Jme₂tag₅ Jesús jme₂tɨin₂₃ Nicodemo
3
Jme₁chan₂ jan₂ dsa₂ fariseo* i₂jme₁chen₂ Nicodemo, i₂jme₁lɨ́n₄ jan₂ dsa₂ dsen₅₄ quián₅ dsa₂ judíos*.
2 Ŋe₄ ꞌéi₂ ca₂i₁jɨin₁₂ Jesús të₂le₃ ca₂nei₂, jaun₂ ca₂juáꞌ₂ ca₂tsɨ́ꞌ₃ Jesús:
―Të₅, ne₄ bá₄ jniaꞌ₅₄ a₂lɨ́nꞌ₅ ꞌne₂ jan₂ të₅ i₂chen₄ quián₅ Diú₄, ia₁ ca₂liaꞌ₂ ꞌi₁jan₂ tsá₃ lé₂ le₃jmo₃ léi₄ juëꞌ₂ le₂në₅, juɨ₁liaꞌ₂ jmoꞌ₂ ꞌne₂, juaꞌ₅₄ tsá₃ quiongꞌ₅₄ Diú₄.
Jesus habla con Nicodemo (Juan 3.1-21)
3 Jaun₂ në́₃ ca₂juáꞌ₂ Jesús ca₂tsɨ́ꞌ₃ Nicodemo:
―A₂dsɨ₂jóꞌ₃ juɨ́g₂ jniá₂ ꞌne₂, në₁juaꞌ₂ tsá₃ rë₂chan₂ táng₃ dsa₂, tsá₃ lé₂ le₃jág₃ ja₁gon₂ Diú₄.
4 Jaun₂ ca₂ŋag₃ Nicodemo:
―¿ꞌA₂ bá₄ liaꞌ₂ lé₂ le₃chan₂ táng₃, jan₂ dsa₂ ma₂juɨnꞌ₂? ¿Lé₂ le₃ꞌí₂ táng₃ néꞌ₃ të₂dsɨ́₅ chog₅₄, jaun₂ le₃chain₂ táng₃?
5 Jaun₂ ca₂ŋag₃ Jesús:
―A₂dsɨ₂jóꞌ₃ juɨ́g₂ jniá₂ ꞌne₂, juɨ₁liaꞌ₂ i₂tsá₃ rë₂chan₂ le₃quióꞌ₅ jmɨg₂, quianꞌ₅₄ le₃quióꞌ₅ Jme₂dsí₂, tsá₃ lé₂ le₃ꞌí₂ ja₁gon₂ Diú₄.
6 Juɨ₁liaꞌ₂ i₂rë₂chan₂ le₃quióꞌ₅ nɨ₁ŋɨ́₅, jan₂ dsa₂ nɨ₁ŋɨ́₅ bá₄ ꞌéi₂; juɨ₁liaꞌ₂ i₂rë₂chan₂ le₃quióꞌ₅ Jme₂dsí₂, jan₂ dsa₂ i₂gu₂dsí₂ bá₄ lɨ́n₅ ꞌéi₂.
7 Tsá₃ juɨ₁dsi₂góꞌ₃ ꞌauꞌ₂ ꞌne₂ a₂juáꞌ₅ jniá₂: “Tion₅₄ bá₄ le₃chanꞌ₂ ꞌniaꞌ₂ táng₃.”
8 ꞌAg₅ dsí₂ juɨ₁ꞌa₂ guë́₃ jáꞌ₄ ꞌnio₃ ꞌag₃; nagꞌ₂ bá₄ ꞌne₂ mɨꞌ₅₄ a₂lë́₂, la₁ia₁ tsá₃ ŋiꞌ₅₄ a₂jáꞌ₄ já₅, on₃ guëꞌ₂ a₂jáꞌ₄ dsó₃. Ján₃ bá₄ le₂në₅ lɨ́n₅ ca₂le₃jɨ́n₃ i₂rë₂chan₂ le₃quióꞌ₅ Jme₂dsí₂.
9 Jaun₂ në́₃ ca₂ŋag₃ táng₃ Nicodemo:
―¿ꞌA₂ bá₄ liaꞌ₂ lé₂ le₃lé₂ a₂juáꞌ₂ ꞌne₂ në₅?
10 Jaun₂ ca₂ŋag₃ Jesús:
―¿ꞌNe₂ guëꞌ₂ lɨ́ngꞌ₅ jan₂ të₅ quián₅ dsa₂ juɨg₂ Israel*, tonꞌ₂ tsá₃ ŋɨ́ꞌ₂ bá₄ guë́₄ ꞌauꞌ₂ jág₁ në₅?
11 A₂dsɨ₂jóꞌ₃ juɨ́g₂ jniá₂ ꞌne₂, juɨ₁liaꞌ₂ a₂ma₂tag₂ bá₄ jniaꞌ₅₄, dsia₂; ján₃ bá₄ jangꞌ₂ jniaꞌ₅₄ jág₁ dsau₅ juɨ₁liaꞌ₂ a₂ma₂të́₂ ne₄ jniaꞌ₅₄. La₁ ꞌniaꞌ₂ në́₃ tsá₃ gueꞌ₂ jág₁ dsau₅ a₂jangꞌ₂ jniaꞌ₅₄.
12 Chi₂juaꞌ₂ ma₂në₂juáꞌ₃ jniá₂ a₂ꞌë₂₃ juɨ₁liaꞌ₂ a₂cha₂ mɨ₂güɨ́g₃ la₂, tonꞌ₂ tsá₃ ꞌénꞌ₂ bá₄ guëꞌ₂ ꞌniaꞌ₂, ¿ꞌa₂ bá₄ guëꞌ₂ liaꞌ₂ le₃ꞌénꞌ₂ ꞌniaꞌ₂ jág₁ quió₃ në₁ca₂juáꞌ₃ jniá₂ ca₂juɨ́g₂ ꞌniaꞌ₂ a₂ꞌë₂₃ juɨ₁liaꞌ₂ a₂cha₂ gueiꞌ₅₄ i₂juɨ́g₃?
13 ꞌCa₂liaꞌ₂ ꞌi₁jan₂ tsá₃ ꞌein₂ ma₂uɨ́g₂ gueiꞌ₅₄ i₂juɨ́g₃, jŋiaꞌ₅₄ liaꞌ₂ ꞌéi₂ i₂ca₂sión₃ gueiꞌ₅₄ i₂juɨ́g₃; co₂ꞌnióꞌ₄ ꞌŋiog₅ Jaun₅* dsa₂ mɨ₂güɨ́g₃.a
14 Juɨ₁liaꞌ₂ ca₂chónꞌ₂ Moisés dsɨ₂mɨꞌ₂ gueiꞌ₅₄ ja₁lë́₄ ꞌuë₃ quein₂ co₂ꞌŋiog₅ jaun₂, ján₃ bá₄ le₂jaun₂ ꞌi₄ ꞌéiꞌ₃ chónꞌ₂ dsa₂ gueiꞌ₅₄ Jaun₅ dsa₂ mɨ₂güɨ́g₃,
15 ia₁jaun₂ ca₂le₃jɨ́n₃ i₂ꞌén₂ të₂le₃ quióꞌ₅ ꞌéi₂, le₃chain₂ co₂tan₅₄.
ꞌNio₃ Diú₄ dsa₂ mɨ₂güɨ́g₃
16 ꞌJaun₂, ꞌuɨg₅₄ ia₁ a₂ŋɨ́₄ lë₃ ca₂rë₃ꞌnio₃ Diú₄ ca₂rë₃ꞌnioi₃ dsa₂ mɨ₂güɨ́g₃, ca₂cuɨin₃ Ja₁ŋiꞌ₅₄ i₂jan₂ tan₅₄ quiáin₅, ia₁jaun₂ ca₂le₃jɨ́n₃ i₂ꞌén₂ të₂le₃ quióꞌ₅ ꞌéi₂, tsá₃ dsɨ₃ꞌéin₂, tonꞌ₂ le₃chain₂ bá₄ co₂tan₅₄.
17 Ia₁ on₃juaꞌ₅₄ jaun₂ ca₂chei₃ Diú₄ ca₂chein₃ Ja₁ŋiꞌ₅₄ mɨ₂güɨ́g₃ a₂qui₃ꞌë́₂ uɨg₅ ja₁con₂ dsa₂ mɨ₂güɨ́g₃; a₂jaun₂ bá₄ ca₂chei₃ ia₁jaun₂ lión₂ dsa₂ mɨ₂güɨ́g₃ të₂le₃ quianꞌ₅₄ ꞌéi₂.
18 Juɨ₁liaꞌ₂ dsa₂ i₂ꞌén₂ të₂le₃ quióꞌ₅ ꞌéi₂, tsá₃ rë₂ꞌë́₂ uɨg₅ ja₁coin₂; la₁ia₁ juɨ₁liaꞌ₂ i₂tsá₃ ꞌén₂ guëꞌ₂ në́₃, ma₂rë₂ꞌë́₂ uɨg₅ ja₁coin₂, ꞌuɨg₅₄ ia₁ a₂tsá₃ ꞌéin₂ të₂le₃ quióꞌ₅ Ja₁ŋiꞌ₅₄ i₂jan₂ tan₅₄ quián₅ Diú₄.
19 A₂la₂ bá₄ uɨg₅ a₂rë₂ꞌë́₂ jaun₂: a₂ma₂gua₅ si₂ ja₁con₂ dsa₂ mɨ₂güɨ́g₃, la₁ ca₂rë₃ꞌnio₃ guë́₄ dsa₂ jë₄ qui₁néꞌ₃ liaꞌ₂ conꞌ₂ guë́₄ ja₁tág₅ si₂, ia₁ a₂ꞌlɨgꞌ₅₄ bá₄ jme₁jmo₂₃-dsáu₅.
20 Ca₂le₃jɨ́n₃ dsa₂ i₂jmo₅ a₂ꞌlɨgꞌ₅₄, ꞌioꞌ₅₄ si₂, jaun₂ tsá₃ jme₂quiáin₃ ja₁tág₅ si₂, ia₁jaun₂ tsá₃ le₃jniá₂ a₂ꞌlɨgꞌ₅₄ a₂jmo₂₃-dsáu₅.
21 La₁ia₁ juɨ₁liaꞌ₂ dsa₂ i₂chan₂ caun₂ juɨ₅ co₂dsau₅, jme₂quiáin₃ ja₁tág₅ si₂, ia₁jaun₂ le₃jniá₂, le₃quióꞌ₅ Diú₄ bá₄ já₅ a₂dse₃ a₂jmo₅ ꞌéi₂.
Jángꞌ₅ táng₃ jág₁ dsau₅ Juan₅₄ i₂chon₅ dsa₂ jmɨg₂ juɨ₁liaꞌ₂ ꞌein₂ ꞌéi₂ Jesús
22 Cang₂ jaun₂, ŋó₃ Jesús juɨ₅ ꞌuë₃ Judea quiainꞌ₅₄ chiꞌ₂ dsɨ₂guia₃-tɨ́n₂ quiáin₅, jaun₂ ja₁jaun₂ ca₂ꞌí₃ ca₂la₂ uë́₂ quiainꞌ₅₄ ꞌéi₂, qui₂choin₂₃ jmɨg₂ dsa₂.b
Juan testifica acerca de Jesús (Juan 3.22-36)
23 Ján₃ bá₄ le₂jaun₂ jme₁ꞌen₅₄ Juan₅₄ në́₃, choin₂₃ jmɨg₂ dsa₂,c caun₂ ja₁chei₂ Enón, ma₂quián₅ Salim, ia₁ ja₁jaun₂ jme₁cha₂ ꞌlióng₂ jmɨg₂; jaun₂ jme₁ja₂lén₂ dsa₂ ia₁jaun₂ qui₃cho₃ Juan₅₄ jmɨg₂.d
24 (A₂la₂ ca₂lë₃ néꞌ₃ guë́₄ a₂tonꞌ₂ dsa₂ Juan₅₄ néꞌ₃ ꞌmá₃.)
25 Jaun₂ në́₃, i₂lɨn₅₄ dsa₂ i₂quianꞌ₅₄ Juan₅₄ ca₂tsɨ́in₂ quianꞌ₅₄ jan₂ dsa₂ judío* ne₄ jág₁ juɨ₁liaꞌ₂ a₂jmo₅ dsa₂ le₁jɨ́in₃.
26 Jaun₂ i₃léin₂ i₁chiꞌ₄ Juan₅₄:
―Të₅, dsa₂ i₂jme₁ꞌen₅₄ quianꞌ₅₄ ꞌne₂ të₂le₃ ja₁ꞌia₂ ꞌiog₂ të₂le₃ quióng₄ Cuá₃ Jordán, dsa₂ i₂ꞌɨ́nꞌ₅ ꞌne₂ ꞌéi₂, jë₂ bá₄ choin₂₃ jmɨg₂ dsa₂,e jaun₂ ca₂le₃jɨ́n₃ bá₄ dsa₂ dsɨ₂léin₂ ja₁coin₂.
27 Jaun₂ ca₂ŋag₃ Juan₅₄:
―Ca₂liaꞌ₂ ꞌi₁caun₂ tsá₃ ꞌe₂ lé₂ le₃cha₂ quióꞌ₅ dsa₂ juaꞌ₅₄ tsá₃ ŋei₂ gueiꞌ₅₄ i₂juɨ́g₃.
28 Ca₂neiꞌ₂ bá₄ ꞌniaꞌ₂ guiongꞌ₅₄ jme₁ca₂juáꞌ₃: “On₃juaꞌ₅₄ jniá₂ lɨ́ng₅ I₂rë₂ꞌɨ́n₁* quián₅ Diú₄; jan₂ dsa₂ i₂chen₄ ne₄ juɨ₅ quióꞌ₅ ꞌéi₂ bá₄ lɨ́ng₅.”
29 I₂ca₂tɨ́n₂ dsa₂ ŋeꞌ₂ i₂jenꞌ₂ gu₂ bá₄, dsa₂ mɨ́₂ i₂jenꞌ₂ gu₂ quiainꞌ₅₄. Jaun₂ dsa₂ a₂mei₅₄ quián₅ dsa₂ ŋeꞌ₂ në́₃, chi₁jŋia₁ nag₂₃. Jaun₂ ꞌioꞌ₂ jénꞌ₅ jë₁ma₂nág₂ jág₁ quióꞌ₅ ꞌéi₂. Ján₃ bá₄ le₂jaun₂ jniá₂ në́₃, rë₂ꞌŋia₅ a₂ꞌioꞌ₂ jénꞌ₅ dsɨ₃.
Juɨ₁liaꞌ₂ i₂já₅ gueiꞌ₅₄ i₂juɨ́g₃
30 ꞌꞌÉi₂ ca₂tɨ́n₂ le₃dsein₅₄ guë́₄; jniá₂ guëꞌ₂ ca₂tɨ́ng₂ le₃megꞌ₂.
31 Juɨ₁liaꞌ₂ i₂já₅ juɨ₅ gueiꞌ₅₄ i₂juɨ́g₃, dsen₅₄ guë́₄ ne₄ quióꞌ₅ ca₂le₃jɨ́n₃. Juɨ₁liaꞌ₂ i₂já₅ guaꞌ₅₄ ꞌuë₃, jan₂ i₂chan₂ guaꞌ₅₄ ꞌuë₃ bá₄ ꞌéi₂. Jaun₂ dsia₂₃ juɨ₁liaꞌ₂ a₂quióꞌ₅ guaꞌ₅₄ ꞌuë₃. La₁ia₁ juɨ₁liaꞌ₂ i₂já₅ gueiꞌ₅₄ i₂juɨ́g₃, dsen₅₄ guë́₄ ne₄ quióꞌ₅ ca₂le₃jɨ́n₃.
32 Jángꞌ₅ ꞌéi₂ jág₁ dsau₅ juɨ₁liaꞌ₂ a₂ma₂të́₂ ne₅₄, juɨ₁liaꞌ₂ a₂ma₂nág₂ në́₃; la₁ ꞌi₁jan₂ tsá₃ ꞌein₂ tónꞌ₂ juɨ₅ jág₁ dsau₅ a₂jángꞌ₅ ꞌéi₂.
33 La₁ia₁ juɨ₁liaꞌ₂ i₂tónꞌ₂ juɨ₅, ma₂cáun₅ ꞌí₁ a₂dsónꞌ₂ bá₄ tí₅ jág₁ a₂juáꞌ₂ Diú₄;
34 ia₁ i₂ca₂chen₃ Diú₄ në́₃, dsia₂₃ jág₁ quióꞌ₅ Diú₄, ia₁ cuɨn₅ Diú₄ Jme₂dsí₂ quiáin₅ ca₂liaꞌ₂ tsá₃ niog₅ ꞌéiꞌ₃.
35 A₂ꞌnio₃ Diú₄ Jmei₂ ꞌnioi₃ Ja₁ŋiꞌ₅₄, jaun₂ o₄gú₃ ꞌéi₂ ma₂dsia₃ ca₂le₃jë́₃.
36 Juɨ₁liaꞌ₂ i₂ꞌén₂ të₂le₃ quióꞌ₅ Ja₁ŋiꞌ₅₄ Diú₄, le₃chain₂ bá₄ co₂tan₅₄; la₁ juɨ₁liaꞌ₂ i₂tsá₃ neꞌ₅₄ le₃quióꞌ₅ Ja₁ŋiꞌ₅₄ Diú₄, tsá₃ të₃ ne₅₄ a₂le₃chain₂ rë₂ꞌŋiai₂₃, tonꞌ₂ të₂le₃ të₃gua₄ ꞌnei₂ dsɨ́₅ Diú₄ ja₁coin₂.