Dsa₂ Israel i₂tɨ́nꞌ₄
11
Jaun₂ në́₃ ŋag₄ jniá₂, ¿O₃ bá₄ ma₂chenꞌ₃ cau₅ Diú₄ dsa₂ juɨg₂ Israel quiáin₅? ¡On₃juaꞌ₅₄ le₂jaun₂! Ia₁ ꞌŋió₃ bá₄ jniá₂ lɨ́ng₅ jan₂ dsa₂ israelita*, jan₂ chiꞌ₂ dsio₄ Abraham, jan₂ tsɨ₁jon₂ Benjamín.
2 Ca₂le₂jŋiá₅ ma₂lɨ́gꞌ₂ lɨn₃ bá₄ ca₂quiónꞌ₂ Diú₄ dsa₂ juɨg₂ quiáin₅; jaun₂ rë₂në́₃ në́₃ tsá₃ juaꞌ₅₄ ma₂ca₂téi₂. ¿Tsa₁ ŋiꞌ₅₄ ꞌniaꞌ₂ ꞌa₂ liaꞌ₂ juáꞌ₂ ne₄ Si₂ ja₁ꞌɨin₂₃ Elías, ꞌa₂ liaꞌ₂ ca₂chi₃léinꞌ₂ Diú₄ a₂ca₂ꞌnɨi₃ dsa₂ Israel? Ca₂juáꞌ₂:
3 “Te₁guiꞌ₅₄, ma₂ca₂jme₃dsian₅ bá₄ dsa₂, dsa₂ i₂jme₁ꞌë́₂ jág₁ quiángꞌ₂, ma₂qui₂ma₂ꞌéin₂ ne₄chei₂ quiángꞌ₂ në́₃; jŋiaꞌ₅₄ liaꞌ₂ jan₂ jniá₂ bá₄ chang₂ guë́₄, qui₂co₂ꞌein₅ dsa₂, ján₃ guëꞌ₂ ꞌnio₃ jŋagꞌ₃.”a
4 Jaun₂, ¿ꞌE₂ jág₁ ca₂jéinꞌ₃ Diú₄? “Ma₂ca₂tsón₃ jniá₂ guion₃ mei₅ dsa₂ të₂le₃ quió₃ i₂tsá₃ ma₂qui₂ca₂jónꞌ₂ mɨ₂jne₄ ne₄ Baꞌal.”b
5 Jaun₂ le₂në₅ bá₄ ján₃ rë₂tsón₂ ca₂dsion₄ dsa₂ ꞌéi₂ rë₂në́₃, jaun₂ Diú₄ në́₃ të₂le₃ ia₁ a₂ꞌua₁ dsɨ́₅ ma₂quióinꞌ₂ ꞌéi₂.
6 Chi₂juaꞌ₂ të₂le₃ ia₁ a₂ꞌua₁ dsɨ́₅ Diú₄, on₃juaꞌ₅₄ jaun₂ ia₁ a₂jmo₅ dsa₂ ꞌe₂ jmo₂₃. Ia₁ juaꞌ₅₄ meiꞌ₂ guë́₃ le₂në₅ në́₃, tsá₃ le₃juaꞌ₅₄ juaꞌ₅₄ a₂ꞌua₁ dsɨ́₅ Diú₄.
7 ¿ꞌE₂ jaun₂ në́₃? Tsá₃ ca₂tióꞌ₃ dsa₂ juɨg₂ Israel dsioꞌ₂ a₂jme₁ꞌnoꞌ₂, la₁ dsa₂ i₂ca₂quiónꞌ₂ Diú₄ ꞌŋiog₅ bá₄ ca₂dsáuꞌ₂. I₂siánꞌ₂ guëꞌ₂ qui₂ca₂rë₃ꞌuáꞌ₃ dsɨ́₅,
8 juɨ₁liaꞌ₂ juáꞌ₂ ne₄ Si₂:
Ca₂jmo₃ Diú₄ a₂le₃tɨn₄ dsa₂ ꞌéi₂ le₃quióꞌ₅ jme₂dsí₂;
ca₂cuë₃ mɨ₂ne₅₄ a₂tsá₃ jniá₂,
ca₂cuë₃ rë₂gua₅₄ a₂tsá₃ nag₅,
le₂jŋió₄ jmɨg₄ në₃.c
9 Ján₃ bá₄ ca₂juáꞌ₂ David:
Ca₂le₃jë́₃ a₂i₂tsón₃ jme₁cha₂ quióꞌ₅
juɨ₁le₅₄ co₂ꞌnióꞌ₄ tsɨ₁liá₂ o₃ ꞌmá₅ ꞌe₂,
ia₁jaun₂ qui₃niói₃, gue₃ ꞌliainꞌ₅₄.
10 Juɨ₁le₅₄ tsá₃ jnióꞌ₅ mɨ₂ne₅₄
juɨ₁guenꞌ₅₄ mɨ₂caꞌ₅₄ co₂ŋeiꞌ₅₄.d
Dsɨ₂nau₂ i₂tɨ́nꞌ₄
11 Ŋag₅ jniá₂ në́₃, ¿O₃ bá₄ co₂ŋeiꞌ₅₄ conꞌ₂ ca₂sénꞌ₂ jaun₂ bá₄ dsa₂ judíos* jme₁ca₂niói₃? ¡On₃juaꞌ₅₄ le₂jaun₂! Të₂le₃ jen₅ bá₄, jme₁ca₂i₃lén₂ dsa₂ judíos ca₂i₁juɨin₅₄, ca₂jmo₃ Diú₄ a₂ca₂dsóꞌ₂ dsɨ₂nau₂ juɨ₅ ja₁tɨ́inꞌ₄, ia₁jaun₂ le₃dsíꞌ₅ ꞌéi₂.
12 La₁ chi₂juaꞌ₂ a₂ca₂i₁juɨn₅₄ ꞌéi₂ jaun₂, ca₂dsióg₃ të₂le₃ dse₃ bá₄ o₄quióꞌ₄ dsa₂ mɨ₂güɨ́g₃, ján₃ bá₄ chi₂juaꞌ₂ a₂ca₂i₃ꞌén₂ quióꞌ₅ ꞌéi₂, ca₂dsióg₃ a₂të₁dsɨ₅₄ quióꞌ₅ dsɨ₂nau₂, ¡ꞌe₂ guë́₄ dse₃ lé₂, jë₁ma₂ca₂rë₃ꞌŋia₅ táng₃ ꞌéi₂!
13 La₁ a₂juáꞌ₅ jniá₂ juɨ́g₂ ꞌniaꞌ₂ i₂lɨ́nꞌ₅ dsɨ₂nau₂: Ia₁ dsónꞌ₂ lɨ́n₅ jniá₂ jan₂ dsa₂ i₂chen₄* ja₁con₂ dsɨ₂nau₂, jmo₅ jniá₂ dsɨ₃ ꞌŋio₅ lɨn₃ dsen₅₄ ta₁ quió₃,
14 conꞌ₂ tsá₃ ŋó₅ në₁juaꞌ₂ ca₂rë₃dsíꞌ₅ dsa₂ go₃ jniá₂ ja₁conꞌ₂ ꞌniaꞌ₂, jaun₂ lé₂ lión₂ i₂lɨn₅₄ ꞌéi₂.
15 Chi₂juaꞌ₂ jme₁ca₂téi₂ Diú₄ quióꞌ₅ dsa₂ judíos, ca₂lɨ́ꞌ₃ dsa₂ mɨ₂güɨ́g₃ a₂ca₂ꞌág₂ caun₂ jág₁ quianꞌ₅₄ Diú₄, ¿ꞌe₂ bá₄ lé₂ jaun₂ në́₃ jë₁ma₂të́₂ rë₁guéiꞌ₂ Diú₄ quióꞌ₅ dsa₂ ꞌéi₂? Lé₂ co₂ꞌnióꞌ₄ ca₂gue₃ táng₃ jme₂dsí₂ dsa₂ i₂jme₁ma₂rë₂ꞌlɨn₄.
16 Chi₂juaꞌ₂ lë́₅ ꞌí₁ juɨ₁liaꞌ₂ i₁ŋíꞌ₄ a₂le₂ꞌuɨg₅₄ a₂jénꞌ₅ dsa₂ ne₄ Diú₄, ján₃ bá₄ le₂jaun₂ lë́₅ ꞌí₁ ta₁jë₂ ti₁can₁; ján₃ bá₄ chi₂juaꞌ₂ lë́₅ ꞌí₁ le₃quióꞌ₅ Diú₄ juɨ₁liaꞌ₂ jmú₄ caun₂ nɨ₁ꞌma₂, ján₃ bá₄ le₂jaun₂ lë́₅ ꞌí₁ nɨ₁guꞌ₂ neiꞌ₅₄ nɨ₁ꞌma₂ ján₃.
17 Dsa₂ judíos i₂ca₂téi₂ Diú₄ ꞌéi₂ në́₃, lɨ́in₅ co₂ꞌnióꞌ₄ guꞌ₂-neiꞌ₅₄ nɨ₁ꞌma₂ olivo a₂cheinꞌ₅₄, a₂ca₂uɨ́nꞌ₂ a₂lɨn₅₄ nɨ₁guꞌ₂; në₃ në́₃, chi₂juaꞌ₂ lɨ́nꞌ₅ ꞌne₂ jan₂ dsɨ₂nau₂ i₂ma₂rë₂ꞌlión₅, në₂jag₄ bá₄ caun₂ nɨ₁guꞌ₂ olivo a₂cha₂ ja₁nau₂, ma₂qui₂ma₂guiónꞌ₃ jmɨꞌ₅₄ nɨ₁ꞌma₂ olivo a₂qui₂jme₂tan₅₄ nɨ₁guꞌ₂,
18 tsá₃ jmóꞌ₂ tángꞌ₅ ja₁con₂ nɨ₁guꞌ₂ siáꞌ₂. Chi₂juaꞌ₂ le₂jaun₂ jmóꞌ₂, dsá₂ ꞌauꞌ₂ jmo₄, on₃juaꞌ₅₄ ꞌne₂ jme₂tangꞌ₅₄ jmú₄; jmú₄ bá₄ jme₂tau₅₄ ꞌne₂.
19 Meiꞌ₂ tsá₃ le₃ŋagꞌ₅₄ ꞌne₂, jaun₂ në́₃: “Ján₅, dsau₅ bá₄ në₅. La₁ia₁ a₂ca₂uɨ́nꞌ₂ nɨ₁guꞌ₂ jaun₂ ia₁jaun₂ lén₂ jniá₂ jan₂ i₂rë₂ꞌlión₅ ja₁jme₁ca₂tɨ́in₂.”
20 Dse₃, la₁ ca₂uɨ́nꞌ₂ nɨ₁guꞌ₂ jaun₂ ꞌuɨg₅₄ ia₁ a₂tsá₃ jme₁ꞌéin₂, la₁ ꞌne₂ guëꞌ₂ në́₃ të₂ꞌŋiágꞌ₄ ꞌuɨg₅₄ ia₁ a₂ꞌéngꞌ₂. Le₂në₅ bá₄ jaun₂, juɨ₁le₁ganꞌ₃ ꞌniaꞌ₂, tsá₃ lë₁jmo₂ róngꞌ₂.
21 Ia₁ chi₂juaꞌ₂ tsá₃ ca₂dsia₃ Diú₄ ŋéi₂ dsɨ́₅ ja₁con₂ nɨ₁guꞌ₂ quióꞌ₅ të₃dsónꞌ₂ nɨ₁ꞌma₂ jaun₂, ján₃ bá₄ le₂jaun₂ tsá₃ dsia₃ ŋéi₂ dsɨ́₅ ja₁conꞌ₂ ꞌne₂ ján₃.
22 Jag₄ jaun₂, ꞌe₂ guë́₄ dsen₃ Diú₄, la₁ ján₃ bá₄ rë₂ qui₂dsɨ₂₃ ꞌéiꞌ₃. Ia₁ ma₂qui₂dsɨ₂₃ ꞌéiꞌ₃ ja₁con₂ i₂ma₂ca₂sénꞌ₂, la₁ dsein₃ bá₄ quianꞌ₅₄ ꞌne₂, chi₂juaꞌ₂ caun₂ náuꞌ₁ tiá₂ juɨ₅ ja₁ꞌua₁ dsɨ́₅ Diú₄. Ia₁ në₁juaꞌ₂ tsá₃ le₂jaun₂, ján₃ bá₄ quéinꞌ₂ ꞌne₂.
23 Juɨ₁liaꞌ₂ ꞌéi₂ në́₃, në₁juaꞌ₂ ca₂rë₃ꞌéin₂ táng₃, lé₂ bá₄ le₃ꞌlióin₃. Ia₁ ꞌio₅ Diú₄ bí₂ chóngꞌ₃ táng₃.
24 Ia₁ në₁juaꞌ₂ ꞌne₂, jan₂ dsɨ₂nau₂, co₂ꞌnióꞌ₄ caun₂ nɨ₁guꞌ₂ nau₂, ca₂quengꞌ₃ dse₃ quianꞌ₅₄ nɨ₁ꞌma₂ olivo a₂cheinꞌ₅₄, o₁jŋiaꞌ₅₄ lɨ́ngꞌ₅ nɨ₁guꞌ₂ nɨ₁ꞌma₂ siáꞌ₂, ¡ꞌe₂ guë́₄ tson₂ lé₂ le₃quenꞌ₃ ꞌéi₂, i₂lɨ́n₅ co₂ꞌnióꞌ₄ nɨ₁guꞌ₂ a₂caun₂ ne₅₄ quianꞌ₅₄ nɨ₁ꞌma₂ olivo jaun₂!
A₂tɨ́nꞌ₄ dsa₂ juɨg₂ Israel
25 Rɨnꞌ₅₄ jniog₄, tsá₃ ꞌnio₃ jniá₂ juaꞌ₅₄ tsá₃ ŋiꞌ₅₄ ꞌniaꞌ₂ jág₁ a₂jme₁rë₂ꞌma₄ la₂, conꞌ₂ tsá₃ ŋó₅ në₁juaꞌ₂ ca₂jmoꞌ₅₄ ꞌniaꞌ₂ róngꞌ₂ quianꞌ₅₄ a₂ŋɨ́ꞌ₂ ꞌauꞌ₂ ꞌniaꞌ₂ guiongꞌ₅₄. Juɨ₁liaꞌ₂ ma₂jmo₃ i₂lɨn₅₄ dsa₂ juɨg₂ Israel, ca₂rë₃ꞌuáꞌ₃ dsɨ́₅, ca₂liaꞌ₂ ca₂rë₃ꞌŋia₅ dsɨ₂nau₂ i₂conꞌ₂ ca₂tɨ́n₂ tónꞌ₃.
26 Jaun₂ guë́₄ lión₂ ca₂le₃jɨ́n₃ dsa₂ juɨg₂ Israel, ia₁ juáꞌ₂ ne₄ Si₂:
O₃ꞌɨn₅ dsa₂ i₂lió₂ juɨg₂ Sión,e
co₂dsia₅ jŋiáꞌ₂ a₂tsá₃ dse₃ jmo₅ tsɨ₁jon₂ Jacob.
27 Jaun₂ a₂la₂ bá₄ jág₁ quió₃ jmo₅₄ quiangꞌ₅₄ dsa₂ ꞌéi₂:
jë₁ma₂të́₂ rë₁ꞌéng₄ dsáu₁.f
28 Juɨ₁liaꞌ₂ të₂le₃ quianꞌ₅₄ jág₁ dse₃ a₂lión₂ dsa₂, lɨ́in₅ co₂ꞌnióꞌ₄ dsa₂ i₂ꞌŋia₅₄ Diú₄, o₄quiánꞌ₂ ꞌniaꞌ₂; la₁ liaꞌ₂ ma₂ꞌnio₃ jaun₂ bá₄ Diú₄ quióꞌ₅ dsa₂ ꞌéi₂, ia₁ a₂ca₂quióinꞌ₂ dsa₂ canꞌ₅₄ quiáin₅ ma₂lɨ́gꞌ₂.
29 Ia₁ tsá₃ dsɨ₂quénꞌ₅ dsɨ́₅ Diú₄ juɨ₁liaꞌ₂ a₂cuë₂₃, on₃ guëꞌ₂ juɨ₁liaꞌ₂ a₂të́₂.
30 Juɨ₁liaꞌ₂ ꞌniaꞌ₂ në́₃, i₂tsá₃ jme₁neꞌ₅₄ ja₁con₂ Diú₄ le₂jŋiá₅, ma₂ca₂tɨ́nꞌ₂ ꞌniaꞌ₂ a₂ŋéi₂ dsɨ́₅ Diú₄ rë₂në́₃, ꞌuɨg₅₄ ia₁ a₂tsá₃ neꞌ₅₄ dsa₂ ꞌéi₂,
31 ján₃ bá₄ le₂në₅ tsá₃ neꞌ₅₄ dsa₂ ꞌéi₂ rë₂në́₃, ia₁jaun₂ të₂le₃ quianꞌ₅₄ a₂ŋéi₂ dsɨ́₅ Diú₄ a₂ca₂tɨ́nꞌ₂ ꞌniaꞌ₂, tɨin₅₄ ján₃ a₂ŋéi₂ dsɨ́₅ Diú₄.
32 Ia₁ Diú₄ në́₃ co₂rë₂ bá₄ ꞌɨin₃ dsa₂ a₂tsá₃ neꞌ₅₄ dsa₂ le₂jain₂ le₂jain₂, ia₁jaun₂ co₂dsia₅ bá₄ dsia₃ ŋéi₂ dsɨ́₅ ja₁con₂ ca₂le₃jɨ́n₃.
33 ¡ꞌE₂ guë́₄ ꞌŋio₅ ꞌei₄ lë́₅ ca₂le₃jë́₃ a₂jláꞌ₁ cha₂ quióꞌ₅ Diú₄,
ca₂le₃jë́₃ a₂ŋɨ́ꞌ₂ dsɨ́₅, a₂ŋi₅ në́₃!
Ca₂liaꞌ₂ tsá₃ lé₂ le₃quiong₅₄ ꞌí₁ a₂niog₅ dsɨ́₅,
on₃ guëꞌ₂ lé₂ le₃ŋágꞌ₂ dsɨ₅ juɨ₅ quióꞌ₅.
34 “¿ꞌEin₂ bá₄ cuɨ́ꞌ₅ ꞌe₂ dsɨ₂jiog₅ dsɨ́₅ Te₁guiꞌ₅₄,
o₃ ꞌein₂ i₂ma₂tióꞌ₃ cuë₃ jág₁ dse₃ cuë́ꞌ₃ ꞌéi₂?”g
35 “¿ꞌEin₂ bá₄ ca₂cuë₃ ꞌe₂ ca₂cuë́ꞌ₃ ꞌéi₂ le₂ꞌuɨg₅₄
ia₁jaun₂ jéinꞌ₃ quí₃ quióꞌ₅?”h
36 Ia₁ ca₂le₃jë́₃ a₂niog₅ cha₂, ca₂lë₃
ja₁con₂ ꞌéi₂, të₂le₃ quianꞌ₅₄ ꞌéi₂, o₄quióꞌ₄ ꞌéi₂ në́₃.
¡Juɨ₁jme₂juagꞌ₂ bá₄ dsa₂ co₂tan₅₄! A₂méi₃*.