3
Jaun₂ në́₃, ¿ꞌe₂ ta₁ jmo₅ a₂quen₅ guë́₄ a₂lɨ́n₅ dsa₂ dsa₂ judío? ¿O₃ ꞌe₂ ta₁ jmo₅ a₂lɨ́n₅ dsa₂ léi₄ a₂rë₂uɨng₄ nɨ₁lo₁₂?
2 ꞌLióng₂ bá₄ ꞌuɨg₅₄ cha₂. Jë₁le₂ꞌuɨg₅₄, ca₂dsia₃ Diú₄ jág₁ dse₃ quióꞌ₅ o₄gú₃ dsa₂ judíos.
3 ¿La₁ ꞌe₂ bá₄ lé₂ në́₃ në₁juaꞌ₂ chan₂ i₂lɨn₅₄ i₂tsá₃ ca₂rë₃tiꞌ₅₄?a ¿O₃ bá₄ lɨ́nꞌ₂ ꞌniaꞌ₂ ján₃ a₂tsá₃ le₃tiꞌ₅₄ Diú₄ jág₁ quióꞌ₅ ia₁ a₂tsá₃ ca₂rë₃tiꞌ₅₄ dsa₂ ꞌéi₂?
4 ¡Dsónꞌ₂ bá₄ tsá₃ le₂jaun₂! Juɨ₁le₂lei₅₄ bá₄ jniog₄, Diú₄ në́₃ jmo₃ bá₄ ca₂le₃jë́₃ liaꞌ₂ conꞌ₂ lë́₅ jág₁ tí₅ quióꞌ₅, juɨ₁ꞌe₂ guë́₃ ca₂le₃jɨ́n₃ dsa₂ tsá₃ tí₅ jág₁ quióꞌ₅; ia₁ ne₄ Si₂ juáꞌ₂:
ia₁jaun₂ le₃líꞌ₄ dsa₂ a₂lɨ́ngꞌ₅ i₂dsen₃
juɨ₁liaꞌ₂ jë₁dsiaꞌ₂ jág₁,
ia₁jaun₂ bá₄ léngꞌ₂
jë₁ma₂të́₂ rë₁con₂ dsa₂ ꞌí₁ ja₁congꞌ₂.b
5 La₁ në₁juaꞌ₂ tí₅ ta₁ dsáu₁ jniog₄ a₂rë₂jniá₂ Diú₄ a₂lɨ́in₅ i₂dsen₃, ¿ꞌe₂ le₃juaꞌ₅₄ jniog₄ në́₃? ¿ꞌAn₁ tsá₃ rë₂ qui₃dsɨ₅ Diú₄ ꞌéiꞌ₃ në₁juaꞌ₂ ca₂rë₃ꞌnéi₃ ꞌë́₂ uɨg₅ ja₁con₂ jniog₄? (A₂lë₁juáꞌ₅ jniá₂ liaꞌ₂ jë₁juáꞌ₂ dsa₂ mɨ₂güɨ́g₃ bá₄.)
6 ¡Dsónꞌ₂ bá₄ on₃juaꞌ₅₄ le₂në₅! Ia₁ juaꞌ₅₄ meiꞌ₂ guë́₃ tsá₃ rë₂ qui₂dsɨ₅ Diú₄ ꞌéiꞌ₃, ¿ꞌa₂ bá₄ liaꞌ₂ le₃con₂ ꞌí₁ ja₁con₂ dsa₂ mɨ₂güɨ́g₃?
7 La₁ në₁juaꞌ₂ jág₁ të₂jág₁ quió₃ tí₅ ta₁ ia₁jaun₂ lë́₅ a₂rë₂jniá₂ guë́₄ jág₁ dsau₅ quióꞌ₅ Diú₄ ia₁jaun₂ të₂le₃ dse₃ guë́₄ chéinꞌ₅, ¿ꞌe₂ lë₃ qui₂dsɨ₅ Diú₄ ꞌéiꞌ₃ a₂rɨn₂ jniá₂ dso₄?
8 ¿Ja₁lɨn₃ guë́₄ dse₃ juaꞌ₅₄ caun₂ a₂jmo₅₄ a₂ꞌlɨgꞌ₅₄, ia₁jaun₂ jiá₃ a₂dse₃? A₂le₂në₅ bá₄ chi₂ꞌag₅ i₂lɨn₅₄ ꞌag₂₃ jniaꞌ₅₄ a₂jme₂tɨ́n₂ jniaꞌ₅₄ dsa₂. La₁ gue₃ bá₄ uɨg₅ dsa₂ i₂dsɨ₂jiog₅ dsɨ́₅ le₂në₅ ꞌa₂ conꞌ₂ ca₂tɨ́in₂.
Ca₂le₃jág₃ bá₄ jniog₄ rë₂cáuꞌ₄ dso₄
9 ¿ꞌE₂ jaun₂ në₃? ¿A₂dse₃ guë́₄ tióng₂ jniaꞌ₅₄ dsa₂ judíos? ¡Dsau₅ bá₄ on₃juaꞌ₅₄ le₂jaun₂! Ia₁ ma₂të₂tsɨꞌ₅₄ jág₁, co₂jaun₂ bá₄ dsa₂ judíos conꞌ₂ dsɨ₂nau₂, caun₂ bá₄ juɨ₅ tioinꞌ₅₄ ꞌuɨg₅₄ dsáu₁.
10 Lë́₅ juɨ₁liaꞌ₂ juáꞌ₂ ne₄ Si₂:
Ca₂liaꞌ₂ ꞌi₁jan₂ dsa₂ tsá₃ chan₂
i₂jme₂ti₃ ꞌÉiꞌ₃ quióꞌ₅ Diú₄,
ca₂liaꞌ₂ ꞌi₁jan₂ tsá₃ chan₂;
11 tsá₃ i₂chan₂ juaꞌ₅₄ i₂ŋɨ́ꞌ₂ dsɨ́₅,
ꞌi₁jan₂ tsá₃ chan₂ juaꞌ₅₄ i₂ꞌnio₃ ꞌnaꞌ₂ Diú₄.
12 Ca₂le₃jɨ́n₃ bá₄ ma₂i₂nio₄ cau₅ juɨ₅ ma₂i₂cóinꞌ₅,
co₂dsia₅ bá₄ ma₂i₃léin₂ juɨ₅ ja₁tsá₃ ta₁ tí₄.
Tsá₃ ꞌein₂ chan₂ ca₂liaꞌ₂ ꞌi₁jan₂
juaꞌ₅₄ i₂qui₂jmo₅ a₂dse₃,
ca₂liaꞌ₂ ꞌi₁jan₂ tsá₃ chan₂.c
13 ꞌUë́ꞌ₅ jág₁ ꞌlɨgꞌ₅₄ le₂ꞌo₅₄
juɨ₁liaꞌ₂ ja₂ dsí₂ ꞌlɨgꞌ₅₄ a₂ꞌuë́ꞌ₅ tau₂ ꞌŋio₅ a₂rë₂na₄;
quianꞌ₅₄ le₁tsɨꞌ₂ jmo₂₃ a₂juɨ₁gain₂.d
Në₂jag₄ bá₄ náu₁ dsɨ₂mɨꞌ₂ ꞌa₄ mɨ₂ꞌo₅₄;e
14 Jmáꞌ₃ caun₂ a₂jaun₂ bá₄ juáꞌ₂ dsa₂,
a₂uɨg₅ dsɨ́₅, a₂jme₃dsiꞌ₃ ja₁con₂ rɨinꞌ₅₄;f
15 Ma₂në₃ bá₄ i₂ŋɨi₂₃ cán₂ tag₅₄
a₂dsɨ₃jme₁dsiain₂₃ rɨinꞌ₅₄.
16 Léi₄ jë₁ca₂ŋɨi₅ ca₂quiog₂ caun₂ juɨ₅ a₂o₂i₁ dsɨ₅,
ja₁i₃ꞌén₂ ꞌa₂ liaꞌ₂ chan₂ dsa₂;
17 ia₁ tsá₃ cuɨ́ꞌ₅ dsa₂ ꞌéi₂ juɨ₅ ꞌei₅ tei₄;g
18 Tsá₃ a₂jaun₂ dsɨ₂jiog₅ dsɨ́₅
juaꞌ₅₄ a₂gain₃ Diú₄.h
19 A₂ne₄ bá₄ jniog₄, ca₂le₃jë́₃ jág₁ a₂tioꞌ₅₄ ne₄ Si₂ ꞌÉiꞌ₃ quióꞌ₅ Diú₄, a₂juáꞌ₂ tsɨ́ꞌ₅ ca₂le₃jɨ́n₃ i₂ca₂tɨ́n₂ ꞌÉiꞌ₃ jaun₂, ia₁jaun₂ jmo₃ tei₄ mɨ₂ꞌo₄ ca₂le₃jɨ́n₃, ia₁jaun₂ ca₂le₃jɨ́n₃ dsa₂ mɨ₂güɨ́g₃ të₃tsɨinꞌ₅₄ rë₂cáinꞌ₄ ne₄ Diú₄.
20 Ia₁ ca₂liaꞌ₂ ꞌi₁jan₂ tsá₃ ꞌein₂ jɨ́n₂ Diú₄ a₂tsá₃ dso₄ rë₂cáinꞌ₄ juaꞌ₅₄ a₂jme₃ti₃ a₂juáꞌ₂ ꞌÉiꞌ₃, ia₁ ꞌŋiog₅ bá₄ ꞌÉiꞌ₃ quíꞌ₅ ta₁ a₂le₃ne₄ jniog₄ a₂lág₅ dsa₂ cha₂ dsáu₁.
A₂lión₂ dsa₂ të₂le₃ a₂jŋiaꞌ₅₄ quianꞌ₅₄ a₂ꞌéin₂ bá₄
21 La₁ në₃ në́₃, ma₂ca₂jme₃jnia₅ bá₄ Diú₄ juɨ₅ a₂tsá₃ ma₃dso₄ rë₂cáuꞌ₄ jniog₄, on₃juaꞌ₅₄ të₂le₃ quianꞌ₅₄ Si₂ ꞌÉiꞌ₃, juɨ₁ꞌe₂ guë́₃ jángꞌ₅ jág₁ dsau₅ juɨ₅ jaun₂ a₂juáꞌ₂ ne₄ Si₂ tioꞌ₅₄ ꞌÉiꞌ₃, quianꞌ₅₄ Si₂ a₂qui₂ca₂jmo₃ dsa₂ i₂jme₁ꞌë́₂ jág₁ quián₅ Diú₄ në́₃.
22 Jángꞌ₅ jág₁ dsau₅ juɨ₅ dse₃ quióꞌ₅ Diú₄ a₂tsá₃ dso₄ rë₂cánꞌ₄ dsa₂, jŋiaꞌ₅₄ liaꞌ₂ të₂le₃ quianꞌ₅₄ a₂ꞌéin₂ të₂le₃ quióꞌ₅ Jesucristo; tsá₃ jma₃quén₅ jmo₂₃ ja₁con₂ juɨ₁ꞌein₂ guë́₃;
23 ia₁ ca₂le₃jɨ́n₃ bá₄ ma₂qui₂ma₂ꞌnáu₂ dso₄, jaun₂ uɨ́ng₂ lɨn₃ bá₄ tióin₂ ja₁qui₂tág₅ co₂ꞌnéꞌ₅ quióꞌ₅ Diú₄.
24 La₁ Diú₄ në́₃, ia₁ a₂ꞌua₁ dsɨ́₅ bá₄ ꞌë́₂ jág₁ a₂tsá₃ dso₄ rë₂cáinꞌ₄, on₃juaꞌ₅₄ a₂ꞌnióꞌ₅ quí₃ ꞌliaꞌ₅₄. A₂lë₁lió₂ bá₄ të₂le₃ quianꞌ₅₄ Cristo Jesús i₂ca₂quí₃ o₄quióꞌ₄ dsáu₁ dsa₂.
25 Ca₂chenꞌ₃ Diú₄ ja₁ŋiꞌ₅₄ ia₁jaun₂ dsian₅ dsáu₁ dsa₂ mɨ₂güɨ́g₃ quianꞌ₅₄ jmɨ₂ ꞌain₅₄ a₂ca₂tein₃. A₂lë₁gue₅ bá₄ dsa₂ a₂jaun₂ jmáꞌ₃ të₂le₃ quianꞌ₅₄ a₂ꞌéin₂. Le₂në₅ ca₂rë₃jniá₂ Diú₄ i₂lɨ́n₅ i₂qui₃dsɨ₅ ꞌéiꞌ₃ rë₂, ia₁ a₂ma₂ca₂jme₃juɨinꞌ₂ dsɨ́₅ a₂ma₂ca₂ŋág₃ bá₄ dsáu₁ dsa₂ a₂jme₁ꞌno₂₃ ma₂lɨ́gꞌ₂.
26 Le₂në₅ ca₂jmo₃ Diú₄ a₂ca₂jme₃jniai₂₃ a₂rë₂ qui₃dsɨ₂₃ ꞌéiꞌ₃, a₂ca₂jme₃jniai₂₃ a₂jɨ́in₂ dsa₂ i₂ꞌén₂ të₂le₃ quióꞌ₅ Jesús në₂jag₄ bá₄ a₂ca₂jme₃ti₃.
27 ¿ꞌE₂ bá₄ ca₂lë₃ jaun₂ në́₃ quianꞌ₅₄ a₂jmo₅ dsa₂ táinꞌ₅? Co₂dsia₅ të₂tsɨꞌ₅₄ cau₅ bá₄ a₂jaun₂. ¿ꞌE₂ ꞌuɨg₅₄? ¿ꞌAn₁ ꞌuɨg₅₄ a₂jme₃ti₃ dsa₂ ꞌÉiꞌ₃? Jan₂ꞌón₄. ꞌUɨg₅₄ ia₁ a₂ꞌén₂ bá₄ dsa₂.
28 Ma₂në₂quiong₅₄ bá₄ jniog₄ ꞌí₁ jaun₂ në́₃, a₂jɨ́n₂ Diú₄ dsa₂ në₂jag₄ bá₄ a₂ca₂jme₃ti₃, ꞌuɨg₅₄ ia₁ a₂ꞌéin₂, jaun₂ tsá₃ ꞌe₂ ꞌí₁ con₂ guë́₄ juaꞌ₅₄ a₂ca₂jme₃ti₃ o₃ tsá₃ ca₂jme₃ti₃ ꞌe₂, conꞌ₂ lë́₅ ꞌÉiꞌ₃.
29 ¿O₃ bá₄ lɨ́n₅ Diú₄ ca₂ne₅₄ jmáꞌ₃ i₂quián₅ dsa₂ judíos? ¿On₁juaꞌ₅₄ i₂quián₅ dsɨ₂nau₂ ján₃? Ján₅. I₂quián₅ ꞌéi₂ bá₄ ján₃,
30 ia₁ jan₂ tan₅₄ bá₄ Diú₄ chan₂; jaun₂ ꞌéi₂ bá₄ jág₃ jɨ́n₂ dsa₂ i₂rë₂uɨng₄ nɨ₁lo₁* në₂jag₄ bá₄ a₂ca₂jme₂ti₃, ꞌuɨg₅₄ ia₁ a₂ꞌéin₂; ján₃ bá₄ le₂jaun₂ jág₃ jɨ́in₂ dsa₂ i₂tsá₃ rë₂uɨng₄ nɨ₁lo₁ në₂jag₄ bá₄ a₂ca₂jme₃ti₃, o₄quióꞌ₄ a₂ꞌéin₂.
31 ¿ꞌE₂ juaꞌ₂ jniog₄ jaun₂ në́₃? ¿A₂tsá₃ ta₁ tí₄ ꞌÉiꞌ₃ ia₁ a₂ꞌéin₂ jniog₄? ¡Dsónꞌ₂ tsá₃ le₂jaun₂! ꞌNióꞌ₄ të₂le₃ cuë₂ bá₄ jniog₄ bí₂ a₂quen₅ ꞌÉiꞌ₃.