₂rë₂ꞌén₄.
49 Ca₂le₃jɨ́n₃ guë́₄ dsa₂ siánꞌ₂ i₂jme₁tiánꞌ₄ ne₄ mesa quiainꞌ₅₄, ca₂dsia₃ tsɨ́ꞌ₅ rɨinꞌ₅₄:
―¿I₂ꞌein₂ bá₄ në₅, ca₂të₂ dsáu₁ dsa₂ qui₂ꞌéin₂?
50 La₁ Jesús në́₃, ca₂tsɨ́ꞌ₃ dsa₂ mɨ́₂ ꞌéi₂:
―Ia₁ a₂ꞌéngꞌ₂, ma₂ca₂lóngꞌ₂ në́₃. Guanꞌ₂ tei₄ quiángꞌ₂.