10
Rɨnꞌ₅₄ jniog₄, a₂ꞌɨ́n₅ dsɨ₃ ꞌŋio₅ lɨn₃, a₂chi₂lengꞌ₅₄ Diú₄ o₄quióꞌ₄ dsa₂ israelitas*, ia₁jaun₂ tɨ́inꞌ₄ bá₄.
2 Ia₁ jángꞌ₅ bá₄ jniá₂ jág₁ dsau₅ ja₁coin₂, a₂dsen₅₄ dsɨ́₅ le₃quióꞌ₅ Diú₄, la₁ia₁ on₃juaꞌ₅₄ jaun₂ ŋɨ́ꞌ₂ dsɨ́₅.
3 ꞌUɨg₅₄ ia₁ a₂tsá₃ ca₂tónꞌ₃ juɨ₅ ꞌa₂ liaꞌ₂ lë́₅ jaun₂ a₂guéiꞌ₂ Diú₄, jaun₂ qui₂ꞌnoꞌ₂ juɨ₅ quióꞌ₅ guioin₅₄ bá₄, tsá₃ ca₂jme₃góꞌ₃ juɨ₅ a₂ca₂cuë₃ Diú₄.
4 Ia₁ ca₂jme₃ꞌŋia₅ I₂rë₂ꞌɨ́n₁* quián₅ Diú₄ ꞌÉiꞌ₃, ia₁jaun₂ guéiꞌ₂ Diú₄ chi₂juaꞌ₂ ꞌein₂ i₂ꞌén₂, në₂jag₄ bá₄ a₂ma₂can₃ caun₂ juɨ₅ co₂dsau₅.
5 Ia₁ juɨ₁liaꞌ₂ a₂guéiꞌ₂ Diú₄ quióꞌ₅ dsa₂ ia₁ a₂ca₂jme₃ti₃ ꞌÉiꞌ₃, juáꞌ₂ Moisés ne₄ Si₂: “Në₁juaꞌ₂ ca₂can₃ dsa₂ caun₂ juɨ₅ co₂dsau₅ liaꞌ₂ conꞌ₂ lë́₅ chi₂quióng₂ jmɨg₄ Si₂ ꞌÉiꞌ₃, të₂le₃ quianꞌ₅₄ ꞌÉiꞌ₃ jaun₂ le₃chain₂.”a
6 La₁ juɨ₁liaꞌ₂ juɨ₅ co₂dsau₅ a₂já₅ ꞌuɨg₅₄ ia₁ a₂ꞌén₂ dsa₂, juáꞌ₂ Si₂ le₂la₂: “Tsá₃ juaꞌ₅₄ ꞌne₂ të₂le₃ juɨ₅ ꞌauꞌ₂: ¿ꞌEin₂ bá₄ lé₂ le₃uɨ́g₂ gueiꞌ₅₄ i₂juɨ́g₃?b ―co₂ꞌnióꞌ₄ le₃juaꞌ₅₄, ia₁jaun₂ sióin₂ I₂rë₂ꞌɨ́n₁* quián₅ Diú₄ ja₁con₂ jniog₄―;
7 on₃ guëꞌ₂ juaꞌ₅₄ ꞌne₂ ján₃: “¿ꞌEin₂ bá₄ lé₂ le₃sión₃ ca₂të₂ ja₁ca₂jein₃ chi₁dsio₅₄?”c ―co₂ꞌnióꞌ₄ le₃juaꞌ₅₄, ia₁jaun₂ chóinꞌ₂ táng₃ I₂rë₂ꞌɨ́n₁ quián₅ Diú₄, jɨn₄ ꞌlag₄.
8 ¿La₁ ꞌe₂ bá₄ guëꞌ₂ juáꞌ₂ Si₂?
Congꞌ₂ bá₄ ꞌniaꞌ₂ ꞌei₅ jág₁ la₂,
ꞌi₄ mɨ₂ꞌoꞌ₅₄, quianꞌ₅₄ juɨ₅ të₂ꞌauꞌ₂,d
co₂ꞌnióꞌ₄ le₃juaꞌ₅₄, jág₁ në₅ bá₄ lë́₅ jág₁ a₂ꞌén₂ dsa₂ a₂qui₂ꞌë́₅ jniaꞌ₅₄ dsa₂:
9 Chi₂juaꞌ₂ jmoꞌ₂ jág₁ quianꞌ₅₄ mɨ₂ꞌoꞌ₅₄ a₂lɨ́n₅ Jesús Te₁guiꞌ₅₄, ján₃ guëꞌ₂ chi₂juaꞌ₂ ꞌéngꞌ₂ juɨ₅ të₂ꞌauꞌ₂ a₂ca₂jme₃jeinꞌ₅₄ táng₃ Diú₄ a₂jme₁rë₂ꞌlɨin₅₄, tɨ́ngꞌ₄ bá₄.
10 Ia₁ të₂le₃ juɨ₅ të₂dsɨ́₅ bá₄ dsa₂ rë₂ꞌéin₂, ia₁jaun₂ guéiꞌ₂ Diú₄ në₂jag₄ bá₄ a₂ca₂jme₃ti₃; ján₃ guëꞌ₂ le₂jaun₂ të₂le₃ quianꞌ₅₄ ꞌo₄ dsa₂ jmo₂₃ jág₁ ia₁jaun₂ tɨ́inꞌ₄ bá₄.
11 Ne₄ Si₂ juáꞌ₂: “Juɨ₁liaꞌ₂ i₂ꞌén₂ le₃quióꞌ₅ ꞌéi₂, tsá₃ dsɨ₃ŋɨ́i₂ o₂guíꞌ₃.”e
12 Tsá₃ jma₃quén₅ jág₂ Diú₄ jɨ́in₂ dsa₂ judíos quianꞌ₅₄ guëꞌ₂ dsa₂ griegos; ia₁ ꞌŋiog₅ bá₄ ꞌéi₂ lɨ́n₅ Te₁guiꞌ₅₄ quián₅ ca₂le₃jɨ́n₃, ján₃ guëꞌ₂ jme₂guꞌ₅₄ cuë₂₃ ca₂liaꞌ₂ ꞌlióng₂ a₂dse₃ quióꞌ₅, cuë́ꞌ₅ ca₂le₃jɨ́n₃ i₂chi₂léiꞌ₂.
13 Ia₁ juáꞌ₂ le₂la₂: “Ca₂le₃jɨ́n₃ i₂chi₂líꞌ₂ ne₄ Te₁guiꞌ₅₄, tɨ́inꞌ₄ bá₄.”f
14 La₁, ¿ꞌA₂ bá₄ liaꞌ₂ lé₂ chi₃líꞌ₂ ne₄ jan₂ i₂tsá₃ ma₂ca₂rë₃ꞌéin₂ le₃quióꞌ₅? Ján₃ guëꞌ₂, ¿ꞌa₂ bá₄ liaꞌ₂ le₃ꞌén₂ dsa₂ le₃quióꞌ₅ në₁juaꞌ₂ tsá₃ ma₂nág₂ guëꞌ₂ ꞌag₅ dsa₂ ꞌɨin₂₃ ꞌéi₂? ¿ꞌA₂ guëꞌ₂ liaꞌ₂ lé₂ nag₃ dsa₂ në₁juaꞌ₂ tsá₃ ꞌein₂ chan₂ i₂ꞌë́₂ jág₁ dse₃?
15 ¿ꞌA₂ bá₄ liaꞌ₂ lé₂ dsi₁lén₂ i₂ꞌë́₂ jág₁ dse₃ në₁juaꞌ₂ tsá₃ ꞌein₂ chei₅? Juɨ₁liaꞌ₂ ma₂rë₂ton₅ ne₄ Si₂: “¡ꞌE₂ guë́₄ jláꞌ₁ gu₂-tag₄ i₂quian₅ jág₁ dse₃!”g
16 La₁ tsá₃ ca₂le₃jɨ́n₃ dsa₂ ca₂tónꞌ₃ juɨ₅ jág₁ dse₃. Juɨ₁liaꞌ₂ ca₂juáꞌ₂ táng₃ Isaías: “¿Te₁guiꞌ₅₄ ꞌein₂ bá₄ i₂ma₂ca₂rë₃ꞌén₂ jág₁ a₂ca₂ꞌë́₂ jniog₄?”h
17 Le₂në₅ bá₄ jaun₂, juɨ₁liaꞌ₂ a₂ꞌén₂ dsa₂, lë́₅ të₂le₃ quianꞌ₅₄ a₂nag₅ dsa₂; a₂nag₅ dsa₂ jaun₂, lë́₅ të₂le₃ quianꞌ₅₄ jág₁ quióꞌ₅ I₂rë₂ꞌɨ́n₁ quián₅ Diú₄.
18 La₁ ŋag₄ jniá₂, ¿O₃ bá₄ tsá₃ ca₂nág₂ dsa₂ jág₁ dse₃? ¡Ma₁ të₃dsónꞌ₂ bá₄ ca₂nág₂! Ia₁ juáꞌ₂ Si₂:
Ta₁caun₂ guaꞌ₅₄ ꞌuë₃ bá₄ ca₂dsia₃ dsa₂;
ca₂le₂con₂ quióng₄ mɨ₂güɨ́g₃ bá₄
ma₂ca₂i₃ꞌág₃ jág₁ quióꞌ₅.i
19 La₁ ŋag₄ táng₃ jniá₂, ¿O₃ bá₄ a₂tsá₃ ma₂ca₂rë₃líꞌ₄ ꞌe₂ dsa₂ juɨg₂ Israel? Ia₁ jë₁le₂ꞌuɨg₅₄, juáꞌ₂ Moisés:
Jmo₅₄ jniá₂ a₂lénꞌ₂ ꞌniaꞌ₂ dsa₂ i₂dsíꞌ₅
ja₁con₂ dsa₂ i₂tsá₃ juɨg₂ nación lɨ́n₅;
ján₃ bá₄ jmo₅₄ jniá₂ le₃ꞌneꞌ₂ ꞌniaꞌ₂
o₄quióꞌ₄ caun₂ juɨg₂ i₂tsá₃ ŋɨ́ꞌ₂ dsɨ́₅.j
20 Conꞌ₂ siáꞌ₂, tiá₂ dsɨ́₅ Isaías a₂juáꞌ₂, o₄quióꞌ₄ Diú₄:
Dsa₂ i₂tsá₃ jme₁ꞌnauꞌ₂ jniá₂,
ca₂dsáuꞌ₂ bá₄;
ca₂jme₁jnia₅ jniá₂
ja₁con₂ dsa₂ i₂tsá₃ jme₁ŋag₅ jniá₂.k
21 La₁ia₁ dsa₂ israelitas bá₄ jme₁tsɨ́ꞌ₅ Isaías, jme₁ca₂juáꞌ₂: “Të₁ne₁ jmɨg₄ bá₄ jme₁chénꞌ₄ jniá₂ chi₁jan₁₂ cu₃ ja₁con₂ juɨg₂ cang₄ mɨ₂dsi₄ i₂tsá₃ neꞌ₅₄.”l