Jmɨg₄ a₂ca₂jenꞌ₅₄ Jesús
28
Ca₂ŋɨ́₂ bá₄ jmɨg₄ sa₅₄. Jaun₂ në́₃, të₂le₃ ca₂jnia₃ jmɨg₄ le₂ꞌuɨg₅₄ semana, ca₂ŋe₄ María i₂chan₂ Magdala quiainꞌ₅₄ María jan₂; ca₂i₁lein₅₄ i₁jag₅₄ tau₂ ꞌŋio₅ quióꞌ₅ Jesús.
2 Conꞌ₂ tsá₃ rë₂jáin₁ dsɨ₂juɨ₅ le₂jaun₂ ca₂i₁bi₅₄ ꞌuë₃ tiá₂ lɨn₃ ia₁ a₂ca₂sión₃ gueiꞌ₅₄ i₂juɨ́g₃ jan₂ ángel quián₅ Te₁guiꞌ₅₄. Ca₂të₁tsɨinꞌ₅₄ o₄ꞌné₄ tau₂ ꞌŋio₅, ca₂mói₂ nɨ₁cang₁ a₂jme₁chi₁jnɨ₅, jaun₂ ca₂guá₂ ne₄ jaun₂.
3 Ca₂liaꞌ₂ tág₅ ꞌŋio₅ lɨn₃ jniái₂ juɨ₁liaꞌ₂ tág₅ si₁ŋíꞌ₃. Tsɨnꞌ₅₄ a₂quiꞌ₂ guëꞌ₂ tiog₂ jau₂ lɨn₃.
4 Jme₁ca₂jág₂ ꞌlióg₂ i₂tionꞌ₅₄ jmo₅ ꞌí₁, ca₂rë₃góꞌ₅ ꞌŋio₅ lɨn₃ ca₂jlein₃ në₂jag₄ bá₄ tsá₃ dsɨ́₅ chan₂ ca₂jénꞌ₃.
5 Jaun₂ ca₂juáꞌ₂ ángel ca₂tsɨ́ꞌ₃ ꞌio₅₄:
―Tsá₃ jmo₂ ꞌniaꞌ₂ gangꞌ₃. Ia₁ guion₄ jniá₂ a₂ꞌnaꞌ₂ Jesús i₂ca₂tion₃ dsa₂ cróg₄ bá₄ ꞌniaꞌ₂ i₂niogꞌ₅₄.
6 Tsá₃ ꞌéi₂ ma₃chan₂ ja₁lá₃; ma₂ca₂jeinꞌ₅₄ bá₄ táng₃ juɨ₁liaꞌ₂ lë́₅ ca₂juáꞌ₂ ꞌŋiog₅. La₂ i₂jag₄ deꞌ₂ ꞌniaꞌ₂ ja₁jme₁rë₂quiain₂₃.
7 O₂nóꞌ₅ ꞌniaꞌ₂ i₂ŋáuꞌ₂ o₂cheiꞌ₅₄ chiꞌ₂ dsɨ₂guia₃-tɨ́n₂ quiáin₅ a₂ma₂ca₂jeinꞌ₅₄ táng₃ ne₄ ꞌmú₃; ma₂ꞌein₅₄ juɨ₅ ŋó₅ jŋiái₅ liaꞌ₂ conꞌ₂ guë́₄ ꞌniaꞌ₂ juɨ₅ Galilea. Ja₁jaun₂ o₁jɨinꞌ₄ ꞌniaꞌ₂. Jág₁ në₅ ma₂në₂juɨ́g₂ ꞌniaꞌ₂.
8 Jaun₂ në́₃ ca₂ꞌuɨn₂ ꞌio₅₄ i₂ŋáuꞌ₂, të₃ ma₂góꞌ₅, tonꞌ₂ jénꞌ₅ rëꞌ₂ ꞌioꞌ₂ ján₃. Jaun₂ ca₂i₃lein₃ co₂chiꞌ₅₄ i₁con₂ jág₁ ne₄ dsa₂ guia₃-tɨ́n₂.
9 Të₃jë₄ i₂lein₃ jaun₂, conꞌ₂ tsá₃ jáin₅ ca₂jme₃jnia₅ Jesús ne₅₄, ca₂juáꞌ₂:
―¡Siangꞌ₃!
Jaun₂ në́₃ ca₂jme₃quiáin₃ con₂ Jesús, ca₂chi₃jné₃ ca₂jmo₃ i₁ꞌáin₃ ca₂të₂ ꞌuë₃, ca₂quɨ́ꞌ₃ cu₅ tag₄ Jesús.
10 Jesús në́₃ ca₂juáꞌ₂:
―Tsá₃ lë₁jmo₂ ꞌniaꞌ₂ gangꞌ₃. O₂nóꞌ₅ ꞌniaꞌ₂ o₂con₄ jág₁ ne₄ rɨ́ngꞌ₃ o₂cheiꞌ₅₄ ꞌniaꞌ₂ juɨ₁dsi₂lein₅ juɨ₅ Galilea, jaun₂ ja₁jaun₂ jág₂ jniá₂.
Jág₁ a₂ca₂dsia₃ ꞌlióg₂
11 Të₁liaꞌ₂ i₃len₃ ꞌio₅₄ ꞌéi₂ i₂con₃ jág₁, i₂lɨn₅₄ ꞌlióg₂ i₂jme₁jmo₅ ꞌí₁ i₃lein₃ jë₄ juɨg₂ i₁con₂ jág₁ ne₄ juɨg₅₄ jme₂dsa₂ ca₂i₁juaꞌ₄ ca₂le₃jë́₃ ꞌa₂ liaꞌ₂ niog₅ ca₂lë₃.
12 Juɨg₅₄ jme₂dsa₂ në́₃ ca₂ŋɨiꞌ₂ quianꞌ₅₄ guiꞌ₅₄ canꞌ₅₄ ca₂jmo₃ jág₁, jaun₂ ca₂cuë́ꞌ₃ ꞌlióng₂ cu₄ ꞌlióg₂ ꞌéi₂,
13 ca₂juáꞌ₂:
―Le₂la₂ dsiáꞌ₁ ꞌniaꞌ₂ juɨgꞌ₅₄ dsa₂: të₁liaꞌ₂ jme₁rë₂güɨ́nꞌ₃ ꞌniaꞌ₂ a₂ꞌuë₂ ca₂dsi₃lén₂ dsa₂ i₂jme₁quiainꞌ₅₄, jaun₂ ca₂tág₃ ꞌlag₄.
14 Në₁juaꞌ₂ ca₂rë₃ŋi₅ dsi₄máꞌ₂ jág₁ në₅, la₂ bá₄ ne₄ jniaꞌ₅₄ ꞌa₂ liaꞌ₂ jme₁ꞌuan₅₄ dsɨ́₅ ia₁jaun₂ tsá₃ cánꞌ₁ ꞌniaꞌ₂ o₂i₁ dsɨ₅.
15 Jaun₂ ca₂gue₃ bá₄ ꞌlióg₂ cu₄, jaun₂ le₂jaun₂ bá₄ ca₂jmo₃ conꞌ₂ lë́₅ jág₁ ca₂toꞌ₂ dsa₂ ꞌéi₂. Jaun₂ le₂në₅ bá₄ jág₁ ꞌei₅ ca₂le₂con₂ le₁ŋi₅ dsa₂ judíos* ca₂të₂ jmɨg₄ në₃.
Ca₂chen₃ Jesús chiꞌ₂ dsɨ₂guia₃-tɨ́n₂ a₂dsɨ₃ꞌë́₃ jág₁
16 Jaun₂ në́₃ i₃len₃ bá₄ ta₁guia₃-ján₃ chiꞌ₂ dsɨ₂guia₃-tɨ́n₂ juɨ₅ Galilea, ca₂i₃léin₂ ja₁lë́₄ caun₂ máꞌ₂, liaꞌ₂ conꞌ₂ lë́₅ ma₂ca₂juáꞌ₂ Jesús le₂jŋiá₅.
17 Jaun₂ dsɨ₂juɨ₅ jme₁ca₂jɨ́in₂ Jesús, ca₂chi₃jné₃ ca₂jmo₃ i₁ꞌáin₃, la₁ i₂lɨn₅₄ në́₃ tsá₃ caun₂ jme₁ma₂le₁ꞌág₄ dsɨ́₅.
18 Jaun₂ ca₂jme₃quián₂ Jesús ja₁tióin₂, jaun₂ ca₂juáꞌ₂:
―Ca₂le₃jë́₃ bí₂ ꞌéiꞌ₃ liaꞌ₂ gueiꞌ₅₄ i₂juɨ́g₃ liaꞌ₂ ne₄ guaꞌ₅₄ ꞌuë₃ në́₃ ma₂ca₂ŋɨg₂.
19 Jaun₂ lë₃, o₂nóꞌ₅ ꞌniaꞌ₂ në́₃ ca₂le₂con₂ mɨ₂güɨ́g₃, o₂jme₁tɨn₅ ꞌniaꞌ₂ dsa₂ a₂léin₂ dsa₂ quiáng₃, o₂qui₂o₂chon₄ ꞌniaꞌ₂ dsa₂ jmɨg₂, liaꞌ₂ conꞌ₂ lë́₅ ꞌéiꞌ₃ quióꞌ₅ Ŋeꞌ₃, quianꞌ₅₄ liaꞌ₂ conꞌ₂ lë́₅ ꞌéiꞌ₃ quióꞌ₅ Ja₁ŋiꞌ₅₄,a quianꞌ₅₄ liaꞌ₂ conꞌ₂ lë́₅ ꞌéiꞌ₃ quióꞌ₅ Jme₂dsí₂ Jŋió₅,
20 o₂jme₁tɨin₅ ꞌniaꞌ₂ a₂nag₃ gau₂ ca₂le₃jë́₃ ꞌéiꞌ₃ a₂ma₂cuë́₃ jniá₂ ꞌniaꞌ₂. Jaun₂ ŋiꞌ₅₄ ꞌniaꞌ₂ në́₃, la₂ bá₄ ꞌeng₅₄ quianꞌ₅₄ ꞌniaꞌ₂ ca₂le₃jë́₃ jmɨg₄, ca₂liaꞌ₂ ca₂ꞌŋia₅ jmɨg₄ jë₁ca₂tóꞌ₂.
Co₂në₅.