Ma₂quiónꞌ₂ Diú₄ dsa₂ juɨg₂ Israel
9
Jág₁ tí₅ dsónꞌ₂ bá₄ juáꞌ₅ jniá₂ le₃quióꞌ₅ Cristo la₂, tsá₃ jme₂gau₅₄ jniá₂; të₂dsɨ₃ jniá₂ jiog₅ Jme₂dsí₂ Jŋió₅ juáꞌ₂ tság₅ jniá₂ a₂dsónꞌ₂ bá₄ dsau₅;
2 ꞌŋio₅ lɨn₃ chang₂ go₂ꞌi₃ quɨꞌ₂ dsɨ₃ co₂tan₅₄,
3 ia₁ ca₂të₂ ꞌŋió₃ jniá₂ jme₁ꞌnio₃ juaꞌ₅₄ dsɨ₃ꞌéng₁, rë₂ꞌna₄ jág₁ ja₁con₂ Cristo juaꞌ₅₄ meiꞌ₂ guë́₃ le₂jaun₂, o₄quióꞌ₄ rɨ́ngꞌ₃ dsa₂ go₃ jniá₂ le₃quióꞌ₅ nɨ₁ŋɨ́₅.
4 ꞌÉi₂ bá₄ i₂lɨ́n₅ dsa₂ tsɨ₁jon₂ Israel;a ꞌéi₂ bá₄ i₂lɨ́n₅ dsa₂ i₂ca₂guéiꞌ₂ Diú₄ a₂lɨ́in₅ chiꞌ₂-guein₂ quiáin₅; ꞌéi₂ bá₄ i₂ca₂të́₂ ne₄ a₂tág₅ co₂ꞌnéꞌ₅ quióꞌ₅ Diú₄; ꞌéi₂ bá₄ i₂ca₂lɨ́ꞌ₃ jág₁ quianꞌ₅₄ Diú₄; ꞌéi₂ bá₄ i₂ca₂gue₃ Si₂ ꞌÉiꞌ₃ ca₂cuë₃ Diú₄; ꞌéi₂ bá₄ i₂ca₂tɨ́n₂ jme₃ti₃ a₂qui₂jénꞌ₃ ne₄ Diú₄; ꞌéi₂ bá₄ i₂ca₂cuë₃ Diú₄ jág₁ quióꞌ₅ në́₃.
5 ꞌÉi₂ bá₄ i₂lɨ́n₅ tsɨ₁jon₂ dsa₂ canꞌ₅₄ quián₂ jniaꞌ₅₄ ma₂lɨ́gꞌ₂. Jaun₂ të₂le₃ quianꞌ₅₄ tsɨ₁jon₂ ꞌéi₂ në́₃, ca₂guan₃ I₂rë₂ꞌɨ́n₁* quián₅ Diú₄ chi₁dsáin₃, i₂lɨ́n₅ Diú₄ ne₄ quióꞌ₅ ca₂le₃jë́₃, i₂jme₃juɨnꞌ₂ dsa₂ co₂tan₅₄, a₂méi₃*.
6 On₃juaꞌ₅₄ rëꞌ₂ a₂tsá₃ ca₂rë₃ti₃ jág₁ a₂rë₂cuë́₄ quióꞌ₅ Diú₄, ia₁ tsá₃ ca₂le₃jɨ́n₃ dsa₂ tsɨ₁jon₂ Israel lɨ́in₅ të₃dsónꞌ₂ dsa₂ i₂tén₅ juɨg₂ Israel.
7 On₃ guëꞌ₂ lɨ́n₅ ca₂le₃jɨ́n₃ dsa₂ tsɨ₁jon₂ Abraham të₃dsónꞌ₂ chiꞌ₂-guein₂ quián₅ ꞌéi₂; ia₁ jme₁ca₂juáꞌ₂ Diú₄ ca₂tsɨ́ꞌ₃ Abraham: “Të₂le₃ quianꞌ₅₄ Isaac bá₄ ja₃lén₂ tsɨ₁jongꞌ₂”.b
8 Jág₁ në₅, jein₅ jág₁, on₃juaꞌ₅₄ chiꞌ₂ dsio₄ le₃quióꞌ₅ nɨ₁ŋɨ́₅ i₂lɨ́n₅ chiꞌ₂-guein₂ quián₅ Diú₄; tonꞌ₂ conꞌ₂ i₂lɨ́n₅ guein₂ i₂ca₂rë₃chán₃ liaꞌ₂ conꞌ₂ lë́₅ jág₁ quióꞌ₅ Diú₄ a₂jme₁ma₂cuë₃, jmáꞌ₃ i₂ꞌéi₂ bá₄ i₂jɨ́n₂ Diú₄ i₂lɨ́n₅ të₃dsónꞌ₂ tsɨ₁jon₂ Abraham.
9 Ia₁ jág₁ quióꞌ₅ Diú₄ a₂ca₂cuë́ꞌ₃ Abraham, a₂la₂ bá₄ jaun₂: “Jein₂ rë₂në́₃ ŋi₂ caun₂, guio₅₄ jniá₂, jaun₂ le₃chan₂ jan₂ guein₂ quián₅ Sara.”c
10 On₃juaꞌ₅₄ jmáꞌ₃ a₂jaun₂. Qui₂ca₂can₃ Rebeca guein₂ quianꞌ₅₄ jan₂ dsa₂ ŋeꞌ₂ i₂lɨ́n₅ Isaac jmei₂ jniaꞌ₅₄.
11 La₁ tsá₃ jme₁ma₂ca₂rë₃chán₃ guein₂ quián₅ i₁Béꞌ₄, on₃ guëꞌ₂ a₂ꞌlɨgꞌ₅₄ a₂dse₃ jme₁ma₂tɨin₂ jmo₃, jme₁ca₂jmo₃ Diú₄ jág₁, ia₁jaun₂ të₃ꞌŋiá₄ a₂ca₂tɨ́n₂ Diú₄ qui₃quióꞌ₂ liaꞌ₂ conꞌ₂ lë́₅ niog₅ dsɨ́₅;
12 on₃juaꞌ₅₄ ꞌuɨg₅₄ ia₁ a₂jme₂ti₃ dsa₂, të₂le₃ ꞌuɨg₅₄ ia₁ a₂të́₂ Diú₄; ca₂juáꞌ₂ Diú₄ ca₂tsɨ́ꞌ₃ i₁Béꞌ₄: “I₂lɨ́n₅ i₂juɨnꞌ₂ jme₃ti₃ ne₄ i₂meꞌ₂.”d
13 Juɨ₁liaꞌ₂ chi₁ton₅ ne₄ Si₂: “Ca₂quioꞌ₄ jniá₂ ca₂jme₁guꞌ₅₄ quióꞌ₅ Jacob, lë́₅ guë́₄ conꞌ₂ guë́₄ Esaú.”e
14 ¿ꞌE₂ bá₄ le₃juaꞌ₅₄ në́₃? ¿On₃ bá₄ tsá₃ rë₂ qui₂dsɨ₅ Diú₄ ꞌéiꞌ₃? ¡Dsónꞌ₂ on₃juaꞌ₅₄ le₂jaun₂!
15 Ia₁ ca₂tsɨ́ꞌ₃ Moisés:
Dsia₅₄ jniá₂ ŋéi₂ dsɨ₃
ja₁con₂ i₂ꞌnio₃ jniá₂ dsia₅₄ ŋéi₂ dsɨ₃ quiainꞌ₅₄;
ján₃ bá₄ jmo₅₄ jniá₂ ꞌua₁ dsɨ₃
ja₁con₂ i₂ꞌnio₃ jniá₂ jmo₅₄ ꞌua₁ dsɨ₃ quiainꞌ₅₄.f
16 Le₂në₅ bá₄ jaun₂, on₃juaꞌ₅₄ rëꞌ₂ ia₁ ꞌnio₃ jan₂ dsa₂, o₃ a₂quɨ́nꞌ₃ bí₂ ꞌe₂; tonꞌ₂ ia₁ a₂ŋéi₂ dsɨ́₅ Diú₄ bá₄.
17 Ia₁ chi₁ton₅ ne₄ Si₂ ꞌa₂ liaꞌ₂ ca₂juáꞌ₂ Diú₄ ca₂tsɨ́ꞌ₃ Faraón*:g “Ta₁ jaun₂ të₃dsónꞌ₂ bá₄ ca₂tságꞌ₂ jniá₂ a₂léngꞌ₂ rag₅₄, ia₁jaun₂ jme₁jnia₅ jniá₂ juɨ₅bí₂ quió₃ të₂le₃ quianꞌ₅₄ ꞌne₂, ia₁jaun₂ guë́₄ le₃ŋi₅ dsa₂ ta₁caun₂ guaꞌ₅₄ ꞌuë₃ ꞌa₂ liaꞌ₂ lɨ́n₅ jniá₂.”h
18 Jaun₂ lë₃, ca₂tɨ́n₂ Diú₄ dsia₃ ŋéi₂ dsɨ́₅ ja₁con₂ chi₂ꞌein₂ ꞌnio₃, tonꞌ₂ ján₃ guëꞌ₂ jme₃ꞌuaꞌ₂ dsɨ́₅ chi₂ꞌein₂ ꞌnio₃ jme₃ꞌuaꞌ₂ dsɨ́₅.
19 La₁ jaun₂, lé₂ juaꞌ₅₄ juɨgꞌ₅₄ jniá₂: “Chi₂juaꞌ₂ le₂në₅, ¿ꞌe₂ lë₃ cuë́ꞌ₅ Diú₄ dso₄ dsa₂, jaun₂ në́₃? Ia₁, ¿ꞌein₂ bá₄ quɨꞌ₅₄ jmɨg₄ jné₃ a₂niog₅ dsɨ́₅ Diú₄ jmo₃?”
20 ¡La₁ ꞌne₂ në́₃! ¿I₂ꞌein₂ bá₄ lɨ́nꞌ₅ ꞌne₂ dsa₂ mɨ₂güɨ́g₃, juaꞌ₅₄ a₂tsɨ́ngꞌ₄ quianꞌ₅₄ Diú₄? ¿O₃ bá₄ lé₂ le₃juáꞌ₂ juɨ₁liaꞌ₂ nɨ₁tɨꞌ₂ guaꞌ₅₄, tsɨ́ꞌ₃ i₂ca₂jmo₃: “¿ꞌE₂ lë₃ ca₂jmogꞌ₅₄ jniá₂ le₂la₂?”i
21 Juɨ₁liaꞌ₂ jan₂ të₅ i₂jmo₅ tɨꞌ₂: ¿Tsa₁ ca₂tɨ́in₂ ꞌuë́ꞌ₃ quianꞌ₅₄ ca₂bëꞌ₅₄ ti₁jein₂ caun₂ nɨ₁tɨꞌ₂ a₂jmóꞌ₂ dsa₂ ta₁ jmáꞌ₃ liaꞌ₂ a₂jláꞌ₁, caun₂ guëꞌ₂ a₂jmóꞌ₂ dsa₂ ta₁ liaꞌ₂ ꞌei₅ ne₅₄ cosa?j
22 ¿ꞌE₂ guëꞌ₂ lé₂ le₃juaꞌ₅₄ ꞌne₂ chi₂juaꞌ₂ ꞌnio₃ Diú₄ jme₃jnia₅ a₂ꞌnei₂, jme₃jnia₅ juɨ₅bí₂ quióꞌ₅ në́₃, la₁ ca₂jmo₃ tióꞌ₃ ca₂jme₃juɨinꞌ₃ dsɨ́₅ ꞌŋio₅ lɨn₃ quiainꞌ₅₄ dsa₂ i₂jme₁ca₂tɨ́n₂ gue₃ uɨg₅ i₂jme₁ꞌi₄ ꞌéiꞌ₃ dsɨ₃ꞌén₂?
23 ¿ꞌE₂ guëꞌ₂ chi₂juaꞌ₂ ca₂jmo₃ Diú₄ le₂jaun₂, ia₁jaun₂ qui₃le₃ŋi₅ dsa₂ a₂jláinꞌ₁ a₂ꞌuainꞌ₂, a₂jme₂jnia₂₃ a₂ŋéi₂ dsɨ́₅ ja₁con₂ dsa₂ i₂ca₂jmóiꞌ₂ co₂jŋia₅₄ të₃jŋiá₅, ia₁jaun₂ tɨin₅₄ jë₁tág₅ co₂ꞌnéꞌ₅ quióꞌ₅?
24 Jniog₄ bá₄ ꞌéi₂ i₂ca₂të́ꞌ₃ Diú₄, on₃juaꞌ₅₄ jmáꞌ₃ jë₄ quióꞌ₅ dsa₂ judíos; ján₃ bá₄ ca₂të́ꞌ₃ dsa₂ jë₄ quióꞌ₅ dsɨ₂nau₂.
25 Juɨ₁liaꞌ₂ juáꞌ₂ ne₄ si₂ quióꞌ₅ Oseas:
Dsa₂ i₂tsá₃ jme₁lɨ́n₄ dsa₂ juɨg₂ quiáng₃,
ca₂të́₃ dsa₂ juɨg₂ quiáng₃;
ján₃ guëꞌ₂ co₂ꞌnióꞌ₄ ꞌio₅₄ i₂tsá₃ jme₁ꞌnióg₃,
ca₂të́₃ bá₄ jniá₂ a₂niói₃ guë́₄ lɨn₃.k
26 Ján₃ bá₄ juáꞌ₂:
Co₂dsau₅ jaun₂ ja₁jme₁juáꞌ₂ dsa₂
a₂tsá₃ lɨ́nꞌ₅ ꞌniaꞌ₂ dsa₂ quiáng₃,
ja₁jaun₂ nágꞌ₁ ꞌniaꞌ₂ a₂të́₂ dsa₂
a₂lɨ́ngꞌ₅ chiꞌ₂-guein₂ quián₅ Diú₄ jénꞌ₃.l
27 La₁ të₂le₃ quióꞌ₅ dsa₂ israelitas në́₃, ca₂juáꞌ₂ Isaías a₂dsen₅₄ dsɨ́₅: “Juɨ₁ꞌa₂ guë́₃ la₂ juɨn₅ lɨn₃ tsɨ₁jon₂ dsa₂ juɨg₂ Israel téin₅ juɨ₁liaꞌ₂ tí₅ ti₁tsag₁ cha₂ cheiꞌ₅₄ jmɨ₁ŋíꞌ₄, la₁ meꞌ₂ co₂ŋɨ́₂ bá₄ dsa₂ i₂juɨn₅ ꞌéi₂ tɨ́nꞌ₄.
28 Ia₁ qui₃dsɨ₅ bá₄ Diú₄ ꞌéiꞌ₃ ne₄ guaꞌ₅₄ ꞌuë₃, jme₃ti₃ ca₂le₃jë́₃ co₂ŋeiꞌ₅₄.”m
29 Juɨ₁liaꞌ₂ ca₂juáꞌ₂ ꞌŋiog₅ Isaías le₂jŋiá₅:
Juaꞌ₅₄ meiꞌ₂ guë́₃ Te₁guiꞌ₅₄ Juɨg₅₄ ꞌLióg₂
tsá₃ ca₂dsiain₃ tsɨ₁jon₂ dsa₂ go₂ jniog₄,
le₂jaun₂ bá₄ jme₁dsi₁ŋág₂ jniog₄
juɨ₁liaꞌ₂ ca₂i₃ŋɨ́₂ dsa₂ juɨg₂ Sodoma quianꞌ₅₄ Gomorra*.n
Dsa₂ judíos quianꞌ₅₄ jág₁ dse₃
30 ¿ꞌE₂ le₃juaꞌ₅₄ jniog₄ jaun₂ në́₃? Juɨ₁liaꞌ₂ dsɨ₂nau₂ i₂tsá₃ jme₁ꞌnoꞌ₂ juɨ₅ ja₁guei₃ Diú₄ në₂jag₄ bá₄ a₂tsá₃ ꞌe₂ dso₄ rɨin₂, ꞌéi₂ bá₄ ma₂lɨ́ꞌ₂ juɨ₅ jaun₂, caun₂ juɨ₅ ja₁guéiꞌ₂ Diú₄ në₂jag₄ bá₄ a₂ca₂jme₃ti₃, të₂le₃ a₂jŋiaꞌ₅₄ conꞌ₂ a₂ꞌéin₂ bá₄.
31 La₁ dsa₂ juɨg₂ Israel guëꞌ₂ në́₃, i₂jme₁tionꞌ₅₄ ꞌÉiꞌ₃ ia₁jaun₂ jme₁guéiꞌ₂ Diú₄ ꞌuɨg₅₄ ia₁ a₂jme₂ti₃, lɨ́in₂, tsá₃ ca₂tióꞌ₃ jme₃ti₃ ꞌÉiꞌ₃ jaun₂.
32 ¿ꞌE₂ lë₃? Ia₁ jme₁ꞌnoꞌ₂ juɨ₅ ja₁guéiꞌ₂ Diú₄ jaun₂, on₃juaꞌ₅₄ të₂le₃ quianꞌ₅₄ a₂ꞌéin₂, të₂le₃ quianꞌ₅₄ a₂jme₁jmo₂₃ guioin₅₄ bá₄. ꞌUɨg₅₄ jaun₂ qui₂ca₂niói₃ bá₄ quianꞌ₅₄ “Nɨ₁cang₁ a₂nió₅ dsa₂.”
33 Juɨ₁liaꞌ₂ rë₂ton₅ ne₄ Si₂:
Ŋí₂ deꞌ₂ ꞌniaꞌ₂, tsɨn₅₄ jniá₂ jan₂ jë₄ juɨg₂ Sión*
i₂lén₂ në₂jag₄ nɨ₁cang₁ a₂qui₂nió₅ dsa₂,
ján₃ guëꞌ₂ co₂ꞌnióꞌ₄ nɨ₁ꞌlau₂
a₂jmo₃ dsɨ₂ganꞌ₅₄ dsa₂;
jaun₂ juɨ₁liaꞌ₂ i₂ꞌén₂ le₃quióꞌ₅ ꞌéi₂,
tsá₃ dsi₁ŋɨ́i₂ o₂guíꞌ₃.o