Jmo₄ a₂ꞌŋio₂ dsɨ́₅ dsa₂ mɨ₂güɨ́g₃ rɨ́ngꞌ₂, on₃juaꞌ₅₄ rëꞌ₂ jmáꞌ₃ a₂të₅ ꞌauꞌ₂ ꞌŋiagꞌ₂
15
Jniog₄ i₂tióng₂ tiá₂ a₂ꞌéin₂, ca₂tág₂ guéi₁ co₂ꞌnióꞌ₄ caun₂ lio₅₄ quián₂, ꞌa₂ liaꞌ₂ qui₂ŋɨ́ꞌ₂ dsɨ́₅ dsa₂ i₂ꞌuan₅₄ ꞌa₂ liaꞌ₂ ꞌéin₂, jaun₂ tsá₃ ꞌnióꞌ₅ jmó₁ conꞌ₂ a₂të₅ dsɨ₅ guio₅₄.
2 Le₂jau₂ le₂jau₂ bá₄ jniog₄ ca₂tág₂ jmó₁ a₂të₅ dsɨ́₅ dsa₂ mɨ₂güɨ́g₃ rɨnꞌ₅₄, a₂jmó₁ a₂lë́₅ a₂dse₃ ja₁coin₂, juɨ₁liaꞌ₂ juɨ₅ ja₁lé₂ qui₂dsɨ₃cóin₃ le₃quióꞌ₅ jme₂dsí₂.
3 Ia₁ ca₂liaꞌ₂ jŋiaꞌ₅₄ ꞌŋiog₅ Cristo tsá₃ ca₂jmo₃ a₂të₅ dsɨ́₅ ꞌŋiog₅. Të₂le₃ ca₂i₃ŋɨ́i₂ juɨ₁liaꞌ₂ juáꞌ₂ ne₄ Si₂:
Ca₂le₃jë́₃ jág₁ uɨg₅ a₂jme₁tsɨ́ꞌ₅ dsa₂ ꞌniaꞌ₂,
ne₃ jniá₂ bá₄ ca₂të₁tsɨꞌ₅₄.a
4 Ia₁ ca₂le₃jë́₃ conꞌ₂ lë́₅ jág₁ a₂ca₂i₃toꞌ₅₄ ne₄ Si₂, a₂ca₂i₃toꞌ₅₄ ia₁jaun₂ jme₁tag₅ jniog₄ rë₂në́₃, ia₁jaun₂ caun₂ chong₂ jniog₄ ꞌɨ́n₂ dsɨ₅ le₃quióꞌ₅ Diú₄, të₂le₃ quianꞌ₅₄ a₂juɨnꞌ₂ dsɨ₅, a₂lë́₂ liánꞌ₂ dsɨ₅ a₂cuë₅ jág₁ a₂já₅ ne₄ Si₂ jaun₂.
5 Juɨ₁jme₂ꞌo₅₄ bá₄ Diú₄, i₂jmo₅ a₂juɨnꞌ₂ dsɨ́₅ dsa₂, i₂cuë₅ liánꞌ₂ në́₃, juɨ₁jme₂ꞌoin₅₄ ꞌniaꞌ₂ a₂tiángꞌ₄ a₂jenꞌ₂ ꞌniaꞌ₂ le₂jangꞌ₂ le₂jangꞌ₂ conꞌ₂ lë́₅ i₂nioꞌ₅₄ ꞌniaꞌ₂ juɨ₅ quióꞌ₅ Cristo Jesús,b
6 ia₁jaun₂ ca₂le₃jɨ́nꞌ₃ ꞌniaꞌ₂ co₂dsia₅, caun₂ bá₄ jág₁, jme₁juɨnꞌ₂ ꞌniaꞌ₂ Diú₄ Jmei₂ Te₁guiꞌ₅₄ Jesucristo quián₂.
Dsɨ₂ꞌag₅ jág₁ dse₃ ja₁con₂ dsɨ₂nau₂
7 Le₂në₅ jaun₂, qui₂guen₅₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂ juɨ₁liaꞌ₂ ca₂guéiꞌ₂ Cristo guio₅₄ jniog₄, ia₁jaun₂ le₃juɨnꞌ₂ Diú₄.
8 Ia₁ a₂juáꞌ₅ jniá₂ juɨ́g₂ ꞌniaꞌ₂, ca₂guan₃ I₂rë₂ꞌɨ́n₁* quián₅ Diú₄, ca₂jme₃ti₃ ja₁con₂ jniaꞌ₅₄ conꞌ₂ lág₅ dsa₂ judíos,c ia₁jaun₂ le₃ti₃ jág₁ ron₅ a₂ca₂ŋɨ₂ dsa₂ canꞌ₅₄ quián₂ jniaꞌ₅₄ ma₂lɨ́gꞌ₂. Jaun₂ le₂në₅ bá₄ ca₂rë₃jniá₂ në́₃ i₂rë₂tiꞌ₅₄ bá₄ Diú₄ jág₁ a₂cuë₂₃.
9 Guain₃ ján₃ ia₁jaun₂ jme₃juagꞌ₂ dsɨ₂nau₂ jme₃juɨinꞌ₂ Diú₄ i₂ŋéi₂ dsɨ́₅, juɨ₁liaꞌ₂ rë₂ton₅ ne₄ Si₂:
ꞌUɨg₅₄ jaun₂ jme₁juɨnꞌ₂ jniá₂ ꞌne₂ jɨn₄ dsɨ₂nau₂;
ꞌë₅₄ jniá₂ neꞌ₅₄ ꞌne₂ a₂jme₁juagꞌ₂.d
10 Conꞌ₂ siáꞌ₂ juáꞌ₂ táng₃:
Jmo₄ ꞌioꞌ₂, ꞌniaꞌ₂ dsɨ₂nau₂,
quianꞌ₅₄ dsa₂ juɨg₂ quiáin₅.e
11 Ja₁siáꞌ₂ táng₃ juáꞌ₂:
Jme₁juɨnꞌ₂ ꞌniaꞌ₂ Te₁guiꞌ₅₄,
ꞌniaꞌ₂ ca₂le₃jɨ́n₃ dsɨ₂nau₂,
juɨ₁jme₂juagꞌ₂ bá₄ ca₂le₃jë́₃ juɨg₂.f
12 Ján₃ bá₄ juáꞌ₂ Isaías:
ꞌŊio₂ tsɨn₅ choꞌ₅₄ Isaí,
jaun₂ náu₃ jan₂ i₂qui₃dsɨ₅ ꞌéiꞌ₃ ja₁con₂ dsɨ₂nau₂;
le₃quióꞌ₅ ꞌéi₂ bá₄ qui₃le₃ꞌɨ́n₂ dsɨ́₅
le₂caun₂ le₂caun₂ juɨg₂.g
13 Jaun₂ Diú₄, i₂jmo₅ ꞌei₅ caun₂ dsɨ₅ a₂ꞌɨ́n₂ dsɨ₅ jniog₄, juɨ₁jme₂cainꞌ₂ bá₄ ꞌauꞌ₂ ꞌniaꞌ₂, a₂changꞌ₂ jmóꞌ₂ ꞌniaꞌ₂ ꞌioꞌ₂, ꞌag₃ tei₄ a₂ꞌéngꞌ₂ le₃quióꞌ₅, ia₁jaun₂ rë₂tsón₂ a₂le₁ꞌág₄ caun₂ ꞌauꞌ₂ a₂ꞌɨ́n₂ ꞌauꞌ₂ ꞌniaꞌ₂ quianꞌ₅₄ juɨ₅bí₂ quióꞌ₅ Jme₂dsí₂ Jŋió₅.
14 Caun₂ bá₄ ꞌei₅ dsɨ₃ jniá₂, rɨnꞌ₅₄ jniog₄, ma₂qui₂le₁rɨn₅ ꞌauꞌ₂ ꞌniaꞌ₂ a₂ŋéi₂ ꞌauꞌ₂ rɨ́ngꞌ₂, tonꞌ₂ qui₂le₁rɨn₅ ꞌauꞌ₂ ꞌniaꞌ₂ a₂tɨnꞌ₂ ꞌniaꞌ₂, jaun₂ quɨꞌ₅₄ ꞌniaꞌ₂ jmɨg₄ tóngꞌ₄ jág₁ rɨ́ngꞌ₂ le₂jangꞌ₂ le₂jangꞌ₂.
15 A₂tiá₂ dsɨ₃ jniá₂ ma₂në₂juáꞌ₃ ja₁lɨn₅₄, ma₂në₂tóꞌ₃ jniá₂ jág₁ ne₄ si₂ la₂ neꞌ₅₄ ꞌniaꞌ₂, ia₁jaun₂ tsá₃ dsɨ₃ꞌén₂ ꞌauꞌ₂ ꞌniaꞌ₂. A₂ꞌua₁ dsɨ́₅ bá₄ Diú₄ ma₂dsia₃ gu₃ ta₁ la₂,
16 a₂jme₂tí₁ ne₄ Jesucristo jë₄ quióꞌ₅ dsɨ₂nau₂, a₂qui₂jenꞌ₄ jniá₂ neꞌ₅₄ ꞌniaꞌ₂ jág₁ dse₃ a₂lión₂ dsa₂, ia₁jaun₂ lé₂ qui₁jenꞌ₄ ꞌniaꞌ₂ i₂lɨ́ngꞌ₅ dsɨ₂nau₂, le₃ne₄ Diú₄, në₂jag₄ bá₄ caun₂ a₂rë₂jenꞌ₅₄ a₂guéiꞌ₃, co₂ꞌnióꞌ₄ dsa₂ i₂ma₂rë₂tson₄, ca₂jmo₃ Jme₂dsí₂ Jŋió₅.
17 Jaun₂ lë₃, jmo₅ jniá₂ tángꞌ₅ le₃quióꞌ₅ Cristo Jesús, quianꞌ₅₄ ta₁ a₂jmo₅ jniá₂ ne₄ Diú₄;
18 on₃juaꞌ₅₄ rëꞌ₂ a₂tiá₂ dsɨ₃ jniá₂ le₃juáꞌ₄ lë́₅ guë́₄ liaꞌ₂ conꞌ₂ guë́₄ juɨ₁liaꞌ₂ a₂ma₂qui₂ma₂jmo₃ Cristo të₂le₃ quianꞌ₅₄ jniá₂, a₂tsɨnꞌ₅₄ jniá₂ dsɨ₂nau₂ ne₄ juɨ₅, quianꞌ₅₄ jág₁ quió₃, quianꞌ₅₄ ta₁ quió₃ në́₃, a₂le₃neꞌ₅₄ ꞌéi₂ ne₄ Diú₄.
19 A₂lë́₅ ta₁ në₅ të₂le₃ quianꞌ₅₄ juɨ₅bí₂ a₂ꞌio₅ léi₄ juëꞌ₂ a₂dsɨ₂góꞌ₃ dsɨ́₅ dsa₂, të₂le₃ quianꞌ₅₄ juɨ₅bí₂ quióꞌ₅ Jme₂dsí₂ Jŋió₅ në́₃. Le₂në₅ bá₄ ma₂ca₂jme₁ꞌŋiag₂₃ ta₁ ma₂qui₂ma₂ꞌë́₃ jág₁ dse₃ quióꞌ₅ Cristo, ca₂jme₁lióg₄ jniá₂ juɨg₂ Jerusalén, jaun₂ guë́₄ ŋeg₅₄ ta₁caun₂ juɨ₅ le₃lágꞌ₃, ca₂liaꞌ₂ ca₂dsióg₃ të₂ ꞌuë₃ Ilírico.
20 Le₂në₅ bá₄ ma₂ca₂jmo₃ dsen₅₄ dsɨ₃ ma₂qui₂ma₂ꞌë́₃ jág₁ le₂tan₅₄ juɨg₂ ja₁ꞌi₁cónꞌ₂ tsá₃ jme₁ma₂nág₂ dsa₂ a₂ꞌɨn₅ dsa₂ Cristo, ia₁jaun₂ tsá₃ cho₅₄ jniá₂ ta₁ ne₄ ꞌuɨg₅₄ ꞌiaꞌ₂ a₂ma₂ca₂jme₃lióg₃ i₂siánꞌ₂.
21 La₁ juɨ₁liaꞌ₂ juáꞌ₂ ne₄ Si₂:
Jág₃ dsa₂ jɨ́in₃ ꞌéi₂
i₂tsá₃ jme₁ma₂gúꞌ₃ jág₁ quióꞌ₅;
jaun₂ le₃ŋɨ́ꞌ₂ dsɨ́₅
juɨ₁liaꞌ₂ i₂tsá₃ jme₁ma₂nág₂ a₂ꞌɨn₅ ꞌéi₂.h
Dsɨ₂jiog₅ dsɨ́₅ Pa₄ dsó₃ juɨ₅ Roma
22 ꞌUɨg₅₄ në₅ ca₂jnɨ́₃ jniá₂ juɨ₅ ꞌlióng₂ ráun₂ liaꞌ₂ conꞌ₂ jme₁ꞌnio₃ jme₁i₁jɨng₁₂ ꞌniaꞌ₂.
23 La₁ në₃ guëꞌ₂ liaꞌ₂ tsá₃ ma₃cha₂ ja₁jmo₅₄ ta₁ le₂tan₅₄ juɨg₂ te₁ꞌi₁ le₃la₂, jaun₂ ma₂ne₁ŋó₄ bá₄ ꞌlióng₂ ŋi₂ jme₁ꞌɨ́n₅ dsɨ₃ jme₁nei₅₄ i₁jɨng₁₂ ꞌniaꞌ₂,
24 ꞌɨ́n₂ dsɨ₃ jniá₂ ŋɨg₅₄ juɨ₅ ja₁tionꞌ₅₄ ꞌniaꞌ₂ jë₁ma₂të́₂ rë₁nei₅₄ juɨ₅ España, ia₁jaun₂ lé₂ le₃tsagꞌ₅₄ ne₄ juɨ₅ jaun₂, cang₂ jë₁ma₂ca₂magꞌ₂ dsɨ₃ jɨng₅₄ ꞌniaꞌ₂.
25 La₁ rë₂në́₃ në́₃, ꞌeng₅₄ juɨ₅ nei₅₄ juɨ₅ Jerusalén, a₂jme₁ti₁ jniá₂ ta₁ ja₁con₂ dsa₂ quián₅ Diú₄ ja₁jaun₂.
26 Ia₁ i₂chan₂ Macedonia quianꞌ₅₄ i₂chan₂ Acaya në́₃, ca₂jmo₃ dsɨ́₅ ca₂cágꞌ₃ cu₄ a₂chein₃ ne₄ rɨnꞌ₅₄ jniog₄ i₂të₂ŋé₂ i₂chan₂ juɨg₂ Jerusalén.
27 A₂ꞌŋio₂ dsɨ́₅ ca₂jmo₃ le₂jaun₂, ia₁ dsau₅ bá₄ jaun₂ rɨin₂ le₃quióꞌ₅ ꞌéi₂. Ia₁ chi₂juaꞌ₂ ma₂qui₂ma₂quenꞌ₅₄ dsɨ₂nau₂ a₂gu₂dsí₂ a₂ca₂cuë₃ dsa₂ judíos, ján₃ bá₄ le₂jaun₂ ca₂tɨ́in₂ jme₃ꞌo₅₄ quianꞌ₅₄ a₂ꞌnióꞌ₅ le₃quióꞌ₅ nɨ₁ŋɨ́₅.
28 Jaun₂ le₂në₅, jë₁ma₂ca₂dsan₃ jángꞌ₅ jniá₂ ne₅₄ a₂ma₂ca₂cágꞌ₃ dsa₂ jaun₂, jaun₂ guë́₄ ꞌú₄ juɨ₅ a₂nei₅₄ juɨ₅ España, a₂i₁jɨng₁₂ ꞌniaꞌ₂ liaꞌ₂ ma₂ꞌeng₅₄ juɨ₅.
29 Jaun₂ caun₂ bá₄ ꞌei₅ dsɨ₃, a₂jme₃guꞌ₅₄ bá₄ Cristo liaꞌ₂ rë₂ꞌŋia₅ jë₁ma₂të́₂ rë₁dsióg₄ jniá₂ a₂i₁jɨng₁₂ ꞌniaꞌ₂.
30 Rɨnꞌ₅₄ jniog₄, mɨ₅ jniá₂ ja₁conꞌ₂ ꞌniaꞌ₂ liaꞌ₂ conꞌ₂ lë́₅ ꞌéiꞌ₃ quióꞌ₅ Te₁guiꞌ₅₄ Jesucristo quián₂ jniog₄, tonꞌ₂ ia₁ a₂cuë₅ Jme₂dsí₂ bí₂, a₂jme₁ꞌnió₄ jniog₄ rɨnꞌ₅₄: a₂jme₁quiongꞌ₅₄ ꞌniaꞌ₂ jniá₂, ne₄ ꞌnei₂ a₂chéngꞌ₅, a₂chi₁lenꞌ₄ ꞌniaꞌ₂ Diú₄ o₄quió₃.
31 Mɨ₄ ꞌniaꞌ₂ ne₄ Diú₄ juɨ₁lio₅₄ jniá₂ o₄gú₃ dsa₂ i₂tsá₃ ꞌén₂ i₂chan₂ Judea, le₂jaun₂ guëꞌ₂ ján₃ juɨ₁gue₅₄ bá₄ rɨnꞌ₅₄ jniog₄ juɨg₂ Jerusalén caun₂ dse₃ a₂i₁can₁₂ a₂jme₁ꞌoin₁₂,
32 ia₁jaun₂ chi₂juaꞌ₂ ꞌnio₃ Diú₄ a₂dsióg₄ jniá₂, i₁jɨng₁₂ ꞌniaꞌ₂ a₂ꞌioꞌ₂ jmo₂₃, a₂tágꞌ₄ jme₂dsí₂ quió₃ co₂dsia₅ quianꞌ₅₄ ꞌniaꞌ₂.
33 Juɨ₁quiongꞌ₅₄ bá₄ Diú₄ i₂jmo₅ ꞌei₅ tei₄, ca₂le₃jɨ́nꞌ₃ ꞌniaꞌ₂. A₂méi₃.