19
Jaun₂ në́₃ ca₂jmo₃ Pilato ꞌéiꞌ₃ a₂ca₂i₁ban₅ dsa₂ Jesús quianꞌ₅₄ tsɨ₁ꞌnei₅₄ a₂co₂taun₅.
2 Jaun₂ ca₂jmo₃ ꞌlióg₂ caun₂ nɨ₁tsag₂ corona a₂lë́₅ jméi₁ nɨ₁uɨng₂ taun₅, jaun₂ ca₂tóꞌ₂ mɨ₂dsi₄ Jesús. Jaun₂ ca₂quenꞌ₃ dsa₂ Jesús caun₂ tsɨ₁ꞌmɨꞌ₂ chenꞌ₅₄ a₂jniá₂ ꞌuɨꞌ₃ guéin₂.
Jesús condenado a muerte (Juan 19.1-16)
―¡Sianꞌ₃ ꞌne₂, Rag₅₄ quián₅ dsa₂ judíos*!
Jaun₂ qui₂ca₂quein₃ dsɨ₂ne₄ Jesús.
4 Jaun₂ në́₃ o₂ꞌɨ́n₃ táng₃ Pilato, jaun₂ ca₂juáꞌ₂ ca₂tsɨ́ꞌ₃ dsa₂:
―Nei₂ ꞌniaꞌ₂, dséin₄ jniá₂ ja₁lá₃ le₃ja₁conꞌ₂ ꞌniaꞌ₂, ia₁jaun₂ le₃lenꞌ₅₄ ꞌniaꞌ₂ ca₂liaꞌ₂ ꞌi₁caun₂ dso₄ tsá₃ dsoꞌ₂ jniá₂ ja₁coin₂.
5 Jaun₂ o₂ꞌɨ́n₃ Jesús, ꞌi₄ dsi₅₄ corona lë́₅ nɨ₁uɨng₂ taun₅, ján₃ bá₄ quiꞌ₂ tsɨ₁ꞌmɨꞌ₂ chenꞌ₅₄ ꞌuɨꞌ₃ jaun₂. Jaun₂ në́₃ ca₂juáꞌ₂ Pilato ca₂tsɨ́ꞌ₃ dsa₂:
―¡Jɨn₄ ꞌniaꞌ₂ dsa₂!
6 Jaun₂ jme₁qui₂ca₂jág₂ juɨg₅₄ jme₂dsa₂ quianꞌ₅₄ chiꞌ₂ ꞌɨꞌ₅₄ quián₅ guáꞌ₅ në́₃, jaun₂ ca₂jme₃lióg₃ qui₂ca₂tóinꞌ₂ co₂mɨꞌ₅₄, ca₂juáꞌ₂:
―¡Tióin₃ cróg₄! ¡Tióin₃ cróg₄!
Jaun₂ ca₂juáꞌ₂ Pilato:
―Te₅₄ ꞌniaꞌ₂ jaun₂, tióin₃ ꞌniaꞌ₂ cróg₄ guiongꞌ₅₄, ia₁ jniá₂ në́₃, ꞌi₁caun₂ dso₄ tsá₃ dsoꞌ₂ jniá₂ ja₁coin₂.
7 La₁ia₁ ca₂ŋag₃ dsa₂ judíos:
―Ron₅ caun₂ ꞌéiꞌ₃ quián₂ jniaꞌ₅₄, jaun₂ liaꞌ₂ conꞌ₂ lë́₅ juáꞌ₂ ꞌéiꞌ₃ jaun₂, a₂ꞌnióꞌ₅ jóin₂ bá₄; ia₁ a₂jmo₂₃ a₂lɨ́in₅ Ja₁ŋiꞌ₅₄ Diú₄.
8 Jme₁ca₂nág₂ Pilato jág₁ në₅, ꞌŋio₅ lɨn₃ guë́₄ ca₂i₃góꞌ₃ dsɨ́₅.
9 Jaun₂ ca₂ꞌí₃ táng₃ të₂le₃ dsi₂néi₂ ne₄ta₁ quióꞌ₅, jaun₂ ca₂ŋag₃ ca₂ŋɨ́iꞌ₃ Jesús:
―¿A₂jáꞌ₄ chanꞌ₂ ꞌne₂?
―¿Tsa₁ ŋagꞌ₅₄ ꞌne₂ jág₁ quió₃ jniá₂? ¿Tsa₁ ŋiꞌ₅₄ ꞌne₂ jaun₂ a₂ꞌo₂ jniá₂ juɨ₅bí₂ a₂jmo₅₄ ꞌéiꞌ₃ a₂tion₃ dsa₂ cróg₄ ꞌne₂, ján₃ bá₄ le₂jaun₂ guëꞌ₂ ján₃, a₂ꞌo₂ jniá₂ juɨ₅bí₂ a₂long₅₄ ꞌne₂?
11 Jaun₂ ca₂ŋag₃ Jesús:
―Ca₂liaꞌ₂ ꞌi₁caun₂ juɨ₅bí₂ tsá₃ ꞌauꞌ₂ ꞌne₂ ja₁con₂ jniá₂, juaꞌ₅₄ tsá₃ Diú₄ ca₂cuë₃. ꞌUɨg₅₄ jaun₂, juɨ₁liaꞌ₂ i₂në₂jángꞌ₂ jniá₂ neꞌ₅₄ ꞌne₂, ꞌŋio₅ lɨn₃ guë́₄ juëꞌ₂ dso₄ rë₂cáinꞌ₄ conꞌ₂ guë́₄ ꞌne₂.
12 Ca₂le₃ jaun₂ ca₂ꞌnáuꞌ₃ dsɨ́₅ Pilato ꞌa₂ liaꞌ₂ cuɨn₅ jmɨg₄ a₂jme₁lióin₂ Jesús; la₁ dsa₂ judíos në́₃ qui₂ca₂tóinꞌ₂ co₂mɨꞌ₅₄ ca₂juáꞌ₂:
―¡Në₁juaꞌ₂ ca₂lioinꞌ₅₄, tsá₃ lɨ́ngꞌ₅ a₂mei₅₄ quián₅ dsɨ₂tan₅₄ emperador*! ¡Ia₁ në₁juaꞌ₂ ꞌein₂ jmo₅ lɨ́in₅ rag₅₄, lɨ́in₅ jan₂ dsa₂ i₂ꞌŋia₅₄ emperador!
13 Jaun₂ në́₃ jme₁ca₂nág₂ Pilato jág₁ jaun₂, ca₂dsein₂₃ Jesús. Jaun₂ ca₂guá₂ ne₄ta₁ ja₁qui₂dsɨ₂₃ ꞌéiꞌ₃; ja₁jaun₂ ja₁chei₂ Gabata quianꞌ₅₄ jág₁ jmei₅ hebreo, co₂ꞌnióꞌ₄ a₂juáꞌ₂, ja₁lë́₄ ꞌuë₃ cang₄.
14 Jme₁lë́₄ jmɨg₄ a₂jmo₅ dsa₂ co₂jŋia₅₄ Jmɨg₄ Të₂ꞌɨn₅₄; jme₁ma₂të́₂ conꞌ₂ dsi₂ŋíꞌ₃; jaun₂ ca₂juáꞌ₂ Pilato ca₂tsɨ́ꞌ₃ dsa₂ judíos:
―¡Jɨn₄ ꞌniaꞌ₂ rag₅₄ quiángꞌ₂!
15 La₁ ca₂tóinꞌ₂ co₂mɨꞌ₅₄ ca₂juáꞌ₂:
―¡Cau₅ jŋiaiꞌ₃! ¡Cau₅ jŋiaiꞌ₃! ¡Tióin₃ cróg₄!
Jaun₂ ca₂juáꞌ₂ Pilato:
―¿A₁ꞌniogꞌ₂ ꞌniaꞌ₂ tóng₄ cróg₄ rag₅₄ quiánꞌ₂ ꞌniaꞌ₂?
La₁ qui₂ca₂ŋag₃ juɨg₅₄ jme₂dsa₂ ca₂juáꞌ₂:
―Tsá₃ rag₅₄ siánꞌ₂ chan₂ quián₂ jniaꞌ₅₄, jŋiaꞌ₅₄ liaꞌ₂ jan₂ emperador bá₄.
16 Jaun₂ bá₄ ca₂jángꞌ₂ Pilato ca₂jɨ́inꞌ₂ Jesús ia₁jaun₂ tio₃ dsa₂ ne₄ cróg₄. Jaun₂ ca₂tág₃ dsa₂.
La crucifixión (Juan 19.17-37)
Ca₂tion₃ dsa₂ cróg₄ Jesús
17 O₂ꞌɨ́n₃ Jesús jaun₂, quian₅ cróg₄ quióꞌ₅, a₂ŋó₃ juɨ₅ ja₁të́ꞌ₂ dsa₂ Dsɨ₂conꞌ₂ Nɨ₁mu₅ Mɨ₂dsi₄ ꞌLag₄. Quianꞌ₅₄ jág₁ jmei₅ arameo guëꞌ₂, chei₂ Gólgota.
18 Ja₁jaun₂ ca₂tion₃ dsa₂ ne₄ cróg₄, ján₃ bá₄ ca₂tion₃ guë́₄ dsa₂ on₃ dsa₂ siánꞌ₂ co₂lë₅ quianꞌ₅₄ Jesús, jma₃jan₂ liaꞌ₂ ca₂ton₂ quióꞌ₅; ꞌŋiog₅ guëꞌ₂ Jesús të₁toin₅₄ dsi₂jo₂.
19 Jaun₂ ca₂tióng₃ Pilato letras dsi₄ cróg₄ co₂ꞌnióꞌ₄ a₂juáꞌ₂: “JESÚS CHAN₂ NAZARET, RAG₅₄ QUIÁN₅ DSA₂ JUDÍOS.”
20 Jaun₂ juɨn₅ dsa₂ judíos ca₂ꞌɨ́₂ letras jaun₂, ia₁ ma₂quián₅ cheiꞌ₅₄ juɨg₂ ciudad bá₄ ja₁ca₂tion₃ dsa₂ cróg₄ Jesús jaun₂. Jme₁chi₁ton₅ letras jaun₂ quianꞌ₅₄ jág₁ jmei₅ hebreo, griego, quianꞌ₅₄ jág₁ jmei₅ latín në́₃.
21 ꞌUɨg₅₄ jaun₂, ca₂juáꞌ₂ juɨg₅₄ jme₂dsa₂ quianꞌ₅₄ dsa₂ judíos, ca₂tsɨ́ꞌ₃ Pilato:
―Tsá₃ lë₁taun₂ “Rag₅₄ quián₅ dsa₂ judíos”; ja₂lɨn₃ guë́₄ dse₃ taunꞌ₅₄“I₂juáꞌ₂ a₂lɨ́n₅ Rag₅₄ quián₅ dsa₂ judíos.”
22 La₁ ca₂ŋag₃ Pilato:
―Juɨ₁liaꞌ₂ a₂ma₂në₂táun₂ jniá₂, co₂në₅ ma₂në₂táun₂.
23 Jme₁ma₂ca₂lë₃ tion₅ ꞌlióg₂ Jesús ne₄ cróg₄, jaun₂ ca₂can₃ tsɨ₁ꞌmɨꞌ₂ quióꞌ₅ Jesús, jaun₂ ca₂jmo₃ quén₂ dsoꞌ₅₄, jma₃jan₂ ꞌlióg₂ liaꞌ₂ ca₂dsoꞌ₅₄. Ján₃ bá₄ le₂jaun₂ ca₂can₃ nɨ₁tsɨnꞌ₅₄ Jesús. La₁ nɨ₁tsɨnꞌ₅₄ në́₃, tsá₃ jme₁rë₂ꞌme₅; jme₁lë́₄ caun₂ ꞌmɨꞌ₂ conꞌ₂ lë́₅ ca₂ta₃ dsa₂, ta₁caun₂.
24 Jaun₂ ca₂juáꞌ₂ ꞌlióg₂ ca₂tsɨ́ꞌ₃ rɨinꞌ₅₄:
―Co₂ŋeiꞌ₅₄ tióꞌ₅ tsá₃ guéi₃. Në₃ i₁cáu₂ co₂ŋeiꞌ₅₄ dsí₂ suerte, o₁ne₄ ꞌein₂ tɨn₅₄.
Jaun₂ le₂në₅ ca₂rë₃ti₃ jág₁ a₂rë₂ton₅ ne₄ Si₂ a₂juáꞌ₂:
Qui₂ca₂dsiónꞌ₂ dsa₂ tsɨ́nꞌ₅ jniá₂ quiainꞌ₅₄ rɨinꞌ₅₄,
ca₂co₃ ca₂dsi₂ suerte o₁ne₄ ꞌein₂ tɨn₅₄.a
Le₂në₅ bá₄ ca₂jmo₃ ꞌlióg₂ ꞌéi₂ tioinꞌ₅₄.
25 La₁ chog₅₄ Jesús në́₃, jaun₂ bá₄ jme₁chéinꞌ₄ cau₅ cróg₄, liaꞌ₂ jma₃quianꞌ₅₄ ꞌio₅₄ rɨinꞌ₅₄, quiainꞌ₅₄ María quián₅ Cleofas, quianꞌ₅₄ María chan₂ Magdala në́₃.
26 Jme₁ca₂jɨ́n₂ Jesús chog₅₄, quiainꞌ₅₄ chiꞌ₂ dsɨ₂guia₃-tɨ́n₂ i₂ŋɨ́₄ lë₃ jme₁ꞌnioi₃ ꞌéi₂, chéinꞌ₅ cau₅, jaun₂ ca₂juáꞌ₂ ca₂tsɨ́ꞌ₃ chog₅₄:
―ꞌIo₅₄, në₅ chénꞌ₅ ja₂ŋíꞌ₂.
27 Jaun₂ guë́₄ ca₂juáꞌ₂ ca₂tsɨ́ꞌ₃ dsɨ₂guia₃-tɨ́n₂ ꞌéi₂:
―Në₅ chénꞌ₅ chogꞌ₂.
Ca₂le₃ jmɨg₄ jaun₂, ca₂guei₃ chiꞌ₂ dsɨ₂guia₃-tɨ́n₂ ꞌéi₂ ca₂guein₃ María dsi₂néi₂ quióꞌ₅.
Ca₂jon₃ Jesús
28 Cang₂ guë́₄ jaun₂ në́₃, ia₁ jme₁ma₂ŋi₅ bá₄ Jesús a₂ma₂ca₂rë₃ꞌŋia₅ ca₂le₃jë́₃, ia₁jaun₂ le₃ti₃ jág₁ tioꞌ₅₄ ne₄ Si₂, ca₂juáꞌ₂:
―Jmɨg₂ i₁guɨꞌ₁ jniá₂.
29 Jë₄ jaun₂ jme₁chíꞌ₄ caun₂ nɨ₁dsɨg₁ a₂ꞌa₄ jmɨg₂ dsiꞌ₃, jaun₂ ca₂tiá₂ dsa₂ caun₂ nɨ₁jau₂ ꞌŋióꞌ₃, ca₂guioin₃ quianꞌ₅₄ jmɨg₂ dsiꞌ₃ jaun₂. Jaun₂ ca₂chi₃dsí₂ dsa₂ neiꞌ₅₄ caun₂ nɨ₁ꞌma₂ hisopo* jaun₂ ca₂chógꞌ₃ dsa₂ të₂ mɨ₂ꞌo₄ Jesús.
30 Jme₁ma₂në₂ꞌénꞌ₂ jmɨg₂ dsiꞌ₃ jaun₂, jaun₂ ca₂juáꞌ₂:
―Ma₂ca₂lë₃.
Jaun₂ në́₃ ca₂sióg₂ mɨ₂dsi₅₄, ca₂jángꞌ₃ jme₂dsí₂ quióꞌ₅.
Ca₂ꞌágꞌ₂ ꞌlióg₂ ŋi₁chenꞌ₂ quióꞌ₅ mɨ₂dsɨ₂con₂ Jesús
31 Jme₁lë́₄ jmɨg₄ a₂jmo₅ dsa₂ co₂jŋia₅₄ Jmɨg₄ Të₂ꞌɨn₅₄, jaun₂ tsá₃ ꞌnio₃ dsa₂ judíos juaꞌ₅₄ liaꞌ₂ ma₂le₁ton₅ jaun₂ nɨ₁ŋɨ₁₂ dsoꞌ₂ cróg₄ jmɨg₄ sa₅₄, ia₁ jmɨg₄ juëꞌ₂ lɨn₃ bá₄ sa₅₄ jaun₂. ꞌUɨg₅₄ jaun₂ në́₃ ca₂mɨ₃ ne₄ Pilato a₂chein₃ ꞌlióg₂ a₂qui₂dsɨ₃jio₅₄ dsɨ₂tag₄ ꞌéi₂, jaun₂ guë́₄ të₂.
32 Jaun₂ në́₃ ca₂i₁len₅₄ ꞌlióg₂ ca₂i₁jio₂ dsɨ₂tag₄ i₂le₂ꞌuɨg₅₄; ján₃ bá₄ le₂jaun₂ ca₂jmo₃ quianꞌ₅₄ i₂jan₂ i₂chi₁ton₅ cróg₄ con₂ Jesús.
33 La₁ jme₁ca₂jme₃quiáin₃ con₂ Jesús, ca₂jág₃ jme₁ma₂join₂₃ bá₄; ꞌuɨg₅₄ jaun₂ në́₃ tsá₃ ma₂ca₂jió₃ dsɨ₂tag₄ ꞌéi₂.
34 La₁ ca₂ꞌágꞌ₂ jan₂ ꞌlióg₂ mɨ₂dsɨ₁con₂ Jesús quianꞌ₅₄ ŋi₁chenꞌ₂ quióꞌ₅, jaun₂ dsɨ₂juɨ₅ le₂jaun₂ ca₂ꞌio₂ jmɨ₂ quianꞌ₅₄ jmɨg₂.
35 Jan₂ dsa₂ i₂ca₂të́₂ ne₄ i₂jángꞌ₅ jág₁ dsau₅ la₂; tonꞌ₂ tí₅ bá₄ jág₁ dsau₅ a₂jángꞌ₅. Ján₃ bá₄ ŋi₅ dsa₂ ꞌéi₂ a₂juáꞌ₂ jág₁ tí₅ të₃dsónꞌ₂, ia₁jaun₂ le₃ꞌénꞌ₂ ꞌniaꞌ₂ ján₃.
36 Ia₁ a₂ca₂lë₃ la₂, ca₂lë₃ ia₁jaun₂ le₃ti₃ jág₁ a₂rë₂ton₅ ne₄ Si₂ a₂juáꞌ₂: “Liaꞌ₂ ꞌi₁caun₂ mu₄ ꞌéi₂ tsá₃ qui₃jio₃ dsa₂.”b
37 Le₂jaun₂ guëꞌ₂ táng₃ juáꞌ₂ ne₄ Si₂ ja₁siáꞌ₂: “Jág₂ dsa₂ jɨ́in₂ ꞌéi₂ i₂ca₂ꞌágꞌ₂ dsa₂ quióꞌ₅.”c
Ca₂ꞌon₃ Jesús
38 Cang₂ guë́₄ jaun₂ në́₃, ca₂mɨ₃ jan₂ dsa₂ i₂chen₂ José, i₂chan₂ juɨg₂ Arimatea, i₂jme₁lɨ́n₄ jan₂ dsa₂ i₂quián₅ Jesús, la₁ia₁ jme₁ꞌéin₂ conꞌ₂ të₃coꞌ₅₄ bá₄, ia₁ a₂gain₃ dsa₂ judíos; ca₂mɨ₃ Së́₄ ꞌéi₂ ne₄ Dsi₄máꞌ₂ Pilato a₂con₂ nɨ₁ŋɨ₁ ꞌlag₄ Jesús. Ca₂cuë₃ bá₄ Pilato jmɨg₄, jaun₂ ŋe₄ Së́₄ ca₂i₁sioin₅ ꞌlag₄, jaun₂ ca₂tág₃.
La resurrección (Juan 19.38-20.18)
39 Ján₃ bá₄ ca₂dsióg₃ Nicodemo i₂jme₁ca₂i₁dsia₂ jág₁ le₂jŋiá₅ quianꞌ₅₄ Jesús a₂ꞌuë₂. Jme₁quian₅ ꞌéi₂ conꞌ₂ guióg₂-guiá₂ kilos mirra* quianꞌ₅₄ áloes* a₂ma₂rë₂güɨ́nꞌ₅.
40 Jaun₂ ca₂tág₃ Së́₄ quiainꞌ₅₄ Nicodemo ca₂tág₃ ꞌlag₄ ca₂lio₃ quianꞌ₅₄ tsɨ₁ꞌmɨꞌ₂ tióg₃ liaꞌ₂ jma₃quianꞌ₅₄ mɨ₂ro₂ jaun₂, liaꞌ₂ jme₁lë́₄ tag₄ chíꞌ₅ quióꞌ₅ dsa₂ judíos a₂jme₁ꞌóin₂ ꞌlag₄.
41 Cau₅ ja₁ca₂tion₃ dsa₂ cróg₄ Jesús, jme₁lë́₄ caun₂ ja₁cha₂ nɨ₁ꞌma₂ a₂ꞌag₅ mɨ́g₂. Jaun₂ jë₄ jaun₂ jme₁dsi₅₄ caun₂ tau₂ ꞌŋio₅ ꞌmɨ́₂ ja₁tsá₃ ꞌein₂ jme₁ma₂tonꞌ₂ dsa₂ ꞌi₁jan₂ ꞌlag₄.
42 Jaun₂ ꞌuɨg₅₄ ia₁ a₂jme₁lë́₄ jmɨg₄ a₂jmo₃ dsa₂ judíos co₂jŋia₅₄ quióꞌ₅, tonꞌ₂ ꞌuɨg₅₄ ia₁ a₂jme₁lë́₄ ma₂quián₅ jaun₂ tau₂ ꞌŋio₅, jaun₂ ja₁jaun₂ ca₂quio₅ Së́₄ quianꞌ₅₄ Nicodemo ca₂quioin₂₃ Jesús.