Tsá₃ chi₂ꞌɨ́ngꞌ₄ uɨg₅ rɨ́ngꞌ₂
14
Chi₂juaꞌ₂ chan₂ dsa₂ ꞌuan₅₄ të₂le₃ quianꞌ₅₄ a₂ꞌéin₂, qui₁guein₅₄ ꞌniaꞌ₂, la₁ on₃juaꞌ₅₄ ia₁jaun₂ qui₁tsɨ́nꞌ₂ ꞌniaꞌ₂ ꞌa₂ liaꞌ₂ lë́₅ ŋɨ́iꞌ₂.
2 Chan₂ i₂lɨn₅₄ i₂ꞌén₂ a₂lé₂ le₃guë́ꞌ₃ ca₂le₃jë́₃ juɨ₁ꞌe₂ guë́₃, tonꞌ₂ chan₂ guëꞌ₂ táng₃ i₂lɨn₅₄ i₂ꞌuan₅₄ dsɨ́₅ ꞌa₂ liaꞌ₂ ꞌéin₂, i₂guë́ꞌ₅ jmáꞌ₃ liaꞌ₂ ca₂ne₅₄ mɨ₂jánꞌ₅.
3 Jaun₂ lë₃ i₂guë́ꞌ₅ liaꞌ₂ ꞌei₅ ne₄ në́₃, tsá₃ ca₂tɨ́in₂ jmo₃ juaꞌ₅₄ tsá₃ jein₅₄ i₂tɨn₂ dsɨ́₅ guë́ꞌ₅ jmáꞌ₃ liaꞌ₂ a₂lɨn₅₄ má₃; tonꞌ₂ ján₃ guëꞌ₂ le₂jaun₂ juɨ₁liaꞌ₂ i₂tsá₃ guë́ꞌ₅ le₃jë́₃, tsá₃ lë₁o₁quion₂ ꞌí₁ ja₁con₂ dsa₂ i₂guë́ꞌ₅ le₃jë́₃. Ia₁ ján₃ bá₄ ca₂guéiꞌ₂ Diú₄ quióꞌ₅ dsa₂ ꞌéi₂.
4 ꞌNe₂ guëꞌ₂, ¿ꞌein₂ bá₄ lɨ́ngꞌ₅ juaꞌ₅₄ a₂caunꞌ₅₄ ꞌí₁ ja₁con₂ dsa₂ i₂jme₂ti₃ ne₄ i₂siánꞌ₂? Ia₁ juɨg₅₄ bá₄ ꞌéi₂ i₂niog₅ ne₄ con₂ ꞌí₁ chi₂juaꞌ₂ chénꞌ₅ ꞌéi₂ rë₂, o₃ të₁tsɨinꞌ₅₄ ꞌlɨgꞌ₅₄ ꞌe₂. Jaun₂ të₃tsɨinꞌ₅₄ bá₄ rë₂, ia₁ i₂quɨꞌ₅₄ jmɨg₄ Te₁guiꞌ₅₄ jmo₃ a₂të₃tsɨnꞌ₅₄ dsa₂ ꞌéi₂.
5 Chan₂ guëꞌ₂ i₂lɨn₅₄ táng₃ i₂jmo₅ dsɨ́₅, ꞌŋio₅ guë́₄ quen₅ a₂lɨn₅₄ jmɨg₄ liaꞌ₂ conꞌ₂ guë́₄ jmɨg₄ siáꞌ₂; chan₂ guëꞌ₂ i₂lɨn₅₄ i₂ꞌén₂ jmo₂₃ dsɨ́₅ a₂co₂rë₂ bá₄ ca₂le₃jë́₃ jmɨg₄. Le₂jan₂ le₂jan₂ ꞌnióꞌ₅ jmo₃ ꞌei₅ caun₂ dsɨ́₅ liaꞌ₂ conꞌ₂ lë́₅ dsɨ₂jŋia₅ dsɨ́₅ ꞌŋiog₅.
6 Juɨ₁liaꞌ₂ dsa₂ i₂jme₂góꞌ₃ caun₂ jmɨg₄, le₃quióꞌ₅ Te₁guiꞌ₅₄ bá₄ jme₂góꞌ₃ jmɨg₄ jaun₂. Le₂në₅ bá₄ juɨ₁liaꞌ₂ dsa₂ i₂guë́ꞌ₅ liaꞌ₂ ꞌei₅ ne₄ má₃, guë́ꞌ₅ le₃quióꞌ₅ Te₁guiꞌ₅₄, ia₁ cuë́ꞌ₅ ti₁ꞌmagꞌ₄ Diú₄. Ján₃ bá₄ le₂në₅ quianꞌ₅₄ juɨ₁liaꞌ₂ i₂tsá₃ guë́ꞌ₅ liaꞌ₂ ꞌei₅ ne₄ má₃, le₃quióꞌ₅ Te₁guiꞌ₅₄ bá₄ tsá₃ guë́ꞌ₅; ján₃ bá₄ cuë́ꞌ₅ ti₁ꞌmagꞌ₄ Diú₄.
7 Ia₁ ꞌi₁jan₂ jniog₄ tsá₃ lé₂ le₃chong₂ le₃quián₂ guio₅₄, on₃ guëꞌ₂ lé₂ le₃dsióg₃ le₃quián₂ guio₅₄ në́₃.
8 Ia₁ të₁liaꞌ₂ chong₂ jniog₄, chong₂ le₃quióꞌ₅ Te₁guiꞌ₅₄ bá₄, në₁juaꞌ₂ ca₂dsau₃ guëꞌ₂ në́₃, dsióg₃ le₃quióꞌ₅ Te₁guiꞌ₅₄ bá₄ ján₃. Le₂në₅ bá₄, të₁liaꞌ₂ chong₂ o₃ jë₁ma₂dsau₃ ꞌe₂, lág₅ i₂quián₅ Te₁guiꞌ₅₄ bá₄.
9 ꞌUɨg₅₄ jaun₂ ca₂jon₃ Cristo, tonꞌ₂ ca₂jeinꞌ₅₄ táng₃: ia₁jaun₂ léin₂ Te₁guiꞌ₅₄ quián₅ dsa₂ i₂ma₂dsan₃, liaꞌ₂ dsa₂ i₂chan₂ në́₃.
10 La₁ ꞌne₂ në́₃, ¿ꞌe₂ ꞌuɨg₅₄ cáunꞌ₂ ꞌí₁ ja₁con₂ rɨ́ngꞌ₂? ¿O₃ ꞌe₂ lë₃ jɨngꞌ₅₄ sion₅ rɨ́ngꞌ₂? Ia₁ ca₂le₃jág₃ bá₄ jniog₄ dsi₁no₃ dsɨ₂jme₁jnia₅ ne₄ Diú₄ ia₁jaun₂ con₂ ꞌéi₂ ꞌí₁ quián₂.
11 Ia₁ ne₄ Si₂ juáꞌ₂:
Juɨ₁liaꞌ₂ a₂dsónꞌ₂ dsau₅ bá₄ a₂chan₂ jniá₂,
juáꞌ₂ Te₁guiꞌ₅₄,
le₂në₅ bá₄ dsau₅ dsónꞌ₂,
ca₂le₃jɨ́n₃ bá₄ qui₃jóinꞌ₂ jne₅₄ ne₃ jniá₂,
jaun₂ ca₂le₃jɨ́n₃ bá₄ jmo₃ jág₁ quianꞌ₅₄ mɨ₂ꞌo₅₄
le₃ne₄ Diú₄.a
12 Le₂në₅ bá₄ jaun₂, le₂jau₂ le₂jau₂ bá₄ jniog₄ dsɨ₁jangꞌ₅₄ jág₁ dsau₅ quián₂ ne₄ Diú₄.
Tsá₃ jmóꞌ₂ juaꞌ₅₄ qui₂nió₃ rɨ́ngꞌ₂
13 Jaun₂ lë₃, tsá₃ ma₃juaꞌ₅₄ qui₁quiong₅₄ jniog₄ ꞌí₁ le₂jau₂ le₂jau₂ ja₁con₂ rɨnꞌ₅₄. Të₂le₃ jmo₄ ꞌniaꞌ₂ ꞌí₁, jmo₄ co₂ŋeiꞌ₅₄ tsá₃ ꞌe₂ jmóꞌ₂ ꞌi₁caun₂ juaꞌ₅₄ a₂qui₃nió₃ rɨ́ngꞌ₂.
14 Guion₄ bá₄ jniá₂, ꞌei₅ caun₂ dsɨ₃ le₃quióꞌ₅ Te₁guiꞌ₅₄, ꞌi₁caun₂ tsá₃ cha₂ juaꞌ₅₄ tsá₃ le₁jë́₃ conꞌ₂ lë́₅ ꞌŋiog₅. La₁ në₁juaꞌ₂ chan₂ jan₂ jmo₂₃ dsɨ́₅, cha₂ caun₂ a₂tsá₃ le₁jë́₃, le₃quióꞌ₅ ꞌŋiog₅ bá₄, tsá₃ le₁jë́₃.
15 Në₁juaꞌ₂ ca₂jénꞌ₃ quɨꞌ₂ dsɨ́₅ rɨ́ngꞌ₂ o₄quióꞌ₄ a₂quë́ꞌ₂ ꞌne₂, tsá₃ ma₃jmoꞌ₂ a₂ꞌniógꞌ₃ rɨ́ngꞌ₂. Tsá₃ jmo₂ juaꞌ₅₄ cuë́ꞌ₁ juɨ₅ o₄quióꞌ₄ a₂quë́ꞌ₂, a₂dsɨ₂ꞌén₂ jan₂ rɨ́ngꞌ₂, ia₁ ca₂jon₃ Cristo o₄quióꞌ₄ ꞌéi₂ ján₃.
16 Tsá₃ cuë₂ ꞌniaꞌ₂ juɨ₅ juaꞌ₅₄ a₂qui₃dsia₃ dsa₂ ꞌlɨgꞌ₅₄ ꞌë₃ juɨ₁liaꞌ₂ a₂jmoꞌ₂ ꞌauꞌ₂ a₂dse₃.
17 Ia₁ juɨ₁liaꞌ₂ ja₁gon₂ Diú₄, tsá₃ lɨn₄ quen₅ juɨ₁liaꞌ₂ a₂guë́ꞌ₅ dsa₂, a₂qui₂ꞌɨ́nꞌ₂ dsa₂ në́₃; a₂jaun₂ bá₄ a₂quen₅ guë́₄ lɨn₃: a₂guéiꞌ₂ Diú₄ jniog₄ në₂jag₄ bá₄ a₂tsá₃ ꞌe₂ dso₄ rag₂, a₂chong₂ jniog₄ tei₄ o₂ꞌŋió₃ o₂jŋia₃ dsɨ₅ të₂le₃ quianꞌ₅₄ Jme₂dsí₂ Jŋió₅.
18 Ia₁ juɨ₁liaꞌ₂ i₂jme₂ti₃ ta₁ ne₄ Cristo le₂në₅, jmo₂₃ a₂ꞌŋio₂ dsɨ́₅ Diú₄, tonꞌ₂ dse₃ ꞌag₅ táng₃ dsa₂ mɨ₂güɨ́g₃.
19 Le₂në₅ bá₄ jaun₂, caun₂ juɨ₁ꞌniogꞌ₅₄ jniog₄ jmáꞌ₃ liaꞌ₂ a₂cuë₅ juɨ₅ ja₁ꞌag₃ tei₄, a₂jme₂ꞌo₅₄ dsɨ₃cau₅₄ jniog₄ të₂le₃ juɨ₅ jme₂dsí₂.
20 Tsá₃ lë₁ꞌén₅ ꞌne₂ ta₁ quióꞌ₅ Diú₄ o₄quióꞌ₄ má₃. Dsónꞌ₂ bá₄ jaun₂, a₂le₁jë́₃ ca₂le₃jë́₃ a₂niog₅ guë́ꞌ₅ dsa₂. La₁ tsá₃ dse₃ në₁juaꞌ₂ o₄quióꞌ₄ a₂quë́ꞌ₂ ꞌne₂, tiánꞌ₂ dso₄ rɨ́ngꞌ₂.
21 Ja₂lɨn₃ guë́₄ dse₃ a₂tsá₃ quɨ́gꞌ₂ ŋɨ́₅, on₃ guëꞌ₂ ꞌagꞌ₅₄ vino, on₃ guëꞌ₂ jmóꞌ₂ juɨ₁ꞌe₂ guë́₃ a₂lé₂ le₃qui₃nió₃ rɨ́ngꞌ₂.
22 Juɨ₁liaꞌ₂ a₂ꞌénꞌ₂ ꞌne₂, a₂ꞌénꞌ₂ ꞌne₂ ꞌŋiagꞌ₂ bá₄ jaun₂ të₂le₃ ne₄ Diú₄. ¡ꞌE₂ guë́₄ dsen₃ juɨ₁liaꞌ₂ dsa₂ i₂con₂ ꞌí₁ ja₁con₂ ꞌŋiog₅, i₂tsá₃ qui₂dsɨ₂jŋi₅ dsɨ́₅ o₄quióꞌ₄ a₂cuë₂₃ jmɨg₄ ꞌŋiog₅!
23 La₁ juɨ₁liaꞌ₂ dsa₂ i₂guë́ꞌ₅, i₂ꞌei₅ caun₂-tɨn₃ dsɨ́₅, ma₂gue₃ uɨg₅, ia₁ tsá₃ ca₂guë́ꞌ₃ të₂le₃ quianꞌ₅₄ a₂ꞌéin₂. Ia₁ ca₂le₃jë́₃ a₂jmo₅ dsa₂ a₂tsá₃ lë́₅ të₂le₃ quianꞌ₅₄ a₂ꞌéin₂, dso₄ bá₄ jaun₂.