Jme₂tag₅ Jesús juɨ₁liaꞌ₂ ꞌe₂ jaun₂ a₂jmo₅ a₂rë₂ꞌŋio₅ dsa₂
15
Jaun₂ në́₃ ca₂o₃lén₂ i₂lɨn₅₄ dsa₂ fariseos* quianꞌ₅₄ të₅juáꞌ₅ i₂ja₂lén₂ Jerusalén, ca₂jme₃quiáin₃ ja₁con₂ Jesús, jaun₂ ca₂ŋag₃:
2 ―¿ꞌE₂ lë₃ tsá₃ jme₂ti₃ dsa₂ i₂quiangꞌ₅₄ tag₄ ꞌéiꞌ₃ a₂chíꞌ₅ quióꞌ₅ dsa₂ canꞌ₅₄? Tsá₃ rang₂₃ gu₂ néꞌ₃ guë́₄ a₂guë́ꞌ₃.
3 Jaun₂ ca₂ŋag₃ Jesús:
―ꞌNiaꞌ₂ guëꞌ₂ në́₃, ¿ꞌE₂ lë₃ qui₂tsóꞌ₂ ꞌniaꞌ₂ ꞌéiꞌ₃ quióꞌ₅ Diú₄ a₂jme₂tíꞌ₁ ꞌniaꞌ₂ jmáꞌ₃ liaꞌ₂ tag₄ quiánꞌ₂ ꞌniaꞌ₂ guiongꞌ₅₄?
4 Ia₁ ca₂juáꞌ₂ Diú₄: “Jme₁gan₃ ꞌniaꞌ₂ chogꞌ₂-ŋéiꞌ₅.”a Ján₃ bá₄ ca₂juáꞌ₂: “I₂të₂ꞌonꞌ₂ jmei₂, o₃ i₂të₃ꞌonꞌ₂ chog₅₄, ca₂tɨ́in₂ jóin₂.”b
5 La₁ ꞌniaꞌ₂ në́₃ jme₂tɨ́ngꞌ₁ dsa₂, në₁ꞌein₂ cha₂ quióꞌ₅ a₂lé₂ le₃jme₃ꞌoin₅₄ chog₅₄-jmei₂, la₁ lag₃ në₁ca₂tsɨ́ꞌ₃ dsa₂ chog₅₄-jmei₂: “A₂ma₂rë₂jenꞌ₅₄ ne₄ Diú₄ bá₄ a₂jaun₂”,
6 jaun₂ në́₃, jme₂tɨ́nꞌ₂ ꞌniaꞌ₂ dsa₂ ꞌéiꞌ₃ a₂tsá₃ ma₃tion₅₄ ꞌnióꞌ₅ jme₃ꞌon₅₄ dsa₂ chog₅₄-jmei₂. O₄quióꞌ₄ tag₄ quiánꞌ₂ ꞌniaꞌ₂ guiongꞌ₅₄ bá₄ ma₂ja₂nóꞌ₅ ꞌniaꞌ₂ jmoꞌ₂ tsá₃ ma₃ꞌe₂ quen₅ ꞌéiꞌ₃ quióꞌ₅ Diú₄.
7 ¡ꞌNiaꞌ₂ dsa₂ i₂lë₁jmo₅-dsáu₅ o₁ne₁ a₂jmoꞌ₂ ꞌniaꞌ₂ a₂jme₂juɨ́ngꞌ₁ Diú₄ quianꞌ₅₄ tag₄ quiángꞌ₂ ja₂nógꞌ₅! Dsónꞌ₂ bá₄ dsau₅ a₂ca₂juáꞌ₂ Isaías i₂jme₁ꞌë́₂ jág₁ quián₅ Diú₄, jme₁ca₂tióng₃ ne₄ si₂, ꞌɨin₂₃ ꞌniaꞌ₂, jme₁ca₂juáꞌ₂:
8 Dsa₂ juɨg₂ la₂ jme₂juagꞌ₂ jniá₂
jmáꞌ₃ liaꞌ₂ quianꞌ₅₄ mɨ₂ꞌo₅₄ bá₄,
la₁ia₁ uɨ́ng₂ bá₄ ꞌi₄ dsɨ́₅
ja₁con₂ jniá₂.
9 La₁ tsá₃ ꞌe₂ ta₁ tí₄ a₂jme₂juagꞌ₂,
ia₁ jág₁ a₂jme₂tag₂₃
jmáꞌ₃ ꞌéiꞌ₃ quióꞌ₅ dsa₂ mɨ₂güɨ́g₃ bá₄ jaun₂.c
10 Jaun₂ ca₂të́ꞌ₃ Jesús dsa₂ juɨn₅ i₂ma₂quiainꞌ₅₄ a₂jme₃quián₃ ꞌéi₂ ja₁coin₂, jaun₂ ca₂juáꞌ₂:
―Rë₂ nei₂ ꞌniaꞌ₂ a₂la₂; juɨ₁le₂ŋɨ́ꞌ₂ ꞌniaꞌ₂:
11 Juɨ₁liaꞌ₂ a₂dsɨ₂toꞌ₅₄ juɨ₅ mɨ₂ꞌo₄ dsa₂, on₃juaꞌ₅₄ a₂jaun₂ jmo₅ a₂rë₃ꞌiog₅ jme₂dsí₂ quióꞌ₅ dsa₂. Ca₂le₃jë́₃ a₂ꞌuë₂ juɨ₅ mɨ₂ꞌo₄ dsa₂, a₂jaun₂ bá₄ jmo₅ a₂rë₂ꞌiog₅ jme₂dsí₂ quióꞌ₅ dsa₂.
12 Jaun₂ ca₂jme₃quián₃ chiꞌ₂ dsɨ₂guia₃-tɨ́n₂, jaun₂ ca₂juáꞌ₂:
―¿Tsa₁ ŋiꞌ₅₄, ꞌŋio₅ lɨn₃ tsá₃ dse₃ ca₂tɨ́n₂ dsa₂ fariseos* jág₁ a₂në₂cheiꞌ₅₄?
13 La₁ ca₂ŋag₃ Jesús:
―Ca₂le₃jë́₃ nɨ₁ꞌma₂ a₂tsá₃ ca₂chéinꞌ₃ Ŋeꞌ₃ jniá₂ i₂guá₅ gueiꞌ₅₄ i₂juɨ́g₃, guéi₃ le₂jiog₅ jmú₄.
14 O₁lë́₄ meꞌ₂; ia₁ dsa₂ ten₄ bá₄ në₅ quian₅ ne₄ juɨ₅.d Ia₁ në₁juaꞌ₂ jan₂ dsa₂ ten₄ jŋiai₂₃ dsa₂ ten₄ rɨinꞌ₅₄, le₃oin₃ bá₄ tsɨ₃séinꞌ₂ siá₅.
15 Jaun₂ ca₂juáꞌ₂ Pe₄ ca₂tsɨ́ꞌ₃ Jesús:
―Juaꞌ₅₄ ꞌe₂ jág₁ dsau₅ jángꞌ₅ jág₁ në₅.
16 Jaun₂ ca₂ŋag₃ Jesús:
―¿Ján₃ bá₄ tsá₃ ŋɨ́ꞌ₂ ꞌauꞌ₂ ꞌniaꞌ₂?
17 Ia₁, ¿tsa₁ ŋɨ́ꞌ₂ ꞌniaꞌ₂, juɨ₁liaꞌ₂ ca₂le₃jë́₃ a₂dsɨ₂toꞌ₅₄ juɨ₅ rë₂ꞌo₄ dsa₂, dsɨ₂lé₂ rë₂túꞌ₅ bá₄ dsa₂, cang₂ jaun₂ ꞌuë₂ táng₃?
18 La₁ juɨ₁liaꞌ₂ a₂ꞌuë₂ juɨ₅ mɨ₂ꞌo₄ dsa₂, a₂jaun₂ a₂já₅ të₂dsɨ́₅ bá₄ dsa₂. A₂jaun₂ bá₄ jmo₅ a₂rë₂ꞌiog₅ jme₂dsí₂ quióꞌ₅ dsa₂.
19 Ia₁ të₂dsɨ́₅ bá₄ dsa₂ já₅ ca₂le₃jë́₃ a₂ꞌlɨgꞌ₅₄ a₂dsɨ₂jiog₅ dsɨ́₅: juɨ₁liaꞌ₂ a₂jme₂dsian₅ dsa₂ dsa₂ mɨ₂güɨ́g₃ rɨinꞌ₅₄: juɨ₁liaꞌ₂ a₂nióꞌ₅ dsa₂ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gu₂, juɨ₁liaꞌ₂ a₂lë₁i₂nio₄ dsa₂ tiáinꞌ₅, tsá₃ gu₂ le₁jenꞌ₂; juɨ₁liaꞌ₂ a₂ꞌang₅ dsa₂; juɨ₁liaꞌ₂ a₂nau₂ dsa₂ a₂jángꞌ₅ jág₁ dsau₅ a₂jmo₂₃ të₂jɨ́in₁; juɨ₁liaꞌ₂ a₂jmo₅ dsa₂ a₂lë₁bóinꞌ₂ dso₄ rɨinꞌ₅₄ në́₃.
20 Ca₂le₃jë́₃ a₂në₅ bá₄ jmo₅ a₂rë₂ꞌiog₅ jme₂dsí₂ quióꞌ₅ dsa₂; la₁ a₂guë́ꞌ₅ dsa₂ të₃ tsá₃ ma₂në₂jme₃ti₃ ꞌéiꞌ₃ tag₄ a₂chíꞌ₅ a₂rang₂₃ gu₂, on₃juaꞌ₅₄ a₂jaun₂ jmo₅ a₂rë₂ꞌŋio₅ dsa₂.
Jan₂ i₁náu₃ i₂ca₂rë₃ꞌén₂ të₂le₃ quióꞌ₅ Jesús
21 O₂ꞌɨ́n₃ bá₄ Jesús ja₁jaun₂, ca₂ŋó₃ táng₃ juɨ₅ juɨg₂ Tiro quianꞌ₅₄ Sidón.
22 Ja₁jaun₂ jan₂ ꞌio₅₄ cananea i₂guá₅ jë₄ juɨg₂ jaun₂, ca₂guain₃ con₂ Jesús ꞌo₂₃ co₂mɨꞌ₅₄, juáꞌ₂ tiá₂:
―¡Te₁guiꞌ₅₄, jaun₅ David, dsia₄ ŋéi₂ ꞌauꞌ₂ jniá₂! Jan₂ chiꞌ₂ ja₁mɨ́g₄ jniá₂ ꞌen₅₄ jan₂ jme₂dsí₂ je₂naꞌ₅₄ të₂dsɨ́₅, ꞌŋio₅ lɨn₃ ŋág₅ uɨg₅.
23 La₁ tsá₃ ꞌe₂ ca₂ŋag₃ Jesús ꞌi₁caun₂. Jaun₂ o₃lén₂ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
―Cheiꞌ₅₄ i₂në₅ juɨ₁dsiainꞌ₅₄, ia₁ já₅ guióꞌ₅ co₂mɨꞌ₅₄ chi₁coꞌ₅₄ quián₂ jniog₄.
24 Jaun₂ ca₂ŋag₃ Jesús ca₂tsɨ́ꞌ₃ ꞌio₅₄ ꞌéi₂:
―Ca₂chei₃ Diú₄ jniá₂ a₂guio₃ jmáꞌ₃ liaꞌ₂ ca₂ne₅₄ o₄quióꞌ₄ jáꞌ₂ chaꞌ₂ i₂ma₂i₂cónꞌ₅ chan₂ juɨg₂ Israel*.
25 La₁ caun₂ já₅ bá₄ ꞌio₅₄ ꞌéi₂, ca₂chi₃jné₃ ne₄ Jesús, ca₂juáꞌ₂:
―¡Te₁guiꞌ₅₄, jme₁ꞌo₄ jniá₂!
26 Jaun₂ ca₂ŋag₃ Jesús:
―Tsá₃ dsi₂ten₅₄ juaꞌ₅₄ a₂jŋiáꞌ₄ jniá₂ i₁ŋíꞌ₄ quióꞌ₅ chiꞌ₂-guein₂ a₂cuë́₄ dsɨ₂jɨꞌ₅₄*.
27 Jaun₂ ca₂ŋag₃ táng₃ ꞌio₅₄:
―Dsónꞌ₂ bá₄ dsau₅, Te₁guiꞌ₅₄; la₁ cágꞌ₅ bá₄ dsɨ₂jɨꞌ₅₄ nɨ₁jne₁ a₂tsɨ₂séiꞌ₂ ne₄ mesa ja₁guë́ꞌ₅ juɨg₅₄.
28 Jaun₂ ca₂ŋag₃ táng₃ Jesús:
―¡ꞌE₂ guë́₄ tson₂ ꞌénꞌ₂ ꞌne₂, dsa₂ mɨ́₂! Juɨ₁le₅₄ bá₄ liaꞌ₂ conꞌ₂ lë́₅ a₂mɨꞌ₂ në₅.
Dsɨ₂juɨ₅ le₂jaun₂ bá₄ ca₂ꞌlón₂ chiꞌ₂ ja₁mɨ́g₄ ꞌio₅₄ ꞌéi₂.
Ca₂jme₃ꞌlión₂ Jesús juɨn₅ dsa₂ dsoꞌ₅₄
29 O₂ꞌɨ́n₃ bá₄ táng₃ Jesús ja₁jaun₂, jaun₂ ca₂ŋɨ́i₃ juɨ₅ cheiꞌ₅₄ jmɨ₁ŋíꞌ₄ Galilea; jaun₂ ca₂uɨ́g₂ juɨ₅ ne₄ máꞌ₂, jaun₂ ca₂guá₂ jme₁dsióg₃.
30 Juɨn₅ dsa₂ ca₂dsi₃lén₂ táng₃ cau₅ quióꞌ₅ ja₁jaun₂, le₁jŋiai₂₃ dsa₂ guianꞌ₅₄, dsa₂ i₂le₁jáꞌ₂ gu₂-tag₄, dsa₂ ten₄, dsa₂ con₄, juɨn₅ guë́₄ dsa₂ siánꞌ₂ i₂jme₁le₁dsoꞌ₅₄ në́₃. Qui₂ca₂dsiog₃ ja₁chénꞌ₄ Jesús, jaun₂ ca₂jme₃ꞌlió₂ ꞌéi₂.
31 Jaun₂ guë́₄ ca₂i₃góꞌ₃ dsɨ́₅ dsa₂ jme₁ca₂të́₂ ne₅₄ ma₂dsia₅ jág₁ dsa₂ i₂jme₁con₄, ma₂i₂nio₄ dsa₂ i₂jme₁qui₂le₁jáꞌ₂ quióꞌ₅, quianꞌ₅₄ dsa₂ guianꞌ₅₄ në́₃; dsa₂ ten₄ në́₃ qui₂ca₂jág₃. Jaun₂ ca₂tónꞌ₂ dsa₂ ca₂jme₃juɨinꞌ₂ Diú₄ quián₅ dsa₂ Israel*.
Ca₂jme₃tan₅₄ Jesús quén₂ mei₅ dsa₂
32 Jaun₂ ca₂të́ꞌ₃ Jesús chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
―ꞌŊio₅ ŋéi₂ dsɨ₃ jɨng₅₄ dsa₂ në₅, ia₁ ma₂ꞌnɨ₅ jmɨg₄ tioinꞌ₅₄ ja₁lá₃ quianꞌ₅₄ jniá₂, ꞌi₁ca₂juɨg₄ tsá₃ ꞌe₂ cha₂ a₂guë́ꞌ₃ ja₁lá₃. Jaun₂ në́₃, tsá₃ ꞌnio₃ jniá₂ dsiainꞌ₅₄ të₃ tsá₃ ma₂në₂guë́ꞌ₃, ia₁ conꞌ₂ tsá₃ ŋó₅ në₁ca₂ꞌuáin₂ le₂ꞌi₄ juɨ₅.
33 Jaun₂ ca₂juáꞌ₂ chiꞌ₂ dsɨ₂guia₃-tɨ́n₂ quiáin₅:
―¿A₂jáꞌ₄ lé₂ dsɨ₁liá₄ i₁ŋíꞌ₄ ja₁co₂ꞌŋiog₅ la₂ a₂guë́ꞌ₃ dsa₂ juɨn₅ në₅?
34 Jaun₂ ca₂ŋag₃ Jesús ca₂ŋɨ́iꞌ₃ chiꞌ₂ dsɨ₂guia₃-tɨ́n₂:
―¿Je₂liáꞌ₂ i₁ŋíꞌ₄ ꞌi₄ guë́₄ quiánꞌ₂ ꞌniaꞌ₂?
Jaun₂ ca₂ŋag₃ ꞌéi₂:
―Guio₃ i₁ŋíꞌ₄ bá₄ ꞌi₄, quianꞌ₅₄ guëꞌ₂ on₃-ún₂ ju₄ píꞌ₁.
35 Jaun₂ ca₂jmo₃ ꞌéiꞌ₃ a₂tianꞌ₃ dsa₂ ꞌuë₃,
36 jaun₂ ca₂jŋaꞌ₃ ta₁guio₃ i₁ŋíꞌ₄ quianꞌ₅₄ i₁ju₁ në́₃, ca₂cuë́ꞌ₃ ti₁ꞌmagꞌ₄ Diú₄. Jaun₂ ca₂dsioin₃ le₂caun₂ le₂caun₂ i₁ŋíꞌ₄, ca₂cuë́ꞌ₃ chiꞌ₂ dsɨ₂guia₃-tɨ́n₂ quiáin₅, jaun₂ ꞌéi₂ guë́₄ në́₃ ca₂dsióꞌ₃ jɨn₄ dsa₂.
37 Ca₂le₃jɨ́n₃ bá₄ dsa₂ ꞌéi₂ ca₂guë́ꞌ₃ ca₂liaꞌ₂ ca₂ꞌágꞌ₃ dsɨ́₅. Jaun₂ ca₂cágꞌ₃ chiꞌ₂ dsɨ₂guia₃-tɨ́n₂ guio₃ tsɨ₁mɨꞌ₂ jmáꞌ₃ nɨ₁jne₁ a₂ca₂chóng₃.
38 Dsa₂ i₂ca₂guë́ꞌ₃ ꞌéi₂ jme₁lë́₂ quén₂ mei₅ jmáꞌ₃ dsa₂ ŋeꞌ₂, i₂siánꞌ₂ bá₄ dsa₂ mɨ́₂ quianꞌ₅₄ chiꞌ₂ në́₃.
39 Jme₁ca₂lë₃ jaun₂, ca₂ꞌágꞌ₃ Jesús jág₁ dsa₂, jaun₂ ca₂ꞌí₃ ꞌŋióꞌ₃ tsɨ₁mu₅ a₂ŋó₃ juɨ₅ jë₄ juɨg₂ Magadán.e