Ca₂jenꞌ₅₄ Jesús
20
Jë₁le₂ꞌuɨg₅₄ jmɨg₄ semana, ŋe₄ María chan₂ Magdala ja₁dsi₅₄ tau₂ ꞌŋio₅, të₂ o₃ꞌiog₂ të₃ qui₁néꞌ₃ guë́₄ le₂jaun₂. Jaun₂ ca₂jág₃, jme₁ma₂rë₃jŋiaꞌ₅₄ bá₄ nɨ₁cang₁ ꞌo₄ tau₂ ꞌŋio₅ jme₁dsióg₃.
2 Jaun₂ në́₃ ca₂ŋáiꞌ₃ co₂chiꞌ₅₄ ja₁jme₁ꞌen₅₄ Si₂mu₅₄ Pe₄ quiainꞌ₅ chiꞌ₂ dsɨ₂guia₃-tɨ́n₂ jan₂ i₂ŋɨ́₄ lë₃ jme₁ꞌnio₃ Jesús ꞌéi₂, jaun₂ ca₂juáꞌ₂:
―Ma₂në₂dsen₅ dsa₂ Te₁guiꞌ₅₄ dsi₂néi₂ tau₂ ꞌŋio₅ ja₁jme₁roin₂₃, jaun₂ tsá₃ ne₄ a₂jáꞌ₄ në₂quio₅ dsa₂.
3 Jaun₂ në́₃ Pe₄ quianꞌ₅₄ chiꞌ₂ dsɨ₂guia₃-tɨ́n₂ jan₂ ꞌéi₂ ca₂ꞌuɨin₂ jaun₂ i₃léin₂ ja₁dsi₅₄ tau₂ ꞌŋio₅.
4 Le₃oin₃ bá₄ i₃léin₂ co₂lë₅ co₂ꞌei₅; la₁ i₂jan₂ ꞌéi₂ ca₂ŋɨ₃ guë́₄ co₂chiꞌ₅₄ conꞌ₂ guë́₄ Pe₄, jaun₂ jŋiái₅ bá₄ ca₂dsióg₃ ja₁dsi₅₄ tau₂ ꞌŋio₅.
5 Jaun₂ ca₂jmo₃ i₁jɨ́in₂ ca₂ŋéi₃ ne₅₄, jaun₂ ca₂jág₃, jaun₂ bá₄ jme₁niog₅ tsɨ₁ꞌmɨꞌ₂ tióg₃, la₁ia₁ tsá₃ ca₂ꞌí₃ dsi₂néi₂.
6 Jaun₂ guë́₄ ca₂dsióg₃ Si₂mu₅₄ Pe₄ chi₁coꞌ₅₄ quióꞌ₅, jaun₂ ca₂ꞌí₃ dsi₂néi₂ tau₂ ꞌŋio₅. Jaun₂ ca₂jág₃ ꞌéi₂ tsɨ₁ꞌmɨꞌ₂ tióg₃: jaun₂ bá₄ jme₁niog₅ ja₁jaun₂;
7 ján₃ bá₄ ca₂jág₃ pe₁guí₄ a₂ca₂lio₃ mɨ₂dsi₄ Jesús. La₁ tsá₃ jme₁ron₅ co₂lë₅ quianꞌ₅₄ tsɨ₁ꞌmɨꞌ₂ tióg₃ jaun₂; cau₅ bá₄ jme₁ron₅ jme₁rë₂jonꞌ₅.
8 Jaun₂ bá₄ ca₂ꞌí₃ chiꞌ₂ dsɨ₂guia₃-tɨ́n₂ jan₂ ꞌéi₂, i₂dsióg₃ le₂ꞌuɨg₅₄; ca₂të́₂ ne₅₄, jaun₂ ca₂rë₃ꞌéin₂.
9 (Ia₁ tsá₃ jme₁ma₂ŋɨ́ꞌ₂ guë́₄ dsɨ́₅ jág₁ a₂chi₁ton₅ ne₄ Si₂, a₂tion₅₄ niog₅ jenꞌ₅₄ Jesús jɨn₄ ꞌlag₄.)
10 Jaun₂ në́₃, i₂len₃ bá₄ táng₃ chiꞌ₂ dsɨ₂guia₃-tɨ́n₂ ꞌéi₂ quióꞌ₅.
Ca₂jme₃jnia₅ Jesús ne₄ María chan₂ Magdala
11 La₁ jaun₂ bá₄ jme₁chénꞌ₄ María ca₁ꞌné₄ tau₂ ꞌŋio₅, ꞌo₂₃. Të₁liaꞌ₂ ꞌo₂₃ jaun₂, ca₂jmo₃ i₁jɨ́in₂ a₂ca₂jág₃ të₂le₃ ꞌŋióꞌ₃ tau₂ ꞌŋio₅,
12 jaun₂ ca₂jɨ́in₂ on₃ ángeles i₂le₁quiꞌ₂ ꞌmɨꞌ₂ tiog₂, tiáinꞌ₅ jë₄ jme₁ron₅ nɨ₁ŋɨ₁ Jesús; jan₂ jme₁guá₄ të₂le₃ ja₁lë́₄ chi₁guiꞌ₂, i₂jan₂ guëꞌ₂ ja₁jme₁lë́₄ a₃tag₅.
13 Jaun₂ ca₂ŋag₃ ángeles ca₂ŋɨ́iꞌ₃ María:
―ꞌIo₅₄, ¿ꞌe₂ lë₃ ꞌauꞌ₂?
Jaun₂ ca₂ŋag₃:
―Ia₁ ma₂në₂te₃ bá₄ dsa₂ Te₁guiꞌ₅₄ quiáng₃, jaun₂ tsá₃ guion₄ jniá₂ a₂jáꞌ₄ në₂quio₅ dsa₂.
14 Jë₂ bá₄ ca₂ꞌŋiai₂ jág₁ në₅, jme₁ca₂jéinꞌ₃, jaun₂ ca₂jɨ́in₂ Jesús jme₁chéinꞌ₄; la₁ tsá₃ jaun₂ jme₁ŋi₅, Jesús bá₄ ꞌéi₂.
15 Jaun₂ në́₃ ca₂ŋag₃ Jesús:
―ꞌIo₅₄, ¿ꞌe₂ lë₃ ꞌauꞌ₂ ꞌne₂? ¿I₂ꞌein₂ ꞌnagꞌ₂?
Jaun₂, ia₁ a₂lɨ́n₂ María a₂lɨ́n₅ ꞌéi₂ dsa₂ i₂jmo₅ ꞌí₁ ꞌuë₃ jaun₂, jaun₂ ca₂juáꞌ₂:
―Guiꞌ₅₄, chi₂juaꞌ₂ ꞌne₂ ne₂teꞌ₅₄, juaꞌ₅₄ a₂jáꞌ₄ në₂quioinꞌ₂, ia₁jaun₂ të₅₄ jniá₂.
16 Jaun₂ ca₂juáꞌ₂ Jesús:
―¡María!
Jaun₂ ca₂jénꞌ₃ María jaun₂ ca₂juáꞌ₂ quianꞌ₅₄ jág₁ jmei₅ hebreo:
―¡Raboni! ―co₂ꞌnióꞌ₄ a₂juáꞌ₂: Të₅ quiáng₃.
17 Jaun₂ ca₂juáꞌ₂ Jesús:
―Tsá₃ lë₁jmáꞌ₂ quió₃, ia₁ tsá₃ ma₂uɨ́g₂ guë́₄ jniá₂ ja₁con₂ Ŋeꞌ₃. La₁ guanꞌ₂ o₂cheiꞌ₅₄ rɨ́nꞌ₃ jniá₂, a₂uɨ́g₂ jniá₂ ja₁con₂ Ŋeꞌ₃, ja₁con₂ Ŋéiꞌ₅ ꞌniaꞌ₂ në́₃, ja₁con₂ Diú₄ quiáng₃, ja₁con₂ Diú₄ quiánꞌ₂ ꞌniaꞌ₂ në́₃.
18 Jaun₂ bá₄ ŋó₃ María chan₂ Magdala ꞌéi₂ ca₂i₁chiꞌ₄ chiꞌ₂ dsɨ₂guia₃-tɨ́n₂ a₂jme₁ma₂në₂jɨ́in₂ Te₁guiꞌ₅₄, a₂jme₁ma₂në₂juáꞌ₂ ꞌéi₂ jág₁ jaun₂.
Ca₂jme₃jnia₅ Jesús ne₄ chiꞌ₂ dsɨ₂guia₃-tɨ́n₂
19 Jme₁ca₂nei₂ jë₁le₂ꞌuɨg₅₄ jmɨg₄ semana jaun₂ në́₃, jme₁tionꞌ₅₄ chiꞌ₂ dsɨ₂guia₃-tɨ́n₂ le₁ŋɨiꞌ₂, qui₂le₁jnág₅ ꞌné₅ ja₁tioinꞌ₅₄, ia₁ a₂gain₃ dsa₂ judíos. Jaun₂ ca₂ꞌí₃ Jesús, jaun₂ ca₂nau₂ dsi₂jo₂ quióꞌ₅ ꞌéi₂, jaun₂ ca₂juáꞌ₂:
―Juɨ₁ꞌei₅ tei₄ ꞌauꞌ₂ ꞌniaꞌ₂.
Jesús se aparece a los discípulos (Juan 20.19-31)
20 Jme₁ma₂ca₂juáꞌ₂ le₂në₅, ca₂ꞌë₃ mɨ₂gu₂ quianꞌ₅₄ mɨ₂dsɨ₁coin₂. Jaun₂ ca₂jmo₃ ꞌioꞌ₂ chiꞌ₂ dsɨ₂guia₃-tɨ́n₂ jme₁ca₂jɨ́in₂ Te₁guiꞌ₅₄.
21 Jaun₂ ca₂juáꞌ₂ táng₃ Jesús:
―Juɨ₁ꞌei₅ tei₄ ꞌauꞌ₂ ꞌniaꞌ₂. Juɨ₁liaꞌ₂ ca₂chei₃ Ŋeꞌ₃ jniá₂, ján₃ bá₄ le₂jaun₂ tsɨn₅₄ jniá₂ ꞌniaꞌ₂.a
22 Jaun₂ në́₃ ca₂jéi₂ dsí₂ ne₄ quióꞌ₅ dsa₂ ꞌéi₂, jaun₂ ca₂juáꞌ₂:
―Guenꞌ₅₄ ꞌniaꞌ₂ Jme₂dsí₂ Jŋió₅.
23 Chi₂juaꞌ₂ ꞌein₂ i₂ca₂ꞌénꞌ₃ ꞌniaꞌ₂ dsáu₁, ma₂qui₂ca₂i₃ꞌén₂ bá₄ dsáu₁ ꞌéi₂; chi₂juaꞌ₂ ꞌein₂ tsá₃ ca₂ꞌénꞌ₃ ꞌniaꞌ₂ dsáu₁, të₃ꞌŋiá₄ dsáu₁ ja₁coin₂.
Jág₅ To₁má₄ jɨ́in₂ Te₁guiꞌ₅₄ a₂ma₂ca₂jeinꞌ₅₄
24 La₁ To₁má₄ në́₃, jan₂ chiꞌ₂ dsɨ₂guia₃-tɨ́n₂ i₂të́ꞌ₂ dsa₂ Dsa₂ Tsɨnꞌ₅₄, tsá₃ jme₁ꞌein₅₄ jë₄ quióꞌ₅ rɨinꞌ₅₄ liaꞌ₂ conꞌ₂ jme₁dsióg₃ Jesús.
25 Jaun₂ lë₃, jme₁ca₂juáꞌ₂ chiꞌ₂ dsɨ₂guia₃-tɨ́n₂ rɨinꞌ₅₄:
―Ma₂në₂jɨn₄ jniaꞌ₅₄ Te₁guiꞌ₅₄.
La₁ To₁má₄ në́₃ ca₂juáꞌ₂:
―Në₁juaꞌ₂ tsá₃ ca₂jág₃ jniá₂ léi₄ mɨ₂gu₂ ja₁ca₂i₃ba₅₄ mɨ₂ŋí₁, ca₂liaꞌ₂ ca₂tiá₃ chi₁gu₃ tau₂ a₂ca₂lë₃ quianꞌ₅₄ mɨ₂ŋí₁, ca₂liaꞌ₂ ca₂tiá₃ mɨ₂gu₃ mɨ₂dsɨ₁coin₂, tsá₃ le₃ꞌéng₂.
26 Jŋia₃ jmɨg₄ cang₂ guë́₄ jaun₂, jme₁le₁ŋɨꞌ₂ táng₃ chiꞌ₂ dsɨ₂guia₃-tɨ́n₂ quiáin₅ caun₂ dsi₂néi₂, le₂jaun₂ guë́₄ në́₃ jme₁ꞌen₅₄ To₁má₄ jë₄ quióꞌ₅ ꞌéi₂. Jaun₂ në́₃, o₁jŋiaꞌ₅₄ qui₂le₁jnág₅ ꞌné₅ ja₁tioinꞌ₅₄, ca₂ꞌí₃ Jesús, ca₂nau₂ dsi₂jo₂ quióꞌ₅ ꞌéi₂, jaun₂ ca₂juáꞌ₂:
―Juɨ₁ꞌei₅ tei₄ ꞌauꞌ₂ ꞌniaꞌ₂.
27 Jaun₂ në́₃ ca₂juáꞌ₂ ca₂tsɨ́ꞌ₃ To₁má₄:
―ꞌŊia₅ i₂tioꞌ₂ chi₁gogꞌ₂ ja₁lá₃, jag₄ mɨ₂gu₃; i₂tioꞌ₂ gogꞌ₂ mɨ₂dsɨ₁cong₂. Tsá₃ lë₁jmo₂ a₂tsá₃ ꞌéngꞌ₂, juɨ₁le₂ꞌéngꞌ₂ bá₄.
28 Jaun₂ në́₃ ca₂ŋag₃ To₁má₄:
―¡Te₁guiꞌ₅₄ quiáng₃, Diú₄ quiáng₃ në́₃!
29 Jaun₂ ca₂juáꞌ₂ Jesús:
―Në₃ guë́₄ ꞌéngꞌ₂ ꞌuɨg₅₄ ia₁ a₂në₂jagꞌ₅₄ jniá₂. ꞌE₂ guë́₄ dsen₃ juɨ₁liaꞌ₂ dsa₂ i₂tsá₃ ca₂jág₂, la₁ ꞌéin₂ bá₄.
Ta₁ a₂quíꞌ₅ si₂ la₂
30 Jaun₂ në́₃, ꞌlióng₂ bá₄ léi₄ juëꞌ₂ siáꞌ₂ ca₂jmo₃ Jesús ne₄ chiꞌ₂ dsɨ₂guia₃-tɨ́n₂ quiáin₅ a₂tsá₃ tioꞌ₅₄ ne₄ si₂ la₂.
31 La₁ia₁ qui₂rë₂ton₅ a₂la₂, ia₁jaun₂ le₃ꞌénꞌ₂ ꞌniaꞌ₂ a₂lɨ́n₅ Jesús I₂rë₂ꞌɨ́n₁* quián₅ Diú₄, tonꞌ₂ lɨ́in₅ Ja₁ŋiꞌ₅₄ Diú₄, ia₁jaun₂ jë₁ma₂qui₂ca₂rë₃ꞌénꞌ₂ ꞌniaꞌ₂, le₃chanꞌ₂ bá₄ ꞌniaꞌ₂ co₂tan₅₄ le₃quióꞌ₅ ꞌéi₂.