ꞌA₂ liaꞌ₂ të₂tsɨnꞌ₅₄ Abraham ne₄ Diú₄
4
¿ꞌE₂ lé₂ le₃juaꞌ₅₄ jniog₄ jaun₂ në́₃? ¿ꞌE₂ ca₂dsóꞌ₂ Abraham dsa₂ juɨnꞌ₂ quián₂ jniaꞌ₅₄ ma₂lɨ́gꞌ₂, liaꞌ₂ jme₁lɨ́in₄ dsa₂ mɨ₂güɨ́g₃?
2 Juaꞌ₅₄ meiꞌ₂ guë́₃ Diú₄ ca₂chiꞌ₃ jág₁ juaꞌ₅₄ a₂dsen₃ ꞌéi₂ të₂le₃ quianꞌ₅₄ ꞌe₂ a₂ca₂jmo₃, juaꞌ₅₄ a₂ca₂jme₃ti₃ ꞌÉiꞌ₃, jaun₂ jme₁cha₂ juɨ₅ a₂jme₁jmo₃ róin₂. La₁ on₃juaꞌ₅₄ ne₄ Diú₄.
3 Jaun₂, ¿ꞌe₂ juáꞌ₂ ne₄ Si₂? “Ca₂rë₃ꞌén₂ bá₄ Abraham jág₁ ca₂cuë₃ Diú₄; jaun₂ ꞌuɨg₅₄ ia₁ a₂ca₂rë₃ꞌéin₂ jaun₂ në́₃, ca₂guéiꞌ₂ Diú₄ në₂jag₄ bá₄ a₂ca₂jme₃ti₃.”a
4 Jaun₂ në́₃, juɨ₁liaꞌ₂ jan₂ dsa₂ i₂jme₂ti₃ ta₁ quióꞌ₅ jan₂ juɨg₅₄, cu₄ a₂lɨ́ꞌ₂ jaun₂ quióꞌ₅, on₃juaꞌ₅₄ a₂lë₁cuë₃ juɨg₅₄, ia₁ a₂ma₂rɨin₂₃ quióꞌ₅ ꞌéi₂ ꞌliaꞌ₅₄ ta₁ quióꞌ₅.
5 La₁ në₁juaꞌ₂ ꞌein₂ të₃tsá₃ ꞌe₂ jmo₂₃, ꞌéin₂ a₂guénꞌ₅ Diú₄ dsa₂ i₂cha₂ dsáu₁, Diú₄ guéiꞌ₂ quióꞌ₅ në₂jag₄ bá₄ dsa₂ dsen₃, o₄quióꞌ₄ a₂ꞌéin₂.
6 ꞌŊiog₅ bá₄ David juáꞌ₂ a₂dsen₃ juɨ₁liaꞌ₂ dsa₂ i₂guéiꞌ₂ Diú₄ në₂jag₄ bá₄ a₂tsá₃ ma₂ꞌe₂ dsáu₁ cha₂, tsá₃ ꞌe₂ ꞌí₁ con₂ Diú₄ ꞌa₂ liaꞌ₂ ca₂jme₃ti₃.
7 Ca₂juáꞌ₂ David:
ꞌE₂ guë́₄ dsen₃ juɨ₁liaꞌ₂ dsa₂ i₂ca₂ꞌén₂ Diú₄ dsáu₁,
i₂ca₂jlë́₂ Diú₄ dso₄ a₂ca₂ꞌnáu₂.
8 ꞌE₂ guë́₄ dsen₃ dsa₂ i₂ca₂jmo₃ Te₁guiꞌ₅₄ dsɨ́₅
a₂tsá₃ dso₄ rɨin₂.b
9 A₂dse₃ në₅ në́₃, ¿a₁dse₃ jmáꞌ₃ liaꞌ₂ ca₂ne₅₄ quióꞌ₅ dsa₂ i₂rë₂uɨng₄ nɨ₁lo₁, o₃ bá₄ le₂jiog₅ a₂dse₃ quióꞌ₅ i₂tsá₃ ꞌe₂ rë₂uɨng₄ quióꞌ₅ bá₄ ján₃? Ma₂në₂juaꞌ₅₄ jniaꞌ₅₄ a₂ca₂guénꞌ₂ Diú₄ Abraham në₂jag₄ bá₄ a₂ca₂jme₃ti₃ ꞌéiꞌ₃, ꞌuɨg₅₄ ia₁ a₂ꞌéin₂.
10 ¿ꞌA₂ liaꞌ₂ jme₁lɨ́n₄ Abraham liaꞌ₂ conꞌ₂ ca₂guéiꞌ₂ jaun₂? ¿Ca₂guéiꞌ₂ cang₂ liaꞌ₂ conꞌ₂ jme₁ma₂ti₃ Abraham quióꞌ₅, o₃ le₂jŋiá₅ ꞌe₂? Le₂jŋiá₅ bá₄, on₃juaꞌ₅₄ cang₂.
11 Cang₂ jaun₂ bá₄ ca₂gue₃ Abraham ꞌéiꞌ₃ jaun₂ a₂ti₃ nɨ₁lo₁₂, a₂lɨ́in₅ léi₄ co₂ꞌnióꞌ₄ caun₂ sello quióꞌ₅ Diú₄ a₂ma₂guéiꞌ₂, në₂jag₄ bá₄ dsa₂ i₂ca₂jme₃ti₃, ꞌuɨg₅₄ ia₁ a₂ꞌéin₂. Le₂në₅ bá₄ ca₂dsióg₃ Abraham a₂ca₂lɨin₃ choꞌ₅₄ ca₂le₃jɨ́n₃ i₂ꞌén₂ ján₃, o₁jŋiaꞌ₅₄ tsá₃ ma₂gue₃ ꞌéiꞌ₃ jaun₂ a₂uɨ́ng₃ quióꞌ₅. Jaun₂ le₂në₅ bá₄ guénꞌ₂ Diú₄ ján₃ dsa₂ tsɨ₁jon₂ ꞌéi₂ në₂jag₄ bá₄ a₂lɨ́in₅ dsa₂ i₂ca₂jme₃ti₃.
12 Dsau₅ bá₄ a₂lɨ́n₅ Abraham choꞌ₅₄ ca₂le₃jɨ́n₃ i₂ma₂gue₃ ꞌéiꞌ₃ jaun₂ a₂uɨ́ng₃ quióꞌ₅, la₁ on₃juaꞌ₅₄ jmáꞌ₃ ꞌuɨg₅₄ ia₁ a₂rë₂uɨng₄ quióꞌ₅; ján₃ bá₄ ꞌuɨg₅₄ ia₁ a₂quian₅ juɨ₅ a₂ꞌéin₂ jaun₂, juɨ₁liaꞌ₂ ca₂can₃ Abraham jmei₂ jniaꞌ₅₄ liaꞌ₂ conꞌ₂ tsá₃ ma₂uɨng₂ quióꞌ₅.
Të₂le₃ quianꞌ₅₄ a₂ꞌén₂ bá₄ dsa₂ jme₃ti₃ Diú₄ jág₁ quióꞌ₅ a₂ma₃cuë₃
13 Jaun₂ ca₂cuë₃ Diú₄ jág₁ quióꞌ₅ ca₂cuë́ꞌ₃ Abraham quiainꞌ₅₄ chiꞌ₂-guein₂ quiáin₅, a₂gue₃ guaꞌ₅₄ ꞌuë₃ a₂cuë₃ Diú₄; la₁ on₃juaꞌ₅₄ ia₁ a₂ca₂jme₃ti₃ Abraham ꞌÉiꞌ₃, të₂le₃ ia₁ a₂caun₂ ꞌéin₂ jág₁ a₂cuë₅ Diú₄, tonꞌ₂ ca₂guéiꞌ₂ Diú₄ në₂jag₄ bá₄ a₂ca₂jme₃ti₃ ꞌÉiꞌ₃.
14 Juaꞌ₅₄ meiꞌ₂ guë́₃ jmáꞌ₃ i₂jme₂ti₃ ꞌÉiꞌ₃ bá₄ gue₅ a₂dse₃ a₂cuë₅ Diú₄ cuë́ꞌ₅ chiꞌ₂-guein₂ quiáin₅, jaun₂ tsá₃ ma₃ꞌe₂ ta₁ tí₄ a₂ꞌén₂ dsa₂, tonꞌ₂ ján₃ guëꞌ₂ le₂jaun₂ jág₁ a₂cuë́₄ quióꞌ₅ Diú₄ tsá₃ ma₃quen₅.
15 Ia₁ juɨ₅ a₂ꞌne₂ Diú₄ bá₄ jiog₅ ꞌÉiꞌ₃, la₁ ja₁tsá₃ ꞌÉiꞌ₃ ca₂tɨ́n₂, tsá₃ ꞌein₂ dsɨ₂juɨn₅₄ ja₁jaun₂.
16 ꞌUɨg₅₄ jaun₂, o₄quióꞌ₄ a₂ꞌén₂ dsa₂ cuë₅ Diú₄ a₂dse₃ cuë́ꞌ₅ chiꞌ₂-guein₂ quiáin₅, ia₁jaun₂ chiꞌ₃ tiá₂ jág₁ a₂cuë́₄ ne₄ a₂ꞌua₁ dsɨ́₅, ia₁jaun₂ dsónꞌ₂ jaun₂ bá₄ jág₁ a₂gue₃ ca₂le₃jɨ́n₃ tsɨ₁jon₂ Abraham, on₃juaꞌ₅₄ jmáꞌ₃ quióꞌ₅ dsa₂ i₂qui₂rë₂tiꞌ₅₄ ꞌÉiꞌ₃; quióꞌ₅ ca₂le₃jɨ́n₃ i₂ꞌén₂ bá₄ ján₃ juɨ₁liaꞌ₂ jme₁ꞌén₂ Abraham. Jaun₂ ꞌéi₂ bá₄ já₅ co₂ꞌnióꞌ₄ lɨ́in₅ jmei₂ jniog₄ ca₂le₃jág₃.
17 Juɨ₁liaꞌ₂ juáꞌ₂ ne₄ Si₂: “ꞌNe₂ ma₂tsɨ́nꞌ₂ jniá₂ a₂lɨ́ngꞌ₅ choꞌ₅₄ dsa₂ chan₂ ꞌlióng₂ juɨg₂ nación.”c Jaun₂ ꞌéi₂ bá₄ i₂lɨ́n₅ jmei₂ jniog₄ ne₄ Diú₄, tonꞌ₂ ca₂ꞌéin₃ jág₁ quióꞌ₅ Diú₄ ꞌéi₂ i₂tonꞌ₂ jme₂dsí₂ dsa₂ i₂ma₂dsan₃, ján₃ guëꞌ₂ të́ꞌ₂ a₂tsá₃ ma₂cha₂ në₂jag₄ bá₄ a₂ma₂cha₂.
18 Juɨ₁ꞌe₂ guë́₃ tsá₃ ma₃ꞌe₂ jmɨg₄ jme₁ma₃cha₂ ja₁con₂ Abraham liaꞌ₂ conꞌ₂ lë́₅ lɨ́n₂ dsa₂ mɨ₂güɨ́g₃, të₂le₃ ia₁ a₂ca₂rë₃ꞌéin₂ jág₁ quióꞌ₅ Diú₄, ca₂dsióg₃ “a₂lɨ́in₅ jmei₂ dsa₂ chan₂ ꞌlióng₂ juɨg₂”, liaꞌ₂ conꞌ₂ lë́₅ ca₂juáꞌ₂ Diú₄: “co₂në₅ tén₅ chiꞌ₂-guein₂ dsióꞌ₂ lé₂.”d
19 Juɨ₁ꞌe₂ guë́₃ jme₁ma₂ꞌen₅₄ Abraham conꞌ₂ ꞌŋiá₂-láu₂ ŋi₂, líꞌ₄ bá₄ ꞌŋiog₅ a₂ma₂guenꞌ₂ nɨ₁ŋɨ₁₂, ján₃ guëꞌ₂ le₂jaun₂ Sara quiáin₅ në́₃ co₂në₅ a₂ma₂chain₂ dsiáin₃ bá₄, tsá₃ ma₃ꞌein₂ guein₂ lé₂ le₃cáin₂, la₁ tsá₃ ca₂ꞌuáin₂ quianꞌ₅₄ jág₁ a₂ma₂chanꞌ₂.
20 Tsá₃ ca₂ꞌág₂ caun₂-tɨn₃ dsɨ́₅ juaꞌ₅₄ a₂tsá₃ ꞌéin₂ jág₁ a₂ca₂cuë₃ Diú₄, të₂le₃ ca₂i₃tsón₂ bá₄ bí₂ a₂ꞌéin₂, tonꞌ₂ ca₂jme₃juɨinꞌ₂ Diú₄,
21 caun₂ bá₄ ꞌei₅ dsɨ́₅ a₂ꞌio₅ Diú₄ juɨ₅bí₂ a₂jme₃ti₃ jág₁ quióꞌ₅ a₂ca₂cuë₃.
22 ꞌUɨg₅₄ jaun₂ ca₂guéiꞌ₂ Diú₄ në₂jag₄ dsa₂ i₂ca₂jme₃ti₃.
23 Jág₁ në₅, “a₂ca₂guéiꞌ₂ Diú₄”, ca₂i₃toꞌ₅₄ ne₄ si₂, on₃juaꞌ₅₄ a₂ꞌɨin₂₃ jmáꞌ₃ Abraham;
24 a₂ꞌag₂₃ jniog₄ bá₄ ján₃. ꞌUɨg₅₄ ia₁ a₂ꞌéin₂ jniog₄, guéiꞌ₂ Diú₄ a₂lág₅ jniog₄ në₂jag₄ bá₄ dsa₂ dsen₃ i₂ca₂jme₃ti₃ conꞌ₂ i₂ꞌén₂ të₂le₃ quióꞌ₅ Diú₄ i₂ca₂jme₃jenꞌ₅₄ Jesús jɨn₄ ꞌlag₄. Jesús bá₄ i₂lɨ́n₅ Te₁guiꞌ₅₄ quián₂ jniog₄,
25 i₂ca₂jɨ́nꞌ₂ dsa₂ a₂jóin₂ ne₄ ꞌuɨg₅₄ dsáu₁ jniog₄, conꞌ₂ siáꞌ₂ ca₂jeinꞌ₅₄ táng₃ ia₁jaun₂ guéiꞌ₂ Diú₄ jniog₄ në₂jag₄ dsa₂ dsen₃ i₂ca₂jme₃ti₃.