Ca₂ꞌë́₂ Jesús jág₁ a₂dsɨ₃ꞌén₂ bá₄ guáꞌ₅ templo
24
Jaun₂ ca₂o₃ꞌɨ́n₃ Jesús i₁dsi₅ guáꞌ₅ templo* ja₁jme₁ꞌein₅₄. Jme₁ma₂ꞌein₅₄ juɨ₅ ŋáiꞌ₅, ca₂jme₃quián₃ chiꞌ₂ dsɨ₂guia₃-tɨ́n₂ quiáin₅ të́₂, ca₂juáꞌ₂:
―Jag₄ ꞌa₂ liaꞌ₂ lë́₅ guáꞌ₅.
2 La₁ jaun₂ ca₂ŋag₃ Jesús:
―¿Jágꞌ₂ ꞌniaꞌ₂ ca₂le₃jë́₃ a₂në₅? A₂dsɨ₂jóꞌ₃ juɨ́g₂ jniá₂ ꞌniaꞌ₂, já₅ jmɨg₄ liaꞌ₂ ꞌi₁ca₂mɨ́g₂ nɨ₁cang₁ tsá₃ ma₃ꞌe₂ juaꞌ₅₄ a₂le₁juɨ́₄ guë́₄ lé₂ quianꞌ₅₄ rɨnꞌ₅₄. Ca₂le₃jë́₃ bá₄ ꞌén₂.
Léi₄ a₂lé₂ jmɨg₄ jë₁ca₂tóꞌ₂
3 Jme₁ca₂dsióg₃ Jesús Máꞌ₂ Olivos*; ja₁jaun₂ ca₂guá₂. Jaun₂ ca₂i₁len₅₄ chiꞌ₂ dsɨ₂guia₃-tɨ́n₂ conꞌ₂ jë₄ jmáꞌ₃ guioin₅₄, ca₂nɨ́iꞌ₃ Jesús:
―ꞌNiog₂ jniaꞌ₅₄ le₃ne₄ lɨ́gꞌ₂ lé₂ a₂juáꞌ₂ ꞌne₂ në₅. ¿ꞌE₂ léi₄ lé₂ jë₁ma₂të́₂ rë₁ŋegꞌ₅₄ táng₃? ¿ꞌE₂ bá₄ léi₄ lé₂ jë₁ma₂të́₂ rë₁të₅₄ jmɨg₄ jaun₂?
4 Jaun₂ ca₂ŋag₃ Jesús:
―Jmo₄ ꞌniaꞌ₂ ꞌí₁ ia₁jaun₂ tsá₃ ꞌein₂ jme₃gau₅.
5 Ia₁ juɨn₅ i₂të₁i₃nio₄ a₂juáꞌ₂ i₂nioi₅₄ o₄quió₃ jniá₂, juáꞌ₂: “Jniá₂ bá₄ lɨ́ng₅ I₂rë₂ꞌɨ́n₁* quián₅ Diú₄”; jaun₂ juɨn₅ dsa₂ i₂qui₂jme₃gain₂₃.
6 Jë₁ma₂neiꞌ₂ ꞌniaꞌ₂ ꞌei₅ jág₁ a₂nio₃ ꞌnei₂ a₂quɨ́nꞌ₂ dsa₂ ja₁lá₃ ja₁ó₃, la₁ tsá₃ jmóꞌ₂ ꞌniaꞌ₂ gangꞌ₃, ia₁ le₂jaun₂ dsónꞌ₂ lé₂ bá₄. La₁ ꞌnióꞌ₅ bá₄ guë́₄ a₂ŋɨ́₂ jein₂ jaun₂.
7 Ia₁ nio₃ ꞌnei₂, qui₃quɨ́nꞌ₂ dsa₂ le₂caun₂ le₂caun₂ juɨg₂ nación; dsɨ₂tan₅₄ guëꞌ₂ në́₃ qui₃tóinꞌ₃ mɨꞌ₅₄ quɨ́inꞌ₂ quianꞌ₅₄ dsɨ₂tan₅₄ rɨinꞌ₅₄ i₂chan₂ juɨg₂ siáꞌ₂. Jaun₂ guë́₄ në́₃ ꞌlióng₂ ja₁qui₂i₂nio₄ dsa₂ ꞌoin₅₄ lé₂, tonꞌ₂ ꞌlióng₂ ja₁qui₂dsɨ₃bi₅₄ ꞌuë₃ në́₃.
8 Ca₂le₃jë́₃ a₂në₅ lé₂ a₂le₂ꞌuɨg₅₄ jmɨ₁uɨg₅ juɨ₁liaꞌ₂ jan₂ ꞌio₅₄ i₂rë₂chan₂ guein₂ quián₅.
9 ꞌJaun₂ guë́₄ në́₃, qui₃jɨ́nꞌ₂ dsa₂ ꞌniaꞌ₂ ne₄ dsɨ₂tan₅₄ ia₁jaun₂ cuë₃ dsa₂ uɨg₅, jaun₂ guë́₄ jme₃dsian₅ dsa₂ ꞌniaꞌ₂. Le₂con₂ mɨ₂güɨ́g₃ bá₄ jme₃ꞌŋia₅₄ dsa₂ ꞌniaꞌ₂ ꞌuɨg₅₄ quió₃ jniá₂.
10 Jmɨg₄ jaun₂, juɨn₅ dsa₂ i₂tí₂ juɨ₅ quióꞌ₅ Diú₄ a₂jme₁ꞌéin₂, qui₂jme₃ꞌŋiai₅₄ bá₄ rɨinꞌ₅₄, qui₃jángꞌ₂ në́₃.
11 Juɨn₅ dsa₂ le₃chan₂ i₂ꞌë́₂ jág₁ i₂juɨ₁gan₂, jaun₂ juɨn₅ dsa₂ i₂jme₃gain₂₃.
12 ꞌUɨg₅₄ ia₁ a₂ŋɨ́₄ lë₃ juɨ₁si ŋag₅₄ le₃ꞌlɨnꞌ₅₄ dsa₂, co₂dsia₅ le₃güɨ́gꞌ₂ bá₄ ꞌa₂ liaꞌ₂ jme₁ꞌnio₃ dsa₂ rɨinꞌ₅₄ le₂jain₂ le₂jain₂.
13 La₁ juɨ₁liaꞌ₂ i₂náu₃ tiá₂ të₂ jë₁ca₂tóꞌ₂, ꞌéi₂ bá₄ lión₂.
14 Jág₁ dse₃ la₂ juɨ₁liaꞌ₂ ꞌa₂ liaꞌ₂ lë́₅ ja₁gon₂ Diú₄ qui₂dsɨ₃ꞌag₅ ta₁caun₂ mɨ₂güɨ́g₃, ia₁jaun₂ le₃ŋi₅ ca₂le₃jë́₃ juɨg₂ te₁ꞌi₁ guaꞌ₅₄ ꞌuë₃ jág₁ dse₃ jaun₂; jaun₂ guë́₄ në́₃ të₅₄ jmɨg₄ jë₁ca₂tóꞌ₂.
15 ꞌJaun₂ në́₃, já₅ jmɨg₄ a₂të₅₄ neꞌ₅₄ ꞌniaꞌ₂ a₂náu₃ jan₂ dsa₂ i₂ꞌlɨnꞌ₅₄ guë́₄ lɨn₃, a₂jme₃ꞌióg₃ ja₁jŋió₅, a₂le₃ti₃ jág₁ a₂ca₂ꞌë́₂ Daniel i₂jme₁ꞌë́₂ jág₁ quián₅ Diú₄,a (jaun₂ juɨ₁le₂ŋɨ́ꞌ₂ bá₄ i₂ꞌɨ₅ si₂ la₂),
16 jaun₂ në́₃, dsa₂ i₂tiánꞌ₅ le₂tan₅₄ ꞌuë₃ Judea, juɨ₁cuɨng₁₂ juɨ₅ máꞌ₂.
17 Juɨ₁liaꞌ₂ i₂ꞌen₅₄ gueiꞌ₅₄ ꞌne₄, tsá₃ ma₃juɨ₁sióin₄ juaꞌ₅₄ a₂ꞌuë́ꞌ₃ ꞌe₂ ꞌuë́ꞌ₃ dsi₂néi₂ quióꞌ₅;
18 juɨ₁liaꞌ₂ i₂ꞌen₅₄ ja₁nau₂ quióꞌ₅ táng₃, tsá₃ ma₃juɨ₁jŋioiꞌ₅₄ juaꞌ₅₄ a₂ja₃quián₂ tsɨ₁ꞌmɨꞌ₂ dsiog₂ quióꞌ₅.
19 ¡Juɨ́g₂ bá₄ juɨ₁liaꞌ₂ dsa₂ mɨ́₂ i₂le₁quian₅ guein₂, juɨ₁liaꞌ₂ i₂le₁jŋia₅ guein₂ i₂ꞌɨ́nꞌ₂ dsiꞌ₅₄ në́₃, jmɨg₄ jaun₂!
20 Mɨ₄ ꞌniaꞌ₂ ne₄ Diú₄ ia₁jaun₂ tsá₃ o₁le₅₄ juaꞌ₅₄ a₂cuɨ́ngꞌ₂ ꞌniaꞌ₂ jein₂ güɨ́g₂, on₃ guëꞌ₂ jmɨg₄ sa₅₄ në́₃.
21 Ia₁ juáꞌ₅ jniá₂, caun₂ o₂i₁ dsɨ₅ lɨn₃ a₂le₃chan₂ dsa₂ jmɨg₄ jaun₂, caun₂ jmɨ₁uɨg₅ a₂tsá₃ ma₂ca₂rë₃chá₃ ca₂le₃ ca₂nio₃ mɨ₂güɨ́g₃, on₃ guëꞌ₂ ma₃niog₅ jmɨg₄ juaꞌ₅₄ a₂le₃cha₂ guë́₄ cang₂.
22 Juaꞌ₅₄ meiꞌ₂ guë́₃ Diú₄ tsá₃ ma₂ca₂jme₃të́₃ jmɨg₄ jaun₂, ꞌi₁jan₂ tsá₃ ꞌein₂ jme₁lión₂ juaꞌ₅₄ meiꞌ₂ guë́₃ tsá₃ le₂jaun₂. La₁ o₄quióꞌ₄ i₂rë₂quionꞌ₅₄ quiáin₅, jme₃të́₃ bá₄ jmɨg₄ jaun₂.
23 ꞌNë₁juaꞌ₂ chan₂ i₂ca₂juáꞌ₂ tsɨ́ꞌ₅ ꞌniaꞌ₂ jmɨg₄ jaun₂: “¡Jag₄ ꞌniaꞌ₂! ¡La₂ bá₄ chénꞌ₅ I₂rë₂ꞌɨ́n₁* quián₅ Diú₄!” o₃ në₁juaꞌ₂ ꞌein₂ ca₂juáꞌ₂: “Jó₄ ꞌein₅₄”, tsá₃ o₁ꞌenꞌ₅₄ ꞌniaꞌ₂ jág₁ jaun₂.
24 Ia₁ juɨn₅ dsa₂ i₂juɨ₁gan₂ ja₃lén₂ a₂juáꞌ₂ a₂lɨ́in₅ I₂rë₂ꞌɨ́n₁ quián₅ Diú₄, a₂juáꞌ₂ në́₃ a₂lɨ́in₅ dsa₂ i₂ꞌë́₂ jág₁ quián₅ Diú₄; ꞌlióng₂ léi₄ juëꞌ₂ a₂o₂dsain₂ jmo₃ a₂jme₃gain₂₃ dsa₂. Juaꞌ₅₄ meiꞌ₂ guë́₃ lé₂, ca₂të₂ dsa₂ i₂quionꞌ₅₄ quián₅ Diú₄ jme₃gain₂₃.
25 Jaun₂ në₅ ma₂në₂juɨ́g₂ jniá₂ ꞌniaꞌ₂ të₃jŋiá₅.
26 Jaun₂ në́₃, në₁juaꞌ₂ ꞌein₂ ca₂tsɨ́ꞌ₃ ꞌniaꞌ₂: “Ŋí₂ ꞌniaꞌ₂, jó₄ ꞌein₅₄ ja₁lë́₄ ꞌuë₃ quein₂ co₂ꞌŋiog₅”, tsá₃ lë₁o₂nóꞌ₅ ꞌniaꞌ₂ ja₁jaun₂; o₃ në₁juaꞌ₂ ꞌein₂ ca₂juáꞌ₂: “Ŋí₂ ꞌniaꞌ₂, ja₁lá₃ rë₂ꞌmai₅₄ dsi₂néi₂”, tsá₃ juɨ₁le₂ꞌénꞌ₂ ꞌniaꞌ₂.
27 Ia₁ juɨ₁liaꞌ₂ jme₁lë́₂ si₁ŋíꞌ₃ ca₂taun₂ ca₂taun₂, le₂jaun₂ bá₄ lé₂ jë₁ma₂të́₂ rë₁guanꞌ₂ Jaun₅* dsa₂ mɨ₂güɨ́g₃.
28 Ia₁ juɨ₁liaꞌ₂ ja₁ron₅ ꞌlag₄, ja₁jaun₂ bá₄ ŋɨꞌ₂ i₁tú₃ tsɨnꞌ₅₄.
ꞌA₂ liaꞌ₂ guanꞌ₂ Jaun₅ dsa₂ mɨ₂güɨ́g₃
29 ꞌDsɨ₂juɨ₅ jë₁ma₂ca₂ŋag₅ jmɨg₄ o₂i₁ dsɨ₅ jaun₂,
ꞌiog₂ në́₃ co₂dsia₅ le₃liaꞌ₂,
tsɨꞌ₂ në́₃ tsá₃ ma₃tág₅ jnia₅₄;
nei₅ guëꞌ₂ në́₃ qui₂tsɨ₃séiꞌ₂,
ca₂le₃jë́₃ guë́₄ ꞌe₂ bí₂ cha₂ gueiꞌ₅₄ mɨ₂güɨ́g₃
qui₃guianꞌ₃.b
30 ꞌTë₃jë₄ jaun₂ guë́₄ në́₃, le₃jniá₂ gueiꞌ₅₄ dsi₂güɨg₂ léi₄ quióꞌ₅ Jaun₅* dsa₂ mɨ₂güɨ́g₃, ca₂le₃jë́₃ juɨg₂ te₁ꞌi₁ le₂con₂ mɨ₂güɨ́g₃ tóinꞌ₃ quɨꞌ₃-ꞌo₃. Jɨ́in₂ Jaun₅ dsa₂ mɨ₂güɨ́g₃, guainꞌ₂ gueiꞌ₅₄ jë₄ jnei₅ quianꞌ₅₄ ca₂le₃jë́₃ juɨ₅bí₂ a₂ꞌio₂₃ jláinꞌ₁.
31 Jaun₂ qui₃chein₃ ángeles quiáin₅ jéi₂ ŋí₂ trompeta tiá₂ lɨn₃ a₂të₂ dsa₂ i₂quionꞌ₅₄ quiáin₅ i₂chan₂ ca₂le₃jë́₃ juɨg₂ te₁ꞌi₁ ta₁caun₂ mɨ₂güɨ́g₃.
32 ꞌJme₁tɨn₅ ꞌniaꞌ₂, juɨ₁le₂ŋɨ́ꞌ₂ ꞌauꞌ₂ jág₁ a₂jángꞌ₅ léi₄ juɨ₁liaꞌ₂ nɨ₁ꞌma₂ a₂ꞌag₅ mɨ́g₂ higos*: jme₁chéiꞌ₂ guꞌ₂ neiꞌ₅₄, a₂ja₂ꞌŋio₃ mogꞌ₅₄, ŋiꞌ₅₄ ꞌniaꞌ₂ a₂ma₂ja₂quián₃ jein₂ ꞌiog₂ bá₄ jaun₂.
33 Le₂në₅ bá₄ ꞌniaꞌ₂ jaun₂ në́₃, jë₁ma₂të₅ neꞌ₅₄ a₂lë́₂ ca₂le₃jë́₃ a₂në₅, juɨ₁le₂ŋiꞌ₅₄ bá₄ ꞌniaꞌ₂ a₂ma₂ja₂quiáin₃, në₂jag₄ bá₄ i₂ma₂chénꞌ₅ o₄ꞌné₄ bá₄ ꞌéi₂.
34 A₂dsɨ₂jóꞌ₃ juáꞌ₅ jniá₂ juɨ́g₂ ꞌniaꞌ₂, tsá₃ dsɨ₃ŋɨ́₂ tsɨ₁jon₂ la₂,c ca₂liaꞌ₂ ca₂lë₃ ca₂le₃jë́₃ a₂në₅.
35 Já₅ jmɨg₄, gueiꞌ₅₄ dsi₂güɨg₂ quianꞌ₅₄ mɨ₂güɨ́g₃ la₂ ŋag₅, la₁ jág₁ quió₃ o₁lɨ́gꞌ₂ tsá₃ ŋag₅ juaꞌ₅₄ a₂tsá₃ le₃ti₃.
36 ꞌLa₁ ꞌi₁jan₂ tsá₃ ꞌein₂ ŋi₅ ꞌe₂ ꞌióꞌ₄, ꞌe₂ hora lé₂ a₂jaun₂, on₃ guëꞌ₂ ángeles i₂tionꞌ₅₄ gueiꞌ₅₄ i₂juɨ́g₃, on₃ guëꞌ₂ ꞌŋiog₅ Ja₁ŋiꞌ₅₄ Diú₄.d Jŋiaꞌ₅₄ liaꞌ₂ ꞌŋiog₅ bá₄ Diú₄ Jmei₂ ŋi₅.
37 ꞌIa₁ juɨ₁liaꞌ₂ ca₂lë₃ jmɨg₄ liaꞌ₂ conꞌ₂ jme₁chan₂ Noé, le₂jaun₂ bá₄ lé₂ ján₃ jë₁ma₂të́₂ rë₁guanꞌ₂ Jaun₅ dsa₂ mɨ₂güɨ́g₃.
38 Ia₁ jmɨg₄ jaun₂, néꞌ₃ a₂canꞌ₂ mɨ₂güɨ́g₃ quianꞌ₅₄ jmɨg₂, jme₁chan₂ dsa₂ qui₂guë́ꞌ₅, qui₂ꞌɨ́nꞌ₂, qui₂jéinꞌ₂ gu₂, qui₂cuɨin₂₃ ja₁mɨ́g₄ jme₁jéinꞌ₂ gu₂ në́₃, ca₂liaꞌ₂ ca₂të́₂ jmɨg₄ jme₁ca₂ꞌí₃ Noé ꞌŋióꞌ₃ nɨ₁barco;
39 la₁ conꞌ₂ tsá₃ ꞌein₂ rë₁ján₁ jme₁ca₂dságꞌ₃ jmɨg₂ ca₂jiog₃ quióꞌ₅ ca₂le₃jɨ́in₃. Le₂jaun₂ bá₄ lé₂ táng₃ jë₁ma₂të́₂ rë₁guanꞌ₂ Jaun₅ dsa₂ mɨ₂güɨ́g₃.
40 Jmɨg₄ jaun₂, on₃ dsa₂ ŋeꞌ₂ tionꞌ₅₄ ja₁nau₂; jan₂ i₂dsánꞌ₃, jan₂ guëꞌ₂ i₂të₃ꞌŋiá₄.
41 On₃ guëꞌ₂ dsa₂ mɨ́₂ tioinꞌ₅₄ éiꞌ₅ ne₄ nɨ₁to₂; jan₂ i₂dsánꞌ₃, jan₂ guëꞌ₂ i₂të₃ꞌŋiá₄.
42 ꞌJme₁jnio₂ ꞌniaꞌ₂ neꞌ₅₄ jaun₂, ia₁ tsá₃ ŋiꞌ₅₄ ꞌniaꞌ₂ ꞌe₂ hora jŋióꞌ₂ juɨgꞌ₂.
43 La₁ juɨ₁le₂ŋɨ́ꞌ₂ ꞌauꞌ₂ ꞌniaꞌ₂ a₂la₂: juaꞌ₅₄ meiꞌ₂ guë́₃ ŋi₅ dsa₂ juɨg₅₄ caun₂ dsi₂néi₂ ꞌe₂ hora jiá₃ dsa₂ ꞌang₂ të₂le₃ ca₂nei₂, jme₃jnio₅₄ ne₅₄, tsá₃ cuë₃ jmɨg₄ a₂ꞌí₂ dsa₂, ꞌang₃ dsi₂néi₂ quióꞌ₅.
44 Le₂në₅ bá₄ ꞌniaꞌ₂, rë₂jánꞌ₁ ꞌniaꞌ₂ changꞌ₂; ia₁ conꞌ₂ tsá₃ ŋiꞌ₅₄ bá₄ ꞌniaꞌ₂ guanꞌ₂ Jaun₅ dsa₂ mɨ₂güɨ́g₃.
Dsa₂ dsen₃ i₂jme₂ti₃, quianꞌ₅₄ dsa₂ i₂tsá₃ jme₂ti₃
45 ꞌ¿ꞌEin₂ dsa₂ i₂ŋɨ́ꞌ₂ dsɨ́₅ jme₂ti₃ conꞌ₂ dsi₂ten₅₄ ne₄ juɨg₅₄? Juɨg₅₄ në́₃ ca₂dsia₃ o₄gú₃ ꞌéi₂ dsi₂néi₂ quióꞌ₅ liaꞌ₂ jma₃quianꞌ₅₄ ca₂le₃jɨ́n₃ rɨinꞌ₅₄ i₂jme₂ti₃, a₂ŋɨiꞌ₃ rɨinꞌ₅₄ jë₁ma₂të́₂ hora a₂guë́ꞌ₃.
46 ꞌE₂ guë́₄ dsen₃ ꞌéi₂ jë₁ma₂të́₂ rë₁jo₅₄ juɨg₅₄ jë₁ma₂guáinꞌ₅ jme₂ti₃ bá₄ ta₁ a₂chéinꞌ₅.
47 A₂dsɨ₂jóꞌ₃ juáꞌ₅ jniá₂, cuë₃ juɨg₅₄ ta₁ a₂nio₃ ne₅₄ ca₂le₃jë́₃ ꞌe₂ a₂cha₂ quióꞌ₅.
48 La₁ juaꞌ₅₄ meiꞌ₂ guë́₃ dsa₂ i₂jme₂ti₃ lɨ́in₅ jan₂ dsa₂ ꞌlɨnꞌ₅₄ i₂tsá₃ tónꞌ₂ juɨ₅ ta₁ a₂chéinꞌ₅, ia₁ lɨ́in₂, “i₂le₃ꞌɨn₄ bá₄ juɨg₃”,
49 jaun₂ jme₂lióg₃ qui₂cuë́ꞌ₅ bá₄ rɨinꞌ₅₄, dsó₂ qui₂dsɨ₂guë́ꞌ₃ qui₂dsɨ₂ꞌénꞌ₃ quianꞌ₅₄ dsa₂ ꞌen₅ në́₃.
50 La₁ caun₂ jmɨg₄ conꞌ₂ tsá₃ rë₂jáin₁, caun₂ hora conꞌ₂ tsá₃ líꞌ₄ bá₄, dsiánꞌ₄ juɨg₅₄.
51 Juɨg₅₄ në́₃ cuë₃ uɨg₅,e ꞌliogꞌ₃ ja₁jaun₂ bá₄ ján₃, ja₁ca₂tɨ́n₂ dsi₁len₅ i₂lë₁jmo₅-dsáu₅ o₁ne₁, ja₁quɨꞌ₂-ꞌo₃, qui₃quɨ́gꞌ₃ jan₅₄.