Lé₂ le₃chong₂ jniog₄ ꞌei₅ tei₄ quianꞌ₅₄ Diú₄
5
Le₂në₅ jaun₂, ia₁ a₂ma₂ꞌë́₂ Diú₄ jág₁ a₂tsá₃ ꞌe₂ dso₄ rë₂cáuꞌ₄ jniog₄, ꞌuɨg₅₄ ia₁ a₂ꞌéin₂, ma₂chong₂ jniog₄ ꞌei₅ tei₄ quiainꞌ₅₄, të₂le₃ quianꞌ₅₄ Te₁guiꞌ₅₄ Jesucristo quián₂.
2 Ia₁ të₂le₃ quianꞌ₅₄ Cristo ꞌéi₂ bá₄ ma₂i₁toꞌ₅₄ jniog₄ ja₁jme₂guꞌ₅₄ Diú₄ ia₁ a₂ꞌua₁ dsɨ́₅, të₂le₃ ia₁ a₂ꞌéin₂. Ja₁dse₃ në₅ në́₃, tióng₂ jniog₄ tiá₂ ꞌioꞌ₂ jein₂, ia₁ ꞌɨ́n₂ dsɨ₅ jniog₄ a₂dsónꞌ₂ jme₁quianꞌ₅₄ Diú₄ jë₄ co₂tág₅ co₂ꞌnéꞌ₅ quióꞌ₅.
3 On₃ rëꞌ₂ juaꞌ₅₄ jmáꞌ₃ a₂në₅; jmo₂ jniog₄ ꞌioꞌ₂ ne₄ o₂i₁ dsɨ₅ a₂qui₂dsɨ₂ŋág₂; ia₁ ne₄ jniog₄, quianꞌ₅₄ o₂i₁ dsɨ₅ bá₄ qui₂rë₂juɨnꞌ₂ dsɨ₅ jniog₄.
4 A₂juɨnꞌ₂ dsɨ₅ jniog₄ jaun₂, jmo₅ a₂cheiꞌ₂ rë₂ jniog₄ ꞌa₂ liaꞌ₂ lág₅; a₂tióng₂ jniog₄ rë₂ jaun₂ në́₃, jmo₅ a₂ꞌɨ́n₂ dsɨ₅ jniog₄ jmɨg₄ a₂le₃ti₃.
5 Jmɨg₄ a₂ꞌɨ́n₂ dsɨ₅ jniog₄ jaun₂, tsá₃ lé₂ le₃jmo₃ juaꞌ₅₄ jéin₂ jniog₄ o₂guíꞌ₃, ia₁ ꞌŋiog₅ Diú₄ ma₂ca₂jme₃cainꞌ₂ jme₂dsí₂ quián₂ jniog₄ ia₁ a₂ŋɨ́₄ lë₃ ꞌnio₃ jniog₄, të₂le₃ quianꞌ₅₄ Jme₂dsí₂ Jŋió₅ i₂ma₂cuɨin₃.
6 Ia₁ liaꞌ₂ conꞌ₂ jme₁lág₄ jniog₄ dsa₂ mɨ₂güɨ́g₃ ꞌuan₅₄ i₂tsá₃ cha₂ juɨ₅ ꞌa₂ liaꞌ₂ lion₄ guio₅₄, la₁ jme₁ca₂të́₂ jmɨg₄ a₂ca₂tióng₃ Diú₄, jaun₂ ca₂jon₃ bá₄ I₂rë₂ꞌɨ́n₁* quiáin₅ o₄quióꞌ₄ dsa₂ i₂tsá₃ Diú₄ cuɨn₅.
7 A₂quian₅ ta₁ lɨn₃ bá₄ juaꞌ₅₄ meiꞌ₂ guë́₃ jan₂ dsa₂ lé₂ le₃guein₃ ꞌmú₃ o₄quióꞌ₄ jan₂ dsa₂ mɨ₂güɨ́g₃ rɨinꞌ₅₄, ca₂liaꞌ₂ jŋiaꞌ₅₄ o₄quióꞌ₄ jan₂ dsa₂ i₂jmo₅ rë₂; ꞌan₁ meiꞌ₂ tsá₃ chan₂ jan₂ i₂lé₂ le₃tiá₂ dsɨ́₅ guen₃ ꞌmú₃ o₄quióꞌ₄ jan₂ dsa₂ i₂dse₃ dsɨ́₅ dsónꞌ₂.
8 La₁ ma₂ca₂cuë₃ bá₄ Diú₄ léi₄ a₂dsónꞌ₂ ꞌnio₃ jniog₄, ia₁ a₂ca₂jon₃ Cristo ꞌuɨg₅₄ quián₂, liaꞌ₂ conꞌ₂ jme₁lág₄ guë́₄ dsa₂ cha₂ dsáu₁.
9 A₂jaun₂ në́₃, ꞌuɨg₅₄ ia₁ a₂ma₂ꞌë́₂ Diú₄ jág₁ të₂le₃ quianꞌ₅₄ jmɨ₄ Cristo a₂ca₂tang₂, a₂tsá₃ ma₂dso₄ rag₂, jaun₂ të₂le₃ i₂juɨꞌ₂ guë́₄ lió₂ jniog₄ të₂le₃ quianꞌ₅₄ ꞌéi₂ a₂gau₂ a₂ꞌne₂ Diú₄ a₂jiá₃ jë₁ca₂tóꞌ₂.
10 Ia₁ chi₂juaꞌ₂ ma₂ca₂ꞌág₂ Diú₄ caun₂ jág₁ quianꞌ₅₄ jniog₄ të₂le₃ quianꞌ₅₄ ꞌmú₃ a₂ca₂i₃ŋɨ́₂ Ja₁ŋiꞌ₅₄ liaꞌ₂ conꞌ₂ jme₁lág₄ guë́₄ jniog₄ dsa₂ i₂ꞌŋia₅₄ ꞌéi₂, ján₃ bá₄ le₂jaun₂ të₂le₃ i₂juɨꞌ₂ guë́₄ lió₂ jniog₄ ꞌuɨg₅₄ ia₁ a₂chain₂, në₃ liaꞌ₂ ma₂ꞌei₅ caun₂ jág₁ quiainꞌ₅₄.
11 Ia₁ on₃ guëꞌ₂ juaꞌ₅₄ jmáꞌ₃ a₂në₅, ia₁ chong₂ jniog₄ jme₁ꞌŋió₄ dsɨ₅ ján₃ le₃quióꞌ₅ Diú₄ të₂le₃ quianꞌ₅₄ Te₁guiꞌ₅₄ Jesucristo, ia₁ të₂le₃ quianꞌ₅₄ Cristo bá₄ ca₂dsi₃náu₅ jniog₄ ꞌei₅ caun₂ jág₁ quianꞌ₅₄ Diú₄.
Adán quianꞌ₅₄ Cristo
12 Le₂në₅ jaun₂, juɨ₁liaꞌ₂ të₂le₃ quianꞌ₅₄ jan₂ dsa₂ ca₂rë₃chá₃ dsáu₁ dsa₂ mɨ₂güɨ́g₃, ꞌuɨg₅₄ në₅ bá₄ ca₂já₃ ꞌmú₃, le₂në₅ bá₄ ján₃ ca₂ŋag₅ ꞌmú₃ ja₁con₂ ca₂le₃jɨ́n₃ dsa₂ mɨ₂güɨ́g₃, ia₁ ca₂le₃jɨ́n₃ bá₄ ca₂ꞌnáu₂ dso₄.
13 Le₂jŋiá₅, liaꞌ₂ conꞌ₂ tsá₃ ꞌÉiꞌ₃ jme₁ma₂ron₅, ma₂qui₂ꞌno₅ bá₄ dsa₂ dso₄ mɨ₂güɨ́g₃, la₁ tsá₃ lé₂ le₃jiógꞌ₂ ꞌí₁ ꞌe₂ a₂rɨn₂ dsa₂ ja₁tsá₃ ꞌéiꞌ₃ cha₂.
14 La₁ ca₂le₃ jme₁chan₂ Adán, ca₂liaꞌ₂ ca₂të́₂ jmɨg₄ a₂jme₁chan₂ Moisés, ca₂ꞌio₃ ꞌmú₃ juɨ₅bí₂ ne₄ quióꞌ₅ dsa₂ i₂qui₂ca₂ꞌnáu₂ dso₄, o₁jŋiaꞌ₅₄ dsáu₁ dsa₂ jaun₂ on₃juaꞌ₅₄ a₂ca₂i₃juɨn₅₄ dsa₂ caun₂ ꞌéiꞌ₃ juɨ₁liaꞌ₂ ca₂jmo₃ Adán; jme₁lɨ́n₄ Adán co₂ꞌnióꞌ₄ caun₂ nióꞌ₄ quióꞌ₅ i₂jiá₃ chi₁quɨ́n₃.
15 La₁ dsáu₁ Adán në́₃, tsá₃ lé₂ le₃quɨn₃ quianꞌ₅₄ a₂lë₁cuë₅ Diú₄ jniog₄. Ia₁ juɨ₁liaꞌ₂ o₄quióꞌ₄ dsáu₁ jan₂ dsa₂, juɨn₅ i₂ca₂dsan₃, ján₃ bá₄ le₂jaun₂ të₂le₃ lë́₅ guë́₄ a₂ꞌua₁ dsɨ́₅ Diú₄ a₂lió₂ a₂lë₁ma₂cuë́ꞌ₃ co₂ŋɨ́₂ dsa₂ juɨn₅ të₂le₃ quianꞌ₅₄ jan₂ tan₅₄ dsa₂ i₂ꞌua₁ dsɨ́₅. Dsa₂ ꞌéi₂ lɨ́n₅ Jesucristo.
16 Dso₄ a₂ca₂ꞌnáu₂ jan₂ dsa₂ tsá₃ lé₂ le₃quɨn₃ quianꞌ₅₄ a₂lió₂ Diú₄ a₂cuë₂₃ jniog₄; ia₁ jme₁ca₂cáun₂ Diú₄ ꞌí₁ dso₄ a₂ca₂rë₃cánꞌ₂ jan₂ dsa₂, jaun₂ ca₂já₃ juɨ₅ a₂ca₂qui₃dsɨ₅ Diú₄ ꞌéiꞌ₃ ja₁con₂ dsa₂ mɨ₂güɨ́g₃; la₁ juɨ₁liaꞌ₂ a₂lión₂ dsa₂ në́₃, a₂lë₁ꞌë́₂ Diú₄ co₂ŋɨ́₂ bá₄ jág₁ a₂tsá₃ ꞌe₂ dso₄ rɨn₂ dsa₂, juɨ₁ꞌa₂ guë́₃ la₂ qui₂ma₂ꞌnáu₂ ꞌlióng₂ dso₄.
17 Chi₂juaꞌ₂ ca₂ꞌio₃ bí₂ ꞌmú₃ ne₄ ca₂le₃jɨ́n₃ dsa₂ o₄quióꞌ₄ dsáu₁ jan₂ dsa₂, të₂le₃ i₂juɨꞌ₂ guë́₄ ꞌŋio₅ tson₂ a₂ꞌua₁ dsɨ́₅ Diú₄ ja₁con₂ dsa₂ i₂guéinꞌ₂ në₂jag₄ bá₄ a₂tsá₃ ꞌe₂ dso₄ rɨin₂, a₂ꞌio₂₃ bí₂ a₂le₃chain₂ dse₃ të₂le₃ quianꞌ₅₄ jan₂ dsa₂, i₂lɨ́n₅ Jesucristo.
18 Jaun₂ lë₃, juɨ₁liaꞌ₂ dsáu₁ Adán ca₂cheinꞌ₃ ca₂le₃jɨ́n₃ dsa₂ juɨ₅ ja₁ꞌë́₃ Diú₄ uɨg₅, le₂në₅ bá₄ ján₃, ta₁ a₂quíꞌ₅ a₂dse₃ a₂ca₂jmo₃ Jesucristo ca₂cain₃ ca₂le₃jɨ́n₃ dsa₂ juɨ₅ ja₁lé₂ le₃chain₂ dse₃, ja₁guéiꞌ₂ Diú₄ në₂jag₄ bá₄ a₂tsá₃ ꞌe₂ dso₄ rɨin₂.
19 Co₂ꞌnióꞌ₄ le₃juaꞌ₅₄, ia₁ juɨ₁liaꞌ₂ tsá₃ gau₂ ca₂nág₂ jan₂ dsa₂ ꞌéi₂, jaun₂ juɨn₅ i₂ca₂rë₃chá₃ dsáu₁, ján₃ bá₄ le₂në₅, ꞌuɨg₅₄ ia₁ a₂ca₂nág₂ gau₂ jan₂ tan₅₄ dsa₂, jaun₂ juɨn₅ i₂guénꞌ₂ Diú₄ në₂jag₄ bá₄ i₂ca₂jme₃ti₃.
20 Ca₂të₁ron₅₄ ꞌÉiꞌ₃ ia₁jaun₂ dsɨ₃juɨn₅₄ guë́₄ dso₄; la₁ ja₁ꞌŋio₅ lɨn₃ guë́₄ ca₂i₁juɨn₅₄ dso₄, jaun₂ ꞌŋio₅ lɨn₃ guë́₄ ca₂jmo₃ Diú₄ ca₂i₃tsón₂ a₂ꞌua₁ dsɨ́₅.
21 Jaun₂ le₂në₅ bá₄ juɨ₁liaꞌ₂ ca₂tɨ́n₂ bí₂ dso₄ juɨ₅ a₂quian₅ ꞌmú₃, le₂në₅ bá₄ ján₃ ca₂ꞌio₃ bí₂ a₂ꞌua₁ dsɨ́₅ Diú₄ a₂jág₂ jniog₄ në₂jag₄ bá₄ dsa₂ i₂ca₂jme₃ti₃, a₂cuë₃ a₂le₃chong₂ jniog₄ dse₃ co₂tan₅₄ të₂le₃ quianꞌ₅₄ Te₁guiꞌ₅₄ Jesucristo quián₂ jniog₄.