Ca₂jmo₃ Jesús ca₂jon₃ dsa₂ ju₄
5
Ca₂lë₃ co₂ráun₂ jme₁ꞌen₅₄ Jesús cheiꞌ₅₄ Jmɨ₁ŋíꞌ₄ Genesaret.a Të₃jë₄ jaun₂ ca₂ŋɨꞌ₂ juɨn₅ lɨn₃ dsa₂, ca₂liaꞌ₂ co₂ꞌliogꞌ₂ bá₄ tioinꞌ₅₄, ia₁ ꞌnio₃ nag₃ jág₁ quióꞌ₅ Diú₄.
San Lucas 5:1-16
2 Jaun₂ ca₂jág₃ Jesús tɨn₃ tsɨ₁mu₅ a₂le₁jë₁, le₁ꞌág₄ cheiꞌ₅₄ jmɨg₂, ia₁ dsa₂ i₂tsánꞌ₂ ju₄ jme₁ma₂sióin₃ i₂ráng₃ ꞌmá₅ quióꞌ₅.
3 Jaun₂ ca₂ꞌí₃ Jesús caun₂ tsɨ₁mu₅ jaun₂, a₂lë́₅ quióꞌ₅ Si₂mu₅₄. Jaun₂ ca₂mɨ₃ a₂jiog₃ ꞌéi₂ ca₂juɨg₄ guë́₄ le₃ne₄ jmɨg₂. Jaun₂ ca₂guá₂ ꞌŋióꞌ₃ tsɨ₁mu₅, jaun₂ ja₁jaun₂ ca₂jme₃lióg₃ ca₂jme₃tɨin₂₃ dsa₂.
4 Jme₁ca₂dsan₃ cuë₂₃ jág₁, ca₂tsɨ́ꞌ₃ Si₂mu₅₄:
―Jŋiogꞌ₅₄ mu₅ quiángꞌ₂ le₃ja₁jɨꞌ₂ guë́₄. Ja₁në₅ tiong₂ ꞌmá₅ quiángꞌ₂, jaun₂ lénꞌ₂ ꞌniaꞌ₂ ju₄.
5 Jaun₂ ca₂ŋag₃ Si₂mu₅₄:
―Të₅, la₂ tioꞌ₅₄ bá₄ jniaꞌ₅₄ ta₁jma₃ nei₅ ca₂néi₃, tsá₃ ꞌein₂ jáꞌ₂ ma₂lag₅ jniaꞌ₅₄; la₁ i₁tion₃ caun₂ ia₁ a₂juáꞌ₂ ꞌne₂.
6 Jme₁ca₂jmo₃ le₂jaun₂, ca₂liaꞌ₂ juɨn₅ lɨn₃ ju₄ i₃tonꞌ₅₄, jŋiaꞌ₅₄ meiꞌ₂ tsá₃ ca₂gag₂ bá₄ ꞌmá₅ quióꞌ₅ tioinꞌ₅₄.
7 Jaun₂ ca₂bí₂ gu₂ ca₂të́ꞌ₃ rɨinꞌ₅₄ i₂jme₁tionꞌ₅₄ tsɨ₁mu₅ caun₂, ia₁jaun₂ ja₃léin₂ jme₃ꞌo₅₄. Jme₁o₃lén₂ ꞌéi₂ në́₃, ca₂jme₃cainꞌ₂ ta₁tɨn₃ tsɨ₁mu₅, jŋiaꞌ₅₄ meiꞌ₂ tsá₃ ca₂i₃gueinꞌ₅₄ bá₄ tioinꞌ₅₄.
8 Jme₁ca₂jág₃ Si₂mu₅₄ në₅, ca₂ŋó₃ ca₂chi₃jné₃ ne₄ Jesús, ca₂juáꞌ₂:
―Jŋiaꞌ₃ cau₅ quió₃, Te₁guiꞌ₅₄, ia₁ dsa₂ cha₂ dsáu₁ bá₄ jniá₂.
9 Ia₁ dsɨ₂góꞌ₃ dsɨ́₅ Si₂mu₅₄ quianꞌ₅₄ rɨinꞌ₅₄, ia₁ a₂ŋɨ́₄ lë₃ ꞌŋio₅ juɨn₅ ju₄ i₂ca₂join₃.
10 Ján₃ bá₄ le₂jaun₂ Jacobo quianꞌ₅₄ Juan₅₄ i₂lɨ́n₅ ja₁ŋiꞌ₅₄ Zebedeo, ia₁ co₂dsia₅ jme₁i₂nioi₅₄ quianꞌ₅₄ Si₂mu₅₄ tsáinꞌ₂ ju₄. La₁ Jesús në́₃ ca₂juáꞌ₂ ca₂tsɨ́ꞌ₃ Si₂mu₅₄:
―Tsá₃ jmo₂ gangꞌ₃. Ia₁ të₂le₃ ne₄ juɨ₅ ja₁dsau₅₄ në₅, ŋɨ́ꞌ₁ jmagꞌ₅₄ dsa₂ mɨ₂güɨ́g₃ juɨ₁liaꞌ₂ jmagꞌ₂ ju₄.
11 Jme₁ma₂në₂jŋiógꞌ₃ tsɨ₁mu₅ quióꞌ₅ le₃ja₁quein₂ cheiꞌ₅₄ jmɨg₂, ja₁jaun₂ ca₂dsia₃ jë₂, ca₂i₃léin₂ bá₄ quianꞌ₅₄ ꞌéi₂.
Ca₂jme₃ꞌlión₂ Jesús jan₂ dsa₂ i₂lɨ́n₅ ꞌméꞌ₅ ꞌiog₅
12 Co₂ráun₂ jme₁ꞌen₅₄ Jesús caun₂ juɨg₂, jaun₂ ca₂dsióg₃ jan₂ dsa₂ dsoꞌ₅₄ i₂lɨ́n₅ ꞌméꞌ₅ ꞌiog₅, ta₁jain₂. Jme₁ca₂jɨ́in₂ Jesús, ca₂tóin₂ të₂rë₃ꞌéin₂ ꞌuë₃, ca₂mɨ₃ tion₅₄-jan₃, ca₂juáꞌ₂:
―Te₁guiꞌ₅₄, chi₂juaꞌ₂ ꞌniogꞌ₂, jŋiaꞌ₅₄ liaꞌ₂ ꞌne₂ bá₄ quɨꞌ₅₄ jmɨg₄ chiꞌ₅₄ dso₄ a₂lɨ́ng₅.
13 Jaun₂ ca₂néiꞌ₃ gu₂, ca₂nɨ́ꞌ₃ quióꞌ₅ dsa₂ dsoꞌ₅₄, ca₂juáꞌ₂:
―ꞌNio₃ jniá₂. Jmo₅₄ bá₄ le₁jɨ́ngꞌ₃.
Dsɨ₂juɨ₅ jme₁ca₂juáꞌ₂ jaun₂, ca₂jŋiaꞌ₃ ꞌméꞌ₅ ꞌiog₅ a₂jme₁lɨ́in₄.
14 Jaun₂ ca₂jmo₃ Jesús ꞌéiꞌ₃ a₂tsá₃ ꞌein₂ tsɨ́ꞌ₃ ꞌi₁jan₂. Jŋiaꞌ₅₄ liaꞌ₂ ca₂juáꞌ₂:
―La₁ gua₂ o₂jme₁jnia₅ ne₄ jme₂dsa₂, o₄quióꞌ₄ a₂ma₂le₁jɨ́ngꞌ₃, o₂jmo₄ o₂jenꞌ₅₄ ne₄ Diú₄ conꞌ₂ lë́₅ ꞌÉiꞌ₃ quióꞌ₅ Moisés,b co₂ꞌnióꞌ₄ a₂jangꞌ₅₄ jág₁ dsau₅ jɨn₄ dsa₂.
15 La₁ të₂le₃ lë́₅ guë́₄ ca₂i₃ꞌag₅₄ bá₄ jág₁ ca₂le₂con₂ a₂ꞌɨn₅ dsa₂ Jesús. Jaun₂ i₂juɨn₅ lɨn₃ dsa₂ i₂jme₁të₁ja₂lén₂ ŋɨiꞌ₂ ja₂néi₃ jág₁, i₂ꞌnio₃ ꞌlión₂ në́₃ ꞌe₂ caun₂ jmɨ₁uɨg₅ chain₂.
16 La₁ jme₁dsɨ₂uɨ́in₃ bá₄ ꞌnɨꞌ₂ juɨg₂ ja₁conꞌ₂ ꞌŋiog₅, chi₃léinꞌ₂ Diú₄.
Ca₂jme₃ꞌlión₂ Jesús jan₂ dsa₂ ꞌlianꞌ₂
17 Ca₂lë₃ co₂ráun₂ jme₁ꞌen₅₄ Jesús jme₂tɨin₂₃ dsa₂. Le₂con₂ jaun₂, jme₁tiánꞌ₄ i₂lɨn₅₄ dsa₂ fariseos*, të₅juáꞌ₅ në́₃, i₂ja₂lén₂ le₂con₂ ꞌuë₃ Galilea, Judea, juɨg₂ Jerusalén në́₃. Ia₁ juɨ₅bí₂ quióꞌ₅ Te₁guiꞌ₅₄ bá₄ jme₁ꞌio₅ Jesús, a₂jme₂ꞌlióin₂ dsa₂.
San Lucas 5:17-39
18 Të₃jë₄ jaun₂, ca₂dsi₃lén₂ dsa₂ le₁jŋiai₂₃ jan₂ dsa₂ ꞌlianꞌ₂, dsɨ́n₂ ne₄ tsɨ₁jein₁. Jme₁ꞌnoꞌ₂ juɨ₅ dsɨ₃toinꞌ₅₄ dsi₂néi₂, jme₁dsɨ₃quio₂₃ ne₄ Jesús.
19 Ia₁ tsá₃ ca₂dsóꞌ₂ ꞌa₂ liaꞌ₂ dsɨ₃toinꞌ₅₄, ia₁ a₂ŋɨ́₄ lë₃ juɨn₅ dsa₂ tionꞌ₅₄, jaun₂ ca₂uɨ́g₂ le₃coꞌ₅₄ tsɨ₁ꞌné₅. Jaun₂ ca₂niá₃ jë₄ guaꞌ₅₄ lag₁, jaun₂ ca₂sió₂ liaꞌ₂ jma₃quianꞌ₅₄ tsɨ₁jein₁, dsi₂jo₂ jaun₂, ne₄ Jesús.
20 Jme₁ca₂jág₃ Jesús a₂ꞌén₂ dsa₂ ꞌéi₂ ꞌŋio₅ lɨn₃, jaun₂ ca₂juáꞌ₂:
―ꞌNe₂ dsa₂, ma₂rë₂ꞌén₄ bá₄ dsáuꞌ₂.
21 Jaun₂ në́₃ ca₂jme₃lióg₃ të₅juáꞌ₅ quianꞌ₅₄ dsa₂ fariseos në́₃ ca₂i₃jŋia₅ dsɨ́₅: “¿I₂ꞌein₂ bá₄ në₅ jmáiꞌ₂ mɨꞌ₅₄ Diú₄ a₂juáꞌ₂ le₂në₅? ꞌI₁jan₂ tsá₃ ꞌein₂ lé₂ le₃ꞌén₂ dsáu₁ dsa₂, jŋiaꞌ₅₄ liaꞌ₂ Diú₄ bá₄.”
22 La₁ a₂líꞌ₄ rë₂ bá₄ Jesús ꞌe₂ a₂qui₂dsɨ₂jŋia₅ dsɨ́₅ dsa₂ ꞌéi₂, jaun₂ ca₂juáꞌ₂:
―¿ꞌE₂ bá₄ lë₃ dsɨ₂jiog₅ ꞌauꞌ₂ ꞌniaꞌ₂ le₂në₅?
23 ¿ꞌE₂ a₂ꞌua₁ guë́₄ ta₁, a₂juáꞌ₄ jniá₂ juɨg₅₄ dsa₂ la₂: “Ma₂rë₂ꞌén₄ dsáuꞌ₂”, o₃ a₂juɨg₅₄ ꞌe₂ jniá₂: “Nau₂, ŋɨ₄”?
24 Ia₁ dse₃ jaun₂. La₂ jmo₅₄ jniá₂ ia₁jaun₂ le₃ŋiꞌ₅₄ ꞌniaꞌ₂ a₂ꞌio₅ bí₂ ꞌéiꞌ₃ Jaun₅* dsa₂ mɨ₂güɨ́g₃ ne₄ guaꞌ₅₄ ꞌuë₃ a₂qui₃ꞌéin₂ dsáu₁ dsa₂.
Jaun₂ guë́₄ ca₂tsɨ́ꞌ₃ dsa₂ ꞌlianꞌ₂:
―ꞌNe₂ juɨ́g₂ jniá₂, nau₂, quion₂ tsɨ₁jein₁ quiángꞌ₂, guanꞌ₂.
25 Dsɨ₂juɨ₅ jaun₂ të₃ jág₅ ca₂le₃jɨ́n₃, ca₂nau₂ ca₂cáun₃ tsɨ₁jein₁ quióꞌ₅ ca₂ŋáiꞌ₃ jme₂juɨinꞌ₂ Diú₄.
26 Jaun₂ ca₂i₃góꞌ₃ dsɨ́₅ ca₂le₃jɨ́n₃, ca₂jme₃juɨinꞌ₂ Diú₄ në́₃. Jaun₂ të₃jë₄ dsɨ₂góꞌ₃ dsɨ́₅ jaun₂, qui₂ca₂tsɨ́ꞌ₃ rɨinꞌ₅₄:
―Jmɨg₄ në₃ ca₂të́₂ ne₄ jniog₄ a₂dsɨ₂góꞌ₃ dsɨ₅.
Ca₂të́ꞌ₃ Jesús Leví
27 Cang₂ jaun₂ ca₂o₃ꞌɨ́in₃ táng₃. Ja₁ŋó₄ jaun₂, ca₂jɨ́in₂ jan₂ i₂chen₂ Leví i₂cán₂ ꞌliaꞌ₅₄ a₂ca₂tɨ́n₂ dsɨ₂tan₅₄, guá₅ ja₁dsɨ₂qui₅ dsa₂ ꞌliaꞌ₅₄. Jaun₂ ca₂juáꞌ₂ Jesús:
―Ŋia₅ chi₁coꞌ₅₄ quió₃.
28 Ja₁jaun₂ ca₂dsia₃ jë₂, ca₂nau₂ ŋó₃ quiongꞌ₅₄.
29 Ca₂i₁jmo₅₄ Leví caun₂ má₃ pa₁ dsi₂néi₂ quióꞌ₅ o₄quióꞌ₄ Jesús, jaun₂ ca₂ŋɨꞌ₂ juɨn₅ dsa₂ i₂cán₂ ꞌliaꞌ₅₄ rɨinꞌ₅₄. Juɨn₅ bá₄ dsa₂ siánꞌ₂ në́₃ qui₂ca₂guë́ꞌ₃ quiainꞌ₅₄.
30 La₁ dsa₂ fariseos quianꞌ₅₄ të₅juáꞌ₅ quiáin₅, chi₂ca₂ꞌɨin₃ dsa₂ i₂ma₂quianꞌ₅₄ Jesús, ca₂juáꞌ₂:
―¿ꞌE₂ lë₃ qui₂quë́ꞌ₂ qui₂ꞌágꞌ₂ ꞌniaꞌ₂ co₂dsia₅ quianꞌ₅₄ dsa₂ i₂cán₂ ꞌliaꞌ₅₄ në₅, dsa₂ i₂le₁cánꞌ₄ dso₄ në́₃?
31 Jaun₂ ca₂ŋag₃ Jesús:
―Ma₁ tsá₃ të₅mɨ́₅ ꞌnióꞌ₅ quióꞌ₅ dsa₂ i₂le₁ꞌág₄ dse₃ dsɨ́₅; dsa₂ i₂le₁dsoꞌ₅₄ bá₄ ꞌnióꞌ₅ quióꞌ₅.
32 Tsá₃ ta₁ jaun₂ guio₃ jniá₂ a₂të́₄ dsa₂ dsen₃; a₂të́₄ dsa₂ i₂le₁cánꞌ₄ dso₄ bá₄ jniá₂ guio₃, ia₁jaun₂ dsi₁quénꞌ₅ dsɨ́₅.
Ca₂ŋɨ́ꞌ₃ dsa₂ Jesús juɨ₁liaꞌ₂ a₂jme₂ꞌɨn₅₄ dsa₂
33 Jaun₂ dsa₂ ꞌéi₂ në́₃ ca₂tsɨ́ꞌ₃ Jesús:
―¿ꞌA₂ guëꞌ₂ liaꞌ₂ i₂gúꞌ₃ jme₂ꞌɨn₅₄ dsa₂ i₂quianꞌ₅₄ Juan₅₄, jë₂ qui₂tsɨ́ꞌ₅ Diú₄, le₂jaun₂ bá₄ dsa₂ quián₅ fariseos në́₃, la₁ dsa₂ quiángꞌ₂, guë́ꞌ₅ ꞌɨ́nꞌ₂ bá₄?
34 Jaun₂ ca₂jéinꞌ₃ Jesús jág₁:
―¿Lé₂ le₃chi₁quianꞌ₄ ꞌniaꞌ₂ jmɨg₄ jme₃ꞌɨn₅₄ juɨ₁liaꞌ₂ dsa₂ i₂té₄ ja₁jenꞌ₂ gu₂ dsa₂, chi₂juaꞌ₂ jaun₂ bá₄ guá₅ guëꞌ₂ dsa₂ ŋeꞌ₂ i₂jenꞌ₂ gu₂?
35 La₁ já₅ jmɨg₄ jë₁ma₂jŋiaꞌ₃ dsa₂ ŋeꞌ₂ ꞌéi₂; jmɨg₄ jaun₂ guë́₄ ma₂lé₂ jme₃ꞌɨin₅₄.
36 Ján₃ bá₄ ca₂juáꞌ₂ Jesús jág₁ jángꞌ₅ léi₄ la₂:
―Ma₁ tsá₃ ꞌein₂ dsa₂ tióng₅ ꞌnau₅₄ ꞌmɨꞌ₂ ꞌmɨ́₂ tsɨ₁ꞌmɨꞌ₂ guiꞌ₅₄. Ia₁ në₁juaꞌ₂ ca₂jmo₃ le₂jaun₂, a₂jŋiaꞌ₅₄ guéi₃ bá₄ caun₂ caun₂, tonꞌ₂ tsá₃ ma₃rë₂ quɨn₅ tsɨ₁ꞌmɨꞌ₂ guiꞌ₅₄ quianꞌ₅₄ ꞌnau₅₄ ꞌmɨ́₂.
37 Ján₃ guëꞌ₂ tsá₃ tiaꞌ₂ dsa₂ vino ꞌmɨ́₂ nɨ₁lau₂* guiꞌ₅₄, ia₁ në₁juaꞌ₂ ca₂jmo₃ dsa₂ le₂jaun₂, a₂neꞌ₂ bá₄ nɨ₁lau₂ guiꞌ₅₄ quianꞌ₅₄ dsióꞌ₁ vino ꞌmɨ́₂; téin₃ bá₄ vino, tonꞌ₂ dsɨ₃ꞌén₂ nɨ₁lau₂ guiꞌ₅₄ në́₃.
38 Jaun₂ lë₃, lau₂ ꞌmɨ́₂ bá₄ ꞌnióꞌ₅ tiaꞌ₃ dsa₂ vino ꞌmɨ́₂, ia₁jaun₂ rë₂ lé₂ ꞌí₁ le₃tɨn₃.
39 Ján₃ bá₄ le₂jaun₂ juɨ₁liaꞌ₂ i₂ma₂ꞌɨnꞌ₅ vino guiꞌ₅₄ a₂ma₂ron₂, tsá₃ jiá₃ dsɨ́₅ ꞌɨ́nꞌ₂ vino ꞌmɨ́₂ a₂të₂ca₂jlenꞌ₃. “Ia₁ tióꞌ₅ a₂guiꞌ₅₄” bá₄ juáꞌ₂.