Jme₂tag₅ Jesús juɨ₁liaꞌ₂ ꞌe₂ jaun₂ a₂jmo₅ a₂rë₂ꞌŋio₅ dsa₂
7
Jaun₂ në́₃ dsa₂ fariseos* quianꞌ₅₄ i₂lɨn₅₄ të₅juáꞌ₅ i₂ja₂lén₂ Jerusalén, ca₂o₃léin₂ ca₂ŋɨiꞌ₂ ja₁ꞌen₅₄ Jesús.
San Marcos 7:1-23
2 Ca₂jág₃ dsa₂ ꞌéi₂ ca₂jɨ́in₂ i₂lɨn₅₄ chiꞌ₂ dsɨ₂guia₃-tɨ́n₂ a₂guë́ꞌ₅ të₃ tsá₃ “le₁jë́₃” gu₂, tsá₃ jme₂ti₃ juaꞌ₅₄ a₂rang₂₃ liaꞌ₂ conꞌ₂ lë́₅ ꞌéiꞌ₃.a
3 (Ia₁ ca₂le₃jɨ́n₃ dsa₂ fariseos*, quianꞌ₅₄ ca₂le₃jɨ́n₃ dsa₂ chan₂ Judea në́₃, jme₂ti₃ liaꞌ₂ conꞌ₂ lë́₅ tag₄ chíꞌ₅ quióꞌ₅ dsa₂ canꞌ₅₄, a₂tsá₃ guë́ꞌ₃ në₁juaꞌ₂ tsá₃ ma₂në₂rang₃ ꞌlióng₂ ráun₂ gu₂.
4 Jë₁ma₂o₃lein₃ ꞌmaꞌ₅₄, tsá₃ guë́ꞌ₃ në₁juaꞌ₂ tsá₃ ma₂në₂jme₃ti₃ conꞌ₂ tag₄ chíꞌ₅ a₂rang₃ quióꞌ₅. Jaun₂ ꞌlióng₂ bá₄ guë́₄ tag₄ siáꞌ₂ a₂jme₂ti₃ dsa₂ juɨ₁liaꞌ₂ a₂rang₅ dsa₂ nɨ₁vaso, juɨ₁liaꞌ₂ a₂rang₅ dsa₂ nɨ₁taza, nɨ₁dsɨg₁, tsɨ₁cama në́₃.)b
5 Jaun₂ në́₃ ca₂ŋag₃ dsa₂ fariseos quianꞌ₅₄ të₅juáꞌ₅, ca₂ŋɨ́iꞌ₃ Jesús:
―¿ꞌE₂ lë₃ tsá₃ jme₂ti₃ chiꞌ₂ dsɨ₂guia₃-tɨ́n₂ quiángꞌ₂ tag₄ chíꞌ₅ quióꞌ₅ dsa₂ canꞌ₅₄? Guë́ꞌ₅ bá₄ të₃ tsá₃ ma₂në₂rang₃ gu₂.
6 Jaun₂ ca₂ŋag₃ ꞌéi₂:
―Dsónꞌ₂ bá₄ dsau₅ ca₂juáꞌ₂ Isaías ca₂ꞌɨin₃ ꞌniaꞌ₂ dsa₂ i₂lë₁jmo₅-dsáu₅ o₁ne₁, juɨ₁liaꞌ₂ tioꞌ₅₄ ne₄ Si₂:
Dsa₂ juɨg₂ la₂ jme₂juagꞌ₂ jniá₂
jmáꞌ₃ liaꞌ₂ quianꞌ₅₄ mɨ₂ꞌo₅₄ bá₄,
la₁ia₁ uɨ́ng₂ bá₄ ꞌi₄ dsɨ́₅ ja₁con₂ jniá₂.
7 La₁ tsá₃ ꞌe₂ ta₁ tí₄ a₂jme₂juagꞌ₂,
ia₁ jág₁ a₂jme₂tag₂₃,
ꞌéiꞌ₃ a₂lë₁lë́₅ quióꞌ₅ dsa₂ mɨ₂güɨ́g₃ bá₄.c
8 Ia₁ co₂dsia₅ ma₂ca₂tíꞌ₃ bá₄ ꞌniaꞌ₂ ꞌéiꞌ₃ quióꞌ₅ Diú₄, a₂ma₂ja₂nógꞌ₅ chanꞌ₅₄ tiá₂ ꞌéiꞌ₃ tag₄ quióꞌ₅ dsa₂ mɨ₂güɨ́g₃.d
9 Ca₂juáꞌ₂ ján₃:
―ꞌŊio₅ tɨnꞌ₂ ꞌniaꞌ₂ jmoꞌ₂ cau₅ ꞌéiꞌ₃ quióꞌ₅ Diú₄, a₂jme₂tíꞌ₁ ꞌniaꞌ₂ tag₄ quiánꞌ₂ ꞌniaꞌ₂ guiongꞌ₅₄.
10 Ia₁ ca₂juáꞌ₂ Moisés a₂jme₃gan₃ dsa₂ chog₅₄-jmei₂.e Jaun₂ juáꞌ₂, chi₂juaꞌ₂ ꞌein₂ ca₂juáꞌ₂ uɨg₅ ne₄ chog₅₄-jmei₂, juɨ₁join₅₄.f
11 La₁ ꞌniaꞌ₂ në́₃ juáꞌ₂ a₂lé₂ le₃juáꞌ₂ dsa₂ tsɨ́ꞌ₃ chog₅₄-jmei₂: “Tsá₃ ꞌniaꞌ₂ lé₂ le₃jme₁ꞌong₁₂, ia₁ ca₂le₃jë́₃ a₂cha₂ quió₃ a₂lë́₅ Corbán”, (co₂ꞌnióꞌ₄ a₂juáꞌ₂, a₂ma₂lë́₅ quióꞌ₅ Diú₄ bá₄).
12 Në₁juaꞌ₂ le₂në₅ jaun₂ tsá₃ ma₃cuëꞌ₂ ꞌniaꞌ₂ jmɨg₄ a₂jme₃ꞌon₅₄ guë́₄ dsa₂ chog₅₄-jmei₂.
13 Jaun₂ le₂në₅ bá₄ tsá₃ ma₃ꞌe₂ quen₅ jág₁ quióꞌ₅ Diú₄, jmoꞌ₂ ꞌniaꞌ₂, të₂le₃ quianꞌ₅₄ tag₄ a₂chíꞌ₅, a₂ca₂ŋag₃ dsa₂ canꞌ₅₄ quiángꞌ₂. ꞌLióng₂ bá₄ guë́₄ a₂siáꞌ₂ jmoꞌ₂ ꞌniaꞌ₂.
14 Jaun₂ ca₂të́ꞌ₃ Jesús dsa₂, ca₂juáꞌ₂:
―Nei₂ ꞌniaꞌ₂ dse₃ ca₂le₃jɨ́ngꞌ₃ a₂juáꞌ₄ jniá₂ la₂.
15 ꞌI₁caun₂ a₂dsɨ₂toꞌ₅₄ quióꞌ₅ dsa₂, on₃juaꞌ₅₄ a₂jaun₂ jmo₅ a₂rë₂ꞌiog₅ jme₂dsí₂ quióꞌ₅. Cosa a₂ꞌuë₂ dsɨ́₅ dsa₂ guioin₅₄, a₂jaun₂ bá₄ jmo₅ a₂rë₂ꞌiog₅ jme₂dsí₂.g
16 (-)
17 Jme₁o₂ꞌɨ́in₃ jɨn₄ dsa₂, ŋáiꞌ₃ dsi₂néi₂, jaun₂ ca₂ŋag₃ chiꞌ₂ dsɨ₂guia₃-tɨ́n₂ quiáin₅ ꞌe₂ jág₁ dsau₅ jángꞌ₅ jág₁ ca₂cuë́ꞌ₃ dsa₂ jaun₂.
18 Jaun₂ ca₂juáꞌ₂:
―¿Ján₃ bá₄ tsá₃ ŋɨ́ꞌ₂ ꞌniaꞌ₂ a₂juáꞌ₅ jniá₂? Ca₂le₃jë́₃ ꞌe₂ a₂guë́ꞌ₅ dsa₂, on₃juaꞌ₅₄ a₂jaun₂ jmo₅ a₂rë₂ꞌiog₅ jme₂dsí₂.
19 Ia₁ on₃juaꞌ₅₄ dsɨ́₅ dsa₂ dsɨ₂toꞌ₅₄ a₂guë́ꞌ₅. Rë₂túꞌ₅ bá₄ dsa₂ dsɨ₂toꞌ₅₄ a₂jaun₂. Cang₂ jaun₂ dsɨ₂ꞌuëꞌ₅₄ táng₃ dsa₂ ca₁ꞌné₄.
―Ca₂le₃jë́₃ a₂ꞌuë₂ dsɨ́₅ dsa₂, a₂jaun₂ bá₄ a₂jmo₅ a₂rë₂ꞌiog₅ jme₂dsí₂.
21 Të₂dsɨ́₅ bá₄ dsa₂ ꞌuë₂ ca₂le₃jë́₃ ne₅₄ a₂ꞌlɨgꞌ₅₄: juɨ₁liaꞌ₂ a₂lë́₅ dsɨ́₅ dsa₂ nióiꞌ₃ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gu₂; a₂ꞌang₅ dsa₂; a₂jme₂dsian₅ dsa₂ rɨinꞌ₅₄;
22 a₂ꞌɨ́n₅ dsɨ́₅ dsa₂ jmo₃ quióꞌ₅ a₂cha₂ quióꞌ₅ rɨinꞌ₅₄; ꞌe₂ caun₂ a₂tsá₃ dsi₂ten₅₄ jmáiꞌ₂ rɨinꞌ₅₄; a₂qui₂jme₂gain₂₃ rɨinꞌ₅₄; a₂jmo₂₃ o₂guíꞌ₃ ꞌlɨgꞌ₅₄, a₂jmo₂₃ uɨg₅ dsɨ́₅, a₂qui₂chi₂ꞌɨn₅ dsa₂ rɨinꞌ₅₄; a₂jme₂róin₂ jmáiꞌ₂ dsa₂; ca₂le₃jë́₃ guë́₄ ꞌe₂ a₂tsá₃ ꞌen₅₄ dsɨ́₅ dsa₂ lɨ́in₅.
23 Ca₂le₃jë́₃ a₂në₅, të₂dsɨ́₅ bá₄ dsa₂ lë́₂, a₂në₅ bá₄ a₂jmo₅ a₂rë₂ꞌiog₅ jme₂dsí₂ quióꞌ₅ dsa₂.
Jan₂ i₁náu₃ i₂ca₂rë₃ꞌén₂ të₂le₃ quióꞌ₅ Jesús
24 A₂ꞌein₅₄ ja₁jaun₂, ca₂o₃ꞌɨ́in₃ ŋó₃ ꞌuë₃ ma₂quián₅ juɨg₂ Tiro.h Jaun₂ ca₂ꞌí₃ conꞌ₂ të₃coꞌ₅₄ bá₄ dsi₂néi₂ quióꞌ₅ dsa₂ ja₁jaun₂. La₁ tion₅₄ bá₄ ca₂rë₃líꞌ₄ dsa₂, tsá₃ ma₃ca₂cuɨn₃ jmɨg₄ a₂ꞌmai₃.
San Marcos 7:24-37
25 Dsɨ₂juɨ₅ jaun₂ ca₂nág₂ chog₅₄ jan₂ ꞌio₅₄ bëꞌ₅₄ i₂ꞌen₅₄ jme₂dsí₂ ꞌlɨnꞌ₅₄. Ca₂dsióg₃, jaun₂ ca₂chi₃jné₃ ne₄ Jesús.
26 ꞌÉi₂ jme₁lɨ́n₄ jan₂ ꞌio₅₄ griega, i₂chan₂ Sirofenicia. Jaun₂ ca₂mɨ₃ ca₂tsɨ́ꞌ₃ ꞌéi₂ a₂dsɨ₃dsein₂₃ je₂naꞌ₅₄ quióꞌ₅ chiꞌ₂ quiáin₅.
27 Jaun₂ ca₂ŋag₃ Jesús:
―Juɨ₁le₂tan₅₄ deꞌ₂ jŋiá₅ chiꞌ₂ quiáng₃; ia₁ tsá₃ dsi₂ten₅₄ juaꞌ₅₄ a₂jŋiáꞌ₄ jniá₂ i₁ŋíꞌ₄ quióꞌ₅ chiꞌ₂, a₂ton₅₄ ne₄ dsɨ₂jɨꞌ₅₄*.
28 Jaun₂ ca₂ŋag₃ táng₃ ꞌio₅₄ ꞌéi₂:
―Dsónꞌ₂ bá₄ dsau₅, Te₁guiꞌ₅₄, la₁ia₁ le₂jiog₅ dsɨ₂jɨꞌ₅₄ bá₄ guë́ꞌ₅ néꞌ₃ nɨ₁mesa ꞌnau₅₄ a₂tsɨ₂séiꞌ₂ guein₂.
29 Jaun₂ ca₂ŋag₃ táng₃:
―Dse₃ në₂ŋagꞌ₅₄. Ma₂lé₂ guangꞌ₅₄. Ma₂o₂ꞌɨ́n₃ bá₄ je₂naꞌ₅₄ i₂jme₁ꞌen₅₄ të₂dsɨ́₅ chiꞌ₂ quiángꞌ₂.
30 Jaun₂ ca₂ŋáiꞌ₃ bá₄; jme₁dsiáinꞌ₃, ca₂jɨ́in₂ ja₁mɨ́g₄ roin₂₃ tei₄ ne₄ tsɨ₁cama, ma₂o₂ꞌɨ́n₃ bá₄ je₂naꞌ₅₄ të₂dsɨ́₅.
Ca₂jme₃ꞌlión₂ Jesús jan₂ dsa₂ güɨn₄ i₂tsá₃ lɨn₄ lé₂ dsia₃ jág₁
31 Ca₂o₃ꞌɨ́n₃ táng₃ Jesús juɨg₂ Tiro, ca₂ŋɨ́i₃ juɨ₅ juɨg₂ Sidón, jaun₂ ca₂dsióg₃ cheiꞌ₅₄ jmɨ₁ŋíꞌ₄ Galilea, jaun₂ ca₂ꞌí₃ ꞌuë₃ Decápolis*.
32 Ja₁jaun₂ ca₂o₃jŋia₃ dsa₂ jan₂ dsa₂ i₂tsá₃ lɨn₄ lé₂ dsia₃ jág₁. Jaun₂ ca₂mɨ₃ dsa₂ a₂quióg₃ Jesús gu₂ ne₄ quióꞌ₅ dsa₂ ꞌéi₂.
33 Jaun₂ ca₂jiog₃ Jesús ca₂jŋiai₃ dsa₂ ꞌéi₂ caun₂ ja₁co₂ꞌŋiog₅, jaun₂ ja₁jaun₂ ca₂tiá₂ chi₁gú₃ rë₂gua₄ dsa₂ ꞌéi₂, jaun₂ ca₂ꞌŋéi₃ chi₁gú₃, jaun₂ ca₂nɨ́iꞌ₂ le₁tsɨꞌ₂ dsa₂ ꞌéi₂.
34 Jaun₂ ca₂chógꞌ₃ ne₅₄ gueiꞌ₅₄ i₂juɨ́g₃, ca₂choin₃ dsɨ́₅, jaun₂ ca₂juáꞌ₂:
―¡Efata! ―co₂ꞌnióꞌ₄ a₂juáꞌ₂: ¡Nia₄!
35 Jme₁ma₂në₂juáꞌ₂ le₂në₅, ca₂niá₃ rë₂gua₄ mɨ₂ꞌo₄ dsa₂ ꞌéi₂ në́₃, ca₂ꞌlóin₂, ca₂dsia₃ dse₃ jág₁.
36 Jaun₂ ca₂juáꞌ₂ Jesús ca₂tsɨ́ꞌ₃ ca₂le₃jɨ́n₃ dsa₂ i₂jme₁tionꞌ₅₄ a₂tsá₃ ꞌein₂ tsɨ́ꞌ₃. La₁ të₂le₃ i₂juɨꞌ₂ guë́₄ ca₂dsia₃ bá₄ dsa₂.
37 Jaun₂ ꞌŋio₅ lɨn₃ ca₂i₃góꞌ₃ dsɨ́₅ dsa₂ jme₁ca₂rë₃ŋi₅. Jaun₂ qui₂ca₂dsia₃ dsa₂:
―Dse₃ bá₄ ca₂le₃jë́₃ a₂jmo₂₃. Jmo₂₃ a₂nag₅ dsa₂ i₂güɨn₄, liaꞌ₂ dsa₂ i₂con₄ në́₃, lé₂ le₃dsia₃ jág₁.