Ca₂caun₃ i₂së₃dsen₃ táu₂ quió₅ Jesús
4
Jaun₂ Jesús në́₃, ma₂rë₂rɨin₅ Jme₂dsí₂ Jŋió₅, ca₂o₃ꞌɨ́in₃ Cuá₃ Jordán. Ca₂jiog₃ Jme₂dsí₂ caun₂ ꞌuë₃ quein₂ co₂ꞌŋiog₅.
San Lucas 4:1-30
2 Ja₁jaun₂ ca₂i₁ꞌi₅ të₂láu₃ jmɨg₄, ia₁jaun₂ cáun₂ táu₂ i₂së₃dsen₃. Tsá₃ ꞌe₂ ca₂guë́ꞌ₃ ꞌi₁ca₂juɨg₄ të₁liaꞌ₂ jmɨg₄ jaun₂. Jme₁ca₂dsan₃ jaun₂, jaun₂ guë́₄ ma₂i₁cónꞌ₅ ꞌŋio₅ lɨn₃.
3 Jaun₂ ca₂juáꞌ₂ i₂së₃dsen₃:
―Chi₂juaꞌ₂ dsónꞌ₂ lɨ́ngꞌ₅ Ja₁ŋiꞌ₅₄ Diú₄, jmo₄ juɨ₁le₅₄ i₁ŋíꞌ₄ nɨ₁cang₁ në₅.
4 Jaun₂ ca₂ŋag₃ Jesús:
―Chi₁ton₅ ne₄ Si₂: “On₃juaꞌ₅₄ jmáꞌ₃ quianꞌ₅₄ i₁ŋíꞌ₄ le₃tan₅₄ dsa₂ mɨ₂güɨ́g₃ le₃chain₂.”a , b
5 Jaun₂ ca₂jiog₃ táng₃ i₂së₃dsen₃ caun₂ máꞌ₂ ja₁ŋei₅. Ja₁jaun₂ ca₂ꞌë₃ ca₂tiá₂ tei₄ ca₂le₃jë́₃ juɨg₂ te₁ꞌi₁ guaꞌ₅₄ ꞌuë₃.
6 Jaun₂ ca₂juáꞌ₂:
―Gogꞌ₂ ꞌne₂ bá₄ dsia₅₄ jniá₂ ca₂le₃jë́₃ juɨg₂ në₅; ꞌne₂ bá₄ gongꞌ₂ lé₂, ꞌóꞌ₄ bí₂, qui₂jme₃juagꞌ₂ dsa₂. Ia₁ a₂niog₅ ne₃ jniá₂ bá₄ në₅, tonꞌ₂ lé₂ le₃cuë́₄ jniá₂ ꞌein₂ ꞌnio₃ cuë́₄.
7 Jaun₂ a₂lé₂ quiángꞌ₂ në₁juaꞌ₂ ca₂chi₁jneꞌ₄ ne₃ jme₁juagꞌ₂.
8 Jaun₂ ca₂ŋag₃ Jesús:
―Ne₄ Si₂c quióꞌ₅ Diú₄ chi₁ton₅: “Jme₁gan₃ ꞌniaꞌ₂ Te₁guiꞌ₅₄ Diú₄ quiángꞌ₂; ne₄ jan₂ ꞌéi₂ bá₄ ca₂tɨ́nꞌ₂ ꞌniaꞌ₂ jme₁tiꞌ₄.”d
9 Cang₂ jaun₂ ca₂jiog₃ táng₃ i₂së₃dsen₃ juɨg₂ Jerusalén, jaun₂ ca₂i₁cheiꞌ₂ caun₂ ja₁lë́₄ ja₁ŋei₅ guë́₄ ne₄ nɨ₁ꞌiaꞌ₂ guáꞌ₅ templo*, jaun₂ ca₂juáꞌ₂:
Dsiog₃ Diú₄ o₄gú₃ ángeles quiáin₅,
jaun₂ jmo₃ ꞌí₁;
11 guéiꞌ₂ quianꞌ₅₄ gu₂
ia₁jaun₂ tsá₃ jéngꞌ₂ uɨg₅ niógꞌ₃ nɨ₁cang₁.e
12 Jaun₂ ca₂ŋag₃ Jesús:
―Ján₃ bá₄ juáꞌ₂ ne₄ si₂: “Tsá₃ tangꞌ₅₄ Te₁guiꞌ₅₄ Diú₄ quiángꞌ₂.”f
13 Jme₁ca₂dsan₃ ca₂le₃jë́₃ a₂niog₅ ca₂juáꞌ₂ i₂së₃dsen₃ a₂cáun₂ táu₂ jaun₂, jaun₂ ca₂i₃uɨ́in₂ co₂ꞌna₂, në₁juaꞌ₂ lɨ́gꞌ₂ ca₂cuɨn₃ táng₃ jmɨg₄.
Ca₂jme₃lióg₃ Jesús ca₂jme₃tag₂₃ ꞌuë₃ Galilea
14 Ca₂ŋáꞌ₃ táng₃ Jesús juɨ₅ ꞌuë₃ Galilea rë₂canꞌ₂ Jme₂dsí₂ Jŋió₅ të₂dsɨ́₅. Le₂con₂ juɨg₂ te₁ꞌi₁ ma₂quián₅ jaun₂, ca₂i₃ꞌag₅₄ jág₁ ꞌag₅ dsa₂.
15 Ca₂i₁jme₁tɨin₂₃ dsa₂ le₂tan₅₄ guáꞌ₅ sinagogas* quióꞌ₅ dsa₂, jaun₂ ca₂le₃jɨ́n₃ bá₄ dsa₂ jme₁jme₂juagꞌ₂.
Dsiáinꞌ₃ táng₃ juɨg₂ Nazaret
16 Jaun₂ ca₂ŋáiꞌ₃ juɨ₅ Nazaret, ja₁ca₂i₃juɨinꞌ₂. Caun₂ jmɨg₄ sa₅₄* ca₂ꞌí₃ dsi₂néi₂ guáꞌ₅ sinagoga, ia₁ le₂jaun₂ tɨin₂. Jaun₂ ca₂nau₂ a₂ꞌɨ₃ Si₂.
17 Jaun₂ ca₂cuë₃ dsa₂ si₂ rë₂bɨn₅ quióꞌ₅ Isaías i₂jme₁ꞌë́₂ jág₁ o₄quióꞌ₄ Diú₄. Jme₁ma₂në₂néiꞌ₃ si₂, jaun₂ ca₂dsóꞌ₂ ja₁chi₁ton₅ le₂la₂:
18 Dsɨ́n₂ Jme₂dsí₂ quián₅ Te₁guiꞌ₅₄ ne₄ quió₃,
ia₁ ma₂ca₂ꞌag₃ jniá₂
a₂i₁ꞌë́₃ jág₁ dse₃ jɨn₄ dsa₂ dsɨ₂ŋé₂.
Ca₂chei₃ a₂i₁ꞌë́₃ jág₁ a₂lión₂ dsa₂ i₂qui₂le₁jnɨ́₅,
tonꞌ₂ ján₃ guëꞌ₂ jmo₅₄ jnia₅₄ jme₁ne₁ dsa₂ i₂ten₄;
qui₁long₁₂ dsa₂ i₂qui₂dsɨ₂ŋɨ́₂ uɨg₅ qui₂jmógꞌ₂ dsa₂;
19 a₂ꞌë́₄ jmɨg₄ dse₃ a₂lió₂ Te₁guiꞌ₅₄.g
20 Jaun₂ ca₂bɨ́in₂ táng₃ si₂; ca₂jɨ́inꞌ₃ dsa₂ i₂jme₂ꞌo₅₄, jaun₂ ca₂guá₂ táng₃. Ia₁ jaun₂ bá₄ tionꞌ₅₄ dsa₂ ca₂le₃jɨ́in₃ le₁ŋɨiꞌ₂, jág₂.
21 Jaun₂ ca₂jme₃lióg₃ Jesús ca₂juáꞌ₂:
―Jmɨg₄ në₃ ca₂të́₂ neꞌ₅₄ ꞌniaꞌ₂ ca₂rë₃ti₃ a₂juáꞌ₂ Si₂ në₅.
22 Ca₂le₃jɨ́n₃ bá₄ dsa₂ ꞌɨin₂₃ dse₃ Jesús, dsɨ₂góꞌ₃ dsɨ́₅ ca₂le₃jë́₃ jág₁ jláꞌ₁ a₂ꞌuëꞌ₂ ꞌo₅₄. Jaun₂ qui₂ca₂ŋɨ́iꞌ₃ rɨinꞌ₅₄:
―¿On₁juaꞌ₅₄ i₂në₅ ꞌéi₂ i₂lɨ́n₅ ja₁ŋiꞌ₅₄ Së́₄?
23 Jaun₂ ca₂juáꞌ₂ Jesús:
―A₂dsɨ₂jóꞌ₃ já₅ jmɨg₄ le₃juaꞌ₅₄ ꞌniaꞌ₂ juɨgꞌ₅₄ jniá₂ quio₃h la₂: “ꞌNe₂ të₅mɨ́₅ jmaꞌ₅₄ mɨ́₅ ꞌŋiagꞌ₂.” Le₃juaꞌ₅₄ ꞌniaꞌ₂ në́₃: “A₂ca₂rë₃ne₄ jniaꞌ₅₄ a₂ca₂jmoꞌ₅₄ Capernaum, ma₂në₃ jmo₄ ja₁lá₃ goꞌ₅₄ ján₃.”
24 Caun₂ ca₂juáꞌ₂ bá₄:
―A₂të₃dsónꞌ₂ juáꞌ₅ jniá₂ juɨ́g₂ ꞌniaꞌ₂, ꞌi₁jan₂ dsa₂ i₂ꞌë́₂ jág₁ quián₅ Diú₄, tsá₃ a₁jaun₂ juaꞌ₅₄ a₂guei₃ dsa₂ dse₃ go₅₄.
25 Tí₅ bá₄ jág₁ quió₃ a₂juáꞌ₅ la₂, juɨn₅ dsa₂ mɨ́₂ ꞌnág₂ i₂jme₁chan₂ Israel jmɨg₄ liaꞌ₂ conꞌ₂ jme₁chan₂ Elías i₂jme₁ꞌë́₂ jág₁ o₄quióꞌ₄ Diú₄, liaꞌ₂ conꞌ₂ ca₂rë₃ꞌɨ́n₃ ꞌŋio₅ lɨn₃ a₂guë́ꞌ₃ dsa₂ ta₁caun₂ juɨg₂ nación, ia₁ tsá₃ ma₃jmɨ́₅ ca₂tang₂ ꞌnɨ₅ ŋi₂ të₂ ca₂dsio₄.
26 La₁ ca₂liaꞌ₂ quióꞌ₅ ꞌi₁jan₂ ꞌio₅₄ ꞌnág₂ i₂jme₁chan₂ Israel, tsá₃ ca₂ŋe₄ Elías, jŋiaꞌ₅₄ liaꞌ₂ quióꞌ₅ jan₂ i₁náu₃ i₂jme₁guá₄ Sareptai a₂niog₅ quián₅ ciudad Sidón bá₄.
27 Ján₃ bá₄ le₂jaun₂ jme₁chan₂ juɨn₅ dsa₂ i₂jme₁lɨ́n₄ ꞌméꞌ₅ ꞌiog₅ juɨg₂ Israel, liaꞌ₂ conꞌ₂ jmɨg₄ ca₂ŋɨ₃ Eliseo i₂jme₁ꞌë́₂ jág₁ o₄quióꞌ₄ Diú₄ ján₃. La₁ ca₂liaꞌ₂ ꞌi₁jan₂ i₂ꞌéi₂ tsá₃ ca₂ꞌlón₂, jŋiaꞌ₅₄ liaꞌ₂ jan₂ i₂jme₁chen₂ Naꞌamánj i₂jme₁chan₂ ꞌuë₃ Siria bá₄.
28 Jme₁ca₂nág₂ dsa₂ jág₁ në₅, ca₂le₃jɨ́n₃ conꞌ₂ i₂tionꞌ₅₄ guáꞌ₅ sinagoga ca₂rë₃ꞌnéi₃ ꞌlɨgꞌ₅₄.
29 Qui₂ca₂nau₂ tioinꞌ₅₄, ca₂dsei₂₃ juɨg₂, ca₂i₃léin₂ le₁jiog₂₃ ca₂të₂ ne₄ máꞌ₂ ja₁lë́₄ nɨ₁ꞌlau₂ dsioꞌ₅₄ juɨg₂, ia₁ a₂jme₁dsɨ₂jiog₅ dsɨ́₅ jme₁tón₂ ja₁jaun₂.
30 La₁ conꞌ₂ ca₂ŋɨ₅ bá₄ ꞌéi₂ jë₄ quióꞌ₅, ca₂lóin₂ ŋáiꞌ₅.
Jan₂ dsa₂ i₂jme₁ꞌen₅₄ jme₂dsí₂ ꞌlɨnꞌ₅₄
31 Jaun₂ ca₂ŋó₃ Jesús juɨg₂ Capernaum, caun₂ juɨg₂ tén₅ ꞌuë₃ Galilea. Ja₁jaun₂ ca₂jme₃tɨin₂₃ dsa₂ jme₁jmɨg₄ sa₅₄.
San Lucas 4:31-44
32 ꞌŊio₅ lɨn₃ dsɨ₂góꞌ₃ dsɨ́₅ dsa₂ quianꞌ₅₄ jág₁ quióꞌ₅, ia₁ a₂ꞌio₂₃ ꞌéiꞌ₃ dsónꞌ₂ bá₄ a₂jme₂tag₂₃.
33 Dsi₂néi₂ guáꞌ₅ sinagoga ja₁tioinꞌ₅₄ jaun₂, jme₁ꞌen₅₄ jan₂ dsa₂ i₂ꞌen₅₄ jme₂dsí₂ je₂naꞌ₅₄ të₂dsɨ́₅. Jaun₂ ca₂guióꞌ₃ ꞌéi₂, ca₂juáꞌ₂:
34 ―¡ꞌNe₂ në́₃! ¿ꞌE₂ lë₃ tiángꞌ₅ jë₄ quián₂ jniaꞌ₅₄, ꞌne₂ Jesús Nazareno?k ¿A₂i₃ꞌéinꞌ₃ jniaꞌ₅₄ bá₄ ꞌne₂ ŋeꞌ₃? Guion₄ jniá₂ ꞌein₂ lɨ́ngꞌ₅: ꞌne₂ lɨ́ngꞌ₅ I₂jŋió₅ quián₅ Diú₄.
35 Jaun₂ ca₂jí₂ Jesús, ca₂juáꞌ₂:
―¡Tei₄ jmo₄; tén₃ dsa₂ në₅!
Jaun₂ je₂naꞌ₅₄ në́₃, ca₂tón₂ ꞌuë₃ të₃ jág₅ ca₂le₃jɨ́n₃, jaun₂ guë́₄ ca₂o₃ꞌɨ́in₃, la₁ tsá₃ ꞌe₂ uɨg₅ ca₂jmógꞌ₂.
36 Jaun₂ ca₂ja₃góꞌ₃ dsɨ́₅ ca₂le₃jɨ́n₃, jaun₂ ca₂dsia₃ jág₁ jɨn₄ rɨinꞌ₅₄, ca₂juáꞌ₂:
―¿ꞌE₂ bá₄ jág₁ në₅? I₂në₅ ꞌio₂₃ bí₂ jmo₂₃ ꞌéiꞌ₃ liaꞌ₂ ma₂ꞌuɨn₂ bá₄ jme₂dsí₂ ꞌlɨnꞌ₅₄ jë₁ma₂ca₂juáꞌ₂.
37 A₂jaun₂ në́₃, ca₂i₃ꞌag₅₄ jág₁ le₂con₂ juɨg₂ te₁ꞌi₁ ma₂quián₅ jaun₂.
Ca₂jme₃ꞌlión₂ Jesús ma₂chog₅₄ Si₂mu₅₄ Pe₄
38 A₂ca₂o₃ꞌɨ́n₃ Jesús guáꞌ₅ sinagoga jaun₂, ca₂ŋó₃ ja₁quióꞌ₄ Si₂mu₅₄. Ja₁jaun₂ jme₁rë₂quian₅ ma₂chog₅₄ ꞌéi₂ dsoꞌ₅₄ ꞌi₄ dséi₂ ꞌŋio₅ lɨn₃. Jaun₂ ca₂mɨ₃ dsa₂ ne₅₄ o₄quióꞌ₄ dsa₂ dsoꞌ₅₄.
39 Jaun₂ ca₂jme₃quiáin₃ cau₅ quióꞌ₅ dsa₂ dsoꞌ₅₄, ca₂jéin₂ dso₄ dséi₂. Jaun₂ ca₂o₃ꞌág₃ dséi₂. Dsɨ₂juɨ₅ le₂jaun₂ bá₄ ca₂nau₂ dsa₂ i₂jme₁dsoꞌ₅₄, ca₂jme₃ti₃ ne₄ dsa₂ i₂tionꞌ₅₄.
Ca₂jme₃ꞌlión₂ Jesús juɨn₅ dsa₂ dsoꞌ₅₄
40 Të₂le₃ ca₂nei₂ jmɨg₄ jaun₂, ca₂le₃jɨ́n₃ dsa₂ i₂chan₂ dsa₂ dsoꞌ₅₄ quián₅ juɨ₁ꞌe₂ guë́₃ dso₄ lɨ́in₅, ca₂o₃jiog₃ dsa₂ ne₅₄. Jaun₂ qui₂ca₂téin₂ gu₂ le₂jan₂ le₂jan₂ dsa₂ dsoꞌ₅₄, ca₂jme₃ꞌlió₂.
41 Juɨn₅ bá₄ jme₂dsí₂ je₂naꞌ₅₄ qui₂ca₂ꞌuɨ́inꞌ₂ quióꞌ₅ dsa₂, qui₂guióꞌ₅ juáꞌ₂:
―¡ꞌNe₂ lɨ́ngꞌ₅ Ja₁ŋiꞌ₅₄ Diú₄!
La₁ Jesús në́₃, ca₂jí₂ bá₄, tsá₃ ca₂cuë₃ jmɨg₄ juaꞌ₅₄ a₂juáꞌ₂ guë́₄, ia₁ a₂ŋi₅ rë₂ bá₄ je₂naꞌ₅₄ a₂lɨ́n₅ ꞌéi₂ I₂rë₂ꞌɨ́n₁* quián₅ Diú₄.
Ca₂ton₃ Jesús jág₁ ꞌuë₃ Galilea
42 Jme₁jnia₃ jaun₂, ca₂o₃ꞌɨ́n₃ Jesús ŋó₃ caun₂ ja₁lë́₄ co₂ꞌŋiog₅. La₁ ca₂le₃jɨ́n₃ dsa₂ ca₂i₁nioi₁₂ ca₂ꞌnauꞌ₂. Jaun₂ në́₃ jme₁ca₂dsáuꞌ₂, jme₁jnéi₂ juɨ₅ tsá₃ jme₁cuë₂₃ jmɨg₄ dsáinꞌ₃.
43 Jaun₂ ca₂juáꞌ₂ Jesús:
―Ca₂tɨ́n₂ jniá₂ qui₂i₁ꞌë́₃ jág₁ juɨ₁liaꞌ₂ ja₁gon₂ Diú₄, le₂tan₅₄ juɨg₂ ja₁siáꞌ₂, ia₁ ta₁ në₅ chen₄ bá₄ jniá₂ guio₃.
44 Jaun₂ le₂në₅ bá₄ ca₂ŋɨ₃ Jesús ca₂ꞌë́₂ jág₁ le₂con₂ guáꞌ₅ sinagogas a₂te₁ꞌi₁ ja₁tén₄ Judea.l