Jan₂ dsa₂ i₂ꞌen₅₄ jme₂dsí₂ ꞌlɨnꞌ₅₄
5
Jaun₂ dsi₃léin₂ jme₁dsi₃léin₂ ꞌŋoꞌ₅₄ jmɨ₁ŋíꞌ₄, go₄ dsa₂ Gadarenos.a
San Marcos 5:1-24
2 Jaun₂ dsɨ₂juɨ₅ jme₁ca₂o₃ꞌɨ́n₃ Jesús ꞌŋióꞌ₃ tsɨ₁mu₅, dsióg₃ jan₂ dsa₂ i₂o₂ꞌɨ́n₃ ja₁le₁ꞌon₅ ꞌlag₄, dsa₂ i₂ꞌen₅₄ jme₂dsí₂ ꞌlɨnꞌ₅₄ dsɨ́₅.
3 Jme₁guá₄ dsa₂ ꞌéi₂ jë₄ tau₂ ꞌŋio₅; jaun₂ tsá₃ ma₃ꞌein₂ jme₁quɨꞌ₅₄ jmɨg₄ tióꞌ₅ ꞌneiꞌ₂ quianꞌ₅₄ ŋí₁ cadena,
4 ia₁ ꞌlióng₂ ráun₂ jme₁ma₂ꞌneiꞌ₂ dsa₂ le₂jŋiá₅, jme₁ma₂tóꞌ₂ dsa₂ cadena mɨ₂tag₅₄, mɨ₂gu₂ në́₃. La₁ jë₂ bá₄ jŋiaꞌ₅₄ ma₂gág₃; ma₂juɨin₃ nɨ₁ŋí₁ jme₁chi₁quɨ́ꞌ₅ mɨ₂tag₅₄ në́₃. Jaun₂ ꞌi₁jan₂ tsá₃ ma₃ꞌein₂ jme₁tio₃.
5 Jaun₂ në́₃, jme₁i₂ŋɨ₅₄ liaꞌ₂ ꞌuë₂-jmɨ₂ dsɨ₂guioꞌ₂ ja₁le₁ꞌon₅ ꞌlag₄ liaꞌ₂ juɨ₅ máꞌ₂ në́₃, qui₂jmáiꞌ₂ uɨg₅ ꞌŋiog₅ qui₂uɨng₂ quióꞌ₅ quianꞌ₅₄ nɨ₁cang₁.
6 La₁ jme₁ca₂jɨ́in₂ Jesús já₅ uɨ́ng₂, ŋó₃ jaun₂ në́₃ co₂chiꞌ₅₄ le₃ne₄ ja₁ŋó₄ Jesús, jaun₂ ca₂chi₃jné₃.
7 Jaun₂ ca₂ꞌí₃ co₂mɨꞌ₅₄ ca₂juáꞌ₂:
―¿ꞌE₂ lë₃ tiánꞌ₅ ꞌne₂ jë₄ quió₃ jniá₂, ꞌne₂ Jesús Ja₁ŋiꞌ₅₄ Diú₄ juɨnꞌ₂? Ca₂Diú₄, jnag₅₄, mɨ₅ jniá₂ neꞌ₅₄ tsá₃ lë₁ꞌë́₅ uɨg₅.
8 Ca₂juáꞌ₂ le₂në₅, ia₁ jme₁ma₂në₂chíꞌ₃ Jesús jme₂dsí₂ ꞌlɨnꞌ₅₄, ca₂juáꞌ₂: “¡Jú₅ quióꞌ₅ dsa₂ në₅, ꞌne₂ jme₂dsí₂ ꞌlɨnꞌ₅₄!”
9 Jaun₂ ca₂ŋag₃ Jesús:
―¿ꞌA₂ liaꞌ₂ chengꞌ₂?
Jaun₂ ca₂ŋag₃:
―Juɨn₅b bá₄ cheng₂, ia₁ a₂juag₅ jniaꞌ₅₄ lë́₂.
10 Jaun₂ ca₂mɨ₃ tion₅₄-jan₃ ne₄ Jesús a₂tsá₃ chein₂ jme₂dsí₂ ꞌlɨnꞌ₅₄ ja₁siáꞌ₂.
11 Ia₁ jme₁tionꞌ₅₄ juɨn₅ i₁ŋí₅, guë́ꞌ₅ quián₅ ꞌuɨg₅₄ máꞌ₂,
12 jaun₂ qui₂ca₂mɨ₃ i₂ꞌlɨnꞌ₅₄ ne₄ Jesús, ca₂juáꞌ₂:
―Chei₅ jniaꞌ₅₄ ja₁tionꞌ₅₄ i₁ŋí₅, jaun₂ dsɨ₁tióꞌ₄ jniaꞌ₅₄ quióꞌ₅ ꞌéi₂.
13 Jaun₂ ca₂cuë₃ bá₄ Jesús jmɨg₄. Jaun₂ ca₂ꞌuɨin₂ ca₂i₃léin₂ i₃toinꞌ₅₄ quióꞌ₅ i₁ŋí₅. Jme₁lë́₂ conꞌ₂ tɨn₃ mei₅ i₁ŋí₅ jme₁tionꞌ₅₄. Ca₂le₃jɨ́n₃ ꞌéi₂ ca₂i₁nioi₁₂ co₂chiꞌ₅₄ cuɨng₂₃ ca₂sein₃ siá₅ i₃toinꞌ₅₄ jmɨ₁ŋíꞌ₄, ca₂dsain₃.
14 Jaun₂ ca₂i₃len₃ dsa₂ i₂jme₁jmo₅ ꞌí₁ cuɨng₂₃ ca₂i₁chiꞌ₄ dsa₂ jë₄ juɨg₂, quianꞌ₅₄ i₂tionꞌ₅₄ ja₁nau₂ në́₃. Jaun₂ i₃lén₂ dsa₂ i₁jag₅₄ ꞌe₂ ca₂lë₃ ja₁jaun₂.
15 Jme₁ca₂o₃léin₂ ja₁ꞌen₅₄ Jesús, ca₂jɨ́in₂ dsa₂ i₂jme₁tionꞌ₅₄ juɨn₅ jme₂dsí₂ je₂naꞌ₅₄ quióꞌ₅. Jaun₂ ma₂guá₅ ma₂quiꞌ₂ tsɨnꞌ₅₄, ma₂ꞌen₅₄ bá₄ dsɨ́₅. Tioinꞌ₅₄ ca₂jág₂ dsɨ₂góꞌ₃ dsɨ́₅.
16 Jaun₂ dsa₂ i₂ca₂jág₃ ca₂dsia₃ ꞌe₂ ca₂lë₃ quianꞌ₅₄ dsa₂ i₂jme₁tionꞌ₅₄ je₂naꞌ₅₄ quióꞌ₅, ꞌe₂ ca₂lë₃ quianꞌ₅₄ i₁ŋí₅ në́₃.
17 Jaun₂ ca₂jme₃lióg₃ qui₂ca₂mɨ₃ tion₅₄ ne₄ Jesús a₂o₃ꞌɨin₅ ꞌuë₃ go₅₄.
18 Jme₁ma₂ŋó₅ Jesús ꞌí₂ tsɨ₁mu₅, jaun₂ jme₁mɨ₅ dsa₂ i₂jme₁tionꞌ₅₄ je₂naꞌ₅₄ quióꞌ₅, jme₁mɨ₂₃ jág₁ ne₄ Jesús a₂dsó₃ quiongꞌ₅₄.
19 La₁ tsá₃ ca₂cuë₃ ꞌéi₂ jmɨg₄. Jaun₂ ca₂tsɨ́ꞌ₃ dsa₂ ꞌéi₂:
―Guanꞌ₂ ja₁quiángꞌ₂, ja₁tiánꞌ₄ rɨ́ngꞌ₂, o₂dsia₄ ca₂le₃jë́₃ ꞌe₂ në₂jmo₃ Te₁guiꞌ₅₄ o₄quiángꞌ₂, ꞌa₂ liaꞌ₂ në₂dsia₃ ŋéi₂ dsɨ́₅.
20 Jaun₂ ŋáꞌ₃ bá₄ dsa₂ ꞌéi₂ dsi₂néi₂ quióꞌ₅, jaun₂ ca₂jme₃lióg₃ ca₂i₁dsia₂ jë₄ juɨg₂ tén₅ Decápolis* ca₂le₃jë́₃ ꞌe₂ ca₂jmo₃ Jesús o₄quióꞌ₄. Ca₂le₃jɨ́n₃ dsa₂ i₂ca₂nág₂ ca₂i₃góꞌ₃ dsɨ́₅.
Ja₁mɨ́g₄ Jairo, quianꞌ₅₄ ꞌio₅₄ i₂ca₂nɨ́ꞌ₃ tsɨnꞌ₅₄ Jesús
21 Jme₁ca₂dsiánꞌ₃ táng₃ Jesús le₃ꞌŋoꞌ₅₄ jmɨ₁ŋíꞌ₄ quianꞌ₅₄ tsɨ₁mu₅, juɨn₅ lɨn₃ dsa₂ i₂ca₂dsi₃lén₂ táng₃ jme₁dsiáinꞌ₃. Të₁liaꞌ₂ ꞌŋɨ₂₃ cheiꞌ₅₄ jmɨg₂,
22 jaun₂ ca₂dsióg₃ jan₂ dsa₂ i₂niog₅ gu₂ guáꞌ₅ sinagoga*, i₂chen₂ Jairo. Jme₁ca₂jɨ́in₂ Jesús, jaun₂ ca₂chi₃jné₃ ne₄ ꞌéi₂.
23 Ca₂mɨ₃ ca₂juáꞌ₂:
―Ma₂i₁jón₂ jan₂ chiꞌ₂ quiáng₃. ¿Tsa₁ gogꞌ₅₄ o₁jɨinꞌ₁ o₁quiogꞌ₂ gogꞌ₂ ne₄ quióꞌ₅, jaun₂ ꞌlióin₂, le₃chain₂?
24 Jaun₂ në́₃ ca₂ŋó₃ Jesús quiongꞌ₅₄; juɨn₅ lɨn₃ guë́₄ dsa₂ siánꞌ₂ i₃lén₂ ca₂liaꞌ₂ co₂ꞌliainꞌ₂ bá₄ Jesús.
25 Jë₄ jaun₂, ŋó₃ jan₂ ꞌio₅₄ i₂ma₂të́₂ guia₃-tɨ́n₂ ŋi₂ a₂dsoꞌ₅₄ a₂tɨin₂.
San Marcos 5:25-43
26 ꞌLióng₂ a₂ma₂i₃ŋɨ́i₂ o₄gú₃ juɨn₅ të₅mɨ́₅; jme₁ma₂ꞌéin₂ ca₂le₃jë́₃ cu₄ a₂jme₁cha₂ quióꞌ₅. La₁ tsá₃ ꞌe₂ ta₁ jmo₃, ia₁ të₂le₃ ca₂i₃ja₃ bá₄ quióꞌ₅.
27 La₁ jme₁ca₂nág₂ a₂ꞌɨn₅ dsa₂ Jesús, jaun₂ ŋó₃ ca₂jme₃quiáin₃ le₃ja₁ŋó₄ ꞌéi₂, jɨn₄ dsa₂. Jme₁ca₂dsióg₃ cau₅ quióꞌ₅ Jesús në́₃, jaun₂ ca₂nɨ́iꞌ₃ nɨ₁tsɨnꞌ₅₄ ꞌéi₂.
28 Ia₁ lɨ́in₂: “Tsá₃ a₂nag₅₄ a₂jŋiaꞌ₅₄ nɨ́gꞌ₄ ca₂juɨg₄ tsɨnꞌ₅₄, jŋia₃ quió₃.”
29 Co₂tan₅₄ dsɨ₂juɨ₅ le₂jaun₂ bá₄ ca₂ꞌná₂ tein₂₃ jmɨ₂, ca₂rë₃líꞌ₄ ca₂ꞌlóin₂ dso₄ quióꞌ₅.
30 Jaun₂ dsɨ₂juɨ₅ bá₄ ca₂rë₃líꞌ₄ Jesús a₂o₃ꞌág₃ bí₂ quióꞌ₅. Jaun₂ ca₂jéinꞌ₃ jɨn₄ dsa₂, ca₂ŋag₃:
―¿ꞌEin₂ bá₄ në₂nɨ́ꞌ₃ tsɨ́nꞌ₅?
31 Jaun₂ ca₂ŋag₃ chiꞌ₂ dsɨ₂guia₃-tɨ́n₂ quiáin₅:
―Juaꞌ₂ jágꞌ₂ bá₄ ꞌne₂ ꞌa₂ liaꞌ₂ co₂ꞌliogꞌ₂ dsa₂ ja₂léin₂. ¿ꞌE₂ lë₃ juáꞌ₂ “ꞌein₂ në₂nɨ́ꞌ₃ quió₃?”
32 La₁ qui₂ja₂né₂ Jesús jɨn₄ dsa₂ a₂ꞌnaiꞌ₂ ꞌein₂ në₂nɨ́ꞌ₃ quióꞌ₅.
33 ꞌIo₅₄ ꞌéi₂ në́₃ ma₂jlein₂₃ bá₄ chéinꞌ₅ góꞌ₅, ia₁ ŋi₅ bá₄ ꞌe₂ ma₂i₂ŋɨ́i₂. Ca₂ŋó₃ co₂ŋeiꞌ₅₄ ne₄ Jesús, ca₂chi₃jné₃, ca₂juáꞌ₂ ca₂le₃jë́₃ liaꞌ₂ tí₅ jág₁ dsónꞌ₂.
34 Jesús në́₃ ca₂juáꞌ₂:
―Jón₃, ia₁ ꞌéngꞌ₂, ca₂ꞌlóngꞌ₂ bá₄. Guanꞌ₂ tei₄ quiángꞌ₂. Co₂në₅ ca₂jŋia₃ dso₄ quiángꞌ₂.
35 Të₃ dsia₅ bá₄ guë́₄ Jesús jág₁ jaun₂ jme₁ca₂dsi₃lén₂ dsa₂ i₂tionꞌ₅₄ ja₁quióꞌ₄ Jairo i₂lɨ́n₅ ta₁ quióꞌ₅ guáꞌ₅ ꞌéi₂. Jaun₂ ca₂juáꞌ₂ tsɨ́₅ Jairo:
―Ma₂ca₂jon₃ bá₄ ja₁mɨ́gꞌ₄. ¿ꞌE₂ ta₁ ma₂cuëꞌ₂ o₂meꞌ₅₄ dsɨ₅ të₅?
36 La₁ tsá₃ ca₂tónꞌ₃ Jesús juɨ₅ jág₁ quióꞌ₅ dsa₂ ꞌéi₂, jaun₂ ca₂tsɨ́ꞌ₃ Jairo:
―Tsá₃ lë₁jmo₂ gangꞌ₃; jŋiaꞌ₅₄ liaꞌ₂ ꞌén₃ bá₄.
37 Tsá₃ ca₂cuë₃ jmɨg₄ Jesús a₂dsɨ₃lén₂ juɨn₅ dsa₂ quiongꞌ₅₄. Jŋiaꞌ₅₄ liaꞌ₂ Pe₄, Jacobo, quianꞌ₅₄ Juan₅₄ rɨinꞌ₅₄ bá₄ i₃lén₂.
38 Jme₁ca₂dsi₃léin₂ ja₁quióꞌ₄ Jairo, ca₂jág₃ tionꞌ₅₄ dsa₂ go₂ꞌi₃ quɨꞌ₂-ꞌo₂₃ co₂mɨꞌ₅₄, ꞌliaꞌ₂ dsɨ́₅.
39 Ca₂ꞌí₃ Jesús dsi₂néi₂, ca₂juáꞌ₂:
―¿ꞌE₂ lë₃ ŋɨ́₄ lë₃ tóꞌ₂ ꞌniaꞌ₂ mɨꞌ₅₄, ꞌauꞌ₂ ꞌniaꞌ₂ le₂në₅? Tsá₃ rë₂jon₅₄ guein₂ në₅. Jŋiaꞌ₅₄ liaꞌ₂ a₂rë₂güɨ́in₃ bá₄.
40 La₁ jŋiaꞌ₅₄ ca₂ŋɨ́₂ bá₄ dsa₂ Jesús tioinꞌ₅₄. Jaun₂ në́₃ ca₂ꞌuɨ́nꞌ₂ Jesús ca₂le₃jɨ́n₃ dsa₂ ꞌéi₂ ca₁ꞌné₄. Jaun₂ ca₂jŋiai₃ chog₅₄-jmei₂ ꞌlag₄, dsa₂ ún₂ i₂jme₁quiainꞌ₅₄ në́₃. Ca₂i₃toinꞌ₅₄ ja₁rë₂quian₅ guein₂ ꞌlag₄.
41 Jaun₂ ca₂jŋaꞌ₃ gu₂ i₂bëꞌ₅₄, jaun₂ ca₂juáꞌ₂:
―Talita, cumi ―co₂ꞌnióꞌ₄ a₂juáꞌ₂: ꞌIo₅₄ bëꞌ₅₄, ꞌne₂ juɨ́g₂ jniá₂, nau₂.