Ca₂jɨ́nꞌ₂ dsa₂ Jesús o₄gú₃ Pilato
27
Jme₁jnia₃ jaun₂, ca₂le₃jɨ́n₃ juɨg₅₄ jme₂dsa₂ quianꞌ₅₄ guiꞌ₅₄ canꞌ₅₄ quián₅ dsa₂ juɨg₂ ca₂jmo₃ caun₂ jág₁ a₂jŋɨiꞌ₃ Jesús.
2 Qui₂ca₂ꞌnéi₂ tioinꞌ₅₄, jaun₂ ca₂tág₃ ca₂i₁jangꞌ₂ ne₄ Dsi₄máꞌ₂ Poncio Pilato.
Ca₂jon₃ Judas
3 Jme₁ma₂të₅ ne₄ Judas i₂ca₂ꞌnag₃, a₂ma₂në₂dsí₃ dsa₂ ꞌéiꞌ₃ a₂jŋɨiꞌ₃ Jesús, jaun₂ ca₂táꞌ₂ quɨꞌ₂ dsɨ́₅. Jaun₂ ca₂i₁con₂ táng₃ ta₁guiog₃-guiá₂ ꞌéiꞌ₃ cu₄tiog₂ jaun₂, ca₂jɨ́inꞌ₃ juɨg₅₄ jme₂dsa₂ quianꞌ₅₄ guiꞌ₅₄ canꞌ₅₄.
4 Jaun₂ ca₂juáꞌ₂:
―Ma₂në₂ꞌno₃ jniá₂ dso₄, ia₁ në₂jɨngꞌ₅₄ ne₄ ꞌmú₃ jan₂ i₂tsá₃ dso₄ rɨn₂.
La₁ ca₂ŋag₃ dsa₂ ꞌéi₂:
―Tsá₃ ꞌe₂ a₂jaun₂ dsan₂ dsɨ₅ jniaꞌ₅₄. A₂ca₂tɨ́nꞌ₂ ꞌne₂ bá₄ jaun₂.
5 Conꞌ₂ ca₂i₁guiaꞌ₂ jaun₂ bá₄ Judas cu₄ jaun₂ dsi₂néi₂ ja₁jŋió₅ guáꞌ₅ templo*, jaun₂ ca₂o₃ꞌɨ́in₃ ca₂i₁tiá₄ ché₂ dsɨ₂lag₅₄ ca₂jŋɨiꞌ₃ ꞌŋiog₅.
6 Juɨg₅₄ jme₂dsa₂ në́₃ ca₂i₁cagꞌ₂ cu₄ jaun₂, jaun₂ ca₂juáꞌ₂:
―Tsá₃ ꞌi₄ ꞌéiꞌ₃ dsɨ₃toꞌ₅₄ cu₄ la₂ ꞌŋióꞌ₃ gu₅ ja₁tioꞌ₅₄ cu₄ quióꞌ₅ guáꞌ₅, ia₁ cu₄ a₂ca₂quɨ́n₂ jmɨ₂ bá₄ la₂.
7 Jaun₂ ca₂jmo₃ caun₂ jág₁ a₂lá₃ caun₂ ꞌuë₃ quianꞌ₅₄ cu₄ jaun₂ quióꞌ₅ jan₂ dsa₂ i₂jme₁jmo₅ nɨ₁dsɨg₁ guaꞌ₅₄, ja₁jmo₃ ꞌuë₃ ja₁ꞌóin₂ jmáꞌ₃ liaꞌ₂ dsɨ₂nau₂.
8 ꞌUɨg₅₄ jaun₂ chei₂ ja₁jaun₂ ca₂të₂ jmɨg₄ në₃, ꞌUë₃ Jmɨ₂.
9 Le₂në₅ ca₂rë₃ti₃ jág₁ a₂ca₂juáꞌ₂ Jeremías, dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂, jme₁ca₂juáꞌ₂: “Ca₂can₃ dsa₂ guióg₂-guiá₂ cu₄tiog₂, conꞌ₂ ꞌmaꞌ₅₄ a₂ca₂dsi₂ dsa₂ juɨg₂ Israel* quióꞌ₅ ꞌéi₂.
10 Quianꞌ₅₄ cu₄ jaun₂ ca₂lá₃ caun₂ ꞌuë₃ quióꞌ₅ dsa₂ i₂jmo₅ nɨ₁dsɨg₁, liaꞌ₂ conꞌ₂ lë́₅ ꞌéiꞌ₃ quióꞌ₅ Te₁guiꞌ₅₄.”a
Chénꞌ₅ Jesús ne₄ Pilato
11 Të₁liaꞌ₂ jaun₂, chénꞌ₅ Jesús ne₄ dsi₄máꞌ₂, jaun₂ ꞌéi₂ në́₃ ca₂ŋag₃:
―¿Dsónꞌ₂ lɨ́ngꞌ₅ Rag₅₄ quián₅ dsa₂ judíos*?
Jaun₂ ca₂ŋag₃ Jesús:
―Le₂në₅ bá₄, juɨ₁liaꞌ₂ juáꞌ₂ ꞌne₂ në₅.
12 Jaun₂ caun₂ qui₂ca₂ꞌnag₃ bá₄ juɨg₅₄ jme₂dsa₂ quianꞌ₅₄ guiꞌ₅₄ canꞌ₅₄ tioinꞌ₅₄. La₁ tsá₃ ma₃ꞌe₂ ca₂ŋag₃ Jesús.
13 Jaun₂ ca₂juáꞌ₂ Pilato:
―¿Tsa₁ nagꞌ₂ ca₂le₃jë́₃ ꞌe₂ i₁juáꞌ₄ dsa₂ në₅ ꞌnɨi₂₃ ꞌne₂?
14 La₁ tsá₃ ma₃ꞌe₂ ca₂ŋag₃ Jesús ꞌi₁caun₂; jaun₂ ca₂i₃góꞌ₃ dsɨ́₅ Pilato.
Ca₂o₃ꞌág₃ ꞌéiꞌ₃ a₂jón₂ Jesús
15 Jmɨg₄ jaun₂ jme₁chíꞌ₄ tag₄ quióꞌ₅ dsi₄máꞌ₂ a₂lióin₂ ca₂le₃jë́₃ ŋi₂, jan₂ dsa₂ i₂ꞌen₅₄ néꞌ₃ ꞌmá₃, jme₁të₅ Jmɨg₄ Të₂ꞌɨn₅₄*, ꞌein₂ ca₂ꞌɨn₃ dsa₂ juɨg₂ i₂lión₂.
16 Jmɨg₄ jaun₂ jme₁rë₂jnɨ́₅ jan₂ dsa₂ i₂chen₂ Barrabás, ca₂le₂con₂ bá₄ ꞌei₅ jág₁ quióꞌ₅ a₂ꞌlɨinꞌ₅₄.
17 Të₃jë₄ le₁ŋɨꞌ₂ dsa₂ jaun₂, ca₂ŋag₃ Pilato ca₂ŋɨ́iꞌ₃ dsa₂ juɨg₂:
―¿I₂ꞌein₂ ꞌniogꞌ₂ ꞌniaꞌ₂ lon₄ jniá₂ quiánꞌ₂ ꞌniaꞌ₂? ¿Barrabás, o₃ Jesús i₂të́ꞌ₂ dsa₂ I₂rë₂ꞌɨ́n₁* quián₅ Diú₄ ꞌe₂?
18 Ia₁ ca₂rë₃líꞌ₄ bá₄ Pilato ꞌŋiog₅, a₂ꞌiog₅₄ uɨg₅ dsɨ́₅ bá₄ dsa₂ ca₂jɨ́inꞌ₂ Jesús ne₅₄.
19 Të₁liaꞌ₂ guá₅ Pilato ne₄ta₁ quióꞌ₅, ja₁qui₂dsɨ₂₃ ꞌéiꞌ₃, të₃jë₄ jaun₂ ca₂chen₃ ꞌio₅₄ quiáin₅ jág₁ ne₅₄ a₂ca₂juáꞌ₂: “Tsá₃ lë₁tián₅ ꞌne₂ cuente quióꞌ₅ dsa₂ i₂tsá₃ ꞌe₂ rɨn₂ në₅. Ia₁ ꞌŋio₅ gau₂ qui₂chóg₂ i₃ŋɨ́g₂ ca₂néi₃ o₄quióꞌ₄.”
20 La₁ juɨg₅₄ jme₂dsa₂ quianꞌ₅₄ guiꞌ₅₄ canꞌ₅₄ në́₃, ca₂toinꞌ₂ jág₁ dsa₂ juɨg₂ ia₁jaun₂ mɨ₃ dsa₂ tsɨ́ꞌ₃ Pilato a₂lióin₂ Barrabás bá₄, jaun₂ jŋɨiꞌ₃ bá₄ Jesús.
21 Jaun₂ ca₂juáꞌ₂ Pilato ca₂tsɨ́ꞌ₃ dsa₂:
―¿I₂ꞌein₂ dsa₂ on₃ la₂ ꞌniogꞌ₂ ꞌniaꞌ₂ lon₄ jniá₂?
Jaun₂ ca₂ŋag₃ dsa₂ juɨg₂ tioinꞌ₅₄:
―Barrabás bá₄.
22 Jaun₂ ca₂ŋag₃ táng₃ Pilato ca₂ŋɨ́iꞌ₃ dsa₂ juɨg₂:
―¿ꞌE₂ guëꞌ₂ ꞌniogꞌ₂ ꞌniaꞌ₂ jmo₅₄ jniá₂ quianꞌ₅₄ Jesús i₂të́ꞌ₂ dsa₂ I₂rë₂ꞌɨ́n₁ quián₅ Diú₄?
Jaun₂ ca₂ŋag₃ co₂dsia₅ ca₂le₃jɨ́in₃ tioinꞌ₅₄:
―¡Tióin₃ cróg₄!
23 Jaun₂ ca₂ŋag₃ táng₃ Pilato:
―¿ꞌE₂ ꞌuɨg₅₄ në́₃? ¿ꞌE₂ guëꞌ₂ dso₄ ma₂ꞌnáu₂?
La₁ të₂le₃ i₂juɨꞌ₂ guë́₄ co₂mɨꞌ₅₄ ca₂tóinꞌ₂, ca₂juáꞌ₂:
―¡Tióin₃ cróg₄!
24 La₁ ca₂rë₃líꞌ₄ bá₄ Pilato tsá₃ ꞌe₂ ta₁ jmo₃ jág₁ quióꞌ₅, ia₁ të₂le₃ ꞌŋio₅ lɨn₃ guë́₄ juɨ₁si co₂mɨꞌ₅₄ ca₂tóinꞌ₂. Jaun₂ lë₃, ca₂chein₃ jan₂ dsa₂ i₁quian₅₄ jmɨg₂, jaun₂ ca₂rang₃ gu₂ të₃ne₄ dsa₂ juɨg₂, jaun₂ ca₂juáꞌ₂:
―Tsá₃ ꞌe₂ rë₃cánꞌ₄ jniá₂ jmɨ₄ dsa₂ në₅; guionꞌ₅₄ bá₄ ꞌniaꞌ₂ rë₂cángꞌ₄ në₁ꞌe₂ ca₂jmaiꞌ₅₄.
25 Jaun₂ ca₂ŋag₃ ca₂le₃jɨ́n₃ dsa₂ juɨg₂ tioinꞌ₅₄:
―¡Jmɨ₄ ꞌmú₃ quióꞌ₅ i₂në₅, juɨ₁dsi₂ŋag₂ jniaꞌ₅₄ ꞌe₂ dsɨ₃ŋág₂, quianꞌ₅₄ tsɨ₁jon₂ quián₂ jniaꞌ₅₄ i₂në₃ guë́₄ të₁ja₃lén₂!
26 Jaun₂ ca₂lión₂ bá₄ Pilato Barrabás i₂mɨ₅ dsa₂ lión₂; jaun₂ ca₂jmo₃ ꞌéiꞌ₃ a₂bán₂ dsa₂ Jesús, jaun₂ guë́₄ ca₂jángꞌ₂ o₄gú₃ dsa₂ juɨg₂ jaun₂ tion₃ cróg₄.
27 Jme₁co₂lág₂ jaun₂, ꞌlióg₂ quián₅ dsi₄máꞌ₂ ca₂jŋiai₃ Jesús juɨ₅ i₁dsi₅ ne₄ta₁ jaun₂. Jaun₂ ca₂ŋɨꞌ₂ ca₂le₃jɨ́n₃ ꞌlióg₂ le₃lágꞌ₃ quióꞌ₅ Jesús.
28 Jaun₂ guë́₄ ca₂dsi₂ tsɨnꞌ₅₄ Jesús, ca₂queiꞌ₃ caun₂ tsɨ₁ꞌmɨꞌ₂ guéin₂ ꞌuɨꞌ₃,b
29 jaun₂ ca₂jmo₃ caun₂ corona quianꞌ₅₄ chi₁uɨ́ng₃ taun₅, ca₂tóꞌ₂ mɨ₂dsi₄ Jesús. Ca₂chongꞌ₂ ca₂ꞌnau₅₄ guëꞌ₂ nɨ₁ꞌma₂ ta₅ gu₂ ne₁. Jaun₂ guë́₄ ca₂chi₃jné₃ ne₄ Jesús tioinꞌ₅₄, a₂lë₁qui₂co₂jmógꞌ₂, ca₂juáꞌ₂:
―¡Sianꞌ₃ ꞌne₂, Rag₅₄ quián₅ dsa₂ judíos!
30 Ján₃ qui₂ca₂ꞌŋéi₂ dsa₂, qui₂ca₂bá₂ dsa₂ mɨ₂dsi₅₄ quianꞌ₅₄ nɨ₁ꞌma₂ a₂ca₂chongꞌ₃ jaun₂.
31 Jme₁ca₂lë₃ a₂lë₁co₂jmógꞌ₂ jaun₂, ca₂dsei₂₃ táng₃ tsɨ₁ꞌmɨꞌ₂ ꞌuɨꞌ₃ a₂jme₁ca₂queiꞌ₃, jaun₂ ca₂queiꞌ₃ táng₃ nɨ₁tsɨnꞌ₅₄ a₂jme₁quiꞌ₂. Jaun₂ guë́₄ ca₂jiog₃ ca₂të₂ ja₁të₃toin₅₄ cróg₄.
Ca₂tion₃ dsa₂ cróg₄ Jesús
32 A₂ca₂ꞌuɨin₂ jaun₂, ca₂jeinꞌ₂ jan₂ dsa₂ i₂chan₂ Cirene, i₂chen₂ Si₂mu₅₄. Jaun₂ ca₂chi₃quiáin₂ jmɨg₄ ꞌéi₂ a₂cán₂ cróg₄.
33 Jaun₂ ca₂dsi₃léin₂ jme₁dsi₃léin₂ caun₂ ja₁chei₂ Gólgota, co₂ꞌnióꞌ₄ ja₁të́ꞌ₂ dsa₂ Dsɨ₂conꞌ₂ Nɨ₁mu₅ Mɨ₂dsi₄ ꞌLag₄.
34 Ja₁jaun₂ ca₂jénꞌ₃ dsa₂ ne₄ Jesús vino a₂rë₃cónꞌ₅ quianꞌ₅₄ dsɨ́ꞌ₁ jáꞌ₂;c la₁ dsɨ₂juɨ₅ jme₁ca₂tí₂ Jesús ꞌo₅₄, tsá₃ ma₃ca₂ꞌɨnꞌ₃.
35 Jme₁ca₂lë₃ tion₂₃ cróg₄, ꞌlióg₂ në́₃ ca₂jmo₃ dsióg₁ tsɨnꞌ₅₄ Jesús, ca₂co₃ o₁ne₄ ꞌein₂ líꞌ₂.d
36 Ja₁jaun₂ ca₂tiáinꞌ₂ jmo₂₃ ꞌí₁.
37 Dsi₄ cróg₄ ca₂tióng₃ dsa₂ letra ja₁juáꞌ₂ ꞌe₂ dso₄ a₂bóinꞌ₂ Jesús, a₂juáꞌ₂ le₂la₂: “I₂LA₂ BÁ₄ JESÚS, I₂LƗ́N₅ RAG₅₄ QUIÁN₅ DSA₂ JUDÍOS”.
38 Ján₃ bá₄ ca₂tioin₃ guë́₄ on₃ dsa₂ ꞌang₂ co₂lë₅ quiongꞌ₅₄, jan₂ të₂le₃ gu₂ ne₁, jan₂ guëꞌ₂ të₂le₃ gu₂ jen₅.
39 Jaun₂ ca₂le₃jɨ́n₃ dsa₂ i₂qui₂ca₂ŋɨ́₃ juɨ₅ jaun₂ qui₂ca₂jnáuꞌ₂ jág₁ uɨg₅, qui₂bí₂ dsi₅₄,
40 ca₂juáꞌ₂:
―ꞌNe₂ guëꞌ₂ i₂juáꞌ₂ a₂ꞌéngꞌ₄ guáꞌ₅, conꞌ₂ siáꞌ₂ tɨngꞌ₂ jmogꞌ₅₄ táng₃ quianꞌ₅₄ ꞌnɨ₅ jmɨg₄, në₃ në́₃, lion₄ ꞌŋiagꞌ₂. Sión₅ ja₁tongꞌ₂ në₅, chi₂juaꞌ₂ dsónꞌ₂ ꞌne₂ lɨ́ngꞌ₅ Ja₁ŋiꞌ₅₄ Diú₄.
41 Ján₃ bá₄ le₂jaun₂ a₂lë₁qui₂co₂jmógꞌ₂ juɨg₅₄ jme₂dsa₂ quianꞌ₅₄ të₅juáꞌ₅, guiꞌ₅₄ canꞌ₅₄ në́₃, dsia₂₃ jág₁ qui₂tsɨ́ꞌ₅ rɨinꞌ₅₄, juáꞌ₂:
42 ―Ca₂lióin₂ bá₄ i₂siánꞌ₂, la₁ ꞌŋiog₅ bá₄ tsá₃ lé₂ le₃lióin₂. Chi₂juaꞌ₂ i₂në₅ lɨ́n₅ Rag₅₄ quián₅ dsa₂ juɨg₂ Israel*, juɨ₁sióin₄ cróg₄ ia₁jaun₂ bá₄ le₃ꞌéin₂ jniog₄ le₃quióꞌ₅.
43 I₂në₅ guëꞌ₂ juáꞌ₂ ꞌei₅ caun₂ dsɨ́₅ ne₄ Diú₄; në₃ në́₃ ꞌéi₂ juɨ₁lio₅₄ chi₂juaꞌ₂ të₃dsónꞌ₂ bá₄ ꞌnioi₃ i₂në₅; ia₁ ꞌŋiog₅ guëꞌ₂ ma₂juáꞌ₂ lɨ́in₅ Ja₁ŋiꞌ₅₄ Diú₄.
44 Le₂jiog₅ dsa₂ ꞌang₂ i₂le₁ton₅ quianꞌ₅₄ Jesús qui₂ca₂juáꞌ₂ uɨg₅.
Ca₂jon₃ Jesús
45 Jme₁ca₂të́₂ dsi₂ŋíꞌ₃,e ca₂ꞌág₂ nei₂ le₂tan₅₄ le₂con₂ ꞌuë₃ jaun₂ ca₂liaꞌ₂ ca₂të́₂ hora ŋí₁ ꞌnɨ₅f të₂le₃ ca₂ꞌláu₂.
46 Hora jaun₂, ca₂ꞌŋia₂ guë́₄ Jesús, jág₁ ca₂juáꞌ₂ tiá₂:
―Elí, Elí, ¿lama sabactani? ―co₂ꞌnióꞌ₄ a₂juáꞌ₂: Diú₄ quiáng₃, Diú₄ quiáng₃, ¿ꞌe₂ lë₃ ma₂në₂téiꞌ₃ jniá₂?g
47 I₂lɨn₅₄ dsa₂ i₂jme₁tión₂ cau₅ jaun₂ ca₂nág₂, jaun₂ ca₂dsia₃ jág₁ tsɨ́ꞌ₅ rɨinꞌ₅₄:
―Nei₂ ꞌniaꞌ₂. Elías, i₂jme₁ꞌë́₂ jág₁ quián₅ Diú₄ ma₂lɨ́gꞌ₂, të́ꞌ₂.
48 Jaun₂ dsɨ₂juɨ₅ le₂jaun₂ ŋó₃ jan₂ co₂chiꞌ₅₄ i₁quian₅₄ caun₂ nɨ₁jau₂ guion₅ jmɨg₂. Jaun₂ ca₂guioin₃ vino dsiꞌ₃, jaun₂ ca₂chi₃dsí₂ neiꞌ₅₄ caun₂ nɨ₁ꞌma₂ ta₅, jaun₂ ca₂jénꞌ₃ ne₄ Jesús ia₁jaun₂ jme₁ꞌɨ́nꞌ₂.
49 La₁ ca₂juáꞌ₂ rɨinꞌ₅₄:
―Tsá₃ leinꞌ₅₄; o₁ne₄ chi₂juaꞌ₂ jiá₃ Elías ja₃lio₅₄ quióꞌ₅.
50 Conꞌ₂ bá₄ ca₂ꞌŋióg₂ guë́₄ Jesús tiá₂ lɨn₃, jaun₂ guë́₄ ca₂jángꞌ₃ jme₂dsí₂ quióꞌ₅.
51 Hora jaun₂ dé₄ dsónꞌ₂ co₂dsia₅ ca₂chen₃ ca₂të₂ gueiꞌ₅₄ ca₂të₂ ꞌuë₃ ca₂lë₃ tɨn₃ tsɨ́nꞌ₅ tsɨ₁ꞌmɨꞌ₂* pa₁ a₂jme₁ꞌei₅ dsi₂néi₂ guáꞌ₅ templo*. ꞌUë₃ guëꞌ₂ në́₃ ca₂i₁bi₅₄, nɨ₁ꞌlau₂ a₂te₁ꞌi₁ ja₁jaun₂ qui₂ca₂dsón₂;
52 tau₂ ꞌŋio₅ në́₃ qui₂ca₂niá₃ ca₂lë₃; ján₃ bá₄ qui₂ca₂jenꞌ₅₄ juɨn₅ ꞌlag₄ jŋió₅ quián₅ Diú₄ i₂ma₂dsan₃ le₂jŋiá₅.
53 Qui₂ca₂ꞌuɨin₂ tau₂ ꞌŋio₅; ca₂i₃toinꞌ₅₄ Jerusalén ciudad jŋió₅ jme₁ca₂jenꞌ₅₄ Jesús, tonꞌ₂ ca₂jme₃jniai₂₃ në́₃ ne₄ juɨn₅ dsa₂.
54 Jaun₂ juɨg₅₄ ꞌlióg₂ quianꞌ₅₄ guë́₄ dsa₂ i₂jme₁quiainꞌ₅₄ jmo₂₃ ꞌí₁ Jesús, jme₁ma₂të₅ ne₅₄ dsɨ₂bi₅₄ ꞌuë₃ ma₂lë́₂ ca₂le₃jë́₃ guë́₄ ꞌe₂ a₂ca₂lë₃ jaun₂, jaun₂ guë́₄ ca₂rë₃góꞌ₅ ꞌŋio₅ lɨn₃; jaun₂ guë́₄ ca₂juáꞌ₂:
―Të₃dsónꞌ₂ bá₄ jme₁lɨ́n₄ i₂në₅ Ja₁ŋiꞌ₅₄ Diú₄.
55 Jme₁tionꞌ₅₄ juɨn₅ ꞌio₅₄ ja₁jaun₂ jág₅, tióin₂ uɨ́ng₂. ꞌÉi₂ ma₂ja₂léin₂ jme₂ti₃ ne₄ Jesús le₂tan₅₄ ꞌuë₃ Galilea.
56 Jɨn₄ ꞌio₅₄ ꞌéi₂ jme₁ꞌen₅₄ María i₂chan₂ Magdala, quiainꞌ₅₄ María chog₅₄ Jacobo quianꞌ₅₄ Së́₄; quianꞌ₅₄ chog₅₄ chiꞌ₂ quián₅ Zebedeo.
Ca₂ꞌon₃ Jesús
57 Jme₁ca₂tóꞌ₂ nei₂ jmɨg₄ jaun₂, guan₃ jan₂ dsa₂ cha₂ cu₄ i₂chen₂ José, i₂chan₂ juɨg₂ Arimatea, ia₁ ján₃ bá₄ ca₂rë₃ꞌéin₂ le₃quióꞌ₅ Jesús.
58 ꞌÉi₂ në́₃, ŋei₅₄ i₂jɨin₁₂ Pilato, ca₂i₁mɨiꞌ₄ ꞌlag₄ Jesús. Jaun₂ ca₂jmo₃ Pilato ꞌéiꞌ₃ a₂jángꞌ₂ dsa₂.
59 Jaun₂ në́₃ ca₂tág₃ Së́₄, ca₂lio₃ rë₂ quianꞌ₅₄ caun₂ tsɨ₁ꞌmɨꞌ₂ le₁jë́₃.
60 Jaun₂ ca₂i₁tioꞌ₂ ꞌŋióꞌ₃ caun₂ tau₂ ꞌŋio₅ ꞌmɨ́₂ quióꞌ₅ ꞌŋiog₅, a₂jme₁ma₂guéi₃ dsoꞌ₂ nɨ₁ꞌlau₂. Jaun₂ ca₂jŋióiꞌ₃ ca₂mɨ́g₂ nɨ₁cang₁ lɨꞌ₂ pa₁, ca₂jlë́₂ ꞌo₄ tau₂ ꞌŋio₅, jaun₂ guë́₄ ca₂ŋáiꞌ₃.
61 La₁ María i₂chan₂ Magdala quiainꞌ₅₄ María jan₂ ꞌéi₂, jaun₂ bá₄ jme₁tiáinꞌ₄ të₂le₃ ja₁jniá₂ o₄ꞌné₄ tau₂ ꞌŋio₅.
Jmo₅ ꞌlióg₂ ꞌí₁ tau₂ ꞌŋio₅
62 Jme₁jnia₃ táng₃ jaun₂, co₂ꞌnióꞌ₄ jme₁ca₂dsan₃ tionꞌ₅₄ dsa₂ jmo₂₃ co₂jŋia₅₄ a₂ꞌnióꞌ₅ quióꞌ₅ jmɨg₄, jaun₂ ca₂i₁len₅₄ juɨg₅₄ jme₂dsa₂ quianꞌ₅₄ dsa₂ fariseos* në́₃ ca₂ŋɨiꞌ₂ ne₄ Pilato,
63 ca₂i₁juaꞌ₄:
―Guiꞌ₅₄, dsáuꞌ₅ dsɨ₅ jniaꞌ₅₄, a₂ca₂juáꞌ₂ të₂jág₁ ꞌéi₂ liaꞌ₂ conꞌ₂ jme₁chain₂ guë́₄, a₂jeinꞌ₅₄ táng₃ a₂ꞌnɨ₅ jmɨg₄.
64 ꞌUɨg₅₄ jaun₂, chen₅ ꞌlióg₂ juɨ₁dsi₂jmó₂ ꞌí₁ tau₂ ꞌŋio₅ ca₂liaꞌ₂ ca₂të́₂ jmɨg₄ ꞌnɨ₅, ia₁ conꞌ₂ tsá₃ ŋó₅ në₁juaꞌ₂ ja₂lén₂ dsa₂ i₂jme₁quiainꞌ₅₄ të₂, jaun₂ táun₂ jág₁ cang₂, lé₂ le₃juáꞌ₂: “Ma₂ca₂jeinꞌ₅₄ bá₄ táng₃.” Ia₁ në₁juaꞌ₂ ca₂lë₃ le₂jaun₂, ja₂lɨn₃ guë́₄ juëꞌ₂ lé₂ jág₁ të₂jág₁ jë₁ca₂tóꞌ₂ në₅, conꞌ₂ guë́₄ jág₁ të₂jág₁ le₂ꞌuɨg₅₄.
65 Jaun₂ ca₂juáꞌ₂ Pilato:
―Në₅ tión₂ co₂nióꞌ₃ i₂në₅. O₂nóꞌ₅ ꞌniaꞌ₂ quiainꞌ₅₄, o₂jmo₄ ꞌniaꞌ₂ ꞌí₁ ꞌa₂ conꞌ₂ jŋiaꞌ₅₄ tianꞌ₃ ꞌniaꞌ₂ jmóꞌ₂.
66 Jaun₂ ca₂i₃léin₂ jaun₂ në́₃, i₁jmo₅₄ ꞌí₁ dse₃ lɨn₃ tau₂ ꞌŋio₅, ca₂tióng₃ caun₂ sello dsoꞌ₂ nɨ₁cang₁ a₂chi₁jnɨ₅, jaun₂ ca₂cheinꞌ₃ co₂nióꞌ₃ ꞌlióg₂ i₂jmo₃ ꞌí₁.