Caun₂ jág₁ a₂jángꞌ₅ léi₄ a₂jauꞌ₂ juɨ₁liaꞌ₂ ja₁con₂ dsa₂ i₂rë₂jenꞌ₂ gu₂
7
Rɨnꞌ₅₄ jniog₄, ꞌniaꞌ₂ dsa₂ i₂cuɨ́ꞌ₅ ꞌa₂ liaꞌ₂ juáꞌ₂ ne₄ Si₂ ꞌÉiꞌ₃, ¿tsa₁ ŋiꞌ₅₄ ꞌniaꞌ₂ a₂ꞌio₅ bí₂ ꞌÉiꞌ₃ ja₁con₂ jan₂ dsa₂ jmáꞌ₃ të₁liaꞌ₂ chain₂?
2 Juɨ₁liaꞌ₂ jan₂ dsa₂ mɨ́₂ i₂chan₂ dsɨ₂i₂gu₂, co₂ꞌnióꞌ₄ a₂chi₁ꞌŋeiꞌ₅₄ bá₄ quiainꞌ₅₄ dsɨ₂i₂gu₂ liaꞌ₂ conꞌ₂ lë́₅ ne₄ Si₂ ꞌÉiꞌ₃, të₁liaꞌ₂ chan₂ dsa₂ ŋeꞌ₂. La₁ në₁juaꞌ₂ ca₂jon₃ dsɨ₂i₂gu₂ në́₃, ca₂tsɨnꞌ₂ bá₄ dsa₂ mɨ́₂ ꞌéi₂ të₂le₃ quióꞌ₅ ꞌéiꞌ₃ a₂jme₁le₁quian₅ quióꞌ₅ quiainꞌ₅₄ dsɨ₂i₂gu₂.
3 Në₁juaꞌ₂ ca₂guá₂ ꞌio₅₄ quiainꞌ₅₄ dsa₂ ŋeꞌ₂ siánꞌ₂ të₃ chan₂ dsɨ₂i₂gu₂, dso₄ bá₄ ꞌno₂₃; la₁ në₁juaꞌ₂ ca₂jon₃ dsɨ₂i₂gu₂ në́₃, ca₂tsɨnꞌ₂ bá₄ ꞌio₅₄ të₂le₃ quióꞌ₅ ꞌéiꞌ₃, ma₂lé₂ bá₄ jéinꞌ₂ táng₃ gu₂ quiainꞌ₅₄ dsa₂ ŋeꞌ₂ siánꞌ₂, tsá₃ ma₃dso₄ ꞌno₂₃.
4 Le₂në₅ bá₄ ján₃, ꞌniaꞌ₂ rɨnꞌ₅₄ jniog₄, ma₂dsanꞌ₃ ꞌniaꞌ₂ le₃quióꞌ₅ ꞌÉiꞌ₃ të₂le₃ quianꞌ₅₄ ŋɨ₄ Cristo, ia₁jaun₂ téngꞌ₄ ja₁con₂ i₂siánꞌ₂: ja₁con₂ ꞌéi₂ i₂ca₂jenꞌ₅₄ táng₃ ne₄ ꞌmú₃. Le₂në₅ ca₂lë₃ ia₁jaun₂ le₃chong₂ jniog₄ téi₅ ta₁ ne₄ Diú₄.
5 Ia₁ liaꞌ₂ conꞌ₂ jme₁chong₂ jniog₄ liaꞌ₂ jme₁jiog₅ nɨ₁ŋɨ₁ jniog₄, ta₁ jaun₂ ca₂quíꞌ₃ ꞌÉiꞌ₃ a₂ca₂ŋei₃ juɨ₅ nɨ₁ŋɨ₁ jniog₄ a₂ca₂lë₃ dsɨ₅ jmó₁ a₂ꞌlɨgꞌ₅₄, ca₂quíꞌ₃ ta₁ a₂ca₂i₁jo₅₄ ne₄ ꞌmú₃.
6 La₁ rë₂në́₃ në́₃, ma₂dsau₃ le₃quióꞌ₅ Si₂ ꞌÉiꞌ₃ a₂jme₁jiog₅ jme₁le₁ꞌŋeiꞌ₅₄, a₂jme₁ti₁ ne₄ Diú₄ juɨ₅ ꞌmɨ́₂ quióꞌ₅ Jme₂dsí₂ quiáin₅. Jaun₂ tsá₃ ma₃tioꞌ₅₄ jniog₄ le₁ꞌŋeiꞌ₅₄ ne₄ ꞌÉiꞌ₃ a₂chi₁ton₅ ne₄ si₂.
Dso₄ a₂ꞌi₄ ja₁con₂ jniá₂
7 ¿ꞌE₂ juaꞌ₅₄ jniog₄ jaun₂ në́₃? ¿A₂lë́₅ dso₄ bá₄ ꞌÉiꞌ₃ jaun₂? ¡Dsónꞌ₂ bá₄ on₃juaꞌ₅₄ le₂jaun₂! La₁ jniá₂ në́₃ tsá₃ ca₂rë₃guion₅₄ ꞌe₂ jaun₂ dsáu₅, juaꞌ₅₄ meiꞌ₂ guë́₃ tsá₃ ꞌÉiꞌ₃ ron₅. Co₂ꞌnióꞌ₄ le₃juaꞌ₅₄, tsá₃ ꞌe₂ ca₂rë₃guion₅₄, juɨ₁liaꞌ₂ a₂ꞌɨ́n₅ dsɨ₃ a₂cha₂ quióꞌ₅ i₂siánꞌ₂, juaꞌ₅₄ meiꞌ₂ guë́₃ tsá₃ a₂juáꞌ₂ ꞌÉiꞌ₃ ne₄ Si₂: “Tsá₃ lë₁jmo₂ ꞌɨ́n₅ ꞌauꞌ₂ a₂quióꞌ₅ dsa₂ siánꞌ₂.”a
8 La₁ dsáu₁ në́₃ ca₂jme₃ꞌŋióiꞌ₃ bá₄ jág₁ në₅; ꞌŋiog₅ bá₄ ꞌÉiꞌ₃ ca₂cuë₃ jmɨg₄ ca₂ŋei₃ të₂dsɨ₃ ca₂le₃jë́₃ ne₅₄ a₂ꞌɨ́n₅ dsɨ₃ a₂cha₂ quióꞌ₅ i₂siánꞌ₂. Ia₁ juɨ₁liaꞌ₂ ja₁tsá₃ ꞌÉiꞌ₃ ron₅, tsá₃ léi₄ jniá₂ a₂cha₂ dsáu₅.
9 Ján₃ bá₄ jme₁chang₂ caun₂ jmɨg₄ liaꞌ₂ conꞌ₂ tsá₃ ꞌÉiꞌ₃ quióꞌ₅ Moisés ma₂ca₂tɨ́ng₂. La₁ jme₁ca₂já₃ ꞌÉiꞌ₃, co₂ꞌnióꞌ₄ a₂ca₂jenꞌ₅₄ bá₄ táng₃ dsáu₁; jniá₂ guëꞌ₂, co₂ꞌnióꞌ₄ a₂ca₂jong₃.
10 Le₂në₅ bá₄ ca₂lë₃ quianꞌ₅₄ ꞌŋiog₅ ꞌÉiꞌ₃ jaun₂; ꞌnióꞌ₄ a₂jme₁cuë₃ bí₂ a₂le₃chan₂ jniá₂, të₂le₃ ca₂jiog₃ juɨ₅ ꞌmú₃ bá₄ a₂jaun₂.
11 Ia₁ dsáu₁ në́₃, ca₂jme₃ꞌŋióiꞌ₃ bá₄ ne₄ ꞌÉiꞌ₃ ja₁con₂ jniá₂, ca₂jme₃gau₂₃. Jaun₂ quianꞌ₅₄ ꞌŋiog₅ bá₄ ꞌÉiꞌ₃, ca₂cuë₃ ꞌmú₃.
12 Jaun₂ në́₃, a₂jŋió₅ bá₄ Si₂ ꞌÉiꞌ₃; ján₃ guëꞌ₂ le₂jaun₂ ca₂le₃jë́₃ ꞌéiꞌ₃ tioꞌ₅₄, a₂jŋió₅, con₂ ꞌí₁ conꞌ₂ dsi₂ten₅₄, a₂dse₃ lɨn₃ bá₄ a₂jaun₂.
13 ¿ꞌE₂ bá₄ jaun₂ në́₃? ¿Juɨ₁liaꞌ₂ a₂dse₃ jaun₂ ca₂lë₃ ꞌmú₃ ja₁con₂ jniá₂? ¡Dsónꞌ₂ on₃juaꞌ₅₄ jaun₂! ꞌUɨg₅₄ dsáu₅ bá₄ jniá₂ jaun₂, ca₂jiog₃ juɨ₅ ꞌmú₃, le₂në₅ ca₂cuë₃ léi₄ a₂lë́₅ dso₄ a₂jaun₂ a₂jme₁jmo₅ jniá₂; ca₂jmo₃ të₂le₃ quianꞌ₅₄ a₂dse₃, jaun₂ le₂në₅ ca₂jme₃jnia₅ ꞌÉiꞌ₃ ꞌe₂ a₂lë́₅ a₂juɨ₁si ꞌlɨgꞌ₅₄ a₂lë́₅ dsáu₁.
14 Ne₄ bá₄ jniog₄ jaun₂ a₂lë́₅ a₂gu₂dsí₂ bá₄ ꞌÉiꞌ₃, la₁ dsa₂ nɨ₁ŋɨ́₅ bá₄ jniá₂; co₂ꞌnióꞌ₄ a₂rë₂ꞌnɨ₅₄ bá₄ jniá₂ ne₄ dso₄.
15 Ia₁ tsá₃ ŋɨ́ꞌ₂ dsɨ₃ ꞌe₂ lë₃ jmo₂₃ ꞌe₂ jmo₂₃, ia₁ tsá₃ lé₂ jmo₅₄ a₂ꞌɨ́n₅ dsɨ₃ jmo₅₄, ia₁ ca₂le₃jë́₃ a₂ꞌio₄ jniá₂ a₂tsá₃ ꞌnio₃ jmo₅₄, a₂jaun₂ dé₄ dsónꞌ₂ jmo₂₃.
16 Ia₁ chi₂juaꞌ₂ jmo₅ jniá₂ a₂tsá₃ të₅ dsɨ₃ jmo₅₄, jaun₂ jmo₅ jniá₂ dsɨ₃ a₂dse₃ bá₄ ꞌÉiꞌ₃.
17 Le₂në₅ bá₄ jaun₂, on₃juaꞌ₅₄ jniá₂ ꞌŋió₃ ꞌno₂₃ dso₄; dsáu₅ jniá₂ a₂ꞌi₄ të₂dsɨ₃ bá₄, a₂jaun₂ bá₄ jmo₅.
18 Ia₁ guion₄ jniá₂, ꞌi₁caun₂ a₂dse₃ tsá₃ cha₂ të₂dsɨ₃ jniá₂, co₂ꞌnióꞌ₄ le₃juaꞌ₅₄ liaꞌ₂ conꞌ₂ lɨ́ng₅ dsa₂ nɨ₁ŋɨ́₅, ia₁ ꞌɨ́n₅ bá₄ dsɨ₃ jmo₅₄ a₂dse₃, la₁ tsá₃ quɨꞌ₅₄ jmɨg₄ jmo₅₄.
19 Tsá₃ qui₂jmo₅ jniá₂ a₂dse₃ a₂ꞌnio₃ jmo₅₄; caun₂ jmo₅ bá₄ jniá₂ a₂ꞌlɨgꞌ₅₄ a₂tsá₃ ꞌnio₃ jmo₅₄.
20 Jaun₂ në́₃, chi₂juaꞌ₂ jmo₅ jniá₂ a₂tsá₃ të₅ dsɨ₃ jmo₅₄, on₃juaꞌ₅₄ jniá₂ ꞌŋió₃ jmo₂₃ a₂jaun₂; dsáu₅ jniá₂ a₂ꞌi₄ të₂dsɨ₃ bá₄, a₂jaun₂ bá₄ jmo₅.
21 Jaun₂ ma₂ca₂rë₃léi₄, cha₂ caun₂ ꞌéiꞌ₃: jë₁ma₂të́₂ rë₁ꞌnio₃ jmo₅₄ a₂dse₃, jŋiaꞌ₅₄ liaꞌ₂ a₂ꞌlɨgꞌ₅₄ bá₄ cha₂ ja₁cong₂.
22 Néꞌ₃ jme₂dsí₂ quió₃, të₅ bá₄ dsɨ₃ ꞌÉiꞌ₃ quióꞌ₅ Diú₄;
23 la₁ jág₅ jniá₂ ja₁con₂ a₂tén₅ nɨ₁ŋɨ₃, cha₂ caun₂ ꞌéiꞌ₃ siáꞌ₂ a₂jmo₅ ꞌnei₂ quianꞌ₅₄ ꞌéiꞌ₃ ꞌa₂ liaꞌ₂ dsɨ₂jiog₅ dsi₃, a₂të₂ chi₁ꞌŋegꞌ₁ ne₄ ꞌéiꞌ₃ quióꞌ₅ dso₄ a₂jmo₅ ta₁ ja₁con₂ a₂tén₅ nɨ₁ŋɨ₃.
24 ¡ꞌE₂ guë́₄ juɨ́g₂ jniá₂! ¿ꞌEin₂ bá₄ jiá₃ lió₂ ne₄ nɨ₁ŋɨ₃ a₂jiog₅ ꞌmú₃ la₂?
25 Ti₁ꞌmagꞌ₄ Diú₄, cha₂ bá₄ juɨ₅ ꞌa₂ liaꞌ₂ lé₂ të₂le₃ quianꞌ₅₄ Te₁guiꞌ₅₄ Jesucristo quián₂ jniog₄.
Jaun₂ në́₃, ꞌŋió₃ bá₄ jniá₂ quianꞌ₅₄ ꞌa₂ liaꞌ₂ dsɨ₂jiog₅ dsi₃, jme₂tí₁ ta₁ ne₄ ꞌÉiꞌ₃ quióꞌ₅ Diú₄, la₁ liaꞌ₂ conꞌ₂ lɨ́ng₅ dsa₂ nɨ₁ŋɨ́₅, jme₁tí₁ jniá₂ ne₄ ꞌéiꞌ₃ quióꞌ₅ dso₄.