Ca₂dsiánꞌ₃ Jesús juɨg₂ Nazaret go₅₄ ja₁tsá₃ ca₂guei₃ dsa₂
6
Jaun₂ ca₂o₃ꞌɨ́n₃ bá₄ Jesús ja₁jaun₂. Jaun₂ ca₂dsiáinꞌ₃ táng₃ juɨg₂ go₅₄ quiainꞌ₅₄ chiꞌ₂ dsɨ₂guia₃-tɨ́n₂ quiáin₅.
San Marcos 6:1-20
2 Jme₁ca₂të́₂ jmɨg₄ sa₅₄, jaun₂ ca₂jme₃lióg₃ ca₂jme₃tɨin₂₃ dsa₂ dsi₂néi₂ guáꞌ₅ sinagoga*. Juɨn₅ bá₄ dsa₂ i₂ca₂nág₂ dsɨ₂góꞌ₃ dsɨ́₅, jaun₂ ca₂tsɨ́ꞌ₃ rɨinꞌ₅₄:
―¿A₂jáꞌ₄ ca₂i₁jme₁tɨn₅ i₂në₅ jág₁ caꞌ₅₄ a₂juáꞌ₂ në₅? ¿I₂ꞌe₂ bá₄ jág₁ a₂ŋɨ́ꞌ₂ dsɨ́₅ a₂ma₂ŋɨi₂ në₅, ca₂të₂ léi₄ juëꞌ₂ në́₃ tɨin₂ jmo₃?
3 ¿On₁juaꞌ₅₄ i₂në₅ të₅ꞌmá₃ ja₁ŋiꞌ₅₄ María, dsó₂ rɨnꞌ₅₄ Jacobo, quianꞌ₅₄ José, quianꞌ₅₄ Judas, quianꞌ₅₄ Si₂mu₅₄ në́₃? Në₅ bá₄ tiánꞌ₅ ꞌio₅₄ rɨinꞌ₅₄ ja₁lá₃ ján₃.
―Ca₂le₂con₂ bá₄ ja₁siáꞌ₂ guen₅ dsa₂ dsa₂ i₂ꞌë́₂ jág₁ quián₅ Diú₄. Jŋiaꞌ₅₄ liaꞌ₂ dsa₂ go₅₄ bá₄ tsá₃ guei₅, on₃ guëꞌ₂ o₁rɨinꞌ₅₄, on₃ guëꞌ₂ rɨinꞌ₅₄ dsi₂néi₂ në́₃.
5 Jaun₂ tsá₃ ꞌlióng₂ léi₄ juëꞌ₂ lé₂ le₃jmo₃ juɨg₂ go₅₄. Jŋiaꞌ₅₄ liaꞌ₂ i₂lɨn₅₄ bá₄ dsa₂ dsoꞌ₅₄ ca₂dsia₃ gu₂, jaun₂ ca₂jme₃ꞌlió₂.
6 Jaun₂ i₃góꞌ₃ dsɨ́₅ ia₁ a₂ŋɨ́₄ lë₃ tsá₃ ꞌe₂ ꞌén₂ dsa₂.
Ca₂chen₃ Jesús dsa₂ guia₃-tɨ́n₂ quiáin₅ ca₂i₁ꞌë́₄ jág₁ dse₃ juɨg₂ siáꞌ₂
7 Jaun₂ ca₂të́ꞌ₃ chiꞌ₂ dsɨ₂guia₃-tɨ́n₂, jaun₂ ca₂chei₃ jma₃on₃ jma₃on₃. Ca₂cuë₃ bí₂ ꞌéiꞌ₃ a₂ꞌuɨ́nꞌ₂ ꞌéi₂ jme₂dsí₂ ꞌlɨnꞌ₅₄ quióꞌ₅ dsa₂.
8 Jaun₂ ca₂tsɨ́ꞌ₃ ꞌéi₂ a₂tsá₃ ꞌe₂ cán₂ ꞌi₁caun₂ le₁ꞌi₄ juɨ₅, jŋiaꞌ₅₄ liaꞌ₂ jma₃cáun₃ ꞌma₂ꞌɨ₅₄ bá₄. ꞌI₁caun₂ a₂siáꞌ₂ tsá₃ cán₂, on₃ guëꞌ₂ të₂ꞌmɨꞌ₂, on₃ guëꞌ₂ i₁ŋíꞌ₄, on₃ guëꞌ₂ cu₄ ꞌŋióꞌ₃ nɨ₁lau₂ le₁jénꞌ₅ túꞌ₅ në́₃.
9 Jŋiaꞌ₅₄ liaꞌ₂ jma₃co₂dsánꞌ₃ nɨ₁lau₂ conꞌ₂ a₂ma₂le₁ton₅ tag₅₄ bá₄ cán₂, tonꞌ₂ tsá₃ cán₂ tɨn₃ dsánꞌ₃ tsɨnꞌ₅₄ në́₃.
10 Jaun₂ ca₂juáꞌ₂ në́₃:
―Jë₁ma₂të́₂ rë₁tónꞌ₄ ꞌniaꞌ₂ liaꞌ₂ caun₂ dsi₂néi₂ quióꞌ₅ dsa₂ ja₁o₁nógꞌ₅, ja₁jaun₂ jŋia₄ ꞌniaꞌ₂ ca₂liaꞌ₂ ca₂të́₂ jmɨg₄ i₁ꞌuɨ́nꞌ₃ ꞌniaꞌ₂ táng₃ juɨg₂ jaun₂.
11 Në₁juaꞌ₂ cha₂ ja₁lɨn₅₄ tsá₃ guei₅ dsa₂, on₃ guëꞌ₂ ꞌnio₃ dsa₂ nag₃ jág₁ quiánꞌ₂ ꞌniaꞌ₂, ꞌuɨnꞌ₂ ꞌniaꞌ₂ ja₁jaun₂, séiꞌ₄ ꞌniaꞌ₂ ꞌliog₂ tagꞌ₅₄ co₂ꞌnióꞌ₄ jmóꞌ₂ ꞌniaꞌ₂ léi₄ co₂jaun₂ ma₂le₁cánꞌ₄ dsa₂ ꞌéi₂ guioin₅₄.a
12 Jaun₂ ca₂ꞌuɨn₂ bá₄ chiꞌ₂ dsɨ₂guia₃-tɨ́n₂ në́₃, ca₂i₃léin₂ ca₂i₁ꞌë́₄ jág₁ a₂dsɨ₃quénꞌ₅ dsɨ́₅ dsa₂.
13 Jaun₂ qui₂ca₂ꞌuɨ́inꞌ₂ juɨn₅ je₂naꞌ₅₄, qui₂ca₂tsɨ́in₂ noꞌ₅₄ juɨn₅ dsa₂ dsoꞌ₅₄, qui₂ca₂jme₃ꞌlóin₂ dsa₂ në́₃.
Ca₂jon₃ Juan₅₄ i₂chon₅ dsa₂ jmɨg₂
14 Ca₂rë₃ŋi₅ Rag₅₄ Herodes jág₁ a₂ꞌei₅ quióꞌ₅ Jesús, ia₁ ca₂le₂con₂ bá₄ ma₂le₁ŋi₅ dsa₂ ꞌe₂ a₂jmo₅ Jesús ŋɨ₂₃. Jaun₂ juáꞌ₂ Rag₅₄ Herodes:
―Ma₂ca₂jenꞌ₅₄ Juan₅₄, dsa₂ i₂jme₁chon₅ dsa₂ jmɨg₂; ꞌuɨg₅₄ jaun₂ quɨꞌ₅₄ jmɨg₄ jmo₂₃ ꞌe₂ a₂jmo₂₃.
15 I₂lɨn₅₄ guëꞌ₂ dsia₅ táng₃:
―Elías bá₄ ꞌéi₂ ŋɨ₅.
La₁ i₂siánꞌ₂ guëꞌ₂ juáꞌ₂:
―Jan₂ i₂chen₄ quián₅ Diú₄ bá₄ ꞌéi₂, juɨ₁liaꞌ₂ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂.
16 Jme₁ca₂nág₂ Rag₅₄ Herodes, jaun₂ ca₂juáꞌ₂:
―Juan₅₄ bá₄ në₅ ŋɨ₅, i₂ca₂ꞌnia₃ dsa₂ dsɨ₂lag₄, ꞌéiꞌ₃ quió₃ jniá₂. Ma₂ca₂jeinꞌ₅₄ táng₃.
17 Ia₁ ꞌŋiog₅ bá₄ Herodes ma₂jmo₅ ꞌéiꞌ₃ le₂jŋiá₅ a₂ca₂i₁chanꞌ₅₄ dsa₂ Juan₅₄ ca₂i₁tioꞌ₂ néꞌ₃ ꞌmá₃ rë₂ꞌŋeiꞌ₅₄ ꞌuɨg₅₄ quióꞌ₅ ꞌio₅₄ Herodías i₂lɨ́n₅ dsɨ₂i₂gu₂ Fe₂li₄ rɨinꞌ₅₄. La₁ Herodes në́₃ ma₂jmo₂₃ quiáin₅.
18 Ia₁ jme₁ma₂qui₂ma₂juáꞌ₂ Juan₅₄ tsɨ́ꞌ₅ Herodes:
―Tsá₃ ꞌi₄ ꞌéiꞌ₃ jmóꞌ₂ quiángꞌ₂, ꞌio₅₄ quián₅ dsó₂ rɨ́ngꞌ₂.
19 ꞌUɨg₅₄ jaun₂ jme₁ꞌi₄ ꞌnei₂ dsɨ́₅ ꞌio₅₄ Herodías jɨ́in₂ Juan₅₄. Jaun₂ jme₁ꞌnio₃ jŋagꞌ₃, la₁ tsá₃ ca₂dsóꞌ₂ juɨ₅ ꞌa₂ liaꞌ₂ jmo₃.
20 Ia₁ jme₁ŋi₅ bá₄ Rag₅₄ Herodes a₂lɨ́n₅ Juan₅₄ dsa₂ dsen₃, jaun₂ jme₁jme₂go₃ bá₄; jaun₂ jme₁jmo₂₃ ꞌí₁. Liaꞌ₂ conꞌ₂ jme₁nag₂₃ jág₁ quióꞌ₅ Juan₅₄, jme₁të₂tsɨinꞌ₅₄ tsá₃ ꞌe₂ ŋi₅ jmo₃, la₁ ꞌŋio₂ bá₄ dsɨ́₅ jme₁nag₂₃.
21 La₁ ca₂cuɨn₃ jmɨg₄ në́₃ jme₁ca₂jmo₃ Herodes jmɨg₄ a₂ca₂dsɨ́ꞌ₃ ŋi₂: ca₂jmo₃ má₃, ca₂të́ꞌ₃ dsa₂ canꞌ₅₄ conꞌ₂ dsa₂ i₂jmo₅ ꞌéiꞌ₃ juɨg₂, i₂lɨ́n₅ juɨg₅₄ ꞌlióg₂ quiáin₅ në́₃, ca₂le₃jɨ́n₃ guë́₄ conꞌ₂ dsa₂ dsen₅₄ quián₅ juɨg₂ ja₁tén₄ Galilea.
San Marcos 6:21-34
22 Jaun₂ ca₂guan₃ ja₁mɨ́g₄ Herodías ja₁niog₅ jmɨg₄, jaun₂ ca₂dsáin₂. A₂jaun₂ ca₂të́₂ dsɨ́₅ Rag₅₄ Herodes, ca₂le₃jɨ́n₃ dsa₂ i₂té₄ i₂tionꞌ₅₄ guë́ꞌ₅ quiainꞌ₅₄ në́₃. Jaun₂ ca₂juáꞌ₂ rag₅₄ ca₂tsɨ́ꞌ₃ ꞌio₅₄ bëꞌ₅₄ ꞌéi₂:
―Mɨ₄ ca₂le₃jë́₃ ꞌe₂ ꞌniogꞌ₂, jaun₂ cuë₅₄ jniá₂.
23 Jaun₂ ca₂cuë₃ jág₁ quióꞌ₅ ca₂le₃jë́₃ ca₂ꞌɨin₃ Diú₄, ca₂juáꞌ₂:
―Chi₂juaꞌ₂ ꞌe₂ caun₂ a₂mɨ́ꞌ₁ ꞌne₂, cuë₅₄ bá₄ jniá₂, jŋiaꞌ₅₄ ca₂dsio₄ ꞌuë₃ ja₁gong₂.
24 Jaun₂ ca₂o₃ꞌɨ́n₃ ꞌio₅₄ bëꞌ₅₄ ꞌéi₂ ca₂i₁ŋag₁₂ chog₅₄, ca₂i₁juaꞌ₄:
―¿ꞌE₂ mɨ₅₄ jniá₂, mag₅₄?
Jaun₂ ca₂juáꞌ₂ chog₅₄:
―Mɨ₄ mɨ₂dsi₄ Juan₅₄ i₂chon₅ dsa₂ jmɨg₂.
25 Jaun₂ ca₂ꞌí₃ táng₃ ꞌéi₂ dsɨ₂juɨ₅ ja₁guá₄ rag₅₄, jaun₂ ca₂juáꞌ₂:
―ꞌNio₃ cuë́ꞌ₁ të₂në₃ mɨ₂dsi₄ Juan₅₄ i₂chon₅ dsa₂ jmɨg₂, a₂ꞌi₄ ꞌŋióꞌ₃ uɨng₅.b
26 Jme₁ca₂nág₂ rag₅₄ jág₁ në₅, ca₂jén₂ dsɨ́₅. La₁ tsá₃ a₂ŋi₅ jmo₃, ia₁ ma₂në₂cuë₃ jág₁ quióꞌ₅ le₂jŋiá₅ a₂cuë₃ chi₂juaꞌ₂ ꞌe₂ ꞌnio₃ ꞌio₅₄ ꞌéi₂, tonꞌ₂ ia₁ ma₂në₂néi₂ a₂mei₅₄ quiáin₅ i₂tiánꞌ₅.
27 Jaun₂ dsɨ₂juɨ₅ jaun₂ ca₂chein₃ jan₂ ꞌlióg₂ a₂dsɨ₃quián₂ mɨ₂dsi₄ Juan₅₄.
28 Jaun₂ ca₂ŋó₃ ꞌlióg₂ juɨ₅ ꞌŋióꞌ₃ ꞌné₅ ꞌmá₃, jaun₂ ca₂i₁quiꞌ₂ dsɨ₂lag₄ Juan₅₄, jaun₂ quian₅ rë₂ꞌi₄ ꞌŋióꞌ₃ uɨng₅,a ca₂cuë́ꞌ₃ ꞌio₅₄ ꞌéi₂. Jaun₂ ꞌio₅₄ në́₃ ca₂gue₃, jaun₂ ca₂i₁cuëꞌ₂ táng₃ chog₅₄.
29 Jme₁ca₂rë₃ŋi₅ dsa₂ i₂jme₁quianꞌ₅₄ Juan₅₄, jaun₂ ca₂o₃léin₂, ca₂tág₃ ꞌlag₄, jaun₂ ca₂i₁ꞌó₄.
Ca₂jme₃tan₅₄ Jesús ꞌŋiá₂ mei₅ dsa₂
30 Cang₂ jaun₂ ca₂o₃len₃ dsa₂ i₂chen₄*c ꞌéi₂, ca₂ŋɨiꞌ₂ táng₃ quiainꞌ₅₄ Jesús, jaun₂ ca₂dsia₃ ꞌe₂ niog₅ ca₂jmo₃ ja₁i₁lein₅₄, ꞌa₂ liaꞌ₂ i₂ca₂jme₁tɨin₂₃ dsa₂.
31 Jaun₂ ca₂juáꞌ₂ Jesús:
―I₂nóꞌ₅ ꞌniaꞌ₂ conꞌ₂ guiongꞌ₅₄ caun₂ ja₁co₂ꞌŋiog₅, i₂jŋia₄ ca₂tiá₂.
Ia₁ juɨn₅ lɨn₃ dsa₂ i₂o₂lén₂, liaꞌ₂ i₂dsɨ₂len₃ në́₃, ca₂liaꞌ₂ jŋiaꞌ₅₄ tsá₃ cuɨn₅ jmɨg₄ guë́ꞌ₃.
32 Jaun₂ në́₃ ca₂tóinꞌ₂ tsɨ₁mu₅ ca₂i₃léin₂ caun₂ ja₁lë́₄ co₂ꞌŋiog₅ conꞌ₂ guioin₅₄.
33 Jaun₂ qui₂ca₂ꞌuɨn₂ dsa₂ le₂caun₂ le₂caun₂ juɨg₂, i₃léin₂ co₂chiꞌ₅₄ juɨ₅ tag₅₄ a₂ꞌein₂₃ Jesús. Jaun₂ jŋiái₅ bá₄ dsi₃léin₂ liaꞌ₂ conꞌ₂ guë́₄ ꞌéi₂.
34 Jme₁ca₂sión₃ Jesús ꞌŋióꞌ₃ tsɨ₁mu₅, ca₂jɨ́in₂ juɨn₅ lɨn₃ dsa₂, ma₂tionꞌ₅₄ le₁jŋiog₅, ca₂táꞌ₂ ŋéi₂ dsɨ́₅ dsa₂ ꞌéi₂, ia₁ i₂nio₄ dsa₂ liaꞌ₂ jë₁i₂nio₄ jáꞌ₂ chaꞌ₂ i₂tsá₃ juɨg₅₄ chan₂, jiog₃, jmo₃ ꞌí₁. Jaun₂ ca₂jme₃lióg₃ ca₂jme₃tɨin₂₃ dsa₂ ꞌlióng₂ lɨn₃ jág₁.
35 Jme₁ca₂ꞌláu₂ jaun₂ ca₂o₃lén₂ chiꞌ₂ dsɨ₂guia₃-tɨ́n₂ quiáin₅, jaun₂ ca₂juáꞌ₂:
―Caun₂ ja₁co₂ꞌŋiog₅ bá₄ la₂, tonꞌ₂ ca₂ꞌláu₂ guë́₄ máꞌ₃.
San Marcos 6:35-56
37 Jaun₂ ca₂ŋag₃ Jesús:
―Cuëꞌ₅₄ ꞌniaꞌ₂ dsa₂ a₂guë́ꞌ₃.
Jaun₂ ca₂ŋag₃ táng₃ ꞌéi₂:
―¿Lé₂ le₃dsɨ₁liá₄ tɨn₃ ꞌŋiá₂-láu₂ ꞌéiꞌ₃ denario* i₁ŋíꞌ₄ ia₁jaun₂ dsioꞌ₂ a₂guë́ꞌ₃ dsa₂?
38 Jaun₂ ca₂juáꞌ₂ táng₃ Jesús:
―O₂jag₄ ꞌniaꞌ₂ je₂liáꞌ₂ i₁ŋíꞌ₄ ꞌi₄ quiánꞌ₂ ꞌniaꞌ₂.
Jaun₂ ca₂i₁jag₅₄ ꞌéi₂ jaun₂ në́₃, jaun₂ ca₂o₃léin₂ táng₃, ca₂juáꞌ₂:
―ꞌŊiá₂ i₁ŋíꞌ₄ bá₄ ꞌi₄, on₃ guëꞌ₂ i₁ju₁.
39 Jaun₂ ca₂chein₃ jág₁ a₂tianꞌ₃ dsa₂ jma₃co₂nióiꞌ₃ ne₄ ŋi₂maꞌ₂ rëꞌ₂,
40 jaun₂ ca₂tiánꞌ₂ dsa₂ jma₃co₂nióiꞌ₃ ja₁lë́₂ caun₂ ꞌŋiá₂-lón₂, i₂ca₂tiánꞌ₂ jma₃co₂nióꞌ₃ jma₃të₂lón₃-guián₂ në́₃.
41 Jaun₂ në́₃ ca₂jŋaꞌ₃ Jesús le₃ꞌŋiá₂ i₁ŋíꞌ₄, le₃on₃ guëꞌ₂ i₁ju₁ në́₃, ca₂jág₃ gueiꞌ₅₄ i₂juɨ́g₃, ca₂cuë́ꞌ₃ ti₁ꞌmagꞌ₄ Diú₄. Jaun₂ ca₂jmo₃ le₁ꞌnau₅₄ i₁ŋíꞌ₄, jaun₂ guë́₄ ca₂cuë́ꞌ₃ chiꞌ₂ dsɨ₂guia₃-tɨ́n₂ quiáin₅, ia₁jaun₂ dsia₃ ꞌéi₂ ne₄ dsa₂. Ján₃ guëꞌ₂ ca₂jmo₃ dsióg₁ quióꞌ₅ i₁ju₁ on₃ ꞌéi₂, ca₂cuë́ꞌ₃ ca₂le₃jɨ́n₃.
42 Jaun₂ le₃jɨ́n₃ dsa₂ ca₂guë́ꞌ₃ ca₂liaꞌ₂ ca₂rë₃tain₅₄.
43 Jaun₂ ca₂cágꞌ₃ bá₄ guë́₄ dsa₂ guia₃-tɨ́n₂ tsɨ₁mɨꞌ₂ ꞌnau₅₄ i₁ŋíꞌ₄, a₂ca₂chóng₃ quióꞌ₅ i₁ju₁ në́₃.
44 ꞌŊiá₂ mei₅ jme₁lë́₂ ca₂le₃jɨ́n₃ dsa₂ ŋeꞌ₂ i₂ca₂guë́ꞌ₃ ꞌéi₂.
Ca₂ŋɨ₃ Jesús ne₄ jmɨ₁ŋíꞌ₄
45 Jaun₂ dsɨ₂juɨ₅ le₂jaun₂ ca₂jmo₃ Jesús ꞌéiꞌ₃ a₂i₃tonꞌ₅₄ chiꞌ₂ dsɨ₂guia₃-tɨ́n₂ quiáin₅ ꞌŋióꞌ₃ tsɨ₁mu₅, jaun₂ jŋiá₅ deꞌ₂ ꞌéi₂ ŋɨ́₃ jmɨg₂ conꞌ₂ guë́₄ ꞌŋiog₅, a₂dsi₁léin₂ Betsaida, të₁liaꞌ₂ ꞌí₁ guë́₄ ꞌŋiog₅ ꞌágꞌ₃ jág₁ dsa₂.
46 Jme₁ma₂ca₂lë₃ ꞌágꞌ₅ jág₁ dsa₂, ca₂ŋó₃ jaun₂ në́₃ juɨ₅ máꞌ₂ i₁chi₂i₁leinꞌ₁ Diú₄.
47 Jaun₂ conꞌ₂ ca₂tóꞌ₂ nei₂ dé₄, ma₂ŋó₅ tsɨ₁mu₅ dsi₂jo₂ jmɨ₁ŋíꞌ₄, ꞌŋiog₅ guëꞌ₂ Jesús jaun₂ bá₄ ꞌein₅₄ ꞌuë₃.
48 Jaun₂ ca₂jág₃ Jesús ꞌŋio₅ cán₂ ta₁ tioinꞌ₅₄ a₂jein₂₃ nɨ₁ꞌma₂ a₂gag₂ jmɨg₂, ia₁ ꞌliogꞌ₂ dsí₂ le₂caꞌ₃. Jaun₂ conꞌ₂ le₁né₃ të₂le₃ ca₂jnia₃, ca₂jme₃quián₃ Jesús ŋɨ₂₃ ne₄ jmɨg₂ ja₁ŋó₄ tsɨ₁mu₅. Jaun₂ ca₂jmo₃ në₂jag₄ bá₄ i₂jme₁ma₂ŋɨ́₃ co₂dsau₅ ja₁tionꞌ₅₄ ꞌéi₂.
49 Jme₁ca₂jág₂ jóinꞌ₅ ŋɨ₂₃ ne₄ jmɨ₁ŋíꞌ₄, dsa₂ ꞌlɨnꞌ₅₄d bá₄ ꞌéi₂ lɨ́in₂, jaun₂ ca₂tóinꞌ₂ co₂mɨꞌ₅₄ ca₂guióꞌ₃,
50 ia₁ ca₂le₃jɨ́in₃ bá₄ ca₂rë₃góꞌ₅ ꞌŋio₅ lɨn₃ jme₁ca₂jág₂. La₁ dsɨ₂juɨ₅ bá₄ ca₂juáꞌ₂ Jesús:
―¡Tiá₂ dsia₄ ꞌniaꞌ₂ ꞌauꞌ₂; jniá₂ bá₄ la₂, tsá₃ lë₁jmo₂ ꞌniaꞌ₂ gangꞌ₃!
51 Jaun₂ ca₂uɨ́g₂ ꞌŋióꞌ₃ tsɨ₁mu₅ ja₁tionꞌ₅₄ ꞌéi₂. Jaun₂ ca₂ꞌág₂ táng₃ tei₄ ca₂jŋiaꞌ₃ dsí₂, jaun₂ i₃góꞌ₃ dsɨ́₅ ꞌéi₂ ꞌŋio₅ lɨn₃.
52 Ia₁ tsá₃ ꞌe₂ ca₂ŋɨ́ꞌ₂ dsɨ́₅ dsa₂ ꞌéi₂ juɨ₁liaꞌ₂ léi₄ juëꞌ₂ a₂ma₂në₂jág₃ jmo₅ Jesús quianꞌ₅₄ i₁ŋíꞌ₄, në₂jag₄ bá₄ cha₂ a₂jmo₅ jnág₅ a₂tsá₃ rë₂ŋɨ́iꞌ₂.
Ca₂jme₃ꞌlión₂ Jesús dsa₂ dsoꞌ₅₄ ꞌuë₃ Genesaret
53 Jme₁ca₂ꞌain₂ jmɨg₂, ca₂dsi₃léin₂ ꞌuë₃ Genesaret. Ja₁jaun₂ ca₂ꞌnéi₂ tsɨ₁mu₅ cheiꞌ₅₄ jmɨg₂.
54 Dsɨ₂juɨ₅ jme₁ca₂ꞌuɨin₂ tsɨ₁mu₅, co₂tan₅₄ liaꞌ₂ ca₂rë₃cuɨn₅ bá₄ dsa₂ Jesús.
55 Jaun₂ ca₂i₁nioi₁₂ co₂chiꞌ₅₄ le₂tan₅₄ juɨg₂ te₁ꞌi₁ ma₂quián₅ jaun₂. Jaun₂ ca₂i₁quian₅₄ dsa₂ dsa₂ i₂le₁dsoꞌ₅₄ quianꞌ₅₄ tsɨ₁jein₁ ꞌa₂ guë́₃ jáꞌ₄ ꞌen₅₄ Jesús.
56 Ca₂le₂con₂ ja₁jme₁ŋɨ₅ Jesús, jë₁ma₂ꞌí₅ jë₄ juɨg₂, jë₄ ciudad, o₃ le₂ꞌi₄ juɨ₅ ja₁ŋó₄ ꞌe₂, jme₁qui₂dsɨ₂jŋia₃ dsa₂ dsa₂ dsoꞌ₅₄, qui₂ca₂dsiog₃ ja₁niog₅ ꞌmaꞌ₅₄. Qui₂ca₂mɨ₃ dsa₂ tsá₃ a₂nag₅₄ o₁jŋiaꞌ₅₄ a₃tag₄ tsɨnꞌ₅₄ bá₄ cuë₃ jmɨg₄ a₂nɨ́iꞌ₃. Jaun₂ ca₂le₃jɨ́n₃ dsa₂ dsoꞌ₅₄ i₂qui₂ca₂nɨ́ꞌ₃ tsɨnꞌ₅₄ Jesús, qui₂ca₂ꞌlóin₂.