Dsa₂ i₂chen₄ quián₅ Juan₅₄ i₂chon₅ dsa₂ jmɨg₂
11
Jme₁ca₂dsan₃ cuë₅ Jesús jág₁ në₅ cuë́ꞌ₅ chiꞌ₂ dsɨ₂guia₃-tɨ́n₂ quiáin₅, ca₂o₃ꞌɨ́in₃ táng₃ ja₁jaun₂, ca₂ꞌí₃ juɨ₅ ca₂i₁ꞌë́₄ jág₁, i₂jme₁tɨin₂₃ dsa₂ juɨg₂ tioꞌ₅₄ conꞌ₂ ma₂quián₅ jaun₂.
2 Juan₅₄ në́₃, të₃ ꞌein₅₄ néꞌ₃ ꞌmá₃, ca₂rë₃ŋi₅ ꞌa₂ liaꞌ₂ lë́₅ jmo₅ I₂rë₂ꞌɨ́n₁* quián₅ Diú₄. Jaun₂ ca₂chein₃ i₂lɨn₅₄ dsa₂ i₂jme₁quiainꞌ₅₄
3 a₂ca₂i₁ŋag₁₂:
―¿ꞌNe₂ língꞌ₅ dsa₂ i₂lë́₅ jág₁ jiá₃, o₃ jŋia₄ jniaꞌ₅₄ i₂siánꞌ₂ ꞌe₂?
4 Jaun₂ ca₂ŋag₃ Jesús:
―O₂nóꞌ₅ ꞌniaꞌ₂ o₂cheiꞌ₅₄ Juan₅₄ ꞌe₂ a₂të₅ neꞌ₅₄ ꞌniaꞌ₂ la₂, ꞌe₂ a₂nagꞌ₂ ꞌniaꞌ₂ në́₃.
5 O₂dsia₄ ꞌniaꞌ₂ ꞌa₂ liaꞌ₂ lë́₅ qui₂jág₅ dsa₂ ten₄; dsa₂ i₂jme₁guianꞌ₅₄ guëꞌ₂ në́₃, ma₂i₂nioi₅₄ rëꞌ₂ táng₃; dsa₂ i₂jme₁lɨ́n₄ ꞌméꞌ₅ ꞌiog₅ ma₂le₁jɨ́in₃ táng₃ dso₄ a₂jme₁lɨ́in₄; dsa₂ i₂jme₁guɨn₄ guëꞌ₂ në́₃ ma₂nag₂₃; dsa₂ i₂ma₂dsan₃, jeinꞌ₅₄ táng₃; ja₁con₂ dsa₂ te₂ŋé₂ në́₃ dsɨ₂ꞌag₅ jág₁ dse₃ la₂ a₂lión₂ dsa₂.
6 ꞌE₂ guë́₄ dsen₃ dsa₂ i₂tsá₃ ꞌag₅ caun₂-tɨn₃ dsɨ́₅ ja₁con₂ jniá₂.
7 Jme₁ma₂i₂len₃ dsa₂ ꞌéi₂, jaun₂ ca₂jme₃lióg₃ Jesús ca₂tsɨ́ꞌ₃ dsa₂ a₂ꞌɨin₂₃ Juan₅₄:
―¿ꞌE₂ jme₁lɨ́nꞌ₂ ꞌniaꞌ₂ jme₁të₃ neꞌ₅₄ liaꞌ₂ conꞌ₂ jme₁i₁nógꞌ₄ ꞌuë₃ quein₂ co₂ꞌŋiog₅ jaun₂? ¿O₃ bá₄ jme₁lɨ́nꞌ₂ ꞌniaꞌ₂ a₂jme₁jɨngꞌ₄ jan₂ dsa₂ i₂lɨ́n₅ juɨ₁liaꞌ₂ lë́₅ ca₂ꞌnau₂ nɨ₁ꞌma₂ ta₅ a₂lë₁qui₂bí₂ dsí₂ juɨ₅ la₂ juɨ₅ në₅?
8 Chi₂juaꞌ₂ tsá₃ le₂jaun₂ në́₃, ¿ꞌe₂ guëꞌ₂ ca₂i₁jagꞌ₄ ꞌniaꞌ₂? ¿O₃ bá₄ a₂jme₁lɨ́nꞌ₂ ꞌniaꞌ₂ a₂jme₁jɨngꞌ₄ jan₂ dsa₂ i₂quiꞌ₂ tsɨnꞌ₅₄ jláꞌ₁? La₁ on₃juaꞌ₅₄ le₂jaun₂. Ia₁ juɨ₁liaꞌ₂ dsa₂ i₂quɨ́ꞌ₅ tsɨnꞌ₅₄ jláꞌ₁, i₂tónꞌ₅ dsi₂néi₂ quióꞌ₅ rag₅₄ bá₄ i₂le₂ꞌéi₂.
9 ¿ꞌE₂ guëꞌ₂ ca₂i₁jagꞌ₄ ꞌniaꞌ₂ jaun₂ në́₃? ¿O₃ bá₄ jan₂ dsa₂ i₂ꞌë́₂ jág₁ quián₅ Diú₄ ꞌe₂? Dsónꞌ₂ bá₄ jaun₂ juáꞌ₅ jniá₂. I₂lɨ́n₅ tson₂ guë́₄ jan₂ dsa₂ i₂ꞌë́₂ jág₁ quián₅ Diú₄ bá₄ ꞌéi₂.
10 Juan₅₄ ꞌéi₂ bá₄ i₂ꞌɨn₅ Si₂ quióꞌ₅ Diú₄ ja₁juáꞌ₂:
Tsɨng₅₄ jan₂ dsa₂ quiáng₃ ne₄ juɨ₅ quiángꞌ₂, jón₃,
a₂dsɨ₃can₅ jág₁, jmo₃ co₂jŋia₅₄ juɨ₅.a
11 A₂dsɨ₂jóꞌ₃ juɨ́g₂ jniá₂ ꞌniaꞌ₂, ꞌi₁jan₂ dsa₂ i₂ma₂can₅ dsa₂ mɨ́₂ i₂chan₂ mɨ₂güɨ́g₃, tsá₃ ꞌein₂ ma₂lɨn₅ i₂juɨnꞌ₂ guë́₄ i₂ꞌë́₂ jág₁ o₄quióꞌ₄ Diú₄, liaꞌ₂ conꞌ₂ guë́₄ Juan₅₄ i₂chon₅ dsa₂ jmɨg₂. La₁ia₁, i₂lɨ́n₅ i₂meꞌ₂ guë́₄ ja₁gon₂ Diú₄, i₂ꞌéi₂ bá₄ lɨ́n₅ i₂juɨnꞌ₂ guë́₄ liaꞌ₂ conꞌ₂ guë́₄ Juan₅₄ ꞌéi₂.
12 Ca₂le₃ ca₂guan₃ Juan₅₄ i₂chon₅ dsa₂ jmɨg₂, ca₂të₂ jmɨg₄ në₃, conꞌ₂ ꞌi₄ juɨ₅ bá₄ ma₂já₅ tiá₂ ja₁gon₂ Diú₄. Jaun₂ dsa₂ conꞌ₂ i₂tiá₂ dsɨ́₅ bá₄ chanꞌ₂ tiá₂ juɨ₅ jaun₂.b
13 Ca₂le₃jɨ́n₃ dsa₂ i₂jme₁ꞌë́₂ jág₁ quián₅ Diú₄, quianꞌ₅₄ ꞌÉiꞌ₃ quióꞌ₅ Moisés në́₃, a₂jŋiaꞌ₅₄ conꞌ₂ ca₂ꞌë́₂ jág₁ ja₁gon₂ Diú₄ bá₄ jaun₂, ca₂liaꞌ₂ ca₂të́₂ jmɨg₄ jme₁ca₂guan₃ Juan₅₄.
14 Ján₃ bá₄ chi₂juaꞌ₂ ꞌniogꞌ₂ ꞌniaꞌ₂ guéiꞌ₁ jág₁ la₂, Juan₅₄ ꞌéi₂ bá₄ i₂ca₂jme₃ti₃ jág₁ a₂lë́₅ a₂jme₁jiá₃ Elías.
15 Juɨ₁liaꞌ₂ i₂le₁dsɨ₅₄ rë₂gua₄, juɨ₁nei₅₄.
16 ꞌ¿ꞌE₂ quianꞌ₅₄ lé₂ le₃quɨ́ng₄ a₂lɨ́n₅ dsa₂ i₂chan₂ jmɨg₄ në₃? Lɨ́in₅ juɨ₁liaꞌ₂ lɨ́n₅ i₂bëꞌ₅₄ i₂tionꞌ₅₄ co₅ jë₄ ꞌmaꞌ₅₄, tioinꞌ₅₄ co₂mɨꞌ₅₄ qui₂guióꞌ₅ tsɨ́ꞌ₅ rɨinꞌ₅₄:
17 Në₂jéi₄ jniaꞌ₅₄ te₁fi₁ o₄quiánꞌ₂ ꞌniaꞌ₂,
la₁ tsá₃ në₂dsiánꞌ₃ guëꞌ₂ ꞌniaꞌ₂;
ján₃ guëꞌ₂ në₂jmó₁ jniaꞌ₅₄ son₅₄ quióꞌ₅ ꞌlag₄
a₂taꞌ₂ ꞌliaꞌ₂ dsɨ́₅ dsa₂,
la₁ tsá₃ ca₂táꞌ₂ guëꞌ₂ quɨꞌ₂ ꞌauꞌ₂ ꞌniaꞌ₂.
18 Ia₁ ca₂guan₃ Juan₅₄, i₂tsá₃ ꞌe₂ ꞌlióng₂ jme₁guë́ꞌ₅ on₃ guëꞌ₂ ꞌe₂ jme₁ꞌɨ́nꞌ₂ në́₃, jaun₂ ca₂ꞌag₃ dsa₂ a₂ꞌein₅₄ je₂naꞌ₅₄.
19 Ca₂guan₃ guëꞌ₂ táng₃ Jaun₅* dsa₂ mɨ₂güɨ́g₃ i₂guë́ꞌ₅ i₂ꞌɨ́nꞌ₂, ꞌag₅ táng₃ dsa₂ a₂lɨ́in₅ jlé₂ ꞌí₅ quianꞌ₅₄ má₄ jmɨ́g₃, a₂lɨ́in₅ a₂mei₅₄ quián₅ dsa₂ cha₂ dsáu₁, quianꞌ₅₄ dsa₂ i₂cán₂ ꞌliaꞌ₅₄ quián₅ dsɨ₂tan₅₄ në́₃. La₁ tion₅₄ bá₄ le₃líꞌ₄ dsa₂ a₂dsau₅ jág₁ a₂ŋɨ́ꞌ₂ dsɨ́₅ Diú₄, ꞌuɨg₅₄ ia₁ ŋɨ́ꞌ₂ bá₄ dsɨ́₅ dsa₂ i₂gue₅ jág₁ në₅.
Juɨg₂ jë₁tsá₃ neꞌ₅₄ dsa₂
20 Jaun₂ në́₃, ca₂jme₃lióg₃ Jesús qui₂ca₂jéin₂ dsa₂ ja₁ꞌlióng₂ guë́₄ léi₄ juëꞌ₂ ma₂qui₂ma₂jmo₃, ia₁ tsá₃ ma₂jéinꞌ₃ dsa₂ dsɨ́₅. Jaun₂ ca₂juáꞌ₂:
21 ―¡ꞌE₂ guë́₄ juɨ́gꞌ₂ ꞌniaꞌ₂ dsa₂ juɨg₂ Corazín! ¡ꞌE₂ guë́₄ juɨ́gꞌ₂ ꞌniaꞌ₂ i₂chan₂ Betsaida! Ia₁ juaꞌ₅₄ meiꞌ₂ guë́₃ jniá₂ ma₂jmo₃ léi₄ juëꞌ₂ në₅ jë₄ juɨg₂ Tiro quianꞌ₅₄ juɨg₂ Sidón juɨ₁liaꞌ₂ a₂ma₂jmo₃ jniá₂ jë₄ quiánꞌ₂ ꞌniaꞌ₂, lɨ́gꞌ₂ bá₄ tsá₃ ma₂ca₂jéinꞌ₃ dsa₂ ꞌéi₂ dsɨ́₅, jme₁cuë₃ léi₄ a₂quɨꞌ₂ dsɨ́₅ jme₁i₃nioi₅₄ le₁quiꞌ₂ ꞌmɨꞌ₂ taun₅* qui₂le₁séin₅ ti₁juá₃* në́₃.
22 La₁ juɨ́g₂ jniá₂ ꞌniaꞌ₂, jmɨg₄ i₁qui₃dsɨ₅ Diú₄ ꞌéiꞌ₃, ja₂lɨn₃ guë́₄ tson₂ uɨg₅ a₂guéiꞌ₁ ꞌniaꞌ₂ conꞌ₂ guë́₄ dsa₂ i₂jme₁chan₂ Tiro quianꞌ₅₄ Sidón.
23 ꞌNiaꞌ₂ guëꞌ₂ dsa₂ i₂chan₂ juɨg₂ Capernaum, ¿lɨ́nꞌ₂ ꞌniaꞌ₂ a₂uɨgꞌ₅₄ gueiꞌ₅₄ lɨn₃? On₃juaꞌ₅₄ le₂jaun₂. Të₂ ja₁jɨꞌ₂ lɨn₃ ja₁tionꞌ₅₄ ꞌlag₄c bá₄ sénꞌ₂ ꞌniaꞌ₂. Ia₁ juaꞌ₂ meiꞌ₂ guë́₃ jniá₂ ca₂jmo₃ léi₄ juëꞌ₂ jë₄ juɨg₂ Sodoma* juɨ₁liaꞌ₂ a₂ma₂ca₂jmo₃ jniá₂ jë₄ quiánꞌ₂ ꞌniaꞌ₂, a₂niog₅ bá₄ juɨg₂ jaun₂ ca₂të₂ jmɨg₄ në́₃.
24 Jaun₂ juáꞌ₅ jniá₂, jmɨg₄ jë₁ma₂të́₂ rë₁qui₃dsɨ₅ Diú₄ ꞌéiꞌ₃, ꞌŋio₅ guë́₄ uɨg₅ guéiꞌ₁ ꞌniaꞌ₂ conꞌ₂ guë́₄ dsa₂ i₂jme₁chan₂ juɨg₂ Sodoma.
Ja₁jŋia₅ dsa₂ i₂ma₂ꞌúꞌ₃
25 Jmɨg₄ jaun₂ ca₂juáꞌ₂ Jesús:
―Jme₁juɨ́nꞌ₁ jniá₂ ꞌne₂, Tia₅₄, i₂lɨ́ngꞌ₅ juɨg₅₄ guaꞌ₅₄ ꞌuë₃ quianꞌ₅₄ gueiꞌ₅₄ i₂juɨ́g₃, ia₁ ca₂ꞌmaꞌ₅₄ a₂në₅ ja₁con₂ dsa₂ i₂tɨn₂ si₂, i₂ŋɨ́ꞌ₂ dsɨ́₅, a₂ma₂ca₂jme₁jniagꞌ₂ ja₁con₂ dsa₂ i₂lɨ́n₅ liaꞌ₂ lɨ́n₅ guein₂, i₂tsá₃ ꞌe₂ cuɨ́ꞌ₅.
26 Dsónꞌ₂ bá₄ jaun₂, Tia₅₄, ia₁ le₂në₅ ca₂rë₃ꞌŋió₃ ꞌauꞌ₂.
27 Jaun₂ ca₂tsɨ́ꞌ₃ dsa₂:
―O₄gu₃ jniá₂ ma₂ca₂dsia₃ Ŋeꞌ₃ ca₂le₃jë́₃. ꞌI₁jan₂ tsá₃ ꞌein₂ cuɨn₅ Ja₁ŋiꞌ₅₄ Diú₄ ꞌa₂ liaꞌ₂ të₃dsónꞌ₂ lɨ́in₅, jŋiaꞌ₅₄ liaꞌ₂ ꞌŋiog₅ bá₄ Jmei₂; ján₃ bá₄ ꞌi₁jan₂ tsá₃ ꞌein₂ cuɨn₅ Jmei₂ ꞌa₂ liaꞌ₂ të₃dsónꞌ₂ lɨ́in₅, jŋiaꞌ₅₄ liaꞌ₂ ꞌŋiog₅ bá₄ Ja₁ŋiꞌ₅₄ táng₃, ján₃ bá₄ jme₃jniai₂₃ ja₁con₂ i₂ꞌnio₃ le₃ŋi₅.
28 I₂nóꞌ₅ ꞌniaꞌ₂ ja₁con₂ jniá₂, ca₂le₃jɨ́nꞌ₃ ꞌniaꞌ₂ i₂qui₂ma₂ꞌúꞌ₃ dsɨ́₅, i₂qui₂le₁quian₅ guei₂, jaun₂ cuë₅₄ jniá₂ ja₁janꞌ₄ ꞌniaꞌ₂.
29 Gue₄ ꞌniaꞌ₂ ta₁ quió₃ a₂cuë́₅ jniá₂ ꞌniaꞌ₂, jme₁tɨn₅ ꞌniaꞌ₂ jmóꞌ₂ ján₃, ꞌa₂ liaꞌ₂ lɨ́n₅ jniá₂, ia₁ juɨnꞌ₂ dsɨ₃ lɨ́ng₅, megꞌ₂ bá₄ lë́₅ dsɨ₃; jaun₂ le₂në₅ bá₄ dsi₁nóꞌ₅ ꞌniaꞌ₂ dsiangꞌ₂ ja₁jŋia₃ të₂ꞌauꞌ₂.
30 Ia₁ ta₁ a₂cuë́₅ jniá₂ ꞌniaꞌ₂, on₃juaꞌ₅₄ a₂ꞌuaꞌ₂ ta₁; ján₃ bá₄ le₂jaun₂ on₃juaꞌ₅₄ a₂guei₂ cánꞌ₁ ꞌniaꞌ₂ a₂cuë́₅ jniá₂ ꞌniaꞌ₂.