Jesús bá₄ i₂quian₅ ꞌéiꞌ₃ ne₄ quióꞌ₅ jmɨg₄ sa₅₄
12
Jmɨg₄ jaun₂ ca₂ŋɨ₃ Jesús ja₁lë́₄ ja₁nau₂ quióꞌ₅ dsa₂ caun₂ jmɨg₄ sa₅₄*. Dsa₂ i₂quiainꞌ₅₄ në́₃ ca₂táꞌ₂ i₁cónꞌ₅, jaun₂ qui₂ca₂gág₃ mɨ́ꞌ₂ trigo, jaun₂ ca₂guë́ꞌ₃.
2 Jme₁ca₂jág₂ dsa₂ fairseos*, jaun₂ ca₂o₃léin₂ ca₂tsɨ́ꞌ₃ Jesús:
―Jag₄ ꞌa₂ liaꞌ₂ tionꞌ₅₄ dsa₂ quiángꞌ₂ jmo₂₃ ta₁ a₂tsá₃ ꞌi₄ ꞌéiꞌ₃ jmo₃ dsa₂ jmɨg₄ sa₅₄.
3 Jaun₂ ca₂ŋag₃ Jesús:
―¿Tsa₁ ma₂ca₂ꞌíꞌ₂ ꞌniaꞌ₂ ne₄ Si₂ ꞌa₂ liaꞌ₂ lë́₅ ca₂jmo₃ David co₂ráun₂ jme₁ca₂lë₃ i₁cónꞌ₅ quiainꞌ₅₄ rɨinꞌ₅₄?
4 Ca₂ꞌí₃ dsi₂néi₂ quióꞌ₅ Diú₄, ca₂guë́ꞌ₃ i₁ŋíꞌ₄* jŋió₅, a₂tsá₃ jme₁ꞌi₄ ꞌéiꞌ₃ guë́ꞌ₃, a₂ꞌi₄ ꞌéiꞌ₃ guë́ꞌ₃ jmáꞌ₃ jme₂dsa₂.
5 ¿O₃ tsa₁ ma₂ca₂ꞌíꞌ₂ ꞌniaꞌ₂ ne₄ Si₂ ꞌÉiꞌ₃ quióꞌ₅ Moisés, juɨ₁liaꞌ₂ jme₂dsa₂ tsá₃ jme₂góꞌ₃ jmɨg₄ sa₅₄? La₁ tsá₃ ꞌein₂ bónꞌ₂ guëꞌ₂ dso₄ ꞌéi₂ në́₃.
6 Juɨ́g₂ jniá₂ ꞌniaꞌ₂, ja₁lá₃ chénꞌ₅ jan₂ i₂juɨnꞌ₂ guë́₄ conꞌ₂ guë́₄ guáꞌ₅ templo*.
7 Juaꞌ₅₄ meiꞌ₂ guë́₃ ma₂ŋɨ́ꞌ₂ ꞌniaꞌ₂ ꞌe₂ jein₅ jág₁ la₂: “A₂ꞌnio₃ jniá₂ a₂dsiáꞌ₁ ꞌniaꞌ₂ ŋéi₂ ꞌauꞌ₂, on₃juaꞌ₅₄ rëꞌ₂ a₂jŋiaꞌ₅₄ qui₁jenꞌ₅₄ ꞌniaꞌ₂ ꞌe₂ qui₁jenꞌ₅₄ ne₃”,a tsá₃ juaꞌ₅₄ jme₁bongꞌ₅₄ dso₄ dsa₂ i₂tsá₃ ꞌe₂ dso₄ rɨn₂.
8 Ia₁ le₂në₅ jaun₂, jniá₂, Jaun₅* dsa₂ mɨ₂güɨ́g₃, jmo₂₃ ꞌéiꞌ₃ juɨ₁liaꞌ₂ jmɨg₄ sa₅₄.
Jan₂ dsa₂ jle₅ caun₂ gu₂
9 Ca₂o₃ꞌɨ́n₃ bá₄ Jesús ja₁jaun₂, jaun₂ ca₂ꞌí₃ táng₃ dsi₂néi₂ guáꞌ₅ sinagoga*.
10 Ja₁jaun₂ jme₁ꞌen₅₄ jan₂ dsa₂ i₂jle₅ caun₂ mɨ₂gu₂. Dsa₂ fariseos në́₃ jme₁ꞌnio₃ ꞌnoꞌ₂ juɨ₅ bóinꞌ₂ dso₄ Jesús, jaun₂ ca₂ŋag₃:
―¿ꞌI₄ ꞌéiꞌ₃ jme₃ꞌlión₂ dsa₂ jan₂ dsa₂ dsoꞌ₅₄ jme₁jmɨg₄ sa₅₄?
11 Jaun₂ ca₂ŋag₃ Jesús:
―¿ꞌEin₂ ꞌniaꞌ₂, i₂ꞌŋio₅ jan₂ jáꞌ₂ chaꞌ₂, në₁juaꞌ₂ ca₂bain₃ siá₅ juɨ₁liaꞌ₂ caun₂ jmɨg₄ sa₅₄, tsa₁ dsó₅ dsɨ₃dsein₂₃ jáꞌ₂ quiáin₅?
12 ¡ꞌË₂ guë́₄ bá₄ quen₅ jan₂ dsa₂ conꞌ₂ guë́₄ jan₂ jáꞌ₂ chaꞌ₂! Jaun₂ lë₃, ꞌi₄ bá₄ ꞌéiꞌ₃ jmo₃ dsa₂ a₂dse₃ juɨ₁liaꞌ₂ jmig₄ sa₅₄.
13 Jaun₂ guë́₄ ca₂tsɨ́ꞌ₃ dsa₂ dsoꞌ₅₄ ꞌéi₂:
―Neiꞌ₅₄ gogꞌ₂.
Jaun₂ ca₂néiꞌ₃ ꞌéi₂ gu₂, ca₂jŋia₃ quióꞌ₅, jaun₂ ca₂lë₃ co₂rë₂ quianꞌ₅₄ a₂caun₂.
14 Ca₂ꞌuɨn₂ bá₄ dsa₂ fariseos ꞌéi₂ në́₃, jaun₂ ca₂jmo₃ jág₁ a₂jŋɨiꞌ₃ Jesús.
Juɨ₁liaꞌ₂ dsa₂ i₂ca₂quiónꞌ₂ Diú₄ a₂jme₃ti₃ ta₁ ne₅₄, jág₁ a₂ca₂ꞌë́₂ dsa₂ i₂ca₂juáꞌ₂ o₄quióꞌ₄ Diú₄
15 Jme₁ca₂rë₃ŋi₅ Jesús jág₁ jaun₂, ca₂o₃ꞌɨ́in₃ bá₄. Jaun₂ juɨn₅ lɨn₃ dsa₂ i₃lén₂ chi₁coꞌ₅₄ quióꞌ₅ ꞌein₂₃. Jme₁jme₂ꞌlión₂ Jesús ca₂le₃jɨ́n₃ dsa₂ i₂le₁dsoꞌ₅₄,
16 jaun₂ ca₂juáꞌ₂ a₂tsá₃ ꞌe₂ dsia₃ dsa₂ juaꞌ₅₄ a₂ꞌag₃ ꞌein₂ lɨ́in₅.
17 Le₂në₅ bá₄ ca₂lë₃ ia₁jaun₂ le₃ti₃ jág₁ a₂ca₂ꞌë́₂ Isaías, dsa₂ i₂jme₁ꞌë́₂ jág₁ quián₅ Diú₄, jme₁ca₂juáꞌ₂ le₂la₂:
18 I₂la₂ bá₄ dsa₂ i₂jme₃ti₃ ta₁ ne₃,
i₂ma₂ca₂quiongꞌ₅₄, i₂ꞌnióg₃ guë́₄ lɨn₃,
jaun₂ ꞌioꞌ₂ jéin₅ jniá₂ quiainꞌ₅₄.
Tónꞌ₁ jniá₂ Jme₂dsí₂ quiáng₃ të₂dsɨ́₅,
jaun₂ jme₃jniai₂₃ ca₂le₃jë́₃ juɨg₂
jɨn₄ dsɨ₂nau₂ ꞌë₃ juɨ₅ dsau₅ të₃dsónꞌ₂.
19 Tsá₃ quein₅ náu₃, on₃ guëꞌ₂ guióꞌ₃,
on₃ guëꞌ₂ néꞌ₂ jág₁ quióꞌ₅ jë₄ calle,
20 Liaꞌ₂ ꞌi₁ca₂tag₄ nɨ₁ꞌma₂ ta₅ tsá₃ jio₃,
on₃ guëꞌ₂ ei₃ nɨ₁mecha a₂ca₂juɨg₄ ꞌia₂ guë́₄ jme₁ŋi₁.
Jmo₃ le₂në₅ ca₂liaꞌ₂ ca₂tióꞌ₃
a₂líꞌ₂ a₂dsi₂ten₅₄ dsónꞌ₂.
21 Jaun₂ caun₂ ja₁con₂ ꞌéi₂ bá₄
ꞌag₃ dsa₂ caun₂ dsɨ́₅
ca₂le₃jɨ́n₃ dsa₂ i₂chan₂ ca₂le₃jë́₃ juɨg₂.b
Juáꞌ₂ dsa₂ a₂ꞌio₅ Jesús juɨ₅bí₂ quióꞌ₅ Beꞌelzebú
22 Jaun₂ ca₂o₃jŋia₃ dsa₂ ja₁coin₂ jan₂ dsa₂ ten₄ i₂con₄ në́₃ i₂jme₁ꞌen₅₄ jan₂ jme₂dsí₂ je₂naꞌ₅₄. Jesús në́₃ ca₂jme₃ꞌlió₂, ca₂jág₃ táng₃ dse₃, ca₂dsia₃ dse₃ jág₁ në́₃.
23 Ca₂i₃góꞌ₃ dsɨ́₅ ca₂le₃jɨ́n₃ dsa₂, jaun₂ ca₂juáꞌ₂:
―¿On₁juaꞌ₅₄ i₂në₅ lɨ́n₅ tsɨ₁jon₂ David?
24 La₁ jme₁ca₂nág₂ dsa₂ fariseos* jág₁ jaun₂, ca₂dsia₃ jág₁ quianꞌ₅₄ rɨinꞌ₅₄:
―A₂ꞌuɨnꞌ₂ i₂në₅ je₂naꞌ₅₄ quióꞌ₅ dsa₂ të₂le₃ quianꞌ₅₄ juɨ₅bí₂ quióꞌ₅ Beꞌelzebú*, juɨg₅₄ je₂naꞌ₅₄ bá₄.
25 La₁ i₂ŋi₅ rë₂ bá₄ Jesús ꞌe₂ dsɨ₂jiog₅ dsɨ́₅ dsa₂ ꞌéi₂, jaun₂ ca₂juáꞌ₂:
―Juɨ₁liaꞌ₂ dsɨ₂tan₅₄ tionꞌ₅₄ le₁dsoinꞌ₅₄, nióꞌ₅ mɨꞌ₅₄, tsá₃ uë́₂ tióꞌ₅ juaꞌ₅₄ tsá₃ dsɨ₃ꞌén₂ ꞌéiꞌ₃ quióꞌ₅. Le₂në₅ bá₄ ján₃ juɨ₁liaꞌ₂ dsa₂ caun₂ dsi₂néi₂, në₁juaꞌ₂ lë́₅ le₁dsoinꞌ₅₄, niog₅ mɨꞌ₅₄, ján₃ bá₄ tsá₃ uë́₂ tióꞌ₅.
26 Ján₃ bá₄ le₂në₅, në₁juaꞌ₂ ca₂jmo₃ Satanás mɨꞌ₅₄ dsein₂₃ jan₂ i₂quiáin₅ ꞌŋiog₅, co₂ꞌnióꞌ₄ ꞌŋiog₅ bá₄ jmo₂₃ le₁dsoinꞌ₅₄. ¿ꞌA₂ liaꞌ₂ lé₂ le₃ꞌio₃ guë́₄ bí₂ ꞌéiꞌ₃ quióꞌ₅, chi₂juaꞌ₂ le₂jaun₂?
27 Chi₂juaꞌ₂ jniá₂ ꞌuɨngꞌ₅₄ je₂naꞌ₅₄ quianꞌ₅₄ bí₂ quióꞌ₅ Beꞌelzebú juɨ₁liaꞌ₂ juáꞌ₂ ꞌniaꞌ₂, ¿ꞌein₂ bá₄ guëꞌ₂ cuë₅ bí₂ cuë́ꞌ₅ dsa₂ quiánꞌ₂ ꞌniaꞌ₂ a₂ꞌuɨ́inꞌ₂ je₂naꞌ₅₄ jaun₂ në́₃? ꞌUɨg₅₄ jaun₂, guion₅₄ bá₄ dsa₂ quiángꞌ₂ jme₃li₅₄ a₂lɨ́nꞌ₅ ꞌniaꞌ₂ guiongꞌ₅₄.
28 La₁ jniá₂ në́₃ në₂ꞌuɨngꞌ₅₄ je₂naꞌ₅₄ të₂le₃ quianꞌ₅₄ bí₂ quióꞌ₅ Jme₂dsí₂ quián₅ Diú₄. Jaun₂ në́₃ le₂në₅ bá₄ cuë₅ jniá₂ léi₄ a₂ma₂gua₅ ꞌéiꞌ₃ quióꞌ₅ Diú₄ ja₁conꞌ₂ ꞌniaꞌ₂.
29 ꞌJaun₂ në́₃, ¿ꞌa₂ liaꞌ₂ lé₂ le₃ꞌí₂ jan₂ dsa₂ dsi₂néi₂ quióꞌ₅ juɨ₁liaꞌ₂ jan₂ dsa₂ i₂ꞌuanꞌ₂, a₂jŋiáꞌ₃ a₂te₁ꞌi₁ quióꞌ₅, chi₂juaꞌ₂ le₂ꞌuɨg₅₄ tsá₃ ma₂në₂ꞌneiꞌ₂ deꞌ₂ dsa₂? Jŋiaꞌ₅₄ liaꞌ₂ le₂jaun₂ bá₄ lé₂ le₃jŋiáꞌ₃ a₂cha₂ quióꞌ₅.
30 ꞌI₂tsá₃ tión₂ le₃quió₃ jniá₂, dsa₂ i₂ꞌiog₅₄ jniá₂ bá₄ ꞌéi₂; le₂jaun₂ guëꞌ₂ i₂tsá₃ quianꞌ₅₄ jniá₂ cágꞌ₅, jŋiaꞌ₅₄ jmo₂₃ tsɨ₁rë₂ja₅₄ bá₄.
31 Juɨ́g₂ jniá₂ ꞌniaꞌ₂ jaun₂ në́₃, a₂lé₂ le₃ꞌén₂ bá₄ ca₂le₃jë́₃ dsáu₁ dsa₂, ca₂le₃jë́₃ ꞌe₂ a₂ꞌlɨgꞌ₅₄ juáꞌ₂ në́₃. La₁ në₁juaꞌ₂ ca₂ꞌɨin₃ ꞌlɨgꞌ₅₄ Jme₂dsí₂ quián₅ Diú₄, a₂në₅ guë́₄ tsá₃ ma₃o₂ꞌén₂ dso₄ cha₂.
32 La₁ në₁juaꞌ₂ chan₂ i₂ca₂ꞌɨn₃ ꞌlɨgꞌ₅₄ Jaun₅* dsa₂ mɨ₂güɨ́g₃, lé₂ bá₄ le₂ꞌén₂ dsáu₁; la₁ juɨ₁liaꞌ₂ i₂ꞌɨn₅ ꞌlɨgꞌ₅₄ Jme₂dsí₂ Jŋió₅, tsá₃ ma₃o₂ꞌén₂ dso₄ cha₂ quióꞌ₅, mɨ₂güɨ́g₃ la₂, on₃ guëꞌ₂ mɨ₂güɨ́g₃ caun₂ në́₃.
Të₂le₃ ꞌa₂ liaꞌ₂ lë́₅ mɨ́g₂ a₂ꞌag₅ bá₄ nɨ₁ꞌma₂, jángꞌ₅ léi₄
33 ꞌChi₂juaꞌ₂ jmoꞌ₂ ꞌniaꞌ₂ a₂le₃dse₃ nɨ₁ꞌma₂, mɨ́g₂ dse₃ bá₄ ꞌag₃; la₁ chi₂juaꞌ₂ jmoꞌ₂ ꞌniaꞌ₂ a₂le₃ꞌlɨgꞌ₅₄ nɨ₁ꞌma₂, mɨ́g₂ ꞌlɨgꞌ₅₄ bá₄ ꞌag₃ ján₃. ꞌUɨg₅₄ jaun₂, të₂le₃ quianꞌ₅₄ mɨ́g₂ a₂ꞌag₅ bá₄ nɨ₁ꞌma₂, jángꞌ₅ léi₄ chi₂juaꞌ₂ dse₃ o₃ a₂ꞌlɨgꞌ₅₄ ꞌe₂.
34 ¡ꞌNiaꞌ₂ tsɨ₁jon₂ dsɨ₂mɨꞌ₂! ¿ꞌA₂ bá₄ liaꞌ₂ lé₂ le₃dsiáꞌ₁ ꞌniaꞌ₂ jág₁ dse₃, tonꞌ₂ ꞌlɨnꞌ₅₄ bá₄ guëꞌ₂ ꞌniaꞌ₂ guiongꞌ₅₄? Ia₁ liaꞌ₂ conꞌ₂ lë́₅ a₂ꞌlióng₂ ŋag₅₄ cha₂ të₂dsɨ́₅ dsa₂, a₂jaun₂ bá₄ ꞌuë₂ mɨ₂ꞌo₅₄.
35 Juɨ₁liaꞌ₂ dsa₂ dsen₃, jág₁ dse₃ bá₄ dsia₂₃, ia₁ jmáꞌ₃ liaꞌ₂ a₂dse₃ bá₄ rë₂ꞌma₄ të₂dsɨ́₅; le₂në₅ bá₄ juɨ₁liaꞌ₂ dsa₂ ꞌlɨnꞌ₅₄, jág₁ ꞌlɨgꞌ₅₄ bá₄ dsia₂₃, ia₁ jmáꞌ₃ liaꞌ₂ a₂ꞌlɨgꞌ₅₄ bá₄ rë₂ꞌma₄ të₂dsɨ́₅.
36 Jaun₂ juáꞌ₅ jniá₂, jángꞌ₃ bá₄ dsa₂ mɨ₂güɨ́g₃ cuenta quióꞌ₅ jë₁ma₂të́₂ jmɨg₄ i₁con₂ Diú₄ ꞌí₁, qui₃dsɨ₂₃ ꞌéiꞌ₃ ne₄ ca₂le₃jë́₃ jág₁ a₂tsá₃ ta₁ tí₄.
37 Ia₁ të₂le₃ ꞌa₂ liaꞌ₂ lë́₅ jág₁ quiánꞌ₂ bá₄ ꞌniaꞌ₂, jiógꞌ₂ ꞌí₁, rɨngꞌ₂ o₃ tsá₃ rɨngꞌ₂.
Mɨ₅ dsa₂ fariseos a₂jmo₃ Jesús caun₂ léi₄ juëꞌ₂
38 Jaun₂ në́₃ i₂lɨn₅₄ dsa₂ fariseos* quianꞌ₅₄ të₅juáꞌ₅ ca₂tsɨ́ꞌ₃ Jesús:
―Të₅, ꞌniog₂ jniaꞌ₅₄ jag₅₄ caun₂ léi₄ juëꞌ₂ a₂jmóꞌ₂ ꞌne₂.
39 Jaun₂ ca₂ŋag₃ Jesús:
―Tsɨ₁jon₂ dsa₂ ꞌlɨnꞌ₅₄ i₂tsá₃ nag₃ la₂ mɨ₂₃ a₂jmo₅₄ jniá₂ caun₂ léi₄ juëꞌ₂. La₁ tsá₃ ma₃ꞌe₂ léi₄ lé₂ le₃cuë₅₄ jniá₂ ja₁conꞌ₂ ꞌniaꞌ₂, jŋiaꞌ₅₄ liaꞌ₂ conꞌ₂ léi₄ juɨ₁liaꞌ₂ a₂ca₂i₃ŋɨ́₂ Jonás i₂jme₁ꞌë́₂ jág₁ o₄quióꞌ₄ Diú₄ bá₄.
40 Ia₁ juɨ₁liaꞌ₂ ca₂ꞌí₃ Jonás ꞌnɨ₅ jmɨg₄, ꞌnɨ₅ nei₅ të₂dsɨ́₅ jáꞌ₂ jmɨg₂ pan₅₄ ꞌéi₂, le₂jaun₂ bá₄ ꞌí₂ Jaun₅* dsa₂ mɨ₂güɨ́g₃ néꞌ₃ ꞌuë₃ ꞌnɨ₅ jmɨg₄, ꞌnɨ₅ nei₅.
41 Jmɨg₄ jë₁ma₂të́₂ rë₁con₂ Diú₄ ꞌí₁, dsa₂ i₂jme₁chan₂ juɨg₂ ciudad Nínive, dsa₂ ꞌéi₂ bá₄ náu₃ qui₃dsɨ₂₃ ꞌéiꞌ₃ ján₃ ja₁conꞌ₂ ꞌniaꞌ₂ dsa₂ changꞌ₂ jmɨg₄ në₃. Ia₁ dsa₂ ꞌéi₂ ca₂jéinꞌ₃ dsɨ́₅ liaꞌ₂ conꞌ₂ jme₁ca₂ꞌë́₂ Jonás jág₁ quióꞌ₅ Diú₄. La₁ në₃ në́₃ la₂ chénꞌ₅ jan₂ i₂juɨnꞌ₂ guë́₄ liaꞌ₂ conꞌ₂ guë́₄ Jonás ꞌéi₂.
42 ꞌIo₅₄ rag₅₄ i₂jme₁gon₂ ꞌuë₃ të₂le₃ sur, ján₃ bá₄ náu₃ ꞌéi₂ jmɨg₄ i₁qui₃dsɨ₅ Diú₄ ꞌéiꞌ₃, ján₃ guëꞌ₂ ꞌliogꞌ₃ ꞌéi₂ ꞌliainꞌ₃ ꞌniaꞌ₂ i₂changꞌ₂ jmɨg₄ në₃. Ia₁ ꞌéi₂ në́₃ ca₂já₃ uɨ́ng₂ lɨn₃ ca₂ꞌí₃ juɨ₅ a₂ca₂o₃néi₃ jág₁ quióꞌ₅ Salomón ꞌa₂ liaꞌ₂ jme₁ŋɨ́ꞌ₂ dsɨ́₅ ꞌéi₂ a₂ŋɨ́₄ lë₃ jme₁tɨin₂;c la₁ në₃ në́₃, la₂ chénꞌ₅ jan₂ i₂juɨnꞌ₂ guë́₄ conꞌ₂ guë́₄ Salomón ꞌéi₂.
Jme₂dsí₂ ꞌlɨnꞌ₅₄ i₂jónꞌ₂ táng₃
43 ꞌJë₁ma₂o₂ꞌɨ́n₃ jan₂ jme₂dsí₂ ꞌlɨnꞌ₅₄ quióꞌ₅ jan₂ dsa₂, jaun₂ dsɨ₂ŋɨ́₃ le₂tan₅₄ ja₁quein₂ ꞌnoꞌ₂ ja₁jŋia₃. Në₁juaꞌ₂ tsá₃ ca₂dsóꞌ₂ ja₁jŋia₃ në́₃, jaun₂ ꞌnoꞌ₂ táng₃ dsɨ́₅:
44 “Négꞌ₄ táng₃ dsi₂néi₂ quió₃ ja₁ca₂o₃ꞌɨ́ng₃.” Jë₁ma₂ca₂dsiáinꞌ₃ jaun₂, dsainꞌ₂ táng₃ dsa₂ ꞌéi₂ lɨ́in₅ co₂ꞌnióꞌ₄ bá₄ caun₂ dsi₂néi₂ a₂rë₂jë₄, rë₂ꞌiaꞌ₅₄, rë₂ chíꞌ₅.
45 Jaun₂ në́₃ o₂ꞌɨin₅₄ táng₃ dsó₅ chi₂liainꞌ₂ conꞌ₂ guë́₄ guion₃ jme₂dsí₂ ꞌlɨnꞌ₅₄ rɨinꞌ₅₄ i₂lë₁ꞌŋio₅ guë́₄ conꞌ₂ guë́₄ ꞌŋiog₅. Dsɨ₂lein₅ dsɨ₂tiainꞌ₂ të₂dsɨ́₅ dsa₂ ꞌéi₂. Jaun₂ dsa₂ ꞌéi₂ në́₃, dsióg₄ léin₂ le₃ꞌlɨinꞌ₅₄ guë́₄ lɨn₃ guë́₄ conꞌ₂ guë́₄ jme₁lɨ́in₄ le₂ꞌuɨg₅₄.d Le₂në₅ bá₄ dsɨ₃ŋɨ́₂ tsɨ₁jon₂ ꞌlɨnꞌ₅₄ i₂chan₂ rë₂në́₃.
Chiꞌ₂ rɨnꞌ₅₄ Jesús quianꞌ₅₄ chog₅₄
46 Të₃ ꞌen₅₄ Jesús dsia₂₃ jág₁ tsɨ́ꞌ₅ dsa₂, jme₁ca₂dsi₃lén₂ chiꞌ₂ rɨinꞌ₅₄ quiainꞌ₅₄ chog₅₄ në́₃. Ca₁ꞌné₄ bá₄ ca₂tiáinꞌ₂ a₂ꞌnio₃ dsia₃ jág₁ quiainꞌ₅₄ Jesús.
47 Jaun₂ ca₂i₁con₂ jan₂ jág₁, ca₂juáꞌ₂:
―Chogꞌ₂ quianꞌ₅₄ chiꞌ₂ rɨ́ngꞌ₂ tiáinꞌ₅ ca₁ꞌné₄, a₂ꞌnio₃ dsia₃ jág₁ quianꞌ₅₄ ꞌne₂.e
48 Jaun₂ ca₂ŋag₃ Jesús:
―¿ꞌEin₂ ꞌéi₂ cha₃ jniá₂, ꞌein₂ ꞌéi₂ rɨ́nꞌ₃ jniá₂ në́₃?
49 Jaun₂ në́₃ ca₂ꞌɨin₃ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂: