Jme₂tag₅ Jesús jág₁ juɨ₁liaꞌ₂ a₂jmo₅ dsa₂ dse₃
6
ꞌJmo₄ ꞌniaꞌ₂ ꞌí₁ tsá₃ lë₁jmo₂ ꞌniaꞌ₂ a₂lɨ́ngꞌ₅ dsa₂ dsen₃ jŋiaꞌ₅₄ liaꞌ₂ jmáꞌ₃ jë₄ jág₃ dsa₂. Në₁juaꞌ₂ le₂në₅ jmoꞌ₂ ꞌniaꞌ₂, Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃ tsá₃ ꞌe₂ ꞌlianꞌ₅₄ ꞌniaꞌ₂ cuë₃ ꞌi₁caun₂.
2 ꞌꞌUɨg₅₄ jaun₂, jë₁ma₂të́₂ rë₁jme₁ꞌonꞌ₁ ꞌniaꞌ₂ ꞌein₂ jme₁ꞌongꞌ₁ juɨ₁liaꞌ₂ i₂ꞌnióꞌ₅ quióꞌ₅, tsá₃ jmóꞌ₂ juaꞌ₅₄ uɨ́ng₂ ma₂dsɨ₂ꞌag₅ jág₁ juɨ₁liaꞌ₂ jmo₅ dsa₂ i₂lë₁jmo₅ o₁ne₁ dsi₂néi₂ guáꞌ₅ sinagogas* juɨ₁liaꞌ₂ jë₄ calles në́₃. Jmo₂₃ le₂jaun₂ a₂cheinꞌ₂ dse₃ guioin₅₄ ia₁jaun₂ ꞌag₃ dsa₂ dse₃; la₁ia₁ a₂të₃dsónꞌ₂ juáꞌ₅ jniá₂ i₂ma₂gue₃ ꞌlianꞌ₅₄ bá₄ i₂le₂ꞌéi₂.
3 La₁ ꞌne₂ në́₃, jë₁ma₂të́₂ rë₁jme₁ꞌongꞌ₁ juɨ₁liaꞌ₂ ꞌein₂ jme₁ꞌongꞌ₁, jmo₄ ca₂liaꞌ₂ jŋiaꞌ₅₄ a₂mei₅₄ dsen₃ quiángꞌ₂ tsá₃ ŋi₅.
4 Ja₂lɨn₃ guë́₄ dse₃ jmóꞌ₂ jë₄ të₃coꞌ₅₄. Jaun₂ Ŋéiꞌ₅ i₂jág₅ a₂dse₃ jmoꞌ₂ jë₄ të₃coꞌ₅₄ jaun₂, cuë₃ ꞌliangꞌ₅₄.a
Jme₂tag₅ Jesús ꞌa₂ liaꞌ₂ chi₃lénꞌ₂ dsa₂ Diú₄
5 ꞌJë₁ma₂të́₂ rë₁chi₁lenꞌ₄ ꞌniaꞌ₂ Diú₄, tsá₃ lë₁jmo₂ ꞌniaꞌ₂ juɨ₁liaꞌ₂ jmo₅ dsa₂ i₂lë₁jmo₅-dsáu₅ o₁ne₁, a₂të₅ dsɨ́₅ chi₂léinꞌ₂ Diú₄ të₃ tióin₂ dsi₂néi₂ guáꞌ₅ sinagogas* jë₄ calles në́₃, ia₁jaun₂ jág₃ dsa₂. A₂dsɨ₂jóꞌ₃ juáꞌ₅ jniá₂, i₂ma₂gue₃ ꞌlianꞌ₅₄ bá₄ i₂le₂ꞌéi₂.
6 La₁ jë₁ma₂të́₂ rë₁mɨ́ꞌ₁ ꞌne₂ ne₄ Diú₄, jne₅₄ dsi₂néi₂ quiángꞌ₂. Ja₁jaun₂ chi₁lenꞌ₄ ꞌne₂ Diú₄ Ŋéiꞌ₅ i₂tsá₃ jniá₂. Jaun₂ në́₃ Ŋéiꞌ₅ i₂ŋi₅ ꞌe₂ a₂jmoꞌ₂ jë₄ të₃coꞌ₅₄, cuë₃ ꞌliangꞌ₅₄.
7 ꞌJë₁ma₂të́₂ rë₁juɨgꞌ₅₄ Diú₄, tsá₃ jmóꞌ₂ ꞌniaꞌ₂ juaꞌ₅₄ a₂lë₁të₁ꞌɨ́ꞌ₁ jág₁ a₂tsá₃ ta₁ tí₄, juɨ₁liaꞌ₂ jmo₅ dsɨ₂nau₂ i₂tsá₃ ꞌén₂, ia₁ lɨ́in₂ nag₃ Diú₄ të₂le₃ ia₁ a₂ꞌlióng₂ jág₁ juáꞌ₂.
8 Tsá₃ lë₁o₁lenꞌ₅₄ ꞌniaꞌ₂ juɨ₁liaꞌ₂ lɨ́n₅ dsa₂ le₂ꞌéi₂. Ia₁ i₂ma₂ŋi₅ bá₄ Ŋéiꞌ₅ ꞌniaꞌ₂ ꞌe₂ a₂ꞌnióꞌ₅ quiánꞌ₂ ꞌniaꞌ₂ néꞌ₃ guë́₄ a₂mɨ́ꞌ₁.
9 Jaun₂ në́₃, le₂la₂ bá₄ juɨgꞌ₅₄ ꞌniaꞌ₂ Diú₄:
Tia₅₄ quián₂ jniog₄, ꞌne₂ i₂ŋéiꞌ₂ gueiꞌ₅₄ i₂juɨ́g₃,
juɨ₁jme₂go₃ bá₄ dsa₂ a₂rë₂jŋió₄ a₂chengꞌ₂.
10 Juɨ₁le₅₄ bá₄ ꞌéiꞌ₃ quiángꞌ₂,
juɨ₁le₅₄ bá₄ a₂ꞌŋio₂ ꞌauꞌ₂ ꞌne₂ ne₄ guaꞌ₅₄ ꞌuë₃,
juɨ₁liaꞌ₂ lë́₅ gueiꞌ₅₄ i₂juɨ́g₃.
11 Cuë₄ a₂ꞌnióꞌ₅ que₅₄ jniaꞌ₅₄ jmɨg₄ në₃.
12 ꞌÉn₃ dso₄ quián₂ jniaꞌ₅₄,
juɨ₁liaꞌ₂ ꞌén₅ jniaꞌ₅₄ dsáu₁ rɨnꞌ₅₄.
13 ꞌA₃ cuë₂ jmɨg₄ jiá₃ juɨ₅bí₂ a₂cáun₂ táu₂,
të₂le₃ lio₄ bá₄ o₄gú₃ i₂së₃dsen₃.b
14 ꞌIa₁ në₁juaꞌ₂ ꞌénꞌ₅ ꞌniaꞌ₂ dsáu₁ rɨ́ngꞌ₂ jë₁ma₂ꞌnáu₂ dso₄ ja₁congꞌ₂, ján₃ bá₄ le₂jaun₂ Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃ ꞌéin₂ dsáuꞌ₂ ꞌniaꞌ₂ guiongꞌ₅₄.
15 La₁ në₁juaꞌ₂ tsá₃ ꞌéngꞌ₅ dsáu₁ rɨ́ngꞌ₂, ján₃ bá₄ le₂jaun₂ tsá₃ ꞌén₂ Ŋéiꞌ₅ dsáuꞌ₂ ꞌniaꞌ₂.
Jme₂tag₅ Jesús jág₁ juɨ₁liaꞌ₂ a₂jme₂ꞌɨn₅₄ dsa₂
16 ꞌJë₁ma₂të́₂ rë₁jme₁ꞌɨnꞌ₄ ꞌniaꞌ₂, tsá₃ jme₁tsɨ́n₄ ꞌniaꞌ₂ o₄-neꞌ₅₄ juaꞌ₅₄ a₂jmóꞌ₂ lë₁ꞌág₄ ꞌliaꞌ₂ ꞌauꞌ₂ juɨ₁liaꞌ₂ jmo₅ dsa₂ i₂lë₁jmo₅-dsáu₅ o₁ne₁. Jmo₅ dsa₂ le₂ꞌéi₂ le₂jaun₂ ia₁jaun₂ jág₃ dsa₂ a₂dsónꞌ₂ bá₄ jme₂ꞌɨin₅₄. A₂dsɨ₂jóꞌ₃ juáꞌ₅ jniá₂, i₂ma₂gue₃ ꞌlianꞌ₅₄ bá₄ ꞌéi₂.
17 La₁ ꞌne₂ në́₃, jë₁ma₂të́₂ rë₁jme₁ꞌɨngꞌ₄, sio₅ rë₂ dseiꞌ₂, rang₂ neꞌ₅₄ në́₃,
18 ia₁jaun₂ tsá₃ ꞌein₂ le₃líꞌ₄ a₂jme₂ꞌɨngꞌ₄. Jŋiaꞌ₅₄ liaꞌ₂ Ŋéiꞌ₅ i₂tsá₃ jniá₂ bá₄ ŋi₅. Jaun₂ Ŋéiꞌ₅ i₂jág₅ ca₂le₃jë́₃ a₂jmoꞌ₂ jë₄ të₃coꞌ₅₄ jaun₂, ꞌéi₂ bá₄ cuë₃ ꞌliangꞌ₅₄.
Juɨ₁liaꞌ₂ a₂quen₅ lɨn₃ a₂rë₂ꞌma₄ gueiꞌ₅₄ i₂juɨ́g₃
19 ꞌTsá₃ lë₁dsia₂ ꞌniaꞌ₂ loꞌ₂ le₁máꞌ₂ a₂jmoꞌ₂ ꞌniaꞌ₂ a₂quen₅ lɨn₃ quiángꞌ₂ ne₄ guaꞌ₅₄ ꞌuë₃ la₂, ia₁ ja₁lá₃ ja₁lë₁qui₂rë₂juɨ₁ tónꞌ₅ i₁cá₁ qui₂ꞌéin₂, ján₃ bá₄ ja₁lá₃ ja₁qui₂dsɨ₂ꞌén₂ qui₂rë₃ꞌáu₁ cosas në́₃; ja₁lá₃ bá₄ chan₂ dsa₂ qui₂juɨin₂₃ ꞌe₂ qui₂juɨin₂₃ a₂tóinꞌ₅ ꞌang₂₃.
20 Gueiꞌ₅₄ i₂juɨ́g₃ bá₄ ꞌnióꞌ₅ dsiáꞌ₁ ꞌniaꞌ₂ loꞌ₂ quiángꞌ₂, ja₁tsá₃ ꞌe₂ lé₂ juaꞌ₅₄ a₂qui₃ꞌén₂ cá₁, on₃ guëꞌ₂ ꞌe₂ rë₂ꞌáu₁, on₃ guë́₄ lé₂ dsɨ₃tonꞌ₅₄ ꞌang₂.
21 Ia₁ juɨ₁liaꞌ₂ jë₁tioꞌ₅₄ a₂quen₅ quiángꞌ₂, ja₁jaun₂ bá₄ ꞌi₄ a₂ꞌɨ₅ ꞌauꞌ₂.
Juɨ₁liaꞌ₂ jme₁ne₁ dsa₂
22 ꞌLë́₅ jme₁ne₁ dsa₂ juɨ₁liaꞌ₂ lë́₅ caun₂ si₂ nɨ₁tsɨ́₅ quióꞌ₅ nɨ₁ŋɨ₁ dsa₂; ꞌuɨg₅₄ jaun₂ në́₃, në₁juaꞌ₂ dse₃ jme₁neꞌ₁, ján₃ bá₄ le₂jaun₂ co₂ꞌnióꞌ₄ tág₅ bá₄ si₂ ta₁jangꞌ₂;
23 la₁ në₁juaꞌ₂ tsá₃ dse₃ jme₁neꞌ₁, ta₁jangꞌ₂ bá₄ lë́₅ qui₁néꞌ₃. Në₁juaꞌ₂ si₂ quiángꞌ₂ në́₃, chíꞌ₅ chi₁liáꞌ₃, ¡ꞌe₂ guë́₄ ꞌŋio₅ juëꞌ₂ lë́₅ qui₁néꞌ₃ në₁juaꞌ₂ le₂jaun₂!
Juɨ₁liaꞌ₂ a₂ꞌnio₃ dsa₂ Diú₄, a₂ꞌɨ́n₅ guëꞌ₂ dsɨ́₅ cu₄ në́₃
24 ꞌꞌI₁jan₂ tsá₃ ꞌein₂ lé₂ jme₃ti₃ ta₁ ne₄ on₃ juɨg₅₄; ia₁ jme₃ꞌŋiai₅₄ jan₂, i₂jan₂ guëꞌ₂ jme₃ꞌnioi₃. O₃ náu₃ tiá₂ quianꞌ₅₄ jan₂, i₂jan₂ guëꞌ₂ tsá₃ le₃jein₅₄. Tsá₃ ꞌein₂ lé₂ jme₃ti₃ ne₄ Diú₄, le₂jiog₅ ne₄ a₂ꞌɨ́n₅ dsɨ́₅ cu₄ në́₃.
Jmo₅ Diú₄ ꞌí₁ chiꞌ₂-guein₂ quiáin₅
25 ꞌJaun₂ në́₃ juɨ́g₂ jniá₂ ꞌniaꞌ₂: Tsá₃ lë₁can₂ ꞌniaꞌ₂ o₂i₁ dsɨ₅ juaꞌ₅₄ a₂ŋɨ́₄ ꞌɨ₅ ꞌauꞌ₂ ꞌe₂ quëꞌ₅₄, o₃ ꞌe₂ ꞌagꞌ₅₄ të₁liaꞌ₂ changꞌ₂, on₃ guëꞌ₂ o₄quióꞌ₄ nɨ₁ŋɨꞌ₁ ꞌniaꞌ₂, ꞌe₂ ꞌmɨꞌ₂ a₂quɨꞌ₅₄. ¿Tsa₁ quen₅ guë́₄ jme₂dsí₂ a₂chan₂ dsa₂ liaꞌ₂ conꞌ₂ guë́₄ má₃?
26 Jɨn₄ deꞌ₂ ꞌniaꞌ₂ juɨ₁liaꞌ₂ i₁tan₅ i₂i₂nio₄ gueiꞌ₅₄: tsá₃ ꞌe₂ jne₂₃, on₃ guëꞌ₂ ꞌe₂ cágꞌ₅, juaꞌ₅₄ a₂dsia₂₃ loꞌ₂; la₁ Ŋéiꞌ₅ ꞌniaꞌ₂ i₂guá₅ gueiꞌ₅₄ i₂juɨ́g₃ qui₂jme₂tau₅₄. Jaun₂ në́₃, ¿Tsa₁ quenꞌ₅ guë́₄ ꞌniaꞌ₂ liaꞌ₂ conꞌ₂ guë́₄ jáꞌ₂ ꞌéi₂?
27 ¿ꞌEin₂ ꞌniaꞌ₂, të₂le₃ ia₁ a₂ŋɨ́₄ ꞌɨ₅ ꞌauꞌ₂, lé₂ le₃jmóꞌ₂ ꞌniaꞌ₂ a₂lé₂ le₃changꞌ₂ caun₂ hora ŋag₅₄ guë́₄?c
28 ꞌ¿ꞌE₂ ꞌuɨg₅₄ a₂ŋɨ́₄ lë₃ ꞌɨ₅ ꞌauꞌ₂ ꞌniaꞌ₂ juɨ₁liaꞌ₂ o₄quióꞌ₄ ꞌmɨꞌ₂ a₂quɨꞌ₅₄? Jag₄ deꞌ₂ ꞌniaꞌ₂ juɨ₁liaꞌ₂ ꞌa₂ liaꞌ₂ dsɨ₂cón₃ lí₁ a₂cha₂ ja₁nau₂; on₃juaꞌ₅₄ i₂jmo₅ ta₁ ꞌuaꞌ₂, on₃ guëꞌ₂ ꞌme₂₃;
29 la₁ juɨ́g₂ jniá₂ ꞌniaꞌ₂, ca₂liaꞌ₂ jŋiaꞌ₅₄ Rag₅₄ Salomón liaꞌ₂ conꞌ₂ jme₁quɨ́ꞌ₅ tsɨnꞌ₅₄ a₂jláꞌ₁ guë́₄, tsá₃ ca₂rë₃jláinꞌ₁ juɨ₁liaꞌ₂ jláꞌ₁ lí₁.
30 Jaun₂ në́₃, chi₂juaꞌ₂ Diú₄ le₂në₅ jmo₂₃ jláꞌ₁ nau₂ a₂cha₂ jmɨg₄ në₃, la₁ ꞌióg₃ guëꞌ₂ dsɨ₃ꞌén₂ dsi₂si₂, ¡ꞌë₂ guë́₄ bá₄ ꞌniaꞌ₂ dsa₂ tsá₃ lɨn₄ ꞌén₂ jmo₃ ꞌí₁ qui₃cheinꞌ₃ ꞌniaꞌ₂ dse₃!
31 Jaun₂ le₂në₅, tsá₃ lë₁can₂ ꞌniaꞌ₂ o₂i₁ dsɨ₅, juaꞌ₅₄ a₂qui₁ŋagꞌ₅₄ ꞌniaꞌ₂: “¿ꞌE₂ que₅₄ jniog₄?” o₃ “¿ꞌE₂ ꞌneꞌ₅₄ jniog₄?” o₃ “¿ꞌE₂ ꞌmɨꞌ₂ quiꞌ₅₄ jniog₄?”
32 Ia₁ dsa₂ mɨ₂güɨ́g₃ bá₄ i₂nio₄ qui₂ꞌen₅ ꞌɨ́n₅ dsɨ́₅ ca₂le₃jë́₃ a₂në₅. I₂ŋi₅ bá₄ Ŋéiꞌ₅ ꞌniaꞌ₂ i₂guá₅ gueiꞌ₅₄, a₂ꞌnióꞌ₅ quiánꞌ₂ ꞌniaꞌ₂ le₃jë́₃ a₂në₅.
33 La₁ jmo₄ deꞌ₂ jŋiá₅ ꞌniaꞌ₂ ꞌɨ́n₅ ꞌauꞌ₂ a₂jiá₃ ꞌéiꞌ₃ quióꞌ₅ Diú₄ ja₁congꞌ₂, quianꞌ₅₄ a₂jmóꞌ₂ ꞌniaꞌ₂ ca₂le₃jë́₃ a₂dse₃ a₂të₅ dsɨ́₅ ꞌéi₂, jaun₂ guë́₄ guéiꞌ₁ ꞌniaꞌ₂ le₃jë́₃ a₂në₅ a₂ŋag₅₄ guë́₄.
34 Tsá₃ lë₁can₂ ꞌniaꞌ₂ o₂i₁ dsɨ₅ jaun₂, o₄quióꞌ₄ jmɨg₄ ꞌióg₃, ia₁ jma₃quén₅ o₂i₁ dsɨ₅ cha₂ bá₄ liaꞌ₂ co₂jmɨg₄ liaꞌ₂ co₂jmɨg₄.