Jág₁ jángꞌ₅ léi₄ juɨ₁liaꞌ₂ guian₃ chiꞌ₂ dsa₂ mɨ₄
25
ꞌJmɨg₄ jaun₂ juɨ₁liaꞌ₂ ja₁gon₂ Diú₄, lé₂ juɨ₁liaꞌ₂ ca₂jmo₃ guian₃ chiꞌ₂ dsa₂ mɨ₄ jme₁ca₂can₃ nɨ₁tsɨ́₅ le₁guíꞌ₂ si₂ quióꞌ₅. Ca₂i₃léin₂ ca₂i₁jme₁jeinꞌ₂ dsa₂ ŋeꞌ₂ i₂jenꞌ₂ gu₂.
2 ꞌŊiá₂ chiꞌ₂ dsa₂ mɨ₄ ꞌéi₂ jme₁coin₅₄; ꞌŋiá₂ guëꞌ₂ i₂ꞌŋio₄, i₂dse₃ niog₅ dsi₄.
3 Dsa₂ mɨ₄ i₂co₄ ꞌéi₂ në́₃, jmáꞌ₃ nɨ₁tsɨ́₅ chi₁guíꞌ₂ si₂ bá₄ ca₂can₃; tsá₃ ca₂can₃ guëꞌ₂ nɨ₁dsɨg₁ a₂ꞌa₄ aceite.
4 La₁ dsa₂ mɨ₄ i₂niog₅ dse₃ dsi₄ në́₃ ca₂jmo₃ co₂jŋia₅₄ quióꞌ₅, jme₁le₁quian₅ nɨ₁tsɨ́₅ le₁guíꞌ₂ si₂, tonꞌ₂ jme₁le₁quian₅ rë₂tsón₂ aceite ꞌa₄ nɨ₁dsɨg₁.
5 La₁ ca₂rë₃ꞌɨn₄ bá₄ guëꞌ₂ dsa₂ ŋeꞌ₂ i₂lë₅ jág₁ jenꞌ₂ gu₂, jaun₂ le₃jɨ́n₃ bá₄ dsa₂ mɨ́₂ ꞌéi₂ në́₃ ca₂táꞌ₂ i₁güɨ́in₃, jaun₂ ca₂güɨin₂ bá₄.
6 Jaun₂ jme₁ca₂të́₂ dsi₃nei₅, ca₂néꞌ₂ tiá₂ i₁juáꞌ₄ dsa₂: “¡Në₅ jónꞌ₅ dsa₂ ŋeꞌ₂ i₂jenꞌ₂ gu₂! ¡ꞌUɨnꞌ₂ ꞌniaꞌ₂ o₂jme₁jeinꞌ₂!”
7 Jaun₂ qui₂ca₂nau₂ ca₂le₃jɨ́in₃, ca₂jmo₃ dse₃ mecha tsɨ́₅ quióꞌ₅.
8 Jaun₂ ca₂juáꞌ₂ dsa₂ mɨ́₂ i₂ꞌŋiá₂ i₂co₄ ꞌéi₂ ca₂tsɨ́ꞌ₃ rɨinꞌ₅₄ i₂ꞌŋio₄: “Cuë́ꞌ₁ ꞌniaꞌ₂ ca₂juɨg₄ aceite quiángꞌ₂, ia₁ ma₂i₁ei₃ si₂ tsɨ́₅ quián₂ jniaꞌ₅₄.”
9 La₁ ca₂ŋag₃ dsa₂ mɨ́₂ i₂ꞌŋio₄: “Jan₂ꞌón₄. Ia₁ conꞌ₂ tsá₃ ŋó₅ në₁juaꞌ₂ tsá₃ ca₂tɨ́nꞌ₂ quián₂ jniaꞌ₅₄ guio₅₄, on₃ guëꞌ₂ quiánꞌ₂ ꞌniaꞌ₂ tɨ́nꞌ₂ në́₃. Co₂ŋeiꞌ₅₄ guë́₄ dse₃ o₂nóꞌ₅ ꞌniaꞌ₂ guiongꞌ₅₄ o₂liá₃ quiángꞌ₂ ja₁ꞌnag₅ dsa₂.”
10 La₁ të₁liaꞌ₂ i₂lén₂ ꞌéi₂ i₂lia₅ aceite, të₃jë₄ jaun₂ ca₂guánꞌ₃ dsa₂ ŋeꞌ₂ i₂lë₅ jág₁ jenꞌ₂ gu₂. Dsa₂ mɨ́₂ i₂tiánꞌ₅ lë́₅ co₂jŋia₅₄ ca₂i₃toinꞌ₅₄ bá₄ co₂lë₅ quiongꞌ₅₄ i₁guëꞌ₂ ja₁niog₅ jmɨg₄ a₂jenꞌ₂ gu₂ dsa₂. Jaun₂ ca₂jnág₃ o₄ꞌné₄ jme₁ca₂jnág₃.
11 Jme₁co₂lág₂ jaun₂, o₃len₅ i₂ꞌŋiá₂ ꞌéi₂, jaun₂ ca₂tóinꞌ₂ ca₂të₃, ca₂juáꞌ₂: “¡Te₁guiꞌ₅₄, Te₁guiꞌ₅₄! ¡Nia₄ o₄ꞌné₄ jaun₂ tióꞌ₄ jniaꞌ₅₄!”
12 La₁ jaun₂ ca₂ŋag₃ dsa₂ ŋeꞌ₂: “A₂dsɨ₂jóꞌ₃ juáꞌ₅, tsá₃ cuɨ́ng₅ ꞌein₂ ꞌniaꞌ₂.”
13 ꞌJaun₂ le₂në₅, chanꞌ₂ ꞌniaꞌ₂ co₂jŋiagꞌ₅₄, ia₁ tsá₃ ŋiꞌ₅₄ ꞌniaꞌ₂ ꞌe₂ ꞌióꞌ₄, ꞌe₂ hora guanꞌ₂ Jaun₅* dsa₂ mɨ₂güɨ́g₃.
Jág₁ jángꞌ₅ léi₄ juɨ₁liaꞌ₂ ꞌa₂ liaꞌ₂ lë́₅ ca₂jmo₃ ún₂ dsa₂ quianꞌ₅₄ a₂ca₂dsia₃ juɨg₅₄ o₄gú₃
14 ꞌConꞌ₂ siáꞌ₂ lë́₅ ja₁gon₂ Diú₄ juɨ₁liaꞌ₂ jan₂ dsa₂ i₂ꞌen₅₄ juɨ₅ dsó₃ dsɨ₃ŋɨ́₃ uɨ́ng₂ juɨg₂ siáꞌ₂. Jaun₂ ca₂të́ꞌ₃ dsa₂ i₂jme₁jme₂ti₃ ta₁ ne₅₄, jaun₂ o₄gú₃ ꞌéi₂ ca₂dsia₃ cu₄.
15 Jan₂ i₂ca₂cuë́ꞌ₃ ꞌŋiá₂ mei₅ ꞌéiꞌ₃ cu₄ talentos*; jan₂ guëꞌ₂ i₂ca₂cuë́ꞌ₃ tɨn₃ mei₅, jan₂ guëꞌ₂ caun₂ mei₅. Ca₂cuë́ꞌ₃ le₂jan₂ dsa₂ ꞌéi₂ ꞌa₂ conꞌ₂ jŋiaꞌ₅₄ quɨꞌ₅₄ jmɨg₄. Jaun₂ guë́₄ ŋó₃ i₁ŋɨ́₃.
16 Dsa₂ i₂ca₂gue₃ ꞌŋiá₂ mei₅ ꞌéiꞌ₃ cu₄ në́₃, ca₂jmóiꞌ₂ ta₁ cu₄ jaun₂, jaun₂ ca₂lɨ́ꞌ₃ conꞌ₂ guë́₄ ꞌŋiá₂ mei₅ jmáꞌ₃ a₂dsɨ́₂.
17 Ján₃ bá₄ le₂jaun₂ ca₂jmo₃ i₂ca₂gue₃ tɨn₃ mei₅, ca₂lɨ́ꞌ₃ conꞌ₂ guë́₄ tɨn₃ mei₅ táng₃ a₂të₁dsɨ₅₄.
18 La₁ dsa₂ i₂ca₂gue₃ caun₂ mei₅ në́₃, ca₂ꞌma₃ bá₄ a₂caun₂ mei₅ a₂ca₂cuë₃ juɨg₅₄, ca₂i₁ꞌó₄ néꞌ₃ ꞌuë₃.
19 ꞌUë́₂ lɨn₃ bá₄ i₁ŋɨ₂ juɨg₅₄ në́₃; la₁ ca₂guáinꞌ₃ jme₁ca₂guáinꞌ₃ cang₂. Jaun₂ ca₂cáun₃ ꞌí₁ ca₂cheinꞌ₃ cuentas quióꞌ₅ dsa₂ i₂jme₂ti₃ i₂ca₂cuë́ꞌ₃ cu₄.
20 Jaun₂ ca₂dsióg₃ i₂le₂ꞌuɨg₅₄ i₂ca₂gue₃ ꞌŋiá₂ mei₅, jaun₂ ca₂jɨ́inꞌ₂ juɨg₅₄ conꞌ₂ guë́₄ ꞌŋiá₂ mei₅ a₂të₁dsɨ₅₄ a₂ca₂lɨ́ꞌ₃, jaun₂ juáꞌ₂ tsɨ́ꞌ₃ juɨg₅₄: “Te₁guiꞌ₅₄, ca₂cuëꞌ₅₄ ꞌne₂ ꞌŋiá₂ mei₅; jag₄, la₂ ron₅ conꞌ₂ guë́₄ ꞌŋiá₂ mei₅ táng₃ a₂ca₂lág₃.”
21 Jaun₂ ca₂juáꞌ₂ juɨg₅₄: “ꞌŊio₅ dse₃ ca₂jmoꞌ₅₄. Lɨ́ngꞌ₅ bá₄ jan₂ dsa₂ dsen₃ i₂ca₂rë₃tiꞌ₅₄; ca₂rë₃tengꞌ₅₄ bá₄ quianꞌ₅₄ a₂ca₂juɨg₄ a₂ca₂dsia₃ jniá₂ gogꞌ₂, në₃ në́₃ ꞌlióng₂ guë́₄ a₂dsia₅₄ jniá₂ gogꞌ₂. ꞌÚ₅ dsi₂néi₂, o₁quián₁ o₂ꞌŋió₃ dsɨ₅ co₂dsia₅.”
22 Jme₁co₂lág₂ jaun₂ ca₂dsióg₃ i₂ca₂gue₃ tɨn₃ mei₅, jaun₂ ca₂juáꞌ₂: “Te₁guiꞌ₅₄, ca₂cuëꞌ₅₄ ꞌne₂ tɨn₃ mei₅; jag₄, la₂ ron₅ conꞌ₂ guë́₄ tɨn₃ mei₅ táng₃ a₂ca₂lág₃.”
23 Jaun₂ ca₂juáꞌ₂ juɨg₅₄, “ꞌŊio₅ dse₃ ca₂jmoꞌ₅₄. Lɨ́ngꞌ₅ bá₄ jan₂ dsa₂ dsen₃ i₂ca₂rë₃tiꞌ₅₄; ca₂rë₃tengꞌ₅₄ bá₄ quianꞌ₅₄ a₂ca₂juɨg₄ a₂ca₂dsia₃ jniá₂ gogꞌ₂, në₃ në́₃ ꞌlióng₂ guë́₄ a₂dsia₅₄ jniá₂ gogꞌ₂. ꞌÚ₅ dsi₂néi₂, o₁quián₁ o₂ꞌŋió₃ dsɨ₅ co₂dsia₅.”
24 ꞌLa₁ jme₁ca₂dsióg₃ i₂ca₂gue₃ caun₂ mei₅, ca₂juáꞌ₂ tsɨ́ꞌ₅ juɨg₅₄: “Te₁guiꞌ₅₄, guion₄ jniá₂ a₂lɨ́ngꞌ₅ jan₂ dsa₂ i₂tsá₃ ꞌe₂ ŋéi₂ dsɨ́₅, ꞌaunꞌ₂ ja₁tsá₃ ꞌe₂ ca₂jŋíꞌ₂, tonꞌ₂ cagꞌ₅₄ ja₁tsá₃ ꞌe₂ ca₂séiꞌ₃.
25 ꞌUɨg₅₄ jaun₂ ca₂rë₃gó₅ jniá₂, ca₂i₁ꞌó₄ bá₄ jniá₂ cu₄ quiángꞌ₂ néꞌ₃ ꞌuë₃. La₁, la₂ bá₄ ron₅ quiángꞌ₂.”
26 Jaun₂ ca₂ŋag₃ juɨg₅₄: “¡Dsa₂ ꞌlɨnꞌ₅₄ juɨ́ꞌ₅! ꞌAn₁, ŋiꞌ₅₄ bá₄ jaun₂ në́₃ a₂ꞌon₂₃ ja₁tsá₃ ꞌe₂ ca₂jan₃, tonꞌ₂ cagꞌ₅₄ ja₁tsá₃ ꞌe₂ ca₂séi₃.
27 ꞌUɨg₅₄ jaun₂, juaꞌ₅₄ banco bá₄ co₂ŋeiꞌ₅₄ ca₂i₁tioꞌ₂ cu₄ quió₃, ia₁jaun₂ jme₁guéiꞌ₄ cu₄ quió₃ jë₁ma₂guángꞌ₃ liaꞌ₂ jma₃quianꞌ₅₄ a₂të₁dsɨ₅₄.
28 Jŋiáꞌ₃ ꞌniaꞌ₂ a₂caun₂ mei₅ chanꞌ₂ i₂në₅ jaun₂ në́₃, o₂cuëꞌ₅₄ i₂chanꞌ₂ guia₃ mei₅.
29 Ia₁ juɨ₁liaꞌ₂ i₂ma₂le₁ꞌio₅ ꞌlióng₂, të₂le₃ ꞌlióng₂ guë́₄ ŋei₂ bá₄, ia₁jaun₂ le₃cha₂ quióꞌ₅ liaꞌ₂ qui₂rë₂tsón₂; la₁ juɨ₁liaꞌ₂ i₂tsá₃ ꞌe₂ le₁ꞌio₅, le₂jiog₅ a₂ca₂juɨg₄ a₂ma₂le₁ꞌio₂₃, co₂dsia₅ jŋiaꞌ₃ bá₄.
30 Jaun₂ dsa₂ i₂tsá₃ ta₁ tén₄ la₂, dsein₅₄ ca₁ꞌné₄ tioinꞌ₂ ꞌniaꞌ₂ jë₄ qui₁néꞌ₃, ja₁quɨꞌ₂-ꞌo₃ quɨ́gꞌ₃ jan₅₄ në́₃.”
Jë₁ma₂të́₂ rë₁të₃dsɨ₅₄ ꞌéiꞌ₃ ja₁con₂ dsa₂ mɨ₂güɨ́g₃.
31 ꞌJë₁ma₂të́₂ rë₁guanꞌ₂ Jaun₅ dsa₂ mɨ₂güɨ́g₃ a₂lɨ́in₅ rag₅₄ jlánꞌ₁ lɨn₃, a₂qui₂le₁lio₃ ángeles quiáin₅, jaun₂ guë́₄ guá₃ ne₄ta₁ quióꞌ₅ a₂ꞌuainꞌ₂ lɨn₃,
32 jaun₂ ŋɨꞌ₂ ne₅₄ ca₂le₃jɨ́n₃ dsa₂ chan₂ juɨg₂ ca₂le₂con₂ mɨ₂güɨ́g₃. Jaun₂ guë́₄ në́₃ jmo₃ jma₃quén₅ conꞌ₂ ca₂tɨ́n₂ le₂jan₂ le₂jan₂ dsa₂ quianꞌ₅₄ rɨinꞌ₅₄, juɨ₁liaꞌ₂ jmo₅ dsa₂ i₂jmo₅ ꞌí₁ jáꞌ₂ chaꞌ₂, jmo₂₃ jma₃quén₅ jáꞌ₂ chaꞌ₂ quianꞌ₅₄ chein₄ lau₂.
33 Të₂le₃ gu₂ ne₁ quióꞌ₅, cheinꞌ₃ jáꞌ₂ chaꞌ₂; chein₄ lau₂ guëꞌ₂ të₂le₃ gu₂ jen₅.
34 Jaun₂ në́₃, juáꞌ₂ Rag₅₄ tsɨ́ꞌ₅ i₂tión₂ të₂le₃ gu₂ ne₁: “I₂noꞌ₄ ꞌniaꞌ₂ i₂ma₂rë₂gonꞌ₅₄ quián₅ Ŋeꞌ₃; gue₄ ꞌniaꞌ₂ a₂ca₂tɨ́ngꞌ₂ ja₁gon₂ Diú₄, ja₁ma₂lë́₅ co₂jŋia₅₄ quiánꞌ₂ ꞌniaꞌ₂ ca₂le₃ ca₂nio₃ mɨ₂güɨ́g₃.
35 Ia₁ ca₂ŋɨ₃ jniá₂ ꞌong₅₄, ꞌniaꞌ₂ bá₄ i₂ca₂cuëꞌ₅₄ a₂ca₂guëꞌ₃; ca₂ŋɨ₃ a₂rë₂quein₂ dsɨ₃ i₁guɨꞌ₄ jmɨg₂, ꞌniaꞌ₂ bá₄ i₂ca₂cuëꞌ₅₄ jmɨg₂ ca₂guɨꞌ₃; ca₂ŋɨ₃ jniá₂ ꞌno₂₃ ja₁jan₁₂, ꞌniaꞌ₂ bá₄ i₂ca₂cuëꞌ₅₄ dsi₂néi₂ quiángꞌ₂ ca₂jan₅₄.
36 Ca₂ŋɨ₃ jniá₂ ꞌɨn₂ tsɨ́nꞌ₅, ꞌniaꞌ₂ bá₄ i₂ca₂cuëꞌ₅₄ tsɨ́nꞌ₅ ca₂quɨ́ꞌ₃; ca₂tsán₂ dsong₅₄, ꞌniaꞌ₂ bá₄ i₂ca₂jmoꞌ₅₄ ꞌí₁; ca₂i₁ꞌú₄ néꞌ₃ ꞌmá₃, ca₂i₁jagꞌ₄ bá₄ ꞌniaꞌ₂.”
37 Jaun₂ në́₃, ŋag₃ dsa₂ dsen₃ ꞌéi₂: “Te₁guiꞌ₅₄, ¿lɨ́gꞌ₂ bá₄ jaun₂ ca₂né₄ jniaꞌ₅₄ ꞌne₂ a₂ŋɨꞌ₂ i₁cuangꞌ₃ jaun₂ ca₂cuë́₁ jniaꞌ₅₄ a₂ca₂quéꞌ₂? ¿O₃ lɨ́gꞌ₂ jaun₂ ca₂né₄ jniaꞌ₅₄ ꞌne₂ a₂ŋɨꞌ₂ rë₂quein₂ ꞌauꞌ₂, jaun₂ ca₂cuë́₁ jniaꞌ₅₄ jmɨg₂ ca₂ꞌénꞌ₂?
38 ¿O₃ lɨ́gꞌ₂ jaun₂ ca₂né₄ jniaꞌ₅₄ ꞌne₂ a₂ŋɨꞌ₂ ꞌnáuꞌ₂ ja₁janꞌ₄, jaun₂ jniaꞌ₅₄ bá₄ ca₂cuë́₁ dsi₂néi₂ ca₂jŋiaꞌ₅₄, o₃ ca₂ŋɨꞌ₅₄ ꞌɨn₂ tsɨ́nꞌ₂, jaun₂ jniaꞌ₅₄ bá₄ ca₂cuë́₁?
39 ¿O₃ lɨ́gꞌ₂ jaun₂ ca₂né₄ jniaꞌ₅₄ ꞌne₂ a₂rongꞌ₂ dsongꞌ₅₄ o₃ liaꞌ₂ conꞌ₂ ca₂ꞌúꞌ₃ néꞌ₃ ꞌmá₃, jaun₂ ca₂i₁jag₅₄ jniaꞌ₅₄?”
40 Jaun₂ në́₃, ŋag₃ Rag₅₄: “A₂dsɨ₂jóꞌ₃ juáꞌ₅ jniá₂, ca₂le₃jë́₃ a₂dse₃ a₂ꞌua₁ ꞌauꞌ₂ ꞌniaꞌ₂ ca₂jmoꞌ₅₄ ja₁con₂ le₂jan₂ le₂jan₂ rɨ́ngꞌ₃ la₂ i₂jɨ́n₂ dsa₂ mɨ₂güɨ́g₃ ꞌuɨn₃, o₄quió₃ jniá₂ bá₄ a₂ca₂jmoꞌ₅₄ ꞌniaꞌ₂.”
41 ꞌJaun₂ juáꞌ₂ táng₃ Rag₅₄ tsɨ́ꞌ₃ i₂tión₂ të₂le₃ gu₂ jen₅: “Jŋiaꞌ₃ ꞌniaꞌ₂ ja₁con₂ jniá₂, ꞌniaꞌ₂ i₂tiongꞌ₅₄ ꞌéiꞌ₃ o₁nógꞌ₅ dsi₂si₂ ja₁tsá₃ ton₅ jmɨg₄ éi₃, ja₁lë́₄ co₂jŋia₅₄ quióꞌ₅ i₂së₃dsen₃ quianꞌ₅₄ ángeles quiáin₅.
42 Ia₁ ca₂ŋɨ₃ jniá₂ i₁cón₅, ꞌniaꞌ₂ në́₃ tsá₃ ꞌe₂ ca₂cuëꞌ₅₄ a₂guëꞌ₅₄; ca₂ŋɨ₃ rë₂quein₂ dsɨ₃ i₁guɨꞌ₄ jmɨg₂, tsá₃ ꞌe₂ jmɨg₂ ca₂cuëꞌ₅₄ ꞌniaꞌ₂.
43 Ca₂ŋɨ₃ jniá₂ ꞌno₂₃ ja₁jan₁₂, tsá₃ ja₁ca₂cuëꞌ₅₄ ꞌniaꞌ₂ jan₅₄. Ca₂ŋɨ₃ ꞌɨn₂ tsɨ́nꞌ₅, tsá₃ ꞌe₂ tsɨ́nꞌ₅ ca₂cuëꞌ₅₄ ꞌniaꞌ₂. Ca₂tsán₂ dsong₅₄, jme₁ca₂ꞌú₃ néꞌ₃ ꞌmá₃ në́₃, tsá₃ ca₂i₁jagꞌ₄ ꞌniaꞌ₂.”
44 Jaun₂ në́₃, ŋag₃ dsa₂ ꞌéi₂: “Te₁guiꞌ₅₄, ¿lɨ́gꞌ₂ bá₄ jaun₂ ca₂né₄ jniaꞌ₅₄ ꞌne₂ a₂ŋɨꞌ₂ i₁cuangꞌ₃, o₃ rë₂quein₂ ꞌauꞌ₂ o₃ ca₂ŋɨꞌ₅₄ ꞌnáuꞌ₂ ja₁janꞌ₄, o₃ ca₂ŋɨꞌ₅₄ tsá₃ tsɨ́nꞌ₂ cha₂ quɨꞌ₅₄, o₃ jme₁ca₂rë₃dsongꞌ₅₄, o₃ liaꞌ₂ conꞌ₂ ca₂ꞌúꞌ₃ néꞌ₃ ꞌmá₃, tsá₃ ca₂jme₁ꞌo₁ jniaꞌ₅₄?”
45 Jaun₂ ŋag₃ Rag₅₄: “A₂dsɨ₂jóꞌ₃ juáꞌ₅ jniá₂, ca₂le₃jë́₃ a₂dse₃ a₂tsá₃ ca₂jmoꞌ₅₄ ꞌniaꞌ₂ ja₁con₂ le₂jan₂ le₂jan₂ rɨ́ngꞌ₃ la₂ i₂jɨ́n₂ dsa₂ mɨ₂güɨ́g₃ ꞌuɨn₃, o₄quió₃ jniá₂ bá₄ tsá₃ ꞌe₂ ca₂jmoꞌ₅₄ ꞌniaꞌ₂.”
46 Jaun₂ dsa₂ ꞌéi₂ dsɨ₃léin₂ ja₁dsɨ₃ŋag₅₄ uɨg₅ co₂tan₅₄, la₁ dsa₂ dsen₃ në́₃, dsɨ₃lein₅ ja₁le₃chain₂ co₂tan₅₄.