5 Ia₁ chi₂juaꞌ₂ ca₂jme₁quiainꞌ₅₄ jniog₄ ne₄ ꞌmú₃ quióꞌ₅, ján₃ bá₄ le₂jaun₂ tion₅₄ bá₄ jme₁quiainꞌ₅₄ jë₁ma₂ca₂jeinꞌ₅₄ jniog₄ juɨ₁liaꞌ₂ ca₂jenꞌ₅₄ ꞌéi₂.

6 Ne₄ bá₄ jniog₄, liaꞌ₂ conꞌ₂ lë́₅ jme₁lág₄ le₂jŋiá₅, ne₄ cróg₄ bá₄ ca₂ŋó₃ a₂jaun₂ co₂lë₅ quianꞌ₅₄ Cristo, ia₁jaun₂ dsɨ₃ꞌén₂ juɨ₅bí₂ a₂ꞌio₅ dsáu₁ ne₄ nɨ₁ŋɨ₁ jniog₄, ia₁jaun₂ tsá₃ ma₃lë́₅ juaꞌ₅₄ a₂qui₂rë₂ꞌŋeiꞌ₅₄ guë́₄ a₂chong₂ qui₂jme₂tí₁ ta₁ ne₄ dsáu₁, në₂jag₄ bá₄ ne₄ jan₂ juɨg₅₄ jniog₄.

7 Ia₁ juɨ₁liaꞌ₂ i₂ma₂jon₅, tsá₃ ma₂ꞌe₂ rë₂ꞌŋeiꞌ₅₄, ma₂lóin₂ bá₄ ne₄ dsáu₁.

8 Chi₂juaꞌ₂ ma₂ca₂dsau₃ jniog₄ quianꞌ₅₄ Cristo, ján₃ bá₄ le₂jaun₂ ꞌéin₂ a₂le₃chong₂ quianꞌ₅₄ ꞌéi₂,

9 ia₁ ne₄ bá₄ jniog₄, conꞌ₂ jme₁ca₂jenꞌ₅₄ Cristo ne₄ ꞌmú₃, o₁lɨ́gꞌ₂ jmɨg₄ tsá₃ ma₃lé₂ le₃jóin₂; tsá₃ ma₂ꞌe₂ juɨ₅bí₂ ꞌio₅ ꞌmú₃ ne₄ quióꞌ₅ ꞌéi₂.

10 Ia₁ jme₁ca₂jon₃ Cristo, co₂ráun₂ bá₄ ca₂join₃ ꞌuɨg₅₄ dsáu₁ dsa₂; la₁ në₃ liaꞌ₂ ma₂chain₂, chain₂ le₃quióꞌ₅ Diú₄.

11 Le₂në₅ bá₄ ꞌniaꞌ₂ ján₃, jmo₄ bá₄ ꞌniaꞌ₂ ꞌauꞌ₂ a₂ma₂dsangꞌ₃ të₂le₃ quióꞌ₅ dso₄, la₁ chanꞌ₂ bá₄ ꞌniaꞌ₂ le₃quióꞌ₅ Diú₄ të₂le₃ quianꞌ₅₄ Cristo Jesús.

12 A₂jaun₂ në́₃, ꞌa₃ cuë₂ ꞌniaꞌ₂ jmɨg₄ juaꞌ₅₄ a₂ꞌio₃ guë́₄ juɨ₅bí₂ dsáu₁ ne₄ nɨ₁ŋɨꞌ₁ ꞌniaꞌ₂ a₂siáꞌ₃, a₂qui₂chi₃quióng₂ jmɨg₄ a₂jme₁tiꞌ₄ ꞌniaꞌ₂ a₂mɨ₅ nɨ₁ŋɨ́₅.

13 ꞌA₃ qui₁jɨnꞌ₅₄ ꞌniaꞌ₂ a₂tén₅ nɨ₁ŋɨꞌ₁ juaꞌ₅₄ a₂ꞌno₃ guë́₄ dso₄, co₂ꞌnióꞌ₄ a₂jmóꞌ₂ ta₁ a₂jmo₃ a₂ꞌlɨgꞌ₅₄. Të₂le₃ ne₄ Diú₄ bá₄ jɨnꞌ₅₄ ꞌniaꞌ₂ a₂lɨ́ngꞌ₅ co₂ꞌnióꞌ₄ dsa₂ i₂ma₂dsan₃, i₂ma₂jenꞌ₅₄ táng₃. Jangꞌ₅₄ ꞌniaꞌ₂ a₂tén₅ nɨ₁ŋɨꞌ₁ le₃ja₁con₂ Diú₄, co₂ꞌnióꞌ₄ a₂jmóꞌ₂ ta₁ a₂jmo₃ jmáꞌ₃ a₂dse₃.

14 Ia₁ tsá₃ ꞌio₃ guë́₄ bí₂ dsáu₁ ne₄ quiánꞌ₂ ꞌniaꞌ₂ në₂jag₄ bá₄ jan₂ juɨg₅₄ ꞌniaꞌ₂, ia₁ tsá₃ o₄gú₃ ꞌÉiꞌ₃ tionꞌ₅₄ ꞌniaꞌ₂; të₂le₃ o₄gú₃ a₂ꞌua₁ dsɨ́₅ Diú₄ bá₄ tionꞌ₅₄ ꞌniaꞌ₂.

15 ¿ꞌE₂ bá₄ jaun₂ në́₃? ¿A₁caun₂ ꞌnióg₁ dso₄ bá₄ ia₁ tsá₃ o₄gú₃ ꞌÉiꞌ₃ tioꞌ₅₄ jniog₄, ia₁ ja₁ꞌua₁ dsɨ́₅ Diú₄ bá₄ tióng₂? ¡Dsónꞌ₂ bá₄ on₃juaꞌ₅₄ le₂në₅!

16 ¿Tsa₁ ŋiꞌ₅₄ ꞌniaꞌ₂, në₁juaꞌ₂ ca₂jɨnꞌ₅₄ ꞌniaꞌ₂ guiongꞌ₅₄ o₄gú₃ jan₂ juɨg₅₄ a₂jme₁tiꞌ₄ ta₁ ne₅₄, ma₂lɨ́ngꞌ₅ jan₂ i₂ma₂chi₁ꞌŋeꞌ₅₄ i₂quián₅ dsa₂ ꞌéi₂? Ján₃ bá₄ le₂jaun₂, në₁juaꞌ₂ ca₂jɨnꞌ₅₄ ꞌniaꞌ₂ guiongꞌ₅₄ ne₄ dsáu₁, dsáu₁ jaun₂ i₂ma₂lɨ́n₅ juɨg₅₄ ꞌniaꞌ₂, jiog₅ juɨ₅ ꞌmú₃; o₃ në₁juaꞌ₂ ca₂jɨnꞌ₅₄ ꞌniaꞌ₂ ne₄ a₂nágꞌ₁ gau₂ jág₁ quióꞌ₅ Diú₄, a₂jaun₂ bá₄ i₂ma₂lɨ́n₅ juɨg₅₄ ꞌniaꞌ₂, jiog₅ juɨ₅ co₂dsau₅.

17 Juɨ₁ꞌe₂ guë́₃ jme₁rë₂qui₂rë₂ꞌŋeꞌ₂ ꞌniaꞌ₂ le₂jŋiá₅ ne₄ dsáu₁, la₁ rë₂në́₃ në́₃, ti₁ꞌmagꞌ₄ Diú₄, ma₂neiꞌ₂ bá₄ ꞌniaꞌ₂ gau₂ ca₂le₃jë́₃ jme₂dsí₂ quiángꞌ₂ jág₁ quen₅ a₂ma₂rë₂jɨnꞌ₅₄ ꞌniaꞌ₂, a₂jme₂tɨ́ngꞌ₂.

18 Jaun₂ në́₃ ma₂lónꞌ₂ ꞌniaꞌ₂ o₄gú₃ dsáu₁, ma₂tionꞌ₅₄ bá₄ ꞌniaꞌ₂ o₄gú₃ juɨ₅ co₂dsau₅.

19 (Juáꞌ₅ jniá₂ juɨ́g₂ ꞌniaꞌ₂ liaꞌ₂ conꞌ₂ lë́₅ jág₁ dsia₅ dsa₂ mɨ₂güɨ́g₃, ia₁ dsónꞌ₂ bá₄ quian₅ ta₁ le₃ŋɨ́ꞌ₂ ꞌauꞌ₂ ꞌniaꞌ₂ dse₃ ia₁ të₂le₃ a₂lɨ́nꞌ₅ ꞌniaꞌ₂ dsa₂ mɨ₂güɨ́g₃.) Ia₁ le₂jaun₂ bá₄ ján₃ juɨ₁liaꞌ₂ qui₂ca₂jɨnꞌ₅₄ ꞌniaꞌ₂ le₂jŋiá₅ a₂tén₅ nɨ₁ŋɨꞌ₁ juɨ₅ ja₁tsá₃ nágꞌ₂ gau₂, ja₁ca₂jme₁tiꞌ₄ ꞌniaꞌ₂ ta₁ ne₄ ca₂le₃jë́₃ ne₅₄ a₂ꞌlɨgꞌ₅₄, le₂në₅ bá₄ guëꞌ₂ jangꞌ₅₄ táng₃ ꞌniaꞌ₂ a₂tén₅ nɨ₁ŋɨꞌ₁ ja₁jme₁tiꞌ₄ ta₁ ne₄ juɨ₅ jŋió₅ ja₁caun₂ le₃dsenꞌ₃ ꞌniaꞌ₂.

20 Liaꞌ₂ conꞌ₂ jme₁lɨ́ngꞌ₄ guë́₄ dsa₂ i₂qui₂rë₂ꞌŋeꞌ₅₄ le₃quióꞌ₅ dsáu₁, tsá₃ jme₁rë₂ꞌŋegꞌ₅₄ juaꞌ₅₄ a₂jme₂tiꞌ₄ guë́₄ ꞌniaꞌ₂ ta₁ ne₄ juɨ₅ co₂dsau₅.

21 La₁ ¿ꞌe₂ bá₄ a₂dse₃ ca₂lɨnꞌ₃ ꞌniaꞌ₂ ca₂le₃jë́₃ a₂jaun₂, a₂caun₂ lë₁o₂guíꞌ₃ quiánꞌ₂ ꞌniaꞌ₂ rë₂në́₃? Ia₁ jmáꞌ₃ liaꞌ₂ ca₂ne₅₄ a₂dsióg₄ ne₄ juɨ₅ ꞌmú₃ bá₄ a₂jaun₂.

22 La₁ rë₂në́₃ në́₃, ma₂lónꞌ₂ ꞌniaꞌ₂ juɨ₅ ja₁jme₁qui₂rë₂ꞌŋeꞌ₅₄ ꞌniaꞌ₂ ꞌnauꞌ₂ dso₄, ma₂i₂tonꞌ₅₄ ꞌniaꞌ₂ juɨ₅ ja₁jme₁tiꞌ₄ ta₁ ne₄ Diú₄, jaun₂ lénꞌ₂ ꞌniaꞌ₂ juɨ₅ jŋió₅ ja₁caun₂ le₃dsenꞌ₃ ꞌniaꞌ₂, juɨ₅ ja₁dsióg₄ a₂le₃chanꞌ₂ ꞌniaꞌ₂ dse₃ co₂tan₅₄.

23 Ia₁ jŋiaꞌ₅₄ liaꞌ₂ ꞌmú₃ bá₄ líꞌ₂ dsa₂ co₂ꞌnióꞌ₄ ꞌliaꞌ₅₄ dsáu₁, la₁ a₂lë₁cuë₅ bá₄ Diú₄ a₂le₃chan₂ dsa₂ dse₃ co₂tan₅₄ të₂le₃ quianꞌ₅₄ Cristo Jesús i₂lɨ́n₅ Te₁guiꞌ₅₄ quián₂ jniog₄.