Ca₂quiónꞌ₂ Jesús guia₃-tɨ́n₂ dsa₂ jë₄ quióꞌ₅ dsa₂ quiáin₅
10
Jaun₂ ca₂të́ꞌ₃ Jesús chiꞌ₂ dsɨ₂guia₃-tɨ́n₂ quiáin₅, jaun₂ ca₂cuë₃ bí₂ ꞌéiꞌ₃ a₂ꞌuɨ́inꞌ₂ jme₂dsí₂ ꞌlɨnꞌ₅₄, a₂qui₂jme₃ꞌlióin₂ ca₂le₃jë́₃ ne₅₄ dso₄ a₂niog₅ lɨ́n₅ dsa₂, ca₂le₃jë́₃ jmɨ₁uɨg₅ në́₃.
2 Le₂la₂ bá₄ chen₂ ta₁guia₃-tɨ́n₂ dsa₂ i₂ca₂quiónꞌ₂ Jesús ꞌéi₂ quiáin₅: Si₂mu₅₄, i₁të́ꞌ₂ dsa₂ Pe₄; quiainꞌ₅₄ Drë́₄ rɨinꞌ₅₄; Jacoboa quianꞌ₅₄ Juan₅₄ rɨinꞌ₅₄, ja₁ŋíꞌ₄ Zebedeo;
3 Fe₂li₄ quianꞌ₅₄ Bartolomé; To₁má₄ në́₃ quianꞌ₅₄ Të₅₄ i₂jme₁cán₂ ꞌliaꞌ₅₄ a₂ca₂tɨ́n₂ dsɨ₂tan₅₄; Jacobo i₂lɨ́n₅ ja₁ŋíꞌ₄ Alfeo; Tadeo në́₃;
4 Si₂mu₅₄ në́₃ i₂të́ꞌ₂ dsa₂ cananista;b Judas Iscariote në́₃, i₂ca₂jɨ́nꞌ₂ Jesús.
Ca₂chen₃ Jesús dsa₂ guia₃-tɨ́n₂ quiáin₅ a₂ca₂i₁ꞌë́₄ jág₁ dse₃
5 Dsa₂ guia₃-tɨ́n₂ në₅ bá₄ ca₂chen₃ Jesús jme₁ma₂në₂cuë₃ jág₁ la₂:
―Tsá₃ o₁nóꞌ₅ ꞌniaꞌ₂ juɨ₅ ꞌuë₃ go₄ dsɨ₂nau₂, on₃ guëꞌ₂ o₂tonꞌ₅₄ ꞌniaꞌ₂ ꞌi₁caun₂ juɨg₂ a₂tén₅ ꞌuë₃ Samaria.
6 Ja₁jaun₂ bá₄ o₂nóꞌ₅ ꞌniaꞌ₂ ja₁tionꞌ₅₄ dsa₂ i₂lɨ́n₅ co₂ꞌnióꞌ₄ jáꞌ₂ chaꞌ₂ i₂ma₂i₂cónꞌ₅ i₂chan₂ juɨg₂ Israel*.
7 O₂nóꞌ₅ ꞌniaꞌ₂ qui₂o₂ꞌë́₃ jág₁ dse₃ la₂ cheiꞌ₅₄ ꞌniaꞌ₂ dsa₂, ma₂ja₂quián₃ ꞌéiꞌ₃ quióꞌ₅ Diú₄.
8 O₂jmo₄ ꞌniaꞌ₂ le₁jɨ́n₃ dsa₂ i₂lɨ́n₅ ꞌméꞌ₅ ꞌiog₅; ca₂le₃jɨ́n₃ guëꞌ₂ i₂lɨ́n₅ dso₄ siáꞌ₂ në́₃, o₂jme₁ꞌlioin₅₄; o₂jme₁jenꞌ₅₄ ꞌniaꞌ₂ ꞌlag₄; o₂ꞌuɨnꞌ₅₄ ꞌniaꞌ₂ je₂naꞌ₅₄ quióꞌ₅ dsa₂ në́₃. Jaun₂ le₂në₅ juɨ₁liaꞌ₂ në₂gueꞌ₅₄ ꞌniaꞌ₂ bí₂ la₂ on₃juaꞌ₅₄ a₂cha₂ ꞌliaꞌ₅₄, le₂në₅ o₂jmo₄ ꞌniaꞌ₂ ján₃, o₂cuëꞌ₅₄ dsa₂ bí₂ tsá₃ ꞌliaꞌ₅₄ cánꞌ₁.
9 Tsá₃ ꞌe₂ cánꞌ₁ ꞌniaꞌ₂, juɨ₁liaꞌ₂ a₂ꞌnióꞌ₅ le₂ꞌi₄ juɨ₅, on₃ guëꞌ₂ cu₄nióg₄, on₃ guëꞌ₂ cu₄tiog₂, on₃ guëꞌ₂ ŋí₁ guéin₂ të₂lau₂ quiángꞌ₂,
10 on₃ guëꞌ₂ të₂ꞌmɨꞌ₂ juaꞌ₅₄ a₂toꞌ₅₄ lio₅₄ cánꞌ₁. Jmáꞌ₃ co₂dsánꞌ₃ tsɨ́nꞌ₂ bá₄ ꞌniaꞌ₂ cánꞌ₁, tsá₃ cánꞌ₁ ꞌniaꞌ₂ lau₂ ton₂ tagꞌ₅₄ a₂ŋag₅₄ guë́₄ conꞌ₂ a₂ma₂le₁ton₅ tagꞌ₅₄, on₃ guëꞌ₂ ꞌma₂ꞌɨ₅₄; ia₁ juɨ₁liaꞌ₂ dsa₂ i₂jmo₅ ta₁, ca₂tɨ́in₂ bá₄ gue₃ má₃ quióꞌ₅.
11 ꞌJë₁ma₂ca₂dsi₃nóꞌ₅ ꞌniaꞌ₂ liaꞌ₂ caun₂ juɨg₂ caꞌ₅₄ o₃ juɨg₂ píꞌ₁ ꞌe₂, ja₁jaun₂ jŋia₄ ꞌniaꞌ₂ ja₁quióꞌ₄ dsa₂ i₂léi₄ dsen₃ ꞌua₁ dsɨ́₅, quióꞌ₅ ꞌéi₂ tiónꞌ₂ ꞌniaꞌ₂ ca₂liaꞌ₂ ca₂të́₂ jmɨg₄ i₁ꞌuɨ́ngꞌ₃ táng₃.
12 Jë₁ma₂të́₂ rë₁tóngꞌ₁ dsi₂néi₂ quióꞌ₅, cuɨin₅₄ ꞌniaꞌ₂ Diú₄ juaꞌ₅₄ ꞌniaꞌ₂: “Juɨ₁ꞌei₅ bá₄ tei₄ dsi₂néi₂ la₂.”
13 Në₁juaꞌ₂ dsa₂ dsi₂néi₂ jaun₂ léi₄ gue₂₃ bá₄ liaꞌ₂ i₁rë₂ jág₁, jág₁ quiánꞌ₂ ꞌniaꞌ₂ a₂cuɨ́inꞌ₅ Diú₄, juɨ₁të₂ꞌŋiá₄ bá₄ ꞌei₅ tei₄ ja₁con₂ dsa₂ ꞌéi₂ dsi₂néi₂ jaun₂. La₁ në₁juaꞌ₂ léi₄ tsá₃ dse₃ le₁ꞌág₄ dsɨ́₅ dsa₂ gue₂₃ jág₁ quiánꞌ₂ ꞌniaꞌ₂, juɨ₁të₂ꞌŋiá₄ bá₄ jág₁ ꞌei₅ tei₄ jaun₂ ja₁conꞌ₂ ꞌniaꞌ₂ guiongꞌ₅₄.
14 Në₁juaꞌ₂ cha₂ ja₁lɨn₅₄ tsá₃ ꞌnio₃ dsa₂ guein₃ ꞌniaꞌ₂, on₃ guëꞌ₂ ꞌnio₃ nag₃ jág₁ quiánꞌ₂ ꞌniaꞌ₂ në́₃, co₂ŋeiꞌ₅₄ ꞌuɨ́nꞌ₂ ꞌniaꞌ₂ dsi₂néi₂ jaun₂, o₃ juɨg₂ jaun₂, séiꞌ₃ ꞌniaꞌ₂ ꞌliog₂ tagꞌ₅₄.
15 Ia₁ a₂dsɨ₂jóꞌ₃ juáꞌ₅ jniá₂, jë₁ma₂të́₂ rë₁qui₃dsɨ₅ Diú₄ ꞌéiꞌ₃, ꞌŋio₅ guë́₄ uɨg₅ gue₃ dsa₂ juɨg₂ jaun₂ conꞌ₂ guë́₄ dsa₂ i₂jme₁chan₂ Sodoma quianꞌ₅₄ Gomorra*.c
Qui₂co₃ꞌein₃ dsa₂
16 ꞌTsɨ́n₂ jniá₂ ꞌniaꞌ₂ jaun₂, a₂lɨ́ngꞌ₅ në₂jag₄ bá₄ jáꞌ₂ chaꞌ₂ jɨn₄ co₂ꞌnióꞌ₄ jáꞌ₂ tsau₂ dsɨ́₅. Jmo₄ ꞌniaꞌ₂ jaun₂ a₂lɨ́ngꞌ₅ dsa₂ i₂ꞌio₅ mai₅₄ juɨ₁liaꞌ₂ dsɨ₂mɨꞌ₂, tonꞌ₂ ꞌua₁ ꞌauꞌ₂ ꞌniaꞌ₂ juɨ₁liaꞌ₂ lɨ́n₅ i₁ju₂.
17 Rë₂jánꞌ₁ ꞌniaꞌ₂ jaun₂ ia₁ qui₃jángꞌ₂ dsa₂ ne₄ dsɨ₂tan₅₄, qui₃bóg₂ dsa₂ në́₃ dsi₂néi₂ guáꞌ₅ sinagogas*.
18 Liaꞌ₂ ne₄ dsi₄máꞌ₂ liaꞌ₂ ne₄ rag₅₄ në́₃, dsi₁jŋia₃ dsa₂ ꞌniaꞌ₂ ꞌuɨg₅₄ quió₃ jniá₂; jaun₂ le₂në₅ bá₄ lé₂ le₃o₁jangꞌ₄ ꞌniaꞌ₂ jág₁ dsau₅ ne₄ ꞌéi₂, quianꞌ₅₄ ja₁con₂ dsɨ₂nau₂ siánꞌ₂ në́₃.
19 La₁ jë₁ma₂të́₂ rë₁qui₃jángꞌ₂ dsa₂ ne₄ta₁, tsá₃ lë₁jmo₂ ꞌniaꞌ₂ ꞌɨ₅ ꞌauꞌ₂ ꞌe₂ juaꞌ₅₄ o₃ ꞌa₂ liaꞌ₂ ŋagꞌ₅₄; ia₁ jë₁ma₂të́₂ rë₁juaꞌ₅₄ ꞌniaꞌ₂ jág₁, Diú₄ bá₄ cuë₃ jág₁ a₂ŋiꞌ₅₄ ꞌniaꞌ₂ ꞌa₂ liaꞌ₂ ŋagꞌ₅₄ juɨgꞌ₅₄ dsa₂.
20 Ia₁ on₃juaꞌ₅₄ guionꞌ₅₄ ꞌniaꞌ₂ juaꞌ₅₄ jág₁; ꞌŋiog₅ bá₄ Jme₂dsí₂ quián₅ Ŋéiꞌ₅ ꞌniaꞌ₂ juáꞌ₂ juɨ₅ të₂ꞌauꞌ₂.
21 ꞌIa₁ lé₂ táng₃, juɨ₁liaꞌ₂ rɨnꞌ₅₄ dsa₂ qui₃jɨ́inꞌ₂ rɨinꞌ₅₄ jaun₂ jŋagꞌ₃ dsa₂, juɨ₁liaꞌ₂ jmei₂ guëꞌ₂ dsa₂ qui₃jɨ́inꞌ₂ chiꞌ₂ quiáin₅; chiꞌ₂ guëꞌ₂ në́₃ qui₃náu₃ ꞌnei₂ jmáiꞌ₃ chog₅₄-jmei₂, qui₃jángꞌ₂ a₂jme₃dsiog₅ dsa₂.
22 Ca₂le₃jɨ́n₃ juɨ₁liaꞌ₂ dsa₂ mɨ₂güɨ́g₃ jme₃ꞌŋiai₅₄ ꞌniaꞌ₂ ꞌuɨg₅₄ quió₃ jniá₂; la₁ia₁ juɨ₁liaꞌ₂ i₂tión₂ tiá₂ ca₂të₂ jë₁ca₂tóꞌ₂, i₂ꞌéi₂ bá₄ i₂lión₂.
23 Jë₁ma₂qui₂co₃ꞌein₃ dsa₂ juɨ₁liaꞌ₂ caun₂ juɨg₂, cuɨng₅ ꞌniaꞌ₂ juɨ₅ juɨg₂ siáꞌ₂ táng₃; a₂dsɨ₂jóꞌ₃ juáꞌ₅ jniá₂, të₃ tsá₃ ma₂lë₅ quenꞌ₄ ꞌniaꞌ₂ i₁niogꞌ₄ ca₂le₃jë́₃ juɨg₂ ja₁tén₄ ꞌuë₃ Israel, a₂guanꞌ₂ táng₃ Jaun₅* dsa₂ mɨ₂güɨ́g₃.
24 ꞌJuɨ₁liaꞌ₂ jan₂ i₂jme₂tɨn₅, tsá₃ juɨinꞌ₂ conꞌ₂ guë́₄ të₅ quiáin₅; ján₃ bá₄ le₂jaun₂ juɨ₁liaꞌ₂ jan₂ dsa₂ i₂jme₂ti₃, tsá₃ juɨinꞌ₂ conꞌ₂ guë́₄ juɨg₅₄.
25 Tióꞌ₅ juɨ₁liaꞌ₂ i₂jme₂tɨn₅ léin₂ juɨ₁liaꞌ₂ lɨ́n₅ të₅ quiáin₅; juɨ₁liaꞌ₂ dsa₂ i₂jme₂ti₃ guëꞌ₂ në́₃, dsi₁léin₂ juɨ₁liaꞌ₂ lɨ́n₅ juɨg₅₄. Chi₂juaꞌ₂ ꞌŋiog₅ dsa₂ juɨnꞌ₂ caun₂ dsi₂néi₂ ma₂quion₅ dsa₂ Beꞌelzebú*, ¡ꞌë₂ guë́₄ bá₄ ꞌɨn₃ dsa₂, juɨ₁liaꞌ₂ i₂tionꞌ₅₄ dsi₂néi₂ quióꞌ₅!
ꞌEin₂ ꞌnióꞌ₅ jme₃gan₃ dsa₂
26 ꞌꞌUɨg₅₄ jaun₂, tsá₃ lë₁jmo₂ ꞌniaꞌ₂ gangꞌ₃ dsa₂ mɨ₂güɨ́g₃. Ia₁ ꞌi₁caun₂ juɨ₁liaꞌ₂ a₂rë₂jlë₅ tsá₃ cha₂ juaꞌ₅₄ a₂tsá₃ le₃jniá₂, ján₃ bá₄ le₂jaun₂ juɨ₁liaꞌ₂ a₂rë₂ꞌma₄ tsá₃ cha₂ juaꞌ₅₄ a₂tsá₃ le₃ŋi₅ dsa₂.
27 Juɨ₁liaꞌ₂ a₂juɨ́g₂ jniá₂ ꞌniaꞌ₂ la₂ jë₄ të₃coꞌ₅₄, juaꞌ₅₄ ꞌniaꞌ₂ të₃jɨn₄ dsa₂ juɨn₅; ján₃ bá₄ le₂jaun₂ juɨ₁liaꞌ₂ a₂juɨ́g₂ jniá₂ ꞌniaꞌ₂ conꞌ₂ tei₄, juaꞌ₅₄ ꞌniaꞌ₂ co₂mɨꞌ₅₄ juɨ₁liaꞌ₂ ja₁ŋei₅.
28 Tsá₃ lë₁jmo₂ ꞌniaꞌ₂ gangꞌ₃ quianꞌ₅₄ i₂jŋɨꞌ₃ nɨ₁ŋɨ́₅, la₁ të₂ꞌauꞌ₂ ꞌniaꞌ₂ tsá₃ ꞌe₂ lé₂ le₃jmo₃; i₂ꞌéi₂ bá₄ ca₂tɨ́nꞌ₂ ꞌniaꞌ₂ jme₁gangꞌ₃ juɨ₁liaꞌ₂ i₂lé₂ le₃jŋɨꞌ₃ nɨ₁ŋɨ́₅ quianꞌ₅₄ guëꞌ₂ të₂ꞌauꞌ₂ ꞌniaꞌ₂ a₂jengꞌ₃ ja₁ꞌlɨgꞌ₅₄.
29 ꞌ¿Tsa₁ ꞌnɨ₅ dsa₂ on₃ i₁tan₅ píꞌ₁ quianꞌ₅₄ caun₂ ŋí₁ guéin₂? La₁ ꞌi₁jan₂ i₁tan₅ tsá₃ tiánꞌ₃ ꞌuë₃ juaꞌ₅₄ tsá₃ ŋi₅ Ŋéiꞌ₅ ꞌniaꞌ₂.
30 Ia₁ le₂jiog₅ nɨ₁jŋi₂ dseiꞌ₂ ꞌniaꞌ₂ le₁ꞌí₁ je₂liáꞌ₂ mɨꞌ₂ tí₅ ján₃.
31 Tsá₃ lë₁jmo₂ ꞌniaꞌ₂ gangꞌ₃, ia₁ ꞌŋio₅ lɨn₃ guë́₄ quenꞌ₄ ꞌniaꞌ₂ liaꞌ₂ conꞌ₂ guë́₄ juɨn₅ lɨn₃ i₁tan₅.
Juɨ₁liaꞌ₂ i₂jme₂jnia₅ a₂cuɨin₂₃ Jesucristo jɨn₄ dsa₂ mɨ₂güɨ́g₃
32 ꞌJuɨ₁liaꞌ₂ i₂jme₂jnia₅ të₂le₃ quió₃ jniá₂ jɨn₄ dsa₂ mɨ₂güɨ́g₃, ján₃ bá₄ le₂jaun₂ jniá₂ në́₃ jme₁jniag₅ të₂le₃ quióꞌ₅ ꞌéi₂ ne₄ Ŋeꞌ₃ i₂guá₅ gueiꞌ₅₄ i₂juɨ́g₃;
33 la₁ juɨ₁liaꞌ₂ i₂jme₂jnia₅ a₂tsá₃ cuɨg₂₃ jniá₂ jɨn₄ dsa₂ mɨ₂güɨ́g₃, ján₃ bá₄ le₂jaun₂ jme₁jnia₅ jniá₂ a₂tsá₃ cuɨ́in₅ ne₄ Ŋeꞌ₃ i₂guá₅ gueiꞌ₅₄ i₂juɨ́g₃.
Jesús bá₄ i₂ꞌuɨn₄ a₂lë́₂ le₁dsonꞌ₅₄ dsa₂
34 ꞌTsá₃ o₁lenꞌ₂ ꞌniaꞌ₂ juaꞌ₅₄ a₂guio₃ jniá₂ a₂i₃ꞌei₃ tei₄ mɨ₂güɨ́g₃; ia₁ tsá₃ ta₁ jaun₂ guio₃ jniá₂ a₂i₃ꞌei₃ tei₄. Mɨꞌ₅₄ ꞌnei₂ bá₄ a₂quian₄ jniá₂.
35 A₂jaun₂ bá₄ guio₃ jniá₂ a₂i₃dsia₃ mɨꞌ₅₄ dsi₂néi₂:
Chiꞌ₂ jme₃ꞌŋiai₅₄ jmei₂,
chiꞌ₂ ja₁mɨ́g₄ dsa₂ në́₃
jme₃ꞌŋiai₅₄ chog₅₄;
i₂lɨ́n₅ mɨ₂lo₅₄ në́₃
tóinꞌ₃ mɨꞌ₅₄ quianꞌ₅₄ ma₂chog₅₄.
36 Dsa₂ i₂lɨ́n₅ jmei₂ dsi₂néi₂
qui₂jme₃ꞌiog₅₄ chiꞌ₂ quiáin₅.d
37 ꞌJuɨ₁liaꞌ₂ i₂ꞌnio₃ guë́₄ ꞌŋio₅ lɨn₃ chog₅₄-jmei₂ liaꞌ₂ conꞌ₂ guë́₄ jniá₂, tsá₃ ca₂tɨ́in₂ léin₂ dsa₂ quiáng₃; le₂në₅ bá₄ ján₃, juɨ₁liaꞌ₂ i₂ꞌnio₃ ꞌŋio₅ lɨn₃ guë́₄ ja₁ŋiꞌ₅₄ o₃ ja₁mɨ́g₄ ꞌe₂, liaꞌ₂ conꞌ₂ guë́₄ jniá₂, tsá₃ ca₂tɨ́in₂ léin₂ dsa₂ quiáng₃;
38 juɨ₁liaꞌ₂ i₂tsá₃ ca₂ꞌág₂ caun₂ dsɨ́₅ ca₂join₃ chi₂juaꞌ₂ ca₂join₃,e a₂jiá₃ chi₁coꞌ₅₄ quió₃, tsá₃ ca₂tɨ́in₂ léin₂ dsa₂ quiáng₃.
39 Juɨ₁liaꞌ₂ i₂ŋɨ́₄ lë₃ ꞌnio₃ líꞌ₂ le₃chain₂ dse₃, dsɨ₃ꞌén₂ quióꞌ₅; ján₃ bá₄ le₂në₅, juɨ₁liaꞌ₂ i₂ca₂guen₃ ꞌmú₃ o₄quió₃ jniá₂, líꞌ₂ bá₄.
Co₂ꞌnióꞌ₄ ꞌlianꞌ₅₄ dsa₂
40 ꞌJuɨ₁liaꞌ₂ i₂guen₅ ꞌniaꞌ₂, guei₂₃ jniá₂; juɨ₁liaꞌ₂ i₂guei₅ jniá₂ guein₂₃ i₂ca₂chei₃ jniá₂ në́₃.
41 I₂guen₅ juɨ₁liaꞌ₂ jan₂ dsa₂ i₂ꞌë́₂ jág₁ o₄quióꞌ₄ Diú₄ ia₁ a₂lɨ́in₅ i₂chen₄ quián₅ Diú₄, co₂jaun₂ bá₄ ꞌliaꞌ₅₄ gue₃ ján₃ juɨ₁liaꞌ₂ ꞌlianꞌ₅₄ jan₂ i₂ꞌë́₂ jág₁ quián₅ Diú₄. Le₂në₅ bá₄ ján₃, juɨ₁liaꞌ₂ i₂guen₅ jan₂ dsa₂ dsen₃ ia₁ lɨ́in₅ dsa₂ dsen₃, gue₃ ꞌliainꞌ₅₄ ján₃ conꞌ₂ ꞌliaꞌ₅₄ a₂ca₂tɨ́n₂ jan₂ dsa₂ dsen₃.
42 Juɨ₁ꞌein₂ guë́₃ dsa₂ i₂cuë₅ caun₂ vaso jmɨg₂ güɨ́gꞌ₂, cuë́ꞌ₅ jan₂ dsa₂ meꞌ₂ le₂në₅ quiáng₃ ꞌuɨg₅₄ ia₁ a₂ꞌein₂₃ jniá₂, a₂dsɨ₂jóꞌ₃ juáꞌ₅, tion₅₄ bá₄ gue₃ ꞌliainꞌ₅₄.