Ca₂jme₃tan₅₄ Jesús quén₂ mei₅ dsa₂
8
Jmɨg₄ jaun₂ ca₂ŋɨꞌ₂ juɨn₅ lɨn₃ dsa₂. Ia₁ tsá₃ ma₃ꞌe₂ cha₂ guë́ꞌ₃, jaun₂ ca₂të́ꞌ₃ Jesús chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
San Marcos 8:1-26
2 ―Ŋéi₂ dsɨ₃ jɨng₅₄ dsa₂ në₅, ia₁ ma₂ꞌnɨ₅ jmɨg₄ tioinꞌ₅₄ ja₁lá₃ quiongꞌ₅₄, tsá₃ ma₃ꞌe₂ cha₂ guë́ꞌ₃.
3 Në₁juaꞌ₂ dsiainꞌ₅₄ guëꞌ₂ jniá₂ quióꞌ₅ të₃ tsá₃ ma₂në₂guë́ꞌ₃, ꞌuáin₂ bá₄ le₂ꞌi₄ juɨ₅, ia₁ uɨ́ng₂ bá₄ ja₂lén₂ i₂lɨn₅₄ në₅.
4 Jaun₂ ca₂ŋag₃ chiꞌ₂ dsɨ₂guia₃-tɨ́n₂ quiáin₅:
―¿A₂jáꞌ₄ bá₄ lé₂ le₃dsɨ₁ꞌnióg₂ ca₂le₃jë́₃ i₁ŋíꞌ₄ a₂ꞌnióꞌ₅ le₂tan₅₄ dsa₂ në₅ ja₁co₂ꞌŋiog₅ la₂?
5 Jaun₂ ca₂ŋag₃ táng₃ Jesús:
―¿Je₂liáꞌ₂ i₁ŋíꞌ₄ ꞌi₄ quiánꞌ₂ ꞌniaꞌ₂?
―Guio₃ bá₄ ―ca₂ŋag₃.
6 Jaun₂ ca₂jmo₃ Jesús ꞌéiꞌ₃ a₂tianꞌ₃ dsa₂ ca₂le₃jɨ́in₃ ꞌuë₃. Jme₁ma₂chanꞌ₂ le₂guio₃ i₁ŋíꞌ₄, ca₂cuë́ꞌ₃ ti₁ꞌmagꞌ₄ Diú₄, jaun₂ ca₂jmo₃ le₁ꞌnau₅₄, jaun₂ guë́₄ ca₂cuë́ꞌ₃ chiꞌ₂ dsɨ₂guia₃-tɨ́n₂ quiáin₅, ia₁jaun₂ ꞌéi₂ dsia₃ ne₄ dsa₂. Jaun₂ le₂jaun₂ bá₄ ca₂jmo₃.
7 Jme₁tionꞌ₅₄ on₃-ún₂ i₁ju₁ píꞌ₁, jaun₂ ca₂jme₃jŋiói₃ quióꞌ₅ ꞌéi₂ ján₃, jaun₂ ca₂jmo₃ ꞌéiꞌ₃ a₂dsiónꞌ₂ ꞌéi₂.
8 Jaun₂ qui₂ca₂guë́ꞌ₃ ca₂le₃jɨ́n₃ dsa₂ ca₂liaꞌ₂ ca₂rë₃tain₅₄. Jme₁ca₂lë₃ jaun₂, ca₂cágꞌ₃ dsa₂ guio₃ tsɨ₁mɨꞌ₂ ꞌnau₅₄ a₂ca₂chóng₃.
9 Ca₂le₃jɨ́n₃ dsa₂ ꞌéi₂ jme₁lë́₂ conꞌ₂ quén₂ mei₅. Jaun₂ guë́₄ qui₂ca₂ꞌágꞌ₃ jág₁ dsa₂.
10 Dsɨ₂juɨ₅ le₂jaun₂ ca₂ꞌí₃ táng₃ ꞌŋióꞌ₃ tsɨ₁mu₅ quiainꞌ₅₄ chiꞌ₂ dsɨ₂guia₃-tɨ́n₂ quiáin₅, ca₂dsi₃léin₂ ꞌuë₃ Dalmanuta.
Mɨ₅ dsa₂ fariseos a₂jmo₃ Jesús caun₂ léi₄ juëꞌ₂
11 Jaun₂ ca₂o₃lén₂ dsa₂ fariseos* ca₂jme₃lióg₃ ca₂tsɨ́in₂ quiongꞌ₅₄, a₂mɨ₂₃ jmo₃ ꞌéi₂ caun₂ léi₄ juëꞌ₂ a₂já₅ gueiꞌ₅₄ i₂juɨ́g₃.
12 Jaun₂ ca₂chon₃ Jesús dsɨ́₅ ꞌŋio₅ lɨn₃, jaun₂ ca₂juáꞌ₂:
―¿ꞌE₂ bá₄ lë₃ ꞌnio₃ dsa₂ chan₂ jmɨg₄ në₃ a₂jmo₅₄ jniá₂ léi₄? A₂dsɨ₂jóꞌ₃ juɨ́g₂ jniá₂ ꞌniaꞌ₂, tsá₃ léi₄ jaun₂ le₃guéiꞌ₁ ꞌniaꞌ₂.
13 Tión₂ jaun₂ bá₄ dsa₂ ꞌéi₂, ca₂ꞌí₃ táng₃ ꞌŋióꞌ₃ tsɨ₁mu₅ ca₂ŋó₃ le₃ꞌŋoꞌ₅₄ jmɨ₁ŋíꞌ₄ le₃ó₃.
Levadura quióꞌ₅ dsa₂ fariseos
14 Ca₂ꞌen₃ dsɨ́₅ chiꞌ₂ dsɨ₂guia₃-tɨ́n₂ cán₂ a₂guë́ꞌ₃, jŋiaꞌ₅₄ liaꞌ₂ caun₂ i₁ŋíꞌ₄ bá₄ quian₅ i₃léin₂ ꞌŋióꞌ₃ tsɨ₁mu₅.
15 Jaun₂ ti₁ca₂néiꞌ₂ Jesús jág₁, ca₂juáꞌ₂:
―Të₃ŋiꞌ₅₄ quiánꞌ₂ ꞌniaꞌ₂ quianꞌ₅₄ juáꞌ₅ quióꞌ₅ dsa₂ fariseos*, quianꞌ₅₄ jág₁ quióꞌ₅ Herodes në́₃. Ia₁ lë́₅ liaꞌ₂ lë́₅ juɨ₁ levadura*.
16 Jaun₂ ca₂dsia₃ chiꞌ₂ dsɨ₂guia₃-tɨ́n₂ quianꞌ₅₄ rɨinꞌ₅₄:
―ꞌAn₁ juáꞌ₂ le₂në₅ ia₁ tsá₃ i₁ŋíꞌ₄ cha₂ quián₂ jniog₄.
17 Ca₂rë₃líꞌ₄ bá₄ Jesús jág₁ a₂dsia₅ ꞌéi₂ i₃léin₂, jaun₂ ca₂juáꞌ₂:
―¿ꞌE₂ lë₃ juáꞌ₂ ꞌniaꞌ₂ a₂tsá₃ i₁ŋíꞌ₄ cha₂ quiánꞌ₂ ꞌniaꞌ₂? ¿ꞌE₂ lë₃ ŋɨ́₄ tsá₃ rë₂ŋɨ́ꞌ₂ ꞌniaꞌ₂? ¿O₃ a₂tsá₃ lenꞌ₅₄ ꞌe₂ ꞌniaꞌ₂, o₃ a₂cang₄ dseiꞌ₂ ꞌe₂ ꞌniaꞌ₂?
18 ¿O₃ bá₄ a₂lë₁tioꞌ₅₄ mɨ₂neꞌ₅₄ ꞌe₂ ꞌniaꞌ₂, la₁ tsá₃ jniagꞌ₃? ¿O₃ bá₄ a₂lë₁le₁dsɨ₅₄ bá₄ rë₂guáꞌ₂ ꞌniaꞌ₂, la₁ tsá₃ nagꞌ₂ guëꞌ₂ ꞌniaꞌ₂? ¿O₃ bá₄ tsá₃ ma₃dsá₂ ꞌe₂ ꞌauꞌ₂ ꞌniaꞌ₂?
19 Liaꞌ₂ conꞌ₂ jme₁ca₂dsioꞌ₄ jniá₂ quianꞌ₅₄ ꞌŋiá₂ i₁ŋíꞌ₄ bá₄ ca₂lɨn₅ ca₂guë́ꞌ₃ conꞌ₂ ꞌŋiá₂ mei₅ dsa₂, ¿je₂liáꞌ₂ mɨꞌ₂ ca₂lë₃ nɨ₁ꞌnau₅₄ a₂ca₂chóng₃ guë́₄ ca₂cagꞌ₅₄ ꞌniaꞌ₂?
Jaun₂ ca₂ŋag₃ ꞌéi₂:
―Guia₃-tɨ́n₂.
20 Conꞌ₂ siáꞌ₂ táng₃, liaꞌ₂ conꞌ₂ jme₁ca₂dsioꞌ₄ jniá₂ guio₃ i₁ŋíꞌ₄ ca₂lɨn₅ ca₂guë́ꞌ₃ quén₂ mei₅ dsa₂, ¿je₂liáꞌ₂ mɨꞌ₂ ꞌnau₅₄ a₂ca₂chóng₃ ca₂cagꞌ₅₄ guë́₄ táng₃ ꞌniaꞌ₂?
Jaun₂ ca₂ŋag₃ táng₃ ꞌéi₂:
―Guio₃.
21 Jaun₂ ca₂juáꞌ₂ táng₃:
―¿Tsa₁ rë₂lenꞌ₅₄ bá₄ guë́₄ ꞌniaꞌ₂ jaun₂?
Ca₂jme₃ꞌlión₂ Jesús jan₂ dsa₂ ten₄ juɨg₂ Betsaida
22 Jaun₂ dsi₃léin₂ juɨg₂ Betsaida. Jaun₂ ca₂o₃jŋia₃ dsa₂ jan₂ dsa₂ ten₄, jaun₂ ca₂mɨ₃ dsa₂ a₂téi₂ gu₂.
23 Jaun₂ në́₃ ca₂jŋaꞌ₃ gu₂ dsa₂ ten₄ ꞌéi₂, ca₂jiog₃ juɨ₅ ꞌnɨꞌ₂ juɨg₂. Jaun₂ ja₁jaun₂ ca₂tsáng₂ jmɨ₁ꞌë́ꞌ₅ quióꞌ₅, jme₁ne₁ dsa₂ ꞌéi₂, ca₂téi₂ gu₂, jaun₂ ca₂ŋag₃ chi₂juaꞌ₂ ma₂lé₂ jág₃.
24 Jaun₂ ca₂chógꞌ₃ ne₅₄ ca₂jág₃, jaun₂ ca₂juáꞌ₂:
―Jɨn₄ jniá₂ dsa₂ i₂nio₄, i₂jniá₂ liaꞌ₂ jniá₂ nɨ₁ꞌma₂.
25 Conꞌ₂ siáꞌ₂ ca₂tí₂ táng₃ Jesús gu₂ jme₁ne₁ dsa₂ ꞌéi₂, jaun₂ guë́₄ ca₂jág₃ i₁caꞌ₅₄ mɨ₂ne₅₄, jaun₂ guë́₄ ca₂rë₃jniá₂ dse₃ jme₁ne₁₂, ca₂ꞌlóin₂.
26 Jaun₂ ca₂dsiógꞌ₂ Jesús co₂dsau₅ ja₁quióꞌ₄, ca₂juáꞌ₂:
―Tsá₃ ꞌú₅ jë₄ juɨg₂ të₃ jág₅ dsa₂.
Ca₂cuë₃ Pe₄ jág₁ dsau₅ a₂lɨ́n₅ Jesús I₂rë₂ꞌɨ́n₁ quián₅ Diú₄
27 Cang₂ jaun₂ ca₂ŋó₃ Jesús quiainꞌ₅₄ chiꞌ₂ dsɨ₂guia₃-tɨ́n₂ quiáin₅ le₂tan₅₄ juɨg₂ Cesarea ja₁tén₄ Filipo. Jaun₂ le₂ꞌi₄ juɨ₅ ja₁i₃léin₂, ca₂ŋag₃ Jesús ca₂ŋɨ́iꞌ₃ chiꞌ₂ dsɨ₂guia₃-tɨ́n₂:
―¿ꞌEin₂ lɨ́n₅ jniá₂, juáꞌ₂ dsa₂?
San Marcos 8:27-38
28 Jaun₂ ca₂ŋag₃ chiꞌ₂ dsɨ₂guia₃-tɨ́n₂:
―I₂lɨn₅₄ dsa₂ juáꞌ₂ a₂lɨ́ngꞌ₅ Juan₅₄ i₂jme₁chon₅ dsa₂ jmɨg₂. I₂lɨn₅₄ guëꞌ₂ juáꞌ₂ a₂lɨ́ngꞌ₅ Elías. I₂lɨn₅₄ guëꞌ₂ juáꞌ₂ táng₃ a₂lɨ́ngꞌ₅ jan₂ i₂siánꞌ₂ i₂chen₄ quián₅ Diú₄.
29 Jaun₂ ca₂ŋag₃ táng₃:
―¿ꞌNiaꞌ₂ guëꞌ₂ në́₃? ¿ꞌE₂ juáꞌ₂ ꞌniaꞌ₂ ꞌein₂ lɨ́n₅ jniá₂?
Jaun₂ ca₂ŋag₃ Pe₄:
―ꞌNe₂ lɨ́ngꞌ₅ I₂rë₂ꞌɨ́n₁* quián₅ Diú₄.
30 Jaun₂ ca₂jmo₃ Jesús ꞌéiꞌ₃ a₂tsá₃ dsia₃ tsɨ́ꞌ₃ ꞌi₁jan₂ juaꞌ₅₄ a₂ꞌag₃.
Ca₂ꞌë́₂ Jesús jág₁ a₂jóin₂
31 Jaun₂ në́₃ ca₂jme₃lióg₃ Jesús ca₂ꞌë́₂ jág₁ ca₂tsɨ́ꞌ₃ chiꞌ₂ dsɨ₂guia₃-tɨ́n₂, a₂ca₂tɨ́n₂ Jaun₅* dsa₂ mɨ₂güɨ́g₃ dsɨ₃ŋɨ́i₂ ꞌlióng₂ uɨg₅, a₂tsá₃ le₃jei₅₄ dsa₂ canꞌ₅₄ quián₅ guáꞌ₅, juɨg₅₄ jme₂dsa₂, të₅juáꞌ₅ në́₃. Ca₂le₃jɨ́n₃ quɨinꞌ₃ jág₁ a₂jŋagꞌ₃. La₁ jeinꞌ₅₄ bá₄ táng₃ a₂ꞌnɨ₅ jmɨg₄ jaun₂.
32 Ca₂juáꞌ₂ liaꞌ₂ rë₂jiá₃ jág₁. Jaun₂ Pe₄ në́₃ ca₂jiog₃ le₂cau₅, jaun₂ ca₂jme₃lióg₃ ca₂ti₂ca₂néiꞌ₂ a₂jme₁jnéi₂ juɨ₅.
33 Jaun₂ ca₂jénꞌ₃ Jesús ca₂jɨ́in₂ ca₂le₃jɨ́n₃ chiꞌ₂ dsɨ₂guia₃-tɨ́n₂, jaun₂ ca₂jéin₂ Pe₄ ca₂juáꞌ₂:
―¡Jŋiagꞌ₃ cau₅ quió₃, ꞌne₂ Satanás! Ia₁ tsá₃ dsɨ₂jiog₅ ꞌauꞌ₂ juɨ₁liaꞌ₂ dsɨ₂jiog₅ dsɨ́₅ Diú₄; liaꞌ₂ dsɨ₂jiog₅ dsɨ́₅ dsa₂ mɨ₂güɨ́g₃ bá₄ dsɨ₂jiog₅ ꞌauꞌ₂.
34 Jaun₂ ca₂të́ꞌ₃ Jesús chiꞌ₂ dsɨ₂guia₃-tɨ́n₂, ca₂le₃jɨ́n₃ guë́₄ dsa₂ i₂jme₁tionꞌ₅₄ në́₃. Jaun₂ ca₂juáꞌ₂:
―Chi₂juaꞌ₂ ꞌein₂ ꞌnio₃ ꞌein₃ jniá₂, co₂dsia₅ juɨ₁dsi₂ꞌén₂ dsɨ́₅ guioin₅₄, juɨ₁jmo₁₂ co₂jŋiai₅₄ a₂jóin₂,a juɨ₁ꞌein₁₂.
35 Ia₁ juɨ₁ꞌein₂ guë́₃ i₂tsá₃ ꞌnio₃ jón₂ ia₁ ꞌɨ́n₅ dsɨ́₅ le₃chain₂ dse₃ mɨ₂güɨ́g₃ la₂, dsɨ₃ꞌén₂ quióꞌ₅. La₁ juɨ₁ꞌein₂ guë́₄ i₂ténꞌ₂ dsɨ́₅ gue₃ ꞌmú₃ ꞌuɨg₅₄ quió₃ jniá₂, ꞌuɨg₅₄ quióꞌ₄ jág₁ dse₃ në́₃, tɨ́inꞌ₄, le₃chain₂ dse₃ mɨ₂güɨ́g₃ caun₂.
36 ¿ꞌE₂ bá₄ ta₁ jmo₃ a₂líꞌ₂ dsa₂ ꞌŋio₅ lɨn₃ ne₄ guaꞌ₅₄ ꞌuë₃ la₂, në₁juaꞌ₂ dsɨ₃ꞌén₂ bá₄ guëꞌ₂ jme₂dsí₂ quióꞌ₅ mɨ₂güɨ́g₃ caun₂?
37 ¿O₃ je₂liáꞌ₂ lé₂ le₃quí₃ dsa₂ ꞌliaꞌ₅₄ ia₁jaun₂ tɨ́nꞌ₄ jme₂dsí₂ quióꞌ₅?
38 Ia₁ juɨ₁ꞌein₂ guë́₃ i₂guiꞌ₅₄ jmógꞌ₂ jniá₂, quianꞌ₅₄ jág₁ dse₃ quió₃, të₃jɨn₄ dsa₂ i₂qui₂rë₂cánꞌ₄ dso₄ i₂tsá₃ neꞌ₅₄ chan₂ jmɨg₄ në₃, ján₃ bá₄ le₂jaun₂ Jaun₅* dsa₂ mɨ₂güɨ́g₃ guiꞌ₅₄ jmógꞌ₂ jë₁ma₂të́₂ rë₁guainꞌ₂ quianꞌ₅₄ ángeles jŋió₅ quianꞌ₅₄ ca₂le₃jë́₃ bí₂ jláꞌ₁ quióꞌ₅ jmei₂.