Cuɨin₂₃ Diú₄ le₂jan₂ le₂jan₂
16
Jme₂jnia₄ jniá₂ ꞌio₅₄ rɨnꞌ₅₄ jniog₄ Febe, i₂ma₂já₅ jme₂ti₃ ja₁con₂ guáꞌ₅ chan₂ Cencrea.
2 Guein₅₄ bá₄ dse₃ o₄quióꞌ₄ Te₁guiꞌ₅₄, jmo₄ bá₄ conꞌ₂ dsi₂ten₅₄ jmo₃ dsa₂ ja₁con₂ rɨinꞌ₅₄ i₂ꞌén₂,a ján₃ guëꞌ₂ jme₁ꞌoin₁₂ quianꞌ₅₄ juɨ₁ꞌe₂ guë́₃ a₂ca₂rë₃ꞌnióꞌ₃ quióꞌ₅, ia₁ ma₂ca₂jme₃ꞌo₅₄ bá₄ ꞌéi₂ ꞌŋiog₅ ma₂ca₂jme₃ꞌoin₅₄ juɨn₅, ján₃ guëꞌ₂ le₂jaun₂ ma₂ca₂jme₃ꞌo₅₄ jniá₂.
3 Cuɨn₅₄ Diú₄ Priscilab quianꞌ₅₄ Aquila, i₂lɨ́n₅ i₂quianꞌ₅₄ jniá₂ jë₄ ta₁ a₂niog₅ quióꞌ₅ Cristo Jesús.
4 ꞌÉi₂ bá₄ ca₂jmo₃ ténꞌ₂ dsɨ́₅ o₄quió₃ jniá₂, o₁jŋiaꞌ₅₄ ca₂quíꞌ₃ dsa₂ dsɨ₂lag₅₄. Jaun₂ cuë́₅ jniá₂ ti₁ꞌmagꞌ₄ ꞌéi₂. On₃ juaꞌ₅₄ jmáꞌ₃ jniá₂; ca₂le₃jɨ́n₃ dsɨ₂nau₂ i₂ꞌén₂ cuë₂₃ ti₁ꞌmagꞌ₄ ján₃.
5 Në₅ i₂cuɨ́ngꞌ₅ Diú₄ ján₃ dsa₂ rɨnꞌ₅₄ jniog₄ i₂ŋɨꞌ₂ dsi₂néi₂ quióꞌ₅ Priscila quianꞌ₅₄ Aquila në́₃. Cuɨn₅₄ Diú₄ Epeneto a₂mei₅₄ quiáng₃, dsa₂ i₂le₂ꞌuɨg₅₄ i₂ca₂rë₃ꞌén₂ le₃quióꞌ₅ Cristo ꞌuë₃ Acaya.c
6 Cuɨn₅₄ co₂nio₄ Diú₄ María, ia₁ ꞌŋio₅ lɨn₃ ma₂jmo₃ ta₁ o₄quiánꞌ₂ ꞌniaꞌ₂.
7 Cuɨn₅₄ co₂nio₄ Diú₄ Andrónico quianꞌ₅₄ Junias, dsa₂ go₃ jniá₂ i₂quiangꞌ₅₄ ca₂ꞌú₃ néꞌ₃ ꞌmá₃; co₂ꞌnióꞌ₄ dsa₂ i₂lén₄ i₂cuɨg₅ guë́₄ dsa₂ i₂chen₄ quián₅ Te₁guiꞌ₅₄, co₂ꞌnióꞌ₄ dsa₂ i₂jme₁ma₂tionꞌ₅₄ le₃quióꞌ₅ Cristo le₂jŋiá₅ guë́₄ conꞌ₂ guë́₄ jniá₂.
8 Cuɨn₅₄ Diú₄ Amplias, jan₂ i₂ꞌnió₃ jniá₂ le₃quióꞌ₅ Te₁guiꞌ₅₄.
9 Cuɨn₅₄ co₂nio₄ Diú₄ ján₃ Urbano, dsa₂ i₂quianꞌ₅₄ jniog₄ jmo₂ ta₁ quióꞌ₅ Cristo Jesús, quianꞌ₅₄ Estaquis në́₃ i₂lɨ́n₅ a₂mei₅₄ quiáng₃ i₂ꞌnióg₃ guë́₄ lɨn₃.
10 Cuɨn₅₄ Diú₄ Apeles, i₂ma₂já₅ cuë₂₃ léi₄ a₂ŋɨ₂₃ le₃quióꞌ₅ Cristo, le₂jaun₂ bá₄ jmo₄ co₂nio₄ quianꞌ₅₄ ca₂le₃jɨ́n₃ i₂chan₂ dsi₂néi₂ quióꞌ₅ Aristóbulo ján₃.
11 Cuɨn₅₄ Diú₄ Herodión, dsa₂ go₃ jniá₂, quianꞌ₅₄ guëꞌ₂ dsa₂ familia quián₅ Narciso i₂ꞌén₂ le₃quióꞌ₅ Te₁guiꞌ₅₄.
12 Cuɨn₅₄ bá₄ co₂nio₄ Diú₄ Trifena quianꞌ₅₄ Trifosa në́₃, on₃ dsa₂ mɨ́₂ i₂jmo₅ ta₁ quióꞌ₅ Te₁guiꞌ₅₄, quianꞌ₅₄ guëꞌ₂ ꞌio₅₄ rɨnꞌ₅₄ jniog₄ Pérsida i₂ꞌnió₄ guë́₄ lɨn₃, i₂ŋɨ́₄ ma₂jmo₃ ta₁ quióꞌ₅ Te₁guiꞌ₅₄ ján₃.
13 Cuɨn₅₄ bá₄ Diú₄ Rufo i₂lɨ́n₅ dsa₂ i₂ma₂quionꞌ₅₄ quián₅ Te₁guiꞌ₅₄, quianꞌ₅₄ chog₅₄, i₂jɨng₅₄ në₂jag₄ bá₄ cha₃ ján₃.
14 Cuɨn₅₄ Diú₄ Asíncrito, Flegonte, quianꞌ₅₄ guëꞌ₂ Hermas, Patrobas, Hermes në́₃, quianꞌ₅₄ guëꞌ₂ dsa₂ rɨnꞌ₅₄ jniog₄ i₂quiainꞌ₅₄ në́₃.
15 Cuɨn₅₄ ꞌniaꞌ₂ Diú₄ ján₃ i₂chen₂ Filólogo quianꞌ₅₄ Julia, Nereo në́₃, quianꞌ₅₄ ꞌio₅₄ rɨinꞌ₅₄; cuɨn₅₄ ꞌniaꞌ₂ Diú₄ Olimpas quianꞌ₅₄ guëꞌ₂ ca₂le₃jɨ́n₃ rɨnꞌ₅₄ jniog₄ i₂ꞌén₂d i₂tionꞌ₅₄ quiainꞌ₅₄.
16 Cuɨn₅₄ ꞌniaꞌ₂ Diú₄ rɨ́ngꞌ₂ le₂jangꞌ₂ le₂jangꞌ₂ a₂qui₁chénꞌ₁e ꞌniaꞌ₂ quióꞌ₅ rɨ́ngꞌ₂, a₂lë́₅ léi₄ a₂ma₂ꞌei₅ caun₂ jág₁ a₂le₁jë́₃ ꞌauꞌ₂ quianꞌ₅₄ rɨ́ngꞌ₂. Ca₂le₃jɨ́n₃ bá₄ guáꞌ₅ quián₅ Cristo dsiáinꞌ₂ jág₁ a₂cuɨin₂₃ Diú₄ ꞌniaꞌ₂.
17 Rɨnꞌ₅₄ jniog₄, mɨ₅ jniá₂ neꞌ₅₄ ꞌniaꞌ₂, rë₂ deꞌ₂ quion₂ ꞌniaꞌ₂ ꞌí₁, ꞌein₂ dsia₅ mɨꞌ₅₄ jmo₅ le₁dsonꞌ₅₄ guáꞌ₅, ꞌein₂ chiꞌ₅ juɨ₅ a₂qui₂nió₃ dsa₂, a₂tsá₃ dsi₂ten₅₄ liaꞌ₂ conꞌ₂ lë́₅ jág₁ a₂ma₂ca₂rë₃tɨ́nꞌ₃ ꞌniaꞌ₂. Jaun₂ co₂dsia₅ chénꞌ₂ ꞌniaꞌ₂ cau₅ i₂jmo₅ le₂jaun₂.
18 Ia₁ on₃juaꞌ₅₄ dsa₂ i₂jme₂ti₃ ne₄ Te₁guiꞌ₅₄ Jesucristo i₂le₂ꞌéi₂; conꞌ₂ jŋiaꞌ₅₄ jme₂ti₃ ne₄ a₂mɨ₅ nɨ₁ŋɨ₁ guioin₅₄ bá₄, qui₂jme₂gain₂₃ dsɨ́₅ juɨ₁liaꞌ₂ dsa₂ i₂tsá₃ lɨn₄ ŋɨ́ꞌ₂ dsɨ́₅, quianꞌ₅₄ jág₁ ꞌua₁, jág₁ rau₂ në́₃.
19 Ca₂le₃jɨ́n₃ bá₄ dsa₂ le₁ŋi₅ ꞌa₂ liaꞌ₂ ma₂ja₂nóꞌ₅ ꞌniaꞌ₂ a₂negꞌ₅₄, jaun₂ ꞌioꞌ₂ jmo₅ jniá₂ o₄quiánꞌ₂ ꞌniaꞌ₂. La₁ia₁ ꞌnio₃ jniá₂ a₂lénꞌ₂ ꞌniaꞌ₂ ꞌŋiogꞌ₅₄ le₃quióꞌ₅ a₂dse₃, ján₃ bá₄ le₂në₅ a₂léngꞌ₂ dsa₂ i₂tsá₃ ꞌe₂ dsɨ₂jŋia₅ dsɨ́₅ ne₄ a₂ꞌlɨgꞌ₅₄.
20 Jaun₂ Diú₄ i₂jmo₅ ꞌei₅ tei₄, ŋiꞌ₅₄ ta₁ jleinꞌ₃ i₂së₃dsen₃ o₄tagꞌ₄ ꞌniaꞌ₂. Juɨ₁ꞌei₅ bá₄ a₂dse₃ dsɨ́₅ Te₁guiꞌ₅₄ Jesús quián₂ jniog₄ ja₁conꞌ₂ ꞌniaꞌ₂.
21 Timoteo, i₂quianꞌ₄ jniá₂ jmo₂₃ ta₁, dsiáinꞌ₂ jág₁ a₂cuɨin₂₃ Diú₄ ꞌniaꞌ₂; le₂jaun₂ bá₄ ján₃ Lucio quianꞌ₅₄ Jasón, Sosípater, i₂lɨ́n₅ dsa₂ go₃ jniá₂.
22 Jniá₂ Tercio i₂tóꞌ₃ jág₁ la₂ ne₄ si₂, ján₃ bá₄ cuɨ́n₅ jniá₂ Diú₄ ꞌniaꞌ₂ o₄quióꞌ₄ Te₁guiꞌ₅₄.
23 Gayo në́₃ dsiáinꞌ₂ jág₁ a₂cuɨin₂₃ Diú₄ ꞌniaꞌ₂. Dsi₂néi₂ quióꞌ₅ ꞌéi₂ bá₄ ꞌeng₅₄. Ján₃ bá₄ cuë₂₃ dsi₂néi₂ quióꞌ₅ cuë́ꞌ₅ ca₂le₃jɨ́n₃ dsa₂ quián₅ guáꞌ₅. Erasto dsa₂ i₂niog₅ gu₂ cu₄ quióꞌ₅ dsa₂ juɨg₂ në́₃, dsiáinꞌ₂ jág₁ a₂cuɨin₂₃ Diú₄ ꞌniaꞌ₂ ján₃; i₂chen₂ Cuarto rɨnꞌ₅₄ jniog₄ në́₃.
24 Juɨ₁jme₂guꞌ₅₄ bá₄ Te₁guiꞌ₅₄ Jesucristo ꞌniaꞌ₂ ca₂le₃jɨ́ngꞌ₃, A₂méi₃.f
ꞌÁgꞌ₃ jág₁ Pa₄ a₂jme₂juɨinꞌ₂ Diú₄
25 Në₃ në́₃, juɨ₁jme₁juɨnꞌ₂ jniog₄ Diú₄. ꞌÉi₂ bá₄ lé₂ le₃jmo₃ a₂náuꞌ₁ ꞌniaꞌ₂ tiá₂ liaꞌ₂ conꞌ₂ lë́₅ jág₁ dse₃ quióꞌ₅ Cristo a₂ꞌë́₅ jniá₂, liaꞌ₂ conꞌ₂ lë́₅ ca₂jme₃jnia₅ Diú₄ jág₁ quióꞌ₅ a₂jme₁rë₂ꞌma₄ ca₃ma₂lɨ́gꞌ₂ lɨn₃.
26 Diú₄ i₂chan₂ co₂tan₅₄ ꞌéi₂ bá₄ ca₂jmo₃ ꞌéiꞌ₃ a₂jmo₃ jág₁ dsa₂ i₂chen₄ quiáin₅ ma₂lɨ́gꞌ₂, jág₁ a₂ca₂tóꞌ₂ ꞌéi₂ ne₄ Si₂, ia₁jaun₂ le₃ŋi₅ dsa₂ chan₂ ca₂le₃jë́₃ juɨg₂ nación, ia₁jaun₂ le₃ꞌéin₂ jág₁ jaun₂, le₃neiꞌ₅₄ në́₃.
27 ¡Diú₄ i₂jan₂ tan₅₄, i₂tɨn₂, i₂ŋi₅, juɨ₁le₂juɨinꞌ₂ bá₄ të₂le₃ quianꞌ₅₄ Jesucristo ca₂liaꞌ₂ co₂tan₅₄! A₂méi₃.
Co₂në₅.