Dsia₅ Jesús jág₁ quianꞌ₅₄ jan₂ ꞌio₅₄ i₂chan₂ Samaria
4
Jme₁ca₂rë₃ŋi₅ Te₁guiꞌ₅₄ a₂ma₂nág₂ dsa₂ fariseos* jág₁, ꞌŋio₅ lɨn₃ guë́₄ juɨn₅ dsa₂ i₂ma₂quianꞌ₅₄ Jesús, qui₂ma₂cho₃ jmɨg₂a liaꞌ₂ conꞌ₂ guë́₄ Juan₅₄;
2 (o₁jŋiaꞌ₅₄ on₃juaꞌ₅₄ ꞌŋiog₅ Jesús choin₂₃ jmɨg₂ dsa₂,b jŋiaꞌ₅₄ liaꞌ₂ chiꞌ₂ dsɨ₂guia₃-tɨ́n₂ quiáin₅ bá₄),
Jesús habla con una mujer samaritana (Juan 4.1-42)
3 jaun₂ ca₂o₃ꞌɨ́in₃ ꞌuë₃ Judea, a₂ŋáiꞌ₃ táng₃ juɨ₅ ꞌuë₃ Galilea.
4 Ja₁tioinꞌ₅₄ juɨ₅ jaun₂, ca₂tɨ́in₂ ŋɨ́i₃ ꞌuë₃ Samaria.
5 Jaun₂ në́₃ ca₂dsi₃léin₂ caun₂ juɨg₂ ja₁tén₄ Samaria a₂chei₂ Sicar, ma₂quián₅ ca₂jne₄ ꞌuë₃ a₂jme₁ca₂cuë₃ Jacob ma₂lɨ́gꞌ₂ ca₂cuë́ꞌ₃ ja₁ŋiꞌ₅₄ i₂chen₂ Së́₄.
6 Ja₁jaun₂ jme₁dsi₅₄ caun₂ tau₂ pozo a₂të́ꞌ₂ dsa₂ a₂quióꞌ₅ Jacob. Jaun₂ ca₂guá₂ Jesús cau₅, ia₁ a₂ca₂ꞌúꞌ₃ ꞌein₅₄ juɨ₅. Jme₁ma₂ca₂të́₂ conꞌ₂ dsi₂ŋíꞌ₃ jaun₂.
7 Të₃ guá₅ jaun₂ ca₂dsióg₃ jan₂ ꞌio₅₄ i₂chan₂ Samaria a₂i₃dsein₂₃ jmɨg₂ pozo jaun₂. Jaun₂ ca₂juáꞌ₂ Jesús ca₂tsɨ́ꞌ₃ ꞌio₅₄ ꞌéi₂:
―Cuë₄ ca₂juɨg₄ jmɨg₂ guɨꞌ₅₄.
8 Të₁liaꞌ₂ jaun₂, i₁len₅₄ jë₄ juɨg₂ chiꞌ₂ dsɨ₂guia₃-tɨ́n₂, i₁lia₅ má₃ a₂guë́ꞌ₃.
9 Jaun₂ në́₃ ca₂juáꞌ₂ ꞌio₅₄ chan₂ Samaria ꞌéi₂ ca₂tsɨ́ꞌ₃ Jesús:
―¿ꞌA₂ liaꞌ₂ lë́₅ jaun₂, ꞌne₂ jan₂ dsa₂ i₂lɨ́n₅ judío*, mɨꞌ₂ jmɨg₂ ne₃ jniá₂, jan₂ ꞌio₅₄ chan₂ Samaria?
(Ia₁ tsá₃ jág₁ ꞌei₅ dsa₂ judíos quianꞌ₅₄ dsa₂ chan₂ Samaria.)c
10 Jaun₂ në́₃ ca₂ŋag₃ Jesús:
―Juaꞌ₅₄ meiꞌ₂ guë́₃ ŋiꞌ₅₄ ꞌne₂ ꞌe₂ jaun₂ a₂cuë₅ Diú₄, quianꞌ₅₄ ꞌein₂ i₂mɨ₅ jmɨg₂ neꞌ₅₄, jme₁mɨ́ꞌ₂ ne₃ jniá₂, jaun₂ jniá₂ në́₃ cuë₅₄ jmɨg₂ jénꞌ₃.
11 Jaun₂ ca₂juáꞌ₂ ꞌio₅₄ ca₂tsɨ́ꞌ₃ Jesús:
―Guiꞌ₅₄, tsá₃ ŋí₁ cubeta cha₂ quiángꞌ₂ a₂dséngꞌ₄ jmɨg₂, tonꞌ₂ a₂jɨꞌ₂ bá₄ tau₂ pozo. ¿ꞌA₂ guëꞌ₂ jáꞌ₄ cánꞌ₁ jmɨg₂ jénꞌ₃ a₂cuë́ꞌ₂ jniá₂?
12 ¿ꞌE₂, ꞌne₂ lɨ́ngꞌ₅ i₂juɨnꞌ₂ guë́₄ conꞌ₂ guë́₄ ꞌlag₄ jmei₂ jniog₄ Jacob, i₂ca₂cuë₃ pozo la₂? Jme₁cán₂ ꞌéi₂ jmɨg₂ a₂ꞌɨ́nꞌ₂ ꞌŋiog₅ quianꞌ₅₄ chiꞌ₂ quiáin₅, quianꞌ₅₄ jáꞌ₂ quiáin₅ në́₃.
13 Jaun₂ ca₂ŋag₃ Jesús:
―Ca₂le₃jɨ́n₃ juɨ₁liaꞌ₂ dsa₂ i₂ꞌɨ́nꞌ₂ jmɨg₂ la₂, lé₂ táng₃ dsɨ́₅ i₁ꞌɨ́nꞌ₂ jmɨg₂;
14 la₁ia₁ juɨ₁liaꞌ₂ i₂ꞌɨ́nꞌ₂ jmɨg₂ a₂cuë́₄ jniá₂, liaꞌ₂ o₁lɨ́gꞌ₂ jmɨg₄ tsá₃ ma₃lé₂ dsɨ́₅ i₁ꞌɨ́nꞌ₂ jmɨg₂. Ia₁ juɨ₁liaꞌ₂ jmɨg₂ a₂cuë́₄ jniá₂, lé₂ në₂jag₄ bá₄ caun₂ o₄tu₁ jmɨg₂ të₂le₃ quióꞌ₅, a₂qui₃ꞌiá₃ jmɨg₂ a₂gu₂dsí₂ a₂jmo₃ a₂le₃chain₂ co₂tan₅₄.
15 Jaun₂ në́₃ ca₂juáꞌ₂ ꞌio₅₄ ca₂tsɨ́ꞌ₃ Jesús:
―Guiꞌ₅₄, cuë₄ jmɨg₂ a₂ꞌëꞌ₂ në₅, ia₁jaun₂ tsá₃ ma₃le₃quein₂ dsɨ₃, on₃ guëꞌ₂ caun₂ guio₅₄ guë́₄ ca₂të₂ la₂ i₁dséng₃ jmɨg₂.
16 Jaun₂ ca₂juáꞌ₂ Jesús:
―Guanꞌ₂ o₂teꞌ₂ dsɨ₂i₂gogꞌ₂, jaun₂ ŋeꞌ₅₄ táng₃ ja₁lá₃.
17 Jaun₂ ca₂ŋag₃ ꞌio₅₄ ꞌéi₂:
―Tsá₃ dsɨ₂i₂gu₃ jniá₂ chan₂.
Jaun₂ në́₃ ca₂juáꞌ₂ Jesús:
―Tí₅ bá₄ jág₁ quiángꞌ₂ a₂në₂juaꞌ₅₄, a₂tsá₃ chan₂ dsɨ₂i₂gogꞌ₂;
18 ia₁ ꞌŋiá₂ dsɨ₂i₂gogꞌ₂ i₂ma₂ca₂néꞌ₂ quiangꞌ₅₄, jaun₂ i₂ŋéiꞌ₂ quiangꞌ₅₄ rë₂në́₃ ján₃, on₃juaꞌ₅₄ dsɨ₂i₂gogꞌ₂ ꞌéi₂. Dsónꞌ₂ bá₄ tí₅ jág₁ quiángꞌ₂ a₂në₂juaꞌ₅₄.
19 Jme₁ca₂nág₂ ꞌio₅₄ jág₁ në₅, ca₂juáꞌ₂ ca₂tsɨ́ꞌ₃ Jesús:
―Te₁guiꞌ₅₄, dsónꞌ₂ bá₄ lɨ́nꞌ₅ ꞌne₂ jan₂ dsa₂ i₂ꞌë́₂ jág₁ quián₅ Diú₄, lɨ́n₂ jniá₂.
20 Ja₁chíꞌ₄ máꞌ₂ la₂ ca₂jme₃juɨnꞌ₂ dsa₂ canꞌ₅₄ quián₂ jniaꞌ₅₄ ca₂jme₃juɨinꞌ₂ Diú₄ ma₂lɨ́gꞌ₂, la₁ia₁ ꞌniaꞌ₂ i₂lɨ́ngꞌ₅ dsa₂ judíos në́₃, juáꞌ₂ Jerusalén bá₄ ja₁ca₂tɨ́n₂ dsa₂ jme₃juɨinꞌ₂ Diú₄.
21 Jaun₂ ca₂ŋag₃ Jesús:
―Juɨ₁le₂ꞌéngꞌ₂ bá₄ a₂juáꞌ₅ jniá₂: já₅ caun₂ jmɨg₄ a₂jme₁juɨnꞌ₂ ꞌniaꞌ₂ Diú₄, on₃juaꞌ₅₄ i₁nógꞌ₅ máꞌ₂ la₂, on₃ guëꞌ₂ o₁nóꞌ₅ ꞌniaꞌ₂ Jerusalén.
22 ꞌNiaꞌ₂ jme₂juɨ́ngꞌ₁ të₃ tsá₃ ŋiꞌ₅₄ ꞌein₂ jme₂juɨ́ngꞌ₁; a₂dsau₅ bá₄ jniaꞌ₅₄, ne₄ jniaꞌ₅₄ ꞌéin₂ i₂jme₂juɨ́nꞌ₂; ia₁ të₂le₃ quióꞌ₅ dsa₂ judíos bá₄ já₅ jág₁ a₂lión₂ dsa₂.
23 La₁ já₅ hora, tonꞌ₂ ma₂të́₂ dsónꞌ₂, a₂jme₃juɨnꞌ₂ dsa₂ Jmei₂, juɨ₁liaꞌ₂ dsa₂ i₂jme₂juagꞌ₂ të₃dsónꞌ₂, jme₃juagꞌ₂ të₂le₃ gu₂dsí₂ tonꞌ₂ të₂le₃ quianꞌ₅₄ jág₁ dsau₅. Ia₁ i₂le₂ꞌéi₂ bá₄ ꞌnaꞌ₂ Jmei₂ jme₃juagꞌ₂.
24 A₂lɨ́n₅ Diú₄ jme₂dsí₂; jaun₂ juɨ₁liaꞌ₂ i₂jme₂juagꞌ₂, ca₂tɨ́in₂ jme₃juagꞌ₂ të₂le₃ gu₂dsí₂ tonꞌ₂ të₂le₃ quianꞌ₅₄ jág₁ dsau₅.
25 Jaun₂ ca₂juáꞌ₂ ꞌio₅₄:
―Guion₄ jniá₂ a₂jiá₃ Mesías, (i₂të́ꞌ₂ dsa₂ I₂rë₂ꞌɨ́n₁* quián₅ Diú₄). Jë₁ma₂guain₂₃, jaun₂ guë́₄ juáꞌ₂ ca₂le₃jë́₃ liaꞌ₂ rë₂jiá₃.
26 Jaun₂ ca₂juáꞌ₂ Jesús:
―Jniá₂ bá₄ ꞌéi₂, i₂dsia₅ jág₁ quianꞌ₅₄ ꞌne₂.
27 Të₁liaꞌ₂ jaun₂, ca₂o₃len₃ chiꞌ₂ dsɨ₂guia₃-tɨ́n₂ quiáin₅, jaun₂ ca₂i₃góꞌ₃ dsɨ́₅ jme₁ca₂jág₃ a₂dsia₅ Jesús jág₁ quianꞌ₅₄ jan₂ ꞌio₅₄. La₁ia₁ liaꞌ₂ ꞌi₁jan₂ tsá₃ ca₂tiá₂ dsɨ́₅ ŋag₃ ꞌe₂ ꞌnoꞌ₂, ꞌe₂ jág₁ dsia₂₃ quiainꞌ₅₄ ꞌio₅₄ ꞌéi₂.
28 Jaun₂, ja₁jaun₂ ca₂chiꞌ₃ ꞌio₅₄ nɨ₁dsɨg₁ quióꞌ₅, jaun₂ ŋáiꞌ₃ jë₄ juɨg₂, jaun₂ ca₂juáꞌ₂ ca₂tsɨ́ꞌ₃ dsa₂:
29 ―I₂nóꞌ₅ ꞌniaꞌ₂ i₂jɨn₄ jan₂ dsa₂ ŋeꞌ₂ i₂ma₂në₂juáꞌ₂ ca₂le₃jë́₃ ꞌe₂ a₂ma₂jmo₃ jniá₂. ¿On₁juaꞌ₅₄ meiꞌ₂ tsá₃ ꞌéi₂ lɨ́n₅ I₂rë₂ꞌɨ́n₁ quián₅ Diú₄?
30 Jaun₂ në́₃ ca₂ꞌuɨn₂ dsa₂ jë₄ juɨg₂ ca₂i₃léin₂ ja₁guá₄ Jesús.
31 Të₁liaꞌ₂ jaun₂, ca₂chi₃quióng₂ jmɨg₄ chiꞌ₂ dsɨ₂guia₃-tɨ́n₂ chi₂quiáin₂ jmɨg₄ Jesús a₂guë́ꞌ₃, juáꞌ₂:
―Të₅, quéꞌ₂ ca₂la₂.
32 Jaun₂ ca₂juáꞌ₂ Jesús:
―Cha₂ caun₂ má₃ a₂guëꞌ₅₄ jniá₂, a₂tsá₃ cuɨnꞌ₂ ꞌniaꞌ₂.
33 Jaun₂ në́₃ qui₂ca₂ŋɨ́ꞌ₃ chiꞌ₂ dsɨ₂guia₃-tɨ́n₂ rɨinꞌ₅₄, jain₂ jain₂:
―¿On₃ bá₄ chan₂ jan₂ i₂ma₂o₃can₅ má₃ a₂guë́ꞌ₃?
34 La₁ ca₂juáꞌ₂ Jesús ca₂tsɨ́ꞌ₃ ꞌéi₂:
―A₂jaun₂ bá₄ má₃ quió₃ jniá₂, a₂jmo₅₄ ꞌéiꞌ₃ a₂ꞌŋio₂ dsɨ́₅ i₂ca₂chei₃, a₂jme₁ꞌŋiag₅ ta₁ quióꞌ₅ në́₃.
35 ¿ꞌOn₁ juáꞌ₂ guëꞌ₂ ꞌniaꞌ₂: “ꞌEi₅ bá₄ guë́₄ quén₂ tsɨꞌ₂ a₂ráu₃”? La₁ia₁ jniá₂ juɨ́g₂ ꞌniaꞌ₂, jag₄ ꞌa₂ liaꞌ₂ ma₂tionꞌ₅₄ dsa₂ le₁jŋia₂₃, në₂jag₄ bá₄ a₂le₁cheinꞌ₂ ja₁nau₂ ca₂ron₂, ma₂lé₂ bá₄ cágꞌ₃.
36 Juɨ₁liaꞌ₂ dsa₂ i₂jmo₅ ta₁ ja₁nau₂ në́₃ gue₂₃ ꞌliainꞌ₅₄. Juɨ₁liaꞌ₂ a₂ráu₃, a₂cágꞌ₃ ja₁nau₂ jaun₂, a₂jiog₃ co₂tan₅₄ bá₄ jaun₂, ia₁jaun₂ co₂lë₅ bá₄ jmo₃ ꞌioꞌ₂, liaꞌ₂ dsa₂ i₂jne₅, liaꞌ₂ dsa₂ i₂cágꞌ₅ në́₃.
37 Le₂në₅ dsónꞌ₂ bá₄ quio₃d a₂dsia₅ dsa₂: “Jan₂ i₂jne₅, i₂siánꞌ₂ i₂cágꞌ₅.”
38 Jniá₂ ma₂tsɨ́ng₂ ꞌniaꞌ₂ a₂o₁cagꞌ₄ ja₁tsá₃ ta₁ ma₂jmoꞌ₅₄ ꞌniaꞌ₂ guiongꞌ₅₄, ta₁ ma₂jmo₃ i₂siánꞌ₂; jaun₂ ꞌniaꞌ₂ në́₃ ca₂lɨngꞌ₃ ta₁ quióꞌ₅ dsa₂ ꞌéi₂.
39 Juɨn₅ dsa₂ i₂chan₂ Samaria i₂tiánꞌ₅ juɨg₂ jaun₂ ca₂rë₃ꞌéin₂ të₂le₃ quióꞌ₅ Jesús jme₁ca₂nág₂ jág₁ dsau₅ a₂ca₂jángꞌ₃ ꞌio₅₄, jme₁ca₂juáꞌ₂: “Në₂juáꞌ₂ ꞌéi₂ ca₂le₃jë́₃ ꞌe₂ a₂ma₂jmo₃ jniá₂.”
40 ꞌUɨg₅₄ jaun₂ në́₃, jme₁ca₂o₃lén₂ dsa₂ chan₂ Samaria, ca₂chi₃quiáin₂ jmɨg₄ Jesús a₂jme₁jŋia₃ ꞌéi₂ quiongꞌ₅₄. Jaun₂ ca₂jŋia₃ Jesús tɨn₃ jmɨg₄ ja₁jaun₂.
41 Jaun₂ të₂le₃ juɨn₅ guë́₄ dsa₂ ca₂rë₃ꞌén₂ jme₁ca₂nág₂ jág₁ a₂juáꞌ₂ ꞌŋiog₅ Jesús.
42 Jaun₂ ca₂juáꞌ₂ dsa₂ ca₂tsɨ́ꞌ₃ ꞌio₅₄:
―Në₃ guë́₄ në́₃ ꞌéin₂ jniaꞌ₅₄, on₃juaꞌ₅₄ ꞌuɨg₅₄ jág₁ a₂ca₂juaꞌ₅₄ ꞌne₂, ia₁ a₂ma₂në₂néi₁ jniaꞌ₅₄ guio₅₄ jág₁ quióꞌ₅, jaun₂ ne₄ jniaꞌ₅₄, të₃dsónꞌ₂ bá₄ ꞌéi₂ lɨ́n₅ dsa₂ i₂lión₂ dsa₂ mɨ₂güɨ́g₃.e
Ca₂jme₃ꞌlión₂ Jesús jan₂ ja₁ŋiꞌ₅₄ jan₂ dsa₂ dsen₅₄ quián₅ dsɨ₂tan₅₄
43 Jme₁ca₂dsan₃ tɨn₃ jmɨg₄ jaun₂, ca₂o₃ꞌɨ́in₃ ja₁jaun₂, ca₂ꞌí₃ juɨ₅ ŋáiꞌ₃ juɨ₅ ꞌuë₃ Galilea.
Jesús sana al hijo de un oficial (Juan 4.43-54)
44 Ia₁ juɨ₁liaꞌ₂ ca₂juáꞌ₂ ꞌŋiog₅ Jesús, juɨ₁liaꞌ₂ jan₂ dsa₂ i₂ꞌë́₂ jág₁ o₄quióꞌ₄ Diú₄, tsá₃ jme₂go₃ dsa₂ juɨg₂ go₅₄.
45 Jme₁ca₂dsiáinꞌ₃ ꞌuë₃ Galilea në́₃, ca₂guei₃ bá₄ dsa₂ dse₃ ja₁jaun₂, ia₁ jme₁ma₂ca₂jág₃ bá₄ ca₂le₃jë́₃ ꞌe₂ a₂ca₂jmo₃ Jesús juɨg₂ Jerusalén jme₁ca₂të́₂ Jmɨg₄ Të₂ꞌɨn₅₄*, ia₁ ján₃ bá₄ jme₁i₁len₅₄ ꞌéi₂ jmɨg₄.
46 Jaun₂ në́₃, ca₂dsióg₃ táng₃ juɨg₂ Caná a₂tén₅ ꞌuë₃ Galilea ja₁ca₂jme₃tsɨ́in₃ jmɨg₂ ca₂jmo₃ vino. Ja₁jaun₂ jme₁ꞌen₅₄ jan₂ dsa₂ i₂jme₂ti₃ ta₁ ne₄ rag₅₄, i₂chan₂ jan₂ chiꞌ₂ dsoꞌ₅₄ quiáin₅, jë₄ juɨg₂ Capernaum.
47 Jme₁ca₂rë₃ŋi₅ dsa₂ ꞌéi₂ a₂ma₂ŋɨ₅ Jesús ꞌuë₃ Galilea, ꞌein₅₄ juɨ₅ a₂o₂ꞌɨ́in₃ ꞌuë₃ Judea, jaun₂ ŋei₅₄ ca₂i₁jɨin₁₂ Jesús, jaun₂ ca₂chi₃quióng₂ jmɨg₄ tion₅₄-jan₃ a₂dsó₃ ꞌéi₂ ja₁quióꞌ₄ a₂jme₃ꞌlióin₂ ja₁ŋiꞌ₅₄ i₂ron₅ ma₂i₁jón₂.
48 Jaun₂ në́₃ ca₂juáꞌ₂ Jesús:
―Tsá₃ ꞌénꞌ₂ ꞌniaꞌ₂ në₁juaꞌ₂ tsá₃ ca₂jagꞌ₅₄ léi₄ juëꞌ₂ a₂dsɨ₂góꞌ₃ ꞌauꞌ₂.
49 Jaun₂ ca₂juáꞌ₂ dsa₂ i₂jme₂ti₃ ta₁ ne₄ rag₅₄ ꞌéi₂:
―Te₁guiꞌ₅₄, i₂ŋáuꞌ₂ uë́₃ ŋia₅, néꞌ₃ guë́₄ a₂jón₂ chiꞌ₂ quiáng₃.
50 Jaun₂ në́₃ ca₂juáꞌ₂ Jesús:
―Guanꞌ₂ bá₄ quiángꞌ₂; ia₁ i₂chan₂ bá₄ chiꞌ₂ quiángꞌ₂.
Ca₂rë₃ꞌén₂ bá₄ dsa₂ jág₁ a₂ca₂juáꞌ₂ Jesús, jaun₂ ca₂ŋáiꞌ₃.
51 Jaun₂ jme₁ma₂ꞌein₅₄ juɨ₅ dsiáinꞌ₂, jaun₂ ca₂jme₃jeinꞌ₂ dsa₂ i₂jme₂ti₃ ta₁ ne₅₄, jaun₂ ca₂juáꞌ₂ ꞌéi₂:
―I₂chan₂ bá₄ chiꞌ₂ quiángꞌ₂.
52 Jaun₂ ca₂ŋag₃ ꞌe₂ hora ca₂tágꞌ₃ dsɨ́₅. Jaun₂ ca₂juáꞌ₂ dsa₂ ꞌéi₂:
―Dsióg₂ conꞌ₂ hora ŋí₁ caun₂ të₂le₃ ca₂ꞌláu₂,f ca₂jŋia₃ dséi₂ a₂jme₁ꞌi₁.
53 Jaun₂ ca₂rë₃líꞌ₄ jmei₂ chiꞌ₂ ꞌéi₂, hora jaun₂ dé₄ ca₂juáꞌ₂ Jesús: “I₂chan₂ bá₄ chiꞌ₂ quiángꞌ₂.” Jaun₂ ca₂rë₃ꞌén₂ dsa₂ ꞌéi₂, quiainꞌ₅₄ ta₁jɨn₂ dsa₂ dsi₂néi₂ quióꞌ₅.
54 A₂në₅ jë₁ca₂të́₂ táng₃ léi₄ juëꞌ₂ a₂ca₂jmo₃ Jesús, jme₁ca₂o₃ꞌɨ́in₃ Judea, jme₁guáinꞌ₃ Galilea.