ꞌA₂ liaꞌ₂ chan₂ dsa₂ conꞌ₂ lë́₅ jiog₅ Jme₂dsí₂ quián₅ Diú₄
8
Në₃ në́₃ jaun₂, tsá₃ ma₂ꞌe₂ uɨg₅ ꞌë́₂ Diú₄ ne₄ quióꞌ₅ dsa₂ i₂ma₂ꞌei₅ caun₂ jág₁ quianꞌ₅₄ Cristo Jesús.a
2 Ia₁ bí₂ a₂ꞌio₅ ꞌéiꞌ₃ quióꞌ₅ Jme₂dsí₂ ma₂cuë₅ jmɨg₄ a₂chan₂ jniá₂ të₂le₃ quianꞌ₅₄ Cristo Jesús, ia₁ ma₂ca₂lió₂ jniá₂ ne₄ ꞌéiꞌ₃ quióꞌ₅ dso₄, quióꞌ₅ ꞌmú₃ në́₃.
3 Ia₁ ma₂ca₂jmo₃ Diú₄ a₂tsá₃ ca₂quɨꞌ₅₄ jmɨg₄ Si₂ ꞌÉiꞌ₃ jmo₃ ia₁ ca₂ꞌuán₂ bá₄ ꞌÉiꞌ₃ ꞌuɨg₅₄ dsáu₁ dsa₂ nɨ₁ŋɨ́₅: ca₂chein₃ ja₁ŋiꞌ₅₄ ꞌŋiog₅ o₄quióꞌ₄ dsáu₁ dsa₂; ca₂jmo₃ a₂lɨ́n₅ ꞌéi₂ dsa₂ chi₁dsáin₃ liaꞌ₂ lɨ́n₅ dsa₂ mɨ₂güɨ́g₃ i₂ꞌno₅ dso₄, jaun₂ le₂në₅ bá₄ ca₂ꞌë́₂ uɨg₅ ne₄ dso₄, ia₁ a₂lɨ́in₅ dsa₂ chi₁dsáin₃.
4 Le₂në₅ ca₂jmo₃ ia₁jaun₂ le₃ti₃ ꞌÉiꞌ₃ a₂con₂ ꞌí₁ conꞌ₂ dsɨ₂ten₅₄, ja₁con₂ jniog₄, i₂i₂nio₄, on₃juaꞌ₅₄ liaꞌ₂ conꞌ₂ lë́₅ jiog₅ nɨ₁ŋɨ₁₂, i₂i₂nio₄ liaꞌ₂ conꞌ₂ lë́₅ jiog₅ Jme₂dsí₂ bá₄.
5 Ia₁ dsa₂ i₂chan₂ liaꞌ₂ conꞌ₂ lë́₅ jiog₅ nɨ₁ŋɨ₁ qui₂dsɨ₂jiog₅ dsɨ́₅ juɨ₅ quióꞌ₅ nɨ₁ŋɨ́₅, la₁ juɨ₁liaꞌ₂ dsa₂ i₂ma₂chan₂ liaꞌ₂ conꞌ₂ lë́₅ jiog₅ Jme₂dsí₂ quián₅ Diú₄, qui₂dsɨ₂jiog₅ dsɨ́₅ a₂quióꞌ₅ jme₂dsí₂ bá₄.
6 Ia₁ juɨ₁liaꞌ₂ a₂qui₂dsɨ₂jiog₅ dsɨ́₅ dsa₂ juɨ₅ quióꞌ₅ nɨ₁ŋɨ́₅, a₂lë́₅ ꞌmú₃ bá₄ jaun₂; la₁ juɨ₁liaꞌ₂ a₂qui₂dsɨ₂jiog₅ dsɨ́₅ dsa₂ le₃quióꞌ₅ Jme₂dsí₂ quián₅ Diú₄, a₂jaun₂ bá₄ jmo₅ a₂le₃chan₂ dsa₂ dse₃, a₂ꞌag₃ tei₄ dsɨ́₅ dsa₂ në́₃.
7 Ia₁ juɨ₁liaꞌ₂ i₂qui₂dsɨ₂jiog₅ dsɨ́₅ juɨ₅ quióꞌ₅ nɨ₁ŋɨ́₅, i₂ꞌŋia₅₄ Diú₄ bá₄ i₂le₂ꞌéi₂, ia₁ tsá₃ ꞌnio₃, on₃ guëꞌ₂ lé₂ jme₃ti₃ ꞌÉiꞌ₃ quióꞌ₅ Diú₄.
8 ꞌUɨg₅₄ jaun₂ bá₄, juɨ₁liaꞌ₂ i₂i₂nio₄ liaꞌ₂ conꞌ₂ jiog₅ nɨ₁ŋɨ₁₂, tsá₃ lé₂ le₃jmo₃ a₂të₅ dsɨ́₅ Diú₄.
9 La₁ juɨ₁liaꞌ₂ ꞌniaꞌ₂ në́₃, tsá₃ ma₃i₂nioꞌ₅₄ ꞌniaꞌ₂ liaꞌ₂ conꞌ₂ jiog₅ nɨ₁ŋɨ́₅, ia₁ ma₂quianꞌ₅₄ bá₄ ꞌniaꞌ₂ Jme₂dsí₂, në₁juaꞌ₂ guá₅ Jme₂dsí₂ quián₅ Diú₄ të₂ꞌauꞌ₂ ꞌniaꞌ₂. Ia₁ juɨ₁liaꞌ₂ dsa₂ i₂tsá₃ ꞌen₅₄ Jme₂dsí₂ quián₅ Cristo të₂dsɨ́₅, tsá₃ lɨ́in₅ i₂quián₅ ꞌéi₂.
10 La₁ në₁juaꞌ₂ ꞌen₅₄ Cristo të₂ꞌauꞌ₂ ꞌniaꞌ₂, jaun₂ chan₂ bá₄ jme₂dsí₂ quiánꞌ₂ ꞌniaꞌ₂ ꞌuɨg₅₄ ia₁ a₂ma₂jɨ́n₂ Diú₄ ꞌniaꞌ₂ në₂jag₄ bá₄ a₂ma₂jme₂tíꞌ₂ ꞌniaꞌ₂, o₁jŋiaꞌ₅₄ ꞌio₅ ꞌmú₃ nɨ₁ŋɨꞌ₁ ꞌniaꞌ₂ o₄quióꞌ₄ dso₄.
11 Chi₂juaꞌ₂ chan₂ ja₁conꞌ₂ ꞌniaꞌ₂ Jme₂dsí₂ quián₅ i₂ca₂jme₃jenꞌ₅₄ Cristo Jesús ne₄ ꞌmú₃, ꞌŋiog₅ bá₄ ꞌéi₂ cuë₃ jme₂dsí₂ ꞌmɨ́₂ ne₄ nɨ₁ŋɨꞌ₁ ꞌniaꞌ₂ a₂ca₂tɨ́n₂ ꞌmú₃, të₂le₃ quianꞌ₅₄ Jme₂dsí₂ quián₅ Diú₄ i₂guá₅ të₂ꞌauꞌ₂ ꞌniaꞌ₂.
12 Le₂në₅ bá₄ jaun₂, ꞌniaꞌ₂ rɨnꞌ₅₄ jniog₄, cha₂ a₂ca₂tág₂ jniog₄ jmó₁, la₁ on₃juaꞌ₅₄ rëꞌ₂ ne₄ nɨ₁ŋɨ́₅ juaꞌ₅₄ a₂ꞌnióꞌ₅ le₃chong₂ jniog₄ ꞌio₄ táng₃ liaꞌ₂ conꞌ₂ lë́₅ mɨ₅ nɨ₁ŋɨ₁.
13 Ia₁ në₁juaꞌ₂ chanꞌ₂ ꞌniaꞌ₂ liaꞌ₂ conꞌ₂ mɨ₅ nɨ₁ŋɨꞌ₁, dsiánꞌ₃ bá₄ ꞌniaꞌ₂; la₁ në₁juaꞌ₂ të₂le₃ quianꞌ₅₄ Jme₂dsí₂, jŋɨ́ꞌ₅ ꞌniaꞌ₂ a₂jmo₅ nɨ₁ŋɨꞌ₁, jaun₂ le₃chanꞌ₂ bá₄ ꞌniaꞌ₂.
14 Ia₁ ca₂le₃jɨ́n₃ dsa₂ i₂i₂nio₄ liaꞌ₂ conꞌ₂ lë́₅ jiog₅ Jme₂dsí₂ quián₅ Diú₄, lɨ́in₅ chiꞌ₂-guein₂ quián₅ Diú₄.
15 Ia₁ Jme₂dsí₂ i₂ma₂guenꞌ₅₄ ꞌniaꞌ₂ on₃juaꞌ₅₄ i₂lɨ́n₅ jme₂dsí₂ i₂qui₃ꞌneiꞌ₂ táng₃ juaꞌ₅₄ a₂jmo₃ a₂le₃ganꞌ₃ táng₃ ꞌniaꞌ₂. Jme₂dsí₂ ꞌéi₂ bá₄ i₂ma₂guenꞌ₅₄ ꞌniaꞌ₂ i₂jmo₃ a₂lénꞌ₂ ꞌniaꞌ₂ chiꞌ₂-guein₂ quián₅ Diú₄. Jme₁juaꞌ₂ jniog₄ të₂le₃ quianꞌ₅₄ ꞌéi₂: “¡Abba!b ¡Tia₅₄ quiáng₃!”,
16 jaun₂ ꞌŋiog₅ bá₄ Jme₂dsí₂ në₅ jme₂quiainꞌ₅₄ jme₂dsí₂ quián₂ jniog₄, jángꞌ₅ jág₁ dsau₅ juáꞌ₂ a₂ma₂lág₅ jniog₄ chiꞌ₂-guein₂ quián₅ Diú₄.
17 Jaun₂ chi₂juaꞌ₂ lág₅ jniog₄ ja₁ŋiꞌ₅₄, ján₃ bá₄ ca₂tág₂ jniog₄ guéi₁ a₂dse₃ a₂ma₂lë́₅ jág₁ cuë₃ Diú₄ a₂cuë́ꞌ₃ chiꞌ₂-guein₂ quiáin₅; guéi₁ jniog₄ a₂në₅ co₂lë₅ quianꞌ₅₄ Cristo, chi₂juaꞌ₂ queinꞌ₅₄ jniog₄ quianꞌ₅₄ jmɨ₁uɨg₅ quióꞌ₅ ia₁jaun₂ queinꞌ₅₄ jniog₄ cang₂ jë₄ co₂tág₅ co₂ꞌnéꞌ₅ quióꞌ₅.
18 Ia₁ lɨ́n₂ jniá₂ on₃juaꞌ₅₄ cha₂ ꞌe₂ uɨg₅ a₂ŋag₄ jniog₄ rë₂në́₃ on₃juaꞌ₅₄ a₂quɨn₃ quianꞌ₅₄ a₂co₂tág₅ co₂ꞌnéꞌ₅ a₂jiá₃ a₂le₃jniá₂ ja₁con₂ jniog₄.
19 Ia₁ ma₂chi₁jŋia₅ chi₁quian₅₄ jmɨg₄ ca₂le₃jë́₃ a₂ca₂jmo₃ Diú₄, a₂ꞌɨ́n₅ dsɨ́₅ jmɨg₄ jë₁ma₂të́₂ rë₁le₃jniá₂ chiꞌ₂-guein₂ quián₅ Diú₄.
20 Ia₁ ca₂le₃jë́₃ a₂ca₂jmo₃ Diú₄ në́₃ ma₂qui₂le₁ꞌŋeiꞌ₅₄ ne₄ juɨ₅ ja₁tsá₃ ta₁ tí₄, on₃juaꞌ₅₄ ia₁ a₂ca₂rë₃ꞌŋió₃ dsɨ́₅ guioin₅₄, ia₁ le₂jaun₂ ꞌéiꞌ₃ ca₂jmo₃ Diú₄ ꞌŋiog₅ bá₄. A₂ꞌɨ́n₂ dsɨ́₅ ca₂le₃jë́₃ a₂në₅,
21 jmɨg₄ a₂lió₂ Diú₄ a₂qui₂chi₁ꞌŋeiꞌ₅₄ ne₄ juɨ₅ a₂siáꞌ₃ quióꞌ₅, ia₁jaun₂ jme₃quiainꞌ₅₄ chiꞌ₂-guein₂ quián₅ Diú₄ jë₄ co₂tág₅ co₂ꞌnéꞌ₅ juɨ₁liaꞌ₂ i₂ma₂qui₂ca₂lón₂.
22 Ia₁ ne₄ bá₄ jniog₄, ca₂liaꞌ₂ jŋió₄ jmɨg₄ në₃, ca₂le₃jë́₃ a₂ca₂jmo₃ Diú₄, qui₂ꞌŋióg₂ qui₂ꞌŋia₂₃ co₂lë₅ chain₂ uɨg₅.
23 On₃juaꞌ₅₄ jmáꞌ₃ a₂jaun₂; ján₃ bá₄ le₂jaun₂ jniog₄ në́₃, i₂ꞌio₅ a₂le₂ꞌuɨg₅₄ a₂ca₂ráu₃ quióꞌ₅ Jme₂dsí₂, qui₂ꞌŋióg₅ qui₂ꞌŋia₂ të₂dsɨ₅ jniog₄ të₁liaꞌ₂ chi₁jŋia₁ a₂ꞌɨ́n₅ dsɨ₅ jmɨg₄ jaun₂, a₂jme₃jnia₅ a₂lág₅ jniog₄ chiꞌ₂-guein₂ quián₅ Diú₄, jmɨg₄ a₂lióin₂ nɨ₁ŋɨ₁ jniog₄ la₂.
24 Ia₁ të₂le₃ quianꞌ₅₄ jmɨg₄ a₂ꞌɨ́n₂ dsɨ₅ jniog₄ në₅ bá₄ ca₂lió₂; la₁ në₁juaꞌ₂ ma₂jág₅ dsa₂ a₂ꞌɨ́n₂ dsɨ́₅, on₃juaꞌ₅₄ ma₃le₃ꞌɨ́n₂ dsɨ́₅ dsa₂ juɨ₁liaꞌ₂ a₂ma₂jág₅, tsá₃ ma₃tion₅₄ ꞌnióꞌ₅ ꞌɨ́n₂ dsɨ́₅.
25 La₁ në₁juaꞌ₂ ꞌɨ́n₂ dsɨ₅ jniog₄ caun₂ a₂tsá₃ ma₂ne₅₄, juɨnꞌ₂ bá₄ dsɨ₅ jŋia₄ a₂ꞌɨ́n₂ dsɨ₅.
26 Ján₃ bá₄ le₂në₅ jme₂ꞌo₅₄ Jme₂dsí₂ quián₅ Diú₄ a₂ꞌuan₅₄ dsɨ₅ jniog₄. Ia₁ tsá₃ tag₂ chi₂lenꞌ₄ Diú₄ ꞌa₂ conꞌ₂ dsi₂ten₅₄, la₁ ꞌŋiog₅ bá₄ Jme₂dsí₂ Jŋió₅ në́₃ mɨ₂₃ ne₄ Diú₄ o₄quián₂ jniog₄, ca₂le₃jë́₃ qui₂ꞌŋióg₂ qui₂ꞌŋia₃ on₃juaꞌ₅₄ a₂lé₂ le₃ꞌŋióg₃ jniog₄ quianꞌ₅₄ jág₁.
27 La₁ Diú₄ në́₃ i₂të₂li₅ të₂dsɨ́₅ dsa₂ mɨ₂güɨ́g₃, ꞌéi₂ bá₄ ŋi₅ ꞌe₂ ꞌnio₃ Jme₂dsí₂ ꞌéi₂ juáꞌ₂; ia₁ mɨ₅ Jme₂dsí₂ Jŋió₅ liaꞌ₂ conꞌ₂ lë́₅ ꞌŋio₂ dsɨ́₅ Diú₄, o₄quióꞌ₄ dsa₂ jŋió₅ quiáin₅.
Të₂le₃ ŋag₅₄ guë́₄ léi₂ jniog₄
28 Ne₄ bá₄ jniog₄, Diú₄ bá₄ i₂jmo₅ ne₄ ca₂le₃jë́₃, a₂dse₃ quióꞌ₅ dsa₂ i₂ꞌnio₃ Diú₄, quióꞌ₅ dsa₂ i₂ma₂të́ꞌ₃ Diú₄ liaꞌ₂ conꞌ₂ lë́₅ ma₂i₂jiog₅ dsɨ́₅ jmo₃.
29 Ia₁ i₂ma₂cuɨg₅ Diú₄ ca₂le₂jŋiá₅, ján₃ bá₄ ca₂cheiꞌ₃ ca₂ꞌɨin₃ ꞌéi₂ a₂léin₂ juɨ₁liaꞌ₂ lɨ́n₅ Ja₁ŋiꞌ₅₄, ia₁jaun₂ lén₂ Ja₁ŋiꞌ₅₄ i₂le₂ne₁ jë₄ quióꞌ₅ rɨinꞌ₅₄ i₂juɨn₅.
30 Dsa₂ i₂conꞌ₂ ma₂ca₂chenꞌ₃ Diú₄ liaꞌ₂ ca₂le₂jŋiá₅, ca₂të́ꞌ₃ ꞌéi₂ ján₃; dsa₂ i₂conꞌ₂ ca₂të́ꞌ₃ ꞌéi₂ në́₃, ján₃ bá₄ ca₂jág₂ në₂jag₄ a₂tsá₃ ꞌe₂ dso₄ rɨin₂; dsa₂ i₂conꞌ₂ ca₂jág₂ Diú₄ a₂tsá₃ ꞌe₂ dso₄ rɨin₂ në́₃, ján₃ bá₄ ca₂jme₃jláinꞌ₁.
31 ¿ꞌE₂ le₃juaꞌ₅₄ jniog₄ në́₃, quianꞌ₅₄ a₂në₅? Chi₂juaꞌ₂ chénꞌ₅ Diú₄ ne₄ jág₁ quián₂ jniog₄, ¿ꞌein₂ bá₄ quɨꞌ₅₄ jmɨg₄ jmógꞌ₂ jniog₄?
32 Tsá₃ ca₂jmo₃ Diú₄ juaꞌ₅₄ tsá₃ jme₁cuɨin₂₃ Ja₁ŋiꞌ₅₄ ꞌŋiog₅, të₂le₃ ca₂jángꞌ₂ bá₄, ca₂ŋó₃ ꞌéi₂ ne₄ ꞌmú₃ o₄quián₂ jniog₄; ¿ꞌa₂ bá₄ liaꞌ₂ juaꞌ₅₄ a₂tsá₃ cuë₃ jniog₄ ján₃ co₂dsia₅ quianꞌ₅₄ ꞌéi₂ ca₂le₃jë́₃?
33 ¿ꞌEin₂ bá₄ lé₂ le₃ꞌnɨ₃ dsa₂ i₂ma₂quiónꞌ₂ Diú₄? Tonꞌ₂ ꞌŋiog₅ bá₄ Diú₄ juáꞌ₂ a₂tsá₃ ꞌe₂ rɨin₂.
34 ¿ꞌEin₂ i₂lé₂ le₃ꞌë́₂ uɨg₅? Ia₁ Cristo Jesús bá₄ i₂ca₂jon₃; të₂le₃ lë́₅ bá₄ guë́₄, a₂ca₂jeinꞌ₅₄ táng₃, tonꞌ₂ ma₂guá₅ le₃gu₂ ne₁ quióꞌ₅ Diú₄, mɨ₂₃ o₄quián₂ jniog₄.
35 ¿ꞌEin₂ bá₄ i₂lé₂ ꞌliogꞌ₃ jniog₄ cau₅ ne₄ a₂ꞌnio₃ Cristo? ¿O₃ bá₄ quɨꞌ₅₄ jmɨg₄ juɨ₁liaꞌ₂ caun₂ jmɨ₁uɨg₅, o₃ juɨ₁liaꞌ₂ caun₂ o₂i₁ dsɨ₅, o₃ jmɨg₄ juɨ₁liaꞌ₂ a₂co₂ꞌein₅ dsa₂, o₃ jmɨg₄ juɨ₁liaꞌ₂ jme₁ꞌɨn₂ a₂que₅₄, o₃ ia₁ a₂tsá₃ cha₂ a₂quiꞌ₅₄ ꞌe₂ jniog₄, o₃ ꞌe₂ caun₂ a₂gau₂ cha₂, o₃ a₂go₃ jniog₄ a₂jme₃dsiog₅ dsa₂ quianꞌ₅₄ ŋi₁tág₂?
36 Juɨ₁liaꞌ₂ rë₂ton₅ ne₄ Si₂:
O₄quiánꞌ₂ ꞌne₂ bá₄ guei₂ jniaꞌ₅₄ ꞌmú₃ co₂tan₅₄.
Jmo₅ dsa₂ dsɨ́₅ a₂lág₅ jniaꞌ₅₄
në₂jag₄ bá₄ jáꞌ₂ chaꞌ₂
i₂ma₂le₁te₂ dsa₂ a₂jme₃dsiog₂₃.c
37 La₁ jë₄ ca₂le₃jë́₃ a₂në₅, tson₂ guë́₄ léi₂ tián₂ jniog₄ të₂le₃ quianꞌ₅₄ ꞌéi₂ i₂ma₂ca₂rë₃ꞌnio₃ quián₂ jniog₄.
38 Ia₁ caun₂ bá₄ ꞌei₅ dsɨ₃, ꞌi₁caun₂ tsá₃ ꞌe₂ lé₂ le₃ꞌliogꞌ₃ cau₅ ne₄ a₂ꞌnio₃ Diú₄ jniog₄. Tsá₃ quɨꞌ₅₄ jmɨg₄ ꞌmú₃, on₃ guëꞌ₂ a₂chong₂, on₃ guëꞌ₂ ángeles, on₃ guëꞌ₂ dsɨ₂tan₅₄ quián₅ jme₂dsí₂, on₃ guëꞌ₂ a₂cha₂ rë₂në́₃, on₃ guëꞌ₂ a₂cha₂ jmɨg₄ ne₄ juɨ₅ në́₃, on₃ guë́₄ juɨ₅bí₂,
39 on₃ guëꞌ₂ i₂tionꞌ₅₄ ja₁ŋei₅ lɨn₃, on₃ guëꞌ₂ i₂tionꞌ₅₄ ja₁ꞌuɨn₃ lɨn₃, on₃ guëꞌ₂ juɨ₁ꞌe₂ guë́₃ a₂siáꞌ₂ a₂ca₂jmo₃ Diú₄, juaꞌ₅₄ le₃quɨꞌ₅₄ jmɨg₄ jmo₃ juaꞌ₅₄ a₂tsá₃ ma₃jme₃ꞌnio₃ Diú₄ jniog₄, të₂le₃ quianꞌ₅₄ Cristo Jesús Te₁guiꞌ₅₄ quián₂ jniog₄.