Jme₂tag₅ Jesús ꞌa₂ liaꞌ₂ chi₃lénꞌ₂ dsa₂ Diú₄
11
Co₂ráun₂ jme₁ꞌen₅₄ Jesús chi₂léinꞌ₂ Diú₄. Jme₁ca₂lë₃ jaun₂, ca₂juáꞌ₂ chiꞌ₂ dsɨ₂guia₃-tɨ́n₂ quiáin₅:
―Te₁guiꞌ₅₄, jme₁tag₅ ꞌa₂ liaꞌ₂ chi₂lenꞌ₄ jniaꞌ₅₄ Diú₄, juɨ₁liaꞌ₂ ca₂jme₃tag₅ Juan₅₄ ca₂jme₃tɨin₂₃ dsa₂ quiáin₅.
San Lucas 11:1-28
2 Jaun₂ ca₂juáꞌ₂:
―Le₂la₂ juaꞌ₅₄ ꞌniaꞌ₂ jë₁ma₂të́₂ rë₁chi₁lengꞌ₄ Diú₄:
Tia₅₄, ꞌne₂ i₂ŋéiꞌ₂ gueiꞌ₅₄ i₂juɨ́g₃a
juɨ₁jme₂góꞌ₃ dsa₂ a₂rë₂jŋió₄ a₂chengꞌ₂.
Juɨ₁le₅₄ bá₄ ꞌéiꞌ₃ quiángꞌ₂,
juɨ₁le₅₄ bá₄ a₂ꞌŋio₂ ꞌauꞌ₂ ꞌne₂, ne₄ guaꞌ₅₄ ꞌuë₃,
juɨ₁liaꞌ₂ lë́₂ gueiꞌ₅₄ i₂juɨ́g₃.b
3 Cuë₄ a₂ꞌnióꞌ₅ que₅₄ jniaꞌ₅₄ jmɨg₄ në₃.
4 ꞌÉn₃ dsáu₁ jniaꞌ₅₄,
juɨ₁liaꞌ₂ ꞌén₅ jniaꞌ₅₄ dsáu₁ rɨnꞌ₅₄.
ꞌA₃ cuë₂ jmɨg₄ jiá₃ juɨ₅bí₂ a₂cáun₂ táu₂,
të₂le₃ lio₄ bá₄ o₄gú₃ i₂së₃dsen₃.c
5 Ca₂juáꞌ₂ Jesús në́₃:
―Juaꞌ₅₄ meiꞌ₂ guë́₃ le₃juaꞌ₅₄, chan₂ jan₂ ꞌniaꞌ₂ i₂dsióg₄ a₂ꞌuë₂ quióꞌ₅ a₂mei₅₄ quián₅, të́₂, juáꞌ₂: “Jmo₄ dse₃ ꞌauꞌ₂ rɨnꞌ₅₄ jniog₄, dsi₄ ꞌnɨ₅ i₁ŋíꞌ₄.
6 Ia₁ liaꞌ₂ guan₅ quió₃ jan₂ a₂mei₅₄ quiáng₃ ꞌein₅₄ juɨ₅; ia₁ tsá₃ ꞌe₂ cha₂ ꞌi₁caun₂ quió₃ a₂le₃cuë́₄.”
7 Dsa₂ dsi₂néi₂ në́₃ lé₂ le₃ŋag₃ të₃ rë₂quiain₂₃: “Tsá₃ cuë₂ o₂meꞌ₅₄ dsɨ₅, ia₁ ma₂chi₁jnág₅ o₄ꞌné₄ quió₃; chiꞌ₂-guein₂ quiáng₃ në́₃ ma₂tiáinꞌ₅ le₁güɨ́in₃. Jaun₂ tsá₃ lé₂ no₅₄ juaꞌ₅₄ cuë₅₄ a₂mɨꞌ₂.”
8 Jaun₂ juáꞌ₅ jniá₂, tion₅₄ bá₄ náu₃ cuë₃ ca₂le₃jë́₃ ꞌe₂ a₂mɨ₅ ꞌéi₂, on₃juaꞌ₅₄ jmo₃ ia₁ lë́₅ a₂mei₅₄, të₂le₃ ꞌuɨg₅₄ ia₁ a₂ŋɨ́₄ lë₃ tion₅₄ mɨ₃ bá₄.
9 Jaun₂ le₂në₅ bá₄ juɨ́g₂ jniá₂ ꞌniaꞌ₂: Mɨ₄ ꞌniaꞌ₂, jaun₂ ŋegꞌ₂ bá₄; ꞌniaiꞌ₂ ꞌniaꞌ₂, jaun₂ dsiainꞌ₂; quein₄ ꞌniaꞌ₂ o₄ꞌné₄ té₃, jaun₂ niá₂.
10 Ia₁ juɨ₁liaꞌ₂ i₂mɨ₅ ꞌe₂ mɨ₅, gue₂₃. Le₂jaun₂ juɨ₁liaꞌ₂ i₂ꞌnoꞌ₂ ꞌe₂ ꞌnoꞌ₂, dsoꞌ₂ bá₄. Le₂jaun₂ guëꞌ₂ quióꞌ₅ juɨ₁liaꞌ₂ i₂të́₂, niá₂ bá₄ o₄ꞌné₄.
11 ꞌO₃ bá₄ chan₂ i₂lɨn₅₄ ꞌniaꞌ₂ jmo₅, jë₁ma₂ca₂mɨ₃ guein₂ quiángꞌ₂ i₁ŋíꞌ₄, ¿cuëꞌ₂ ꞌniaꞌ₂ ca₂mɨ́g₂ nɨ₁cang₁? O₃ në₁juaꞌ₂ ca₂mɨi₃ jan₂ i₁ju₁, ¿cuɨ́inꞌ₅ ꞌniaꞌ₂ jan₂ dsɨ₂mɨꞌ₂?
12 O₃ jë₁ma₂ca₂mɨ₃ ca₂mɨ́g₂ mɨ₂jlag₂, ¿o₃ bá₄ cuɨ́inꞌ₅ jan₂ i₁ꞌné₅ ꞌe₂?
13 Chi₂juaꞌ₂ ꞌniaꞌ₂ dsa₂ mɨ₂güɨ́g₃ i₂ꞌnauꞌ₂ dso₄ changꞌ₂, tɨngꞌ₂ cuëꞌ₂ bá₄ chiꞌ₂-guein₂ quiángꞌ₂ a₂dse₃, ¡ꞌë₂ guë́₄ bá₄ Ŋéiꞌ₅ ꞌniaꞌ₂ i₂guá₅ gueiꞌ₅₄ cuɨin₃ Jme₂dsí₂ Jŋió₅ quiáin₅ quióꞌ₅ ca₂le₃jɨ́n₃ i₂mɨ₅!
Juáꞌ₂ dsa₂ a₂ꞌio₅ Jesús juɨ₅bí₂ quióꞌ₅ Beꞌelzebú
14 Co₂ráun₂ táng₃ jme₁ꞌen₅₄ Jesús dsein₂₃ jan₂ jme₂dsí₂ je₂naꞌ₅₄ i₂jmo₅ a₂tsá₃ lé₂ dsia₃ dsa₂ jág₁. Jme₁ca₂o₃ꞌɨ́n₃ je₂naꞌ₅₄ quióꞌ₅ dsa₂, jaun₂ guë́₄ ca₂dsia₃ táng₃ dsa₂ ꞌéi₂ jág₁. Jaun₂ ca₂i₃góꞌ₃ dsɨ́₅ dsa₂ tioinꞌ₅₄.
15 La₁ i₂lɨn₅₄ guëꞌ₂ ca₂dsia₃ ꞌɨin₂₃ Jesús:
―Quɨꞌ₅₄ i₂në₅ jmɨg₄ ꞌuɨ́inꞌ₂ je₂naꞌ₅₄ quianꞌ₅₄ juɨ₅bí₂ quióꞌ₅ Beꞌelzebú*, i₂lɨ́n₅ juɨg₅₄ je₂naꞌ₅₄.
16 I₂lɨn₅₄ guëꞌ₂ në́₃, a₂jŋiaꞌ₅₄ conꞌ₂ cáun₂ táu₂ bá₄ jme₁mɨ₂₃ a₂jme₁jmo₃ Jesús a₂sió₃ caun₂ léi₄ gueiꞌ₅₄ i₂juɨ́g₃.
17 La₁ a₂ŋi₅ rë₂ bá₄ Jesús ꞌa₂ liaꞌ₂ dsɨ₂jiog₅ dsɨ́₅ dsa₂ ꞌéi₂. Jaun₂ lë₃ ca₂juáꞌ₂:
―Juɨ₁liaꞌ₂ caun₂ juɨg₂ nación, tioinꞌ₅₄ mɨꞌ₅₄ guioin₅₄, tioinꞌ₅₄ le₁dsoinꞌ₅₄, dsɨ₃ꞌén₂ bá₄ juɨg₂ jaun₂. Le₂jaun₂ guëꞌ₂ juɨ₁liaꞌ₂ caun₂ dsi₂néi₂ tionꞌ₅₄ dsa₂ le₁dsoinꞌ₅₄ tsá₃ caun₂ jág₁ ꞌei₅, ján₃ bá₄ dsɨ₃ꞌén₂ dsi₂néi₂ jaun₂.
18 Le₂në₅ bá₄ ján₃, në₁juaꞌ₂ ca₂lë₃ le₁dsoꞌ₅₄ juɨ₅bí₂ quióꞌ₅ i₂së₃dsen₃, ¿ꞌa₂ guëꞌ₂ liaꞌ₂ lé₂ le₃quɨꞌ₅₄ guë́₄ jmɨg₄ jiog₃ ne₄ta₁ quióꞌ₅? Juáꞌ₅ jniá₂ le₂në₅ ia₁ juáꞌ₂ ꞌniaꞌ₂, quianꞌ₅₄ bí₂ quióꞌ₅ Beꞌelzebú bá₄ a₂ꞌuɨnꞌ₄ jniá₂ je₂naꞌ₅₄.
19 La₁ chi₂juaꞌ₂ le₂jaun₂ ꞌuɨinꞌ₄ jniá₂ quianꞌ₅₄ bí₂ quióꞌ₅ Beꞌelzebú, ¿ꞌein₂ guëꞌ₂ quióꞌ₅ bí₂ quian₅ i₂quianꞌ₅₄ ꞌniaꞌ₂ a₂lé₂ le₃ꞌuágꞌ₂ ján₃? Jaun₂ juɨ₁liaꞌ₂ lë́₅ jmo₅ dsa₂ ꞌéi₂ bá₄ jiógꞌ₂ ꞌí₁ a₂tsá₃ tí₅ jág₁ quiánꞌ₂ ꞌniaꞌ₂.
20 La₁ chi₂juaꞌ₂ jaun₂ quianꞌ₅₄ juɨ₅bí₂ a₂tɨn₂ Diú₄ lon₄ jniá₂ dsa₂ o₄gú₃ je₂naꞌ₅₄, jaun₂ le₂në₅ bá₄ jauꞌ₂ jág₁ dsau₅ a₂ma₂gua₅ bí₂ ꞌéiꞌ₃ quióꞌ₅ Diú₄ ja₁conꞌ₂ ꞌniaꞌ₂.
21 ꞌJuɨ₁liaꞌ₂ jan₂ dsa₂ ꞌuanꞌ₂ chain₂ rë₂jáin₁, ꞌio₂₃ ca₂le₃jë́₃ a₂ꞌnióꞌ₅ quióꞌ₅ jmo₃ ꞌnei₂, jaun₂ lë́₅ ꞌí₁ ca₂le₃jë́₃ ꞌe₂ tioꞌ₅₄ dsi₂néi₂.
22 La₁ në₁ca₂já₃ jan₂ i₂ꞌuanꞌ₂ guë́₄ liaꞌ₂ conꞌ₂ guë́₄ ꞌŋiog₅ ꞌéi₂, në₁ca₂jo₃ në́₃, i₂ꞌéi₂ guëꞌ₂ në́₃ jŋiáꞌ₂ ca₂le₃jë́₃ a₂ŋɨ́₄ lë₃ beinꞌ₂ jmo₂₃ a₂ꞌuainꞌ₂. Jaun₂ jmo₂₃ dsióg₂ ca₂le₃jë́₃ a₂ca₂lɨ́ꞌ₃.
23 ꞌJuɨ₁liaꞌ₂ dsa₂ i₂tsá₃ chénꞌ₅ le₃quió₃ jniá₂, i₂ꞌiog₅₄ bá₄ ꞌéi₂. Juɨ₁liaꞌ₂ i₂tsá₃ cágꞌ₅ co₂lë₅ quianꞌ₅₄ jniá₂, jŋiaꞌ₅₄ jmo₅ tsɨ₁rë₂ja₅₄.
Jme₂dsí₂ ꞌlɨnꞌ₅₄ i₂dsiánꞌ₅ táng₃
24 ꞌJuɨ₁liaꞌ₂ jan₂ jme₂dsí₂ ꞌlɨnꞌ₅₄ i₂o₂ꞌɨn₅ quióꞌ₅ dsa₂, dsɨ₂ŋɨ́₃ le₂tan₅₄ ja₁quein₂ dsɨ₂ꞌnioꞌ₂ ja₁jŋia₃. Në₁juaꞌ₂ tsá₃ dsoꞌ₂ ja₁ꞌí₂ në́₃, ꞌnoꞌ₂ dsɨ́₅: “Négꞌ₄ táng₃ dsi₂néi₂ quió₃ ja₁o₂ꞌɨ́ng₃.”
25 Jë₁ma₂dsiáinꞌ₃, jeinꞌ₂ táng₃ dsa₂ ꞌéi₂ ma₂lɨ́in₅ co₂ꞌnióꞌ₄ bá₄ caun₂ dsi₂néi₂ a₂chíꞌ₅ rë₂, rë₂ꞌiaꞌ₅₄, rë₂lag₄ në́₃.
26 Jaun₂ dsó₅ táng₃ dsɨ₂quiáin₂ guë́₄ guion₃ jme₂dsí₂ i₂ꞌlɨnꞌ₅₄ guë́₄ liaꞌ₂ ꞌŋiog₅, jaun₂ dsɨ₂tiainꞌ₂ ca₂le₃jɨ́in₃ të₂dsɨ́₅ dsa₂ ꞌéi₂. Jaun₂ dsa₂ ꞌéi₂ në́₃ ꞌŋio₅ lɨn₃ guë́₄ le₃ꞌlɨinꞌ₅₄ dsióg₄ liaꞌ₂ conꞌ₂ guë́₄ jme₁lɨ́in₄ le₂jŋiá₅.d
ꞌA₂ liaꞌ₂ ꞌnióꞌ₅ jmo₃ dsa₂ ia₁jaun₂ le₃chain₂ dse₃
27 Të₃ ꞌen₅₄ Jesús dsia₂₃ le₂në₅, ca₂juáꞌ₂ tiá₂ jan₂ dsa₂ mɨ́₂ të₃jɨn₄ dsa₂:
―¡ꞌE₂ guë́₄ dsen₃ dsa₂ mɨ́₂ i₂ca₂caun₃ ꞌne₂, i₂ca₂ꞌéinꞌ₃ dsiꞌ₅₄ quióꞌ₅!
28 Jaun₂ ca₂ŋag₃:
¡Të₂le₃ ja₂lɨn₃ guë́₄ dsen₃ dsa₂ i₂nag₅ ꞌe₂ juáꞌ₂ Diú₄, tonꞌ₂ jme₂ti₃!
Léi₄ a₂lɨ́n₅ Jonás
29 Caun₂ qui₂ŋɨꞌ₂ bá₄ dsa₂ ja₁chénꞌ₄ Jesús, jaun₂ ꞌéi₂ në́₃ ca₂jme₃lióg₃ ca₂juáꞌ₂:
―ꞌŊio₅ lɨn₃ ma₂ꞌlɨnꞌ₅₄ dsa₂ rë₂në́₃, mɨ₂₃ a₂jmo₅₄ jniá₂ léi₄ juëꞌ₂. La₁ tsá₃ ma₂ꞌe₂ léi₄ juaꞌ₅₄ a₂jmo₄ guë́₄ jniá₂, jŋiaꞌ₅₄ liaꞌ₂ caun₂ léi₄ a₂ca₂lë₃ quianꞌ₅₄ Jonás bá₄.
San Lucas 11:29-54
30 Ia₁ le₂në₅ juɨ₁liaꞌ₂ Jonás ca₂lɨin₃ caun₂ léi₄ të₂le₃ ja₁con₂ dsa₂ i₂jme₁chan₂ Nínive jmɨg₄ jaun₂, le₂në₅ bá₄ ján₃, Jaun₅* dsa₂ mɨ₂güɨ́g₃ léin₂ caun₂ léi₄ a₂jángꞌ₃ jág₁ dsau₅ ja₁con₂ dsa₂ i₂chan₂ jmɨg₄ në₃.
31 Jë₁ma₂të́₂ rë₁qui₃dsɨ₅ Diú₄ ꞌéiꞌ₃, náu₃ ꞌio₅₄ rag₅₄ i₂jme₁chan₂ të₂le₃ sur, jeinꞌ₅₄ quianꞌ₅₄ dsa₂ ŋeꞌ₂ i₂chan₂ jmɨg₄ në₃. ꞌA₂ liaꞌ₂ niog₅ ca₂jmo₃ ꞌéi₂, jiógꞌ₂ ꞌí₁ a₂rë₂cánꞌ₄ dsa₂. Ia₁ ꞌio₅₄ ꞌéi₂ ca₂ꞌí₃ juɨ₅ ca₂já₃ uɨ́ng₂ lɨn₃ guain₃ ca₂o₃néi₃ jág₁ caꞌ₅₄, ca₂o₃dso₅₄ dsɨ́₅ ꞌa₂ liaꞌ₂ niog₅ dsi₄ Salomón. La₁ në₃ në́₃, la₂ chénꞌ₅ jan₂ i₂juɨnꞌ₂ guë́₄ liaꞌ₂ Salomón.
32 Ján₃ bá₄ náu₃ i₂jme₁chan₂ Nínive, jeinꞌ₅₄ quianꞌ₅₄ dsa₂ ŋeꞌ₂ i₂chan₂ jmɨg₄ në₃, jë₁ma₂të́₂ rë₁qui₃dsɨ₅ Diú₄ ꞌéiꞌ₃. ꞌA₂ liaꞌ₂ niog₅ ca₂jmo₃ ꞌéi₂ ma₂lɨ́gꞌ₂ jiógꞌ₂ ꞌí₁ a₂rë₂cánꞌ₄ dsa₂ jmɨg₄ në₃. Ia₁ ꞌéi₂ ca₂jme₃tsɨ́in₃ dsɨ́₅ jme₁ca₂ꞌë́₂ Jonás jág₁ quióꞌ₅ Diú₄. La₁ në₃ në́₃, la₂ chénꞌ₅ jan₂ i₂juɨnꞌ₂ guë́₄ liaꞌ₂ Jonás.
Dsa₂ i₂lɨ́n₅ liaꞌ₂ lë́₅ caun₂ si₂
33 ꞌꞌI₁jan₂ dsa₂ tsá₃ guíꞌ₅ caun₂ si₂ nɨ₁tsɨ́₅ juaꞌ₅₄ chiꞌ₃ ja₁chi₁quionꞌ₅₄.e A₂ꞌag₅ gueiꞌ₅₄ bá₄ dsa₂ si₂, ia₁jaun₂ jág₃ dsa₂ i₂dsɨ₃tonꞌ₅₄ dsi₂néi₂.
34 Jme₁ne₁ dsa₂ lë́₅ co₂ꞌnióꞌ₄ caun₂ nɨ₁tsɨ́₅ a₂guíꞌ₂ si₂ quióꞌ₅ nɨ₁ŋɨ₁ dsa₂. Chi₂juaꞌ₂ dse₃ jme₁neꞌ₄, ta₁jangꞌ₂ bá₄ tág₅ si₂ quiángꞌ₂. La₁ në₁juaꞌ₂ tsá₃ dse₃, ta₁jangꞌ₂ bá₄ chéngꞌ₅ qui₁néꞌ₃.
35 Të₃ŋiꞌ₅₄ ꞌniaꞌ₂ jaun₂, ia₁ conꞌ₂ tsá₃ ŋó₅ në₁juaꞌ₂ si₂ quiángꞌ₂ tsá₃ jniá₂.
36 Chi₂juaꞌ₂ ta₁jangꞌ₂ tág₅ bá₄ si₂ quiángꞌ₂, tsá₃ qui₁néꞌ₃ lë́₅. Jniágꞌ₂ bá₄ liaꞌ₂ ja₁jniá₂ tág₅ caun₂ si₂.
Jme₂cáunꞌ₂ Jesús quióꞌ₅ dsa₂ fariseos quianꞌ₅₄ të₅juáꞌ₅
37 Jme₁ca₂dsan₃ cuë₂₃ jág₁, ca₂tág₃ jan₂ dsa₂ fariseo* a₂i₃guë́ꞌ₃ quiongꞌ₅₄. Jme₁ca₂dsióg₃ dsi₂néi₂ ca₂guá₂.
38 Dsa₂ fariseo ꞌéi₂ në́₃, i₃góꞌ₃ dsɨ́₅ ia₁ tsá₃ ca₂jme₃ti₃ Jesús conꞌ₂ lë́₅ tag₄ a₂chíꞌ₅, a₂rang₃ gu₂ néꞌ₃ a₂guë́ꞌ₃.
39 La₁ Te₁guiꞌ₅₄ në́₃, ca₂juáꞌ₂:
―ꞌNiaꞌ₂ dsa₂ fariseos lɨ́ngꞌ₅ liaꞌ₂ lë́₅ nɨ₁vaso, nɨ₁uɨng₅, a₂jŋiaꞌ₅₄ le₁jë́₃ jmáꞌ₃ le₃coꞌ₅₄, la₁ të₂le₃ juɨ₅ jme₂dsí₂ quiángꞌ₂, qui₂rë₂canꞌ₂ ca₂le₃jë́₃ a₂ꞌlɨgꞌ₅₄ a₂jmoꞌ₂: tsá₃ magꞌ₂ ꞌauꞌ₂ ꞌniaꞌ₂ ma₂qui₂ma₂ꞌangꞌ₂ quióꞌ₅ dsa₂.
40 ¡ꞌE₂ bá₄ tsá₃ ŋɨ́ꞌ₂ ꞌauꞌ₂ ꞌniaꞌ₂! ¿On₁juaꞌ₅₄ i₂ca₂jmo₃ le₃coꞌ₅₄, ca₂jmo₃ le₃ꞌŋióꞌ₂ ján₃?
41 Ja₂lɨn₃ guë́₄ dsióg₅ jenꞌ₅₄ deꞌ₂ ꞌniaꞌ₂ a₂te₁ꞌi₁ quiángꞌ₂, jaun₂ guë́₄ lé₂ le₃të₃tsɨnꞌ₅₄ ꞌniaꞌ₂ le₁jɨ́ngꞌ₃ le₃ja₁con₂ Diú₄.
42 ꞌ¡ꞌE₂ guë́₄ juɨ́gꞌ₂ ꞌniaꞌ₂ dsa₂ fariseos! Ia₁ a₂jme₂tíꞌ₁ ꞌniaꞌ₂ jmoꞌ₂, cuëꞌ₂ Diú₄ caun₂ quiꞌ₅₄ a₂guia₃ a₂ꞌi₄ ꞌéiꞌ₃ cuëꞌ₅₄, ca₂liaꞌ₂ ca₂le₃jë́₃ ne₅₄ ma₁ꞌau₂ a₂lë́₂ ma₂juɨg₂ má₃ bá₄ jángꞌ₄ ꞌniaꞌ₂. La₁ conꞌ₂ ma₂ŋɨꞌ₅₄ bá₄ ꞌniaꞌ₂ juɨ₅ dse₃ të₃dsónꞌ₂ ja₁ꞌŋio₂ dsɨ́₅ Diú₄, ja₁jme₁jme₁ꞌnióꞌ₄ ꞌniaꞌ₂ Diú₄: a₂në₅ bá₄ a₂dsen₅₄ guë́₄ a₂ca₂tɨ́nꞌ₂ ꞌniaꞌ₂ jmóꞌ₂, la₁ on₃juaꞌ₅₄ a₂tsá₃ ma₃jme₁tiꞌ₄ ꞌniaꞌ₂ ꞌéiꞌ₃.
43 ꞌ¡Juɨ́gꞌ₂ ꞌniaꞌ₂ dsa₂ fariseos! Ia₁ ꞌŋio₅ lɨn₃ të₅ ꞌauꞌ₂ a₂tiángꞌ₄ jlángꞌ₁ ja₁dsen₅₄ guë́₄ juɨ₁liaꞌ₂ dsi₂néi₂ guáꞌ₅ sinagogas*. Ján₃ bá₄ të₅ ꞌauꞌ₂ ꞌniaꞌ₂ qui₃cuag₃ dsa₂ Diú₄ juɨ₁liaꞌ₂ jë₄ ꞌmaꞌ₅₄ a₂jme₂go₃ dsa₂ ꞌŋio₅ lɨn₃.
44 ꞌ¡ꞌE₂ guë́₄ juɨ́gꞌ₂ ꞌniaꞌ₂!f Ia₁ lɨ́ngꞌ₅ juɨ₁liaꞌ₂ lë́₅ tau₂ ꞌŋio₅ a₂tsá₃ léi₄ cha₂. Dsa₂ në́₃ qui₂ŋɨ́i₅ ne₄, të₃ tsá₃ ŋi₅.”
45 Jaun₂ ca₂ŋag₃ jan₂ të₅juáꞌ₅:
―Të₅, a₂juáꞌ₂ ꞌne₂ në₅, a₂të₂ꞌóꞌ₁ jniaꞌ₅₄ bá₄ ꞌne₂.
46 Jaun₂ ca₂ŋag₃ Jesús:
―¡Juɨ́gꞌ₂ ꞌniaꞌ₂ të₅juáꞌ₅! Ia₁ quianꞌ₄ ꞌniaꞌ₂ lio₅₄ guei₂ i₂siánꞌ₂, la₁ guionꞌ₅₄ ꞌniaꞌ₂ në́₃, ca₂liaꞌ₂ jŋiaꞌ₅₄ gogꞌ₂ tsá₃ ꞌniogꞌ₂ tíꞌ₄.
47 ꞌ¡Juɨ́gꞌ₂ ꞌniaꞌ₂! Ia₁ qui₂chogꞌ₂ ꞌniaꞌ₂ nɨ₁ꞌiaꞌ₂ jláꞌ₁ quióꞌ₅ ꞌlag₄ i₂jme₁ꞌë́₂ jág₁ quióꞌ₅ Diú₄, tonꞌ₂ dsa₂ canꞌ₅₄ quiánꞌ₂ ꞌniaꞌ₂ guiongꞌ₅₄ qui₂ca₂jme₃dsiog₂₃.
48 Jaun₂ në́₃, liaꞌ₂ lë́₅ jmoꞌ₂ ꞌniaꞌ₂, cuëꞌ₂ léi₄ co₂ꞌnióꞌ₄ caun₂ bá₄ ꞌei₅ jág₁ ꞌniaꞌ₂ quianꞌ₅₄ dsa₂ canꞌ₅₄ quiángꞌ₂. Ia₁ dsa₂ canꞌ₅₄ ca₂jme₃dsiog₂₃; ꞌniaꞌ₂ guëꞌ₂ ma₂ja₂niógꞌ₅ chogꞌ₂ nɨ₁ꞌiaꞌ₂.
49 ꞌJaun₂ lë₃ Diú₄, ia₁ a₂tɨin₂ a₂ma₂ŋi₅ bá₄ a₂lé₂, ca₂juáꞌ₂: “Qui₁tsɨng₅₄ dsa₂ i₂dsɨ₃can₅ i₂dsɨ₃ꞌë́₃ jág₁ quió₃. I₂lɨn₅₄ ꞌéi₂ jme₃dsian₅ dsa₂; i₂lɨn₅₄ guëꞌ₂ qui₃ꞌein₃.”
50 Jaun₂ në́₃ ca₂të₂ dsa₂ chan₂ jmɨg₄ në₃ bá₄ rë₂cánꞌ₄ ꞌmú₃ quióꞌ₅ ca₂le₃jɨ́n₃ dsa₂ i₂ꞌë́₂ jág₁ i₂ma₂dsan₃ ca₂le₃ ca₂nio₃ mɨ₂güɨ́g₃.
51 Ca₂liaꞌ₂ conꞌ₂ jme₁ca₂jon₃ Abel, ca₂të₂ jmɨg₄ i₁ca₂jon₃ Zacarías i₂ca₂jŋɨꞌ₃ dsa₂ jë₄ ja₁lë́₄ ne₄chei₂ quianꞌ₅₄ ja₁jŋió₅, dsa₂ chan₂ jmɨg₄ në₃ bá₄, juáꞌ₅ jniá₂, quí₃ ꞌmú₃ quióꞌ₅ ca₂le₃jɨ́n₃ dsa₂ i₂ma₂dsan₃ ꞌéi₂.
52 ꞌ¡ꞌE₂ guë́₄ juɨ́gꞌ₂ ꞌniaꞌ₂ të₅juáꞌ₅! Ia₁ ꞌniaꞌ₂ bá₄ ma₂rë₂ꞌmógꞌ₄ jág₁ quióꞌ₅ Diú₄ a₂lë́₅ co₂ꞌnióꞌ₄ ŋí₁ llave quióꞌ₅ o₄ꞌné₄ ja₁jme₁le₃tɨn₂, le₃ŋɨ́ꞌ₂ dsa₂. On₃ guëꞌ₂ guionꞌ₅₄ ꞌniaꞌ₂ tóngꞌ₄, on₃ guëꞌ₂ cuëꞌ₂ ꞌniaꞌ₂ jmɨg₄ dsɨ₃tonꞌ₅₄ i₂ꞌnio₃ tónꞌ₃.