2 Rɨnꞌ₅₄ jniog₄, a₂ꞌŋio₂ dsɨ₃ lɨn₃ cuë́₅ jniá₂ ti₁ꞌmagꞌ₄ ꞌniaꞌ₂, ꞌuɨg₅₄ ia₁ a₂dsauꞌ₂ bá₄ ꞌauꞌ₂ jniá₂, ia₁ chanꞌ₅₄ bá₄ ꞌniaꞌ₂ tiá₂ jág₁ conꞌ₂ lë́₅ ma₂ca₂jme₁tɨn₅ jniá₂ ꞌniaꞌ₂.

3 La₁ ꞌnio₃ jniá₂ a₂le₃ŋiꞌ₅₄ ꞌniaꞌ₂: juɨ₁liaꞌ₂ lɨ́n₅ Cristo mɨ₂dsi₄ le₂jan₂ le₂jan₂ dsa₂ ŋeꞌ₂, ján₃ guëꞌ₂ le₂jaun₂ lɨ́n₅ dsa₂ ŋeꞌ₂ mɨ₂dsi₄ dsa₂ mɨ́₂; jaun₂ lɨ́n₅ Diú₄ mɨ₂dsi₄ Cristo.

4 Juaꞌ₅₄ meiꞌ₂ guë́₃ jan₂ dsa₂ ŋeꞌ₂ jlë́₂ dsi₅₄ jme₁chi₂léinꞌ₂ Diú₄ jë₁le₁ŋɨꞌ₂ dsa₂, o₃ jme₁ŋág₅ jág₁ a₂cuë₅ Diú₄, cheinꞌ₂₃ o₂guíꞌ₃ mɨ₂dsi₅₄ chi₂juaꞌ₂ le₂jaun₂.

5 La₁ chi₂juaꞌ₂ jan₂ guëꞌ₂ dsa₂ mɨ́₂ tsá₃ chi₁jlë₅ dsi₅₄ jme₁chi₂léinꞌ₂ Diú₄, o₃ jme₁ŋág₅ jág₁ a₂cuë₅ Diú₄, cheinꞌ₂₃ o₂guíꞌ₃ mɨ₂dsi₅₄ chi₂juaꞌ₂ le₂jaun₂ ján₃; co₂jaun₂ bá₄ dsióg₅ në₂jag₄ bá₄ rë₂chei₄ jŋi₂ dsi₅₄.

6 Chi₂juaꞌ₂ tsá₃ ꞌnio₃ juɨ₁liaꞌ₂ jan₂ dsa₂ mɨ́₂ jlë́₂ dsi₅₄, co₂ŋeiꞌ₅₄ o₁chéi₄ jŋi₂ dsi₅₄. La₁ chi₂juaꞌ₂ caun₂ o₂guíꞌ₃ jaun₂, a₂chéi₃ jan₂ dsa₂ mɨ́₂ jŋi₂ dsi₅₄, o₃ a₂téiꞌ₅ ꞌe₂, juɨ₁jlë₅₄ bá₄ mɨ₂dsi₅₄.

7 Tsá₃ ca₂tɨ́n₂ dsa₂ ŋeꞌ₂ jlë́₂ dsi₅₄, ia₁ ꞌéi₂ bá₄ lɨ́n₅ co₂ꞌnióꞌ₄ nióꞌ₄ quióꞌ₅ Diú₄, i₂jme₂jnia₅ a₂jláꞌ₁ quióꞌ₅ Diú₄. La₁ia₁ dsa₂ mɨ́₂ në́₃, lɨ́n₅ i₂jlánꞌ₁ quián₅ dsa₂ ŋeꞌ₂.

8 Le₂ꞌuɨg₅₄ liaꞌ₂ conꞌ₂ jme₁ca₂jmóꞌ₂ Diú₄ dsa₂ ŋeꞌ₂, ma₁ on₃juaꞌ₅₄ quióꞌ₅ dsa₂ mɨ́₂ ca₂can₃ ꞌuɨg₅₄. Dsa₂ mɨ́₂ bá₄ ꞌéi₂ ca₂já₃ ca₂lɨin₃ quianꞌ₅₄ nɨ₁ŋɨ₁ dsa₂ ŋeꞌ₂.

9 O₄quióꞌ₄ dsa₂ ŋeꞌ₂ bá₄ ca₂jmóꞌ₂ Diú₄ dsa₂ mɨ́₂, jaun₂ on₃juaꞌ₅₄ rëꞌ₂ dsa₂ ŋeꞌ₂ ca₂lɨin₃ o₄quióꞌ₄ dsa₂ mɨ́₂.

10 ꞌUɨg₅₄ jaun₂ guëꞌ₂ në́₃, o₄quióꞌ₄ ángeles, ca₂tɨ́n₂ dsa₂ mɨ́₂ cán₂ caun₂ léi₄ ne₄ mɨ₂dsi₅₄, a₂ꞌein₅₄ ꞌéiꞌ₃.

11 La₁ të₂le₃ quióꞌ₅ Te₁guiꞌ₅₄ në́₃, tsá₃ lé₂ le₃chan₂ dsa₂ ŋeꞌ₂ juaꞌ₅₄ meiꞌ₂ guë́₃ tsá₃ dsa₂ mɨ́₂ chan₂. Le₂jaun₂ guëꞌ₂ ján₃ tsá₃ lé₂ le₃chan₂ dsa₂ mɨ́₂ juaꞌ₅₄ meiꞌ₂ guë́₃ tsá₃ dsa₂ ŋeꞌ₂ chan₂ táng₃.

12 Ia₁ juɨ₁liaꞌ₂ ca₂já₃ dsa₂ mɨ́₂ dsɨ₁con₂ dsa₂ ŋeꞌ₂, ján₃ bá₄ le₂jaun₂ guëꞌ₂ në́₃ rë₂chan₂ dsa₂ ŋeꞌ₂ cáun₂ dsa₂ mɨ́₂. La₁ ja₂lé₂ ca₂le₃jë́₃ ja₁con₂ Diú₄.

13 Quion₂ ꞌniaꞌ₂ ꞌí₁ jɨnꞌ₄ ꞌniaꞌ₂ guiongꞌ₅₄: ¿Dsi₁ten₅₄ chi₃lénꞌ₂ dsa₂ mɨ́₂ Diú₄ jme₁le₁ŋɨꞌ₂ ꞌniaꞌ₂ të₃ tsá₃ chi₁jlë₅ mɨ₂dsi₅₄?

14 ¿Tsa₁ léi₄, tsa₁ jágꞌ₂ ꞌniaꞌ₂ ꞌa₂ liaꞌ₂ lë́₅ dsi₂ten₅₄ i₂nio₄ dsa₂, caun₂ o₂guíꞌ₃ bá₄ jaun₂ quióꞌ₅ juɨ₁liaꞌ₂ jan₂ dsa₂ ŋeꞌ₂, chi₂juaꞌ₂ quian₅ jŋi₂ dsi₅₄ jang₄?

15 La₁ dsa₂ mɨ́₂ guëꞌ₂ në́₃, jláꞌ₁ bá₄ të₂le₃ quióꞌ₅ ꞌéi₂ chi₂juaꞌ₂ quian₅ jŋi₂ dsi₅₄ jang₄. Ia₁ conꞌ₂ jaun₂ ca₂ŋɨi₂ jŋi₂ dsi₅₄ jang₄ co₂ꞌnióꞌ₄ caun₂ ꞌmɨꞌ₂ ꞌŋiáꞌ₂.

16 Chi₂juaꞌ₂ chan₂ guëꞌ₂ i₂ꞌnio₃ tsɨn₃ quióꞌ₅ jág₁ në₅, jaun₂ juáꞌ₅ jniá₂, ca₂liaꞌ₂ jŋiaꞌ₅₄ jniaꞌ₅₄ guio₅₄, on₃ guëꞌ₂ ꞌi₁caun₂ guáꞌ₅ quián₅ Diú₄, tsá₃ tag₄ siáꞌ₂ chíꞌ₅.

17 La₁ ne₄ si₂ la₂, ꞌéiꞌ₃ a₂në₃ guë́₄ jmo₅₄ jniá₂, tsá₃ lé₂ juaꞌ₅₄ juáꞌ₄ jniá₂ a₂dse₃ tionꞌ₅₄ ꞌniaꞌ₂. Ia₁ jmoꞌ₂ ꞌniaꞌ₂ dain₅₄ jme₁ŋɨgꞌ₂, ꞌnióꞌ₄ a₂jme₁jmóꞌ₂ ꞌniaꞌ₂ a₂dse₃.

18 Jë₁le₂ꞌuɨg₅₄ juáꞌ₅ jniá₂, ma₂guion₅₄ jág₁ a₂jmoꞌ₂ ꞌniaꞌ₂ le₁dsongꞌ₅₄, liaꞌ₂ jme₁ŋɨꞌ₂ ꞌniaꞌ₂. Meiꞌ₂ tsá₃ tí₅ bá₄ ca₂la₂ jág₁ në₅, lɨ́ng₂.

19 Dsónꞌ₂ bá₄ jaun₂, tion₅₄ niog₅ qui₃jmo₃ dsa₂ jma₃quén₅ la₂-në₅, ia₁jaun₂ le₃jniá₂ jɨnꞌ₄ ꞌniaꞌ₂ juɨ₁liaꞌ₂ dsa₂ i₂ma₂guei₃ Diú₄.

20 Jaun₂ lë₃, jme₁ŋɨꞌ₂ ꞌniaꞌ₂, tsá₃ ma₂lë́₅ quióꞌ₅ Te₁guiꞌ₅₄, má₃ a₂quë́ꞌ₂ ꞌniaꞌ₂ jaun₂,

21 ia₁ jë₁ma₂ca₂të́₂ hora a₂quëꞌ₅₄ ꞌniaꞌ₂, jmo₅ dsa₂ i₂lɨn₅₄ jma₃quén₅ dsɨ₂jŋiái₄ qui₂guë́ꞌ₅. Chan₂ i₂lɨn₅₄ tionꞌ₅₄ i₁cónꞌ₅; të₁liaꞌ₂ tionꞌ₅₄ i₂siánꞌ₂ le₁ꞌein₅.

22 ¿Tsa₁ dsi₂néi₂ quiánꞌ₂ ꞌniaꞌ₂ cha₂ ja₁lé₂ le₃qui₁quëꞌ₅₄ qui₁ꞌagꞌ₅₄ ꞌniaꞌ₂ në́₃? ¿O₃ bá₄ ma₂jɨnꞌ₅₄ ꞌniaꞌ₂ sion₅ guáꞌ₅ quián₅ Diú₄, ján₃ guëꞌ₂ cuëꞌ₂ ꞌniaꞌ₂ o₂guíꞌ₃ dsa₂ i₂tsá₃ ꞌe₂ cha₂ quióꞌ₅? ¿ꞌE₂ bá₄ juɨg₅₄ jniá₂ ꞌniaꞌ₂? ¿A₁juáꞌ₄ jniá₂ dse₃ liaꞌ₂ tionꞌ₅₄ ꞌniaꞌ₂ ia₁ a₂jmoꞌ₂ le₂jaun₂? ¡Dsónꞌ₂ bá₄ tsá₃ le₂jaun₂!

23 Ia₁ a₂ca₂ŋɨ₂ bá₄ jniá₂ a₂ca₂jme₃tag₅ ꞌŋiog₅ Te₁guiꞌ₅₄ a₂ma₂ca₂jme₁tɨn₅ guëꞌ₂ jniá₂ ꞌniaꞌ₂: liaꞌ₂ conꞌ₂ le₃ca₂nei₂ jmɨg₄ jme₁ca₂jángꞌ₂ dsa₂, ca₂can₃ i₁ŋíꞌ₄.

24 Jme₁ma₂dsan₃ cuë́ꞌ₅ ti₁ꞌmagꞌ₄ Diú₄, jaun₂ guë́₄ ca₂ꞌniai₃ ca₂dsióꞌ₃ i₁ŋíꞌ₄, jaun₂ ca₂juáꞌ₂: “Quéꞌ₂ ꞌniaꞌ₂; a₂la₂ bá₄ ŋɨ₃ a₂rë₂ꞌna₄ o₄quiánꞌ₂ ꞌniaꞌ₂. Jmo₄ ꞌniaꞌ₂ le₂la₂ a₂dsiogꞌ₂ ꞌauꞌ₂ jniá₂.”

25 Ján₃ bá₄ le₂në₅, jme₁ma₂ca₂lë₃ guë́ꞌ₅ i₁ŋíꞌ₄, ca₂can₃ táng₃ copa, jaun₂ ca₂juáꞌ₂: “A₂ꞌa₄ copa la₂, lë́₅ jág₁ ꞌmɨ́₂ a₂lɨꞌ₅₄ të₂le₃ quianꞌ₅₄ jmɨ₃.^a Liaꞌ₂ co₂ráun₂ ꞌagꞌ₅₄ ꞌniaꞌ₂, jmo₄ ꞌniaꞌ₂ a₂dsauꞌ₂ ꞌauꞌ₂ jniá₂.”

26 Jaun₂ le₂në₅ bá₄, liaꞌ₂ co₂ráun₂ tónꞌ₄ ꞌniaꞌ₂ quëꞌ₅₄ i₁ŋíꞌ₄, ꞌagꞌ₅₄ ꞌniaꞌ₂ a₂ꞌa₄ copa, qui₂ꞌë́ꞌ₅ ꞌniaꞌ₂ ꞌmú₃ quióꞌ₅ Te₁guiꞌ₅₄ ca₂liaꞌ₂ ca₂të́₂ jmɨg₄ i₁guainꞌ₂ táng₃.

27 Jaun₂ lë₃, chi₂juaꞌ₂ ꞌein₂ guë́ꞌ₅ i₁ŋíꞌ₄, ꞌɨ́nꞌ₂ a₂ꞌa₄ copa jaun₂, on₃juaꞌ₅₄ ia₁ a₂léi₄ dsan₂ dsɨ́₅, a₂rë₂cánꞌ₄ bá₄ ꞌéi₂ le₃ja₁con₂ ŋɨ₄ jmɨ₄ Te₁guiꞌ₅₄.

28 ꞌUɨg₅₄ jaun₂ në́₃, néꞌ₃ a₂guë́ꞌ₃ jan₂ dsa₂ i₁ŋíꞌ₄, néꞌ₃ a₂ꞌɨ́nꞌ₂ a₂ꞌa₄ copa, juɨ₁quion₂ ꞌí₁ ja₁con₂ ꞌŋiog₅.

29 Ia₁ në₁ca₂guë́ꞌ₃ ca₂ꞌɨnꞌ₃, të₃ tsá₃ rë₂ŋɨ́ꞌ₂ dsɨ́₅, tsá₃ rë₂cuɨ́ꞌ₅ ŋɨ₄ Te₁guiꞌ₅₄, cuë́ꞌ₅ uɨg₅ ꞌŋiog₅ bá₄ në₁ca₂guë́ꞌ₃ ca₂ꞌɨnꞌ₃ le₂jaun₂.

30 Ne₄ ꞌuɨg₅₄ jaun₂, juɨn₅ ꞌniaꞌ₂ i₂le₁dsoꞌ₅₄, i₂ꞌuan₅₄ në́₃; i₂lɨn₅₄ guëꞌ₂ ma₂qui₂ca₂dsain₃.

31 La₁ në₁juaꞌ₂ ca₂quiong₅₄ jniog₄ ꞌí₁ dsɨ₅ guio₅₄, tsá₃ ꞌe₂ ꞌí₁ con₂ Te₁guiꞌ₅₄ ja₁con₂ jniog₄.

32 Jme₁con₂ Te₁guiꞌ₅₄ ꞌí₁ ja₁con₂ jniog₄, jme₂rë́₃ juɨ₅ quián₂ jniog₄, ia₁jaun₂ tsá₃ guéi₁ uɨg₅ co₂lë₅ quianꞌ₅₄ dsa₂ mɨ₂güɨ́g₃.

33 Jaun₂ le₂në₅ bá₄, ꞌniaꞌ₂ rɨnꞌ₅₄ jniog₄, juɨ₁liaꞌ₂ juáꞌ₅ jniá₂ chi₂juaꞌ₂ lɨ́gꞌ₂ jme₁tónꞌ₂ ꞌniaꞌ₂ longꞌ₂ quianꞌ₅₄ rɨ́ngꞌ₂ a₂jmogꞌ₅₄ ꞌniaꞌ₂ Má₃ quióꞌ₅ Te₁guiꞌ₅₄, jŋia₄ ꞌniaꞌ₂ rɨ́ngꞌ₂ jangꞌ₂ jangꞌ₂ a₂quëꞌ₅₄ co₂dsia₅.

34 Chi₂juaꞌ₂ chan₂ jan₂ i₁cónꞌ₅, juɨ₁guë́ꞌ₄ co₂ŋeiꞌ₅₄ ja₁quióꞌ₄, ia₁jaun₂ tsá₃ ꞌë́₂ Diú₄ uɨg₅ juɨ₁liaꞌ₂ jë₁ŋɨgꞌ₂ ꞌniaꞌ₂.