ꞌA₂ liaꞌ₂ i₂nio₄ dsa₂ i₂rë₂tson₄ quián₅ Diú₄
12
Le₂në₅ bá₄ jaun₂ rɨnꞌ₅₄ jniog₄, të₂le₃ quianꞌ₅₄ a₂ŋéi₂ dsɨ́₅ Diú₄, mɨ₅ jniá₂ neꞌ₅₄ ꞌniaꞌ₂, co₂dsia₅ jɨnꞌ₄ ꞌniaꞌ₂ nɨ₁ŋɨꞌ₁ guiongꞌ₅₄, co₂ꞌnióꞌ₄ a₂rë₂jengꞌ₅₄ le₁jénꞌ₃ ne₄ Diú₄, a₂rë₂tsongꞌ₅₄, a₂ꞌŋio₂ dsɨ́₅ Diú₄, a₂dsi₂ten₅₄ jme₁tiꞌ₄ ne₅₄.
2 Tsá₃ i₁nioꞌ₄ ꞌniaꞌ₂ liaꞌ₂ conꞌ₂ lë́₅ i₂nio₄ dsa₂ mɨ₂güɨ́g₃ la₂. Të₂le₃ cuë₄ jmɨg₄ a₂jme₃tsɨ́n₃ Diú₄ ꞌa₂ liaꞌ₂ qui₂dsɨ₂jŋia₅ ꞌauꞌ₂ ꞌniaꞌ₂, ia₁jaun₂ bá₄ qui₃le₃ꞌmagꞌ₂ táng₃ ꞌauꞌ₂, ia₁jaun₂ lé₂ le₃caunꞌ₅₄ ꞌniaꞌ₂ ꞌí₁ ꞌa₂ liaꞌ₂ lë́₅ a₂ꞌŋio₂ dsɨ́₅ Diú₄, a₂dse₃, a₂të₅ dsɨ́₅, a₂rë₂ꞌŋia₅ në́₃.
3 Ia₁ o₄quióꞌ₄ a₂ꞌua₁ dsɨ́₅ Diú₄ a₂ma₂dsia₃ gu₃ jniá₂, juɨ́g₂ jniá₂ le₂janꞌ₂ le₂janꞌ₂ ꞌniaꞌ₂: tsá₃ lë₁juɨ₁qui₂dsi₂jŋia₅ ꞌauꞌ₂ a₂lɨ́ngꞌ₅ dsengꞌ₅₄ ŋag₅₄ guë́₄ conꞌ₂ ca₂tɨ́nꞌ₂ ꞌniaꞌ₂ dsɨ₃jŋia₅ ꞌauꞌ₂; të₂le₃ juɨ₁qui₂dsi₃jiog₅ bá₄ ꞌauꞌ₂ a₂ꞌen₅₄ ꞌauꞌ₂ ꞌniaꞌ₂, ꞌa₂ conꞌ₂ tí₅ ma₂ca₂rë₃ꞌénꞌ₂ ꞌniaꞌ₂ a₂ma₂cuë₃ Diú₄.
4 Ia₁ le₂në₅ juɨ₁liaꞌ₂ lë́₅ caun₂ nɨ₁ŋɨ₁ jniog₄ le₂jau₂ le₂jau₂, ꞌlióng₂ a₂chei₂ le₂caun₂ le₂caun₂ a₂tén₅ quióꞌ₅, tsá₃ ca₂ne₅₄ ta₁ jme₂ti₃,
5 le₂në₅ bá₄ jniog₄ ján₃, juɨ₁ꞌa₂ guë́₃ la₂ juag₅ jniog₄, caun₂ bá₄ nɨ₁ŋɨ₁₂ jniog₄ lág₅ le₃quióꞌ₅ Cristo, téi₅ jniog₄ le₂jau₂ le₂jau₂ quianꞌ₅₄ rɨnꞌ₅₄.
6 Jma₃quén₅ bá₄ qui₂ꞌau₂ jniog₄ bí₂, liaꞌ₂ conꞌ₂ lë́₅ ma₂cuë₃ Diú₄ a₂ꞌua₁ dsɨ́₅. Jaun₂ ca₂tág₂ jniog₄ jmoꞌ₄ ta₁ juɨ₅bí₂ a₂ma₂cuë₃. Juɨ₁liaꞌ₂ dsa₂ i₂ma₂cuë₃ Diú₄ bí₂ a₂tɨin₂ a₂ꞌë́₂ jág₁ dse₃ a₂gue₂₃ quióꞌ₅ Diú₄, juɨ₁ꞌë₅₄ bá₄ jág₁ ꞌa₂ conꞌ₂ tí₅ a₂ꞌéin₂;
7 juɨ₁liaꞌ₂ i₂ma₂cuë́ꞌ₃ juɨ₅bí₂ jme₃ꞌo₅₄, juɨ₁jme₂ꞌo₅₄; juɨ₁liaꞌ₂ i₂ꞌio₅ bí₂ jme₃tag₂₃, juɨ₁jme₂tɨin₂₃ bá₄ dsa₂;
8 juɨ₁liaꞌ₂ i₂tɨn₂ jmo₃ liánꞌ₂ dsɨ́₅ i₂siánꞌ₂, ca₂tɨ́in₂ bá₄ jmo₃ le₂jaun₂; juɨ₁liaꞌ₂ i₂jmo₅ dsióg₁, juɨ₁cuë₁₂ a₂ꞌua₁ dsɨ́₅, on₃juaꞌ₅₄ rëꞌ₂ cha₂ a₂ꞌɨ́n₂ dsɨ́₅ ꞌŋiog₅; juɨ₁liaꞌ₂ i₂quian₅ ne₄ juɨ₅, juɨ₁jmo₁₂ bá₄ a₂dsen₅₄ dsɨ́₅; juɨ₁liaꞌ₂ i₂dsia₅ ŋéi₂ dsɨ́₅, juɨ₁jmo₁₂ bá₄ quianꞌ₅₄ o₂ꞌŋió₃ o₂jŋia₃ dsɨ́₅.
ꞌA₂ liaꞌ₂ ca₂tɨ́n₂ le₃chan₂ dsa₂ quián₅ Cristo
9 Juɨ₁le₂chanꞌ₂ ꞌniaꞌ₂ të₃dsónꞌ₂ bá₄ a₂ꞌnióꞌ₃ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂. Co₂dsia₅ jmo₄ ꞌniaꞌ₂ ꞌŋiagꞌ₅₄ co₂ŋeiꞌ₅₄ a₂ꞌlɨgꞌ₅₄; chanꞌ₂ bá₄ ꞌniaꞌ₂ tiá₂ juɨ₁liaꞌ₂ a₂dse₃.
10 Jme₁ꞌnióꞌ₄ ꞌniaꞌ₂ rɨ́ngꞌ₂ a₂ꞌŋio₂ ꞌauꞌ₂; jmo₄ ꞌniaꞌ₂ a₂dsen₅₄ guë́₄ rɨ́ngꞌ₂ le₂jangꞌ₂ le₂jangꞌ₂.a
11 Tsá₃ jmo₂ ꞌniaꞌ₂ juɨ́ngꞌ₅, ꞌag₃ caun₂-tɨn₃ ꞌauꞌ₂, të₂le₃ jme₁ti₁ ne₄ Te₁guiꞌ₅₄ ca₂liaꞌ₂ dsen₅₄ jme₂dsí₂ quiángꞌ₂.
12 Juɨ₁chanꞌ₂ ꞌniaꞌ₂ o₂jŋia₃ ꞌauꞌ₂, ia₁ ma₂lë́₅ bá₄ co₂jŋia₅₄ a₂ꞌɨ́n₂ ꞌauꞌ₂ ꞌniaꞌ₂. Jmo₄ ꞌniaꞌ₂ juɨnꞌ₂ ꞌauꞌ₂ jmɨg₄ jme₁chanꞌ₂ ꞌniaꞌ₂ o₂i₁ dsɨ₅. O₁nióꞌ₄ bá₄ ꞌniaꞌ₂ co₂tan₅₄ a₂chi₂lengꞌ₅₄ Diú₄.
13 Jme₁ꞌon₁ ꞌniaꞌ₂ dsa₂ ꞌén₂ rɨ́ngꞌ₂ chi₂juaꞌ₂ ꞌe₂ niog₅ cha₂ a₂ꞌnióꞌ₅ quióꞌ₅. Dse₃ guen₅₄ ꞌniaꞌ₂ juɨ₁liaꞌ₂ ꞌein₂ niog₅ qui₂dsɨ₂jag₅₄ ꞌniaꞌ₂.
14 Jme₁guꞌ₅₄ bá₄ ꞌniaꞌ₂ juɨ₁liaꞌ₂ i₂jmógꞌ₂. Juaꞌ₅₄ bá₄ ꞌniaꞌ₂ jág₁ dse₃ on₃juaꞌ₅₄ jág₁ uɨg₅.
15 Jmo₄ ꞌniaꞌ₂ ꞌioꞌ₂ quianꞌ₅₄ juɨ₁liaꞌ₂ i₂jmo₅ ꞌioꞌ₂; ján₃ guëꞌ₂ quɨꞌ₂-ꞌo₄ ꞌniaꞌ₂ quianꞌ₅₄ i₂ꞌo₅.
16 Juɨ₁le₂chanꞌ₂ bá₄ ꞌniaꞌ₂ a₂jengꞌ₂ le₂jangꞌ₂ le₂jangꞌ₂. Tsá₃ jmo₂ ꞌniaꞌ₂ róngꞌ₂, co₂rɨnꞌ₂ bá₄ ꞌniaꞌ₂ jmo₄ quiangꞌ₅₄ dsa₂ te₂ŋé₂. Tsá₃ lë₁jmo₂ ꞌniaꞌ₂ juaꞌ₅₄ a₂ŋɨ́₄ lë₃ cuɨngꞌ₂.
17 Tsá₃ jeinꞌ₅₄ ꞌniaꞌ₂ ꞌlɨgꞌ₅₄ quianꞌ₅₄ a₂ꞌlɨgꞌ₅₄. Quenꞌ₂ ꞌniaꞌ₂ bí₂ jmóꞌ₂ conꞌ₂ dsi₂ten₅₄ ja₁të₃ ne₄ ca₂le₃jɨ́n₃.
18 Jmo₄ ꞌniaꞌ₂ bí₂, ꞌa₂ conꞌ₂ ca₂tɨ́ngꞌ₂, ꞌa₂ conꞌ₂ ja₁quɨꞌ₅₄ ꞌniaꞌ₂ jmɨg₄, ꞌnauꞌ₅₄ ꞌniaꞌ₂ juɨ₅ ja₁ꞌag₃ tei₄ quianꞌ₅₄ ca₂le₃jɨ́n₃.
19 Rɨnꞌ₅₄ jniog₄, tsá₃ lë₁jenꞌ₅₄ ꞌniaꞌ₂ guiongꞌ₅₄ juɨ₁liaꞌ₂ quióꞌ₅ i₂jmógꞌ₂, të₂le₃ dsia₄ ꞌniaꞌ₂ o₄gú₃ Diú₄ a₂jaun₂. Ia₁ ma₂rë₂ton₅ ne₄ Si₂: “Jniá₂ bá₄ ca₂tɨ́ng₂ jeinꞌ₅₄ uɨg₅; jniá₂ bá₄ quɨ́₄, juáꞌ₂ Te₁guiꞌ₅₄.”b
20 La₁: “Chi₂juaꞌ₂ i₁cónꞌ₅ juɨ₁liaꞌ₂ dsa₂ i₂ꞌiog₅₄, cuëꞌ₅₄ bá₄ ꞌniaꞌ₂ a₂guë́ꞌ₃. Chi₂juaꞌ₂ ŋɨ₂₃ rë₂quein₂ dsɨ́₅, cuëꞌ₅₄ a₂ꞌɨ́nꞌ₂. Ia₁ jë₁ma₂ca₂jmoꞌ₅₄ le₂në₅, jmaiꞌ₅₄ tsáu₃ dséi₂ dsɨ₂ne₅₄,c jéinꞌ₄ o₂guíꞌ₃.”d
21 Tsá₃ cuɨ́n₅ jmɨg₄ juaꞌ₅₄ a₂jo₃ a₂ꞌlɨgꞌ₅₄; të₂le₃ quenꞌ₂ bí₂, tión₃ ꞌuë₃ a₂ꞌlɨgꞌ₅₄ të₂le₃ quianꞌ₅₄ a₂dse₃.