2 Jaun₂ ca₂ŋag₃ Jesús:

3 Jme₁ca₂dsióg₃ Jesús máꞌ₂ Olivos* a₂chíꞌ₅ quióng₄ guáꞌ₅, ja₁jaun₂ ca₂guá₂. Jaun₂ ca₂guan₃ Pe₄, Jacobo, quiainꞌ₅₄ Juan₅₄, Drë́₄ në́₃, ca₂tsɨ́ꞌ₃ Jesús conꞌ₂ jë₄ të₃coꞌ₅₄:

4 ―Juaꞌ₅₄ lɨ́gꞌ₂ bá₄ le₃ti₃ a₂juáꞌ₂ ꞌne₂ në₅. ꞌNiog₂ jniaꞌ₅₄ le₃ne₄. ¿ꞌE₂ léi₄ a₂lé₂ néꞌ₃ a₂të₅₄ jmɨg₄ jaun₂?

5 Jaun₂ ca₂ŋag₃ Jesús:

6 Ia₁ juɨn₅ i₂të₁i₃nio₄ a₂juáꞌ₂ i₂nioi₅₄ o₄quió₃ jniá₂, juáꞌ₂: “Jniá₂ bá₄ lɨ́ng₅ ꞌéi₂,” jaun₂ juɨn₅ dsa₂ i₂qui₂jme₃gain₂₃.

7 ꞌJë₁ma₂neiꞌ₂ ꞌniaꞌ₂ ꞌei₅ jág₁ a₂nio₃ ꞌnei₂ a₂quɨ́nꞌ₂ dsa₂ ja₁lá₃ ja₁ó₃, la₁ tsá₃ jmó₁ ꞌniaꞌ₂ gangꞌ₃, ia₁ le₂jaun₂ dsónꞌ₂ lé₂ bá₄. La₁ on₃juaꞌ₅₄ jmɨg₄ jë₁ca₂tóꞌ₂ jaun₂.

8 Ia₁ nio₃ ꞌnei₂, qui₃quɨ́nꞌ₂ dsa₂ le₂caun₂ le₂caun₂ juɨg₂ nación; dsɨ₂tan₅₄ guëꞌ₂ në́₃ qui₃tóinꞌ₃ mɨꞌ₅₄ quɨ́inꞌ₂ quianꞌ₅₄ dsɨ₂tan₅₄ rɨinꞌ₅₄ i₂chan₂ juɨg₂ siáꞌ₂. ꞌLióng₂ ja₁qui₂dsɨ₃bi₅₄ ꞌuë₃ lé₂, tonꞌ₂ le₃cha₂ ꞌlióng₂ ja₁qui₂i₂nio₄ dsa₂ ꞌoin₅₄. A₂le₂ꞌuɨg₅₄ jmɨ₁uɨg₅ bá₄ guë́₄ në₅, juɨ₁liaꞌ₂ jan₂ ꞌio₅₄ i₂rë₂chan₂ guein₂ quián₅.

9 ꞌRë₂jánꞌ₁ ꞌniaꞌ₂ changꞌ₂, ia₁ qui₃jɨ́nꞌ₂ dsa₂ ꞌniaꞌ₂ ne₄ dsɨ₂tan₅₄ quián₅ guáꞌ₅ ia₁jaun₂ bóg₂ dsa₂ dsi₂néi₂ guáꞌ₅ sinagogas*. Jaun₂ dsi₁nóꞌ₅ ꞌniaꞌ₂ të₃ne₄ dsi₄máꞌ₂, ne₄ rag₅₄ në́₃, ꞌuɨg₅₄ quió₃ jniá₂; ja₁jaun₂ o₁jangꞌ₄ ꞌniaꞌ₂ jág₁ dsau₅.

10 Jág₁ quióꞌ₅ Diú₄ deꞌ₂ jŋiá₅ ꞌnióꞌ₅ dsɨ₃ꞌag₅ le₂con₂ mɨ₂güɨ́g₃.

11 Jë₁ma₂të́₂ rë₁qui₃të₂ dsa₂ ꞌniaꞌ₂ a₂dsi₁jó₂ ne₄ dsɨ₂tan₅₄, tsá₃ jmóꞌ₂ ꞌniaꞌ₂ ꞌɨ₅ ꞌauꞌ₂ të₃jŋiá₅ ꞌe₂ ŋagꞌ₅₄. La₁ ŋag₄ bá₄ ꞌniaꞌ₂ conꞌ₂ jág₁ a₂ma₂ca₂ŋɨꞌ₂ ꞌniaꞌ₂ hora jaun₂, ia₁ on₃juaꞌ₅₄ guionꞌ₅₄ ꞌniaꞌ₂ a₂ŋagꞌ₅₄ jág₁ jaun₂; Jme₂dsí₂ Jŋió₅ bá₄ i₂jmo₃.

12 Ia₁ tónꞌ₃ dsa₂ qui₃jɨ́inꞌ₂ rɨinꞌ₅₄ jmɨg₄ jaun₂, jaun₂ jŋagꞌ₃ dsa₂; juɨ₁liaꞌ₂ jmei₂ qui₃jɨ́inꞌ₂ chiꞌ₂ quiáin₅. Chiꞌ₂ guëꞌ₂ në́₃, jme₃ꞌŋiai₅₄ chog₅₄-jmei₂; chan₂ guëꞌ₂ i₂qui₂jme₃dsian₅ chog₅₄-jmei₂ në́₃.

13 Ca₂le₃jɨ́n₃ dsa₂ jme₃ꞌŋia₅₄ ꞌniaꞌ₂ ꞌuɨg₅₄ quió₃ jniá₂, la₁ juɨ₁liaꞌ₂ i₂tióꞌ₃ náu₃ tiá₂ të₂ jë₁ca₂tóꞌ₂, tɨ́inꞌ₄ bá₄.

14 ꞌJaun₂ në́₃, já₅ jmɨg₄ a₂të₅₄ neꞌ₅₄ ꞌniaꞌ₂ a₂náu₃ jan₂ dsa₂ i₂juɨ₁si ꞌlɨnꞌ₅₄ ja₁tsá₃ ꞌi₄ ꞌéiꞌ₃ náu₃,^a ―jaun₂ juɨ₁le₂ŋɨ́ꞌ₂ bá₄ i₂ꞌɨ₅ si₂ la₂―; jaun₂ në́₃, dsa₂ i₂tiánꞌ₅ le₂tan₅₄ ꞌuë₃ Judea, juɨ₁cuɨng₁₂ juɨ₅ máꞌ₂.

15 Juɨ₁liaꞌ₂ i₂ꞌen₅₄ gueiꞌ₅₄ ꞌne₄, tsá₃ juɨ₁sióin₄ juaꞌ₅₄ a₂ꞌuë́ꞌ₃ ꞌe₂ ꞌuë́ꞌ₃ dsi₂néi₂ quióꞌ₅;

16 juɨ₁liaꞌ₂ i₂ꞌen₅₄ ja₁nau₂ quióꞌ₅ táng₃, tsá₃ ma₃juɨ₁jŋioiꞌ₅₄ juaꞌ₅₄ a₂ja₃quián₂ tsɨ₁ꞌmɨꞌ₂ dsióg₂ quióꞌ₅.

17 ¡Juɨ́g₂ bá₄ juɨ₁liaꞌ₂ dsa₂ mɨ́₂ i₂le₁quian₅ guein₂, juɨ₁liaꞌ₂ i₂chan₂ guein₂ bëꞌ₅₄ i₂ꞌɨ́nꞌ₂ dsiꞌ₅₄ quióꞌ₅ në́₃, jmɨg₄ jaun₂!

18 Mɨ₄ ꞌniaꞌ₂ ne₄ Diú₄ tsá₃ juɨ₁dsi₂ŋɨ́ꞌ₂ ꞌniaꞌ₂ a₂jaun₂ juɨ₁liaꞌ₂ jein₂ güɨ́g₂.

19 Ia₁ juáꞌ₅ jniá₂, caun₂ o₂i₁ dsɨ₅ lɨn₃ a₂le₃chan₂ dsa₂ jmɨg₄ jaun₂, caun₂ jmɨ₁uɨg₅ a₂tsá₃ ma₂ca₂rë₃chá₃ ca₂le₃ ca₂nio₃ mɨ₂güɨ́g₃, on₃ guëꞌ₂ ma₃niog₅ jmɨg₄ juaꞌ₅₄ a₂le₃cha₂ guë́₄ cang₂.

20 Juaꞌ₅₄ meiꞌ₂ guë́₃ Te₁guiꞌ₅₄ tsá₃ ma₂ca₂jme₃të́₃ jmɨg₄ jaun₂, ꞌi₁jan₂ tsá₃ ꞌein₂ jme₁lión₂ juaꞌ₅₄ meiꞌ₂ guë́₃ tsá₃ le₂jaun₂. La₁ ma₂ca₂jme₃të́₃ bá₄ jmɨg₄ jaun₂ o₄quióꞌ₄ i₂quionꞌ₅₄ quiáin₅.

21 ꞌNë₁juaꞌ₂ chan₂ i₂ca₂juáꞌ₂ tsɨ́ꞌ₅ ꞌniaꞌ₂ jmɨg₄ jaun₂: “¡Jag₄ ꞌniaꞌ₂! La₂ bá₄ chénꞌ₅ I₂rë₂ꞌɨ́n₁* quián₅ Diú₄”, o₃ në₁juaꞌ₂ ꞌein₂ ca₂juáꞌ₂: “Jó₄ ꞌein₅₄”, tsá₃ o₁ꞌenꞌ₅₄ ꞌniaꞌ₂ jág₁ jaun₂.

22 Ia₁ juɨn₅ dsa₂ i₂jme₃gau₅ ja₃lén₂ a₂juáꞌ₂ lɨ́in₅ I₂rë₂ꞌɨ́n₁ quián₅ Diú₄, a₂juáꞌ₂ në́₃ a₂lɨ́in₅ dsa₂ i₂ꞌë́₂ jág₁ quián₅ Diú₄; ꞌlióng₂ léi₄ juëꞌ₂ a₂o₂dsain₂ jmo₃ a₂jme₃gain₂₃ dsa₂. Juaꞌ₅₄ meiꞌ₂ guë́₃ lé₂, ca₂të₂ dsa₂ i₂quionꞌ₅₄ quián₅ Diú₄ jme₃gain₂₃.

23 La₁ chanꞌ₂ ꞌniaꞌ₂ rë₂jángꞌ₁,^b jaun₂ le₂në₅ ma₂në₂juɨ́g₂ jniá₂ ꞌniaꞌ₂ ca₂le₃jë́₃ të₃jŋiá₅.

24 Jë₁ma₂ca₂ŋag₅ jmɨg₄ o₂i₁ dsɨ₅ jaun₂,

26 ꞌTë₃jë₄ jaun₂ guë́₄ në́₃, jɨ́n₂ dsa₂ Jaun₅* dsa₂ mɨ₂güɨ́g₃, jŋióiꞌ₂ gueiꞌ₅₄ jë₄ jnei₅ quianꞌ₅₄ ca₂le₃jë́₃ juɨ₅bí₂ a₂ꞌio₂₃ jláinꞌ₁.

27 Jaun₂ qui₃chein₃ ángeles quiáin₅, a₂të₂ dsa₂ i₂quionꞌ₅₄ quiáin₅ i₂chan₂ ca₂le₃jë́₃ juɨg₂ te₁ꞌi₁ ca₂taun₂ ca₂taun₂ mɨ₂güɨ́g₃.

28 ꞌJme₁tɨn₅ ꞌniaꞌ₂, juɨ₁le₂ŋɨ́ꞌ₂ ꞌauꞌ₂ jág₁ a₂jángꞌ₅ léi₄ juɨ₁liaꞌ₂ nɨ₁ꞌma₂ a₂ꞌag₅ mɨ́g₂ higos*; jme₁chéiꞌ₂ guꞌ₂-neiꞌ₅₄, qui₂ja₂ꞌiá₃ mogꞌ₅₄ në́₃, ŋiꞌ₅₄ bá₄ ꞌniaꞌ₂ a₂ma₂ja₂quián₃ jein₂ ꞌiog₂ bá₄ jaun₂.

29 Le₂në₅ bá₄ ꞌniaꞌ₂ jaun₂ në́₃, jë₁ma₂të₅ neꞌ₅₄ a₂lë́₂ ca₂le₃jë́₃ a₂në₅, juɨ₁le₂ŋiꞌ₅₄ bá₄ ꞌniaꞌ₂ a₂ma₂ja₂quiáin₃, në₂jag₄ bá₄ i₂ma₂chénꞌ₅ o₄ꞌné₄ bá₄ ꞌéi₂.

30 A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, tsá₃ dsɨ₃ŋɨ́₂ tsɨ₁jon₂ la₂,^e ca₂liaꞌ₂ ca₂lë₃ ca₂le₃jë́₃ a₂në₅.

31 Jaun₂ já₅ jmɨg₄, gueiꞌ₅₄ dsi₂güɨg₂ quianꞌ₅₄ mɨ₂güɨ́g₃ la₂ ŋag₅, la₁ jág₁ quió₃, o₁lɨ́gꞌ₂ jmɨg₄ tsá₃ ŋag₅ juaꞌ₅₄ a₂tsá₃ le₃ti₃.

32 ꞌLa₁ ꞌi₁jan₂ tsá₃ ꞌein₂ ŋi₅ ꞌe₂ ꞌióꞌ₄, ꞌe₂ hora lé₂ a₂jaun₂, on₃ guëꞌ₂ ángeles i₂tionꞌ₅₄ gueiꞌ₅₄ i₂juɨ́g₃, on₃ guëꞌ₂ ꞌŋiog₅ Ja₁ŋiꞌ₅₄ Diú₄. Jŋiaꞌ₅₄ liaꞌ₂ ꞌŋiog₅ bá₄ Diú₄ Jmei₂ ŋi₅.

33 ꞌChanꞌ₂ ꞌniaꞌ₂ rë₂jángꞌ₁, jme₁jnio₂ ꞌniaꞌ₂ neꞌ₅₄, ia₁ tsá₃ ŋiꞌ₅₄ ꞌniaꞌ₂ ꞌe₂ jmɨg₄ lé₂.

34 Lé₂ juɨ₁liaꞌ₂ jan₂ dsa₂ i₂o₂ꞌɨn₅ dsi₂néi₂ quióꞌ₅, dsó₅ dsɨ₂ŋɨ́₃ uɨ́ng₂; dsia₂₃ gu₂ dsa₂ i₂jme₂ti₃ ne₅₄ dsi₂néi₂ quióꞌ₅, le₂jan₂ le₂jan₂ ꞌéi₂ jma₃quén₅ ta₁ cuë́ꞌ₅ conꞌ₂ ca₂tɨ́in₂, tsɨ́ꞌ₅ mozo i₂jmo₅ ꞌí₁ o₄ꞌné₄ a₂chain₂ rë₂jáin₁.

35 Jaun₂ le₂në₅ bá₄ ꞌniaꞌ₂ ján₃, rë₂jángꞌ₁ ꞌniaꞌ₂ changꞌ₂, ia₁ tsá₃ ŋiꞌ₅₄ ꞌniaꞌ₂ ꞌe₂ ꞌióꞌ₄ guanꞌ₂ dsa₂ i₂quióꞌ₅ dsi₂néi₂, të₂le₃ ca₂nei₂, o₃ dsi₃nei₅, o₃ jë₁ma₂ca₂ꞌo₃ i₁tú₃, o₃ të₂le₃ ca₂jnia₃ ꞌe₂,

36 ia₁ conꞌ₂ tsá₃ ŋó₅ në₁juaꞌ₂ ca₂guáinꞌ₃ co₂tiá₂, jo₅₄ rë₂güɨ́nꞌ₃ ꞌniaꞌ₂.

37 Jaun₂ jág₁ a₂juɨ́g₂ jniá₂ ꞌniaꞌ₂ la₂, juɨ́g₂ ca₂le₃jɨ́n₃: “¡Chanꞌ₂ ꞌniaꞌ₂ rë₂jángꞌ₁!”