2 Ca₂ꞌë́₂ Diú₄ jág₁ dse₃ në₅ ca₂tóꞌ₂ ne₄ Si₂ jŋió₅ quióꞌ₅ ma₂lɨ́gꞌ₂, ca₂cuë₃ të₂le₃ quianꞌ₅₄ dsa₂ i₂jme₁ꞌë́₂ jág₁ quiáin₅,

3 a₂ꞌɨin₂₃ ja₁ŋiꞌ₅₄, i₂jme₁lɨ́n₄ tsɨ₁jon₂ David liaꞌ₂ conꞌ₂ lɨ́n₅ dsa₂ mɨ₂güɨ́g₃;

4 liaꞌ₂ conꞌ₂ lë́₅ Jme₂dsí₂ Jŋió₅ në́₃ ca₂jme₃jnia₅ a₂lɨ́n₅ ꞌéi₂ Ja₁ŋiꞌ₅₄ Diú₄ jme₁ca₂jeinꞌ₅₄ táng₃ jɨn₄ ꞌlag₄, quianꞌ₅₄ juɨ₅bí₂ quióꞌ₅, a₂ꞌuainꞌ₂. Jesucristo Te₁guiꞌ₅₄ quián₂ jniog₄ bá₄ ꞌéi₂.

5 Të₂le₃ quianꞌ₅₄ Jesucristo, tonꞌ₂ o₄quióꞌ₄ ꞌéi₂ bá₄, ma₂jmo₃ Diú₄ dse₃ dsɨ́₅ ja₁con₂ jniaꞌ₅₄, jaun₂ ca₂chei₃ jɨn₄ dsɨ₂nau₂ ia₁jaun₂ le₃chan₂ dsa₂ ca₂le₂con₂ juɨg₂ i₂jme₂ti₃ jág₁ quióꞌ₅, ia₁ a₂ꞌéin₂.

6 Jɨn₄ dsa₂ ꞌéi₂ tiánꞌ₅ ꞌniaꞌ₂ i₂ma₂të́ꞌ₃ Diú₄ ján₃, a₂lénꞌ₂ ꞌniaꞌ₂ i₂quián₅ Jesucristo.

7 Jaun₂ tsɨ́ng₂ si₂ la₂ neꞌ₅₄ ca₂le₃jɨ́nꞌ₃ ꞌniaꞌ₂ i₂tiánꞌ₅ jë₄ juɨg₂ Roma, i₂lɨ́n₅ i₂ꞌnio₃ Diú₄, jaun₂ ma₂të₂₃ a₂le₃chanꞌ₂ ꞌniaꞌ₂ lɨ́ngꞌ₅ dsa₂ i₂lë́₅ ꞌí₁ i₂ma₂quiáin₅. Juɨ₁jme₂guꞌ₅₄ bá₄ Diú₄ juɨ₁le₂chanꞌ₂ bá₄ ꞌniaꞌ₂ dse₃, juɨ₁ꞌag₅₄ bá₄ tei₄ o₄quióꞌ₄ Diú₄ Jmei₂ jniog₄, o₄quióꞌ₄ Te₁guiꞌ₅₄ Jesucristo në́₃.

8 Jë₁le₂ꞌuɨg₅₄, të₂le₃ quianꞌ₅₄ Jesucristo cuë́₅ ti₁ꞌmagꞌ₄ Diú₄ quiáng₃ o₄quiánꞌ₂ ꞌniaꞌ₂ ca₂le₃jɨ́ngꞌ₃, ia₁ ca₂le₂con₂ bá₄ ꞌei₅ jág₁ dsia₅ dsa₂ ꞌa₂ liaꞌ₂ ꞌénꞌ₂ ꞌniaꞌ₂.

9 Jaun₂ Diú₄, i₂jme₂tí₁ jniá₂ ne₄ ca₂le₃jë́₃ jme₂dsí₂ quió₃, a₂qui₂ꞌë́₅ jág₁ dse₃ quióꞌ₅ Ja₁ŋiꞌ₅₄, ꞌéi₂ bá₄ i₂lɨ́n₅ i₂jángꞌ₅ jág₁ dsau₅ ꞌa₂ liaꞌ₂ dsauꞌ₂ dsɨ₃ ꞌniaꞌ₂ ca₂le₃jë́₃ jë₁chi₂lénꞌ₂ jniá₂ Diú₄.

10 Co₂tan₅₄ bá₄ mɨ₅ jniá₂ ne₄ Diú₄ juɨ₁le₅₄ bá₄ ꞌa₂ liaꞌ₂ ꞌŋio₂ dsɨ́₅, ꞌa₂ liaꞌ₂ lé₂ a₂cuɨn₃ jmɨg₄, ca₂liaꞌ₂ ca₂lë₃ a₂nei₅₄ i₁jɨng₁₂ ꞌniaꞌ₂.

11 Ia₁ ꞌɨ́n₅ dsɨ₃ i₁jɨng₁₂ ꞌniaꞌ₂, tonꞌ₂ ꞌnio₃ jme₁ꞌong₁₂ ꞌe₂ caun₂ ꞌnióꞌ₅ jme₁ꞌong₁₂ ꞌniaꞌ₂ të₂le₃ quióꞌ₅ jme₂dsí₂, ia₁jaun₂ le₃náuꞌ₁ guë́₄ ꞌniaꞌ₂ tiá₂;

12 co₂ꞌnióꞌ₄ le₃juaꞌ₅₄, ia₁jaun₂ lé₂ le₃cuë₅₄ liánꞌ₂ rɨnꞌ₅₄ le₂jau₂ le₂jau₂ quianꞌ₅₄ a₂ꞌéin₂ juɨ₁liaꞌ₂ ꞌénꞌ₂ ꞌniaꞌ₂ juɨ₁liaꞌ₂ ꞌén₂ jniá₂ ján₃.

13 Rɨnꞌ₅₄ jniog₄, ꞌnio₃ le₃ŋiꞌ₅₄ ꞌniaꞌ₂ ꞌlióng₂ ráun₂ bá₄ ma₂lë₅ dsɨ₃ a₂ꞌnio₃ nei₅₄ i₁jɨng₁₂ ꞌniaꞌ₂, la₁ ca₂liaꞌ₂ jŋiaꞌ₅₄ rë₂në́₃ tsá₃ ma₂lë₅, ia₁ ma₂rë₂jnɨ₅ juɨ₅. ꞌNio₃ nei₅₄ ia₁jaun₂ chi₁loꞌ₂ a₂ma₂rau₂ quióꞌ₅ Jme₂dsí₂ jë₄ quiánꞌ₂ ꞌniaꞌ₂, juɨ₁liaꞌ₂ ma₂cagꞌ₄ jniá₂ ján₃ juɨg₂ siáꞌ₂, go₄ dsɨ₂nau₂ siánꞌ₂ ján₃.

14 Ia₁ jniá₂ bá₄ niog₅ ne₃ ca₂tɨ́ng₂ quianꞌ₅₄ ca₂le₃jɨ́n₃, juɨ₁lɨ́n₄ dsa₂ ꞌe₂ lɨ́in₅, dsa₂ griego, o₃ dsɨ₂nau₂ ꞌe₂, dsa₂ i₂ŋɨ́ꞌ₂ dsɨ́₅, o₃ dsa₂ co₄ ꞌe₂;

15 jaun₂ le₂në₅ bá₄ ꞌɨ́n₅ dsɨ₃ a₂qui₂i₁ꞌë́₃ jág₁ dse₃ ja₁con₂ dsa₂ juɨg₂ goꞌ₄ ꞌniaꞌ₂ i₂chan₂ Roma ján₃.

16 Ia₁ tsá₃ ꞌe₂ o₂guíꞌ₃ jéin₅ jniá₂ quianꞌ₅₄ jág₁ dse₃, ia₁ juɨ₅bí₂ quióꞌ₅ Diú₄ bá₄ në₅ a₂lión₂ ca₂le₃jɨ́n₃ i₂ꞌén₂: quióꞌ₅ dsa₂ judíos deꞌ₂ le₂ꞌuɨg₅₄, ján₃ bá₄ le₂jaun₂ quióꞌ₅ dsɨ₂nau₂.

17 Ia₁ jág₁ dse₃ la₂ jángꞌ₅ jág₁ dsau₅ ꞌa₂ liaꞌ₂ cheiꞌ₂ Diú₄ juɨ₅ co₂rë₂, juɨ₅ ja₁ma₂dsan₃ dsáu₁ dsa₂, juɨ₅ a₂jme₂lióg₃ a₂ꞌén₂ dsa₂, tonꞌ₂ a₂ꞌén₂ dsa₂ ca₂liaꞌ₂ jë₁ca₂tóꞌ₂. Le₂në₅ juáꞌ₂ ne₄ Si₂: “Dsa₂ i₂ŋɨ₅ juɨ₅ co₂rë₂ ia₁ a₂ꞌéin₂, ꞌéi₂ bá₄ le₃chan₂.”^a

18 A₂juáꞌ₅ jniá₂ le₂në₅, ia₁ a₂ne₄ bá₄ jniog₄ jaun₂, caun₂ jme₂jnia₅ Diú₄ a₂ꞌnei₂ të₂ ja₁guá₄ gueiꞌ₅₄ i₂juɨ́G₃ ja₁con₂ dsa₂ i₂tsá₃ Diú₄ cuɨn₅, ja₁con₂ dsa₂ i₂tsá₃ tionꞌ₅₄ juɨ₅ co₂dsau₅, dsa₂ i₂jnéi₅ juɨ₅ quióꞌ₅ jág₁ dsau₅ të₂le₃ quianꞌ₅₄ juɨ₅ ꞌlɨgꞌ₅₄ ja₁i₂nioi₅₄.

19 Ia₁ rë₂jniá₂ rë₂ bá₄ ca₂le₃jë́₃ a₂ŋi₅ dsa₂ ꞌa₂ liaꞌ₂ lɨ́n₅ Diú₄, ia₁ a₂ma₂ca₂jme₃jniai₂₃ të₂le₃ quianꞌ₅₄ a₂ma₂jmo₃,

20 ia₁ ca₂le₃jë́₃ a₂tsá₃ rë₂jniá₂ quióꞌ₅ Diú₄, lé₂ le₃cuɨ́ꞌ₅ dsa₂ të₂le₃ quianꞌ₅₄ ca₂le₃jë́₃ a₂ma₂jmo₃; ma₂ca₂rë₃jniá₂ dse₃ lɨn₃ bá₄, ca₂le₃ ca₂jmo₃ Diú₄ mɨ₂güɨ́g₃ a₂lɨ́in₅ dsónꞌ₂ Diú₄, tonꞌ₂ a₂ꞌio₂₃ juɨ₅bí₂ co₂tan₅₄ bá₄; jaun₂ le₂në₅ bá₄ tsá₃ ma₃ꞌe₂ lé₂ le₃juáꞌ₂ dsa₂ juaꞌ₅₄ a₂tsá₃ ŋi₅.

21 Ia₁ o₁jŋiaꞌ₅₄ ŋi₅ le₂në₅ a₂chan₂ Diú₄, la₁ tsá₃ ma₂ca₂jme₃juagꞌ₂ liaꞌ₂ conꞌ₂ lë́₅ ca₂tɨ́n₂ Diú₄ le₃juɨinꞌ₂, on₃ guëꞌ₂ ma₂cuë́ꞌ₃ Diú₄ ti₁ꞌmagꞌ₄. Jë₂ bá₄ ma₂ja₂léin₂ qui₂ꞌnoꞌ₂ dsɨ́₅ a₂tsá₃ ta₁ tí₄; tsá₃ të₂tsɨꞌ₅₄ dsɨ́₅, jaun₂ ma₂të₁ꞌŋiái₄ jë₄ qui₁néꞌ₃.

22 Juɨ₁ꞌa₂ guë́₃ la₂ juáꞌ₂ a₂lɨ́in₅ dsa₂ i₂cuɨ́ꞌ₅, a₂tɨin₂ a₂ŋi₅, la₁ dsa₂ co₄ bá₄ ca₂lɨin₃ jë₁ca₂tóꞌ₂.

23 Jaun₂ në́₃, ꞌnióꞌ₄ a₂jme₁jme₃juɨinꞌ₂ Diú₄ i₂tsá₃ ton₄ jmɨg₄ jón₂, ma₂ca₂jme₃tsɨ́in₃ bá₄ a₂co₂tág₅ co₂ꞌnéꞌ₅ quióꞌ₄ Diú₄ quianꞌ₅₄ nióꞌ₄ quióꞌ₅ dsa₂ mɨ₂güɨ́g₃ i₂dsan₂, juɨ₁liaꞌ₂ nióꞌ₄ quióꞌ₅ jáꞌ₂ i₂ꞌɨn₅, jáꞌ₂ i₂tsë́ꞌ₅ quióꞌ₅, jáꞌ₂ i₂lë́₂ quén₂ mɨ₂tag₄ në́₃.

24 ꞌUɨg₅₄ në₅ në́₃ co₂dsia₅ ma₂jángꞌ₄ Diú₄ juɨ₅ ꞌlɨgꞌ₅₄ a₂ꞌɨ́n₅ dsɨ́₅ a₂tsá₃ le₁jë́₃, ia₁jaun₂ caun₂ i₃nioi₅₄ jmo₂₃-dsáu₅ cosa a₂o₂guíꞌ₃ a₂jmáiꞌ₅ nɨ₁ŋɨ₁₂ quiainꞌ₅₄ rɨinꞌ₅₄ le₂jain₂ le₂jain₂,

25 ia₁ ca₂jme₃tsɨ́in₃^b jág₁ dsau₅ quióꞌ₅ Diú₄ quianꞌ₅₄ jág₁ të₂jág₁; jaun₂ ma₂ja₂léin₂ jme₂góꞌ₃ jme₂juɨinꞌ₂ cosas a₂ca₂jmo₃ Diú₄, ꞌnióꞌ₄ a₂jme₁jme₃juɨinꞌ₂ Diú₄ ꞌŋiog₅, i₂ca₂tɨ́n₂ dsónꞌ₂ a₂jme₃juagꞌ₂ dsa₂ co₂tan₅₄. ¡Le₂në₅ dsónꞌ₂ bá₄! A₂méi₃*.

26 ꞌUɨg₅₄ në₅ co₂dsia₅ ma₂jángꞌ₂ juɨ₅ ja₁cuë́ꞌ₅ o₂ꞌŋió₃ o₂jŋia₃ dsɨ́₅ a₂lë́₅ o₂guíꞌ₃, ia₁ ca₂le₂jiog₅ dsa₂ mɨ́₂ quiáin₅ bá₄ ca₂jme₃tsɨ́in₃ ꞌa₂ liaꞌ₂ i₂nioi₅₄, a₂tsá₃ ma₃i₂nioi₅₄ liaꞌ₂ conꞌ₂ dsi₂ten₅₄ ꞌi₄ ꞌéiꞌ₃ i₃nio₄ liaꞌ₂ dsa₂ mɨ́₂ dsa₂ ŋeꞌ₂.

27 Ján₃ bá₄ guëꞌ₂ le₂jaun₂ dsa₂ ŋeꞌ₂ ma₂ca₂tí₂ bá₄ ꞌa₂ liaꞌ₂ ꞌi₄ ꞌéiꞌ₃ le₃chain₂ tiainꞌ₃ quiainꞌ₅₄ dsa₂ mɨ́₂; ma₂ja₂léin₂ chógꞌ₅ dséi₂ quiainꞌ₅₄ dsa₂ ŋeꞌ₂ rɨinꞌ₅₄, jmo₂₃-dsáu₅ a₂o₂guíꞌ₃ le₂jain₂ le₂jain₂, jaun₂ gue₂₃ uɨg₅ guioin₅₄ a₂ca₂tɨ́in₂ o₄quióꞌ₄ juɨ₅ ja₁ca₂quiá₂ cau₅.

28 Jaun₂, ꞌuɨg₅₄ ia₁ a₂lɨ́in₂ a₂tsá₃ ꞌe₂ quen₅ Diú₄, tsá₃ toinꞌ₂ juɨ₅ ꞌéi₂, jaun₂ co₂dsia₅ ma₂jángꞌ₂ Diú₄ juɨ₅ ja₁dsɨ₂qui₂dsɨ₃jiog₅ dsɨ́₅ a₂ꞌlɨgꞌ₅₄, a₂dsɨ₂qui₂dsɨ₃cóinꞌ₅ a₂ꞌliainꞌ₂, a₂jmo₃ a₂tsá₃ dsi₂ten₅₄.

29 Ca₂liaꞌ₂ qui₂rë₂rɨn₅ ca₂le₃jë́₃ ne₅₄ cosa ꞌlɨgꞌ₅₄ jme₂dsí₂ quióꞌ₅, qui₂ꞌno₂₃ dso₄, jmáꞌ₃ guioin₅₄ bá₄ ꞌnio₃ jme₁ꞌŋióiꞌ₃, a₂qui₂ꞌnoꞌ₂ dsɨ́₅ ꞌa₂ liaꞌ₂ ꞌë́ꞌ₃ uɨg₅ rɨinꞌ₅₄. Rë₂canꞌ₂ dsɨ́₅ a₂uɨg₅ dsɨ́₅ jɨ́in₂ rɨinꞌ₅₄, a₂jme₂dsiain₂₃ rɨinꞌ₅₄, a₂lë₁qui₂dsia₂₃ mɨꞌ₅₄, a₂qui₂jme₂gain₂₃ rɨinꞌ₅₄, tsá₃ dsau₅ jág₁ quian₅, ꞌŋio₅ ꞌŋio₄ dsa₂, a₂co₂jmo₅ dsa₂ jág₁ të₂jág₁ jë₄ të₃coꞌ₅₄.

30 Ján₃ bá₄ le₂jaun₂ a₂lë₁chi₂ꞌag₅ dsa₂, ꞌŋiai₅₄ bá₄ Diú₄, a₂lë₁co₂jmáiꞌ₂ rɨinꞌ₅₄, a₂jme₂rón₂ guioin₅₄, dsia₂₃ jág₁ táꞌ₅, a₂qui₂ꞌnoꞌ₂ dsɨ́₅ ꞌa₂ liaꞌ₂ jmo₃ a₂ꞌlɨgꞌ₅₄, on₃ guëꞌ₂ jmáꞌ₃ jme₂gain₃ chog₅₄-jmei₂;

31 tsá₃ të₂tsɨꞌ₅₄ dsɨ́₅ në́₃, on₃ guëꞌ₂ juaꞌ₅₄ jme₃ti₃ ꞌe₂ caun₂ jág₁ cuë₂₃ a₂jmo₃; tsá₃ ꞌein₂ ꞌɨin₂₃ ꞌi₁jan₂, tsá₃ tɨn₂ dsɨ́₅ ꞌéin₂ dso₄ quióꞌ₅ rɨinꞌ₅₄, on₃ guëꞌ₂ ŋéi₂ dsɨ́₅.

32 I₂ŋi₅ rë₂ bá₄ dsa₂ ꞌéi₂ ꞌa₂ liaꞌ₂ lë́₅ ꞌéiꞌ₃ ma₂quíꞌ₃ Diú₄, ia₁ ca₂le₃jɨ́n₃ i₂jmo₅ le₂në₅ ca₂tɨ́in₂ dsiáin₃ bá₄; la₁ juɨ₁ꞌe₂ guë́₃ ŋi₅ a₂jaun₂, on₃juaꞌ₅₄ jmáꞌ₃ guioin₅₄ caun₂ qui₂jmo₂₃, të₂le₃ të₅ dsɨ́₅ bá₄ a₂jmo₅ i₂siánꞌ₂ ján₃.