Si₂ carta le₂ꞌuɨg₅₄ a₂ca₂jmo₃ San Pablo ne₄ dsa₂
CORINTIOS
Jmo₅ Pa₄ si₂ le₂ꞌuɨg₅₄ a₂chein₂ ne₄ Guáꞌ₅ i₂chan₂ juɨg₂ Corinto
1
Jniá₂ Pa₄, co₂në₅ ca₂rë₃ꞌŋió₃ dsɨ́₅ Diú₄, ca₂të₃ ꞌéi₂ a₂léng₂ dsa₂ i₂chen₄ quián₅ Te₁guiꞌ₅₄ Jesucristo; jniaꞌ₅₄ co₂dsia₅ quianꞌ₅₄ Sóstenes rɨnꞌ₅₄ jniog₄,
2 jmo₂₃ si₂ carta la₂ a₂dsianꞌ₄ ja₁con₂ guáꞌ₅ quián₅ Diú₄, dsa₂ chan₂ juɨg₂ Corinto, dsa₂ i₂ma₂të₅ Diú₄ a₂léin₂ dsa₂ i₂le₃chan₂ lë́₅ ꞌí₁ le₃quióꞌ₅ Cristo Jesús; co₂dsia₅ bá₄ quianꞌ₅₄ ca₂le₃jɨ́n₃ i₂jme₂juɨnꞌ₂ Te₁guiꞌ₅₄ Jesucristo ca₂le₂con₂ mɨ₂güɨ́g₃, a₂lɨ́n₅ ꞌéi₂ Te₁guiꞌ₅₄ quiáin₅, juɨ₁liaꞌ₂ quián₂ jniog₄ táng₃:
3 Juɨ₁chanꞌ₂ bá₄ ꞌniaꞌ₂ ꞌei₅ tei₄, juɨ₁jme₂guꞌ₅₄ bá₄ Diú₄ i₂lɨ́n₅ jmei₂ jniog₄, juɨ₁jme₂guꞌ₅₄ Te₁guiꞌ₅₄ Jesucristo ján₃.
Jme₂guꞌ₅₄ Diú₄ të₂le₃ quianꞌ₅₄ Cristo
4 Ca₂le₃o₃ jmɨg₄ bá₄ cuë́₅ jniá₂ ti₁ꞌmagꞌ₄ Diú₄ o₄quiánꞌ₂ ꞌniaꞌ₂, ia₁ ca₂jme₃guꞌ₅₄ bá₄ Diú₄ të₂le₃ quianꞌ₅₄ Cristo Jesús.
5 Të₂le₃ ia₁ a₂chanꞌ₂ ꞌniaꞌ₂ le₃quióꞌ₅ Cristo, Diú₄ bá₄ ma₂ca₂jme₃ꞌo₅₄ ꞌniaꞌ₂ ca₂le₃jë́₃ ne₅₄ a₂dse₃ quióꞌ₅, juɨ₁liaꞌ₂ jág₁ a₂ꞌŋiaꞌ₂ ꞌniaꞌ₂, juɨ₁liaꞌ₂ ca₂le₃jë́₃ a₂tɨnꞌ₂ ꞌniaꞌ₂ në́₃.
6 Le₂në₅ bá₄ ca₂le₃jë́₃ ꞌe₂ niog₅ ca₂jme₁tag₅ jniaꞌ₅₄ të₂le₃ quióꞌ₅ Cristo, ma₂ca₂rë₃ti₃ bá₄ të₂le₃ quianꞌ₅₄ ꞌniaꞌ₂.
7 Jaun₂ lë₃, tsá₃ ma₃ꞌe₂ ꞌnióꞌ₅ quiánꞌ₂ ꞌniaꞌ₂ juaꞌ₅₄ a₂cuë₃ Diú₄ caun₂ bí₂ a₂gu₂dsí₂, të₁liaꞌ₂ janꞌ₅₄ ꞌniaꞌ₂ a₂ꞌɨ́n₂ ꞌauꞌ₂ a₂jme₃jnia₅ Te₁guiꞌ₅₄ Jesucristo quián₂ jniog₄.
8 ꞌÉi₂ bá₄ jme₃ꞌo₅₄ náuꞌ₁ ꞌniaꞌ₂ tiá₂ ca₂të₂ jmɨg₄ jë₁ca₂tóꞌ₂, ia₁jaun₂ tsá₃ ꞌe₂ dso₄ rɨnꞌ₂ ꞌniaꞌ₂ jë₁ma₂ca₂të́₂ jmɨg₄ quióꞌ₅ Te₁guiꞌ₅₄ Jesucristo.
9 I₂jme₃ti₃ bá₄ Diú₄ ca₂le₃jë́₃ jág₁ quióꞌ₅; ꞌéi₂ bá₄ ma₂ca₂të₃ ꞌniaꞌ₂ ꞌag₃ caun₂ jág₁ quianꞌ₅₄ Jesucristo ja₁ŋiꞌ₅₄, Te₁guiꞌ₅₄ quián₂.
A₂tsɨ₂jɨn₅ dsa₂ dsia₂₃ mɨꞌ₅₄ jmo₂₃ le₁dsoinꞌ₅₄
10 Rɨnꞌ₅₄ jniog₄, mɨ₅ jniá₂ ja₁conꞌ₂ ꞌniaꞌ₂ quianꞌ₅₄ ꞌéiꞌ₃ quióꞌ₅ Jesucristo Te₁guiꞌ₅₄ quián₂, ꞌéi₂ ꞌniaꞌ₂ caun₂ jág₁, tsá₃ dsia₂ ꞌniaꞌ₂ mɨꞌ₅₄ a₂jmóꞌ₂ le₁dsongꞌ₅₄. Të₂le₃ ca₂tɨ́nꞌ₂ bá₄ ꞌniaꞌ₂ tóngꞌ₄ ꞌei₅ caun₂ jág₁ jenꞌ₂ ꞌniaꞌ₂, juɨ₁liaꞌ₂ ꞌa₂ liaꞌ₂ ŋɨ́ꞌ₂ ꞌniaꞌ₂, a₂dsɨ₂jiog₅ ꞌauꞌ₂ në́₃.
11 Juɨ́g₂ jniá₂ ꞌniaꞌ₂ le₂në₅, rɨnꞌ₅₄ jniog₄, ia₁ ca₂rë₃chá₃ jág₁ juáꞌ₂ dsa₂ familia quián₅ Cloé, ꞌa₂ liaꞌ₂ lë́₅ tionꞌ₅₄ ꞌniaꞌ₂, a₂niog₅ mɨꞌ₅₄ jɨnꞌ₄ ꞌniaꞌ₂.
12 Co₂ꞌnióꞌ₄ le₃juaꞌ₅₄ jág₁, jma₃quén₅ bá₄ ma₂lë́₅ jagꞌ₅₄ ꞌniaꞌ₂ tiongꞌ₅₄. I₂lɨn₅₄ ma₂juáꞌ₂: “I₂quián₅ Pa₄ bá₄ jniá₂”; i₂lɨn₅₄ guëꞌ₂ juáꞌ₂ táng₃: “Jniá₂ guëꞌ₂ lɨ́ng₅ i₂quián₅ Pe₄”; siánꞌ₂ guëꞌ₂ juáꞌ₂ táng₃: “Jniá₂ guëꞌ₂ lɨ́ng₅ dsa₂ i₂quián₅ Apolos”; i₂lɨn₅₄ guëꞌ₂ juáꞌ₂ táng₃: “Jniá₂ guëꞌ₂ lɨ́ng₅ i₂quián₅ Cristo.”
13 ¿O₃ bá₄ le₁dsoꞌ₄ ma₂i₂lé₂ quióꞌ₅ Cristo në₁juaꞌ₂ le₂jaun₂? ¿O₃ bá₄ Pa₄ i₂ca₂të₁ton₅₄ cróg₄ o₄quiánꞌ₂ ꞌniaꞌ₂? Le₂jaun₂ guëꞌ₂ ján₃, ¿O₃ bá₄ liaꞌ₂ conꞌ₂ lë́₅ ꞌéiꞌ₃ quióꞌ₅ Pa₄ ca₂jŋóꞌ₂ ꞌniaꞌ₂ jmɨg₂?a
14 Ti₁ꞌmagꞌ₄ Diú₄ tsá₃ jniá₂ ca₂chóng₃ jmɨg₂b ꞌi₁janꞌ₂ ꞌniaꞌ₂, jŋiaꞌ₅₄ liaꞌ₂ Crispo quianꞌ₅₄ Gayo,
15 conꞌ₂ tsá₃ lë́₅ juaꞌ₅₄ a₂dsia₃ dsa₂ a₂ca₂chóin₃ jniá₂ jmɨg₂c liaꞌ₂ conꞌ₂ lë́₅ ꞌéiꞌ₃ quió₃.
16 (Jŋiaꞌ₅₄ liaꞌ₂ familia quián₅ Estéfanas bá₄ ján₃, dsá₂ dsɨ₃ ca₂chón₃ jniá₂ jmɨg₂.d\f*
17 Ia₁ tsá₃ ta₁ jaun₂ ca₂chei₃ Cristo jniá₂ juaꞌ₅₄ a₂tsón₄ jniá₂ jmɨg₂ dsa₂,d conꞌ₂ jŋiaꞌ₅₄ liaꞌ₂ a₂qui₁ꞌë́₄ jág₁ a₂tɨ́nꞌ₄ dsa₂ bá₄, on₃juaꞌ₅₄ qui₁ton₁ jág₁ juaꞌ₅₄ a₂jmo₅₄ a₂ŋɨ́₄ tɨng₂, conꞌ₂ tsá₃ lë́₅ juaꞌ₅₄ a₂tsá₃ ta₁ tí₄ a₂ca₂guen₃ Cristo ꞌmú₃ ne₄ cróg₄.
Cristo i₂lɨ́n₅ bí₂ quióꞌ₅ Diú₄
18 Jág₁ dse₃ la₂, ꞌa₂ liaꞌ₂ ca₂jon₃ Cristo ne₄ cróg₄, lë́₅ jág₁ co₄ të₂le₃ ja₁con₂ dsa₂ i₂tionꞌ₅₄ juɨ₅ dsɨ₃ꞌén₂. La₁ të₂le₃ quián₂ jniog₄ i₂tioꞌ₅₄ juɨ₅ a₂tágꞌ₄, lë́₅ juɨ₅bí₂ quióꞌ₅ Diú₄.
19 Ia₁ juɨ₁liaꞌ₂ juáꞌ₂ ne₄ Si₂:
Co₂dsia₅ ꞌén₄ jniá₂ juɨ₁liaꞌ₂ a₂tɨn₂ dsa₂
i₂ŋɨ́₄ lë₃ ŋi₅ jmo₅,
ján₃ guëꞌ₂ jmo₅₄ cau₅ jág₁ a₂ŋɨ́ꞌ₂ dsɨ́₅
dsa₂ i₂jmo₅ a₂ŋɨ́₄ lë₃ ꞌŋioi₅₄.e
20 ¿ꞌE₂ bá₄ ta₁ tén₄ juɨ₁liaꞌ₂ dsa₂ i₂ŋɨ́₄ tɨn₂ në́₃, juɨ₁liaꞌ₂ të₅, o₃ juɨ₁liaꞌ₂ dsa₂ i₂ŋɨ́₄ ŋi₅ dsia₃ ca₂le₃jë́₃ ꞌa₂ liaꞌ₂ niog₅ lë́₅ mɨ₂güɨ́g₃ la₂? Ia₁ ca₂le₃jë́₃ ꞌe₂ niog₅ ŋɨ́ꞌ₂ dsa₂ mɨ₂güɨ́g₃ la₂, ꞌŋiog₅ bá₄ Diú₄ ma₂jmo₃ jág₁ jaun₂ a₂tsá₃ ta₁ tí₄.
21 Ia₁ juɨ₁liaꞌ₂ ca₂ꞌnáuꞌ₃ dsɨ́₅ Diú₄ jmo₃, tsá₃ ca₂rë₃cuɨg₅ dsa₂ mɨ₂güɨ́g₃ të₂le₃ quianꞌ₅₄ jág₁ a₂ŋɨ́ꞌ₂ dsɨ́₅ guioin₅₄, a₂jaun₂ bá₄ ca₂rë₃ꞌŋió₃ dsɨ́₅ Diú₄ a₂lióin₂ dsa₂ i₂ꞌén₂ jág₁ quióꞌ₅, të₂le₃ quianꞌ₅₄ jág₁ a₂ca₂ꞌë́₂ dsa₂, caun₂ jág₁ a₂jmo₅ dsa₂ mɨ₂güɨ́g₃ dsɨ́₅ caun₂ jág₁ co₄.
22 Juɨ₁liaꞌ₂ dsa₂ judíos* në́₃, ꞌnio₃ të₃ ne₅₄ léi₄ juëꞌ₂, dsa₂ griego në́₃ ꞌnoꞌ₂ jág₁ a₂le₃ŋɨ́₂ dsɨ́₅,
23 la₁ia₁ jniaꞌ₅₄ në́₃, qui₂ꞌë́₅ jág₁ ꞌɨ́n₅ jniaꞌ₅₄ Cristo i₂ca₂jon₃ të₁ton₅₄ cróg₄. Jág₁ në₅ në́₃, lë́₅ caun₂ a₂jnág₅ juɨ₅ ja₁jme₁rë₂ꞌén₂ dsa₂ judíos, ján₃ bá₄ lë́₅ caun₂ jág₁ co₄ të₂le₃ quióꞌ₅ dsɨ₂nau₂.
24 La₁ të₂le₃ quióꞌ₅ dsa₂ i₂ma₂të₅ Diú₄, liaꞌ₂ dsa₂ judíos liaꞌ₂ dsa₂ griegos táng₃, ꞌɨ́n₅ jniaꞌ₅₄ Cristo i₂lɨ́n₅ juɨ₅bí₂ quióꞌ₅ Diú₄, i₂lɨ́n₅ jág₁ a₂ŋɨ́ꞌ₂ dsɨ́₅ Diú₄ në́₃.
25 Ia₁ co₂ꞌnióꞌ₄ jág₁ co₄ quióꞌ₅ Diú₄, juáꞌ₂ dsa₂ mɨ₂güɨ́g₃, jág₁ në₅ bá₄ a₂lë́₅ a₂dsen₅₄ quen₅ guë́₄ liaꞌ₂ conꞌ₂ guë́₄ jág₁ a₂ŋɨ́ꞌ₂ dsɨ́₅ dsa₂ mɨ₂güɨ́g₃. Ján₃ bá₄ juɨ₁liaꞌ₂ a₂jmo₅ dsa₂ dsɨ́₅ a₂ꞌuan₅₄ quióꞌ₅ Diú₄, a₂jaun₂ guë́₄ dsónꞌ₂ a₂ꞌio₅ guë́₄ bí₂ liaꞌ₂ conꞌ₂ guë́₄ bí₂ quióꞌ₅ dsa₂ mɨ₂güɨ́g₃.26 Rɨnꞌ₅₄ jniog₄, ca₂tɨ́nꞌ₂ bá₄ ꞌniaꞌ₂ ꞌnauꞌ₅₄ ꞌauꞌ₂ ꞌa₂ liaꞌ₂ ca₂të₃ Diú₄ ꞌniaꞌ₂. Tsá₃ juɨnꞌ₅ ꞌniaꞌ₂ i₂tɨn₂ ŋi₅ liaꞌ₂ conꞌ₂ lë́₅ ŋi₅ dsa₂ mɨ₂güɨ́g₃; ján₃ guë́₄ tsá₃ juɨnꞌ₅ ꞌniaꞌ₂ ꞌauꞌ₂ bí₂; tsá₃ juɨnꞌ₅ ꞌniaꞌ₂ ca₂rë₃chánꞌ₃ juɨ₁liaꞌ₂ familia dsen₅₄ në́₃. 27 La₁ia₁ ma₂quióꞌ₂ Diú₄ jág₁ a₂jmo₅ dsa₂ mɨ₂güɨ́g₃ dsɨ́₅ jág₁ co₄, a₂jmo₃ a₂të₃tsɨnꞌ₅₄ o₂guíꞌ₃ dsa₂ i₂lɨ́n₂ ŋɨ́ꞌ₂ guë́₄ dsɨ́₅. Ján₃ bá₄ ma₂quióꞌ₂ Diú₄ jág₁ a₂jmo₅ dsa₂ mɨ₂güɨ́g₃ dsɨ́₅ jág₁ ꞌuan₅₄, a₂jmo₃ a₂të₃tsɨnꞌ₅₄ o₂guíꞌ₃ juɨ₁liaꞌ₂ dsa₂ i₂lɨ́n₂ a₂ꞌuainꞌ₂. 28 Ma₂quiónꞌ₂ Diú₄ juɨ₁liaꞌ₂ dsa₂ i₂jɨ́n₂ dsa₂ mɨ₂güɨ́g₃ i₂tsá₃ ꞌe₂ quen₅, i₂sion₅ guë́₄, i₂tsá₃ ꞌe₂ lɨ́n₅, a₂tón₂ ꞌuë₃ juɨ₁liaꞌ₂ i₂ŋɨ́₄ lë₃ dsen₅₄ lɨ́in₂, 29 ia₁jaun₂ tsá₃ ꞌein₂ lé₂ dsia₃ jág₁ táꞌ₅ le₃ne₄ Diú₄. 30 ꞌŊiog₅ bá₄ Diú₄ ma₂jmo₃ a₂tionꞌ₅₄ ꞌniaꞌ₂ le₃quióꞌ₅ Cristo Jesús, i₂ma₂lɨ́n₅ i₂ŋɨ́ꞌ₂ dsɨ́₅ quián₅ Diú₄ o₄quián₂ jniog₄. Co₂ꞌnióꞌ₄ le₃juaꞌ₅₄, të₂le₃ quianꞌ₅₄ Cristo bá₄ ma₂guei₃ Diú₄ jniog₄ në₂jag₄ bá₄ a₂tsá₃ ꞌe₂ dso₄ rag₂; të₂le₃ quianꞌ₅₄ Cristo bá₄ jág₂ Diú₄ jniog₄ dsa₂ le₁jɨ́n₃ i₂lë́₅ ꞌí₁ quiáin₅; të₂le₃ quianꞌ₅₄ Cristo bá₄ ján₃, ca₂ꞌág₂ táng₃ caun₂ jág₁ quián₂ jniog₄ quianꞌ₅₄ Diú₄. 31 Jaun₂ lë₃, juɨ₁liaꞌ₂ juáꞌ₂ ne₄ Si₂, “Juɨ₁liaꞌ₂ dsa₂ i₂dsia₅ jág₁ táꞌ₅, juɨ₁dsia₁₂ jág₁ táꞌ₅ le₃quióꞌ₅ Te₁guiꞌ₅₄.”f