Chen₅ Jesús ꞌnagꞌ₂ ne₂guión₂ rë₂dsɨ́₂ guian₃ dsa₂
10
Cang₂ jaun₂ ca₂quiónꞌ₂ Te₁guiꞌ₅₄ ꞌnagꞌ₂ ne₂guión₂ rë₂dsɨ́₂ guian₃ (70) dsa₂ siánꞌ₂.a Jaun₂ qui₂ca₂chein₃ jma₃on₃ jma₃on₃ ꞌéi₂ i₃léin₂ ne₄ juɨ₅ quióꞌ₅, ca₂le₃jë́₃ juɨg₂ ja₁ꞌein₅₄ juɨ₅ dsióg₄.
San Lucas 10:1-24
2 Ca₂tsɨ́ꞌ₃ ꞌéi₂:
―Juɨn₅ lɨn₃ bá₄ dsa₂ ꞌnio₃ gue₃ jág₁ quióꞌ₅ Diú₄; lë́₅ në₂jag₄ bá₄ ꞌlióng₂ lɨn₃ a₂ca₂rau₂, la₁ dsa₂ i₂jmo₃ ta₁ bá₄ tsá₃ juɨn₅ chan₂. Jaun₂ lë₃, mɨ₄ ꞌniaꞌ₂ cheiꞌ₅₄ Juɨg₅₄ ja₁nau₂ juɨ₁chein₁₂ dsa₂ i₂jmo₃ ta₁ cágꞌ₃.
3 Jag₄ ꞌniaꞌ₂ jaun₂, ꞌniaꞌ₂ tsɨ́n₂ jniá₂ o₁nógꞌ₅ lɨ́ngꞌ₅ co₂ꞌnióꞌ₄ guein₂ jáꞌ₂ chaꞌ₂ jɨn₄ dsɨg₂ náu₂.
4 Tsá₃ tsɨ₁naꞌ₅₄ cánꞌ₁ ꞌniaꞌ₂, on₃ guëꞌ₂ lau₂ tóꞌ₅ cu₄, on₃ guëꞌ₂ lau₂ ton₅ tagꞌ₄ ꞌniaꞌ₂ siáꞌ₂ cánꞌ₁. Tsá₃ jme₁ꞌagꞌ₄ ꞌniaꞌ₂ le₂ꞌi₄ juɨ₅ juaꞌ₅₄ a₂dsiáꞌ₁ ꞌniaꞌ₂ jág₁ uë́₂ quianꞌ₅₄ dsa₂.
5 Jë₁ma₂të́₂ rë₁tónꞌ₂ ꞌniaꞌ₂ dsi₂néi₂ quióꞌ₅ dsa₂ ja₁janꞌ₄, cuɨn₅₄ deꞌ₂ ꞌniaꞌ₂ dsa₂ Diú₄ juɨgꞌ₅₄ le₂la₂: “Juɨ₁ꞌei₅ bá₄ tei₄ tionꞌ₄ ꞌniaꞌ₂ dsi₂néi₂ la₂.”
6 Chi₂juaꞌ₂ dsa₂ i₂quióꞌ₅ dsi₂néi₂ jaun₂ ꞌua₁ bá₄ dsɨ́₅, të₃ꞌŋiá₄ bá₄ jág₁ a₂ꞌei₅ tei₄ quiánꞌ₂ ꞌniaꞌ₂ ja₁coin₂. La₁ në₁juaꞌ₂ tsá₃ le₂jaun₂, të₃ꞌŋiá₄ bá₄ táng₃ ja₁conꞌ₂ ꞌniaꞌ₂ guiongꞌ₅₄ jág₁ a₂ꞌei₅ tei₄ jaun₂.
7 Caun₂ bá₄ ja₁o₁jŋiaꞌ₄ ꞌniaꞌ₂, quéꞌ₂, ꞌénꞌ₂ ꞌniaꞌ₂ ꞌe₂ caun₂ a₂niog₅ cuë₅ dsa₂; ia₁ a₂co₂jaun₂ ca₂tɨ́n₂ bá₄ dsa₂ ꞌliainꞌ₅₄ ta₁ quióꞌ₅. Jaun₂ tsá₃ i₁nioꞌ₄ ꞌniaꞌ₂ le₂ꞌí₁ ꞌné₅.
8 Jë₁ma₂dsi₃nógꞌ₅ le₂caun₂ juɨg₂ ja₁guei₅ dsa₂, quéꞌ₂ ꞌniaꞌ₂ juɨ₁ꞌe₂ guë́₃ a₂cuë₅ dsa₂.
9 Jme₁ꞌlion₅₄ ꞌniaꞌ₂ dsa₂ dsoꞌ₅₄ i₂chan₂ ja₁jaun₂, cheiꞌ₅₄: “Ma₂ja₂quián₃ bí₂ ꞌéi₂ quióꞌ₅ Diú₄ ja₁conꞌ₂ ꞌniaꞌ₂.”
10 La₁ në₁juaꞌ₂ ca₂dsi₃nóꞌ₅ ꞌniaꞌ₂ caun₂ juɨg₂ ja₁tsá₃ guei₅ dsa₂, ꞌuɨnꞌ₂ ꞌniaꞌ₂ jë₄ calles, cheiꞌ₅₄:
11 “Le₂jiog₅ ꞌliog₂ te₁ꞌi₁ goꞌ₄ ꞌniaꞌ₂, a₂qui₂ca₂quenꞌ₂ tag₄ jniaꞌ₅₄, la₂ séiꞌ₄ jniaꞌ₅₄, a₂jmó₁ léi₄ tsá₃ ma₃ꞌe₂ ꞌuag₄ jniaꞌ₅₄ quianꞌ₅₄ ꞌniaꞌ₂. La₁ dsá₂ ꞌauꞌ₂ ꞌniaꞌ₂ jmo₄, ma₂ja₂quián₃ bí₂ ꞌéiꞌ₃ quióꞌ₅ Diú₄ ja₁congꞌ₂.”
12 Juáꞌ₅ jniá₂ juɨ́g₂ ꞌniaꞌ₂, ꞌŋio₅ lɨn₃ guë́₄ uɨg₅ a₂ꞌë́₂ Diú₄ jmɨg₄ jaun₂ ja₁con₂ dsa₂ ꞌéi₂, liaꞌ₂ conꞌ₂ guë́₄ dsa₂ juɨg₂ Sodoma*.
Juɨg₂ ja₁tsá₃ neꞌ₅₄ dsa₂
13 ꞌ¡ꞌE₂ guë́₄ juɨ́gꞌ₂ ꞌniaꞌ₂ dsa₂ juɨg₂ Corazín! ¡ꞌE₂ guë́₄ juɨ́gꞌ₂ ꞌniaꞌ₂ dsa₂ juɨg₂ Betsaida! Ia₁ juaꞌ₅₄ meiꞌ₂ guë́₃ ca₂le₃jɨ́n₃ dsa₂ chan₂ Tiro quianꞌ₅₄ Sidón ca₂të́₂ ne₅₄ juɨ₁liaꞌ₂ juɨ₅bí₂ juëꞌ₂ a₂niog₅ lë́₂ jë₄ quiánꞌ₂ ꞌniaꞌ₂ jmɨg₄ në₃, lɨ́gꞌ₂ bá₄ tsá₃ ma₂quɨ́ꞌ₂ ꞌmɨꞌ₂ taun₅* jme₁tiainꞌ₃ jë₄ jua₂ në́₃, jme₁jmo₃ léi₄ a₂ca₂dsi₃quénꞌ₅ dsɨ́₅.
14 La₁ jë₁ma₂të́₂ rë₁qui₃dsɨ₅ Diú₄ ꞌéiꞌ₃, ꞌŋio₅ lɨn₃ guë́₄ ꞌŋio₅ uɨg₅ guéiꞌ₁ ꞌniaꞌ₂ conꞌ₂ guë́₄ uɨg₅ a₂ca₂gue₃ dsa₂ i₂chan₂ Tiro quianꞌ₅₄ Sidón.
15 ꞌNe₂ guëꞌ₂ juɨg₂ Capernaum, ¿a₁rongꞌ₂ ŋei₅ të₂ gueiꞌ₅₄ i₂juɨ́g₃, lɨ́ngꞌ₂? ꞌEn₁ bá₄ ꞌne₂ sióngꞌ₃ ca₂të₂ ja₁ca₂tɨ́n₂ ꞌlag₄.b
16 ꞌDsa₂ i₂nag₅ jág₁ quiánꞌ₂ ꞌniaꞌ₂, jág₁ quió₃ jniá₂ bá₄ nag₂₃. Dsa₂ i₂tsá₃ guen₅ ꞌniaꞌ₂, jniá₂ bá₄ a₂tsá₃ guei₂₃. I₂tsá₃ guei₅ jniá₂, ján₃ bá₄ le₂jaun₂ tsá₃ guein₂₃ i₂ca₂chei₃ jniá₂.
Ca₂dsi₃len₃ táng₃ i₂ꞌnagꞌ₂ ne₂guión₂ rë₂dsɨ́₂ guian₃
17 Ca₂o₃len₃ táng₃ ꞌioꞌ₂ jénꞌ₅ ta₁ꞌnagꞌ₂ ne₂guión₂ rë₂dsɨ́₂ guian₃ (70)c dsa₂ ꞌéi₂, jaun₂ dsia₂₃, juáꞌ₂:
―Te₁guiꞌ₅₄, ca₂liaꞌ₂ jiog₅ je₂naꞌ₅₄ bá₄ nag₅ gau₂ jág₁ quián₂ jniaꞌ₅₄ jë₁ma₂ca₂ꞌɨ́n₂ jniaꞌ₅₄ ꞌne₂.
18 Jaun₂ ca₂ŋag₃ Jesús:
―Ján₅. Ma₁ jág₅ bá₄ jniá₂ jme₁ca₂tánꞌ₂ Satanás gueiꞌ₅₄ i₂juɨ́g₃ liaꞌ₂ ja₁taꞌ₂ caun₂ si₁ŋíꞌ₃.d
19 ꞌÉiꞌ₃ jaun₂ bá₄ ma₂cuë́₃ jniá₂ ꞌniaꞌ₂ a₂ꞌóꞌ₅ ꞌniaꞌ₂ bí₂ ꞌéiꞌ₃ a₂lé₂ le₃qui₁tsongꞌ₅₄ dsɨ₂mɨꞌ₂, i₁ꞌné₅ në́₃, a₂tiangꞌ₃ ne₄ ca₂le₃jë́₃ juɨ₅bí₂ a₂gu₂dsí₂ i₂ꞌioꞌ₅₄, ca₂liaꞌ₂ jŋiaꞌ₅₄ tsá₃ ꞌe₂ jénꞌ₄ ꞌniaꞌ₂ guiongꞌ₅₄.
20 La₁ tsá₃ jmo₂ ꞌniaꞌ₂ ꞌioꞌ₂ ia₁ a₂nag₅ gau₂ jme₂dsí₂ ꞌlɨnꞌ₅₄ jág₁ quiánꞌ₂ ꞌniaꞌ₂. A₂jaun₂ bá₄ jmo₄ ꞌniaꞌ₂ ꞌioꞌ₂ ia₁ a₂ma₂le₁tongꞌ₂ ne₄ si₂ gueiꞌ₅₄ i₂juɨ́g₃.
Jmei₂ quianꞌ₅₄ Ja₁ŋiꞌ₅₄
21 Hora jaun₂, ca₂jmo₃ Jme₂dsí₂ Jŋió₅ a₂ꞌioꞌ₂ jénꞌ₅ lɨn₃ Jesús, jaun₂ ca₂juáꞌ₂:
―Jme₂juɨ́nꞌ₁ jniá₂ ꞌne₂, Tia₅₄, Juɨg₅₄ gueiꞌ₅₄ i₂juɨ́g₃, guaꞌ₅₄ ꞌuë₃ në́₃, ia₁ ma₂ca₂ꞌmaꞌ₅₄ a₂në₅ ja₁con₂ dsa₂ i₂ŋɨ́₄ tɨn₂ si₂, i₂ŋɨ́ꞌ₂ dsɨ́₅ në́₃, a₂ma₂ca₂jme₁jniagꞌ₂ le₃ja₁con₂ dsa₂ i₂lɨ́n₅ liaꞌ₂ lɨ́n₅ guein₂ i₂tsá₃ ꞌe₂ cuɨ́ꞌ₅. Dsónꞌ₂ bá₄ jaun₂, Tia₅₄ quiáng₃, ia₁ le₂në₅ ꞌŋio₂ ꞌauꞌ₂.
22 Jaun₂ ca₂jénꞌ₃ Jesús, ca₂juáꞌ₂:e
―Ŋeꞌ₃ jniá₂ ma₂dsia₃ o₄gu₃ ca₂le₃jë́₃. Jaun₂ ꞌi₁jan₂ tsá₃ ꞌein₂ cuɨn₅ ꞌein₂ ꞌéi₂ i₂lɨ́n₅ Ja₁ŋiꞌ₅₄, jŋiaꞌ₅₄ liaꞌ₂ ꞌŋiog₅ bá₄ Jmei₂. Ján₃ guëꞌ₂ le₂jaun₂, ꞌi₁jan₂ tsá₃ ꞌein₂ cuɨn₅ ꞌein₂ ꞌéi₂ lɨ́n₅ Jmei₂, jŋiaꞌ₅₄ liaꞌ₂ Ja₁ŋiꞌ₅₄ bá₄ i₂cuɨg₅, jaun₂ jme₂jniog₂₃ ne₄ dsa₂ i₂ꞌŋio₂ dsɨ́₅ Ja₁ŋiꞌ₅₄ jme₂jniog₂₃.
23 Jaun₂ ca₂jéinꞌ₃, ca₂tsɨ́ꞌ₃ jmáꞌ₃ chiꞌ₂ dsɨ₂guia₃-tɨ́n₂ guioin₅₄:
―ꞌE₂ guë́₄ dsen₃ dsa₂ i₂të₅ ne₄ juɨ₁liaꞌ₂ a₂niog₅ jágꞌ₂ ꞌniaꞌ₂,
24 ia₁ a₂dsɨ₂jóꞌ₃ juáꞌ₅ jniá₂, juɨn₅ rag₅₄ ma₂lɨ́gꞌ₂, liaꞌ₂ dsa₂ i₂jme₁ꞌë́₂ jág₁ quián₅ Diú₄ në́₃, jme₁ꞌɨ́n₅ dsɨ́₅ jme₁të₃ ne₅₄ juɨ₁liaꞌ₂ a₂niog₅ të₅ neꞌ₅₄ ꞌniaꞌ₂ rë₂në́₃, la₁ tsá₃ ca₂jág₃. Ján₃ bá₄ jme₁ꞌɨ́n₅ dsɨ́₅ nag₃ juɨ₁liaꞌ₂ a₂niog₅ nagꞌ₂ ꞌniaꞌ₂ jmɨg₄ në₃, la₁ tsá₃ ca₂nág₂.
Jág₁ jángꞌ₅ léi₄: a₂dse₃ ca₂jmo₃ jan₂ dsa₂ chan₂ Samaria
25 Co₂ráun₂ ca₂nau₂ jan₂ të₅juáꞌ₅, a₂jŋiaꞌ₅₄ conꞌ₂ cáun₂ táu₂ bá₄ ca₂ŋag₃:
―Të₅, ¿ꞌe₂ ꞌnióꞌ₅ jmo₅₄ jniá₂, ia₁jaun₂ tɨng₅₄ ja₁le₃chang₂ co₂tan₅₄?
San Lucas 10:25-42
26 Jaun₂ ca₂ŋag₃ Jesús:
―¿ꞌE₂ ꞌéiꞌ₃ tioꞌ₅₄ ne₄ Si₂ guëꞌ₂? ¿ꞌA₂ liaꞌ₂ ŋɨ́ꞌ₂ ꞌauꞌ₂ a₂ꞌɨꞌ₂?
27 Jaun₂ ca₂ŋag₃ táng₃ të₅juáꞌ₅ ꞌéi₂:
―“Jme₁ꞌnió₄ Te₁guiꞌ₅₄ Diú₄ quiángꞌ₂ ca₂le₃jë́₃ ꞌauꞌ₂, ca₂le₃jë́₃ jme₂dsí₂, ca₂le₃jë́₃ juɨ₅bí₂, quianꞌ₅₄ ca₂le₃jë́₃ a₂ŋɨ́ꞌ₂ dseiꞌ₂ në́₃;f ján₃ guëꞌ₂ le₂jaun₂ jme₁ꞌniógꞌ₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniógꞌ₃ ꞌŋiagꞌ₂.”g
28 Jaun₂ ca₂ŋag₃ táng₃ Jesús:
―Dse₃ lɨn₃ bá₄ në₂ŋagꞌ₅₄. Në₁juaꞌ₂ ca₂jmoꞌ₅₄ le₂në₅, léngꞌ₂ bá₄ ja₁le₃changꞌ₂ co₂tan₅₄.
29 La₁ të₅ ꞌéi₂ jme₁ꞌnio₃ cheinꞌ₃ dse₃, jaun₂ ca₂tsɨ́ꞌ₃ Jesús:
―¿ꞌEin₂ ꞌéi₂ dsa₂ mɨ₂güɨ́g₃ rɨ́ngꞌ₃?
30 Jaun₂ ca₂ŋag₃ Jesús ma₂të₂chanꞌ₂ jág₁ jaun₂, ca₂juáꞌ₂:
―Jan₂ dsa₂ jme₁ꞌen₅₄ juɨ₅ o₂ꞌɨ́in₃ Jerusalén ca₂sióin₃ a₂dsióg₄ juɨg₂ Jericó. Dsa₂ ꞌang₂ bá₄ ca₂jo₃ ca₂cheiꞌ₃ lɨ́in₃, ca₂cuë₃ dsa₂ ꞌŋio₅ lɨn₃ jŋiaꞌ₅₄ meiꞌ₂ tsá₃ ca₂jŋagꞌ₃. Jaun₂ guë́₄ ca₂i₃lein₅.
31 Jë₂ liaꞌ₂ juɨ₅ jaun₂ ꞌen₅₄ juɨ₅ já₅ jan₂ jme₂dsa₂. La₁ conꞌ₂ ca₂quiá₂ cau₅ bá₄ ca₂ŋɨi₅ jme₁ca₂jág₂.
32 Ján₃ bá₄ ca₂já₃ táng₃ jan₂ dsa₂ i₂lɨ́n₅ tsɨ₁jon₂ Leví, conꞌ₂ ca₂quiá₂ cau₅ bá₄ ján₃, ca₂ŋɨi₅.
33 La₁ jan₂ dsa₂ i₂chan₂ Samaria ꞌein₅₄ juɨ₅, ca₂dsióg₃ ja₁ron₅ dsa₂ dsoꞌ₅₄, ca₂táꞌ₂ ŋéi₂ dsɨ́₅ jme₁ca₂jág₂.
34 Jaun₂ ca₂jme₃quiáin₃ cau₅ quióꞌ₅, ca₂ꞌág₂ aceite quianꞌ₅₄ vino ja₁rë₂cuɨ́ꞌ₃, ca₂lio₃. Jaun₂ ca₂tág₃ co₁lag₁ búꞌ₄ quiáin₅, ca₂jiog₃ caun₂ ꞌné₅ ja₁jŋia₅ dsa₂. Ja₁jaun₂ ca₂jmo₃ ꞌí₁.
35 Jme₁jnia₃ jaun₂, ca₂dsi₂ tɨn₃ cu₄ ꞌuaꞌ₂ ca₂cuë́ꞌ₃ dsa₂ juɨg₅₄ dsi₂néi₂, ca₂juáꞌ₂: “Jmo₄ co₂nio₄ ꞌí₁ dsa₂ në₅. Në₁juaꞌ₂ ꞌe₂ ca₂ꞌéngꞌ₃ guë́₄ quiángꞌ₂, la₂ bá₄ jángꞌ₄ jë₁ma₂guióngꞌ₃.” Në₃ në́₃ jaun₂.
36 ¿ꞌEin₂ dsa₂ i₂ún₂ ꞌéi₂ lɨ́ngꞌ₂ ca₂jmo₃ dsɨ́₅ a₂lɨ́n₅ dsa₂ mɨ₂güɨ́g₃ rɨnꞌ₅₄ dsa₂ i₂ca₂jmáꞌ₂ dsa₂ ꞌang₂?
37 Jaun₂ ca₂ŋag₃ táng₃ të₅juáꞌ₅:
―I₂ca₂táꞌ₂ ŋéi₂ dsɨ́₅ dsa₂ ꞌéi₂.
Jaun₂ ca₂ŋag₃ táng₃ Jesús:
―Guanꞌ₂, le₂në₅ jmo₄ ꞌne₂ ján₃.
Ca₂dsióg₃ Jesús dsi₂néi₂ quióꞌ₅ Marta quianꞌ₅₄ María
38 Conꞌ₂ tioinꞌ₅₄ juɨ₅, ca₂ꞌí₃ Jesús caun₂ juɨg₂ píꞌ₁. Ja₁jaun₂ ca₂guei₃ jan₂ dsa₂ mɨ́₂ i₂chen₂ Marta dsi₂néi₂ quióꞌ₅.
39 ꞌÉi₂ në́₃ jme₁chan₂ jan₂ rɨinꞌ₅₄ i₂chen₂ María. ꞌÉi₂ në́₃ tei₄ bá₄ ca₂guá₂ cau₅ mɨ₂tag₄ Te₁guiꞌ₅₄, nag₂₃ jág₁ a₂juáꞌ₂ ꞌéi₂.
40 Marta guëꞌ₂ në́₃ ꞌein₅₄ tsá₃ rë₂jɨin₅₄ jmo₂₃ ta₁ a₂cha₂ dsi₂néi₂, jaun₂ guain₃ o₃chiꞌ₅₄ Jesús, ca₂juáꞌ₂:
―Te₁guiꞌ₅₄, ¿tsa₁ dsan₂ ꞌauꞌ₂ a₂tsá₃ ꞌe₂ jme₂ꞌo₅₄ ꞌio₅₄ rɨ́ngꞌ₃? ꞌŊió₃ bá₄ ꞌeng₅₄ tsá₃ rë₂jɨng₅₄ jme₂ti₅₄. Cheiꞌ₅₄ juɨ₁jme₂ꞌo₅₄.
41 Jaun₂ ca₂ŋag₃ Te₁guiꞌ₅₄: