13
Ca₂le₃jɨ́n₃ bá₄ ca₂tɨ́n₂ tónꞌ₃ ꞌéiꞌ₃ quióꞌ₅ dsɨ₂tan₅₄ i₂gon₂. Ia₁ ꞌi₁jan₂ dsɨ₂tan₅₄ i₂chan₂, juaꞌ₅₄ tsá₃ ca₂cheiꞌ₃ Diú₄. Jaun₂ ca₂le₃jɨ́n₃ dsɨ₂tan₅₄ i₂chan₂ në́₃, i₂dsián₁ quián₅ Diú₄ bá₄ ꞌéi₂.
2 Jaun₂ le₂në₅, juɨ₁liaꞌ₂ i₂nau₂ quen₅ ja₁con₂ dsɨ₂tan₅₄, nau₂ quein₂₃ ja₁con₂ i₂dsián₁ quián₅ Diú₄ bá₄. Jaun₂ gue₃ uɨg₅ juɨ₁liaꞌ₂ i₂jmo₅ le₂jaun₂.
3 Ia₁ tsá₃ ta₁ jaun₂ dsián₄ dsɨ₂tan₅₄ a₂jmo₃ góꞌ₅ juɨ₁liaꞌ₂ i₂jmo₅ a₂dse₃; a₂jmo₃ góꞌ₅ dsa₂ i₂jmo₅-dsáu₅ a₂ꞌlɨgꞌ₅₄ bá₄. ¿ꞌNiogꞌ₂ ꞌne₂ le₃changꞌ₂ a₂tsá₃ gangꞌ₃ dsɨ₂tan₅₄? Jmo₄ bá₄ a₂dse₃, jaun₂ con₂ ꞌí₁ dsɨ₂tan₅₄ ja₁congꞌ₂, a₂lɨ́ngꞌ₅ dsa₂ dsen₃.
4 Ia₁ ta₁ jaun₂ tiáinꞌ₅ jme₂ti₃ ne₄ Diú₄ bá₄, a₂dse₃ quiángꞌ₂. La₁ në₁juaꞌ₂ ca₂jmoꞌ₅₄ a₂ꞌlɨgꞌ₅₄ në́₃, ca₂tɨ́ngꞌ₂ le₃gangꞌ₃, ia₁ on₃juaꞌ₅₄ a₂lë₁lë́₄ ꞌio₅ dsɨ₂tan₅₄ ꞌéiꞌ₃ a₂chain₂ bí₂ cuë₃ uɨg₅. Jan₂ i₂jme₂ti₃ ne₄ Diú₄ bá₄ ꞌéi₂, a₂ꞌë́₂ uɨg₅ ja₁con₂ dsa₂ i₂jmo₅ a₂ꞌlɨgꞌ₅₄.
5 Jaun₂ lë₃, tion₅₄ bá₄ ꞌnióꞌ₅ tónꞌ₃ dsa₂ ꞌéiꞌ₃ quióꞌ₅ dsɨ₂tan₅₄, on₃juaꞌ₅₄ rëꞌ₂ a₂jŋiaꞌ₅₄ ia₁jaun₂ tsá₃ gue₃ uɨg₅; të₂le₃ ia₁ a₂lë́₅ dsɨ́₅ le₂jaun₂ jmo₂₃ a₂dse₃.
6 ꞌUɨg₅₄ në₅ bá₄ quɨ́ꞌ₂ ꞌniaꞌ₂ ꞌliaꞌ₅₄ a₂ca₂tɨ́n₂ dsɨ₂tan₅₄, ia₁ ca₂ne₅₄ jme₂ti₃ dsɨ₂tan₅₄ ta₁ a₂lɨ́in₅ ne₄ Diú₄.
7 Cuëꞌ₅₄ bá₄ ꞌniaꞌ₂ dsa₂ ꞌe₂ niog₅ qui₂ca₂tɨ́in₂. Chi₂juaꞌ₂ ca₂tɨ́n₂ dsɨ₂tan₅₄ ꞌliaꞌ₅₄, qui₄ ꞌliaꞌ₅₄; chi₂juaꞌ₂ ca₂tɨ́in₂ mɨ₃ cu₄ te₁ꞌéngꞌ₂, cuëꞌ₅₄ cu₄ jaun₂; chi₂juaꞌ₂ ꞌein₂ ca₂tɨ́n₂ jme₃go₃ dsa₂, jme₁gan₃ bá₄ ꞌéi₂; chi₂juaꞌ₂ ꞌein₂ ca₂tɨ́n₂ jme₃juagꞌ₂ dsa₂, jme₁juɨinꞌ₂ bá₄.
8 Ja₁con₂ ꞌi₁jan₂ tsá₃ juɨ₁le₅₄ juaꞌ₅₄ cha₂ a₂qui₂le₂rɨnꞌ₂ ꞌniaꞌ₂ uë́₂, jŋiaꞌ₅₄ liaꞌ₂ a₂qui₂le₂rɨngꞌ₂ a₂ꞌniógꞌ₃ rɨ́ngꞌ₂ le₂jangꞌ₂ le₂jangꞌ₂ bá₄; ia₁ juɨ₁liaꞌ₂ i₂ꞌnio₃ dsa₂ mɨ₂güɨ́g₃ rɨnꞌ₅₄, ma₂ca₂jme₃ti₃ ꞌÉiꞌ₃ quióꞌ₅ Diú₄.
9 Juáꞌ₂ ꞌÉiꞌ₃ quióꞌ₅ Diú₄: “Tsá₃ niógꞌ₄ jág₁ quianꞌ₅₄ i₂tsá₃ lɨ́n₅ dsɨ₂i₂gogꞌ₂; tsá₃ jŋɨ́gꞌ₄ dsa₂ mɨ₂güɨ́g₃ rɨ́ngꞌ₂; tsá₃ ꞌángꞌ₁; tsá₃ jmóꞌ₂ jág₁ të₂jág₁; tsá₃ jmóꞌ₂ ꞌɨ́n₅ ꞌauꞌ₂ a₂quióꞌ₅ i₂siánꞌ₂.”a ꞌÉiꞌ₃ në₅ quianꞌ₅₄ guë́₄ ca₂le₃jë́₃ ꞌéiꞌ₃ siáꞌ₂ në́₃, qui₂rë₂tan₅₄ quianꞌ₅₄ jág₁ la₂: “Jme₁ꞌnió₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniógꞌ₃ ꞌŋiagꞌ₂.”b
10 Juɨ₁liaꞌ₂ dsa₂ i₂ꞌnio₃ dsa₂ mɨ₂güɨ́g₃ rɨnꞌ₅₄, tsá₃ ꞌe₂ ꞌlɨgꞌ₅₄ jmo₂₃ ja₁coin₂. Le₂në₅ bá₄ jaun₂ ja₁ꞌnio₃ dsa₂ rɨinꞌ₅₄, co₂ꞌnióꞌ₄ ca₂rë₃ti₃ bá₄ ꞌÉiꞌ₃ quíꞌ₅ Si₂.
11 Jë₄ ca₂le₃jë́₃ a₂në₅ në́₃, jmo₄ a₂ŋɨ́ꞌ₂ ꞌauꞌ₂ juɨ₁liaꞌ₂ jmɨg₄ chong₂ rë₂në́₃, a₂ma₂ca₂të́₂ hora a₂ŋéi₂ jniog₄ jë₄ le₁guág₃. Ia₁ jë₁lió₂ jniog₄ caun₂ ma₂ja₂quián₃ co₂ŋɨ́₂ bá₄ rë₂në́₃ liaꞌ₂ conꞌ₂ guë́₄ jme₁ca₂rë₃ꞌéin₂ jniog₄ le₂ꞌuɨg₅₄.
12 Juɨ₁liaꞌ₂ jë₄ ꞌuë₂ la₂ caun₂ qui₂dsɨ₂juɨn₅₄ bá₄; caun₂ ma₂ja₂quián₃ jnia₅₄ bá₄. ꞌUɨg₅₄ jaun₂ bá₄ ca₂tág₂ jniog₄ tí₄ a₂tsá₃ ma₃jmó₁ juɨ₁liaꞌ₂ a₂lë́₂ jë₄ qui₁néꞌ₃, a₂quián₁ quiꞌ₅₄ ca₂le₃jë́₃ a₂ꞌnióꞌ₅ quián₂, a₂jmo₅ ꞌí₁, a₂i₁nio₁ juɨ₁liaꞌ₂ ꞌlióg₂ i₂i₂nio₄ jë₄ jniá₂ si₂.
13 Juɨ₁i₁nio₁ jniog₄ liaꞌ₂ conꞌ₂ dsi₂ten₅₄, juɨ₁liaꞌ₂ i₂nio₄ dsa₂ a₂jmɨ₂. Tsá₃ ma₃ꞌnióꞌ₅ le₃chong₂ i₁nio₁ le₁ꞌein₅, on₃ guëꞌ₂ o₂ꞌŋió₃ o₂jŋia₃ dsɨ₅, on₃ guëꞌ₂ nióꞌ₄ jniog₄ jág₁ quianꞌ₅₄ i₂tsá₃ lɨ́n₅ dsɨ₂i₂gu₂ jniog₄, on₃ guëꞌ₂ jmó₁ a₂tsá₃ dsi₂ten₅₄, on₃ guëꞌ₂ dsiá₁ mɨꞌ₅₄, on₃ guëꞌ₂ qui₁jɨn₁ uɨn₅ dsɨ₅ rɨnꞌ₅₄ në́₃.
14 Të₂le₃ quiꞌ₂ ꞌniaꞌ₂ co₂ꞌnióꞌ₄ a₂qui₂rë₂liónꞌ₃ ꞌniaꞌ₂ lë́₅ ꞌí₁ të₂le₃ quianꞌ₅₄ ꞌŋiog₅ Te₁guiꞌ₅₄ Jesucristo, tsá₃ ma₃juɨ₁dsi₂jiog₅ guë́₄ ꞌauꞌ₂ ꞌa₂ liaꞌ₂ magꞌ₂ dsɨ́₅ a₂mɨ₅ nɨ₁ŋɨꞌ₁ ꞌniaꞌ₂.